စီးပွားရေး ပိတ်ဆို့မှု ရုတ်သိမ်းသင့်ကြောင်း ကိုဇာဂနာ အကြံပြု

2011-12-19

မြန်မာနိုင်ငံအပေါ် စီးပွားရေးပိတ်ဆို့ အရေးယူထားတာတွေ ပြန်လည် ရုတ်သိမ်းလိုက်မယ် ဆိုရင် သာမန် ပြည်သူလူထု အတွက် အကျိုးကျေးဇူးတွေ ရရှိလာမယ်လို့ ဟာသ သရုပ်ဆောင် ကိုဇာဂနာက ပြောဆို လိုက်ကြောင်း Bloomberg သတင်းဌာနက ဖေါ်ပြပါတယ်။

အထူးသဖြင့် အထည်ချုပ် လုပ်ငန်း ကဏ္ဍမှာ ရင်းနှီး မြှုပ်နှံခွင့်တွေ ရရှိလာမယ် ဆိုရင် သာမန်ပြည်သူတွေ အကျိုးခံစားရမှာ ဖြစ် ပါ တယ်၊


စီးပွားရေး ပိတ်ဆို့ အရေးယူထားတာတွေကို ရုတ်သိမ်းလိုက်မယ် ဆိုရင် နိုင်ငံခြား တိုင်းပြည်တွေဆီက အကူအညီတွေ ပိုရလာမှာ ဖြစ်ပါတယ်လို့ ထိုင်းနိုင်ငံ ဘန်ကောက်မြို့ကို ရောက်ရှိနေတဲ့ ကိုဇာဂနာက နိုင်ငံခြား သတင်းထောက်တွေကို ပြောကြားခဲ့ပါတယ်။

ကမ္ဘာ့ဘဏ် နဲ့လည်း တွေ့ဆုံဆွေးနွေးခဲ့ရာမှာ မြန်မာနိုင်ငံကို ကူညီ ထောက်ပံ့မှုတွေ ပေးနိုင်တဲ့ နည်းလမ်းတွေနဲ့ ပတ်သက်ပြီး ဆွေးနွေးခဲ့ကြောင်းလည်း ကိုဇာဂနာက ပြောဆိုပါတယ်။

ကိုဇာဂနာနဲ့ အဖွဲ့ဟာ ရုပ်ရှင်လုပ်ငန်းနဲ့ ပတ်သက်ပြီး အိမ်နီးချင်း နိုင်ငံတွေကို သွားရောက် လေ့လာရေး ခရီးစဉ် စတင်နေပါ တယ်။ ဒီခရီးစဉ်ဟာ သူ့ရဲ့ပထမဆုံး ပြည်ပခရီး ဖြစ်ပါတယ်။ ကိုဇာဂနာ နဲ့အဖွဲ့ဟာ ထိုင်းနိုင်ငံ ကနေ ကမ္ဘောဒီးယားနိုင်ငံ ကို ဆက်လက် သွားရောက်မှာ ဖြစ်ပါတယ်။

Ref: အာရ်အဖ်အေ

Read More...

Collapse...

မြန်မာပြည်သွားရောက်ခဲ့ကြောင်း ထိုင်းဝန်ကြီးချုပ်ဟောင်း အတည်ပြု ပြောဆို

2011-12-19

ပြည်ပရောက် ထိုင်းဝန်ကြီးချုပ်ဟောင်း သက်ဆင် ရှင်နာဝပ်ထရာ ဟာ ပြီးခဲ့တဲ့ ကြာသပတေးနေ့က မြန်မာနိုင်ငံကို သွားရောက် ခဲ့ပြီး စစ်ခေါင်းဆောင်ဟောင်း ဗိုလ်ချုပ်မှုးကြီး သန်းရွှေနဲ့ လက်ရှိ သမ္မတ ဦးသိန်းစိန် အပါအ၀င် မြန်မာ အာဏာပိုင်တွေနဲ့ တွေဆုံ ခဲ့ ကြောင်း ဘန်ကောက်ပို့စ် သတင်းစာကို အတည်ပြု ပြောဆိုလိုက်ပါတယ်။

သူ့ရဲ့ခရီးစဉ်ဟာ ညီမဖြစ်သူ ထိုင်းဝန်ကြီးချုပ် ယင်လတ် ရှင်နာဝပ်ထရာ မြန်မာပြည်ကို သွားတဲ့အခါ အဆင်ပြေ ချောမွေ့စေဖို့ အတွက် ဖြစ်တယ်လို့ ဆိုပါတယ်။ ယူအေအီးနိုင်ငံ ဒူဘိုင်းမြို့တော်မှာ ရှိနေတဲ့ ၀န်ကြီးချုပ်ဟောင်း သက်ဆင် ကို ဘန်ကောက်ပို့စ် သတင်းစာ က တယ်လီဖုန်းက တဆင့် ဆက်သွယ် မေးမြန်းခဲ့ရာမှာ မြန်မာပြည် ခရီးစဉ်ကို အတည်ပြု ပြောကြားခဲ့တာ ဖြစ်ပါ တယ်။

မြန်မာပြည်မှာ လက်ရှိ သမ္မတ ဦးသိန်းစိန်နဲ့တွေဆုံခဲ့သလို ယခင်ခေါင်းဆောင်ဟောင်း ဗိုလ်ချုပ်မှုးကြီး သန်းရွှေ နဲ့လည်း တွေ့ဆုံ ခဲ့ကြောင်း၊ ဒါ့အပြင် ၀န်ကြီးချုပ် ယင်လတ် အနေနဲ့ မြန်မာ့ ဒီမိုကရေစီ ခေါင်းဆောင် ဒေါ်အောင်ဆန်းစုကြည်နဲ့ပါ တွေ့ဆုံနိုင်ဖို့ကို လည်း ဆောင်ရွက်ခဲ့ကြောင်း ပြောဆိုပါတယ်။

မစ္စယင်လတ် နဲ့ ဒေါ်အောင်ဆန်းစုကြည်နဲ့ တွေ့ဆုံရေးမှာ အရေးကြီးတဲ့ အချက်နှစ်ချက် ရှိကြောင်း၊ ပထမအချက် အနေနဲ့ မြန်မာ အတွက် ထိုင်းဟာ အရေးပါတယ်ဆိုတဲ့ အဓိပ္ပါယ် ဖြစ်ပြီး၊ ဒီတွေ့ဆုံမှုဟာ ထိုင်းနိုင်ငံ ၀န်ကြီးချုပ် တစ်ယောက် အနေနဲ့ ပထမဆုံး အကြိမ် တွေ့ဆုံတာ ဖြစ်ကြောင်း၊ ဒီလို တွေ့ဆုံမှုမျိုးကို မြန်မာ အစိုးရ အနေနဲ့ အရင်က ခွင့်ပြုလေ့ မရှိကြောင်း မစ္စတာ သက်ဆင် က ပြောပါတယ်။ ဒုတိယအချက် ကတော့ ထိုင်းအစိုးရဟာ မြန်မာ့ ဒီမိုကရေစီရေးကို အားပေးတယ် ဆိုတာ ကမ္ဘာကို ပြသလိုက်တာ ဖြစ်တယ်လို့ ဆိုပါတယ်။

ဝေဖန် သုံးသပ်သူတွေ ကတော့ --မစ္စယင်လတ်ရဲ့ မြန်မာပြည် ခရီးစဉ်ဟာ စွမ်းအင်နဲ့သယ်ယူ ပို့ဆောင်ရေး လုပ်ငန်းတွေမှာ ရင်းနှီးမြှုပ်နှံဖို့ အတွက် အဓိက ဖြစ်ပြီး ၊ ဒီလုပ်ငန်းတွေ ကနေ မစ္စတာ သက်ဆင် နဲ့ သူ့ရဲ့ စီးပွားရေး အပေါင်းအပါတွေ အကျိုးရှိဖို့ အတွက်သာ ဖြစ်လိမ့်မယ်လို့ ပြောဆိုကြပါတယ်။

ထိုင်းဝန်ကြီးချုပ် ဟာ မြန်မာ့ ဒီမိုကရေစီ ခေါင်းဆောင် ဒေါ်အောင်ဆန်းစုကြည်နဲ့တွေ့ဆုံတဲ့အခါ ပြည်ပ ထွက်လို့ ရမယ်ဆိုရင် ထိုင်းနိုင်ငံကို လာရောက် လည်ပတ်ဖို့ ဖိတ်ခေါ်မှာ ဖြစ်ကြောင်း ထိုင်းအစိုးရ ပြောရေးဆိုခွင့် ရှိသူက ပြောဆိုပါတယ်။

Ref: အာရ်အဖ်အေ

Read More...

Collapse...

CNF နဲ့ ပြည်နယ် အစိုးရ ဆွေးနွေးဖို့ ချင်းခေါင်းဆောင်တွေ သဘောတူ

2011-12-19

အစိုးရရဲ့ ငြိမ်းချမ်းရေး ကမ်းလှမ်းချက်အရ ချင်းအမျိုးသား တပ်ဦး CNF ဟာ လာမယ့် ဇန်န၀ါရီလ ပထမပတ်ထဲမှာ ချင်းပြည် နယ် အစိုးရနဲ့ ပဏာမ အဆင့် တွေ့ဆုံ ဆွေးနွေးသွားမယ်လို့ အာရ်အက်ဖ်အေကို ပြောပါတယ်။

ပြီးခဲ့တဲ့ ရက်ပိုင်း အတွင်းက ကျင်းပခဲ့တဲ့ ချင်း မျိုးနွယ်စု ခေါင်းဆောင်တွေ၊ ချင်း လူမှု အဖွဲ့အစည်း ကိုယ်စားလှယ်တွေ၊ ပညာ ရှင်တွေနဲ့ ချင်းအမျိုးသား တပ်ဦးတို့ ပါတဲ့ အရေးပေါ်ညီလာခံကနေ ချင်းပြည်နယ် အစိုးရနဲ့ အရင် တွေ့ဆုံ ဆွေးနွေးဖို့ သဘော တူခဲ့ တာလို့ ပြောရေးဆိုခွင့်ရှိသူ ဒေါက်တာ အန်ဒရူး ငုန်ကျုန်းလျန်က အာရ်အက်ဖ်အေကို ပြောပါတယ်။


ချင်းပြည်နယ် အစိုးရနဲ့ ဆွေးနွေးမယ့် CNF ရဲ့ကိုယ်စားလှယ် အဖွဲ့ကို လက်ထောက် အတွင်းရေးမှူးချုပ် ဒေါက်တာ ရွှေခါး၊ ဒေါက်တာ အန်ဒရူး ငုန်ကျုန်းလျန် အပါအ၀င် အဖွဲ့ဝင် ၁၀ ဦးနဲ့ ဖွဲ့စည်းထား ပါတယ်။

ပြီးခဲ့တဲ့ အောက်တိုဘာလ ၁၉ ရက်က ချင်းအမျိုးသား တပ်ဦး CNF ဟာ တခြား တိုင်းရင်းသား အဖွဲ့ တစ်ချို့လိုပဲ မြန်မာ အစိုးရ ရဲ့ဗဟိုအဆင့် ငြိမ်းချမ်းရေး ကိုယ်စားလှယ် အဖွဲ့နဲ့ ထိုင်း မြန်မာ နယ်စပ် တစ်နေရာမှာ ပထမဆုံး အကြိမ် တွေ့ဆုံ ဆွေးနွေးခဲ့ ပါတယ်။

Ref: အာရ်အဖ်အေ

Read More...

Collapse...

လူ့အခွင့်အရေး ရှေ့နေ ဦးမြင့်သွင် လိုင်စင် ၃ နှစ် အပိတ်ခံရ

2011-12-19

နိုင်ငံရေး အကျဉ်းသားတွေ၊ နိုင်ငံရေး လှုပ်ရှားသူတွေနဲ့ မြေယာ အသိမ်းခံရတဲ့ တောင်သူ လယ်သမားတွေ အတွက် ဥပဒေ အကျိုး ဆောင် အဖြစ် ဆောင်ရွက်ပေးနေသူ မန္တလေးမြို့က ရှေ့နေကြီး ဦးမြင့်သွင်ကို တရားလွှတ်တော်ချုပ်က ရှေ့နေလိုက်ခွင့် သုံးနှစ် ပိတ် လိုက်တယ်လို့ သိရပါတယ်။

ဒီအမိန့်စာကို ပြီးခဲ့တဲ့ ကြာသပတေးနေ့က ရကြောင်း ဦးမြင့်သွင်က ပြောပါတယ်။

၂၀၁၁ ခုနှစ် ဆယ်လပိုင်းလောက်က တရားရုံးချုပ် ရုံးချိန်းတစ်ခုမှာ နောက်ကျသွားတဲ့ အတွက် ချိန်းတဲ့နေ့မှာ လျှောက်လဲချက် မပေးနိုင်ခဲ့တာကို အကြောင်းပြပြီး အခုလို လိုင်စင် သုံးနှစ် ရပ်နားခံရတာလို့ ဦးမြင့်သွင်က ပြောပါတယ်။


ဒါပေမယ့် ဦးမြင့်သွင်ဟာ အဲဒီ ပျက်ကွက်တဲ့ ရုံးချိန်း အတွက် အစားထိုး လျှောက်လဲခွင့် ကျမ်းကျိန်ပြီး လျှောက်ထားခဲ့ရာမှာ တရားရုံးချုပ်က ခွင့်ပြုတဲ့ အတွက် နောက်ပိုင်းမှာ အမှုအတွက် လျှောက်လဲချက် ပေးနိုင်ခဲ့တယ်လို့ သိရပါတယ်။

ဦးမြင့်သွင်ဟာ မန္တလေးက ဒေါ်ဝင်းဝင်းမြ၊ မြင်းခြံက ဒေါက်တာ ဝင့်သူတို့ အပါအဝင် နိုင်ငံရေး အကျဉ်းသား တော်တော် များ များရဲ့ အကျိုးဆောင် ရှေ့နေကြီး ဖြစ်တဲ့ အပြင် ဖားကန့်နဲ့ မေမြို့က မြေယာ အသိမ်းခံရတဲ့ တောင်သူများရဲ့ အကျိုးဆောင် ရှေ့နေကြီးလည်း ဖြစ်ပါတယ်။

သူဟာ မြန်မာနိုင်ငံ တရားစီရင်ရေးနဲ့ ပတ်သက်လို့ တရားရေး အာဏာပိုင်တွေရဲ့ ချို့ယွင်းမှုတွေကို ရေဒီယိုကနေ ပြောဆိုအပြီး တစ်ပတ် အကြာမှာ အခုလို လိုင်စင် ပိတ်ခံရတာ လို့လည်း သိရပါတယ်။

Ref: အာရ်အဖ်အေ

Read More...

Collapse...

ကချင်ပြည်နယ် မိုးကောင်းမှာ ဗုံး ၅ လုံး ပေါက်ကွဲခဲ့

2011-12-19

ကချင်ပြည်နယ် မိုးကောင်း မြို့နယ်ထဲမှာ ရှိတဲ့ မန္တလေး မြစ်ကြီးနား မီးရထားလမ်းပေါ်မှာ ဒီဇင်ဘာ ၁၈ ရက် မနက်ပိုင်းက ဗုံး ၅ လုံး ပေါက်ကွဲခဲ့ပြီး လူနှစ်ဦး သေဆုံးခဲ့တယ်လို့ ဒေသခံတွေက အာရ်အက်ဖ်အေကို ပြောပါတယ်။

မိုးကောင်း မြို့နယ်နဲ့ ၅ မိုင် အကွာလောက်မှာ ရှိတဲ့ ထိုးဖူး ကျေးရွာနဲ့ ဆားမှော် ကျေးရွာ အကြားမှာ ဖြစ်ပြီး မီးရထားလမ်း မိုင် တိုင် အမှတ် ၆၇၈ (၁၁∕၁၂) အနီးက နေရာ နှစ်နေရာမှာ ၂ လုံး တစ်ကြိမ်၊ ၃ လုံး တစ်ကြိမ် ဆက်တိုက် ဗုံးပေါက် ကွဲခဲ့ တာလို့ သိရပါတယ်။


မိုးကောင်းမြို့နယ် ရဲစခန်းက ရဲအရာရှိက ပေါက်ကွဲမှုနဲ့ ပတ်သက်ပြီး အတည်ပြု ပြောဆိုခဲ့ပေမယ့် အသေးစိတ် အချက်အလက် မသိရှိကြောင်း အာရ်အက်ဖ်အေကို ပြောပါတယ်။

မနက်လင်းအားကြီး အချိန်မှာ ဗုံးပေါက်ကွဲခဲ့တာ ဖြစ်ပြီး မိုးကောင်းမြို့ကနေ မန္တလေးကို ထွက်လာတဲ့ မီးရထား တစ်စီး မရောက် ခင်မှာ ပေါက်ကွဲခဲ့တာလို့ ဆားမှော် ရွာသား တစ်ဦးက အာရ်အက်ဖ်အေကို ပြောပါတယ်။

“မနေ့က မနက်ပေါ့။ ၃ နာရီလောက်၊ မိုးကောင်း ကနေ ထွက်မယ်ဆိုရင် ထိုးဖူးကို ရောက်တယ်။ ထိုးဖူးကနေ ထွက်မယ်ဆိုရင် ဆားမှော် ရောက်တယ်။ ထိုးဖူးနဲ့ ဆားမှော်ကြားပေါ့။ ၂ ခုကွဲတယ်။ အဲဒီ မိုင်းခွဲတဲ့နားမှာ သေတာက နှစ်ယောက်၊ လွတ်တာက တစ်ယောက်လို့တော့ ကြားတယ်။ မန္တလာလား၊ တရုတ်ရထားလား မသိဘူး။ သွားတယ်။ သွားတဲ့အခါကျတော့ သံလမ်း မိုင်းကွဲ နေတာ ဖြစ်နေတဲ့ အခါကျတော့ အဲဒီရထား ဥသြဆွဲပြီးတော့ နောက်ပြန်ဆုတ်လာတယ်၊ ချက်ချင်းပဲ ပြန်ပြင်တယ်”

သေဆုံးခဲ့သူ နှစ်ဦးဟာ ဗုံးထောင်ရင်း ဗုံးပေါက်ကွဲမှုကြောင့် သေဆုံးခဲ့တာ ဖြစ်နိုင်ပြီး ဘယ်အဖွဲ့အစည်းက ဆိုတာ အတိအကျ မသိရဘူးလို့ ဒေသခံတွေက ပြောပါတယ်။

ဗုံးပေါက်ကွဲပြီးနောက် မီးရထားသံလမ်း ကင်းယူထားတဲ့ မိုးကောင်း အခြေစိုက် ခလရ ၁၀၅ တပ်ရင်း တပ်ဖွဲ့ဝင်တွေရဲ့ သေနတ် ပစ်ခတ်သံတွေ ထွက်ပေါ်ခဲ့ပေမယ့် တစ်စုံတစ်ရာ ထူးခြားတာ မတွေ့ရဘူးလို့ အခုနက ရွာသားကပဲ ပြောပါတယ်။

ပြီးခဲ့တဲ့ တစ်လကျော် ကလည်း အခု ပေါက်ကွဲမှု ဖြစ်ခဲ့တဲ့ ဆားမှော် ကျေးရွာ အနီးက ရထားလမ်းပေါ်မှာပဲ ဗုံးတစ်လုံး ပေါက်ကွဲ ခဲ့ပေမယ့် ထိခိုက် သေဆုံးမှု မရှိကြောင်း သိရပါတယ်။

Ref: အာရ်အဖ်အေ

Read More...

Collapse...

ဦးတင်ဦးနဲ့ ဒေါ်အောင်ဆန်းစုကြည်တို့ကို မှတ်ပုံတင်မယ့် NLD ပါတီခေါင်းဆောင်တွေ အဖြစ် ရွေးချယ်

2011-12-19

ပြန်လည် မှတ်ပုံတင်မယ့် အမျိုးသား ဒီမိုကရေစီ အဖွဲ့ချုပ် NLD ပါတီရဲ့ခေါင်းဆောင်နဲ့ ဒုတိယ ခေါင်းဆောင်တွေ အဖြစ် ဗိုလ်ချုပ်ကြီးဟောင်း သူရဦးတင်ဦးနဲ့ ဒေါ်အောင်ဆန်းစုကြည်တို့ကို NLD ဗဟို အလုပ်အမှုဆောင် ကော်မတီက ရွေးကောက် တင်မြှောက်လိုက် ပါတယ်။

ဒီကနေ့ မနက် ၁၀ နာရီက ကျင်းပတဲ့ NLD ပါတီ ပြန်မှတ်ပုံတင်ဖို့ ရွေးကောက်ပွဲ ကော်မရှင်ကို အဆိုပြု လျှောက်ထားခဲ့သူ ၂၁ ဦးရဲ့အစည်းအဝေးမှာ ခေါင်းဆောင် ၂ ဦးကို အခုလို ရွေးချယ် တင်မြှောက်ခဲ့တာလို့ ပြန်ကြားရေး တာဝန်ခံ ဦးအုံးကြိုင်က ပြော ဆိုပါတယ်။


ပါတီ ခေါင်းဆောင်နဲ့ ဒုတိယ ခေါင်းဆောင်တွေ ဆိုတာဟာ ဥပဒေအရ လိုအပ်တဲ့ ပါတီ မှတ်ပုံတင်ဖို့ ဆန္ဒပြုသူ ၂၁ ဦးရဲ့ခေါင်း ဆောင်တွေ ဖြစ်တယ်လို့သာ အဓိပ္ပာယ်ရပြီး ပါတီ ဥက္ကဋ္ဌနဲ့ ဒုတိယ ဥက္ကဋ္ဌ ရာထူးတွေ ကိုတော့ မှတ်ပုံတင်ပြီးမှ ရွေးမယ်လို့လည်း ဦးအုံးကြိုင်က ပြောပါတယ်။

အဲဒီအစည်းအဝေးမှာပဲ ပါတီ စာအုပ်စာတမ်းနဲ့ စာစောင်တွေ ထုတ်ဝေနိုင်အောင် ထုတ်ဝေခွင့် မှတ်ပုံတင် နံပါတ် လျှောက်ထားဖို့ လည်း ဆုံးဖြတ်ခဲ့တယ်လို့ သိရပါတယ်။

Ref: အာရ်အဖ်အေ

Read More...

Collapse...

ထိုင်းဝန်ကြီးချုပ် ရဲ့ မြန်မာပြည်ခရီး လေ့လာသူတွေ သံသယရှိ

2011-12-19

ထိုင်းဝန်ကြီးချုပ် ယင်လပ် ရှင်နာဝပ်ထရာရဲ့ မြန်မာပြည် ခရီးစဉ်မှာ စီးပွားရေး မသမာမှုတွေ ပေါ်ပေါက်နိုင်တာကြောင့် အနီးကပ် စောင့်ကြည့်ကြဖို့ ပညာရှင်တွေနဲ့ လူ့အခွင့်အရေး တက်ကြွ လှုပ်ရှားသူတွေက ထိုင်းလူထုကို တိုက်တွန်းလိုက် ပါတယ်။

လက်ရှိ ထိုင်းဝန်ကြီးချုပ် ယင်လပ်ရဲ့ အစ်ကို ပြည်ပရောက် ၀န်ကြီးချုပ်ဟောင်း သက်ဆင်ဟာ ပြီးခဲ့တဲ့ တစ်ပတ်က နီပေါ နိုင်ငံ ကို အသွား၊ မြန်မာပြည်ကို ၀င်ရောက်ခဲ့တာကြောင့် ဝေဖန်သူတွေ စိုးရိမ်မကင်း ဖြစ်နေကြကြောင်း ဘန်ကောက်ပို့စ် သတင်းစာက ဖေါ်ပြ ပါတယ်။


သက်ဆင် မြန်မာပြည်ကို သွားတာဟာ သူ့ရဲ့ ဖွေထိုင်းပါတီ ဦးဆောင်တဲ့ ထိုင်းအစိုးရ အနေနဲ့ မြန်မာ အစိုးရနဲ့ အတူ ပူးပေါင်း ဆောင်ရွက်ရာမှာ အဆင်ပြေအောင်၊ နှမဖြစ်သူ ယင်လပ်ရဲ့ မြန်မာပြည် ခရီးစဉ် ချောမွေ့အောင် ဖြစ်တယ်လို့ ဖွေထိုင်း ပါတီက လွှတ်တော် အမတ် တစ်ဦးကို ကိုးကားပြီး ဘန်ကောက်ပို့စ်က ရေးသားပါတယ်။

ထိုင်းဝန်ကြီးချုပ် ယင်လပ်ဟာ နေပြည်တော်မှာ ကျင်းပမယ့် စတုတ္ထမြောက် မဲခေါင်မြစ်အောက်ပိုင်း နိုင်ငံများ ဆွေးနွေးပွဲကို တက်ရောက်ဖို့ မြန်မာပြည်ကို ဒီကနေ့ရောက်ရှိမှာ ဖြစ်ပါတယ်။ ဒီခရီးစဉ် အတွင်း ထိုင်း အစိုးရ အဖွဲ့ဟာ မြန်မာ အစိုးရနဲ့ သီးခြား တွေ့ဆုံပြီး လမ်းပန်း ဆက်သွယ်ရေး နဲ့ စွမ်းအင်ကိစ္စ၊ မြန်မာ့ သဘာဝ ဓါတ်ငွေ့ ၀ယ်ယူရေး နဲ့ ထားဝယ် ရေနက် ဆိပ်ကမ်း တည်ဆောက်ရေးတွေ ဆွေးနွေးမှာ ဖြစ်ပါတယ်။

ချူလာလောင်ကွန် တက္ကသိုလ် နိုင်ငံရေး သိပ္ပံဌာန ကထိက ပါနီတန် ကတော့ ယင်လပ် အစိုးရရဲ့ မြန်မာပြည် ဆိုင်ရာ စီမံကိန်း တွေ ကနေ ရရှိလာမယ့် အကျိုးအမြတ်တွေကို ပြည်သူတွေ မခံစားရဘဲ၊ သက်ဆင်ရဲ့ စီးပွားရေး အပေါင်းပါတွေ ကသာလက်ဝါး ကြီးအုပ် ရယူသွားမှာကို စိုးရိမ်ကြောင်း ပြောဆိုပါတယ်။ သက်ဆင် ၀န်ကြီးချုပ် ဖြစ်ခဲ့စဉ် ၂၀၀၁ နဲ့ ၂၀၀၄ ခုနှစ်တွေ တုန်းက လည်း လမ်းပန်း ဆက်သွယ်ရေး၊ စွမ်းအင်နဲ့ သတင်း ဆက်သွယ်ရေး လုပ်ငန်းတွေ ကနေ အကျိုးအမြတ်တွေ ဖန်တီးခဲ့ကြောင်း၊ သူပိုင်ဆိုင်တဲ့ ဆက်သွယ်ရေး ကုမ္ပဏီက ပစ္စည်း တွေက်ို မြန်မာ စစ်အစိုးရ ၀ယ်ယူနိုင်အောင် ထိုင်း ဘတ်ငွေ သန်းပေါင်း တစ် ထောင် ချေးငှားဖို့ ထိုင်း သွင်းကုန် ထုတ်ကုန်ဘဏ် ကို အမိန့်ထုတ်ခဲ့ကြောင်း ကထိက ပါနီတန်က ပြောပါတယ်။

ဒါ့ပြင် လူ့အခွင့်အရေး အဖွဲ့တွေ ကလည်း မြန်မာ ကနေ ထိုင်း ကို ဓါတ်ငွေ့ပိုက်လိုင်း သွယ်တန်း ဖေါက်လုပ်ရာမှာ လူ့အခွင့် အရေး ချိုးဖေါက်မှုတွေ ပေါ်ပေါက်လာနိုင်တာမို့ အထူး စောင့်ကြည့်ဖို့ လိုအပ်ကြောင်း တိုက်တွန်း လိုက်ပါတယ်။

Ref: အာရ်အဖ်အေ

Read More...

Collapse...

ဦးတင်ဦးနှင့် ဒေါ်အောင်ဆန်းစုကြည် ပါတီခေါင်းဆောင်လုပ်မည်

မျိုးသိဏ်း
ဒီဇင်ဘာလ ၁၉ ရက် ၂၀၁၁ ခုနှစ်

ကြားဖြတ်ရွေးကောက်ပွဲတွင် ဝင်ရောက် ယှဉ်ပြိုင်ရန် အမျိုးသား ဒီမိုကရေစီ အဖွဲ့ချုပ်၏ ပထမခေါင်းဆောင်အဖြစ် ဦးတင်ဦး၊ ဒုတိယ ခေါင်းဆောင်အဖြစ် ဒေါ်အောင်ဆန်းစုကြည်တို့ကို အမည်စာရင်း တင်သွင်းမည် ဖြစ်ကြောင်း သိရသည်။

တနင်္လာနေ့ နံနက်ပိုင်းက ပြုလုပ်သည့် အန်အယ်လ်ဒီပါတီ တည်ထောင်သူ ၂၁ ဦး အစည်းအဝေးတွင် ဦးတင်ဦးနှင့် ဒေါ်အောင် ဆန်းစုကြည်တို့ကို ခေါင်းဆောင်များအဖြစ် ရွေးချယ်ခဲ့ပြီး ယင်းတို့နှစ်ဦး မကြာမီ နေပြည်တော်သို့ သွားရောက်၍ ရွေးကောက်ပွဲ ကော်မရှင်တွင် ပါတီမှတ်ပုံတင်ခြင်း ပြုလုပ်မည်ဖြစ်ကြောင်း ပါတီပြောရေးဆိုခွင့်ရှိသူ ဦးဉာဏ်ဝင်းက ပြောသည်။


“၂၁ ဦး အစည်းအဝေးမှာ နေပြည်တော်ကိုသွားပြီး ကော်မရှင်မှာ NLD ပါတီကို မှတ်ပုံတင်ဖို့ ပထမခေါင်းဆောင်နဲ့ ဒုတိယ ခေါင်းဆောင် ရွေးတယ်။ ပထမခေါင်းဆောင်က ဦးတင်ဦး၊ ဒုတိယ ခေါင်းဆောင်က ဒေါ်အောင်ဆန်းစုကြည်။ သူတို့က မကြာခင် မှာ နေပြည်တော်ကို သွားပြီးတော့ ကော်မရှင်နဲ့ တွေ့ဆုံပြီးတော့ NLD ကို တရားဝင် နိုင်ငံရေး ပါတီအဖြစ် မှတ်ပုံတင် လိမ့် မယ်” ဟု ဦးဉာဏ်ဝင်းက ပြောသည်။

ဦးတင်ဦးနှင့် ဒေါ်အောင်ဆန်းစုကြည် နေပြည်တော်သို့ သွားရောက် မှတ်ပုံတင်မည့်ရက်ကို ပြောဆိုနိုင်ခြင်း မရှိသေးကြောင်း ကြားဖြတ် ရွေးကောက်ပွဲ ကျင်းပမည့် နေ့ရက်ကို ကော်မရှင်က ထုတ်ပြန်ခြင်း မရှိသေးသည့် အတွက် မဲဆန္ဒနယ်များနှင့် ဝင်ရောက် ယှဉ်ပြိုင်မည့် ကိုယ်စားလှယ်လောင်းများကို ရွေးချယ်ထားခြင်း မရှိသေးကြောင်း ဦးဉာဏ်ဝင်းက ပြောသည်။

“ကော်မရှင်ကတောင်မှ ရွေးကောက်ပွဲ ဘယ်နေ့လုပ်မယ်ဆိုတာ မပြောသေးတဲ့ အတွက်။ သူဘယ်နေ့ပြောမလဲ ဆိုတာ စောင့်ရ မှာပေါ့။ ဒါပေမဲ့ မဲတော့ ဆွယ်ကြလို့ ပြောတယ်။ တို့မှာ ဘယ်နေရာမှာ ဘယ်သူ ဝင်ပြိုင်မယ်ဆိုတာ တိတိကျကျ ဆုံးဖြတ်ထား တာ မရှိသေးဘူး”ဟု NLD ပြောရေးဆိုခွင့်ရ ပုဂ္ဂိုလ်က ဆိုသည်။

မဲဆွယ်မှုလုပ်ငန်းများ မစသေးသော်လည်း ရွေးကောက်ပွဲ အောင်နိုင်ရေးအတွက် လိုအပ်သည့် ဖွဲ့စည်းမှုများ ပြုလုပ် ပြင်ဆင် ထား ကြောင်း ဦးဉာဏ်ဝင်းက ပြောသည်။

Ref: မဇ္ဈိမ

Read More...

Collapse...

KIO နှင့် ဆွေးနွေးရန် ပြည်ထောင်စုအဆင့် ငြိမ်းချမ်းရေး ဆွေးနွေးရေးအဖွဲ့ ဖွဲ့ပြီး

ဖနိဒါ
ဒီဇင်ဘာလ ၁၉ ရက် ၂၀၁၁ ခုနှစ်

ပြည်ထောင်စုအဆင့် 'နိုင်ငံရေး ဆွေးနွေးရန်' ဦးအောင်သောင်း ခေါင်းဆောင်သော ၁၁ ဦးပါ အဖွဲ့ ဖွဲ့စည်းထားကြောင်း အသိ ပေးစာအား ကချင်လွတ် မြောက်ရေးအဖွဲ့ KIO ကို ယမန်နေ့က လက်ခံ ရရှိကြောင်း KIO ပြောခွင့်ရ ဦးလနန်က ပြောသည်။

ကချင်တိုင်းရင်းသား လက်နက်ကိုင် အဖွဲ့များနှင့် ငြိမ်းချမ်းရေး ဆွေးနွေးရန် ပြည်ထောင်စုအဆင့် ငြိမ်းချမ်းရေး ဆွေးနွေးရေး အဖွဲ့အား သီးသန့်ဖွဲ့စည်းတာဝန်ပေးအပ်ခြင်း အမိန့်စာကို KIO ကို ယမန်နေ့က အီးမေးလ်မှတဆင့် တရားဝင် အသိပေးလာခြင်း ဖြစ်သည်။

“နိုင်ငံရေးအရ ညှိနှိုင်းဆွေးနွေးနိုင်ရန်အတွက် အကြောင်းကြားခြင်းဆိုကာ ဦးအောင်သောင်း၏ လက်မှတ် ရေးထိုးထားသော ပြည်ထောင်စုအဆင့် ငြိမ်းချမ်းရေးဆွေးနွေးအဖွဲ့ကို နိုင်ငံတော် သမ္မတ ဦးသိန်းစိန်က တာဝန် ပေးအပ်ပြီး ဖြစ်ပါကြောင်း”ဟု ဦးလနန်က ပြောသည်။


အစိုးရဘက်မှ တရားဝင်အကြောင်းကြားလာသဖြင့် KIO အဖွဲ့အနေဖြင့်လည်း ဗဟိုကိုယ်စားလှယ်အဖွဲ့ ပြန်လည် ဖွဲ့စည်းပြီးနောက် အစိုးရထံ တရားဝင် ထပ်မံစာပို့မည်ဟု ဦးလနန်က ပြောသည်။

လက်ရှိ ရှေ့တန်းနေရာများတွင် နှစ်ဘက် တိုက်ပွဲများ ဆက်လက်ဖြစ်ပွားနေပြီးရဘက်မှ လက်နက်နှင့် စစ်အင်အား များကို ဆက် လက် ပို့တောင်နေသည်ဟု ဦးလနန်က ပြောသည်။

“အင်အားလျော့သွားတာ မရှိဘူး။ နဂိုရှိပြီးသား အခြေစိုက်နေတဲ့နေရာကို လက်နက်တွေ ရိက္ခာတွေ ယာဉ်တန်းနဲ့ ပို့နေပါ တယ်”ဟု သူက မဇ္စျိမကို ပြောသည်။

ကြံ့ခိုင်ရေးနှင့် ဖွံ့ဖြိုးရေးပါတီ အထွေထွေအတွင်းရေးမှူး ၁ ဖြစ်သည့် အဖွဲ့ခေါင်းဆောင် ဦးအောင်သောင်းနှင့် ဒုတိယ ခေါင်းဆောင် ဝန်ကြီး ဦးသိန်းဇော်တို့က ပြီးခဲ့သည့် သောကြာနေ့က ဒီဇင်ဘာလ ၁၆ ရက်နေ့က ရန်ကုန်မြို့ ၈ မိုင်လမ်းဆုံရှိ ဟိုတယ်ရန်ကုန်၌ သတင်းစာ ရှင်းလင်းပွဲတခု ကျင်းပခဲ့ပြီး မြန်မာပြည် မငြိမ်းချမ်း၍ ကမ္ဘာက အထင်သေးကြောင်း၊ ထို့ကြောင့် ယခုအစိုးရသက် တမ်း အတွင်း ငြိမ်းချမ်းရေးကို ရအောင်လုပ်မည်ဖြစ်ကြောင်း ပြောဆိုသွားခဲ့သည်။

သမ္မတ ဦးသိန်းစိန် က ကာကွယ်ရေးဦးစီးချုပ် ဗိုလ်ချုပ်ကြီး မင်းအောင်လှိုင်ထံ ကချင်ပြည်နယ်အတွင်း ထိုးစစ်ဆင်မှု ရပ်ဆိုင်းရန် ဒီဇင်္ဘာ ၁ဝ ရက်နေ့က ထုတ်ပြန်လိုက်သော်လည်း ကချင်ပြည်နယ်အတွင်း တိုက်ပွဲများ ဖြစ်ပွားနေမှုနှင့် ပတ်သက်၍ ဦးအောင်သောင်းက ကချင်ပြည်နယ်တွင် ထိုးစစ်ဆင်ခြင်းမဟုတ်ဘဲ စစ်ရေးသဘောအရ ဖြစ်နေခြင်း သာ ဖြစ်သည်ဟု ပြောကြားခဲ့သည်။

“ဘယ်လိုဟာမျိုးလဲဆိုတော့ ဥပမာ ဝေးလံတဲ့နေရာမှာ သူက ရိက္ခာ ခုနစ်ရက်စာလောက် ရှိတယ်။ ခုနစ်ရက် စာ ကုန်ပြီဆိုရင် ကျနော်တို့က ရိက္ခာကို ငါးရက်မြောက်တဲ့နေ့မှာ စပို့တယ်။ အဲဒီပို့တဲ့အခါမှာ လမ်းခရီးမှာ သူကလည်း မသိဘူး၊ ကိုယ်ကလည်း မသိဘူး ဒီအမိန့်တွေ ထုတ်ပြန်တာ။ အဲဒီအခါမှာတော့ မှားယွင်း ပစ်ခတ်မှု ရှိနိုင်ပါတယ်။ ဒီလိုပစ်ခတ်နေလို့ အမိန့်ပေးတာက တမျိုး၊ ဒီလို ပစ်ခတ်မှုက ရှိနေပါသေးတယ်ဆိုတာ သူတို့ ဝေဖန်လို့၊ အပြစ်တင် လို့ မရပါဘူး။ စစ်ရေးစစ်ရာသဘောမှာ ဒီလို ရှိပါတယ်”ဟု ဦးအောင်သောင်းက သတင်းထောက်များကို ပြောခဲ့ သည်။

“ကိုယ်က သိသော်ငြားလည်းပဲ သူက မသိရင် ခက်တယ်။ အဲဒီတော့ ဒီလို အနေအထားလေးတွေ ရှိတယ်။ ဒီလိုလုပ် လို့ သမ္မတ အမိန့်ပေးပါလျက်နဲ့ ဒီလိုချည်း လုပ်နေတယ်၊ ဒါ မုန့်တမျိုး တုတ်တမျိုးဖြစ်နေတယ်လို့ ဒီလို ပြောလို့မရ ဘူး၊ ဒီလို ဝေဖန်လို့ မရဘူး။ ဒါက သဘာဝရဲ့၊ စစ်ရေးစစ်ရာသဘောဝနဲ့ စစ်ဆင်ရေး နယ်မြေရဲ့ သဘော သဘာဝလေးကို သိဖို့ ဖြစ်ပါ တယ်။ ဒီလိုဆောင်ရွက်နေတာ ဖြစ်ပါတယ်ဆိုတာကို ကျနော် ပြောလိုပါတယ်”ဟု ဆက်ပြောသည်။

ငြိမ်းချမ်းရေးအရ တဆင့်ချင်း ဆောင်ရွက်နေသည့် လုပ်ငန်းများအရ ခန့်မှန်းခြေ ၃ နှစ်၊ ၄ နှစ် ကြာမြင့်နိုင်မည်ဟု ဦးအောင် သောင်းက ပြောဆိုသွားသည်။

သို့သော် ထိုသတင်းစာရှင်းလင်းပွဲတွင် ဒုတိယခေါင်းဆောင် မီးရထားဝန်ကြီး ဦးအောင်မင်း ပါဝင်ခြင်း မရှိခဲ့ပေ။

KIO နှင့်အစိုးရခေါင်းဆောင်များ ယခင်လ နိုဝင်ဘာလ ၂၉ ရက်နေ့က တရုတ်နိုင်ငံ ရွှေလီမြို့တွင် တွေ့ဆုံခဲ့စဉ် KIO ဘက်က အပစ်အခတ် ရပ်ဆိုင်းရေး မဟုတ်ဘဲ နိုင်ငံရေးအရ တွေ့ဆုံဆွေးနွေးလိုကြောင်း စာပို့ခဲ့သည်။

ပြီးခဲ့သည့် ဇွန်လမှ စတင်ဖြစ်ပွားခဲ့သော တိုက်ပွဲကြောင့် အိုးအိမ်စွန့်ခွာ ထွက်ပြေးနေထိုင်နေရသော စစ်ပြေး ဒုက္ခသည်ပေါင်း တရုတ်-မြန်မာနယ်စပ် လိုင်ဇာ၊ မိုင်ဂျာယန်၊ ဗန်မော်၊ မိုးမောက်၊ မန်စီ စသည့်မြို့နယ်များအတွင်း စစ်ပြေးဒုက္ခသည်ပေါင်း ၄၆ဝဝဝ ကျော်ရှိနေသည်ဟု KIO က ထုတ်ဖော်ပြောဆိုထားသည်။

အလားတူ မြစ်ကြီးနား၊ ဝိုင်းမော်၊ ဗန်းမော် စသည့်မြို့နယ်များအတွင်းရှိ စစ်ပြေးဒုက္ခသည်များကို ကူညီထောက်ပံ့ခဲ့ သူ ရုပ်ရှင် သရုပ်ဆောင် ဦးကျော်သူ၏ ရန်ကုန်အခြေစိုက် နာရေးကူညီမှုအသင်းမှ သိန်းပေါင်း ၂ဝဝ ကူညီခဲ့မှုခြင်း အား ကျေးဇူးတင် ကြောင်းနှင့် ဆက်လက် ကူညီမည်ဆိုပါက ကြိုဆိုကြောင်းလည်း KIO ဒုက္ခသည်များ ကူညီရေး ကော်မတီက ဒီဇင်ဘာ ၁၇ ရက်နေ့က ကြေညာချက် ထုတ်ပြန်ထားသည်။

စဉ် နာမည်များ ရာဝူး ငြိမ်းချမ်းရေးအဖွဲ့ဝင်
၁ ဦးအောင်သောင်း (ပြည်သူ့လွှတ်တော် ကိုယ်စားလှယ်) အဖွဲ့ခေါင်းဆောင်
၂ ဦးအောင်မင်း (မီးရထားဝန်ကြီး) ဒု - အဖွဲ့ခေါင်းဆောင်
၃ ဦးသိန်းဇော် (တိုင်းရင်းသားရေးရာနှင့် ပြည်တွင်းငြိမ်းချမ်းရေး ဖော်ဆောင်မှု ကော်မတီ ဥက္ကဋ္ဌ)
ဒု - ခေါင်းဆောင်
၎ ဦးအုန်းမြင့် (သမဝါယမနှင့် မွေးမြူရေးဝန်ကြီးဌာန) အဖွဲ့ဝင်
၅ ဦးဝင်းထွန်း (ပတ်ဝန်းကျင်ထိန်းသိမ်းရေးနှင့် သစ်တောရေးရာ ပြည်ထောင်စုဝန်ကြီး) အဖွဲ့ဝင်
၆ ဦးလဂျွန်ငံဆိုင်း (ကချင်ပြည်နယ် ဝန်ကြီးချုပ်) အဖွဲ့ဝင်
၇ ဗိုလ်ချုပ် ဇေယျအောင် (တိုင်းမှူး၊ မြောက်ပိုင်းတိုင်း စစ်ဌာနချုပ်) အဖွဲ့ဝင်
၈ ဗိုလ်ချုပ် ဇော်ဝင်း (ဒု-ဝန်ကြီး၊ နယ်စပ်ရေးရာဝန်ကြီးဌာန) အဖွဲ့ဝင်
၉ ဦးထွန်းသိန်း (ခ) ဦးထွန်းထွန်း (ပြည်သူ့လွှတ်တော်ကိုယ်စားလှယ်၊မန်စီ)အဖွဲ့ဝင်
၁၀ ဦးခက်ထိန်နန် (အမျိုးသားလွှတ်တော် ကိုယ်စားလှယ်၊ မြစ်ကြီးနား) အဖွဲ့ဝင်
၁၁ ဗိုလ်မှူးကြီး ကျော်စိုးဝင်း(တပ်မတော်ကာကွယ်ရေးဦးစီးချုပ်ရုံး အဖွဲ့ဝင်) အဖွဲ့ဝင်



Ref: မဇ္ဈိမ

Read More...

Collapse...

CNF ငြိမ်းချမ်းရေး ကိုယ်စားလှယ်အဖွဲ့ ရွေးချယ်ပြီးစီး

ကိုပေါက်
ဒီဇင်ဘာလ ၁၉ ရက် ၂၀၁၁ ခုနှစ်

ပြည်နယ်အစိုးရနှင့် ဆွေးနွေးရန် ချင်းအမျိုးသားတပ်ဦး CNF ၏ ပဏာမ ငြိမ်းချမ်းရေး ကိုယ်စားလှယ် အဖွဲ့ကို အရေးပေါ် ပါတီညီလာခံမှ ရွေးချယ်ပေးလိုက်သည်။

၂ဝ၁၂ ဇန်နဝါရီလ ၅ ရက်နှင့် ၆ ရက်နေ့များတွင် ဟားခါးမြို့၌ ပြည်နယ်အစိုးရနှင့် ဆွေးနွေးရန်အတွက် လက်ထောက် အထွေ ထွေအတွင်းရေးမှူး ဒေါက်တာဆလိုင်းရွှေခါး ဦးဆောင်သည့် ၁ဝ ဦးပါ အဖွဲ့အား စေလွှတ်မည် ဖြစ်ကြောင်း ပြောခွင့်ရ ဒေါက်တာ ဆလိုင်းအင်ဒရူး ငွန်ကျုံးလျန် က မဇ္ဈိမကို ပြောသည်။

“ဒီဆွေးနွေးမှုမှာ စာချုပ်စာတမ်းကြီးတွေချုပ်ပြီးတော့ လုပ်နိုင်ကောင်းမှ လုပ်လိမ့်မယ်။ မလုပ်နိုင်ဘဲလည်း ဖြစ်နိုင် တယ်။ Talk about talk စကားပြောနိုင်ဖို့အတွက် ပြည်နယ်အစိုးရနဲ့ ပထမဦးဆုံးအကြိမ် ပဏာမအဖြစ်နဲ့ ပြောတာဖြစ်တယ်။ တူနိုင်တဲ့ ကိစ္စကို သဘောတူလိုက်မယ်။ တူနိုင်သလောက် တူအောင် ပြောကြည့်မယ်။ နောက်တခါ ပြန်တွေ့နိုင်ဖို့ ရှေ့ပြေး ပဏာမအနေနဲ့ ညှိနှိုင်းတာ ဖြစ်ပါတယ်။ ဟိုကိစ္စ ဒီကိစ္စ ဆွေးနွေးမယ်ဆိုတာ ခုချိန်မှာ အသေးစိတ်ပြောဖို့ စောလွန်းတယ်ထင်ပါတယ်” ဟု ပြော သည်။


နိုဝင်္ဘာလအတွင်းက ထိုင်းနိုင်ငံ မယ်ဆိုင်မြို့တွင် ရထားဝန်ကြီး ဦးအောင်မင်းနှင့် CNF မှ ဥက္ကဋ္ဌ ပူးဇင်ကျုံးနှင့် ဒေါက်တာ ရွှေခါးတို့ တွေ့ဆုံရာမှ ရလဒ်တခုဖြစ်ပြီး ပြည်ထောင်စုအဆင့် တာဝန်ရှိသူများလည်း လေ့လာသူအဖြစ် တက်ရောက်မည်ဟု သိရသည်။

CNF ၏ ပထမအကြိမ် အရေးပေါ် ပါတီညီလာခံကို အိန္ဒိယ-မြန်မာ နယ်စပ်တနေရာတွင် ဒီဇင်္ဘာလ ၁၂ ရက်မှ ၁၆ ရက်နေ့ထိ ခေါ်ယူကျင်းပခဲ့ပြီး အထွေထွေအတွင်းရေးမှူးချုပ် ပူးဇင်ကျုံး ခေါင်းဆောင်သည့် ၅၅ ဦးပါ ဗဟိုကော်မတီ အားရွေးချယ်တာဝန် ပေးလိုက်သည်။

“စတုတ္ထအကြိမ် ပါတီညီလာခံ ကျင်းပပြီးတာ ၃ နှစ်ရှိပါပြီ။ ၂ဝ၁ဝ ရွေးကောက်ပွဲနဲ့ နိုင်ငံရေး အခင်းအကျင်းသစ် တွေလည်း ပေါ်လာတယ်။ ကျနော်တို့ပါတီထဲက စည်းရုံးရေးကိစ္စနဲ့ တခြားအားလုံးကိစ္စတွေ ကြည့်လိုက်တော့ အရေးပေါ်ညီလာခံ ခေါ်ပြီးတော့ အလွှာပေါင်းစုံ၊ ဒေသပေါင်းစုံ၊ လူမျိုးပေါင်းစုံ ပါဝင်လာနိုင်အောင် ပြုပြင်ပြောင်းလဲရေး လုပ်သင့်တယ်ဆိုပြီး ခေါ်ရတာဖြစ်ပါတယ်” ဟု ပူးငွန်ကျုံးလျန်က ရှင်းပြသည်။

အသစ်ဖွဲ့စည်းလိုက်သည့် အဓိပတိ ကောင်စီ (Supreme Council)တွင် ၁၉၉ဝ လွှတ်တော် ကိုယ်စားလှယ်များ ဖြစ်ကြသည့် ဒေါက်တာဇလှယ်ထန်းနှင့် ဦးလျန်အုတ်တို့လည်း အလှည့်ကျ ဥက္ကဋ္ဌများအဖြစ် ပါဝင်လာသည်။

ပြည်ထောင်စု ငြိမ်းချမ်းရေးဖော်ဆောင်ရေးကော်မတီ ခေါင်းဆောင် ဦးအောင်သောင်းက သောကြာနေ့က ပြုလုပ် သည့် သတင်း စာရှင်းလင်းပွဲတွင် “ဒီအစိုးရ သက်တမ်းမှာ ငြိမ်းချမ်းရေး ရအောင်လုပ်မယ်လို့ ခိုင်ခိုင်မာမာ ပြောခြင်း ဖြစ်ပါ တယ်” ဟု ပြောဆို လိုက်ခြင်းအပေါ် ကြိုဆိုသော်လည်း ဖြေရှင်းစရာများအတွက် စိတ်ရှည် သည်းခံကြရမည် ဖြစ်ကြောင်း ဒေါက်တာဆလိုင်းအင်ဒရူး ငွန်ကျုံးလျန်က မဇ္ဈိမကို ပြောသည်။

“နှစ်ပေါင်း ၆ဝ ကျော် ပဋိပက္ခကြီးကို တရက်တည်း၊ တလတည်း၊ တနှစ်တည်းနဲ့ ပြီးနိုင်မှာ မဟုတ်ပါဘူး။ သုံးနှစ် အတွင်းမှာ အားလုံးနဲ့ ငြိမ်းချမ်းရေးစာချုပ် ချုပ်နိုင်ရင်တောင်မှ ကျန်ရှိနေသေးတဲ့ ရှင်းစရာ လင်းစရာတွေက အများကြီး ရှိပါဦးမယ်။ အဲဒီ အတွက် စိတ်ရှည်ဖို့လိုတယ်။ သည်းခံကြဖို့လိုတယ်။ နားလည်ကြဖို့လိုတယ်။ အဲလိုမှ မဟုတ်ရင် ပြီးခါနီးကျမှ ဆင်ပြောင်ကြီး အမြီးကျမှ တစ် ဆိုတာမျိုး ဖြစ်သွားမှာ စိုးရိမ်ပါတယ်”

နအဖ စစ်ကောင်စီလက်ထက် ၂ဝဝ၇ ခုနှစ်က အစိုးရနှင့် CNF ပထမဆုံးအကြိမ် တွေ့ဆုံဆွေးနွေးခဲ့ဖူးသော်လည်း မည်သည့် အကောင် အထည်မှ မပေါ်ခဲ့ပေ။

Ref: မဇ္ဈိမ

Read More...

Collapse...

ဒေါ်အောင်ဆန်းစုကြည်နဲ့ ထိုင်းဝန်ကြီးချုပ် သီးသန့်တွေ့မည်

ကိုဝိုင်း
ဒီဇင်ဘာလ ၁၉ ရက် ၂၀၁၁ ခုနှစ်

ထိုင်းဝန်ကြီးချုပ် ယင်းလပ် ရှင်နာဝါထရာသည် တနင်္လာနေ့က နေပြည်တော်၌ စတင်သော မဲခေါင် မြစ်ဝှမ်းဒေသ ၆ နိုင်ငံ အစည်းအဝေးခရီးစဉ်အပြီး လူထုခေါင်းဆောင် ဒေါ်အောင်ဆန်းစုကြည်နှင့် သီးသန့် တွေ့ဆုံမည်ဟု သိရသည်။

“မနက်ဖြန်မှ။ အချိန် မသိသေးဘူးခင်ဗျ။ နေရာက ကျနော်တို့ဆီမှာတော့ မဟုတ်ဘူး” ဟု အမျိုးသား ဒီမိုကရေစီ အဖွဲ့ချုပ်-NLD ဗဟိုအလုပ်အမှုဆောင် ဦးဟံသာမြင့်က မဇ္ဈိမကို ပြောသည်။ မည်သည့်ကိစ္စများ ဆွေးနွေးမည်ကိုမူ မသိရသေးပေ။

ယင်းလပ်သည် ထိုင်း၊ မြန်မာ၊ ကမ္ဘောဒီးယား၊ ဗီယက်နမ်၊ တရုတ်၊ လာအို မဲခေါင်ဒေသ ၆ နိုင်ငံ ၄ ကြိမ်မြောက် အစည်း အဝေးအပြီး အင်္ဂါနေ့ ညနေ ၅ နာရီကျော်၌ ဒေါ်အောင်ဆန်းစုကြည်နှင့် ရန်ကုန်မြို့ ထိုင်းသံရုံးတွင် တွေ့ဆုံ မည်ဟု ထိုင်းသတင်း အေဂျင်စီ TNA က တနင်္လာနေ့တွင် ဖော်ပြထားသည်။

မဲခေါင် ၆ နိုင်ငံ ထိပ်သီး အစည်းအဝေးကို ၂ဝဝ၂ ခုနှစ်မှစ၍ သုံးနှစ်တကြိမ်ကျင်းပခြင်းဖြစ်ကာ ကမ္ဘောဒီးယား (၂ဝဝ၂)၊ တရုတ်(၂ဝဝ၅) နှင့် လာအို (၂ဝဝ၈) တို့ ကျင်းပခဲ့ပြီး ဖြစ်သည်။

ဒေါ်အောင်ဆန်းစုကြည်နှင့် ထိုင်းဝန်ကြီးချုပ်တို့ တွေ့ဆုံရန်ရှိသည်ကို NLD က ကြိုဆိုပြီး မြန်မာနိုင်ငံတွင်း ထိုင်းနိုင်ငံ၏ စီးပွား လုပ်ငန်းကိစ္စများကို ဒေါ်အောင်ဆန်းစုကြည်အား ချပြဖွယ်ရှိသည်ဟု သုံးသပ်နေသည်။

“နိုင်ငံတခုရဲ့အကြီးအကဲ လာတာတော့ ဝမ်းမြောက်ဝမ်းသာကြိုဆိုခွင့်ပြုရမှာပေါ့။ သူတို့က စီးပွားရေးသမားတွေပဲ။ စီးပွားရေးကိစ္စနဲ့ ပတ်သက်တာ မြန်မာနိုင်ငံမှာ ဘယ်လို လုပ်ထားတယ်။ သူတို့ဘက်က ဒါကို ပြေလည်အောင် ဘာတွေ လုပ်ပေးရမလဲ ဒေါ်အောင် ဆန်းစုကြည်ကို မေးပြီးတော့ လုပ်ပေးနိုင်တာရှိရင် လုပ်ပေးမှာပေါ့” ဟု NLD ဒုဥက္ကဌ ဦးတင်ဦးက ဆိုသည်။

မစ္စစ်ယင်းလပ်၏ အောက်တိုဘာလ ၅ ရက်နေ့ ပထမခရီးစဉ်အတွင်းက ဒေါ်အောင်ဆန်းစုကြည်နှင့် တွေ့ဆုံခဲ့ခြင်း မရှိဘဲ သမ္မတ ဦးသိန်းစိန်အပါအဝင် ထိပ်တန်းဝန်ကြီးများနှင့် တွေ့ဆုံ၍ နှစ်နိုင်ငံကုန်သွယ်ရေးနှင့် ရင်းနှီးမြှုပ်နှံမှု တိုးမြှင့်ရေးကိစ္စများ ဆွေးနွေးခဲ့ ကြသည်။

ယင်းအပြင် ထားဝယ်ရေနက်ဆိပ်ကမ်း၌ လုပ်ပိုင်ခွင့်များရထားသည့် ထိပ်တန်းစီးပွားရေးလုပ်ငန်းရှင် ဦးဇော်ဇော် နှင့်လည်း တွေ့ဆုံ ခဲ့သေးသည်။

မဲခေါင် မြစ်ဝှမ်းဒေသ ၆ နိုင်ငံ ၄ ကြိမ်မြောက် အစည်းအဝေးသို့ တရုတ်နိုင်ငံမှ နိုင်ငံတော်ကောင်စီဝင် ဒိုင်ဘန်ဂေါင်း၊ ကမ္ဘောဒီး ယားဝန်ကြီးချုပ် ဟွန်ဆန်း၊ ဗီယက်နမ် ငုရင်တန်ဒေါင်း၊ လာအို ဝန်ကြီးချုပ် ထောင်ဆင် ထမ်မာဗေါင်း Thongsing Thammavong တို့လည်း တက်ရောက်ကြမည် ဖြစ်သည်။

အစည်းအဝေးတွင် ခေါင်းဆောင်များက မဲခေါင် ၆ နိုင်ငံအကြား စီးပွားရေး ကိစ္စများ ဦးစားပေး ဆွေးနွေးကြမည်ဖြစ်ပြီး မဲခေါင် စီမံကိန်းတွင်ပါဝင်သည့် တရုတ်-ထိုင်း၊ မြန်မာ-ထိုင်း-ဗီယက်နမ် လမ်းဖောက်ရေးကိစ္စလည်း ပါဝင် မည် ဖြစ်သည်။ ထားဝယ် ရေနက်ဆိပ်ကမ်းကိစ္စလည်း ထည့်သွင်း ဆွေးနွေးဖွယ်ရှိကြောင်း နှင့် ၂ဝ၁၂-၂ဝ၂၂ အထိ လာမည့် ၁ဝ နှစ်အတွက် မဟာဗျူဟာ အစီအစဉ်များ ချမှတ်ကြမည်ဟု သိရသည်။

မြန်မာနိုင်ငံသို့ နှစ်လာကျော်အတွင်း ဒုတိယကြိမ်သွားရောက်မည့် ယင်းလပ်နှင့်အတူ နိုင်ငံခြားရေး ဝန်ကြီး ဆူရာဖုံ တိုဝိကျတ ချိုင်းကွန်၊ စွမ်းအင်ဝန်ကြီး ဖီချိုင်း နာရစ်ဖထာဖန်တို့ လိုက်ပါသွားမည်ဖြစ်ပြီး ဒီဇင်ဘာ ၁၉ ရက် ညနေပိုင်းတွင် ဘန်ကောက်မြို့မှ ထွက်ခွာကာ နေပြည်တော်တွင် သမ္မတဦးသိန်းစိန်နှင့် တွေ့မည်ဟု ထိုင်း TNA သတင်းဌာနတွင် ပါရှိသည်။

ထိုင်းဝန်ကြီးချုပ်၏ ခရီးစဉ်အတွင်း နှစ်နိုင်ငံစွမ်းအင်ဝန်ကြီးများအကြား ကုန်းတွင်းရေနံနှင့် သဘာဝဓာတ်ငွေ့ ရှာဖွေရေး ကိစ္စများ ဆွေးနွေးနိုင်ဖွယ် ရှိသည်ဟုလည်း မြန်မာ့စွမ်းအင်ဝန်ကြီးဌာနထံမှ သိရှိရသည်။

ထိုင်းနိုင်ငံမှ မြန်မာနိုင်ငံအလယ်ပိုင်း ဧရာဝတီမြစ်ကြောင်းတလျှောက်ရှိ ကုန်းတွင်း ရေနံနှင့် သဘာဝဓာတ်ငွေ့ ရှာဖွေရေး လုပ် ကွက် သစ် ၁၈ ကွက်အချို့ကို လုပ်ကိုင်ခွင့်ရလိုနေပြီး၊ ထိုင်းစွမ်းအင် ကုမ္ပဏီ PTTEP မှ မုတ္တမ ပင်လယ်ကွေ့တွင် အသစ်တွေ့ ရှိသည့် M-3 လုပ်ကွက်မှ ဓာတ်ငွေ့များကို ကုန်းပေါ် သွယ်တန်းရေးကိစ္စများလည်း ပါဝင်နိုင်ကြောင်း ခန့်မှန်းနေကြသည်။

လုပ်ကွက်အသစ် M-3 အောင်သိင်္ခ-၂ စီမံကိန်းမှ ရေနံနှင့် သဘာဝဓာတ်ငွေ့များ တွေ့ရှိကြောင်း PTTEP က ၂ဝ၁၁ ခုနှစ် မေလက ကြေညာခဲ့သည်။

“ကုန်းတွင်းလုပ်ကွက်ပေါ့ အဲဒါတွေ သူတို့တောင်းထားတာရှိတယ်။ ရှာဖွေရေးလုပ်ရမယ့်လုပ်ကွက် ပေါ့။ M-3 ကတွေ့တဲ့ ဓာတ်ငွေ့ ကို ကုန်းတွင်းပိုင်းယူဖို့ ကိစ္စတွေလည်း ပါနိုင်တာပေါ့လေ” ဟု မြန်မာစွမ်းအင်ဝန်ကြီးဌာနမှ အမည်မဖော်လိုသူ အရာရှိတဦးက မဇ္ဈိမကို ပြောသည်။

M-3 လုပ်ကွက်မှ တွေ့ရှိသည့် ဓာတ်ငွေ့အားလုံးကို နိုင်ငံပိုင်နှင့် ပုဂ္ဂလိကပိုင် စက်မှုကဏ္ဍများသို့ တိုးမြှင့် ဖြန့်ဖြူး ပေးသွား ရန်ရှိ သည်ဟု အောက်တိုဘာ ၁၈ ရက်နေ့က ကျင်းပသည့် ပြည်သူ့လွှတ်တော် ဒုတိယအကြိမ် အစည်းအဝေး၌ စွမ်းအင်ဝန်ကြီး ဦးသန်းဌေးက ပြောဆိုထားသည်။

သို့သော် ထိုင်းဝန်ကြီးချုပ်၏ ယခုခရီးစဉ်သည် မဲခေါင် ၆ ခြောက်နိုင်ငံ ထိပ်သီးအစည်းအဝေးအတွက်သာ အဓိက သွားခြင်းဖြစ် သည်ဟု လေ့လာသူများက ခန့်မှန်းနေကြသည်။

“ထိုင်းနဲ့မြန်မာ ဆက်ဆံရေးတလျှောက်မှာ ဒီမိုကရက်ပါတီက စစ်အစိုးရကို ဝေဖန်တာ ပိုရှိခဲ့တယ်။ (ယင်လပ်၏ ဖူရာ့ထိုင်းပါတီ) က အရင်တုန်းက ဝန်ကြီးချုပ်ဟောင်း တာ့ဆင်ဦးဆောင်တဲ့ပါတီ။ သူတို့က အမြဲတန်း စီးပွားရေး ဘက်ကိုပဲ အလေးပေးတယ်။ ဒေါ်အောင်ဆန်းစုကြည်နဲ့က အခြေအနေပေးလို့ ဝင်တွေ့လိုက်တဲ့ သဘောပဲလို့ ထင်တယ်” ဟု ထိုင်းနိုင်ငံအခြေစိုက် မြန်မာ့ အရေးလေ့လာသူ ဦးအောင်သူငြိမ်းက သုံးသပ်သည်။

ထိုင်းနိုင်ငံသည် ၁၉၉၈ ခုနှစ်မှစ၍ မြန်မာနိုင်ငံ မုတ္တမပင်လယ်ကွေ့ ရတနာနှင့် ရဲတံခွန်လုပ်ကွက်မှ သဘာဝ ဓာတ်ငွေ့များကို ဝယ်ယူခြင်း ဖြစ်သည်။ ယင်းအပြင် အရှေ့အလယ်ပိုင်းနှင့် ဥရောပမှ ကုန်စည်များ တင်သွင်းရန် ရည်ရွယ်၍ ခန့်မှန်းခြေ အမေရိ ကန်ဒေါ်လာ ၅၈ ဘီလျံ ကုန်ကျခံ တည်ဆောက်မည့် ထားဝယ်ရေနက်ဆိပ်ကမ်းနှင့် အထူး စီးပွားရေးဇုန်စီမံကိန်းကိုလည်း လုပ် ကိုင်ခွင့် ရထားသည်။

ယင်းစီမံကိန်းမှာ BOT (ဆောက်လုပ်၊ လည်ပတ်၊ လွှဲပြောင်း) စနစ်ဖြင့် လုပ်ကိုင်ရမည်ဖြစ်ကာ နှစ်ပေါင်း ၆ဝ စီမံခွင့်ရမည် ဖြစ်သည်။

Ref: မဇ္ဈိမ

Read More...

Collapse...

ကြက်ရိုးဗေဒင် မေးကြည့်မယ်

နှင်းပန်းအိမ်
ဒီဇင်ဘာလ ၁၉ ရက် ၂၀၁၁ ခုနှစ်

နတ်တော်လဆုတ် လမင်းရဲ့ အလင်းရောင်က မနက်အာရုဏ်ဦးမှာ နို့ဖိုးတောင်ကိုကျော်ပြီး ဆင်းလာတယ်။ ဒီလို ဆိုရင် ကျမတို့ တဲအိမ်ထဲကို လမင်းရဲ့အလင်းရောင်က အင်ဖက်အမိုးတွေကြားကနေ ထိုးဖောက်ပြီးအလည် ရောက်လာ တတ်တယ်။ ကျမတို့ ဒုက္ခ သည်စခန်းကို ကာဆီးပေးထာတဲ့ တောင်တွေပေါ်မှာ လမင်းက မေးတင်နေတဲ့ အချိန်ဆို ရေဒီယို ခလုတ်ဖွင့်လိုက်ယုံပဲ။ နာရီ ကြည့် စရာမလိုဘူး။ ရေဒီယိုသတင်းတွေကို နားထောင်ပြီး ပြင်ပကမ္ဘာ ဆီ ကျမတို့ နားနဲ့ လှမ်းကြည့်ကြတယ်။

VOA ရဲ့ တိုက်ရိုက်လေလှိုင်းမျာ ဦးကျော်ဇံသာက ကိုမိုးသီးဇွန်ကို မေးလိုက်တယ် “ကိုမိုးသီးရေ ၈၈ အပြီး ပြည်ပမှာ လှုပ်ရှား နေသူတွေကြောင့် ဘာတွေများ အောင်မြင်မှုရသလဲလို့ သောတရှင်တဦးက မေးထားပါတယ် ခင်ဗျာ” တဲ့။

ကိုမိုးသီးဇွန်အသံက ဆောင်းလေနဲ့ဆန့်ကျင်လို့ တက်ကြွနွေးထွေးနေတယ် “ကျနော်တို့ လုပ်နိုင်သလောက် အကောင်းဆုံး ကြိုးစားပြီးလုပ်ခဲ့တယ်။ အဲဒီထဲက အောင်မြင်မှုလို့ ပြောရရင်တော့ တိုင်းရင်းသားတွေရဲ့ အခက်အခဲတွေကို ကမ္ဘာကသိအောင် ကျနော်တို့လုပ်ပေးနိုင်ခဲ့တယ်။” လို့ ဖြေခဲ့ပါတယ်။ ဘဝတွေကို ပျော်စရာတွေနဲ့ စတင် လာတာမဟုတ်ဘဲ စစ်ပြေးဒုက္ခသည်အဖြစ် ကလေးဘဝကနေ မိခင်၊ဖခင် အရွယ်။ အဲဒီကနေ အဘိုးအဘွား အရွယ်အထိ စစ်ပြေးပြီး ကိုယ့်ဇာတိမြေမှာ မဟုတ်ဘဲ တော တောင်ထဲ၊ ဒုက္ခသည် စခန်းထဲ၊ ခေါင်းချသွားတာတွေကို မြင်ရ တော့ကျမရင်ထဲ ထိထိခိုက်ခိုက် ဖြစ်ရတာ အမှန်ပါပဲ။ ဒီအဖြစ် တွေကို ကိုမိုးသီးဇွန်က ကျမထက်စောပြီး မြင်ခဲ့ သူကိုး။

တည်မြဲမှု၊ တည်ငြိမ်မှု၊ ပြည့်စုံမှုဆိုတာတွေကို သိခွင့်မရတဲ့ စစ်ပြေးဒုက္ခသည်တွေ။ ဒါက မတော်တဆ ဖြစ်တာ မဟုတ်ဘူး ကံ တရားကြောင့်မဟုတ်ဘူး။ တည်ဆဲလူနေမှုစနစ်ကြောင့် ဖြစ်ရတာပါ။ စစ်ပြေး ဒုက္ခသည်တွေက သူတို့ဘဝတွေကို ရဲရဲရင်ဆိုင်ကြ တယ်။ ဒါကြောင့်လည်း မျက်ရည်နဲ့ ရဲရင့်တဲ့အပြုံးကို ကျွမ်းကျွမ်းကျင်ကျင် ပေါင်းစပ် နိုင်ခဲ့ကြတာလို့ ကျမခံစားမိတယ်။ သူတို့ရဲ့ ဘဝရှင်သန်မှုအတွက် ဓလေ့ထုံးစံ ယဉ်ကျေးမှုတွေနဲ့ တွဲဖက် နေထိုင် ကျသူတွေလည်း ဖြစ်ပါတယ်။

ထိုင်းမြန်မာနယ်စပ်တလျှောက် ဒုက္ခသည်စခန်း ကိုးခုရှိတယ်လို့ ပြောကြပါတယ်။ အဲဒီစခန်းတွေက မဲဟောင်ဆောင် ဒုက္ခသည် စခန်းမှာ ဆယ်နှစ်ကျော်ကျော်နေခဲ့ရပြီး ယခုလက်ရှိ ဒုက္ခသည်စခန်းမှာ ငါးနှစ်ကျော် နေထိုင်ဆဲဖြစ်တဲ့ တော်လှန်ရေးသမား တယောက် ဖြစ်လည်း ဝါရင့်ဒုက္ခသည် ကိုဝင်းကိုနဲ့ ကျမ စကားတွေ ပြောဖြစ်တယ်။

ကိုဝင်းကို ဖြတ်သန်းခဲ့ရတဲ့ ဘဝခရီး ကြမ်းကြမ်းပါ။ ၁၉၉ဝ မှာ တော်လှန်ရေးနယ်မြေထဲကို ရောက်ခဲ့သူ ဖြစ်ပါတယ်။ ကိုဝင်းကိုက အသားဖြူဖြူ ကိုယ်ဟန်က ပါးပါးလျလျရှိပေမယ့် စိတ်ဓာတ်ကြံ့ခိုင်တယ် စကားပြော တိုးတိတ်ညင်သာပေမယ့် သတ္တိကောင်းတယ်။ အမှန်တရားကို မြတ်နိုးတတ်သူမို့ အမှန်တရားနဲ့ ခါးသီးမှုကို အမြဲခံရသူဖြစ်ပါတယ်။ ဒါပေမယ့် သူကိုကြည့်ရတာ ခရီးကြမ်းကို ဖြတ်ခဲ့ရတဲ့လူလို့ မထင်ရဘူး။ လက်ရှိဒုက္ခသည်ဘဝရဲ့ ထွက်ပေါက်ကို စာရေးခြင်းနဲ့ လမ်းရှာသူဖြစ်ပါတယ်။ ဒီလိုကြမ်းတမ်းတဲ့ ကိုယ့်အနာဂတ်ကို ကိုယ်မပိုင်တဲ့ဒုက္ခသည်ဘဝကို ကိုဝင်းကိုရော တခြားတိုင်းရင်းသား စစ်ပြေးဒုက္ခသည် တွေရော ဘယ်လို ရှင် သန်အောင် နေနိုင်ခဲ့သလဲ ဘာတွေက ထွန်းအားပေးခဲ့သလဲလို့ ကျမကမေးတော့ “အမရေ ဇာတိစိတ်နဲ့ ကိုယ့်ယဉ်ကျေးမှု ဓလေ့ ထုံးစံတွေက ကျနော်တို့ကို ရှင်သန်စေခဲ့တာ။ ဒါ့အပြင် တနေ့ ကျနော်တို့ မြန်မာပြည်မှာ ငြိမ်းချမ်းရေးရမယ်ဆိုတဲ့ မျှော်လင့်ချက် ကလည်း ကျနော်တို့ကို ရှင်သန်စေတာပါပဲ။ တနေ့ကိုယ့်ဇာတိကိုပြန်ပြီး ငြိမ်းချမ်းတဲ့ ကိုယ်ပိုင်ဘဝတွေကို တည်ဆောက်နိုင် ရမယ် ဆိုတဲ့ စိတ်လည်း ပါတာပေါ့ အမရယ်” တဲ့။

မဲ့ဟောင်ဆောင်မှာနေခဲ့တဲ့ ကိုဝင်းကိုက ကယား(ကရင်နီ) လူမျိုးတွေရဲ့ ဓလေ့ထုံးစံ ယဉ်ကျေးမှုအကြောင်း ကျမမေးကြည့်တော့ နို့ဖိုးမှာနေတဲ့ ကိုဝင်းကို စိတ်တွေ မဲ့ဟောင်ဆောင်ဆီ တဒင်္ဂ ထွက်ပြေးသွားတယ်။

“မဲ့ဟောင်ဆောင်မှာ ကယား(ကရင်နီ) ၊ ကယော၊ ကယန်း၊ ဂေခို၊ ဂေဘား၊ မနူး၊ မနော၊ ယင်းဘော၊ ယင်းတလဲ၊ ဆိုတဲ့ လူမျိုးစုတွေရှိတယ်။ ကိုးကွယ်ကျတာတော့ မိရိုးဖလာ ဗုဒ္ဓဘာသာ ရှိတယ်။ နတ်ဗုဒ္ဓဘာသာ ရှိတယ်။ ခရစ်ယာန် ဘာသာရှိတယ်။ မဲ့ဟောင်ဆောင် ဒုက္ခသည်စခန်းက တောင်စောင်းတွေမှာပဲ အိမ်လေးတွေ ဆောက်နေကြတာပဲ။ ကယား(ကရင်နီ)လူမျိုးတွေက တောင်ယာ လုပ်ငန်းနဲ့ အသက်မွေးနေကြတဲ့သူတွေပဲ။ တောင်စောင်းတွေမှာပဲ
တောင်ယာ စိုက်ကြတယ်။ စပါးစိုက်တော့ ဆူးထိုးစိုက်ကြတယ်။”

“ကျနော်တို့ အဲဒီတုန်းက လူပျိုဘဝနဲ့ တော်လှန်ရေးထဲမှာ ရှိနေကြတဲ့အချိန်ပေါ့။ ပန်းပွင့်ဆိုတာ အချိန်ရှိတုန်း ပွင့်ကြ တာပါ။ အခါရာသီတုံးသွားရင် ဘယ်မှာပန်းပွင့်ရှိတော့မှာလဲ။ ဒီလိုပဲ လူငယ်တွေရဲ့ ချစ်ခြင်းမေတ္တာ ဆိုတာလည်း ပန်းပွင့်တွေလိုပဲပေါ့ အမရယ်။”

“လူပျိုတွေက အပျိုအိမ်သွားရင် အပျိုရဲ့ ညီအကိုမောင်နှမတွေက တခြားအိမ်ကို သွားလည်ကြတယ်။ အပျိုက လက်ခံရင် မိုးလင်း ပေါက် စကားထိုင်ပြောလို့ရတယ်။ ညဘက်ဆိုတော့ မီးအလင်းရောင်ရဖို့် ထင်းရူးဆီနဲ့ မီးထွန်းတာ လူပျိုကလည်း သုံးလေး ယောက် ဆိုတော့ စကားပြောတဲ့သူကပြော၊ မီးထွန်းဖို့ ထင်းရူးဆီ ခုတ်တဲ့သူကခုတ်နဲ့၊ မီးငြိမ်းလို့မရဘူး။ မီးငြိမ်းရင် ရိုးရာအရ ဆေးကြောရတယ်။ ကံမကောင်းဘူးလို့ အဓိပ္ပါယ်ရတယ်။ ရိုးသားမှု ပွင့်လင်းမှု ရှိရမယ်။ အပျိုရဲ့အိမ်လုပ်ငန်းတွေကို ဝိုင်းကူးရင်း လူပျိုက အပျိုပေါ်ထားတဲ့မေတ္တာကို ခွန်အားနဲ့လည်း ဖော်ပြကြ တယ်။”

“မြေပဲပေါ်ချိန်ဆိုမြေပဲ နုတ်ပေးရတယ်။ မြေပဲကိုနေလှန်းထားပြီး ညဘက်ဆိုလူပျိုလှည့်ရင် အပျိုကတချက်ခုတ် နှစ်ချက်ပြတ် မြေပဲပုံပေးထားတယ်။ မြေပဲကိုဝါးကြမ်းပြင်ပေါ်ကို ထိုးထိုးပြီးအခွံခွာရင်း စကားပြောတာလေ။ ဒီလိုမျိုးနဲ့ လူပျိုလှည့်သလို တချို့ ကြတော့လည်း ငွေကြေးအသင့်အသင့် ပြည့်စုံသူ လူပျိုက ကက်ဆက်လေး ပုခုံးထမ်းပြီး အိမ်ရှေ့ကနေ လူပျိုလှည့်တာပဲ အဲဒီ လူပျိုက ပိုပြီးမျက်နှာပွင့်တာပေါ့။ အပျိုကလက်ခံလို့ ကြိုက်ပြီဆိုရင် အပျို အတွက် လက်ဆောင်တင်ရတယ်။ အပျိုမိဘတွေဆီမှာ လူပျိုက ကတိပြုပြီး ပစ္စည်းနဲ့တင်တောင်းတာ စေ့စပ်တာပေါ့။ အပျိုဘက်ကလည်း ပျက်ကွက်ရင် လူပျိုကို နှစ်ဆပြန်လျှော်ရတယ်။ လူပျိုဘက်က ပျက်ကွက်ရင်တော့ လျှော်စရာ မလိုဘူး။”

မင်္ဂလာဆောင်တာကတော့ ကျနော်တို့မြေပြန့်နဲ့ သိပ်မကွာဘူး။ ကလေးမွေးဖွားရင်တော့ ကလေးမိခင်ဝမ်းက ကျွတ်တာနဲ့ ဖခင်က တူမီးသေနတ်ထမ်းပြီး တောလည်ရတယ်။ သားကောင်လိုက်ပစ်ရတယ်။ သားကောင်ကြီးကြီး ရရင် ဒီကလေးက အကျိုးပေးတယ် လာခြင်းကောင်းတယ်လို့ ပြောကြတယ်။ ဒီတော့ တောထဲက သားကောင် ကြီးကြီး မရရင်တော့ ဖခင်ဖြစ်သူက ငှက်ပဲဖြစ်ဖြစ် ရအောင်ပစ်လာတယ်။ သူတို့ဓလေ့မှာ သင်္ကြန်ဆိုတာ ရှိတယ်။ “ကူထိုးဘိုး” ဆိုတာ တံခွန်တိုင်ကို တန်ခူးလမှာ စိုက်ထူကြတယ်။ တံခွန်တိုင်ကို သွားခုတ်ရင် အဲဒီသစ်ပင်က အပြစ်အနာအဆာ မရှိရဘူး။ သန့်ရှင်းပြီးတော့ သစ်ကောင်း၊ သစ်မြတ် ဖြစ်ရမယ်။ တံခွန်တိုင်ထမ်းလာတဲ့သူတွေကို အပျို အအို မိန်းမတွေက အောင်သပြေပန်းနဲ့ ရေပက်ဖြန်းကြတယ်။ တံခွန်တိုင်ထိပ်မှာ သစ်သား ဒါမှမဟုတ် ဝါးနဲ့ ထီးပုံ လုပ်ထားတယ်။ တံခွန်တိုင်ကို အဖွဲ့လိုက် ကကြတယ်။ ဒါကလည်း ပွဲတခုပဲ။”

“ဒီးကူး ပွဲဆိုတာကလည်း ယွန်းပဒေရာဇ်တွေကို ကရင်နီတွေက သူတို့ကိုယ်ပိုင်မြေပေါ်က မောင်းထုတ် နိုင်တဲ့ပွဲ။ အဲဒီတိုက်ပွဲ ကာလမှာ ရိက္ခာအတွက် ကောက်ညင်း သုံးထုပ်ကို ပေါင်းချည်ထားတယ်။ စည်းလုံး၊ ညီညွတ်မှုကို အဓိပ္ပါယ်ဖွင့်ဆိုတယ်။ ရန်သူကို အောင်နိုင်တဲ့အထိမ်းအမှတ်အနေနဲ့ နှစ်စဉ် ဆင်နွဲကြတာပါ။”

“ကောက်သစ်စားပွဲကတော့ တခြားရိုးရာပွဲတော်တွေလောက် မထင်ပေါ်ဘူး။ တောင်ယာပိုင်ရှင်က ကောက်သစ် စပါးကို မောင်း ထောင်းပြီး ရလာတဲ့ဆန်ကို ချက်တယ်။ ဝက်သားကို ကျောက်ဖရုံသီးနဲ့ ရောပြီး ချက်ကျွေးမွေးကြ တယ်။ ခေါင်ရည်သောက် ထမင်းစားပြီးရင် ကယား နပမ်းလုံးကြတယ်။ နပမ်းလုံးမယ့်သူက ပေါင်နဲ့ခါးမှာ ပုဆိုး ချည်ထားရတယ်။ တဘက်လူက ပုဆိုးဆွဲပြီး နပမ်းလုံးကြတယ်။ လှဲကြသူက အရှုံးပဲ။ အားချင်းပြိုင်တဲ့ ရိုးရာ အားကစားပွဲပေါ့။”

“ကယား(ကရင်နီ)တွေမှာ သေဆုံးရင် ရိုးရာအရ အဘိုးအဘွားတွေက ဧယဉ်ကျူးတယ်။ သေဆုံးသူရဲ့ ဘေးမှာပေါ့။ သေဆုံး သူရဲ့ဘဝနဲ့ သေဆုံးသူရဲ့ကောင်းကြောင်းကို သိစေချင်လို့လေသေလို့ မြုပ်ရင် သေဆုံးသူ နောင်ဘဝမှာ အသုံးပြုဖို့ ပေါက်ပြား၊ ဓား၊ မျိုးစေ့နဲ့ သူ့ရဲ့အသုံးအဆောင်ပစ္စည်းတွေပါ ထည့်ပြီး မြေမြုပ်ပေးလိုက်တယ်။ ထမင်းနဲ့ ကြက်သားဟင်းပါ ထည့်ပေးသလို ကြက်ကိုသတ်ပြီး ဆန်ပါ ထည့်ပေးတယ်။”

“ကယားတွေ ယုံကြည်တဲ့ ဗေဒင်နှစ်မျိုးရှိတယ်။ “ဖိုးထီးခရီ”ဆိုတဲ့ အဖိုးတောင်းနတ်နဲ့ ကြက်ရိုးဗေဒင်ဆိုတာ ရှိတယ်။ ဖိုးထီးခရီ ဆိုတာကတော့ တန်ခူးလ တံခွန်တိုင်ထူတဲ့ ပွဲတော်ချိန်အတွင်းမှာပဲ မေးလို့ရတာ။ ကြက်ရိုးဗေဒင်ကတော့ အချိန်ရာသီမရွေး အသုံး ပြုလို့ရတဲ့ ဗေဒင်။”

“ဖိုးထီးခရီ အဖိုးတောင်းနတ်ဆိုတာ ဝါးကိုဖြာပြီး ယက်ထားတဲ့တောင်းကို လူနှစ်ယောက်ကိုင်ပြီး မေးချင်တဲ့ မေးခွန်း ကိုမေးလို့ ရတယ်။ ဥပမာ ဒီနှစ်တောင်ယာ စပါးကောင်း၊ မကောင်း မေးမယ်ဆိုရင် တောင်ယာစပါး ကောင်းမယ်ဆို တောင်းရိုက်ပြပါဆို လူနှစ်ယောက်ကိုင်ထားတဲ့ တောင်းကထိန်းမနိုင်အောင် ကြမ်းနဲ့ ရိုက်ပြတာ။”

“ကြက်ရိုးဗေဒင်အတွက် အသုံးပြုမယ့် ကြက်အရှင်က အထီးဆို တွန်ပြီးရမယ်။ အမဆို ဥ,ဥပြီးရမယ်။ ဗေဒင်ဆရာက ကြက် အရှင် ကို ပေါင်းကြားမှာညှပ်ပြီး လက်နဲ့ပေါင်ရိုးကို ဆောင့်ထိုးလိုက်တယ် အရိုးပေါ်လာတော့ ကြက်ရဲ့ပေါင်မှာ ကပ်နေတဲ့ အသား ကိုခြစ်လိုက်တယ်။ တင်ပါးဆုံအရိုး အောက်နားကို နှီးဖျားလေးနဲ့လိုက်ထိုးတယ် အဲဒါကိုကြည့်ပြီး ဗေဒင်ထွက်တာ။ မှန်တယ်လို့ ပြောတာများတယ်။ ဗေဒင်ဆရာပြောတာ လွဲခဲတယ်လို့ ပြောကြတာပဲ။ အမကော မေးကြည့်ချင်လား” တဲ့။

ကိုဝင်းကိုပြောတဲ့ ကြက်ရိုးဗေဒင်က လွဲခဲတယ်ဆိုရင် ကျမ မေးကြည့်ချင်တယ်။ ကျမတို့ တိုင်းရင်းသားတွေနဲ့ မြန်မာ ပြည်ကြီး အတွက်ပါ။ “စစ်မှန်တဲ့ ဖယ်ဒရယ် ပြည်ထောင်စုနဲ့ ငြိမ်းချမ်းရေး ဘယ်တော့ရမလဲ။” လို့။

Ref: မဇ္ဈိမ

Read More...

Collapse...

'ဥပစ္ဆေဒကံနဲ့ သေရမယ့်ဇာတာ ပါတော့လည်း ဘယ်တတ်နိုင်ပါ့မတုန်း'

ထွန်းထွန်း
ဒီဇင်ဘာလ ၁၉ ရက် ၂၀၁၁ ခုနှစ်
(ရွှေညဝါဆရာတော် အင်တာဗျူး)

ကျောင်းတိုက်မှ ဖယ်ရှားရန် ဖိအားပေးခံနေရသည့် ရွှေညဝါဆရာတော် ဦးပညာသီဟ မှာ ၁၉၈၈ အရေးအခင်း ကာလအတွင်း စတင်ဘာ ၁၇ ရက်နေ့က ရန်ကုန်မြို့ ကုန်သွယ်ရေးရုံး အပေါ်ထပ်တွင် လူထုကြီး၏ ဝိုင်းဝန်း ညှပ်ပိတ် မှုကို ခံနေရသည့် စစ် သား (၁၂) ယောက်အား ကယ်ထုတ်ပေးခဲ့သည့် ကိုယ်တော်တပါး ဖြစ်သည်။

နှစ်ဖက်အထိအခိုက် မရှိစေရန်နှင့် ငြိမ်းချမ်းစွာ ဖြေရှင်းရေးအတွက် ရည်ရွယ်၍ ဆောင်ရွက်ခဲ့သူ ဆရာတော်မှာ ယင်းစစ်သား များ အား သံဃာဟန်ဆောင်စေ၍ ခေါ်ထုတ်ခဲ့ပြီး ယင်းကာလ စစ်တပ် အထိုင်ချရာ အောင်ဆန်းကွင်း သို့ ပို့ဆောင်ပေးခဲ့ရသည်ဟု သိ ရသည်။

ကုန်သွယ်ရေးရုံး အဖြစ်အပျက်အတွင်း စစ်သားများအား ကူညီခဲ့ပုံများနှင့် ပတ်သက်၍ ဆရာတော်အား မဇ္ဈိမ သတင်းထောက် ထွန်းထွန်းက ဆက်သွယ် မေးမြန်းထားပါသည်။


၈၈ အရေးအခင်းတုန်းက အရှင်ဘုရား ကုန်သွယ်ရေးရုံးမှာ စစ်သားတွေကို ကယ်ခဲ့တယ်လို့ ကြားပါတယ်။ အဲဒီကိစ္စ သေချာ အောင်လို့ တပည့်တော် မေးကြည့်တာပါ ဘုရား။

“ဟုတ်တယ်လေ။ ပြည်သူနဲ့ တပ်ကြားမှာ ဘယ်သူ့ဘက်ကအနေနဲ့ သေကြေပျက်စီးမှာစိုးလို့ ဘုန်းကြီးနဲ့ ဘုန်းကြီး သံဃာတွေ အကုန်လုံးက ကြားက ဝင်ဖြန်ဖြေပေးတာလေ။ ဝင်ဖြန်ဖြေပြီးတော့ သူတို့တပ်တွေကို သူတို့ ပြည်သူတွေ၊ အောက်က လူထုတွေ မသိအောင် သင်္ဃန်းကြို၊ သင်္ဃန်းကြားထဲ ပတ်ပြု၊ ခေါင်းရိတ်၊ သင်္ဃန်းပတ်ခေါ်သွားပြီး အောင်ဆန်းကွင်းထဲ သွားအပ်ထားတာ”

အဲဒီတုန်းက စစ်သား ဘယ်နှယောက်ရှိသလဲ ဘုရား။

“အများကြီးပေါ့”

အဲဒီတုန်းက အဖြစ်အပျက်ကို ပြန်ပြောပြပါလား ဘုရား။ လူထုက သူတို့ကို ဘာလို့ ဒေါသထွက်သလဲ၊ ဘယ်လိုဖြစ်သလဲဆိုတာ။ နောက်ပြီးတော့ အရှင်ဘုရားတို့ ဘယ်လို တက်ပြီး ဆောင်ရွက်ခဲ့ရသလဲဆိုတာ။

“သူတို့က ကုန်သွယ်ရေးရုံးအပေါ်ကနေ စီးထားတာလေ။ လက်နက်တွေနဲ့ ချိန်ထား တာလေ။ အောက်ကလည်း လူထုက ပုရွက်ဆိတ်အုံကြီးလိုပဲလေ။ အဲဒီအခြေအနေ တင်းမာမှုတွေကို ဘုန်းကြီးက ရွှေတိဂုံဘုရားမှာ အထိုင်ချ တော့… ဟို အကြောင်း ကြားတော့ ဘုန်းကြီးက သွားပြီးတော့ အဲဒီရုံး ပေါ်ကို တက်လို့တောင် မပြီးသေးဘူး လူထုတွေက နောက်ကနေပြီးတော့ ကျုပ်တို့ တောင်မှ မလိုလားတဲ့ စကားသံတွေနဲ့ အော်သေးတယ်လေ”

မလိုလားဘူးဆိုတာ ဘယ်လိုအော်တာပါလဲ ဘုရား။

“သြော်...မလိုလားဘူးဆိုတာ ကျုပ်တို့က ဖြန်ဖြေဖို့၊ ဒုက္ခမရောက်ဖို့၊ သေကြေမပျက်စီးဖို့၊ သွေးချောင်းမစီးဖို့ အတွက် ပြည်သူ တွေလည်း တောင်းပန်၊ တောင်းပန်ရင်း အဲဒီအပေါ်လည်း တက်သွားဆိုတော့ ကျုပ်တို့ကို အထင်လွဲတာပေါ့ဗျ။ တပ်ဘက်က လို လို၊ သစ္စာဖောက်လိုလို ဘာလိုလို အထင်လွဲတာပေါ့”

တက်သွားတော့ အရင်ဆုံး ဘယ်လိုတွေ့ရသလဲ ဘုရား။

“တက်သွားတော့ မတက်ခဲ့နဲ့ ပြောတာပေ့ါဗျ။ လောင်ချာကြီးတွေ၊ သေနတ်ကြီးတွေနဲ့ ချိန်ထားတာပေါ့ဗျ။ မင်းတို့ကို ရန်လုပ်ဖို့ တက်လာတာ မဟုတ်ဘူးလို့။ မင်းတို့လည်းပဲ ပြည်သူကြားက တပ်သားတွေပဲလို့။ ပြည်သူ မွေးထားတာ လို့။ အဲဒါမှ မင်းတို့ လူလို နားမလည်ရင်လည်း ပစ်ချလိုက်ကွာလို့။ သိပ်တော့ မင်းတို့ကိုလည်း ငါက မကြောက်လို့ တက်လာတာပေါ့ကွာလို့။ မင်းတို့ ကို ရန်လုပ်ဖို့ တက်လာတာ မဟုတ်ဘူးလေကွာ။ တို့လက်ထဲ ဘာပါလို့တုန်းလို့”

“အောက်မှာ ပြည်သူတွေက ပုရွက်ဆိတ်အုံကြီးလို ဖြစ်နေတာ မင်းတို့ ဘာလုပ်မလဲ၊ ပစ်မှာလား။ တက်လာရင်တော့ ပစ်မှာ။ အေး မတက်အောင် ငါတို့ လုပ်ပေးမယ်။ မင်းတို့လည်း မပစ်နဲ့ပေါ့။ ဒီလိုပြောရ တာပေါ့ဗျ”

အဲဒီတုန်းက သူတို့ကကော ဘာပြန်ပြောသလဲ ဘုရား။

“နောက်ကျတော့ ဖြန်ဖြေရေးတရား ဟောတာပေါ့ဗျာ။ ရွှေပြည်အေးတရားပေါ့၊ ငြိမ်းချမ်းရေးတရားလေး ဘာလေး ပြောဆိုပြီး ခင်ဗျားတို့ကို ကျုပ်တို့ သွားရမယ့်နေရာ၊ သွားလိုတဲ့နေရာကို ရအောင် ကဲ့ပြီးတော့ နောက်ဖေးပေါက်က ခင်ဗျားတို့ အသွင် သဏ္ဌာန်တူ ပုံစံလုပ်ပြီးတော့ ထုတ်ပေးမယ်ဆိုပြီး ကျုပ်ရဲ့ လက်အောက်ကိုယ်တော်တွေကို အမြန်ဆုံး ခေါင်းရိတ်သင့်တဲ့ ရိတ်ပေး၊ သင်္ဃန်းပတ်သင့်တဲ့သူ၊ ခေါင်းရိတ်ဖို့ အချိန်မရတဲ့သူကို သင်္ဃန်းခေါင်းမြီးချုံ ပြီးတော့ ထုတ်ပေးရတာပေါ့။ အဲဒီတုန်းက တပ်မတော် ဗျူဟာမှူး အောင်ဆန်းကွင်းမှာ အထိုင်ချတယ်။ အဲဒီကို သွားအပ်လိုက်တာ။ ကျုပ်ရဲ့ မှတ်တမ်းစာအုပ်တွေက မရှိတော့ဘူးလေဗျာ။ အဲဒီတုန်းက အဖမ်းခံရတော့ သူတို့ပဲ သိမ်းသွားတာ”

ဒါဆိုရင် သူတို့ကို အောင်ဆန်းကွင်းမှာ သွားအပ်လိုက်တာပေါ့ ဘုရား။

“သွားအပ်လိုက်တာပေါ့။ ဘယ်နှယောက် အပ်တယ်၊ လက်ခံရရှိတယ်၊ လက်မှတ်တွေ ဘာတွေလည်း ဘယ်ရှိတော့ မလဲဗျ။ အဖမ်းခံရတော့ အကုန်ပါသွားတာပေါ့။ ခင်ဗျားတို့ Press တွေက ရေးတယ် ဆိုရင်လည်းပဲ ကျုပ်တို့ကို မလိုလားအပ်တဲ့ ချဲ့ကားမှုတွေ မပါဘဲနဲ့ပေါ့လေ။ အဲဒီတုန်းက ပြည်သူနဲ့ အရပ်သားနဲ့ တပ်သားကြားမှာ ကြားဝင်ပြီး ဖြန်ဖြေခဲ့တဲ့ ငြိမ်းချမ်းရေးရဲ့အစ ပုံဖော်ခဲ့တယ်လေ ကျုပ်။


အဲဒီတုန်းက အပေါ်မှာ နေနေတဲ့စစ်သားတွေကို ပြည်သူတွေက ဘာကြောင့် ဒေါသထွက်နေတာလဲ ဘုရား။

“အာ…ကုန်သွယ်ရေးအရေးအခင်းက ကျုပ်တို့က နောက်မှ ရောက်သွားတာလေ။ တင်းမာမှုတွေ ဖြစ်နေမှ ရောက် သွားတာလေ။

သူတို့ကကော ပစ်ခတ်မှုတွေ ရှိနေလား ဘုရား။

“မရှိပါဘူး အဲဒီတုန်းက။ ပစ်မယ့်ဆဲဆဲကြီး ဖြစ်နေတာ။ အထက်အမိန့်ပေးလိုက်ရင်တော့ ဆော်ပြီပေါ့။ ဆော်ရင် တော့လည်း အဲဒီမှာ ပိုးလို့ပက်လက်တွေ သေကုန်ပြီ။ ကျန်တဲ့သူတွေလည်း ပြေးမှာပေါ့ဗျ။ မပစ်သေးတဲ့ အတွက်ကြောင့် အောက်ကနေပြီး နင်လား၊ ငါလားနဲ့ ဆဲဆိုနေကြတာ။ အဲဒီလို အဲဒီလို။ အထက်ကသာ အမိန့်ပေးလိုက်ရင် ပြီးပြီပေါ့”

အရှင်ဘုရားကိုကော သပိတ်ကော်မတီကနေ အကူအညီတောင်းတာလား ဘုရား။

“သတင်းတွေက လာပို့တာလေဗျာ။ ကျုပ်တို့မှာလည်း အဲဒီတုန်းက ဒီလို ဟမ်းဖုန်းတွေ ဘာတွေ မရှိပေမယ့် ခြေမြန် တပ်သား တွေ၊ ခြေမြန်ကိုယ်တော်တွေ၊ နောက် အကျိုးလိုလားတဲ့သူ တချို့ကလည်း ဒီလို တရားမဝင်နဲ့ ဖုန်းတခု ပေးထားတယ်။ အဲဒီ တုန်းက ဟမ်းဖုန်းက မရှိသေးတာကိုး။ အဲဒီလို အဲဒီလို။ အကြောင်းကြားတော့ သွားရတာပေါ့။ ဆက်သွယ်မှုတွေ ဘာတွေလေ”

“အဲဒီတုန်းကလည်း ကျုပ်တို့ကလည်းဗျာ… အသက်က ၂၃ နှစ်စွန်းစွန်းပဲ ရှိသေးတာ။ မကြောက်မရွံ့နဲ့ ဒီလိုပဲ အခု Trader ပေါ့ဗျာ။ ပပဝင်းရုံနား ဟိုဘက်ကဆို ရဲရင့်ရုံပေါ့။ ဟိုဘက်ကဆို ဘူတာရုံပေါ့။ အဲဒီနေရာမှာ၊ လေးပွင့်ဆိုင်တွေမှာလည်း ကျုပ်တို့ ဝင်ရှင်းရတာပဲ… ဒီလိုပဲ။ မလုပ်ပါနဲ့ဗျာ၊ မပစ်ပါနဲ့ဗျာ…ဒီလိုပဲ ပြောရတာ။ အဲဒီလိုနဲ့ ယောင် ကန်းကန်းနဲ့ အဲဒီလို ကယ်ဆယ်ရေး တွေနဲ့၊ တပ်နဲ့ ပြည်သူအကြား ဖြန့်ဖြေရင်းနဲ့ နောက်ဆုံး အာဏာသိမ်းသွားပြီး ဘုမသိ ဘမသိနဲ့ အဖမ်းခံရတာလေ။ ပြီးသွား တာပဲ။ ကျုပ်ရဲ့ ၈၈ နိုင်ငံရေးသမိုင်း အကျဉ်းချုပ်ကတော့ အဲဒါပဲ။ ရှင်းတယ်နော်”

ခုချိန် စစ်တပ်က ပစ်မယ်ခတ်မယ်၊ အဲဒီလိုလုပ်မယ် ဆိုရင်ကော အရှင်ဘုရားစိတ်ထဲမှာ ဘယ်လိုဆန္ဒ ရှိပါသလဲ ဘုရား။

“ဟား ဟား ဟား ဟား။ ခင်ဗျား တကယ့်အရေးမှ မရောက်သေးတာ။ ကျုပ်ကလည်း မပစ်သေးခင်တော့ လုပ်မယ်၊ ချမယ်ပဲ ပြန်ဖြေမှာပေါ့ဗျ။ ချမယ်ဆိုတာက ဖြန်ဖြေရေး လုပ်ငန်းကို လုပ်မှာပေါ့ဗျ။ အကယ်၍မှ ကံဆိုးလို့ ဥပစ္ဆေဒကံနဲ့ ရင်ဘက်ပွင့်ပြီး သေရမယ့်ဇာတာပါတော့လည်း ဘယ်တတ်နိုင်ပါ့မတုန်းဗျ။ ကျုပ်လည်းပဲ အလုပ်တခု လုပ်မယ်ဆိုရင် ဗေဒင်လေးဘာလေး သေသေချာချာ၊ ကျကျနန မေးပြုပြီး တွက်ကြည့်ရသေးတယ်။ သေနိုင်သလား၊ ထောင်ကျနိုင်သလားဆိုတာ၊ အဲဒီလိုလေး မေးမြန်းပြီးမှ လုပ်ရတယ်”

“အခုတောင် ကျုပ်က မေးထားသေးတယ်။ ဇာတာနဲ့ သေသေချာချာ၊ ကျကျနန မေးထားတယ်။ ၁၆ ရက်နေ့ ညနေ ၅ နာရီ ဒီဘက်ကို လက်မထောင်လို့ ရပြီတဲ့။ အဆိုးတွေက လွတ်သွားပြီတဲ့။ ကျုပ် မေးနေကျပုဂ္ဂိုလ်ကို မေးထားတာ”

အခု လောလောဆယ်ကော အခြေအနေ ဘယ်လိုရှိပါသလဲ ဘုရား။

“ကျုပ်နေရာ ကျုပ်နေပြီး ကျုပ်သာသနာပြုလုပ်ငန်း ယန္တရားတွေ ပုံမှန် လည်ပတ်နေတယ်လေ။ သက်ဝင် လှုပ်ရှား နေတယ်လေ။ အဲဒါမှ မကျေနပ်လို့ အဓမ္မနည်းနဲ့ သုံးမယ်ဆိုရင်တော့လည်း လာခဲ့ပေါ့ဗျာ။ မကြောက်လို့ကို စည်းဝိုင်း ထဲမှာကို ကျုပ်က ပြောင် ပြောင်တင်းတင်း တွယ်နေတာလေ။ ကျုပ် မှန်နေသရွေ့ မကြောက်ဘူး။ ကျုပ်မှားရင်တော့ ကြောက်ရမှာပေါ့ဗျ”

“ကျုပ်က တရားဥပဒေလည်း ချိုးဖောက်ထားတာ မဟုတ်ဘူး။ ရာဇဝတ်မှုလည်း ကျူးလွန်တာလည်း မဟုတ်ဘူး။ နိုင်ငံတော် ပုန်ကန်တာလည်း မဟုတ်ဘူး။ အကြမ်းဖက်တာလည်း မဟုတ်ဘူး”

Ref: မဇ္ဈိမ

Read More...

Collapse...

ဒဲရက်မစ်ချယ် - မြန်မာဆိုင်ရာမူဝါဒ ကင်းထောက်

ဒီဇင်ဘာလ ၁၉ ရက် ၂၀၁၁ ခုနှစ်

မြန်မာနိုင်ငံဆိုင်ရာ အမေရိကန် အထူးကိုယ်စားလှယ်နှင့် မြန်မာပြည်ဆိုင်ရာ မူဝါဒညှိနှိုင်းရေးမှူး ဒဲရက်မစ်ချယ် သည် မြန်မာအစိုးရ အရာရှိများနှင့် ဆွေးနွေးပြောဆိုခဲ့သည်များကို ပေကျင်းမြို့ရှိ အမေရိကန်သံရုံး၌ အင်္ဂါနေ့က တရုတ်အစိုးရ အရာရှိများကို သူ၏ ခ ရီး စဉ်အပြီး ရှင်းလင်းပြောပြခဲ့သည်။

အဆိုပါ တွေ့ဆုံမေးမြန်းခန်းတွင် မြန်မာအစိုးရသစ်၏ မကြာသေးခင်က ပြုလုပ်ခဲ့သော ပြုပြင်ပြောင်းလဲရေး လုပ်ငန်းများအပေါ် အမေရိကန်အစိုးရ၏ အမြင်၊ ဒေသတွင်း လုံခြုံရေးကိစ္စများ၊ တိုင်းရင်းသား လူနည်းစု အရေးနှင့် မြန်မာနိုင်ငံ ပြုပြင်ပြောင်းလဲရေး လုပ်ငန်းများနှင့် စပ်လျဉ်းသည့် အမေရိကန်နှင့် တရုတ်နိုင်ငံတို့ အကြား ပူးပေါင်း ဆောင်ရွက်မှုကိစ္စများ ပါဝင်သည်။ အမေရိကန် နိုင်ငံခြားရေး ဝန်ကြီးဌာနမှ ထုတ်ပြန်သည့် အဆိုပါ တွေ့ဆုံမေးမြန်းခန်းကို အနည်းငယ်ကို တည်းဖြတ်တင်ဆက် ထားပါသည်။


နိုင်ငံခြားရေးဝန်ကြီး ဟီလာရီကလင်တန် မြန်မာနိုင်ငံကို သွားရောက်အပြီးမှာ အမေရိကန်နဲ့ မြန်မာနိုင်ငံ ဆက်ဆံရေး တစုံတရာ ပြောင်းလဲသွားပြီလို့ ယုံကြည်ယူဆ မှုတွေရှိနေပါတယ်။ အမေရိကန် နိုင်ငံခြားရေး မူဝါဒမှာ မြန်မာနိုင်ငံဟာ ဘယ်လိုအခန်း ကဏ္ဍက ဆက်ရှိနေမှာပါလဲ။

"ဆက်ဆံရေးကတော့ ဆက်ပြီးတိုးတက်နေမှာပါ။ သူတို့က ပြုပြင်ပြောင်းလဲရေး လုပ်ငန်းတွေ လုပ်နေသမျှ အမေရိကန်ကလည်း အထောက်အပံ့တွေ ပေးနေမှာပါ၊ ဒီဖြစ်စဉ်မှာ လက်တွဲဆောင်ရွက်နေမှာပါ။"

"နိုင်ငံခြားရေးဝနကြီးနဲ့ သွားခဲ့တဲ့ ခရီးစဉ် အပါအဝင် ဒီနိုင်ငံကို လေးကြိမ် သွားခဲ့ပါပြီ။ တကြိမ်သွားပြီးတိုင်း၊ သွားပြီးတိုင်း ကျနော်တို့ကြားမှာ ယုံကြည်မှုတည်ဆောက် နိုင်ခဲ့တယ်၊ အဆက်အသွယ်တွေ တည်ဆောက်နိုင် ခဲ့တယ်၊ ဆက်ဆံရေး တည် ဆောက်နိုင်ခဲ့တယ်လို့ ထင်ပါတယ်။ လွန်ခဲ့တဲ့ သုံး၊လေး လအတွင်း ဒါမှမဟုတ် ဒီထက်နဲနဲ ပိုတဲ့အချိန်အတွင်းနိုင်ငံခြားရေးဝန်ကြီး နဲ့ ငါးကြိမ်တွေ့နိုင်ခဲ့ပါတယ်။ မြန်မာနိုင်ငံဟာ အာဆီယံ အဖွဲ့ကြီးအတွက် မရှိရင်မဖြစ်တဲ့ အစိတ်အပိုင်းတရပ်ပါ။ နိုင်ငံတွင်းမူဝါဒများနဲ့ ဖွံ့ဖြိုးမှုနည်းပါးတာကြောင့် ခုလို ဒီအဖွဲ့ကြီးနဲ့ကြာရှည်ကြာများ ကင်းကွာနေရတာပါ။"

"မြန်မာနိုင်ငံနဲ့ ဆက်ဆံရေးကြောင့် တရုတ်-မြန်မာ ဆက်ဆံရေးမှာ အနုတ်လက္ခဏာဆောင်တဲ့ ဘယ်လို သြဇာ သက်ရောက်မှု ပဲဖြစ်ဖြစ် ပေါ်ပေါက်လာစေဖို့ အမေရိကန်မှာ ရည်ရွယ်ချက်မျိုး မရှိပါဘူး။ ဘယ်နိုင်ငံကိုမှ ထိခိုက်ပြီး ဆက်ဆံရေး တည်ဆောက် မှာ မဟုတ်ပါဘူး။ မြန်မာနိုင်ငံ သူ့အိမ်နီးချင်းနိုင်ငံတွေနဲ့ တင်းမာတဲ့ ဆက်ဆံရေး ရှိနေ တာဟာလည်း အမေရိကန်အတွက် အကျိုး မရှိပါဘူး။ မြန်မာနိုင်ငံ အိမ်နီးချင်း နိုင်ငံတွေနဲ့ ဆက်ဆံရေးကောင်းနေမှ ဒေသတွင်းငြိမ်းချမ်းရေးနဲ့ တည်ငြိမ်ရေးကို အကျိုးဖြစ်ထွန်းစေမှာ ဖြစ်ပါတယ်။ ဒေသတွင်း ကွဲပြားမနေဘဲ ချဉ်းကပ် မှုတွေမှာ ပူးပေါင်းဆောင်ရွက်မှုတွေ ရှိနေမှာဖြစ်ပါတယ်။ တူညီတဲ့ ချဉ်းကပ်မှုတွေ ရှိနေမှာ ဖြစ်ပါတယ်။ အနည်းဆုံး တော့ အတူတကွ ဆွေးနွေးညှိနှိုင်းလုပ်ကိုင်နေမှာဖြစ်ပါတယ်။"

"ကျနော်ပြောခဲ့သလိုပါဘဲ၊ တရုတ်နဲ့ မြန်မာနိုင်ငံတွေဟာ ရှည်လျားတဲ့ နယ်နိမိတ်ရှိပြီး ရှည်လျားတဲ့ သမိုင်းကြောင်း လည်း ရှိကြပါတယ်။ အချုပ်အခြာအာဏာပိုင် နိုင်ငံတခုကို နိုင်ငံခြားရေးမူဝါဒနဲ့ ပတ်သက်လို့ နိုင်ငံတကာ ဆက်ဆံရေးနဲ့ ပတ်သက်လို့ ဘယ်လိုလုပ်ပါလို့ ပြောနိုင်တဲ့အခွင့်အလမ်း အမေရိကန်နိုင်ငံမှာ မရှိပါဘူး။ ဒါမျိုး အရင်တုံးကမလုပ်ခဲ့သလို နောက်လည်း လုပ်မှာမဟုတ်ပါဘူး။"

ဒေသတွင်း လုံခြုံရေးနဲ့ ပတ်သက်ပြီး မြန်မာနိုင်ငံအပေါ် ခင်ဗျားတို့ အစိုးရိမ်ဆုံး အချက်ကဘာလဲဗျ။

"အကြီးမားဆုံး စိုးရိမ်စရာက ကျနော်ထင်တာ စိန်ခေါ်မှုကို အဓိပ္ပါယ်ဖွင့်တာပဲ၊ အနှစ်သာရအရ ပြောရရင် မြန်မာ နိုင်ငံရဲ့ လွတ်လပ်ရေးရပြီးခေတ် အမျိုးသားညီညွတ်ရေးနဲ့ အမျိုးသားရင်ကြားစေ့ရေးကိစ္စပဲ ဖြစ်ပါတယ်။ တိုင်းရင်း သား လူနည်းစုတွေ အကြား၊ တိုင်းရင်းသား လူနည်းစုတွေနဲ့ ဗဟိုအစိုးရကြား၊ တိုင်းရင်းသား လူနည်းစုတွေနဲ့ လူများစု မြန်မာလူမျိုးတွေအကြား ကွဲပြားခြားနားမှုတွေကို အဖြေရှာနိုင်ဖို့ တိုင်းပြည်မှာ လုပ်ကိုင်နိုင်စွမ်းရှိဖို့က အရေးကြီးပါတယ်။ အခြေခံအားဖြင့်တော့ တိုင်းပြည်မှာ ပြည်တွင်းစစ် ဖြစ်နေတာပါ။ အနိမ့်ဆုံးအားဖြင့်တော့ လွတ်လပ်ရေး ရပြီးကတည်းက တောက်လျှောက် ပြည်တွင်း ပဋိပက္ခတွေ ဖြစ်နေခဲ့တာ ဖြစ်ပါတယ်။ ဒါဟာ
အကြီးမားဆုံး စိုးရိမ်စရာ အချက်ကြီး ဖြစ်ပြီးတော့ တိုင်းပြည် တည်ငြိမ်အေးချမ်းဖို့၊ ရေရှည်ဖြစ်ထွန်း တိုးတက်ဖို့၊ မုချဖြေရှင်း ရမယ့် အချက်လည်းဖြစ်ပါတယ်။"

"လက်နက်နဲ့ဖြေရှင်းရင် အတုအယောင် တည်ငြိမ်မှုကိုပဲ ရမှာဖြစ်ပါတယ်။ ရေရှည်ခံမှာ မဟုတ်ပါဘူး။ တကယ့် ရေရှည်ခံမယ့် တည်ငြိမ်မှုဆိုတာ ရင်ကြားစေ့ရေး နိုင်ငံရေး လုပ်ငန်းစဉ်နဲ့သာ ရမှာဖြစ်ပါတယ်။ ဆွေးနွေးခြင်း၊ ယုံကြည်ခြင်း၊ တန်းတူညီမျှမှု ရှိခြင်းနဲ့ စိတ်စေတနာကောင်းတွေ နှစ်ဘက်လုံးမှာ ရှိမှဖြစ်မှာပါ။ ခုတော့ နှစ်ပေါင်း များစွာ ရှည်ကြာခဲ့တဲ့ မယုံကြည်နိုင်မှုတွေဟာ စိတ်မကောင်းစရာဘဲ နက်နက်ရှိုင်းရှိုင်း ရှိနေပါတယ်။"

"ဒီမိုကရေစီ ဖွံ့ဖြိုးတိုးတက်မှုဟာ အခုမှ တကယ့်ကိုအစပဲ အစပျိုးကာစပဲ ရှိပါသေးတယ်။ ဒါကြောင့်လာမယ့် ရွေးကောက်ပွဲ တွေမှာ ဒေါ်အောင်ဆန်းစုကြည်ရဲ့ ပါတီကို ဝင်ရောက်ယှဉ်ပြိုင်ခွင့် ပေးတာမျိုးလို ဖွင့်ပေးတာလေးတွေ အပြောင်းအလဲ လုပ်တာ လေးတွေကိုပဲ ကျနော်တို့ နှစ်ထောင်းအားရ ဖြစ်မိပါတယ်။ လွှတ်တော်နဲ့ လွှတ်တော် ဥက္ကဋ္ဌတွေက သူတို့လွှတ်တော်တွေကို ခိုင်ခံ့တဲ့ စနစ်တရပ် အဆောက်အအုံ တရပ်ဖြစ်လာအောင် လုပ်နေတယ် လို့ ပြောနေပါတယ်။ နောင်မှာ အချေအတင် ဆွေးနွေး မှုတွေ၊ မူဝါဒချမှတ်ရာမှာ အစပျိုး လုပ်ဆောင်တာတွေ ရှိလာနိုင်ပါတယ်။ ဒါပေမယ့် ဒီစနစ်ဟာ တကယ့်ကို အစပဲရှိပါသေးတယ်။ ဒီမိုကရေစီ ဖွံ့ဖြိုးတိုးတက်အောင်လုပ်ဖို့ စိတ်ပိုင်းဖြတ်မှုမျိုးလဲ သူတို့မှာရှိပါတယ်။"


မြန်မာ အမေရိကန် ဆက်ဆံရေး နှစ်နိုင်ငံအကျိုးတူ ဆက်ဆံရေးကို ခိုင်မာအောင် အမေရိကန်က ဘယ်လိုလုပ်သွားမှာပါလဲ ခင်ဗျ။ မြန်မာခေါင်းဆောင်တွေကို အမေရိကန်ကို ဖိတ်တာမျိုးလုပ်မှာလား။ ဒါမှမဟုတ် ဒေသတွင်း စစ်ရေးလေ့ကျင့်မှုတွေမှာ ပါဝင်ဖို့ အမေရိကန်က မြန်မာနိုင်ငံကို ဖိတ်ခေါ်မှာ လား။

"ကျနော်တို့မြန်မာသမ္မတကြီးကို အမေရိကန်လာဖို့ မဖိတ်သေးပါဘူး။ နိုင်ငံခြားရေး ဝန်ကြီးကိုတော့ အာရှရေးရာတွေ ဆွေးနွေးဖို့ ဖိတ်ခေါ်ခဲ့ပါတယ်။ ဒါတခြား နိုင်ငံပေါင်းများစွာနဲ့ ကျနော်တို့ လုပ်နေသလိုပဲ ဒေသတွင်း အတွေး အမြင်တွေ ဖလှယ်ဖို့သာ ဖြစ်ပါ တယ်။ ဆွေးနွေးတာ အမြင်တွေရှုထောင့်တွေ ရှာဖွေတာစတဲ့ အလေ့အကျင့်ကောင်း တွေကို ဖွံ့ဖြိုးတိုးတက်စေချင်ပါတယ်။ ကျနော် တို့မှာ နားလည်မှုဆိုတာ အကန့်အသတ်နဲ့သာ ရှိပါတယ်။ ကျနော်တို့ ဘယ်က ဘယ်လိုဆင်းသက်လာတယ် ဆိုတာကို သူတို့သေသေချာချာ သိပါ့မလားလို့ ကျနော်သံသယ ဖြစ်မိပါ တယ်။"

"မြန်မာသမ္မတကို အမေရိကန် ပြည်ထောင်စုကို လာရောက်လည်ပတ်ဖို့ ကျနော်တို့ မဖိတ်ကြားရသေးပါဘူး။ ဒေသတွင်း စစ်ရေး လေ့ကျင့်မှုတွေမှာလည်း ဒီလိုပါပဲ အခု ဘာမှမရှိသေးပါဘူး။ စစ်တပ်ချင်း ဆက်ဆံရေးမှာ ကျနော်တို့အတွက် အကန့်အသတ်တွေ ရှိပါတယ်။ ဒါကြောင့်ခင်ဗျားမေးတဲ့ ဒုတိယအချက်ကလည်း ဘာမှလုပ် ဆောင်နေတာ မရှိသေးပါဘူး။"

Ref: မဇ္ဈိမ

Read More...

Collapse...

မြစ်ကြီးနား မန္တလေး ရထားသံလမ်း မိုင်းကွဲ နှစ်ဦး သေဆုံး

ဇော်ကြီး
ဒီဇင်ဘာလ ၁၉ ရက်၊ ၂၀၁၁ ခုနှစ်။

ကချင်ပြည်နယ် မြစ်ကြီးနားမြို့မှ မန္တလေးမြို့သို့သွားသည့် ရထားသံလမ်း ယမန်နေ့ နံနက်ပိုင်းက မိုင်းဖောက်ခွဲခံရပြီး ဖောက်ခွဲသူ ဟု ယူဆရသူ နှစ်ဦး သေဆုံးခဲ့သည်ဟု ဒေသတွင်း သတင်းများက ဆိုသည်။

မိုးကောင်းမြို့နယ် အတွင်းရှိ ထိုဖူးနှင့် ဆားမှော်ကျေးရွာ ဘူတာအကြား နံနက် (၃) နာရီ အချိန်ခန့်က မိုင်းနှစ်ကြိမ် ပေါက်ကွဲခဲ့ သည်ဟု သိရကြောင်း ဆားမှော် ဒေသခံ တဦးက အခုလို ပြောသည်။

“အဲဒီမိုင်းထောင်တဲ့ လူကတော့ မိုင်းကွဲတဲ့ အနားမှာဘဲ သေတယ်လို့ ပြောတာပဲ။ သူ့မိုင်းနဲ့သူ ပြန်ထိတဲ့ သဘောပေ့ါ။ သုံးယောက် သွားတယ် နှစ်ယောက်သေတယ်လို့ ကြားရတယ်။”


ပေါက်ကွဲမှု ဖြစ်ပွားပြီးနောက် သေနတ် ပစ်ခတ်သံများ ကြားရပြီး ဖောက်ခွဲသူ တဦးအား ဖမ်းမိခဲ့သည်ဟုလည်း “အဲဒီမှာ ရထား သံလမ်းကင်းယူတဲ့ ဆားမှော် (၁၀၅) တပ်ကရှိတယ်။ သူတို့က ခြောက်ပြီးတော့ ဖောက်တဲ့ ပုံစံပါဘဲ။ နောက်ဆုံးတော့ လူ တယောက် ဖမ်းမိတယ်လို့တော့ ကြားပါတယ်။ အဲဒါ အတိအကျတော့ ကျနော်တို့ မသိဘူးဗျ။” ဟု ၎င်းက ဆက်ပြောသည်။

ယင်းကိစ္စနှင့် ပတ်သက်၍ မိုးကောင်းမြို့ ရဲစခန်းမှ မိုင်းငါးလုံး ပေါက်ကွဲခဲ့သည်ဟု အတည်ပြု ပြောဆိုသော်လည်း ထိခိုက်သေ ဆုံးမှု ရှိမရှိကိုမူ ဖြေကြားခဲ့ခြင်း မရှိပါ။

မည်သူမည်ဝါ၏ လက်ချက်ဖြစ်သည်ကို မသိရသေးသော်လည်း ပေါက်ကွဲမှုကြောင့် ထိခိုက်ပျက်စီး သွားသည့် သံလမ်းအား ပြန် လည် ပြင်ဆင်ပြီးကြောင်းနှင့် ယခုအခါ ရထားများ ပုံမှန် ပြေးဆွဲ နေပြီဟု သိရသည်။

လွန်ခဲ့သည့် တလခန့်ကလည်း ဆားမှော်ကျေးရွာ တောင်ဖက်ရှိ ရထားသံလမ်း ဖောက်ခွဲ ခံခဲ့ရပြီး တစုံတရာ ထိခိုက်သေဆုံးမှု မရှိကြောင်း ဒေသခံက ပြောသည်။

ယနေ့ထုတ် အစိုးရအာဘော် သတင်းစာ၌ မြစ်ကြီးနား၊ ဆွမ်ပရာဘွမ်၊ ပူတာအို ကားလမ်း ဖောက်လုပ် နေသည့် စက်ယန္တယား များ အား ဒီဇင်ဘာလ (၁၆) ရက် နံနက် (၁) နာရီအချိန်ခန့်က သောင်းကျန်းသူများက မိုင်းထောင် ဖောက်ခွဲဖျက်ဆီး ခဲ့ သဖြင့် လမ်းကြိတ်စက် တစီး၊ မြေထိုးစက် တစီးနှင့် ၀န်ချီစက် တစီးတို့ ပျက်စီးခဲ့ကြောင်း ဖော်ပြထားသည်။

အလားတူ ကရင်ပြည်နယ် သံတောင်ကြီးမြို့နယ် အတွင်းရှိ ၂၃၀ ကေဗွီ လောပိတ-တောင်ငူ မဟာ ဓါတ်အားလိုင်း အမှတ် (၂၁၃) အား ဒီဇင်ဘာလ (၁၈) ရက် နံနက် (၆) နာရီခွဲ အချိန်ခန့်က သောင်းကျန်းသူများက မိုင်းထောင်ဖောက်ခွဲ ဖျက်ဆီး ခဲ့သည်ဟုလည်း ဖော်ပြထားသည်။

သို့သော် အဆိုပါဖြစ်ရပ် နှစ်ခုစလုံးတွင် မည်သူမည်ဝါ၏ လက်ချက်ဟု ဖော်ပြထားခြင်း မရှိဘဲ သောင်းကျန်းသူများဟုသာ သုံးနှုန်းထားသည်။

တိုင်းရင်းသားလက်နက်ကိုင် တပ်ဖွဲ့များနှင့် အစိုးရတပ်တို့ နှစ်(၆၀) ကျော် ဖြစ်ပွား နေသည့် ပြည်တွင်း စစ်အတွင်း ပေါက်ကွဲမှု များ ဖြစ်ပွားတိုင်း အစိုးရက သောင်းကျန်းသူများ လက်ချက်ဟု စွပ်စွဲ ပြောဆိုလေ့ရှိသလို တိုင်းရင်းသားများ ဘက်ကလည်း ငြင်း ဆိုလေ့ရှိသည်။

Ref: အဲန်အမ်ဂျီ

Read More...

Collapse...