အင်းစိန် ဗုံးကွဲမှု ဂယက် နိုင်ငံရေး အကျဉ်းသားဟောင်းများကို ရိုက်ခတ်

လင်းသန့်
03 March 2011

ရန်ကုန်မြို့ အင်းစိန်မြို့နယ်တွင် ဗုံးတလုံး ပေါက်ကွဲပြီးနောက် ယခုရက်ပိုင်းအတွင်း နိုင်ငံရေး အကျဉ်းသား ဟောင်းများ၏ အမည်စာရင်းကို ရဲအထူးသတင်းတပ်ဖွဲ့ (SB) က လိုက်လံမေးမြန်း စုံစမ်းနေပြီး လက်သည်တရားခံပြရန် အမှုဆင်နေသည်ဟု သိရသည်။

အင်းစိန်မြို့နယ်၊ ကမ်းနားလမ်း အလယ်ရပ်ကွက်၊ အောင်ဇေယျ အိမ်ရာ တခုရှေ့တွင် ဖေဖော်ဝါရီလ ၂၇ ရက်နေ့ည ၇ နာရီကျော်က ဖြစ်ပွားသော ဗုံးပေါက်ကွဲမှုကြောင့် လူ ၈ ဦး ဒဏ်ရာရခဲ့ကြောင်း၊ ပေါက်ကွဲ မှုတွင် ဒဏ်ရာရရှိသော မင်္သကာ သူဟု ဆိုသည့် ဇော်မင်းသန်း၏ အခန်းတွင်ဖောက်ခွဲရေး ပစ္စည်းများ တွေ့ရှိ ရကြောင်း၊ ဖြစ်စဉ်ကို စုံစမ်းဖော်ထုတ်ဆဲ ဖြစ်ကြောင်း ဖေဖော်ဝါရီ လ ၁ ရက်နေ့ထုတ် စစ်အစိုးရ သတင်းစာများတွင် ဖော်ပြထားသည်။

SB ၏ လာရောက် မေးမြန်းခြင်းခံရသူ နိုင်ငံရေး အကျဉ်းသားဟောင်း တဦးက “ညကပဲ ကျနော်ဆီကို SB အရာရှိတယောက်နဲ့ တခြားအဆင့် တယောက် လူကိုယ်တိုင် လာသွား တယ်။ နိုင်ငံရေး အကျဉ်းသားဟောင်း တချို့ နာမည်တွေနဲ့ နေရပ်လိပ်စာ တွေမေးပြီး ကျနော့်ကိုလည်း ကူညီဖို့ပြောတယ်။ အရင်လည်း မကြာခဏ ဒီလို တော့ လာလာမေးတတ်တယ်” ဟု ဧရာဝတီသို့ ပြောသည်။

တခြား နိုင်ငံရေး အကျဉ်းသားဟောင်း တဦးကလည်း “အခုဟာကတော့ သူတို့က အရင် ABSDF (မြန်မာနိုင်ငံလုံးဆိုင်ရာ ကျောင်းသားများ ဒီမိုကရက်တစ်တပ်ဦး) ကျောင်းသား ဟောင်းတွေနဲ့ လက်နက်မှုနဲ့ ထောင်ကျခဲ့ဖူးသူတွေကို အဓိကထား မေးတယ်။ ကျနော်တို့လည်း စိုးရိမ်တယ်ဗျာ။ ကိုယ်ဘာမှ မသိလိုက်ရဘဲ ထောင်ကျခံရမယ့်အရေး မိသားစုကလည်း ပူတာပေါ့။ ကျနော်တို့ ထောင်ထဲမှာ ကတည်းက အပြင်မှာ ဗုံးကွဲ လိုက်တာနဲ့ လာမေးတော့တာပဲ” ဟု ပြောသည်။

အင်းစိန်ဗုံးကွဲမှု ဖြစ်ပွားပြီးနောက် ညစဉ်ရက်ဆက် ဧည့်စာရင်းစစ်ခြင်း၊ ခရီးသွားပြည်သူများ အားလုံခြုံရေး အထူးကြပ်မတ် စစ်ဆေးခြင်းများကြောင့် စိတ်ပျက်စရာများနှင့် ကြုံနေရကြောင်း ရန်ကုန်မြို့ခံတဦးက ဆိုသည်။

ဗုံးပေါက်ကွဲပြီးနောက် ရန်ကုန်အ၀င်အထွက် ကားများ၊ ရထားများနှင့် ခရီးသည်များကိုပါ လုံခြုံရေးတပ်ဖွဲ့များက တင်းကျပ်စွာ စစ်ဆေးမှုများလုပ်နေကြောင်း သိရသည်။

အမည်မဖော်လိုသူ နိုင်ငံရေး အကျဉ်းသားဟောင်း တဦးက “လူထုလှုပ်ရှားမှု ပေါ်ပေါက် ရေးလုပ်နေသူတွေကို နိုင်ငံရေး အကျဉ်းသားဟောင်းတွေက နောက်ကွယ်က စီမံနေ တယ်လို့ သူတို့က ထင်နေတယ်။ အခုအခါက နိုင်ငံတကာမှာလည်း လူထုတော်လှန်ရေး တွေက ဆက်တိုက်ဖြစ်နေတာ မဟုတ်လား။ နိုင်ငံရေး အကျဉ်းသားဟောင်း တချိုကတော့ ဆက်မလုပ်ကြတော့ပါဘူး။ ကြည့်ရတာ အမှိုက်လှည်း တဲ့ စီမံချက်ထဲမှာ အကုန်သိမ်းကျုံး မလို့ အကွက်ချထားတာ ထင်တယ်” ဟု ပြောသည်။

မတ်လ ၁၃ ရက်နေ့တွင် ကျရောက်မည့် စက်မှုတက္ကသိုလ်ကျောင်းသား ကိုဖုန်းမော်နှင့် ကိုစိုးနိုင်တို့ ကျဆုံးသည့် နှစ်ပတ်လည်နေ့အတွက် မြန်မာနိုင်ငံ လူ့အခွင့်အရေးနေ့အဖြစ် ကျင်းပသွားရန် တက်ကြွလှုပ်ရှားသူများက စီစဉ်နေကြကြောင်း သိရသည်။ အဆိုပါ လှုပ်ရှားမှုများကို စစ်အစိုးရက စိုးရိမ်မှုများ ဖြစ်ပေါ်နေပြီး ကြိုတင်ဟန့်တားခြင်းအဖြစ် ယခုကဲ့သို့ လုပ်ဆောင်နေခြင်းလည်း ဖြစ်နိုင်ကြောင်း နိုင်ငံရေး အကျဉ်းသားဟောင်း တဦးက ပြောသည်။

Ref;irrawaddy