ဘာသာရေးအကြောင်းပြ အကြမ်းဖက်မှုများကို ဆန့်ကျင်ကြပါစို့

မေလ ၃၁ ရက် ၂၀၁၃ ခုနှစ်

လူသားတိုင်းအတွက် မွေးရာပါ အခြေခံလူ့အခွင့်အရေးတွင် လွတ်လပ်စွာယုံကြည်ခွင့်၊ လွတ်လပ်စွာ ကိုးကွယ်ခွင့်နှင့် အခြားလူမျိုးတို့၏ ယုံကြည်မှုတို့ကို လေးစားမှုရှိရပေမည်။ လားရှိုးမြို့တွင် လက်ရှိဖြစ်ပွား
နေသော အကြမ်းဖက်မှုများ၊ ပစ္စည်းဥစ္စာ အဆောက်အဦးများ၊ ဘာသာရေးဆိုင်ရာ အဆောက်အဦးများကို ပစ်မှတ်ထား ဖျက်ဆီးနေမှုများသည် လူ့အခြေခံအခွင့်အရေးကို ချိုးဖောက်မှုဖြစ်သည်။

နိုင်ငံသားတိုင်း အေးချမ်းလုံခြုံစွာ နေထိုင်နိုင်ရေးမှာ နိုင်ငံတစ်နိုင်ငံ ရပ်တည်ဖြစ်ထွန်းမှု၏ အခြေခံဖြစ် ပေသည်။ နိုင်ငံ၏ စီးပွားရေး တည်ငြိမ်တိုးတက်ကောင်းမွန်ရန်မှာ နိုင်ငံသားတိုင်း အခြေခံလူ့အခွင့်
အရေးကို အေးချမ်းတည်ငြိမ်စွာဖြင့် ရရှိမှုတွင် အများအပြား မူတည်နေသည်။

မြန်မာနိုင်ငံ ဒီမိုကရေစီ ပြုပြင်ပြောင်းလဲမှု လမ်းကြောင်းပေါ် လျောက်လှမ်းရန်ကြိုးစားနေ ချိန်တွင် နိုင်ငံတကာအသိုင်းအဝိုင်းက မြန်မာနိုင်ငံအတွင်း ဘာသာရေး အကြမ်းဖက်မှုများကို စိုးရိမ်ပူပန်စွာ အနီးကပ်စောင့်ကြည့်နေ သည်။ မြန်မာနိုင်ငံ စီးပွားရေး ပြန်လည်ဖွံ့ဖြိုးတိုးတက်လာရန်မှာ နိုင်ငံခြား ရင်းနှီးမြုပ်နှံသူများအတွက် စိတ်ချရသော အခြေနေများ ကို ဖန်တီးပေးရန် အရေးကြီးသည်။

လုံခြုံရေးများ ချထားသည့်ကြားထဲက လမ်းမများပေါ်တွင် ဆိုက်ကယ်၊လူအုပ်စုလိုက် များဖြင့် တုတ်တရမ်းရမ်း၊ ဓါးတလှမ်းလှမ်းဖြင့် ဥပဒေမဲ့ ပြုလုပ်နေသည်မှာ ဥပဒေ စိုမိုးရေးအတွက် တာဝန်ရှိသူများ မျက်မှောက်တွင် ပင် ဖြစ်ပွားနေပေသည်။ တာဝန်အရှိဆုံးမှာ နိုင်ငံတော်အစိုးရ ဖြစ်ပေသည်။ အကြမ်းဖက်မှုများကို ထိရောက်စွာ မတားဆီး၊ မနှိမ်နင်းနိုင်ပါက အစရအား ပြည်သူလူထု၏ ယုံကြည် မှု လျော့လာလိပ်မည် ဖြစ်သည်။ သို့ရာတွင် အစိုးရတစ်ခုတည်းဖြင့် မပြီးပါ။ နိုင်ငံသားတိုင်းမှာ မိမိနိုင်ငံ အေးချမ်းသာယာဖွံ့ဖြိုးရေး၊ နိုင်ငံသားတိုင်း အေးချမ်းသာယာစွာနေနိုင်ရေး တို့အတွက် ကိုယ်စီ တာဝန်ရှိကြပါသည်။

ထိုအကြမ်းဖက်မှုများကို ပြင်းပြင်းထန်ထန်ဆန့်ကျင်ပြီး အရေးယူဆောင်ရွက်ရန် မြန်မာနိုင်ငံသားတိုင်းတွင် တာဝန်ရှိသည်။ ငါနှင့်မဆိုင်လို့၊ ငါနှင့်မတည့်လို့၊ ငါနှင့် ဘာ သာမတူလို့ စသဖြင့် အကြောင်း အမျိုးမျိုးပြပြီး ဆိတ်ဆိတ်နေလျှင် ငါ့အလှည့်ရောက်လျှင် နောက်ကျသွားလိမ့်မည်။ အကြမ်းဖက်မှုက ငါ့ဘက်လှည့် လာသည့်အခါ ငါတစ်ယောက်တည်းပဲ ကျန်နေတော့မည်။

အထူးသဖြင့် လူနည်းစုများအား နိုင်ငံသားတိုင်း၏ တန်းတူအခွင့်အရေးဖြင့် ကာကွယ်စောင့်ရှောက်ရန် အရေးကြီးပေသည်။ အကြမ်းဖက်မှုများ၏ နောက်ကွယ်တွင် ကြိုးကိုင်လှုံ့ဆော်နေသူများ၊ အုပ်စုများ ရှိ၊ မရှိအားလည်း သက်ဆိုင်ရာ လုံခြုံရေး အဖွဲ့အစည်းများအနေနှင့် တရားဥပဒေနှင့်အညီ မှန်မှန်ကန်ကန် စုံစမ်းဖော်ထုတ်သင့်ပြီး ထိုသူများ၊ ထိုအုပ်စုများရှိပါက တည်ဆဲဥပဒေများအရ တိတိကျကျ လျင်လျင်မြန်မြန် အရေးယူသင့်သည်။

Ref: မဇ္ဈိမ

Read More...

Collapse...

ရွာခရိုးက ရွှေချိုးကူသံ

မေလ ၂၉ ရက် ၂၀၁၃ ခုနှစ်

အခုတလော ငြိမ်းချမ်းရေးအကြောင်းပြောတဲ့အသံတွေ တော်တော်လေး ကြားလာရတယ်။ နှစ်ပေါင်းများစွာ ငြိမ်းချမ်းရေးစကားသံနဲ့ ဝေးနေခဲ့တော့ ငြိမ်းချမ်းရေးလို့ ဆိုလိုက်တာနဲ့ လူတွေ လန်းလန်းဆန်းဆန်း
ဖြစ်သွားစေတယ်။

လူထုကတော့ နှစ် ၆ဝကျော် ကြာမြင့်ခဲ့ပြီဖြစ်တဲ့ လွတ်လပ်ရေးရဲ့ ဖွားဘက်တော် ပြည်တွင်းစစ်ကို အဆုံး သတ်ချင်ပြီ။ ဒါကြောင့်မို့ အခြေအနေပေးရင် ပေးသလောက် ငြိမ်းချမ်းရေး တောင်းဆိုလှုပ်ရှားမှုကို လုပ်ခဲ့ကြတာပဲ။ ဒီတခါအခွင့်အခါ သာလာပုံက ငြိမ်းချမ်းရေးအသံက လွှတ်တော်ထဲအထိ ဝင်လာခဲ့တယ်။ ရွာခရိုးက ရွှေချိုးကူသံက နေပြည်တော်အထိ ချဉ်းကပ်လာနေပြီလို့တောင် ပြောလို့ရမလားပဲ။

အခုဆိုရင် ပြည်တွင်းငြိမ်းချမ်းရေးနဲ့ပတ်သက်ပြီး အစိုးရရဲ့ ဆောင်ရွက်မှုတွေဟာ လွန်လေပြီးသော ခေတ်က ငြိမ်းချမ်းရေး ဆောင်ရွက်မှုတွေနဲ့ နှိုင်းယှဉ်ရင် လက်တွေ့ ပိုကျလာတာကို တွေ့ရတယ်။ ဥပမာ အပစ်အခတ် ရပ်စဲရေးတင် ရပ်မထားပဲ နိုင်ငံရေးအရပါ ဆွေးနွေးဖို့ ပြောလာကြတယ်။ တကယ်တော့ စစ်ပွဲတွေဟာ နိုင်ငံရေးကြောင့် ဖြစ်လာရတာဖြစ်လို့ နိုင်ငံရေးအရ မဖြေရှင်းရင် ဘယ်ငြိမ်းချမ်းရေးဆောင် ရွက်မှု အစီစဉ်မဆို အချိန်မရွေး ကျိုးပဲ့သွားရမှာပဲ။

ကျွန်တော်တို့တိုင်းပြည်မှာ ဖွဲ့အစည်းပုံအခြေခံဥပဒေပြင်ဆင်ဖို့ စိုင်းပြင်းနေကြတဲ့အချိန် လွတ်လပ်တဲ့ စီးပွားရေးစံနစ် ထူထောင်နေတဲ့အချိန်မျိုးမှာ စစ်ဆန့်ကျင်ရေး ငြိမ်းချမ်းရေး တောင်းဆိုလှုပ်ရှားကြတာ
ကောင်းပါတယ်။ ဘာကြောင့်လဲဆိုတော့ စစ်လိုလားသူများ ဒီနိုင်ငံမှာ ရှိနေခဲ့လျှင် အဲဒီ အခြေခံဥပဒေရဲ့ အားနည်းချက်နဲ့ စီးပွားပျက်ကို အကြောင်းပြုပြီး အချိန်မရွေး နောက်ပြန်လှည့်သွားနိုင်လို့ပါပဲ။

ကျွန်တော်တို့ရဲ့ အန္တိမကိစ္စက စစ်ပွဲတွေမဟုတ်ဘူး။ ငြိမ်းချမ်းရေးပါ။ မတတ်သာလို့သာ စစ်တိုက်ခဲ့ကြ ရတယ်လို့ ပြောမယ်ဆိုရင် အခု တတ်သာတဲ့လမ်းမြင်ရင် အဲဒီလမ်းကိုလည်း အသုံးချသင့်ရင် ချကြရမှာပဲ။ ကျွန်တော်တို့ရဲ့ ရည်မှန်းချက်ပန်းတိုင်က အမြှောက်ဆံတွေ မဟုတ်ဘူး။ ချိုးငှက်လွှတ်ပွဲတော်ပါ။

အခုဆိုရင် တိုင်းရင်းသားလက်နက်ကိုင် အဖွဲ့တွေကလည်း ရေတိုငြိမ်းချမ်းရေး အတုအယောင်ကိုပယ်ပြီး ထာဝရငြိမ်းချမ်းရေးလမ်းကိုပဲ တောင်းဆိုနေပြီ။ လွှတ်တော်ထဲမှာတောင်မှ ပြည်တွင်းငြိမ်းချမ်းရေးစကား တရားဝင် ပြောနေဆိုနေကြရပြီ။ ပြောလို့ဆိုလို့ ရလာနေပြီ။ ဒါဟာအခြေအနေနဲ့ အချိန်အခါက ပြည်တွင်း ငြိမ်းချမ်းရေးအတွက် လမ်းခင်းပေးနေတဲ့သဘောပဲ။ ကျွန်တော်တို့အားလုံး လူထုရဲ့ ပြည် တွင်းငြိမ်း ချမ်းရေး တောင်းဆိုဖို့ ထောင်လိုက်တဲ့ အလံတော်အောက် ဝင်ပြီးရပ်ကြရပါလိမ့်မယ်။

ရွှေချိုးကူသံက ရွာခရိုးတင်မက ရွာထိပ်အထိရောက်လာနေပြီ။ ကျွန်တော်တို့ တစ်တိုင်းတစ်ပြည်လုံး အတိုင်းအတာနဲ့ ကျင်းပနိုင်တဲ့ ချိုးငှက်လွှတ်ပွဲကြီးဖြစ်လာအောင် အမြန်ဆုံးချိတ်ဆက် လုပ်ကိုင်ကြရပါ လိမ့်မယ်။

Ref: မဇ္ဈိမ

Read More...

Collapse...

အဆိပ်လည်း အစာ၊ အစာလည်း အဆိပ်

သစ္စာနီ
February 25, 2013

လူတိုင်း အသက်ရှည်လိုကြသည်။ အသက်ရှည်ခြင်း၏ အကြောင်းတရား ၄ ပါး အဖြစ် ကံ၊ စိတ်၊ ဥတု၊ အဟာရ ဟု ပြဌာန်းထားရာ အစားအစာဟု ဆိုရမည့် အာဟာရသည် မည်မျှ အရေးကြီးကြောင်း သိနိုင်သည်။ “အစားမတော် တလုပ်” ဆိုသော စကားနှင့်လည်း သတိပေးထား သေးသည်။ မြန်မာလူမျိုးများသည် ရှေးယခင်အခါများကပင် ဓာတ်စာဟူ၍ ရာသီ စာကို ကြည့်ကာ ချင့်ချိန်စားသောက်လာကြသော ဓလေ့ရှိသည်။ ဒါကြောင့် “ဆေးလည်းအစာ အစာလည်းဆေး” ဟု ဆိုရိုး စကားရှိခဲ့သည်။ ယခုတော့ ထိုစကားကို “အဆိပ်လည်း အစာ အစာလည်း အဆိပ်”ဟု ပြောင်းလဲရမည့် အခြေ အနေ ရောက်နေသည်။ ကျနော်တို့သည် အကြောင်း အမျိုးမျိုးကြောင့် (ကျနော် အပါအ၀င်) စားသုံးရန် လုံးဝ မသင့်တော်သော အစားအစာများကို ပါးစပ်မှတဆင့် ခန္ဓာကိုယ်အတွင်းသို့ မလွှဲသာ မရှောင်သာ သွတ်သွင်းနေကြရသည်။


မနက်မိုးလင်းလျှင် လူအများစုမှာ လက်ဖက်ရည်ဆိုင် ထိုင်ကာ လက်ဖက်ရည် တခွက်နှင့် အီကြာကွေး တချောင်းတော့စား သောက်လေ့ရှိသည်။ အီကြာကွေး ကြော်သော ဆီမှာ စားသုံးရန် မသင့်တော်သော စားအုန်းဆီ ဖြစ်ရုံသာမက အထပ်ထပ်ကြော်ထားသဖြင့် မည်းနက်၍ပင်နေသည်။ တခါကြော်ပြီးဆီကို ထပ်မသုံးသင့်၊ သွန်ပစ်ရမည် ဆိုသော အသိ မရှိ။ သိလျှင်လည်း စီးပွားရေးအရ တွက်ခြေမကိုက်သဖြင့် လိုက်နာမည် မထင်။ မကြာခင်ကပင် ထိုဆီထဲ၌ ပလပ်စတစ် ရေသန့်ဗူးခွံတွေ ထည့်သွင်း အသုံးပြုနေတာ ကြားလိုက်ရသေးသည်။ အကြော် ကြာရှည် မာကျွတ်နေဖို့ ထည့်ကြော်တာဟု ဆို၏။

ရက်ပိုင်းကပင် ထန်းခြောက်ပင်က စားသုံးသူ တဦးက သူစားသော အီကြာကွေးမှာ “သေး”စော်နံနေသည်ဟု လာတိုင်ကြားသဖြင့် စားသုံးသူ ကာကွယ်ရေး အသင်းက စစ်ဆေးကြည့်ရာ အီကြာကွေးထဲတွင် ပွဆေးအဖြစ် မိုးနီးယား (Mxs gas) တွေ ပါဝင်နေတာ တွေ့ရသည်။ ထို ဂက်စ်မှာ အဲယားကွန်း၊ ရေခဲသေတ္တာများတွင်သာ သုံးရသည့် gas ဖြစ်သည်။ ကျနော်သည် ဆိုင်တွင် ရှယ် ခေါ် ဗူးနို့ဆီ လက်ဖက်ရည်သာ သောက်လေ့ရှိသည်။ ကိန်းခန်းကြီးသော ကြောင့် မဟုတ်။ ချက်နို့ဆီဖြင့် ဖျော်သော ရိုးရိုးလက်ဖက်ရည် သောက်လျှင် မကြာခဏ ကြွက် သေပုပ်စော် အနံ့ရသောကြောင့် ဖြစ်သည်။ ချက်နို့ဆီ ကြာရှည်ခံအောင် ဖော်မလင်ဆေး ထည့်သွင်းထားသောကြောင့် ဟုဆိုသည်။

လက်သုပ်စာ စားမည် ဆိုလျင်လည်း အသုံးပြုသော ငရုတ်ရည်မှာ ဆန်ကွဲဆန်ကျိုးကို ကြိုကာ အသိုးခံ အချဉ်ဖောက်ထား ပြီး အနီရောင်ဆေး ဆိုးထားသော အချဉ် ဖြစ်နေ၏။ ထို အထဲတွင် အချိုမှုန့်ကို အစိမ်းလိုက် ဖြူးလိုက်သေးသည်။ အချိုမှုန့် ဆိုသည်မှာ ပွက်ပွက်ဆူနေသော ရေထဲတွင် အနည်းငယ်မျှသာ ခပ်သုံးရသော အရာ ဖြစ်သည်။ (ကျနော် ငယ်ငယ်က အချိုမှုန့် မရှိ။ ဟင်းချိုချက်လျှင် ပုဇွန်ခြောက်ကောင်း လက်တဆုပ်လောက် ထည့်လိုက်ရုံသာ။ အခုခေတ် တော်ရုံလူ မသုံးနိုင်တော့။ အများစုမှာ လွယ်ကူ သက်သာရာကိုပင် မရှောင်သာ မလွှဲသာ သုံးနေရသည့်အခြေ ရောက်နေသည်။)

ဆင်းရဲသားသုံး ငပိမှာ ဖွဲနုများကို အရောင်ဆိုးထားခြင်းသာ။ ငံပြာရည်မှာလည်း အရောင်ဆိုးထားသော ဆားရည်ကျိုသာ။ မှိုတက်နေသော ငရုတ်သီးတောင့်များနှင့် ချည်ဆိုးဆေး ဆိုးထားသော မျှစ်များ၊ ပြီးတော့ ငှက်ပျောသီး၊ သရက်သီး ဆိုတာ လည်း နုနုလေးတွေ ခူးကာ ဆေးအုပ်၍ ရင့်မှည့်စေသဖြင့် မူလ အရသာမရှိ။ မကြာခင်က ပင် စားသုံးရန် မသင့်သော တဖက်နိုင်ငံမှ တင်သွင်းသည့် ကြက်သား၊ အမဲသား (ရေခဲရိုက် အေးခဲထားသည့်) များကို ရှာဖွေ ဖမ်းဆီးနေရသော သတင်း ဖတ်လိုက်ရသည်။ ပုဇွန်လည်း ပါသည်။ ပညာပေး ကာလ ၂ လ အတွင်းမှာ သိန်း ၂၆၀ ဖိုး ဖမ်းမိသည်ဟု ဆိုသည်။ နယ်စပ်ကုန်သွယ်ရေးက ဖမ်းဆီးခြင်း ဖြစ်သည်။

ဖေဖော်ဝါရီ ၁၂ ဟုမ္မလင်း ယက်ဖ ကျေးရွာတွင် သစ်ပါးလွှာစက်ရုံမှ ၀န်ထမ်းများ မနက်စာ စားရင်း အစာအဆိပ်သင့် သဖြင့် လူ ၃၂ ဦး (ကျား ၁၇၊ မ ၁၅) ဆေးရုံတင်ရရာ (မ) ၂ ဦး သေဆုံးသွားသည်။ သူတို့ စားသည့် ဂေါ်ဖီထုပ် တွင် ပိုးသတ်ဆေးများ အလွန်အကျွံ ပါဝင်နေသောကြောင့် ဖြစ်သည်။ ဖေဖော်ဝါရီ ၁၄ က သုဝဏ္ဏဈေးတွင် ကိုက်လံနှင့် ပန်းဂေါ်ဖီထုပ် များကို စမ်းသပ် စစ်ဆေးရာ ပိုးသတ်ဆေးများ တွေ့ရသဖြင့် သိမ်းဆည်းခဲ့ရသည်။ ဆေး သုတေသနဦးစီးဌာန၏ ပြောကြားချက် အရမူ ဆေးဖြန်းပြီး ၇ ရက်ကြာသည်အထိ လူကို အန္တရာယ် ပေးနိုင်သည့် အာနိသင် ရှိနေသည်ဟု ဆို၏။ ယခုတော့ ချက်ချင်းခူး၊ ချက်ချင်း ဈေးကွက်ထဲရောက်၊ ရေနဲ့ စင်အောင် မဆေးကြသဖြင့် ယခုလို အန္တရာယ် ကြုံရ ခြင်း ဖြစ်သည်။

မကြာခင်က ပိုးသတ်ဆေး အန္တရာယ်ကို သတိထားရန် မင်းထင်ကိုကိုကြီးက “အင်းသီး” ဆိုသော မှတ်တမ်းတင် ကားတိုလေး ရိုက်ကာ ပညာပေးဖူးသည်။ တောင်သူများသည် ကန့်သတ်ထားသော ပိုးသတ်ဆေးများ (ဥပမာ- အင်ဒရင်း၊ ဒီဒရင်း)၊ သုံးစွဲခွင့် ပြုမထား မှတ်ပုံတင်မထားသော (ကလိုဒိန်း၊ ဟိုင်းရပ်စ်၊ တော့စ်ဖိန်း) တွေကို အကြောင်းကြောင်း ကြောင့် သုံးစွဲနေရသည်။ မြန်မာနိုင်ငံတွင် စားသုံးသူ ကာကွယ်ရေး၊ အသင်း တချို့ရှိသော်လည်း တနိုင်ငံလုံး အတိုင်းအတာ ဖြင့် ကျယ်ကျယ်ပြန့်ပြန့် မဆောင်ရွက်နိုင်။ မြန်မာနိုင်ငံတွင် FDA ခေါ် အစားအသောက်နှင့် ဆေးဝါး ကွပ်ကဲရေးဌာန ရှိသော်လည်း ထိရောက်အောင် ဆောင်ရွက်ဖို့ လူအင်အား ငွေအင်အားကြောင့် ခက်ခဲနေပုံ ရသည်။ ထို အဖွဲ့က ၂၀၁၂ ခုနှစ် အတွင်း ဈေးကွက်ထဲ၌ ရောင်းချနေသော ငရုတ်သီးမှုန့် နမူနာ ၅၄၃ ကို စစ်ဆေးခဲ့ရာ ၁၇၅ ခုတွင် စားသုံးသူကို ကင်ဆာဖြစ်စေနိုင်၊ မျိုးရိုးဗီဇ ထိခိုက်စေနိုင်သော ဓာတုဆိုးဆေး (Auramnine – O နှင့် Rhodamine B) များ ထည့်သွင်းထားတာ တွေ့ရသည်။ ထိုအထဲမှ အမှတ်တံဆိပ် ၂၀ ကို အရေးယူခဲ့သည်။ ဒါဆို တခြား ၁၅၅ မျိုးကို အရေးမယူတော့တဲ့ သဘော ဖြစ်နေသည်။ (တမျိုးမှာ အမည်မပါ၊ အမည်ပါသော်လည်း လိပ်စာမပါ။) ဘာကြောင့်ပါလဲ။

ဖမ်းဆီးရမိသူများကို အမျိုးသား အစားအသောက် ဥပဒေ ပုဒ်မ ၂၈ (က)အရ အရေးယူသည်။ ထို ဥပဒေအရ ထောင်ဒဏ် ၃ နှစ် သို့မဟုတ် ငွေဒဏ် ၃ သောင်း ချမှတ်နိုင်၏။ ဒီ ပြစ် ဒဏ်လောက်ကို ၀ိသမသား လုပ်ငန်းရှင်တွေက ဖြုံမယ် မထင်။ ပြင်းထန် ထိရောက်သော အပြစ်ဒဏ် စီရင်ပေးဖို့ လိုသည်။ တရုတ်ပြည်တွင် အားလုံးအသိပင်၊ ဒီလို ကိစ္စမျိုး ဖြစ်လာလျှင် သေဒဏ် ပေးလေ့ရှိသည်။ (နို့မှုန့်ထဲတွင် မယ်လမင်း ဓာတ်ပါဝင်မှု ကိစ္စ ကြည့်ပါ။)

မကြာခင်က (စက်တင်ဘာ ၄ ကစ၍) မြန်မာနိုင်ငံတွင် ချောကလက်၊ ဝေဖာ၊ ကိတ်နှင့် ပီကေ (ချွင်းဂမ်း) ကို စီးပွားရေးနှင့် ကူးသန်းရောင်းဝယ်ရေး ၀န်ကြီးဌာနက တရားဝင် တင် သွင်းခွင့် ပြုလိုက်သည်ဟု သတင်းကြားရသောအခါ ကျနော် အံအားသင့်သွားသည်။ အံအားသင့်ရခြင်းမှာ ထို ပစ္စည်း ၄ မျိုးကို ရှေ့နှစ်ပေါင်းများစွာကပင် ဆိုင်များ၌ ထင်ရှားပေါ်လွင်စွာ ရောင်းချနေခဲ့တာ မြင်ခဲ့ရသောကြောင့် ဖြစ်သည်။ (ဤ အချက်က ကျနော်တို့ နိုင်ငံတွင် ဥပဒေနှင့် အညီ အရေးယူ ဆောင်ရွက်နိုင်မှု အားနည်းကြောင်း ဖော်ပြနေ ပေသည်။) နှစ်ပေါင်း များစွာ ခိုးသွင်းကာ ရောင်းချနေခဲ့ကြသည်။ ဒီလို ခိုးသွင်းကြတော့ ကျန်းမာရေး ထောက်ခံချက် မရှိ။ တိုင်းပြည် ၀င်ငွေ ထိခိုက်၏။ တရားဝင် တင်သွင်းခွင့် ပိတ်ပင်ထားသော အရက် ဘီယာနဲ့ စီးကရက်တွေလည်း ဒီလိုပဲ ရောင်းချနေကြတာ တွေ့ရသည်။

သူများ နိုင်ငံများတွင် အစိုးရ ဌာနများကသာ မက NGO၊ ပုဂ္ဂလိက အဖွဲ့အစည်းများကပါ စားသုံးသူကို ကာကွယ်စောင့်ရှောက် ပေးကြသည်။ ထုတ်လုပ်ရောင်းချသည့် ကုမ္ပဏီတွေ ကလည်း ကိုယ်ကျိုးစီးပွား တခုတည်းကို မကြည့်ကြ။ ရက်ပိုင်းအတွင်းကပင် ကမ္ဘာ့အကြီးဆုံး စားသောက်ကုမ္ပဏီကြီး ဖြစ်သော Nestle က စပိန်နှင့် အီတလီတွင် ရှိသော သူတို့ ဖြန့်ဖြူးထားသည့် စည်သွတ်ဗူးတွေကို လိုက်လံသိမ်းဆည်းခဲ့သည်။ ဂျာမနီမှ စစ်ဆေးရေးအဖွဲ့က ထို အမဲသားဗူး တချို့ကို စစ်ဆေးကြည့်ရာ မြင်း၏ ဒီအင်အေ (DNA) ကို တွေ့ရ သောကြောင့်ဟု ဆိုသည်။ ကျနော်တို့ နိုင်ငံက စားသုံးသူတွေကတော့ ဗူးပေါ်က ရက်လွန်နေ့စွဲကလေးကိုပင် ဖတ်ကြည့်လေ့ မရှိကြ။ စက်ရုံထုတ် ပစ္စည်းများမှာ ရက်လွန်နေပါက စားသုံးရန် မသင့်။

ရက်လွန် နေ့စွဲကို ကြည့်ကာ တမင် စားသုံးသူ တယောက်တော့ ရှိသည်။ ကိုးရီးယား Girl’s Generation အဖွဲ့က အဆိုတော် ဟိုယွန်း ဆိုတဲ့ ကောင်မလေး ဖြစ်သည်။ သူက အလုပ် သိပ်များကာ ပင်ပန်းနေပြီး လူတွေနဲ့ မတွေ့ချင်တော့ဘူး အနားယူချင်တယ် ဆိုရင် ရက်လွန်နေတဲ့ နွားနို့ဗူးတဗူး သောက်လေ့ရှိသည်။ သူ ၀မ်းပျက် ၀မ်းလျော ဖြစ်တော့ အနားယူ ရတာပေါ့။ ကိုးရီးယား လုပ်သမျှ လိုက်တုပသူတွေကို သတိပေးချင်သည်။ ဒီလို ကိစ္စမျိုးမှာတော့ မတုပကြပါနှင့်။ အန္တရာယ် ရှိသဖြင့် တားရခြင်း ဖြစ်ပါသည်။

သစ္စာနီသည် ကဗျာ၊ ၀တ္ထုတို၊ ဆောင်းပါး၊ ဘာသာရေး၊ နိုင်ငံရေး၊ သရော်စာ၊ ဘာသာပြန်၊ သိပ္ပံဝတ္ထု၊ အနုပညာ ဝေဖန်ရေး စသည့် စာပေ လက်ရာစုံကို မဂ္ဂဇင်း၊ ဂျာနယ်များတွင် ရေးသားလျက် ရှိပြီး လုံးချင်း စာအုပ်များစွာကိုလည်း ရေးသားထုတ်ဝေလျက်ရှိသည့် စာရေးဆရာ တဦးဖြစ်သည်။

Ref: ဧရာဝတီ

Read More...

Collapse...

မြန်မာနိုင်ငံနှင့် ထာဝရတည်တံ့မည့် အပြောင်းအလဲ

အီမန်ညူယယ် ဘရိုင်အာ
November 8, 2012

မြန်မာနိုင်ငံသည် သမိုင်းတွင် အရေးကြီးဆုံး နိုင်ငံရေး အသွင်ကူးပြောင်းမှု တချို့ကို အခုအချိန်တွင် ဖြတ်သန်း နေရသည်။ တမတ်သား အရပ်သားအစိုးရသစ်သည် အကောင်းမြင်ရန်နှင့် သတိကြီးရန်တို့ကို ယူဆောင်လာ သည့် ရည်မှန်းချက်ကြီးသော ပြုပြင်ပြောင်းလဲရေးလမ်းကြောင်းကို စတင် လျှောက်လှမ်းနေသည်။

၂၀၁၁ခုနှစ် ဧပြီလတွင် သက်ဝင်သော လွှတ်တော်တခု ကျင်းပပေးနိုင်ခြင်း၊၂၀၁၂ ခုနှစ် ဇန်န၀ါရီလတွင် နိုင်ငံရေး အကျဉ်းသား ရာနှင့်ချီ လွှတ်ပေးခြင်းနှင့် စက်တင်ဘာလတွင် နောက်တဖန် ထပ်လွှတ်ပေးခြင်း၊ ၂၀၁၂ ခုနှစ် အစော ပိုင်းတွင် လက်နက်ကိုင် တိုင်းရင်းသားအဖွဲ့အစည်းများနှင့် အပစ်အခတ် ရပ်စဲရေး သဘောတူစာချုပ်များ ချုပ်ဆို နိုင်ခြင်းနှင့် ဒီမိုကရေစီခေါင်းဆောင် ဒေါ်အောင်ဆန်း စုကြည်ကိုယ်တိုင် လွှတ်တော် အမတ်အဖြစ် ရွေးချယ် တင်မြှောက်ခံခဲ့ရသည့် ၂၀၁၂ ခုနှစ်ဧပြီလ လွတ်လပ်၍ တရားမျှတသော ကြားဖြတ်ရွေးကောက်ပွဲ ကျင်းပနိုင်ခဲ့ခြင်း စသဖြင့် အပြုသဘောဆောင်သော အဖြစ်အပျက်များ ဖြစ်ထွန်းခဲ့သည်။

သမ္မတဦးသိန်းစိန် ဦးဆောင်သော ပြုပြင်ပြောင်းလဲမှုကို စစ်မှန်သော လုပ်ငန်းစဉ် တခုဟု တချို့က ရှုမြင် နေကြသော်လည်း ကြီးမားသော စိန်ခေါ်မှုများ ရှိနေခြင်းနှင့် နိုင်ငံရေးနှင့် စီးပွားရေးတွင် စစ်တပ် အာဏာ အခိုင် အမာ ရှိနေခြင်းကြောင့် ပြုပြင် ပြောင်းမှုတွေများ ရှေ့ဆက်သွားနိုင်မည်လားဟု စိတ်ပူပန်နေဆဲ ဖြစ်သည်။

အတိုက်အခံခေါင်းဆောင် ဒေါ်အောင်ဆန်းစုကြည်နှင့် အမျိုးသား ဒီမိုကရေစီ အဖွဲ့ချုပ်အနေနှင့်လည်း ပြုပြင် ပြောင်းလဲမှုများအပေါ် သတိနှင့် စောင့်ကြည့်နေဆဲဖြစ်ပြီး၊ “သန်စွမ်းသော ဝေဖန်ရေး” အမြင်ကို ဆက်လက် ဆွဲကိုင် ထားဆဲဖြစ်သည်။ တိုင်းပြည်အတွင်း လူထုအခြေပြု လူမှုအဖွဲ့အစည်း များတွင်လည်း ထိုကဲ့သို့သော အမြင် မျိုးရှိသည်။

ဤနေရာတွင် မြန်မာနိုင်ငံ အပြောင်းအလဲများကို အဓိက မောင်းနှင်နေသည်မှာ မည်သည့်အရာများနည်းဟူ၍ မေးခွန်းမေးစရာရှိ လာသည်။

တိုင်းပြည်အတွင်း သြဇာအရမ်းကြီးမားလာနေသည့် တရုတ်သြဇာကို ချိန်ခွင့်ညှာညှိရန် မဖြစ်မနေ လုပ်လာရသော ပြုပြင်ပြောင်းလဲ မှုများဟု တချို့က ရှုမြင်ကြသည်။ တချို့က အတွင်းကြိတ် ပဋိပက္ခများ၏ ပေါင်းစည်းမှုကြောင့်ဟု မြင်ကြပြန်သည်။

ပြည်ပတွင် အခြေစိုက်ကြသည့် မြန်မာအဖွဲ့အစည်းများ၏ အဓိက အခန်းကဏ္ဍမှာမူ အင်္ဂလန်၊ ဥရောပနှင့် ကုလသမဂ္ဂတွင် မြန်မာ့အရေး အသက်ဝင်နေရန် စည်းရုံးတိုက်တွန်းကြခြင်း ဖြစ်သည်။

၂၀၁၅ခုနှစ် မြန်မာနိုင်ငံကို အာဆီယံစီးပွားရေးအသိုင်းအ၀န်း (AEC) အတွင်း ဆွဲသွင်းယူသော အရှေ့တောင်အာရှ နိုင်ငံများ အသင်း၏ အပြုသဘောဆောင် ဆက်ဆံရေးကိုလည်း နောက်ထပ် မောင်းနှင်အားတခုအဖြစ် တချို့က ရှုမြင်ကြသည်။

အချုပ်အားဖြင့် မြန်မာအစိုးရ၏ လက်ရှိသွားနေသော ပြုပြင်ပြောင်းလဲရေးလမ်းကြောင်းသည် အတွင်း၊ အပြင် နှစ်ဖက်စလုံး၏ သြဇာလွှမ်းမိုးကြောင့်ဖြစ်လာရခြင်း ဖြစ်သည်။ ထို့ကြောင့် နောက်ကြောင်းပြန်လှည့်နိုင်မည့်ပုံ မပေါ်သေးချေ။

သို့သော် ရှေ့တွင် တွေ့ရမည့် စိန်ခေါ်ချက်မှာ သက်ဆိုင်သူ အားလုံးပါဝင်နိုင်သော အင်စတီကျူးရှင်းများ ဖြစ်လာစေရေး ဒီမိုက ရက်တစ် အတွေးအခေါ်များကို လက်တွေ့ကျင့်သုံးလာနိုင်မည်လား ဆိုသည် ဖြစ်သည်။

၂၀၁၂ခုနှစ် စက်တင်ဘာလ အမေရိကန်ခရီးစဉ်အတွင်း ဒေါ်အောင်ဆန်းစုကြည်သည် Asia Foundation တွင် မိန့်ခွန်းတွင် အုပ်ချုပ်ရေး၊ တရားစီရင်ရေးနှင့် ဥပဒေပြုရေးတို့တွင် ဒီမိုကရက်တစ်အင်စတီကျူးရှင်းများ တည်ဆောက်ရန် အနောက်ကမ္ဘာ၏ အကူအညီသည် အရေးကြီးကြောင်း ထည့်သွင်းဟောပြောခဲ့သည်။

မှန်ကန်သော တောင်းဆိုချက်ဖြစ်သည်။ သို့သော် စစ်မှန်သော နိုင်ငံရေး ပြုပြင်ပြောင်းလဲမှု ဟုတ်မဟုတ် ဆိုသည့်အချက်နှင့်ပတ် သက်ပြီး စစ်တပ်သည် နိုင်ငံရေးတွင် ဆက် ရှိနေ မနေဆိုသည့် အချက်ကလည်း သက်သေပြသင့်စရာ အချက်တခုဖြစ်သည်။

မြန်မာအစိုးရအနေဖြင့် အင်ဒိုနီးရှားနိုင်ငံမှ စစ်တပ်ကြီးစိုးမှုခေတ်လွန်ကာလ ပြုပြင်ပြောင်းလဲမှုများကို လေ့လာသင့်သည်။

ကျောင်းသားလှုပ်ရှားမှု၏ ရလဒ်အဖြစ် ၁၉၉၈ ခုနှစ် ဆူဟာတို အာဏာမှ မစွှန့်လွှတ်ခင် အင်ဒိုနီးရှားနိုင်ငံသည် ၃၂ နှစ်ကြာ ကမ္ဘာပေါ်တွင် အရက်ဆုံးသော စစ်အစိုးရလက်အောက်တွင် ပြားပြားဝပ်ခံခဲ့ရသည်။ နောက်ပိုင်းတွင် အင်ဒိုနီးရှားတပ်မတော် (TNI)သည် နိုင်ငံရေးတွင် လက်ဝါးကြီးအုပ်ခွင့်ပေးထားသော (Dual-function doctrine)စနစ်ကို ဖျက်သိမ်းလိုက်ပြီး အင်စတီကျူးရှင်း ပြုပြင်ပြောင်းလဲမှုများ စတင်လုပ်ဆောင်ခဲ့သည်။

၎င်းစနစ် မဖျက်သိမ်းခင်က အင်ဒိုနီးရှားစစ်တပ်သည် ကာကွယ်ရေးနှင့်လုံခြုံရေးအခန်းကဏ္ဍအပြင် နိုင်ငံတော် ဖွံ့ဖြိုးတိုးတက်ရေး မြှင့်တင်ပေးသော လူမှုစီးပွားရေး နယ်ပယ်နှင့် နိုင်ငံရေးတည်ငြိမ်မှုအတွက် တာဝန်နှစ်ရပ် ထမ်းဆောင်ခွင့်ရထားသည်။

ထို့ကြောင့် စစ်တပ်သည် နိုင်ငံရေးတွင် ထင်ထင်ရှားရှား ပါဝင်ခဲ့ရသည်။ လွှတ်တော်တွင် အမတ်နေရာ ၅၀၀ အနက် TNI အတွက် ၇၅ နေရာ ဖယ်ထားပေးရသည်။ ဒေသဆုိုင်ရာ ဥပဒေပြု လွှတ်တော်စုစုပေါင်းတွင် ရွေးချယ်ခံစရာမလိုသော စစ်တပ် ကိုယ်စားလှယ် ၂၈၀၀ ဦးအထိ ရရှိခဲ့သည်။

(Dual-function doctrine) အပြင် အင်ဒိုနီးရှားစစ်တပ်သည် ကီကာယန် (အင်ဒိုနီးရှား ဘာသာစကား ဖြစ်သည်။ မြန်မာလို ယာယီတာဝန်ဟု အဓိပ္ဗါယ်ရသည်) မူဝါဒကို ကျယ်ကျယ်ပြန့်ပြန့် အကောင်အထည် ဖေါ်လုပ်ဆောင်ခဲ့သည်။ ၎င်းမူဝါဒအရ လက်ရှိ တာဝန်ထမ်းဆောင်နှင့် အငြိမ်းစား စစ်တပ်အရာရှိများသည် ရွာသူကြီးမှအစ နိုင်ငံတော်ပိုင် စီးပွား ရေးလုပ်ငန်းများတွင် အမှုဆောင်အရာရှိနေရာများအလယ် အမျိုးသား နှင့်ဒေသဆိုင်ရာအဆင့် မဟာဗျူဟာမြောက်သော အစိုးရရာထူးများကို လက်ဝါကြီးအုပ်ထားခဲ့ကြသည်။

အင်ဒိုနီးရှားစစ်တပ်သည် အစိုးရကျောထောက်နောက်ခံပါတီ ဂိုကာမှတဆင့် နိုင်ငံရေးသြဇာတည်ဆောက်သကဲ့သို့ ရွေးကောက်ပွဲ များတွင်လည်း ဂိုကာပါတီ မဲအနိုင်ရရေး ကူညီပေးခဲ့သည်။

ဆူဟာတိုပြုတ်ကျအပြီး “ပညာတက်နှင့် ပြုပြင်ပြောင်းလဲရေးစိတ်” အခြေခံရှိသူဗိုလ်ချုပ်များဖြစ်ကြသည့် အော်ဂက်စ် ၀ီဒ်ဂျိုဂျို၊ အော်ဂက်စ် ၀ိဒါဟာဒီ ကူဆူမာနှင့် (လက်ရှိ သမ္မတ ဖြစ်နေသူ) ဆူစီလိုဘန်ဘန်ယိုဒိုယိုနိုတို့က TNI အကြီးအကဲ ဗိုလ်ချုပ်ကြီးဝါရင်တိုအား စစ်တပ်အတွင်း ပြုပြင်ပြောင်းလဲမှုများ စလုပ်ရန် ချည်းကပ်ခဲ့သည်။

ဆူဟာတိုအဆင်း နိုင်ငံရေးပြုပြင်ပြောင်းလဲမှုများ ပြဌာန်းရန် စစ်တပ်အတွင်းနှင့် လူထုဖိအားနှစ်မျိုးစလုံး ရှိခဲ့သည်။

ထို့နောက် TNI သည် “ပါရာဒိုင်းအသစ်” ဟုခေါ်သော အဓိက ပြုပြင်ပြောင်းလဲမှုလေးခုပါသည့် မူအသစ်ကိုချမှတ်ခဲ့သည်။ ထိုလေးချက်မှာ စစ်တပ်သည် အမျိုးသား နိုင်ငံရေး မျက်နှာစာတွင် အမြဲရှိနေရန် မလိုအပ်၊ စစ်တပ်သည် နိုင်ငံရေးတာဝန်များ မယူ၊ သုို့သော် ဆုံးဖြတ်ချက်ချခြင်း လုပ်ငန်းစဉ်တွင် ပါဝင်စွက်ဖက်ခွင့်ရှိမည်၊ စစ်တပ်သည် ၎င်း၏ သြဇာကို တိုက်ရိုက်မသုံး၊ သွယ်ဝိုက်၍သာအသုံးပြုမည်နှင့် စစ်တပ်သည် အမျိုးသား အဖွဲ့အစည်းများနှင့် ပူးပေါင်းဆောင်ရွက်မည်ဟူ၍ ဖြစ်သည်။

၎င်းအဆင့်သည် အင်ဒိုနီးရှားစစ်တပ်အတွက် ပြုပြင်ပြောင်းလဲမှုများ ဆက်လုပ်ရန်အတွက် အရေးကြီးသော အလှည့်အပြောင်း တခုဖြစ်သည်။ စစ်တပ်၏ တာဝန်နှစ်ရပ်မူကို ပယ်ဖျက်လိုက်သော်လည်း ပြုပြင်ပြောင်းလဲမှု စတင်လုပ်ဆောင်လာခဲ့သည်မှာ ၁၄ နှစ်ကြာခဲ့ပြီဖြစ်သော်လည်း သိသာသော ပြုပြင်ပြောင်းလဲမှုများ မရှိသေး သည်ကိုတော့ သတိချပ်သင့်သည်။

မြန်မာနိုင်ငံ၏ အင်္ဂလိပ် ကိုလိုနီခေတ်လွန် ကာလကို စစ်တပ်မှ ၆၂ နှစ်ကြာ အမျိုးသားနိုင်ငံရေးတွင် အဓိကမင်းမူခဲ့သော ကာလအဖြစ် မက်ခ်ဒီးန် (Mark Dearn) က သတ်မှတ်ခဲ့သည်။

ပေါ်ထွန်းစ မြန်မာနိုင်ငံမှာ ဂိုဏ်းဂဏ၀ါဒ၊ ပါတီတွင်း ပဋိပက္ခများနှင့် လုံးချာလိုက်နေသည့် ညွှန့်ပေါင်းအစိုးရအုပ်စိုးသည့် “ပါလီမန် ခေတ် (၁၉၄၈ – ၁၉၆၂) ” ဟု ကာလတိုတခု ရှိခဲ့သော်လည်း စစ်တပ်စိုးမိုးမှုသည် ယနေ့အချိန်အထိ ပုံစံမျိုးစုံနှင့် ရှိခဲ့သည်။ မြန်မာ့နိုင်ငံရေးစနစ်သည် စစ်အရာရှိကြီးများက ခြိမ်းခြောက် အကြပ်ကိုင် နည်းလမ်းမျိုးစုံသုံး နိုင်ငံရေးအာဏာ ယူလေ့ရှိပြီး “ကာကွယ်စောင့်ရှောက်သူ”အဖြစ် ပုံဖော်လေ့ရှိသည်။

၂၀၁၁ခုနှစ် မတ်လတွင် ဗိုလ်ချုပ်ကြီးဟောင်း သမ္မတဦးသိန်းစိန်ဦးဆောင်သော ပြုပြုပြောင်းလဲမှုများသည် အသိအမှတ်ပြုထိုက် သော်လည်း စစ်တပ်သည် နိုင်ငံရေးတွင် တက်တက်ကြွကြွ ပါဝင်နေသည့်အချက်မှာ စိုးရိမ်စရာအချက်ကြီးတခု ဖြစ်သည်။

လွှတ်တော်တွင် အခြေခံဥပဒေက ခွင့်ပြုထားသော စစ်တပ်ကိုယ်စားလှယ် ၂၅ ရာခိုင်နှုန်းရှိသည်။ လွှတ်တော်အမတ် အများ စုသည် ပြည်ထောင်စုကြံ့ခိုင်ရေးနှင့် ဖွံ့ဖြိုးတိုးတက်ရေးပါတီ (ပြည်ခိုင်ဖြိုး) အမတ်များဖြစ်၍ လွှတ်တော်တခုလုံး၏ ၆၀ ရာခိုင် နှုန်းရှိသည်။ ဦးသိန်းစိန်သည် တခြား စစ်တပ်အကြီးအကဲ ၂၂ ဦးနှင့်အတူ ပြည်ခိုင်ဖြိုးကိုဦးဆောင်သည်။

တပ်မတော်ကိုယ်စားလှယ်များက ၎င်းတို့သည် သမ္မတ၏ ကြီးကြပ်မှုအောက်တွင် တပြေးညီတာဝန်ထမ်းဆောင်နေပါသည်ဟု ပြောနေချိန်တွင် တိုင်းရင်းသားဒေသတချို့တွင် စစ်ရေးထိုးစစ်မှုများ လုပ်နေခြင်းကြောင့် စစ်တပ်၏ ကိုယ်ပိုင်အုပ်ချုပ်ခွင့် အခွင့် အာဏာကို မီးမောင်းထိုးပြသလိုလည်း ဖြစ်နေသည်။

စီးပွားရေးနှင့် နိုင်ငံရေးပြုပြင်ပြောင်းလဲမှုများ စတင်လုပ်ဆောင်နေစဉ် တပြိုင်နက် စစ်တပ်အနေဖြင့် သမ္မတ ဦးဆောင်သော ပြုပြင်ပြောင်းလဲရေးကို သဘာတူလက်ခံဖို့ အရေးကြီးသည်။ ထို့အပြင် မြန်မာနိုင်ငံတွင် ပြုပြင်ပြောင်းလဲမှုများ ထာဝရတည် တန့်စေရေးအတွက် နိုင်ငံတကာအသိုင်းအ၀န်းသည် စစ်တပ်ပြုပြင်ပြောင်းလဲမှုအတွက် ထိထိရောက်ရောက် ကူညီပေးနိုင်သည့် အချက်ကလည်း အရေးကြီးသည်။

စာရေးသူသည် Institute of Resource Governance and Social Change အဖွဲ့တွင် သုတေသီအဖြစ် ဆောင် ရွက်နေပြီး လက်ရှိတွင် ကမ္ဘာဒီးယားနိုင်ငံ၊ ဖနွိုင်းပင်မြို့တွင် အခြေစိုက်နေထိုင်သည်။ The Jakarta Post သတင်းစာပါ Emanuel Bria ၏ Myanmar and Sustainable Change ကို ဆီလျော်အောင် ဘာသာပြန်ဆိုသည်။

Ref: ဧရာဝတီ

Read More...

Collapse...

အပြင်ကကောင်တွေနဲ့ အထဲကကောင်တွေ ဇာတ်လမ်းကြီး

ဇော်မင်း
September 6, 2012

သည်ရက်ပိုင်း သည်ကာလပိုင်းအတွင်း ကြားရတာတွေ သိရတာတွေကတော့ ဝမ်းနည်းဖွယ်ရာတွေ စိတ်မကောင်း စရာတွေ များ နေသည်။ ဘာတွေများ ကြားရလို့ ဘာတွေကို စိတ်မကောင်း ဖြစ်နေတာတုန်း လို့ မေးမယ့်သူလည်း ရှိပါ လိမ့်မည်။ လူတွေ တဦးနဲ့တဦး တယောက်နဲ့တယောက် ကြည့်မရသလိုလို ရန်လိုနေသလိုလို ဖြစ်နေတာကြောင့်လို့ ဆိုရပါမည်။

တဲ့တဲ့ပြောစမ်းပါဗျာ၊ တိတိလင်းလင်း ပြောစမ်းပါဗျာဟု တောင်းဆိုလာသူ မိတ်ဆွေများလည်း ရှိသေးသည်။ ဟုတ်ကဲ့။ တဲ့တဲ့နဲ့ တိတိလင်းလင်း ပြောရမည် ဆိုပါက ကျနော်တို့မျိုးဆက်တွေ ညီညီညွတ်ညွတ် မရှိတာ ကို မြင်ရသောကြောင့်ပင်။ ကျနော်တို့ မျိုးဆက်ဆိုတာ ရှစ်လေးလုံးက ပေါက်ဖွားလာသော နိုင်ငံရေး သမား၊ တော်လှန်ရေးသမားများကို ဆိုလိုတာ ဖြစ်သည်။ နိုင်ငံရေး၊ တော်လှန်ရေး တိုက်ရိုက်ကိစ္စတွေကို မလုပ်တော့ဘဲ မီဒီယာလုပ်ငန်းတွေကို လုပ်ကိုင်နေသူတွေ လည်း ဒီအထဲမှာ ပါသည်။ အန်ဂျီအို လုပ်ငန်းတွေမှာ ကူးပြောင်းလုပ်ကိုင် နေသူတွေလည်း အကျုံးဝင်သည်။

အခုအခြေအနေက အရင်လို မဟုတ်တာတော့ သေချာသည်။ အရင်တုန်းက နိုင်ငံရေးအခြေအနေက တိုက်ရိုက် စစ် အုပ်ချုပ်ရေး အောက်မှာ ပြားပြားဝပ်နေခဲ့ရတာကို ဆိုလိုရင်းဖြစ်သည်။ အခုတော့ အတော်အတန် ပြောဆိုခွင့်တွေ ရလာ သည်။ အတော်အ တန်လေး ပြောဆို၊ လုပ်ကိုင်၊ သွားလာခွင့် ရလာတဲ့ အပေါ်မှာ တချို့က ဂုဏ်မောက်လာသည်။ တချို့က မျက်နှာကြော ပြောင်း လာသည်။ တချို့က အိုက်တင်များလာသည်။ တချို့က ပဲများလာသည်။ အဲသည်မှာပဲ ဇာတ်လမ်းက စသည်လို့ ဆိုနိုင်သည်။ ဘာဇာတ်လမ်း စတာတုန်းလို့ မေးရင် ဖြေရပေတော့မည်။

အပြင်ကကောင်တွေနဲ့ အထဲကကောင်တွေ ဆိုသည့် ဇာတ်လမ်းကြီးပင် ဖြစ်ပေတော့သည်။ အပြင် ကကောင်တွေဟာ အပြင်မှာ လွတ်လပ်နေတိုင်း သူတို့ပြောချင်ရာ ပြောသည် ဆိုသည်ဟု အထဲကကောင်တွေက ထင်သည်။ အဲသည်တော့ အပြင်က ကောင် တွေ အထဲကို ပြန်လာရင် ဘယ်လို ဆက်ဆံရမှာလဲ ဘယ်လိုသဘော ထားရမှာလဲ ဆိုတဲ့ အယူအဆ ကလေးများ ဟိုမှာသည်မှာ ပြောနေ ကြတာကို ကြားရသည်။ အတွင်းကကောင်တွေက ပြည်ပရောက်နေသူများကို အပြင် က ကောင်တွေဟု အမည်သညာ ပေးသည်။ ဒို့ ရှစ်လေးလုံးမျိုးဆက်တွေ၊ တချိန်က လုပ်ဖော်ကိုင်ဖက် ရဲဘော်တွေလို့ သတ်မှတ်နိုင်ဖို့ ဝန်လေးနေဟန် ရှိသည်။ ကျနော်ပြောတာ လွန်သွားတယ်ဆိုပါက တောင်းပန်သည်။

လက်ခုပ်ဆိုတာ နှစ်ဖက်တီးလို့သာ မည်ရသည်ဟု ဆိုထားသည်။ အပြင်ကကောင်တွေကလည်း အထဲကကောင်တွေဟာ နှစ်ပေါင်း များစွာ ထောင်တန်းကျခဲ့တော့ ကက်ပယ်စီတီ အရာမှာ နိမ့်နေသေး သည်လို့ မြင်ဟန်ရှိသည်။ ငဒို့က အနောက် နိုင်ငံများမှာ တက္ကသိုလ်တွေတောင် တက်နိုင်ခဲ့တာမို့ သူတို့ထက် ပိုတတ်ပိုသိသည်ဟု ထင်နေသူ တချို့လည်း ရှိသည်။ အထဲကကောင်တွေ နိုင်ငံတကာ မျက်နှာစာကို ဒို့လောက် နားမလည်သေး ဟုလည်း တချို့ကလည်း ထင်ဟန်ရှိသည်။ ဒါကြောင့် အထဲကို ပြန်ဝင်ပြီး သင်းကလေးတို့ကို ကက်ပယ်စီတီ မြှင့်တင်ပေးဖို့ လုပ်ပေးရမည်ဟု ဆိုလာသူလည်း ရှိသည်။ တခါ အဲတာကို ပြောင်ထုတ်ပြော မိလို့ (စကားမပြော တတ်တာလည်းပါ) မျက်နှာစာအုပ်တွေမှာ အဝေဖန်ခံရသည်။ အဆဲခံ ရသည်။ အကောင်းမြင်နဲ့ ဝေဖန်သူ ရှိသလို အပြင်ကကောင်တွေဆိုရင် မစွံပါဖူး၊ သည်လိုချည်းပဲဟု ဝေဖန်သူများလည်း ရှိနေသည်။

အပြင်ကကောင်တွေ မှာလည်း လူဆိုးလူကောင်းရှိသည်။ ကြွားဝါတာကို ရှေ့တန်းမတင်သူ တွေ ရှိသလို သောက်ကြွား ပိုလွန်း သူများလည်း မနည်းလှ။ အခွင့်ရေးမမက်သူနှင့် အခွင့်ရေးမက်မောသူ ဟူ၍လည်း ရှိသည်။ ဗိုလ်လုပ်ချင်သူ ရှိသလို ပူးပေါင်း ဆောင်ရွက်တာမျိုးကို လိုလားသူလည်း ရှိသည်။ ဂိုဏ်းဂနစွဲ ရှိသူတွေ ရှိနေသေးသလို ပကတိ အခြေအနေတွင် လက်တွေ့ လုပ် နိုင်တာကို လက်တွေ့ လုပ်လိုသူများလည်း ရှိသည်။ နာမည်ရှိထားသူများနဲ့ တပူးတွဲတွဲလုပ်ရင်း ကိုယ့်ကိုယ် ကို လူသိအောင် လုပ်လိုသူများလည်း ရှိသည်။ အပြင်မှာ နေတာကြာပြီဆိုတော့ အဆက်အသွယ်ကောင်း ဒိုနာကောင်းတွေ ရထားသူ တချို့လည်း ရှိနေသည်။ သူတို့က အထဲကိုဝင်လိုသည်။

ဝင်လာသည့်သူတချို့ကိုလည်း တွေ့နေရသည်။ ဘယ် ဒိုနာရဲ့ ပိုက်ဆံမှ မပါဘဲ ကိုယ့်တိုင်းပြည် အခြေအနေကို လက်တွေ့မျက်တွေ့ မြင်တွေ့လို၍ ကိုယ့်စရိတ်ကိုယ်စားပြီး ပြန်သွား ကြည့်သူများ လေ့လာသူများလည်း ရှိသည်။ အပြင်ကကောင်တွေဟာ နိုင်ငံခြား တိုင်းပြည်တွေလို ကွန်ဖော့ဇုန် အတွင်းမှာ သက်တောင့်သက်သာ နေပြီး ဆရာလုပ်ချင်တဲ့ စိတ်ကများနေသည်ဟု ဆိုလာသူတွေ လည်း ရှိသည်။ ငြင်းမရ ဟုတ်သင့် သလောက်လည်း ဟုတ်နေသည်။

အထဲကကောင်တွေရော ဘယ်လိုလဲ။ ကြားရတာက မသက်သာပါ။ အထဲကကောင်တွေလည်း ထင်ထားသလို ညီညွတ် ခြင်း မရှိဘဲ တိတ်တိတ်လေး ကွဲနေကြသည်တဲ့။ ရုံးခန်းကြီး ဖွင့်ထား၍ ပုံမှန်ရုံးတက်သူ တချို့ ရှိနေသော်လည်း ရုံးကို လုံးဝနီးပါး မလာတဲ့ သူများလည်း ရှိသေးသည်ဟု ကြားရသည်။ အပြင်ကကောင်တွေ အထဲအကြောင်း မသိဘဲနဲ့ ငါတို့ အထဲက ကောင် တွေကို ဆရာလုပ်တာ မကြိုက်ဟု ဆိုသူများလည်း ရှိသည်။ ဆရာလုပ်ခြင်းကို မကြိုက်တာ သဘာဝ ကျသည်။ ဆရာလာလုပ် သူကိုလည်း ပြောင်ပြောသင့်သည်။ သို့သော် အပြင်ကကောင်တွေဟာ ဆရာ သိပ်လုပ်ချင်တယ် လို့ အပြင်ကကောင်တွေ အားလုံးကို လုံးပြီး မပြောသင့်။ ခြေမမကောင်း ခြေမ၊ လက်မမကောင်း လက်မ ခွဲခြားနားလည်ဖို့ တော့ လိုသည်။ ဒါ့အပြင် အထဲက ကောင်တွေကိုလည်း ဝေဖန်သူများ ရှိလာသည်။

မီဒီယာအားကောင်းသော၊ သံတမန်ရေးရာ အားကောင်းသော၊ နိုင်ငံခြားသားမျိုးစုံ ဝင်ထွက်သွား လာသော ရန်ကုန်တွင် သာ ပျော်နေသည်ဟု ဆိုသော စကားများ ဖြစ်သည်။ ဒါကို တချို့က ကွန်ဖော့ဇုန်ထဲမှာ နေလိုတာက လူ့သဘာဝ၊ ဘယ်သူ မှ ချင်းတောင်မှာ နာဂတောင်တန်းမှာ ကြာကြာသွား နေနိုင်ပါ့မလဲဟု ဖြည့်စွက်ကြသည်။ ဒါလည်း ဟုတ်သင့်သလောက် ဟုတ်နေ သည်။ ဒါပေမယ့် နာဂတောင်တန်းကတော့ ဝေးလွန်းလှသည်။ ရန်ကုန်ကနေ သိပ်မဝေးတဲ့ တောနယ်တွေဖက် သွားပြီး လုပ်ကိုင် ပေးနိုင်တယ် ဆိုရင်တော့ သိပ်မဆိုးလှ။ ရန်ကုန်ကိုလည်း မကြာခဏ ပြန်နိုင်ဦးမည်။ နောက်တချက် ကတော့ အထက်ဗမာပြည် မှာ နိုင်ငံရေး အားမကောင်းလို့ နိုင်ငံရေးအားကောင်းရန် ကျုပ်တို့လာတာဆိုပြီး ပြောမိလို့ အထက်သားများ တရှုးရှုးဖြင့် နှာမှုတ် သံပြင်းနေတာ အပြင်ကတောင် ကြားနေရသည်။ အထက်အရပ် ရောက်တုန်း ရောက်ခိုက် မြန်မာ့ရိုးရာ ဆိုင်းဝိုင်းကြီးနဲ့ သီချင်းဆို ချင်တဲ့ ခေါင်းဆောင်တယောက်ကို အထက်သားများ မျက်မှောင်ကုတ် ပြီး ကြည့်နေတာကိုလည်း သတိချပ်ဖို့လိုသည်။

လူကြီးတွေ ပြောခဲ့ဖူးတာ တခု အမှတ်ရသည်။ ဘာကြောင့် မြန်မာပြည်မှာ ပြည်တွင်းစစ် သက်ဇိုးရှည်ရတာလဲ ဆိုတာကို ပြောပြ ခြင်းဖြစ်သည်။ တိုတိုဆိုရသော် မြန်မာနိုင်ငံရေးသမားတွေ အကွဲကွဲ အပြားပြားနဲ့ မညီညွတ်လို့ဆိုတဲ့ ကောက်ချက် ကို မှတ်သားရ ဖူးသည်။ ဒီခေတ်မှာလည်း မြန်မာနိုင်ငံရေး ခေါင်းဆောင် ကြီးငယ်လတ်တွေ မညီညွတ်ရင် ဘောင်းဘီချွတ် ထားတာ ပူပူနွေးနွေး သာ ရှိသေးတဲ့ ခရိုနီများရဲ့ အဘများနဲ့ စုဖွဲ့ထားတဲ့ အစိုးရသာ သက်ဆိုး ရှည်လိမ့်ဦးမည်ဆိုတဲ့ အဖြေကိုသာ တွက်ထုတ်လို့ရသည်။

နိဂုံးချုပ်သောအခါ အပြင်ကကောင်တွေကိုလည်း ဝေဖန်ပြီးပြီ။ အထဲကကောင်တွေကိုလည်း ဝေဖန်ပြီးပြီ။ ဝေဖန်ပြီးရင် ဘာလုပ်မ တုန်း။ မျိုးဆက်တူ ညီအကို မောင်နှမ ရဲဘော်များ ထဲထဲဝင်ဝင် ပွင့်ပွင့်လင်းလင်း ညှိနိုင်းတိုင်ပင်ပြီး လုပ်စရာ ရှိတာတွေ လုပ် သင့် သည်။ အမြင်မကြည်လင် တာတွေကို အပြန်အလှန် ဆွေးနွေးပြီး သကာလ၊ အပြင်ကကောင်တွေ၊ အထဲကကောင်တွေ ဆိုတဲ့ ဝေါဟာရများလည်း ပျောက်ပျက်စေသတည်းလို့ ဆုတောင်းလိုက်သည်။ ။

Ref: ဧရာဝတီ

Read More...

Collapse...