သာလွန်ဇောင်းထက်
October 15, 2012
အာဏာရ ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီ(ကြံ့ခိုင်ရေးပါတီ)၏ အဓိက ကြုံတွေ့နေရသည့် အားနည်းချက်မှာ လူထု ယုံကြည်မှု လိုအပ်နေခြင်း ဖြစ်ကြောင်း ယင်းပါတီ၏ အထွေထွေ အတွင်းရေးမှူး ဦးဌေးဦးက ပြောဆိုလိုက်သည်။
နေပြည်တော်တွင် ယမန်နေ့က ကျင်းပသည့် ကြံ့ခိုင်ရေးပါတီ ညီလာခံပထမနေ့ အစည်းအဝေးအပြီး ပြုလုပ်သော ဧရာဝတီ သတင်းဌာနနှင့် သီးသန့် တွေ့ဆုံမေးမြန်းခန်းတွင် ၄င်းက အထက်ပါအတိုင်း ပြောဆိုလိုက်ခြင်းဖြစ်သည်။
“အဓိက ကတော့ အားနည်းချက် ဆိုတဲ့နေရာမှာ ယေဘုယျပဲ ခြုံပြီးတော့ ပြောမယ်ဆိုရင် လူထုယုံကြည်မှု လိုတာပေါ့။ လူထု ယုံကြည်ရင် ရွေးကောက်ပွဲဆိုတာ သာမညပါပဲ။ အဓိကက လူထုက ယုံကြည်ဖို့လိုတယ်။ လူထုကနေပြီးတော့ သူတို့ အကျိုး အတွက် နိုင်ငံ အကျိုးအတွက် ဆောင်ရွက်ပေးနိုင်မယ့် သူတွေလို့ ယုံကြည်ရင် အဲဒီလူကို ရွေးမှာပဲ။ မယုံကြည်သရွေ့ကတော့ ဘာပဲလုပ်ပေးနေနေ ရွေးမှာမဟုတ်ဘူး” ဟု ဦးဌေးဦးက ပြောသည်။
လူထုယုံကြည်မှု လိုအပ်နေသည်ဟု ဦးဌေးဦးက ပြောဆိုသော်လည်း ပါတီ၏ ဗဟိုအလုပ်အမှုဆောင် တဦးဖြစ်သူ ဦးသိန်းဇော်ကမူ ကြံ့ခိုင်ရေးပါတီတွင် ပါတီဝင်အင်အား တိုးတက်လျက်ပြီး ကြံ့ခိုင်ရေးအသင်းမှ ပါတီအဖြစ်သို့ ပြောင်းလဲဖွဲ့စည်းသည့် ၂၀၁၀ ခုနှစ်မှ ယနေ့အချိန်အထိ ပါတီဝင်အင်အား ၄ သန်းကျော်ရှိလာပြီဟု ဆိုသည်။
“စည်းရုံးပြီး ပါတီဝင်အင်အားက ၄ သန်းကျော် ရှိပြီဖြစ်ပါတယ်။ ပါတီအဖွဲ့အစည်း အဆင့်ဆင့် ခိုင်မာစွာ ဖွဲ့စည်းခဲ့နိုင်ခဲ့အတွက် ပြည်နယ်/တိုင်းဒေသကြီး ကော်မတီ ၁၉ ခု၊ ခရိုင်ပါတီကော်မတီပေါင်း ၆၃ ခု၊ မြို့နယ်ပါတီ ကော်မတီပေါင်း ၃၂၅ ခုနဲ့ ရပ် ကွက်ကျေးရွာအုပ်စု ပါတီအဖွဲ့ပေါင်း ၁၅၁၆၀ ခု၊ စုစုပေါင်း ၁၅၅၆၇ ခု ဖွဲ့စည်း တည်ထောင်ပြီး ဖြစ်ပါတယ်”ဟု ဦးသိန်းဇော်က ပါတီညီလာခံသို့ တင်သွင်းသော ဗဟိုအလုပ်အမှုဆောင် အစီအရင်ခံစာတွင် ထည့်သွင်းပြောသည်။
ကြံ့ခိုင်ရေးပါတီ ဒုတိယ ဥက္ကဋ္ဌ သူရဦးရွှေမန်းကမူ ပါတီကို ဒီမိုကရေစီစနစ်နှင့်အညီ ပြည်သူ့ပါတီပုံစံ အသွင်ပြောင်းလဲရန် တိုက် တွန်းပြောဆိုသည်။
“ဒီမိုကရေစီစနစ်ကို အများကြိုက်သလို အများကပဲ ပိုင်တာဖြစ်ပါတယ်။ အများနဲ့သက်ဆိုင်နေ၍ပင် ဒီမိုကရေစီစနစ်ကို စည်းစနစ် ကျစွာ ကျင့်သုံးဆောင်ရွက်ကြရန်လည်း လိုပါတယ်” ဟု ဦးရွှေမန်းက ညီလာခံ အဖွင့်မိန့်ခွန်းတွင် ထည့်သွင်းပြောဆိုသွားသည်။
ကြံ့ခိုင်ရေးပါတီ၏ ပထမအကြိမ် ညီလာခံတွင် ပါတီဥက္ကဋ္ဌရာထူးအတွက် ရွေးချယ်မှုများ ပြုလုပ်မည်ဟု သတင်းများ ကျယ်ကျယ် ပြန့်ပြန့် ထွက်ပေါ်လာသော်လည်း ယင်းသတင်းမှာ မဟုတ်မှန်ဘဲ သမ္မတ ဦးသိန်းစိန်ကသာ ကြံ့ခိုင်ရေးပါတီဥက္ကဋ္ဌအဖြစ် ဆက် လက် ဆောင်ရွက်မည်ဟု ပါတီဗဟို အလုပ်အမှုဆောင်များက ပြောဆိုကြသည်။
“ပါတီဥက္ကဋ္ဌက လက်ရှိသမ္မတပဲ။ ဖွဲ့စည်းပုံအခြေခံဥပဒေ ပုဒ်မ ၆၄ အရ သမ္မတက ပါတီနိုင်ငံရေး လုပ်ခွင့်မရတာ။ ပါတီက နုတ်ထွက်စရာ မလိုဘူး။ သမ္မတက ဦးဆောင်နေတာ အားလုံးကောင်းနေတာပဲ” ဟု ပါတီ ဗဟိုအလုပ်အမှုဆောင် ဦးအောင် သောင်းက ဧရာဝတီသို့ ပြောသည်။
ဦးဌေးဦးကလည်း သမ္မတ ဦးသိန်းစိန် ပါတီဥက္ကဋ္ဌရာထူးတွင် ဆက်လက်ရှိနေမည် ဖြစ်သော်လည်း သမ္မတရာထူး ထမ်းဆောင်နေ ၍ ပါတီလုပ်ငန်းများ အပြည့်အ၀ မထမ်းရွက်နိုင်သောကြောင့် ထမ်းရွက်နိုင်သူများက ၀ိုင်းဝန်း လုပ်ဆောင်ပေးကြမည်ဖြစ်ကြောင်း ရှင်းပြသည်။
“သမ္မတက ပါတီဥက္ကဋ္ဌတာဝန် ထမ်းဆောင်လို့ မရဘူး။ သို့သော်လည်းပဲ နိုင်ငံတကာမှာလည်းပဲ ရှိပါတယ်။ ဥက္ကဋ္ဌ ရာထူးတာဝန် ပေးထားတယ်။ သူရဲ့ ဥက္ကဋ္ဌရာထူးတာဝန်ကိုတော့ ကျန်တဲ့သူက တွဲလုပ်ရမှာပေါ့။ သူမှ မလုပ်နိုင်တာပဲ။ ဥက္ကဋ္ဌနေရာမှာ သမ္မတ ကြီး ဆက်ရှိနေမှာပါ” ဟု ဦးဌေးဦးက ဆိုသည်။
ဒီမိုကရေစီစနစ် ကျင့်သုံးမည့် ကြံ့ခိုင်ရေးပါတီတွင် လူမှုရေးအခြေခံသော စိတ်ဓာတ်များဖြင့် လာမည့် ၂၀၁၅ ရွေးကောက်ပွဲ အ တွက် ပြင်ဆင်သွားမည်ဖြစ်ကြောင်း၊ ရွေးကောက်ပွဲနိုင်ခြင်း၊ မနိုင်ခြင်းထက် ပြည်သူနှင့် ဒေသအကျိုး ဆောင်ရွက်ရမည်ဆိုသော စိတ်ဓာတ်များ ပေါ်ထွန်းလာစေရန် ကြိုးပမ်းသွားမည်ဖြစ်ကြောင်း ဦးဌေးဦးက ဆက်လက်ပြောသည်။
“ရွေးကောက်ပွဲ နိုင်တာ ရှုံးတာက ပြည်သူက အဆုံးအဖြတ်ပဲ ကိုယ်ဘာမှ ပြောလို့မရဘူး။ ကိုယ်လုပ်စရာရှိတာကတော့ အကျိုး ရှိတဲ့ လုပ်ငန်းတွေကို ဟိုအရင်တုန်းက ကျနော်တို့ရှိတဲ့ လူမှုရေးစိတ်ဓာတ်ကို အခြေခံပြီး လုပ်ဖို့ပဲ”ဟု ၄င်းက ရှင်းလင်းပြောဆို သည်။
ဒေါ်အောင်ဆန်းစုကြည် သမ္မတဖြစ်ခွင့်ရှိရေး ဖွဲ့စည်းပုံ အခြေခံဥပဒေနှင့် ညီညွတ်မှသာဖြစ်နိုင်ပြီး ကြံ့ခိုင်ရေးပါတီအနေနှင့် ဖွဲ့စည်း ပုံအခြေခံဥပဒေ ပြင်ဆင်ရန် အစီအစဉ် မရှိကြောင်း ကြံ့ခိုင်ရေးပါတီ ဗဟိုအလုပ်အမှုဆောင်များက ဆိုကြသည်။
“ဖွဲ့စည်းပုံအခြေခံ ဥပဒေဆိုတာ ဒေါ်အောင်ဆန်းစုကြည်ကို ရည်ရွယ်ပြီး ဆွဲထားတာလည်း မဟုတ်ဘူး။ ဖွဲ့စည်းပုံအခြေခံ ဥပဒေမှာ ပါတဲ့ သမ္မတဖြစ်ဖို့ ပြည့်စုံရမယ့် အရည်အချင်း သတ်မှတ်ချက်တွေက ၁၉၄၇ မှာလည်း ပါတယ်။ ၇၄ မှာလည်း ပါတယ်။၂၀၀၈ မှာလည်း ပါတယ်။ တဦးတယောက်အတွက် ရည်ရွယ်တာ မဟုတ်ပါဘူး။ အားလုံးအတွက် ရည်ရွယ်တာဖြစ်တော့ သူတို့ပြန်ပြီး ပြုပြင်ပေးရမယ် ဆိုရင်လည်း အများသဘောနဲ့ လုပ်ရမှာပေါ့။ တယောက်တည်း သဘောတော့လည်း ဘယ်လုပ်လို့ရမလဲ။ ပါတီ အနေနဲ့ ဖွဲ့စည်းပုံအခြေခံ ဥပဒေပြင်ဖို့ အဆိုတင်သွင်းဖို့ မရှိသေးဘူး”ဟု ဦးဌေးဦးက ဆက်ပြောသည်။
ကြံ့ခိုင်ရေးပါတီ၏ ပထမဆုံးအကြိမ် ညီလာခံကို အောက်တိုဘာလ ၁၄ ရက်နေ့မှ ၁၆ ရက်နေ့အထိ သုံးရက်ကြာ ကျင်းပမည်ဖြစ် ပြီး တနိုင်ငံလုံးမှ ကြံ့ခိုင်ရေးပါတီဝင်များ တက်ရောက်လျက်ရှိကြောင်း၊ ပထမနေ့ ညီလာခံ အစည်းအဝေးသို့ သမ္မတဦးသိန်းစိန် ခေတ္တလာရောက်ပြီး ပါတီခေါင်းဆောင်များနှင့် ပါတီဝင်များကို နှုတ်ဆက်ကာ ပြန်လည်ထွက်ခွာသွားခဲ့သည်။
Ref: ဧရာဝတီ
1 hour ago
Posts
0 comments:
Post a Comment