ဒေါ်အောင်ဆန်းစုကြည်ကို ဖိတ်ကြားမည်ဟု အိန္ဒိယ သတင်းစာ ရေး

2012-05-24

အိန္ဒိယ ၀န်ကြီးချုပ် မန်မိုဟန်ဆင်း မြန်မာနိုင်ငံကို လာရောက် လည်ပတ်တဲ့ အခါ အမျိုးသား ဒီမိုကရေစီအဖွဲ့ချုပ် ဥက္ကဋ္ဌ ဒေါ်အောင်ဆန်းစုကြည်ကို အိန္ဒိယကို လာရောက် လည်ပတ်ဖို့ တရားဝင် ဖိတ်ကြားမှာဖြစ်ကြောင်း Time of India သတင်းစာက ရေးသားဖော်ပြပါတယ်။

အိန္ဒိယ ၀န်ကြီးချုပ် မန်မိုဟန်ဆင်းဟာ မြန်မာနိုင်ငံကို ၃ ရက်ကြာ လာရောက် လည်ပတ်ဖို့ ရှိနေပြီး သူ့ရဲ့ ခရီးစဉ်ကို လာမယ့် တနင်္ဂနွေနေ့မှာ စတင်မှာဖြစ်ပါတယ်။

မြန်မာသမ္မတ ဦးသိန်းစိန်နဲ့ တွေ့ဆုံဆွေးနွေးပြီး အင်္ဂါနေ့မှာ အန်အယ်လ်ဒီ ဥက္ကဋ္ဌ ဒေါ်အောင်ဆန်းစုကြည် နဲ့လည်း တွေ့ဆုံမှာဖြစ်ပါတယ်။ သူ့ရဲ့ခရီးစဉ်ဟာ ၂၅ နှစ်အတွင်း ပထမဆုံး အကြိမ် အိန္ဒိယ ၀န်ကြီးချုပ် အနေနဲ့ မြန်မာနိုင်ငံကို လာရောက်မှာပါ။

သူ့ရဲ့ခရီးစဉ်အတွင်း အိန္ဒိယမြို့ကြီးတွေကနေ မြန်မာနိုင်ငံကို လေကြောင်းခရီးစဉ်တွေ တိုးချဲ့ ပျံသန်းဖို့ ပါဝင်သလို၊ အင်ဖာကနေ မန္တလေးကို ဘတ်စ်ကားလိုင်း ပြေးဆွဲဖို့ အစီအစဉ်တွေကိုလည်း ဆွေးနွေးမှာဖြစ်ကြောင်း သိရပါတယ်။ ဒါ့အပြင် ကလက္ကတားနဲ့ ချနိုင်းကနေ ရန်ကုန်ကို ကုန်ပြေးဆွဲတဲ့ မော်တော်ယာဉ်လိုင်းတွေ ပြုလုပ်ဖို့ကိုလည်း ဆွေးနွေးဖို့ ရှိပါတယ်။

လောလောဆယ် မြန်မာနိုင်ငံက ရေနံနဲ့ သဘာဝဓာတ်ငွေ့ ထုတ်လုပ်ရေးတွေမှာ အိန္ဒိယ Gail, Essar နဲ့ ONCG ကုမ္ပဏီတွေက ရင်းနှီးမြှုပ်နှံ လုပ်ကိုင်နေပါတယ်။ ဒီတစ်ခေါက် အိန္ဒိယ ၀န်ကြီးချုပ် လာရောက် လည်ပတ်တဲ့အခါ မြန်မာနိုင်ငံကို နောက်ထပ်ငွေ ထုတ်ချေးဖို့ အစီအစဉ်လည်း ပါဝင်မှာဖြစ်ပါတယ်။

၂၀၁၀ နဲ့ ၂၀၁၁ ခုနှစ်တွေအတွင်း မြန်မာနိုင်ငံကို အိန္ဒိယက ငွေထုတ်ချေးထားတာ ၂ ကြိမ်ရှိပြီဖြစ်ပြီး စုစုပေါင်း အမေရိကန်ဒေါ်လာ သန်း ၈၀၀ ထုတ်ချေးထားပြီး ဖြစ်ပါတယ်။

Ref: RFA News

Read More...

Collapse...

ဒေါ်စု ကို Johns Hopkins တက္ကသိုလ် ဂုဏ်ထူးဆောင်ဘွဲ့ ချီးမြှင့်

ဦးရော်နီညိမ်း
ကြာသပတေး, 24 မေ 2012

မေလ (၂၄) ရက် မနေ့က အမေရိကန်ပြည်ထောင်စု Maryland ပြည်နယ်၊ Johns Hopkins တက္ကသိုလ်မှာ ကျင်းပတဲ့ ဘွဲ့နှင်းသဘင် အခမ်းအနားမှာ မြန်မာ့ ဒီမိုကရေစီ ခေါင်းဆောင် ဒေါ်အောင်ဆန်းစုကြည်ကို ဂုဏ်ထူးဆောင် ပါရဂူဘွဲ့ (Doctor of Humane Letters) ချီးမြှင့်ခဲ့ပါတယ်။ မြန်မာနိုင်ငံမှာ AIDS ရောဂါ ကာကွယ် ကုသစောင့်ရှေက်မှုတွေ မကြာခဏ သွားရောက် လုပ်ဆောင်ခဲ့သူ Johns Hopkins တက္ကသိုလ် လူထု ပညာရေးဌာနက ပါမောက္ခ ဒေါက်တာ ခရစ်(စ်) ဘိုင်ယာ (Dr. Chris Beyrer) က ဒေါ်အောင်ဆန်းစုကြည် ကိုယ်စား လက်ခံ ရယူခဲ့ပါတယ်။ ဒေါ်အောင်ဆန်းစုကြည် ကလည်း ဒီအခမ်းအနား အတွက် ဗီဒီယို မိန့်ခွန်းပေးပို့ ခဲ့တာမှာ မြန်မာနိုင်ငံက လူငယ်တွေရဲ့ တောက်ပတဲ့ အနာဂတ်အတွက် Johns Hopkins တက္ကသိုလ်က ပူးပေါင်း ပါဝင်လိမ့်မယ်လို့ သူမျှော်လင့် ကြောင်း ထည့်သွင်းပြောဆို သွားခဲ့ပါတယ်။ ဒေါ်အောင်ဆန်းစုကြည်ကို Johns Hopkins တက္ကသိုလ်က ဂုဏ်ထူးဆောင် ပါရဂူဘွဲ့ ချီးမြှင့်တာနဲ့ ပတ်သက်ပြီး ကိုရော်နီညိမ်းက တင်ပြပေးပါထားပါတယ်။

မေလ ၂၄ ရက်နေ့က မေရီလဲန်းပြည်နယ်၊ ဘော်လတီမိုးမြို့က Johns Hopkins တက္ကသိုလ် ဟုမ်းဝုဒ် နယ်မြေ (Hpme Wood Campus)မှာ ကျင်းပခဲ့တဲ့ ဒီဘွဲ့နှင်းသဘင် အခမ်းအနားမှာ ဒေါ်အောင်ဆန်းစုကြည်ကို ဂုဏ်ထူးဆောင် ပါရဂူဘွဲ့ ချီးမြှင့်ခဲ့တာပါ။ ဒီအခမ်းအနား အတွက် ဒေါ်အောင်ဆန်းစုကြည်ပေးပို့တဲ့ ဗီဒီယို မိန့်ခွန်း အမှာစကားကိုလည်း ပြသခဲ့ပါ တယ်။ ဒေါ်အောင်ဆန်းစုကြည်က မြန်မာနိုင်ငံမှာ တက္ကသိုလ် ဘွဲ့ရ လူငယ်တွေ ရင်ဆိုင်နေကြရတဲ့ လက်တွေ့ ပကတိ အခြေအနေကို အခုလို ပြောပြခဲ့ပါတယ်။

ဒေါ်အောင်ဆန်းစုကြည်။ ။ ကျမတို့နိုင်ငံက လူငယ်ထုရဲ့ အများစုကြီးဟာ အခြေခံကျတဲ့ ပညာရေး လိုအပ်နေ ကြပါတယ်။ ကျမက မူလတန်းကျောင်း အဆင့် ကလေးတွေရဲ့ အခြေခံ ပညာရေးကို ပြောနေတာ မဟုတ်ပါဘူး။ ကျမက တက္ကသိုလ်ဘွဲ့ရ လူငယ်တွေမှာ အခြေခံကျတဲ့ ပညာရေး လိုအပ်နေကြတာကို ပြောနေတာ ပါ။ မြန်မာနိုင်ငံ မှာ မြောက်များလှတဲ့ တက္ကသိုလ်ဘွဲ့ရ လူငယ်တွေဟာ အလုပ် လက်မဲ့တွေ ဖြစ်နေကြပါတယ်။ ဘာဖြစ်လို့လဲ ဆိုတော့ တက္ကသိုလ်တွေက သူတို့တွေ အလုပ်အကိုင်တွေ ရရှိကြဖို့ လုံလောက်စွာ လိုအပ်တဲ့ အခြေခံ ကျကျ ပညာရေးကို သင်ကြား မပေးနိုင်ကြလို့ပါပဲ။ ဒါကြောင့် ကျမတို့နိုင်ငံနဲ့ ကျမတို့ရဲ့ လူငယ်တွေမှာ အခုလို ပညာရေးအရ အကြီးအကျယ် လိုအပ်နေမှုကို Johns Hopkins တက္ကသိုလ်နဲ့တကွ တခြားသော အမေရိ ကန်ပြည်ထောင်စုက ပညာရေး အဖွဲ့အစည်းတွေကို၊ ကျမက သိရှိကြစေချင် ပါတယ်။ ကျမတို့နိုင်ငံရဲ့ တက္ကသိုလ် ဘွဲ့ရ လူငယ်တွေဟာ တကယ့် ပညာတွေကို တတ်မြောက်ကြပြီးသား လူငယ်တွေ ဖြစ်လာ ကြရမှာပါ။ ဒါပေမဲ့ အဲဒီလို ဖြစ်မလာ ကြတာကြောင့် သူတုိ့အတွက် ဘ၀ရဲ့ စိန်ခေါ်မှုတွေကို တကယ်တမ်း ရင်ဆိုင်နိုင်တဲ့ ပညာရေးကို အကြီးအကျယ် လိုအပ်နေကြတယ် ဆိုတာကို သိစေချင်ပါတယ်။

ဒေါ်အောင်ဆန်းစုကြည်က သူ့ကို အခုလို ဂုဏ်ထူးဆောင်ပါရဂူဘွဲ့ ချီးမြှင့်ခဲ့တဲ့ Johns Hopkins တက္ကသိုလ် အနေနဲ့ မြန်မာ လူငယ်ထုရဲ့ ပညာရေးကို ကူညီစောင့်ရှောက်ပေးဖို့ ဗီဒီယို မိန့်ခွန်းထဲမှာ ထည့်သွင်းပြောကြား ခဲ့ပါတယ်။

ဒေါ်အောင်ဆန်းစုကြည်။ ။ ကျမတို့နိုင်ငံရဲ့ လူငယ်ထုနဲ့ သူတို့ရဲ့ပညာရေးဟာ၊ ကျမတို့နိုင်ငံရဲ့ အနာဂတ် အတွက် အလွန့်ကို အရေး ပါနေပါတယ်။ သူတို့တွေနဲ့ ကျမတို့ နိုင်ငံရဲ့ အနာဂတ် တွေ တောက်ပ လာနိုင်ဖို့ အတွက် Johns Hopkins တက္ကသိုလ်က ပူးပေါင်း ပါဝင်လိမ့်မယ်လို့၊ ကျမက မျှော်လင့်ပါတယ်။ မြန်မာနိုင်ငံက လူငယ်တွေဟာ Johns Hopkins တက္ကသိုလ်ကပေးတဲ့ ပညာရေးကို ရယူနိုင်ပြီး ကျမ အခုရရှိတဲ့ ဂုဏ်ထူးဆောင် ပါရဂူဘွဲ့မျိုးတွေ သူတို့လည်း ရရှိလာကြတဲ့ အထိ၊ သူတို့ရဲ့ ပညာရေးကို Johns Hopkins က မြှင့်တင်ပေးနိုင်မယ့် အချိန်ကို ကျမက စောင့်မျှော်နေပါတယ်။”

ပြီးခဲ့တဲ့ ဇန်နဝါရီလက Johns Hopkins တက္ကသိုလ်ရဲ့ ဥက္ကဋ္ဌ ရွန်ဒဲန်နီရယ်လ် (Ron Daniel) နဲ့အတူ မြန်မာနိုင်ငံကို သွားရောက်ခဲ့သူ ဒေါ်အောင်ဆန်းစုကြည် ကိုယ်စား ဂုဏ်ထူးဆောင် ပါရဂူဘွဲ့ကို လက်ခံယူခဲ့တဲ့ ဒေါက်တာ ခရစ္စ်ဘိုင်ယာက ဒေါ်အောင်ဆန်းစုကြည်ကို ဒီဘွဲ့ချီးမြှင့်တာနဲ့ ပတ်သက်ပြီး အခုလို ပြောပါတယ်။

ဒေါက်တာ ခရစ္စ်ဘိုင်ယာ။ ။ ပြီးခဲ့တဲ့ဇန်န၀ါရီလက မြန်မာပြည်မှာ Johns Hopkins တက္ကသိုလ်ရဲ့ ဥက္ကဋ္ဌ ရွန် ဒဲန်နီရယ်လ်နဲ့ ကျနော်နဲ့ဟာ၊ အမျိုးသား ဒီမိုကရေစီ အဖွဲ့ချုပ် ခေါင်းဆောင်တွေနဲ့ အကျဉ်းထောင်က လွတ်မြောက်ခါစ (၈၈) မျိုးဆက် ကျောင်း သားတွေ အပါအ၀င် မြန်မာ့နိုင်ငံရေးမှာ အရေးပါသူတွေ၊ လူမှုရေး လုပ်ငန်းတွေ ကို ဆောင်ရွက်နေကြ သူတွေ၊ မြန်မာ အစိုးရရဲ့ သမ္မတကြီး ဦးသိန်းစိန်နဲ့ ၀န်ကြီး တချို့နဲ့ပါ တွေ့ဆုံ ခဲ့ကြပါတယ်။ တွေ့ခဲ့သမျှ ပုဂ္ဂိုလ်တွေနဲ့ ကျနော်တို့ ကျယ်ကျယ်ပြန့်ပြန့် ဆွေးနွေးခဲ့ကြတာက မြန်မာနိုင်ငံက ပညာရေးနဲ့ လူထုကျန်း မာရေးကဏ္ဍတွေမှာ အထူးသဖြင့် တက္ကသိုလ်ကောလိပ်ကျောင်းတွေမှာ ပညာရေး ကို ပြန်ပြီးမြှင့်တင်ဖို့ ကျနော်တို့ Johns Hopkins တက္ကသိုလ်က ဘယ်လို အခန်းကဏ္ဍကနေ ပါဝင်ဆောင် ရွက်နိုင်မလဲ ဆိုတာ ပါ။ တော်တော်များများ အစီအစဉ်တွေ စဉ်းစားကြံဆ ချမှတ်နိုင်ခဲ့ကြပါတယ်။ ဒါကြောင့် လည်း မြန်မာနိုင်ငံမှာ ဒီလိုအခြေအနေတွေ ရောက်ရှိလာအောင် အကြမ်းမဖက် ငြိမ်းချမ်းတဲ့ နည်းလမ်း အမျိုး မျိုးနဲ့ ကြိုးပမ်း ခဲ့တဲ့ ဒေါ်အောင်ဆန်းစုကြည်ကို ကျနော်တို့ Johns Hopkins တက္ကသိုလ်က ဂုဏ်ထူးဆောင် ပါရဂူဘွဲ့ ချီးမြှင့်ရတာဖြစ်ပြီးတော့ ကျနော်တို့ တက္ကသိုလ်က ဒီ့အတွက် ပိုပြီး ဂုဏ်တက်ပါတယ် ခင်ဗျာ။

ဒေါက်တာ ခရစ္စ်ဘိုင်ယာက အခုအခါ မြန်မာနိုင်ငံမှာ Johns Hopkins တက္ကသိုလ်က စတင်ဆောင်ရွက်နေ မှုနဲ့ ပတ်သက်လို့ အခုလိုပြောပါတယ်။

ဒေါက်တာ ခရစ္စ်ဘိုင်ယာ။ ။ ပြီးခဲ့တဲ့ဇန်န၀ါရီလက စလို့၊ ကျနော်တို့ တက္ကသိုလ်ရဲ့ လူထု ပညာရေးဌာနက သင်တန်းပေးတဲ့ သူတွေ၊ မြန်မာနိုင်ငံကို သွားပြီးတော့ အရေးပေါ် ကျန်းမာရေး ပြုစုစောင့်ရှောက်မှု ပညာရပ် အခြေခံ သင်တန်းနဲ့ အဆင့်မြင့် သင်တန်း တချို့ကို စပြီး သင်ကြားပေးနေ ကြပါပြီ။ ကျနော်တို့က အပြန်အလှန် ပညာရေး ဖလှယ်မှု အစီအစဉ် အဖြစ် ကျနော်တို့ တက္ကသိုလ်ရဲ့ လူထု ပညာရေး ဌာနက ကျောင်းသားတွေ မြန်မာနိုင်ငံမှာ သွားရောက်ပညာ သင်ကြားကြဖို့နဲ့၊ မြန်မာကျောင်းသားတွေ Johns Hopkins တက္ကသိုလ်ကို လာရောက် ပညာ သင်ကြားကြဖို့တွေကို၊ မကြာခင် အကောင်အထည်ပေါ်လာအောင် လုပ်ကိုင်ဆောင် ရွက်နေပါတယ်။"

လူ့အခွင့်အရေးအတွက် ငြိမ်းချမ်းစွာ တိုက်ပွဲဝင်ခဲ့သူအနေနဲ့ အခုလို ဒေါ်အောင်ဆန်းစုကြည်ကို Johns Hopkins တက္ကသိုလ်က ဂုဏ်ထူးဆောင် ပါရဂူဘွဲ့ ချီးမြှင့် ခဲ့တာကြောင့်၊ ဒေါ်အောင်ဆန်းစုကြည်က ဗီဒီယို မိန့်ခွန်း သတင်းစကား ထဲမှာ ဒီ့အတွက် တုံ့ပြန်စကားပြောခဲ့ပါတယ်။

ဒေါ်အောင်ဆန်းစုကြည်။ ။ မြန်မာနိုင်ငံက လူ့အခွင့်အရေးအကြောင်းကို ကျမက ပြောတယ်ဆိုရင်၊ တကယ်က ကျမက တကမ္ဘာလုံးက လူ့အခွင့်အရေး အကြောင်းကို ပြောတာပဲ ဖြစ်ပါတယ်။ ဘာဖြစ်လို့လဲ ဆိုတော့ လူသား အနေနဲ့ ဖြစ်တည်နေမှုက ဘ၀အခြေ အနိမ့်အမြင့်နဲ့ မဆိုင်ပါဘူး။ လူသား တစ်ဦးဟာ ကမ္ဘာပေါ်က တနေရာမှာ မပြည့်မစုံ ဘ၀နဲ့ နေနေရတာကြောင့်၊ သူဟာ တင့်တောင့် တင့်တယ် နေထိုင်နေကြရတဲ့နေရာက လူသားထက် နိမ့်ကျတယ်လို့ အဓိပ္ပာယ်ဖွင့်လို့ မရပါဘူး။ ဒါကြောင့် ကျမတို့က မြန်မာနိုင်ငံမှာ လူ့အခွင့်အရေး အတွက် ရုန်းကန် လှုပ်ရှားနေကြတယ် ဆိုရင်၊ ဒါက ကျမတို့က လူသားအားလုံးရဲ့ လူ့အခွင့်အရေး အတွက် ရုန်းကန် လှုပ်ရှားနေတာပါပဲ။

Johns Hopkins တက္ကသိုလ်ရဲ့ အမေရိကန်ပြည်ထောင်စုနဲ့ နိုင်ငံတကာမှာရှိတဲ့ တက္ကသိုလ်ခွဲတွေ အားလုံး မှာ ဘွဲ့နှင်းသဘင် အခမ်းအနားတွေကို မေလ ၂၄ ရက်နေ့က ကျင်းပ ခဲ့တာဖြစ်ပြီး ဒီအခမ်းအနား အားလုံးမှာ ဂုဏ်ထူးဆောင် ပါရဂူဘွဲ့ ချီးမြှင့်ခံခဲ့ရတဲ့ ဒေါ်အောင်ဆန်းစုကြည်ရဲ့ ဗွီဒီယို မိန့်ခွန်း အမှာစကားကို ပြသခဲ့ပါ တယ် ခင်ဗျာ။

Ref: VOA News

Read More...

Collapse...

ပြည်သူတွေ လျှပ်စစ်ခြွေတာဖို့ သမ္မတ အကြံပေး တိုက်တွန်း

သင်းသီရိ
ကြာသပတေး, 24 မေ 2012

မြန်မာနိုင်ငံမှာ အိမ်တွေ ဖယောင်းတိုင်ထွန်းပြီး လျှပ်စစ်မီး ပိတ်ထားရင် ပြဿနာ အဆင်ပြေသွားမယ်လို့ နိုင်ငံတော် သမ္မတ အကြံပေး တဦးက ပြောပါတယ်။ အခုရက်ပိုင်းတွေ ထဲမှာ မြန်မာနိုင်ငံမှာ အလုပ်သမား လစာ တိုးရေးနဲ့ လျပ်စစ်မီး အချိန် အပြည့်အ၀ ရရှိရေးတွေ အတွက် ဆန္ဒပြ တောင်းဆိုတာတွေနဲ့ ပတ်သက်တဲ့ သတင်းထောက်တွေရဲ့ မေးခွန်းထဲ အခုလို ဖြေခဲ့တာဖြစ်ပြီး ဆန္ဒပြတာတွေ မလုပ်ပဲ သက်ဆိုင်ရာ အဖွဲ့အစည်းတွေနဲ့ အချင်းချင်း ပြေလည်အောင် ညှိနှိုင်းတာဟာ အကောင်းဆုံးပဲလို့ သမ္မတ အကြံပေး ဦးကိုကိုလှိုင်က ပြောခဲ့ပါတယ်။ ရန်ကုန်က သမ္မတ အကြံပေးရုံးမှာ ဒီကနေ့ လုပ်ခဲ့တဲ့ သတင်းစာရှင်းလင်းပွဲ အကြောင်းကိုတော့ မသင်းသီရိက တင်ပြပေးထားပါတယ်။

မေလ ၂၄ ရက် ကြာသာပတေးနေ့က ရန်ကုန်မှာရှိတဲ့ သမ္မတအကြံပေးရုံးမှာ နိုင်ငံတော်သမ္မတရုံးရဲ့ ညွှန်ကြားချက်အရ ဆိုပြီး ဦးကိုကိုလှိုင်နဲ့အတူ နောက်ထပ် သမ္မတ အကြံပေးအဖွဲ့ဝင် တချို့နဲ့ သတင်းစာရှင်းလင်းပွဲ တခု လုပ်ခဲ့တာပါ။

အဲဒီမှာ လတ်တလော မြန်မာနိုင်ငံတ၀ှမ်း လျပ်စစ်မီး အချိန်ပြည့်ရရေး ဆန္ဒဖော်ထုတ် ပွဲတွေ ဖြစ်နေတာမို့ နိုင်ငံတော် အနေနဲ့ ဒီပြဿနာကို ဘယ်လို ဖြေရှင်းပေးဖို့ စီစဉ်ထားပါသလဲ ဆိုတဲ့ သတင်းထောက်တွေရဲ့ အမေးကို ဦးကိုကိုလှိုင်ကတော့ လျပ်စစ်မီးတွေပိတ်ကာ ဖယောင်းတိုင် ထွန်းပြီး လျပ်စစ်မီးခြွေတာရင် ပြဿနာ အားလုံး ပြေလည် သွားမယ်လို့ အခုလိုဖြေခဲ့ပါတယ်။

"တချို့နေရာတွေကျတော့ အခက်အခဲ ရှိတာတွေ ရှိတယ်။ ဥပမာဆိုပါတော့ - အခု လျှပ်စစ်မီး ကိစ္စပဲ ဆိုပါစို့။ ကျနော် ဥပမာလေး တခု ပြောပြမယ်။ ဂျပန်မှာ နြူကလီးယား Facility တွေ ပျက်သွားတယ်။ အဲဒါနဲ့ ကြောက်လန့်ပြီးတော့ နြူကလီးယား Plant တွေ အကုန်လုံး ပိတ်လိုက်ရတယ်။ အခု ၄၀ ကျော်မှာ ၂ ခုပဲ လည်ပတ်နေတယ်။ ဒါပေမယ့် ဂျပန်နိုင်ငံမှာ မီးမပြတ်ဘူး။ ဘာကြောင့်လည်း ဆိုတော့ ပြည်သူလူထုက အကုန်လုံး ခြိုးခြံ ခြွေတာတယ်။ အိမ်သာမှာ ဖင်ထိုင်တဲ့နေရာမှာ အပူပေးတဲ့ စံနစ်ကအစ သူတို့ မသုံးဘူး။ အအေးခံပြီးတော့ အိမ်သာ သွားတယ်။ မလိုအပ်တဲ့နေရာက မီးတွေ အကုန်ဖြတ်တယ်။ အကုန်လုံး ခြွေတာတယ်။ အဲဒီအခါကျတော့ Plant ၄၀ မှာ ၂ ခုပဲ လည်ပတ်နေတာတောင်မှ မီးမပြတ်ဘူး။ အဲဒီတော့ ကျနော်တို့ကလည်း၊ ကျနော်ပြောချင်တာက - တကယ့် စေတနာနဲ့ ပြောချင်တာ၊ ဖရောင်းတိုင်တွေကို ကိုယ့်အိမ်မှာ ကိုယ်ထွန်းပြီး မီးလေး ပိတ်ထား လိုက်ကြပါ။ အားလုံး အဆင်ပြေ သွားပါမယ်။"

ဒါ့အပြင်လည်း အလုပ်သမားဆန္ဒပြမှုတွေနဲ့ ပတ်သက်လို့ သူအမြင်ကို ရှင်းပြရာမှာတော့ ဆန္ဒပြ တောင်းဆိုတာတွေ မလုပ်ပဲ သက်ဆိုင်ရာနဲ့ ညှိနှိုင်းရင် ပိုကောင်းမယ်လို့ မြင်ကြောင်းကိုလည်း
ပြောပါတယ်။

"ဘာမှ ဆန္ဒမပြပဲနဲ့ အေးအေးချမ်းချမ်း ပြဿနာတွေဟာ အချင်းချင်း၊ သက်ဆိုင်တဲ့ အဖွဲ့အချင်းချင်း ထဲမှာ ညှိနှိုင်းပြီးတော့ ပြေလည်သွားရင် အကောင်းဆုံးပေါ့။ ဥပမာ ဆိုရင် အလုပ်ရှင်နဲ့ အလုပ်သမားကြား၊ အချင်းချင်း ညှိပြီးတော့ ဘာမှ မဖြစ်တဲ့အချိန်မှာ ပြေလည်သွားရင် အလုပ်လည်း မပိတ်ရဘူး၊ သူတို့ လစာလည်း မထိခိုက်ဘူးပေါ့။ အဓိက ကတော့ ဘာလဲဆိုတော့ တဖက်နဲ့ တဖက်က အပေးအယူ မျှဖို့၊ နားလည်မှုရှိဖို့က အရေးကြီးဆုံးပဲ။"

နောက်တခါ ဒုတိယ သမ္မတ သီဟသူရ ဦးတင်အောင်မြင့်ဦး ရာထူးကနေ နှုတ်ဖို့ စာတင်ထားတဲ့ သတင်းနဲ့ ပတ်သက်လို့ သမ္မတ အကြံပေး တယောက်အနေနဲ့ ဒီသတင်းကို အတည်ပြု နိုင်ပါသလား ဆိုတဲ့ အမေးကိုတော့ ဦးကိုကိုလှိုင်က -

"ကျနော်လည်း အမှန် ပြောရလို့ရှိရင် ရန်ကုန်နဲ့ ဗမာပြည်မှာနေတာထက်၊ အပြင်မှာ ရောက်နေတာက များတယ်။ ဒီတလော အတွင်းမှာ။ ဒီကိစ္စတွေတောင်မှ ကျနော်လည်းပဲ အွန်လိုင်းမှာပဲ သိတဲ့ဘ၀ ဖြစ်နေတယ်။ တမြန်မနေ့က ကျနော် ပြန်ရောက်လာတယ်၊ ဒီကနေ့ ခနနေရင် ကျနော် လေယာဉ်ပျံကွင်း ပြန်ဆင်းရမယ်။ ရေရေရာရာ ကျနော် ဘာမှ မသိပါဘူး။ ဒါပေမယ့် ပြောရရင်တော့ ၃ ရက်နေ့က ထွက်လာတဲ့ အမိန့်အရ ဒုသမ္မတကြီးက ငြိမ်းချမ်းရေး အဖွဲ့ထဲမှာ ပါနေတယ် ဆိုလို့ရှိရင် ဒါ တရားဝင် Position အရတော့ ရှိနေဦးမယ် ဆိုတာ ရှင်းပါတယ်။ ဆိုတော့ ဒုသမ္မတ တယောက် နှုတ်ထွက်တယ် ဆိုတာ ပေါ့ပေါ့ သေးသေးကိစ္စ မဟုတ်ပါဘူး။ ဖြစ်လာတာနဲ့ သူ့ဟာသူ တရားဝင် ပေါ်ပေါက်လာမယ့် ကိစ္စဖြစ်မယ်လို့ပဲ ကျနော် ထင်ပါတယ်။ ဒါမျိုးက ပုန်းလျှိုး ကွယ်လျှိုးလည်း လုပ်လို့ရတဲ့ ကိစ္စမျိုးမှ မဟုတ်ပဲ။ ဖြစ်လာတဲ့ အခါကျရင် တရားဝင် လုပ်ထုံး လုပ်နည်းနဲ့ ဖြစ်မှာပေါ့။ မဖြစ်သေးလို့ရှိရင်လည်း မဖြစ်ဘူးပေါ့။"

ဒီကနေ့ သတင်းထောက်တွေကို ခေါ်ယူပြီး ရှင်းပြရတဲ့ အဓိက အကြောင်းအရင်းကတော့ မေလ ၁၉ ရက်နေ့ မှာ သမ္မတရဲ့ စီးပွာရေး အကြံပေး တဦးဖြစ်တဲ့ ဒေါက်တာဦးမြင့်ရဲ့ "ရန်ကုန် တက္ကသိုလ်ရဲ့ အစဉ်အလာ ဂုဏ်သိက္ခာကို ပြန်လည် တည်ဆောက်ရေး အတွက် ပြည်သူသို့ အိတ်ဖွင့်ပေးစာ" ဆိုတာနဲ့ ပတ်သက်ပြီးတော့ သတင်းထောက်တွေကို ရှင်းပြကြတာ ဖြစ်ပါတယ်။

ဒေါက်တာ ဦးမြင့်ဟာ သမ္မတရဲ့ အကြံပေးအဖွဲဝင်တဦး ဖြစ်ပေမယ့် ဒီစာဟာ ပုဂ္ဂိုလ်ရေး ခံစားမှုနဲ့ ဆန္ဒ အရသာဖြစ်ပြီး သမ္မတ အကြံပေး အဖွဲ့နဲ့ရော နိုင်ငံတော် သမ္မရုံးနဲ့ပါ မပတ်သက်ဘူး ဆိုပြီးတော့ ဦးကိုကိုလှိုင်က ရှင်းပြခဲ့တာ ဖြစ်ပါတယ်။

ဒါ့အပြင် ရန်ကုန်တက္ကသိုလ်ပိုင် တင်းနစ်ကွင်းတွေဟာလည်း ၂၀၁၃ ခုနှစ် မြန်မာနိုင်ငံမှာ ကျင်းပမယ့် အရှေ့တောင်အာရှ အားကစားပြိုင်ပွဲများ အတွက် ပုဂ္ဂလိက စီးပွားရေး လုပ်ငန်းရှင်များနဲ့ ပူးတွဲပြီးတော့ အဆင့်မြင့် ကွင်းတွေ အဖြစ်ပြုပြင်ဖို့သာ ဖြစ်ပြီးတော့ ပုဂ္ဂလိက လုပ်ငန်းရှင်တွေကို လွဲပေးလိုက်တာ မဟုတ်ဘူး ဆိုတာကိုလည်း သူ့ရဲ့ သတင်း စာရှင်းလင်းပွဲ အတွင်းမှာ ထည့်သွင်း ပြောကြား သွားခဲ့ပါတယ်။

တခါ မြန်မာနိုင်ငံမှာ ပညာရေးနဲ့ ကျန်းမာရေး ကဏ္ဍတွေ မြင့်မားလာဖိူ့အတွက် နည်းပညာ တက္ကသိုလ်တွေ အဆင့်အတန်း တိုးတက်လာဖို့ အိန္ဒိယနိုင်ငံနဲ့ ပူးပေါင်း ဆောင်ရွက်ဖို့ စီစဉ် ထားသလို တောင်ကိုရီးယား နိုင်ငံကလည်း ပညာရေးနဲ့ ကျန်းမာရေး ကဏ္ဍတွေမှာ ကူအညီပေးမယ် ဆိုတာတွေကို ပြောထားတယ်လို့လည်း ရှင်းပြသွားပါတယ်။

တခါ နိုင်ငံမှာ တိုင်းရင်းသား ပြဿနာတွေကို အမျိုးသား အဆင့်နဲ့ ဆောင်ရွက်နိုင်ဖို့ အတွက် သမ္မတကြီး ကိုယ်တိုင် ဦးဆောင်ကာ နောက်ထပ် အဖွဲ့ဝင်တွေနဲ့ ဖွဲ့စည်း ဆောင်ရွက်နေတယ် ဆိုတာကိုလည်း သတင်းစာ ရှင်းလင်းပွဲအတွင်းမှာ ပြောသွားပါတယ်။

Ref: VOA News

Read More...

Collapse...

မြန်မာနိုင်ငံသား ရင်းနှီးမြှုပ်နှံမှု ဥပဒေသစ် ပေါ်ထွက်လာရန်ရှိ

အောင်ဝင်း
ကြာသပတေးနေ့၊ မေလ ၂၄ ရက် ၂၀၁၂

ရန်ကုန် (မဇ္ဈိမ) ။ ။ မြန်မာနိုင်ငံသား ရင်းနှီးမြှုပ်နှံမှု ဥပဒေသစ်ကို ပြင်ဆင်ရေးဆွဲလျက် ရှိပြီး အသစ် ထွက်ပေါ် လာမည့် ထိုဥပဒေ သစ်တွင် ဝင်ငွေခွန်နှင့် အကောက်ခွန် ကင်းလွတ်ခွင့်များ ပါရှိမည် ဖြစ်ကြောင်း ရင်းနှီးမြှုပ်နှံမှုနှင့် ကုမ္ပဏီများ ညွှန်ကြားမှု ဦးစီးဌာနမှ ညွှန်ကြားရေးမှုး ဦးကျော်ထွန်းက ပြောကြားသည်။

“မြန်မာ့ ရင်းနှီးမြှုပ်နှံမှု ကော်မရှင်အနေနဲ့ မြန်မာနိုင်ငံသား ရင်းနှီးမြှုပ်နှံမှု ဥပဒေကို ပြင်ဆင် ရေးဆွဲ နေပါတယ်။ အခု အသစ်ပြင်ဆင်ဖို့ ရှိတဲ့ နိုင်ငံသား ရင်းနှီးမြှုပ်နှံမှု ဥပဒေဟာ နိုင်ငံခြားသား ရင်းနှီးမြှုပ်နှံမှု ဥပဒေမှာ ပါဝင်မယ့် အခွင့်အရေး တွေထက် သာစေရပါမယ်။ နိုင်ငံသားတွေနဲ့ နိုင်ငံခြားသားတွေ ဖက်စပ် ရင်းနှီးမြှုပ်နှံဖို့ ဥပဒေတွေလည်း ပါပါလိမ့်မယ်” ဟု ဦးကျော်ထွန်းက ဆိုသည်။

အသစ်ထွက်ပေါ်လာရန် ရှိသည့် မြန်မာနိုင်ငံသား ရင်းနှီးမြုပ်နှံမှု ဥပဒေတွင် ဝင်ငွေခွန်နှင့် အကောက်ခွန် ကင်းလွတ်ခွင့် အနည်းဆုံး ၃ နှစ် ရရှိမည်ဖြစ်ပြီး ကင်းလွတ်ခွင့် ကာလအတွင်း တင်သွင်း ကုန်ကြမ်းများနှင့် လုပ်ငန်းသုံး ပစ္စည်းများ တင်သွင်းမှု အပေါ် အခွန်ကင်းလွတ်ခွင့် ပေးသွားမည်ဟုလည်း ဆိုသည်။

“ပြည်တွင်းမှာ မော်တော်ယာဉ်တွေ တပ်ဆင် ထုတ်လုပ်ဖို့အတွက် မြန်မာနိုင်ငံသား ရင်းနှီး မြှုပ်နှံမှု စက်ရုံ သုံးရုံကို လုပ်ကိုင်ခွင့်ပြုထားပြီး ဖြစ်ပါတယ်။ အခု အသစ် ခွင့်ပြုထားတဲ့ ကုမ္ပဏီတွေ အနေနဲ့ လုပ်ငန်းသစ်တွေ အနေနဲ့ စတင် လုပ်ကိုင်ရပါမယ်” ဟု ညွှန်ကြားရေးမှူး က ဆိုသည်။

နိုင်ငံခြားနှင့် ပြည်တွင်းလုပ်ငန်းရှင်များ ဖက်စပ်ရင်းနှီး မြှုပ်နှံလုပ်ငန်း လုပ်ကိုင်ဖို့အတွက် ဥပဒေသစ် ကိုလည်း ရေးဆွဲလျက် ရှိပြီး အဆိုပါ ဥပဒေတွင် ပြည်တွင်း လုပ်ငန်းရှင်များ အနေဖြင့် ဖက်စပ် လုပ်ငန်းများတွင် အရင်းအနှီး ထည့်ဝင်ရာတွင် အနည်းဆုံး ပမာဏ အနေဖြင့် ပထမနှစ်တွင် ၁ဝ ရာခိုင်နှုန်း၊ ဒုတိယနှစ်တွင် ၂ဝ ရာခိုင်နှုန်းနှင့် တတိယနှစ်တွင် ၃ဝ ရာခိုင်နှုန်း စသည်ဖြင့် ပါဝင် ရင်းနှီးမြှုပ်နှံမှု ပြုလုပ်ရမည် ဟု ဆိုသည်။

“လောလောဆယ် ဖက်စပ်ရင်းနှီးမြုပ်နှံမှု လုပ်ငန်းလုပ်ကိုင်ဖို့ အတွက် ပါမစ်ခွင့်ပြုချက် လျှောက်ထားမှု ၄၃ ခုရှိပါ တယ်။ မော်တော်ယာဉ်တပ်ဆင် ထုတ်လုပ်မှု လုပ်ငန်းတွင် ဆူဇူးကီး ကုမ္ပဏီက ပြည်တွင်း ကုမ္ပဏီတခုနဲ့ ပူးပေါင်းပြီး လုပ်ငန်းလုပ်ကိုင်ဖို့ ခွင့်ပြုချက် တင်ထားပါတယ်” ဟု ဦးကျော်ထွန်းက ဆိုသည်။

ပြည်တွင်းနှင့် နိုင်ငံခြားရင်းနှီးမြုပ်နှံမှု လုပ်ငန်းများ လုပ်ကိုင်ရာတွင် ပြည်ပမှ ကုန်ကြမ်း တင်သွင်းပြီး၊ ပြည်တွင်းတွင် ကုန်ချော ထုတ်လုပ်သည့် လုပ်ငန်းများ ကိုလည်း ခွင့်ပြု သွားဖွယ် ရှိပြီး အဆိုပါ လုပ်ငန်း ရပ်များတွင် ငါးလုပ်ငန်း အတွက် ကုန်ကြမ်းများ တင်သွင်းပြီး ပြည်တွင်းတွင် အပြီးသတ် ကုန်ချော ထုတ်လုပ်သည့် လုပ်ငန်းများလည်း ပါဝင်မည်ဖြစ် သည်ဟု ဆိုသည်။

နိုင်ငံခြား ရင်းနှီးမြှုပ်နှံမှု ဆိုင်ရာ ပြင်ဆင်သည့် ဥပဒေတရပ်ကိုမူ လွန်ခဲ့သော မတ်လအတွင်းက ပြည်သူ့ လွှတ်တော် အစည်း အဝေးတွင် အတည်ပြုခဲ့ပြီး ထိုဥပဒေကို လက်တွေ့ ကျင့်သုံးရန် အတွက် နိုင်ငံတော် သမ္မတက အတည်ပြု လက်မှတ်ရေးထိုးရန် ကျန်ရှိနေသေးသည်။

အဆိုပါ ပြင်ဆင်ထားသည့် ဥပဒေတွင် နိုင်ငံခြားကုမ္ပဏီများအနေဖြင့် ရင်းနှီးမြှုပ်နှံမှု ပြည်တွင်း ကုမ္ပဏီများနှင့် ပူးပေါင်းရန် မလိုအပ်တော့ဘဲ ၁ဝဝ ရာခိုင်နှုန်းပြည့် ရင်းနှီးမြှုပ်နှံမှု ပြုလုပ်နိုင်မည်ဖြစ်ပြီး ပထမ ငါးနှစ်တာ ကာလ အတွင်း အခွန်အကောက် ကင်းလွတ်ခွင့် ပြုမည်ဟု ဆိုထားသည်။

နိုင်ငံခြား ကုမ္ပဏီများအနေဖြင့် ပြည်တွင်းကုမ္ပဏီများနှင့် ပူးတွဲရင်းနှီးမြှုပ်နှံမှု ပြုလုပ်ပါကလည်း နိုင်ငံခြား ရင်းနှီးမြုပ်နှံမှု ၃၅ ရာခိုင်နှုန်း အနည်းဆုံး ထည့်ဝင်ကာ ရင်းနှီးမြှုပ်နှံမှု ပြုလုပ်နိုင်သည်။ ရင်းနှီးမြှုပ်နှံမှု အတွက် လိုအပ်သော မြေနေရာ များကို နှစ် ၃ဝ စာချုပ်အထိ ချုပ်ဆို ငှားရမ်း လုပ်ကိုင်နိုင်ပြီး ၁၅ နှစ် ထပ်မံ သက်တမ်းတိုး လုပ်ကိုင်နိုင်သည်ဟုလည်း ဆိုထားသည်။

Ref: မဇ္ဈိမ

Read More...

Collapse...

ဦးမြင့်၏ ‘အိတ်ဖွင့်ပေးစာ’ သမ္မတရုံး သဘောထားမဟုတ်ဟု အကြံပေးအဖွဲ့ ရှင်းလင်း

ကိုပေါက်
ကြာသပတေးနေ့၊ မေလ ၂၄ ရက် ၂၀၁၂

နယူးဒေလီ (မဇ္ဈိမ) ။ ။ သမ္မတကြီး ဦးသိန်းစိန်၏ စီးပွားရေး အကြံပေးအဖွဲ့ ခေါင်းဆောင် ဒေါက်တာ ဦးမြင့်၏ “ပြည်သူသို့ အိတ်ဖွင့်ပေးစာ”မှာ သမ္မတရုံး၏ သဘောထားကို ထင်ဟပ်ခြင်း မရှိကြောင်း သမ္မတ အကြံပေးဖွဲ့က သတင်းစာ ရှင်းလင်းပွဲ တခုလုပ်၍ ကြာသပတေးနေ့ နံနက်ပိုင်းက ပြောဆိုလိုက်သည်။

ဒေါက်တာဦးမြင့်၏ မေလ ၁၉ ရက်နေ့ ရက်စွဲပါ “ရန်ကုန်တက္ကသိုလ်ရဲ့ အစဉ်အလာ ဂုဏ်သိက္ခာကို ပြန်လည် တည်ဆောက်ရေး ပြည်သူသို့ အိတ်ဖွင့်ပေးစာ”နှင့် ပတ်သက်၍ ဖြေရှင်းရန် အတွက် နိုင်ငံတော် သမ္မတရုံးမှ တိုက်ရိုက် ညွှန်ကြားချက် အရ သမ္မတ၏ နိုင်ငံရေး အကြံပေး ဦးကိုကိုလှိုင်၊ စီးပွားရေး အကြံပေး ဒေါက်တာနေဇင်လတ်၊ ဥပဒေ အကြံပေးများ ဖြစ်ကြသော ဦးစစ်မင်းနှင့် ဒေါ်ခင်မျိုးမြင့်တို့က ပြည်တွင်းပြည်ပ သတင်း မီဒီယာများအား ရှင်းလင်း ပြောပြကြခြင်း ဖြစ်သည်။

အဆိုပါ အိတ်ဖွင့်ပေးစာမှာ ဦးမြင့်၏ ပုဂ္ဂလိက သဘောထားများသာ ဖြစ်ကြောင်း အကြံပေး အဖွဲ့က ရှင်းပြခဲ့သည်ဟု ကိုယ်တိုင် သတင်း တက်ရောက် ယူခဲ့သည့် မဇ္ဈိမ သတင်းထောက်က ပြောသည်။

“ဒီစာဟာ ဦးမြင့်ရဲ့ ပုဂ္ဂလိက ဆန္ဒအရ ရေးတာပါ။ နိုင်ငံတော်သမ္မတ အကြံပေးရုံး အနေနဲ့ ကြိုတင်လည်း မသိဘူး၊ သဘောထားလည်း ထင်ဟပ်ခြင်း မရှိဘူး။ ဒါပေမယ့် ဦးမြင့်သည် သမ္မတ အကြံပေး ဖြစ်နေသည့် အတွက် အကြံပေး အဖွဲ့ကို ထိခိုက်နိုင်တဲ့ သဘောမျိုး။ ဦးမြင့် အိတ်ဖွင့်ပေးစာနဲ့ ပတ်သက်ပြီး နားလည်မှု အယူကောက် လွဲမှာစိုးလို့ပေါ့။ ဒီကိစ္စဟာ မူဝါဒရေးရာပိုင်းမှာ အရေးပါပြီးတော့ Sensitive ဖြစ်တဲ့ အတွက် အထင်လွဲမှာ စိုးလို့ ပြန်လည် ဖြေရှင်းတာပါ လို့ ပြောသွားပါတယ်” ဟု သတင်းထောက် လင်းဘိုဘို က ပြောသည်။

ရန်ကုန်မြို့“နိုင်ငံတော်သမ္မတ အကြံပေးအဖွဲ့ရုံး”တွင် ပြုလုပ်ခဲ့သည့် ထိုရှင်းလင်းပွဲတွင် သမ္မတ၏ နိုင်ငံရေး အကြံပေး ဦးကိုကိုလှိုင် ကသာ အများဆုံး ရှင်းလင်းပြောဆို ခဲ့သည်ဟု သိရသည်။

အင်တာနက် စာမျက်နှာများပေါ်တွင် ပြန့်နှံ့နေသည့် ထိုအိတ်ဖွင့်ပေးစာတွင် “ရန်ကုန် တက္ကသိုလ်၏ အစဉ်အလာ ဂုဏ်သိက္ခာကို ပြန်လည် တည်ဆောက်ရေး အတွက် အဆိုပြုပါတယ်” ဟု ဦးမြင့်က ရေးသားသည်။

ထိုသို့ ရန်ကုန်တက္ကသိုလ်ကြီး၏ ဂုဏ်သိက္ခာ ပြန်လည်မြင့်မားရေးအတွက် ကျောင်းသားသမဂ္ဂ အဆောက် အဦး ပြန်လည် တည်ဆောက်ရေး အတွက် ၁၉၈၈ ခုနှစ် မဆလ နောက်ဆုံး သမ္မတ ဒေါက်တာမောင်မောင်၏ ပြည်သူအား ပေးခဲ့သည့် ကတိကိုလည်း ဦးမြင့်က ထောက်ပြထားသည်။

၂၃ ပိုဒ်ရှိ ဦးမြင့်၏ စာပါ ပညာရေးတိုးတက်မြင့်မားရေး အခြား အဆိုပြုချက်များနှင့် ပတ်သက်၍လည်း သမ္မတ အကြံပေး အဖွဲ့က ပြန်လည် ရှင်းလင်း သွားခဲ့ကြောင်း မဇ္ဈိမ သတင်းထောက်က ပြောသည်။

“နိုင်ငံတော်အစိုးရအနေနဲ့ ပညာရေးစနစ်နဲ့ပတ်သက်ပြီးတော့ လုပ်ဆောင်နေတာတွေ ရှင်းပြပါတယ်။ အိန္ဒိယနိုင်ငံကနေ အိုင်တီ တက္ကသိုလ်တခု ဖွင့်လှစ်ပေးဖို့ သဘော တူညီထားတယ်။ မန္တလေးကနေ စစ်ကိုင်းကို ပြောင်းထားတဲ့ တိုင်းရင်းသား လူမျိုးများ စွမ်းရည်ဖွံ့ဖြိုးရေး ဒီဂရီကောလိပ်နေရာမှာ အဲဒီ တက္ကသိုလ်ကို ဖွင့်မယ်။ ၂ဝ၁၃ မှာ စဖွင့်ဖို့ စီစဉ်နေတယ်။ မြန်မာပြည်က ဆရာတွေ well trained ဖြစ်ပြီးသွားရင်၊ လွှဲပြောင်းပေးမယ်ပေါ့။ တခြားစီမံကိန်းတွေ လည်း ပြောပြပါတယ်။ အားကစား ကိစ္စ ဆိုရင်လည်း ဆီးဂိမ်းကိစ္စ ဘယ်လိုလုပ်ဖို့ စီစဉ်ထားပါတယ်။ စသဖြင့် ပြောသွား ပါတယ်” ဟု လင်းဘိုဘို က ပြောသည်။

ဦးမြင့်က “ရန်ကုန်တက္ကသိုလ်အား ဧရာဝတီမြစ်ကြီးနဲ့ နှိုင်းယှဉ်နိုင်ပါတယ်” ဧရာဝတီကို ကာကွယ်ရန် အတွက်လည်း စည်းလုံးသည့် ပြည်သူ့ အင်အားနှင့် အစိုးရ၏ လူထုဆန္ဒကို လေးစားမှုကြောင့် ကောင်းမွန်သော ရလဒ်များ ရရှိနိုင်ခဲ့ကြောင်း ရေးသားထားသည်။

သတင်းစာရှင်းလင်းပွဲနှင့်ပတ်သက်၍ ဦးမြင့်၏ တုန့်ပြန်ချက်အား သိရှိနိုင်ရန် မဇ္ဈိမက ဆက်သွယ် ခဲ့သော်လည်း ဦးမြင့်မှာ နေပြည်တော်သို့ ခရီး လွန်နေ၍ ဆက်သွယ် မရခဲ့ပေ။

သုံးသပ်သူများ၏ အဆိုအရ ဦးမြင့်မှာ အတိုက်အခံ အမျိုးသား ဒီမိုကရေစီ အဖွဲ့ချုပ်နှင့် နီးစပ်သူဖြစ်၍ ယခုကဲ့သို့ အကြံပေးအဖွဲ့တွင်း သဘောထား ကွဲလွဲမှုများ ပေါ်ပေါက်လာခြင်း ဖြစ်သည်ဟု ယူဆကြသည်။

Ref: မဇ္ဈိမ

Read More...

Collapse...

NLD ပါတီ အလုပ်သမားများဘက်က ရပ်တည်မည်

2012-05-24

အခြေခံအလုပ်သမား လစာတိုးမြှင့်ရေး ဆန္ဒပြတောင်းဆိုနေကြတဲ့ လှိုင်သာယာ စက်မှုဇုန်က အလုပ်သမားတွေ အရေး အတွက် အပြည်ပြည် ဆိုင်ရာ အလုပ်သမား အဖွဲ့ချုပ် ILO ကို တင်ပြဆောင်ရွက် သွားမယ်လို့ အမျိုးသား ဒီမိုကရေစီ အဖွဲ့ချုပ်က ဒီကနေ့ ပြောဆိုပါတယ်။

NLD ရုံးချုပ်မှာ မနေ့က ပြုလုပ်တဲ့ ဗဟိုအလုပ်အမှုဆောင် အဖွဲ့ဝင် အစည်း အဝေးမှာ ဆန္ဒပြ အလုပ်သမားတွေ အရေးနဲ့ ပတ်သက်ပြီး ဒေါ်အောင်ဆန်းစုကြည်နဲ့ ဆွေးနွေးပြီး အခုလို စီစဉ် ဆုံးဖြတ်ခဲ့တာ ဖြစ်တယ်လို့ NLD ပါတီ သဘာပတိ အဖွဲ့ ဥက္ကဋ္ဌ ဦးတင်ဦးက အခုလို ပြောပါတယ်။

" ကျွန်တော်တို့မနေ့က ဗဟိုအလုပ်မှုဆောင်အဖွဲ့ အစည်းအဝေးမှာ ဒေါ်အောင်ဆန်းစုကြည် ကိုယ်တိုင် တက်ပြီးတော့ ဒါတွေ အကုန်လုံးကို ကြားနာပြီးပြီ။ ကျွန်တော်တို့ တင်ပြတာတွေကို နားထောင်ပြီး ကျွန်တော်တို့ ပြောပြလိုက်ပြီးပြီ။ အဲဒါနဲ့ ပတ်သက်လို့ ဒေါ်အောင်ဆန်းစုကြည် ကိုယ်တိုင်ပဲ ဒီအလုပ်သမား အရေး ကိစ္စ ပတ်သက်လို့ရှိရင် အေးအေးချမ်းချမ်း ဖြေရှင်းပေးပြီးတော့ အတွေ့အကြုံ ရှိတဲ့ ပုဂ္ဂိုလ်တွေနဲ့ ဒေါ်အောင်ဆန်းစုကြည်က တွေ့ဖို့ချိန်းထားတယ်။ တွေ့ပြီး လို့ရှိရင် အဲဒီပေါ်မူတည်ပြီးတော့ လက်ရှိ ဒီမှာရှိနေတဲ့ ILO နဲ့ ဆောင်ရွက်စရာ ရှိတာတွေကိုလည်းပဲ ဒေါ်အောင်ဆန်းစုကြည်က သူဆောင်ရွက်နိုင်စွမ်း ရှိတာကို ဆောင်ရွက်မယ်။ နောက်ပြီးတော့လည်းပဲ ဒီထက် ဆက်ပြီးတော့ လိုအပ်တဲ့ လိုအပ်ချက်များ ကိုလည်းပဲ ILO ပေါ့နော်၊ ကျွန်တော်တို့ ဗဟိုအလုပ်သမား အဖွဲ့ချုပ် အထိပေါ့၊ ဒါကိုလည်းပဲ အစိုးရပိုင်းကော၊ အလုပ်ရှင် ပိုင်းကော နောက် အလုပ်သမားများ ခံစားရတဲ့အပိုင်းတွေကော၊ ဒါတွေကို ပြေလည်အောင် ဆောင်ရွက်ဖို့ လုပ်ကိုင်သွားမယ်"

မနေ့ နေ့လည်က လှိုင်သာယာစက်မှုဇုန် နေမင်းအောင် အထည်ချုပ်စက်ရုံက အလုပ်သမား ကိုယ်စားလှယ်တွေက အမျိုးသား ဒီမိုကရေစီ အဖွဲ့ချုပ်ရုံးကို လာရောက်ပြီး သူတို့ရဲ့ အခက်အခဲတွေကို တင်ပြ ခဲ့ကြပါတယ်။

ဆန္ဒပြအလုပ်သမားတွေ အနေနဲ့ ဆက်လက် ဆန္ဒပြနေမယ်ဆိုရင် အလုပ်က ထုတ်ပယ်မှာဖြစ်ကြောင်း ပြောဆိုတဲ့ အတွက် အမျိုးသား ဒီမိုကရေစီ အဖွဲ့ချုပ်ကို လာရောက် တင်ပြကြတာ ဖြစ်တယ်လို့ ဆိုပါတယ်။

အမျိုးသား ဒီမိုကရေစီအဖွဲ့ချုပ် နာယက ဦးတင်ဦးက အလုပ်သမား ကိုယ်စားလှယ်တွေကို လက်ခံတွေ့ဆုံပြီး၊ အလုပ်သမားတွေ အနေနဲ့ မိမိတို့ရဲ့ အခွင့်အရေး အတွက် ငြိမ်းချမ်းတဲ့ နည်းနဲ့ တောင်းဆိုကြဖို့၊ အလုပ်သမားတွေရဲ့ အခွင့်အရေး အတွက် NLD က ကူညီဆောင်ရွက်မယ့် အကြောင်း ရှင်းပြ ခဲ့တယ်လို့ သိရပါတယ်။

Ref: RFA News

Read More...

Collapse...

လျှပ်စစ်မီးရရှိရန် ပြည်မြို့ ဒုတိယနေ့ဆန္ဒပြမှု ရိုက်နှက်ဖမ်းဆီးမှုများရှိ

May 24th, 2012

ယနေ့နံနက် (၉) နာရီတွင် စတင်ခဲ့သည့် ပဲခူးတိုင်း၊ ပြည်မြို့ လျှပ်စစ်မီး ၂၄ နာရီ အပြည့်အဝရရှိရေး ဒုတိယနေ့ ဆန္ဒပြမှုတွင် လုံထိန်းရဲ များ၏ ရိုက်နှက်ဖမ်းဆီးမှုများ ရှိခဲ့ကြောင်း ဆန္ဒပြပွဲတွင် ပါဝင်သူတဦးက ပြောသည်။

ပြည်မြို့တွင် ယမန်နေ့မှစတင်ကာ လျှပ်စစ်မီး ၂၄ နာရီ ရရှိရေးအတွက် လူနှစ်ထောင်ခန့်က ငြိမ်းချမ်းစွာ ဆန္ဒပြခဲ့ရာ ပထမနေ့တွင် အာဏာပိုင်တို့နှင့် ညှိနှိုင်းမှုဖြင့် အောင်မြင်စွာ ဆန္ဒပြနိုင်ခဲ့သော်လည်း ယနေ့ ဒုတိယနေ့ အဖြစ် ဆက်လက် ဆန္ဒပြကြရာတွင် လုံထိန်းရဲများ၏ ရိုက်နှက် ဖမ်းဆီးခြင်းကို ခံခဲ့ရခြင်းဖြစ်သည်။

“မနေ့က စပြီး ဆန္ဒပြတဲ့ မြို့နယ်လျှပ်စစ်ရုံးရှေ့ကနေပြီး လူတစ်ထောင်ကျော်နဲ့ ဒီနေ့ စထွက်တယ်။ စထွက်ထွက်ချင်းပဲ HRDP ကိုကျော်ဆွေနဲ့ NLD ကိုဝင်းလှိုင် တို့ကို ရိုက်နှက်ပြီး ခေါ်သွားတယ်။ ဆန္ဒပြတဲ့ လူတွေကလည်း သူတို့နှစ်ဦးကို ရဲလက်က ပြန်လုယူကြတယ်။ ဒါပေမယ့် မရဘူး။ ပါသွားတယ်” ဟု ဆန္ဒပြမှုတွင် ပါဝင်သူက ပြောသည်။

ဆန္ဒပြခေါင်းဆောင်နှစ်ဦးအား အာဏာပိုင်လုံထိန်းရဲများက အကြမ်းဖက် ရိုက်နှက်ဖမ်းဆီးခေါ်ဆောင်သွားသော်လည်း ငြိမ်းချမ်းစွာ ဆက်လက် ဆန္ဒပြခဲ့ကြကြောင်း သူက ဆက်ပြောသည်။

သူက “(၁၀) နာရီခွဲလောက်မှာ တကြိမ် ထပ်ပြီး ရိုက်နှက်ဖမ်းဆီးမှု လုပ်တယ်။ ဆောက်လုပ်ရေး ဝိုင်းလမ်းချိုး၊ ထွန်းသီလမ်း ထဲမှာပါ။ ဒီတခါတော့ ကိုဇော်ထွန်း၊ ကိုကျော်ဆွေ၊ ကိုမြင့်အေး အပါအဝင် ၆ ဦး ပါသွားတယ်” ဟု ပြောသည်။

ယခု သတင်းရေးသားနေချိန်တွင် ရိုက်နှက်ဖမ်းဆီးခံရသူ များအား အာဏာပိုင်များက အာမခံဖြင့် ပြန်လည် လွှတ်ပေးလိုက်ပြီဖြစ်ကြောင်း သိရသည်။

ပြီးခဲ့သည့် ဇွန်လ (၂၀) ရက်နေ့၊ ညတွင် လျှပ်စစ်မီး ၂၄ နာရီပတ်လုံး ရရှိရေး အတွက် မန္တလေးမြို့မှ ပြည်သူများက ဖယောင်းတိုင် မီးများ ထွန်းညှိကာ ငြိမ်းချမ်းစွာ စတင် ဆန္ဒပြခဲ့ကြသည်။ ယခုအခါ ရန်ကုန်၊ မုံရွာ၊ သုံးခွ အပါအဝင် မြို့ကြီးအချို့တွင် လျှပ်စစ်မီးရရှိရေးအတွက် ညဘက်၌ ဖယောင်းတိုင် မီးများဖြင့် ဆန္ဒပြနေကြပြီး ပြည်မြို့တစ်မြို့တည်းတွင်သာ နေ့ဘက်၌ ဆန္ဒပြနေခြင်းဖြစ်သည်။

Ref: ရိုးမ ၃

Read More...

Collapse...

အလုပ်သမားထု တောင်းဆိုချက်များ အငြင်းခံရ

2012-05-24

အခြေခံလစာ တိုးမြှင့်ပေးရေး တောင်းဆိုဆန္ဒပြနေကြတဲ့ ရန်ကုန်တိုင်း၊ မှော်ဘီမြို့နယ်၊ မြောင်းတကာ က Yangon Crown သံမဏိ စက်ရုံ အလုပ်သမားတွေရဲ့ တောင်းဆိုချက်ကို ကုမ္ပဏီ အနေနဲ့ လိုက်လျောပေးမှာ မဟုတ်ကြောင်း ဒီကနေ့ ကြေညာချက် ထုတ်ပြန်လိုက်တယ်လို့ သိရပါတယ်။

သံရည်ကျိုစက်ရုံ အလုပ်သမားတွေက တစ်လ ကျပ်လေးသောင်း ပေးဖို့ ပြီးခဲ့တဲ့ တနင်္လာနေ့က တောင်းဆို ခဲ့တာကို ကုမ္ပဏီက ငြင်းပယ် လိုက်တာ ဖြစ်ပါတယ်။

ဒီအလုပ်သမားတွေရဲ့ တောင်းဆိုချက်ကို အလုပ်ရုံနဲ့ အလုပ်သမားဥပဒေ စစ်ဆေးရေး ဦးစီး ဌာနနဲ့ မှော်ဘီမြို့နယ် အလုပ်သမား ညွှန်ကြားမှု ဦးစီးဌာနက ကြားဝင် စေ့စပ်ပေးခဲ့ကြောင်းလည်း သိရပါတယ်။

ဒီကိစ္စနဲ့ ပတ်သက်ပြီး အလုပ်သမားတွေက သက်ဆိုင်ရာ ဌာနတွေနဲ့ ILO ကို တင်ပြသွားမှာဖြစ်သလို ဆက်လက်ပြီး တောင်းဆို ဆန္ဒပြ သွားမယ်လို့ သိရပါတယ်။

ဒီအတောအတွင်းမှာပဲ ရန်ကုန်တိုင်း လှိုင်သာယာစက်မှုဇုန်က Hi-Mo ဆံပင်တု စက်ရုံက အလုပ်သမား ၀န်ကြီးဌာန၊ အလုပ်ရှင်နဲ့ အလုပ်သမား သုံးပွင့်ဆိုင် သဘော တူထားတဲ့ စာချုပ်ကို အလုပ်ရှင်က တရားဝင် မဟုတ်ကြောင်း ငြင်းဆိုလိုက်တဲ့ အတွက် အလုပ်သမားတွေက ဒီကနေ့ ထပ်မံ ဆန္ဒပြခဲ့ကြပါတယ်။

မေလ ၈ ရက်နေ့ကစပြီး အခြေခံလစာ တိုးမြှင့်ပေးရေး ဆန္ဒဖော်ထုတ်ခဲ့ကြပါတယ်။ မေလ ၁၀ ရက်နေ့မှာ စက်ရုံ တာဝန်ရှိသူနဲ့ အလုပ်သမား ၀န်ကြီးဌာန ညွှန်ကြားရေးမှူး ချုပ်နဲ့ အလုပ်သမား ကိုယ်စားလှယ်တွေ ညှိနှိုင်းပြီး လစာ ကျပ် သုံးသောင်း တိုးမြှင့်ပေးရေး သဘောတူစာချုပ် ချုပ်ဆိုခဲ့ကြပါတယ်။

ဒီသဘောတူစာချုပ်ကို တရားဝင်မဟုတ်ကြောင်း ပြန်လည်ချုပ်ဆိုရမှာ ဖြစ်ကြောင်း အလုပ်ရှင်က မေလ ၁၇ ရက်နေ့က ငြင်းဆိုခဲ့တဲ့ အတွက် ထပ်မံပြီး ဆန္ဒပြခဲ့ကြပါတယ်။ လက်ရှိ အသစ်ရောက်ရှိ လာတဲ့ ကိုးရီးယား အလုပ်ရှင်က အလုပ်သမားတွေကို အခြေခံလစာ ကျပ်တစ်သောင်းခွဲနဲ့ စာချုပ် ချုပ်ဆိုဖို့ တိုက်တွန်း ခဲ့ပေမဲ့ အလုပ်သမား ကိုယ်စားလှယ်တွေက သဘောမတူတဲ့ အတွက် စက်ရုံထဲမှာပဲ ငြိမ်းချမ်းစွာ ဆက်လက် ဆန္ဒပြနေကြတယ်လို့ သိရပါတယ်။

ဒါ့အပြင် လှိုင်သာယာစက်မှုဇုန် အတွင်းက နောက်ထပ် အထည်ချုပ် စက်ရုံ နှစ်ရုံ ကလည်း အလုပ်သမား အခြေခံ ရပိုင်ခွင့်နဲ့ ပတ်သက်ပြီး ဆန္ဒပြ တောင်းဆိုနေကြောင်း၊ ဆန္ဒပြနေတဲ့ စက်ရုံ စုစုပေါင်း (၁၀) ရုံ ရှိသွားပြီ ဖြစ်ပါတယ်။

Ref: RFA News

Read More...

Collapse...

ဒေါ်အောင်ဆန်းစုကြည် ဘန်ကောက်သို့ ရက်ပိုင်းအတွင်း သွားရောက်မည်

မိုးမခအထောက်တော် အမှတ် ၀၀၁
မေ ၂၄၊ ၂၀၁၂

ဒေါ်အောင်ဆန်းစုကြည်သည် ထိုင်းနိုင်ငံ ဘန်ကောက်မြို့သို့ သွားရောက်မည်ဟု သိရသည်။

ဘန်ကောက်တွင် ရှေ့တပတ် ဗုဒ္ဓဟူးနေ့မှ စတင်၍ ၃ ရက်ကြာ ပြုလုပ်မည့် ကမ္ဘာ့စီးပွားရေး နှစ်ပတ်လည် ညီလာခံ (World Economic Forum) သို့ တက်ရောက်မည်ဟု သတင်းများတွင် ဖော်ပြထားသည်။ ထိုညီလာခံသို့ သမ္မတ ဦးသိန်းစိန်လည်း တက်ရောက်ဖွယ်ရှိသည်ဟု သတင်းများက ဆိုသည်။

ဒေါ်အောင်ဆန်းစုကြည် ထိုင်းနိုင်ငံသို့ ရောက်ရှိစဉ် မြန်မာပြည်သားများနှင့် တွေ့ဆုံရန် အစီအစဉ် ရှိမရှိကိုမူ သတင်းများတွင် ဖော်ပြထားခြင်း မရှိသေးပေ။

ထိုင်းနိုင်ငံတွင် မြန်မာပြည်သား အများအပြား နေထိုင်လျက် ရှိသည်။ ထိုင်းနိုင်ငံအနှံ့အပြားတွင် အလုပ် လုပ်ကိုင်နေသူ မြန်မာပြည်သား ၂ သန်းမှ ၄ သန်းအထိရှိသည်။ စစ်ပြေးဒုက္ခသည် တသိန်း ၀န်းကျင်ရှိသည်။ နိုင်ငံရေးအဖွဲ့အစည်းများ တည်ထောင်ပြီး လှုပ်ရှားနေသူများလည်း ရှိသည်။

ယခု ဒေါ်အောင်ဆန်းစုကြည်၏ ဘန်ကောက်ခရီးစဉ်သည် အနှစ် ၂၀ ကျော်အတွင်း ပထမဦးဆုံး ပြည်ပခရီးစဉ် ဖြစ်လာမည်။

ယခင်က ပြည်ပခရီးသွားရောက်ခြင်း မရှိခဲ့သည်မှာ မြန်မာပြည်သို့ ပြန်ဝင်ခွင့် မရမည်ကို စိုးရိမ်သောကြောင့် ဖြစ်သည်ဟု အများက သုံးသပ်ကြသည်။

နော်ဝေး အပါအ၀င် ဥရောပနိုင်ငံတချို့သို့ သွားရောက်မည်ဟု သတင်းများ ထွက်ပေါ်ပြီးနောက် ဘန်ကောက်ခရီးစဉ်သတင်း ထွက်ပေါ်လာခြင်း ဖြစ်သည်။

ပြီးခဲ့သည့် အနှစ် ၂၀ ကျော်အတွင်း ဒီမိုကရေစီ ခေါင်းဆောင် ဒေါ်အောင်ဆန်းစုကြည်သည် ပြည်ပခရီးထွက်ရန် အချိန် နည်းပါးခဲ့ပြီး နှစ်ပေါင်းများစွာ ထိန်းသိမ်းခံရခဲ့ရသည်။

Ref: မိုးမခ

Read More...

Collapse...

ဒေါ်လာ သန်း ၅ဝဝ တန် ချေးငွေနှင့် ပတ်သက်သည့် စည်းမျဉ်းများ အိန္ဒိယ ဖြေလျှော့ဖွယ်ရှိ

ဗုဒ္ဓဟူးနေ့၊ မေလ ၂၃ ရက် ၂၀၁၂

မဇ္ဈိမသတင်းဌာန ။ ။ မေလ ၂၇ ရက်နေ့တွင် မြန်မာနိုင်ငံသို့ လာရောက်လည်ပတ်မည့် အိန္ဒိယ ဝန်ကြီးချုပ် မန်မိုဟန်ဆင်း အနေဖြင့် “ဖွံ့ဖြိုးရေးနှင့် (နှစ်နိုင်ငံ) ဆက်သွယ်ရေး” ကို အရှိန် မြှင့်တင်နိုင်ရေးအတွက် ယူဆောင် လာမည့် ကမ်းလှမ်းချက်များတွင် ဒေါ်လာ သန်း ၅၀၀ တန် ချေးငွေနှင့် ပတ်သတ်သည့် စည်းကမ်း သတ်မှတ်ချက် များ လျှော့ပေါ့ပေးခြင်းများလည်း ပါဝင်ဖွယ်ရှိသည်ဟု အိန္ဒိယသတင်းစာများက သုံးသပ်ကြသည်။

အိန္ဒိယ ဝန်ကြီးချုပ် အနေဖြင့် အိန္ဒိယမှ မြန်မာနိုင်ငံအား ထုတ်ချေးထားသော ချေးငွေများနှင့် ပတ်သတ်၍ ပြန်လည် ဆပ်ရမယ့် အချိန် ကာလကို နောက်ဆုတ်ပေးခြင်း အားဖြင့် ချေးငွေ စည်းကမ်းများအား လျှော့ပေါ့ပေးလိမ့်မည်ဟု မျှော်လင့်ရပြီး အဆိုပြုထားသော ရေအားလျှပ်စစ် စီမံကိန်းများတွင် အိန္ဒိယနိုင်ငံ ပါဝင်ရေးနှင့် ပတ်သက်၍ လိုအပ်ချက်များကို ၄ဝ ရာခိုင်နှုန်း လျှော့ပေါ့ ပေးလိမ့်မည်ဟု မျှော်လင့်ရကြောင်း Indian Express သတင်းစာက ဆိုသည်။

နယ်စပ်မြို့ မိုရေးကို ဖြတ်သန်း၍ အိန္ဒိယ နိုင်ငံ Imphal နှင့် မြန်မာနိုင်ငံ မန္တလေးမြို့အကြား ဘတ်စ်ကား ပြေးဆွဲရန် အစီအစဉ်နှင့် တပတ်တွင် နှစ်ကြိမ် နှစ်နိုင်ငံအကြား ပျံသန်းပြေးဆွဲနေသည့် လေကြောင်း ခရီးစဉ် ကို တိုးချဲ့ရန် အပြင် အိန္ဒိယနှင့် နယ်စပ် ဒေသများတွင် မြန်မာနိုင်ငံ၏ မီးရထားလုပ်ငန်း ဖွံ့ဖြိုးရေးအား ၂ဝ၁၆ ခုနှစ်ထက် နောက်မကျစေပဲ အကူအညီပေးရန် ကမ်းလှမ်းချက်များ ပါဝင်လိမ့်မည်ဟု သိရသည်။

ယခုခရီးစဉ်အား အိန္ဒိယ-မြန်မာ ဆက်ဆံရေး၏ အဓိက ကျသော အခိုက်အတန့် တခု ဖြစ်လာလိမ့်မည်ဟု အိန္ဒိယ သတင်းစာများက အမွှမ်းတင်ခဲ့ကြပြီး၊ တောင်အာရှဒေသတွင် အင်အားအကြီးဆုံး ဒီမိုကရေစီ နိုင်ငံဖြစ်သည့် အိန္ဒိယနိုင်ငံ အနေဖြင့် “အရှေ့မျှော်” မူဝါဒကို ကျင့်သုံးကာ ပိုမိုရင်းနှီးသော ဆက်ဆံရေး ထူထောင်ရန် စိတ်အား ထက်သန် နေလိမ့်မည်ဟုလည်း ဆိုကြသည်။

ယခုခရီးစဉ်သည် အိန္ဒိယ ဝန်ကြီးချုပ် ရာဂျစ်ဂန္ဒီ၏ ၁၉၈၇ ခုနှစ် ခရီးစဉ်အပြီး အိန္ဒိယ ဝန်ကြီးချုပ် တဦး၏ ပထမဆုံး မြန်မာခရီးစဉ်လည်း ဖြစ်သည်။

အခြားကမ်းလှမ်းချက်များတွင် တတိယမြောက် နယ်စပ် ကုန်သွယ်ရေး စခန်း (Avakhung-Pansat/Somrai) ဖွင့်လှစ်ရန်၊ တမံသီနှင့် ရွှေစရေး ရေအားလျှပ်စစ် စီမံကိန်း နှင့် Rhi-တီးတိန် ကားလမ်း၊ တမူး-ကလေးဝ-Kalmvo ကားလမ်းများနှင့် တံတား ၇၆ ခု အား အဆင့်မြှင့်တင်ရန်၊ ဒေသတွင်း ငွေကြေးများဖြင့် ကုန်သွယ်ရေး တိုးမြှင့်ရန် အတွက် Union Bank of India နှင့် Bank of India တို့၏ ဘဏ်ခွဲများ မြန်မာနိုင်ငံတွင် ဖွင့်လှစ်ရန်အပြင် ဘဏ်အရာရှိများအား သင်တန်းများ ပေးရန်တို့ ပါဝင်သည်ဟု သတင်းစာက ဆိုသည်။

မြန်မာနိုင်ငံ သမ္မတ ဦးသိန်းစိန်သည် ၂ဝ၁၁ ခုနှစ် အောက်တိုဘာလတွင် အိန္ဒိယ နိုင်ငံသို့ သွားရောက် လည်ပတ်ခဲ့ သည်။

အိန္ဒိယနိုင်ငံနှင့် မြန်မာနိုင်ငံတို့သည် နှစ်နိုင်ငံ ကုန်သွယ်မှု ပမာဏအား နှစ်ဆ တိုးမြှင့်ရန် သဘောတူညီထားပြီး ၂ဝ၁၅ ခုနှစ်တွင် အမေရိကန်ဒေါ်လာ သန်းပေါင်း ၃,ဝဝဝ ပမာဏ အထိ ရောက်ရှိရန် ကုန်သွယ်ရေး တိုးမြှင့်မည် ဖြစ်သည်။ ယခု လက်ရှိ နှစ်နိုင်ငံ ကုန်သွယ်မှု တန်ဖိုးမှာ အမေရိကန် ဒေါ်လာ ၁.၅ ဘီလီယံ ခန့်ရှိသည်။

အိန္ဒိယ အနေဖြင့် မြန်မာနိုင်ငံတွင် ဆေး၊ မီးရထား၊ ရေနံ နှင့် သဘာဝ ဓာတ်ငွေ့၊ သတ္ထုတူးဖော်ရေး နှင့် ရေအားလျှပ်စစ် စီမံကိန်းများတွင် ရင်းနှီးမြှုပ်နှံထားသည်။

ထို့ပြင် နှစ်နိုင်ငံ အနေဖြင့် ကုလားတန် ဘက်စုံ စီမံကိန်း တည်ဆောက်မှုများအား ၂၀၁၃ ခုနှစ် တွင် အပြီးသတ်ရန် မျှော်လင့်ထားပြီး အမေရိကန် ဒေါ်လာ သန်း ၁၂၀ ကျော်ခန့် ကုန်ကျမည် ဖြစ်သည်။

အိန္ဒိယ နှင့် တရုတ်နိုင်ငံသည် မြန်မာနိုင်ငံမှ စီးပွါးရေး အကျိုးအမြတ်များ ရရှိရန် အပြိုင်အဆိုင် ကြိုးစားနေကြသည်ဟု မီဒီယာများက ဖော်ပြကြသည်။


Ref: မဇ္ဈိမ

Read More...

Collapse...

ထားဝယ်စီမံကိန်းအတွက် ထိုင်းအစိုးရ ဒေါ်လာ ၁ ဘီလီယံ ခွင့်ပြု

May 23, 2012

ထားဝယ်ရေနက်ဆိပ်ကမ်းနှင့် စက်မှုဇုန် တည်ဆောက်ရေး အထောက်အကူဖြစ်စေမည့် စီမံကိန်း ၂၀၃ ခု အတွက် အမေရိကန် ဒေါ်လာ ၁ ဘီလီယံကျော် ထိုင်း အစိုးရက ခွင့်ပြုလိုက်ကြောင်း ဘန်ကောက်ပို့စ် သတင်းစာ ဖော်ပြချက်အရ သိရသည်။

ထားဝယ်ရေနက်ဆိပ်ကမ်းနှင့် နီးသည့် ထိုင်းဘက်အခြမ်းရှိ ခရိုင် ၈ ခုတွင် စီမံကိန်းများ အပြီး တည်ဆောက်ရေး အတွက် ထိုင်းကက်ဘိနက်က ထိုင်းဘတ် ၃၃.၁ ဘီလီယံ (အမေရိကန် ဒေါ်လာ ၁ ဘီလီယံကျော်) ကို မေလ ၂၀ ရက်နေ့က ခွင့်ပြုလိုက်ခြင်း ဖြစ်ကြောင်း၊ ဘတ်ငွေ ၁ ဘီလီယံ ကုန်ကျမည့် စီမံကိန်း ၆၀ ခုမှာ အကောင်အထည်ဖော်ရန် အသင့်ဖြစ်ကြောင်း အစိုးရ ပြောခွင့်ရပုဂ္ဂိုလ် Anusorn Lamsa-ard ဘန်ကောက်ပို့စ် သတင်းစာသို့ ပြောထားသည်။

ထိုင်းဝန်ကြီးချုပ် ယင်းလတ် ရှင်နာဝပ် ဥက္ကဋ္ဌအဖြစ် ဆောင်ရွက်သော ကက်ဘိနက် အစည်းအဝေးက ဤစီမံကိန်းများအတွက် သတော တူညီလိုက်ခြင်း ဖြစ်သည်။

“ထားဝယ်က အာဆီယံ အနောက်ဘက်ခြမ်း ကုန်သွယ်ရေးအတွက် တံခါးပေါက် ဖြစ်လာနိုင်ပြီး ဒေသတွင်း နိုင်ငံတွေနဲ့ အရှေ့တောင် အာရှကို ပေါင်းကူးပေးမယ့် တံတား ဖြစ်လာနိုင်ပါတယ်” ဟု Anusorn က ဆိုသည်။

ထားဝယ်ရေနက်ဆိပ်ကမ်းနှင့် စက်မှုဇုန် တည်ဆောက်ရေးတွင် ထိုင်းနိုင်ငံက ဆောက်ရွက်ခြင်းမှာ ယင်းစီမံကိန်းများက မြန်မာ့ စီးပွားရေး ဖွံ့ဖြိုးမှုကို အထောက်အကူ ပေးမည်ဖြစ်ပြီး ထိုင်းနိုင်ငံ အနောက်ဘက်ပိုင်းတွင် ကုန်သွယ်ရေး ဗဟိုချက်အသစ် အဖြစ် ချဲ့ထွင်နိုင်ရေး အတွက် ဖြစ်သည်ဟု ထိုင်းအစိုးရ ပြည်သူ့ဆက်ဆံရေး ဌာန၏ အဆိုအရ သိရသည်။

ထိုင်းဘက်အခြမ်း ကန်ချနဘူရီမှ မြန်မာဘက် ထားဝယ်သို့ အဝေးပြေးကားလမ်း ဖောက်လုပ်ရေးအတွက် ကန်ချနဘူရီ ခရိုင်အတွင်းရှိ ဘန်ဖူနမ်ရွန်ရွာ အနီး နယ်စပ်ကို ဖွင့်ပေးခြင်းအားဖြင့် မြန်မာဘက်က အထောက်အကူ ပေးစေလိုကြောင်း ထိုင်းအစိုးရက မြန်မာကို တိုက်တွန်း ထားသည်ဟု ထိုင်းအစိုးရ ဝက်ဘ်ဆိုဒ်တွင် ဖော်ပြထားသည်။

ထိုင်း ဒု ဝန်ကြီးချုပ်နှင့် ထိုင်းဘဏ္ဍရေးဝန်ကြီးတို့၏ ဦးဆောင်မှုအောက်တွင် စီမံကိန်း ထောက်ပံ့ရေး အတွက် အဆင့်သုံးဆင့် ရှိသည်ဟု ဘန်ကောက်ပို့စ် သတင်းစာတွင် ဖော်ပြထားသည်။

အကောင်အထည်ဖော်မည့် စီမံကိန်းများတွင် ပထမအဆင့်၌ ထားဝယ်မြို့နှင့် ထိုင်း-မြန်မာ နယ်စပ်အား ဆက်သွယ်ပေးမည့် လေးလမ်းသွား အဝေးပြေး လမ်းမကြီး၊ ရေလှောင် တမံတခု၊ ကျောက်မီးသွေးသုံး ဓာတ်အားပေး စက်ရုံတရုံ၊ စက်မှုဇုံများသို့ ချိတ်ဆက်ပေးမည့် လမ်းများ၊ အိမ်ယာသစ်များ၊ အစိုးရ ရုံးအဆောက် အအုံသစ်များ၊ ရေနှင့် ရေပိုက်လိုင်းများ၊ ရေဆိုးထုတ် စနစ်များ ပါဝင်မည်ဟု သိရသည်။

၂၀၁၈ ခုနှစ်တွင် ဒုတိယ အဆင့်အနေဖြင့် ၄င်းနယ်မြေအတွင်း ဈေးဝယ်စင်တာများ တည်ဆောက်ခြင်း၊ ထားဝယ်နှင့် ထိုင်း-မြန်မာနယ်စပ် လမ်းမကြီးအား ရှစ်လမ်းသွား အဖြစ် တိုးချဲ့မည့် စီမံကိန်းများ ပါရှိသည်။

ရထားလမ်း၊ လျှပ်စစ်ဓာတ်အားပေးလိုင်း၊ သဘာဝဓာတ်ငွေ့နှင့် ရေနံပိုက်လိုင်းများ ထိုင်းနိုင်ငံ အထိ တိုးချဲ့ သွယ်တန်းခြင်းကို နောက်ဆုံး အဆင့်အဖြစ် ၂၀၂၀ တွင် လုပ်ဆောင် သွားမည်ဟု သိရသည်။

ထားဝယ် ရေနက်ဆိပ်ကမ်းနှင့် အထူးစီးပွားရေးဇုန်ကို ထိုင်းနိုင်ငံ၏ အကြီးဆုံး ဆောက်လုပ်ရေး ကုမ္ပဏီဖြစ်သည့် အီတလီ-ထိုင်း ဖွံ့ဖြိုးရေး ကုမ္ပဏီမှ တာဝန်ယူ တည်ဆောက်မည် ဖြစ်သည်။

ထိုင်းက ထားဝယ်ဒေသအတွင်း စီးပွားရေးတိုးချဲ့မှုကို အရှိန်မြှင့်နေစဉ် မတရား မြေယာသိမ်းဆည်းမှုနှင့် အဓမ္မ ရွှေ့ပြောင်းခိုင်းမှုများ၊ လမ်းပမ်း ဆက်သွယ်ရေး အတွက် ဖယ်ပေး လိုက်ရသော အိမ်ယာများ၊ ပြန်လည် နေရာချထားရေးများ အတွက် လျှော်ကြေး ထိုက်တန်စွာ မရခြင်းများကြောင့် ဒေသခံများ၏ ကန့်ကွက်မှုများလည်း ထွက်ပေါ်နေသည်။ ဒေသခံပြည်သူ အများအပြားက အဆိုပါ စီမံကိန်းကြောင့် ၎င်းတို့၏ နယ်မြေများနှင့် နေ့စဉ်ဘ၀ ထိခိုက်ဆုံးရှုံးမည်ကို စိုးရိမ်နေကြသည်။

၂၀၁၅ တွင် အပြီးသတ်ဖွယ်ရှိသည့် ယင်းစီမံကိန်းအတွက် ၂၀၁၃ ခုနှစ်အကုန်တွင် ဒေသခံပေါင်း ၃ သောင်းခန့် နေရာရွှေ့ပြောင်းရဖွယ်ရှိကြောင်း သိရှိရသည်။

Thai Govt Approves $1Bn for Dawei by The Irrawaddy ကို ဆီလျော်အောင် ဘာသာပြန်ဆိုသည်။

Ref: ဧရာဝတီ

Read More...

Collapse...

ဆန္ဒပြမှုတွေ ပြေလည်အောင်ဖြေရှင်းပေးဖို့ အာဏာပိုင်တွေကို ၈၈ မျိုးဆက်တောင်းဆို

ကိုဇော်ဝင်းလှိုင်
ဗုဒ္ဓဟူး, 23 မေ 2012

ရန်ကုန်မြို့တဝိုက်မှာဖြစ်ပေါ်နေတဲ့ အလုပ်သမားဆန္ဒပြမှုတွေ ပြေလည်ဖို့ အတွက် သက်ဆိုင်ရာ အာဏာပိုင်တွေ အနေနဲ့ ဖြန်ဖြေရေး ကော်မတီတွေ ဖွဲ့ပြီးတော့ အမြန်ဆုံး ဖြေရှင်းပေးဖို့လိုတယ်လို့ ၈၈ မျိုးဆက် ကျောင်းသားများ အဖွဲ့က တိုက်တွန်း လိုက်ပါတယ်။ အလုပ်သမားဆန္ဒပြမှုတွေ အရှိန်မြင့်လာနေပြီး အကြမ်းဖက်မှုတွေ ဖြစ်ပွားတဲ့ အထိပါ အခြေအနေတွေ ပိုပြီးတော့ ဆိုးလာနေတယ် ဆိုတဲ့သတင်းတွေ ထွက်ပေါ်လာတဲ့ အချိန်မှာပဲ ၈၈ မျိုးဆက် ကျောင်းသားတွေက အခုလိုမျိုး တိုက်တွန်း လိုက်တာ ဖြစ်ပါတယ်။ ဒီအကြောင်း အပြည့်အစုံကိုတော့ ဆက်သွယ် စုံစမ်းထားတဲ့ ကိုဇော်ဝင်းလှိုင်က တင်ပြပေးထားပါတယ်။

ရန်ကုန်မြို့တဝိုက်က စက်ရုံအလုပ်သမားတွေ လုပ်အားခတိုးမြှင့်ပေးရေးနဲ့ အလုပ်သမား ခံစားခွင့်တွေ ပိုမို ရရှိရေးတို့ အတွက် ဆန္ဒပြတောင်းဆိုမှုတွေ အရှိမြင့် လာနေချိန်မှာပဲ မနေ့က ၈၈ မျိုးဆက်ကျောင်းသားများ အဖွဲ့က ကြေညာချက် ထုတ်ပြန်ပြီးတော့ အခုလို တောင်းဆို လိုက်တာပါ။ မနေ့က ဆန္ဒပြမှုတွေ အရှိန်မြင့်လာပြီး အကြမ်းဖက်မှုတွေပါ ဖြစ်ပေါ်လာနေတယ် ဆိုတဲ့ သတင်းတွေ ထွက်ပေါ် လာနေတာကြောင့် ဒီကိစ္စပြေလည်နိုင်အောင် သက်ဆိုင်ရာ အာဏာပိုင်တွေ အနေနဲ့ ဖြန်ဖြေရေး ကော်မတီလိုမျိုး ဥပဒေအရ လုပ်ပိုင်ခွင့်ရှိတဲ့ ကော်မတီတရပ် ဖွဲ့စည်းပြီး ဒီကိစ္စကို အမြန်ဆုံးဖြေရှင်းပေးဖို့ လိုအပ်တယ်လို့ ၈၈ မျိုးဆက် ကျောင်းသားများ အဖွဲ့က ဦးကိုကိုကြီးက ပြောပါတယ်။

"ဥပဒေအရဆိုရင်တော့ ဖြန်ဖြေရေးကော်မတီပေါ့- ကော်မရှင်ပေါ့။ ခုံသမာဓိအဖွဲ့ ဖွဲ့ဖို့ အဲဒါကို ဖွဲ့ပြီးတော့ ဖြေရှင်းပေးဖို့၊ အမြန်ဆုံးပေါ့လေ၊ အရေးယူဆောင်ရွက်ပေးဖို့ ကျနော်တို့ တိုက်တွန်းတာပါ။"

အလုပ်ရှင်၊ အလုပ်သမားဆိုတာဟာ မိသားစုလို ဆက်ဆံကြရမှာဖြစ်တာကြောင့် တဦးနဲ့တဦး ဆက်ဆံရေးမှာ ပြေလည်ဖို့ လိုအပ်တယ် လို့လည်း ဦးကိုကိုကြီးက ပြောပါတယ်။ နိုင်ငံခြားကရောက်လာတဲ့ ရင်းနှီးမြှုပ်နှံမှုတွေကို ကြိုဆို ကြရမှာဖြစ်ပေမယ့်လည်း တိုင်းပြည် အတွင်းက အလုပ်သမားတွေရဲ့ အခွင့်အရေးကို မထိခိုက်စေဖို့တော့ သတိထား သင့်တယ်လို့လည်း ကိုကိုကြီးက ထောက်ပြပြောဆိုပါတယ်။

"ကျနော်တို့က ၁၉၈၈ မှာကတည်းက နိုင်ငံက ဖွံ့ဖြိုးမှုအနိမ့်ဆုံးနိုင်ငံဖြစ်သွားတဲ့ အပေါ်မှာ၊ တိုင်းပြည် ဆင်းရဲ မွဲတေတဲ့ အပေါ်မှာ နိုင်ငံရေး၊ စီးပွားရေးစံနစ်တွေကို ကျနော်တို့ မကျေနပ်လို့ ဆန္ဒပြလာခဲ့တာ၊ အဲဒီတော့ ဖွံ့ဖြိုးရေးနဲ့ ပတ်သက်လို့ နိုင်ငံခြား ရင်းနှီးမြှုပ်နှံမှုတွေ၊ ပုဂ္ဂလိက လုပ်ငန်းတွေကို ကျနော်တို့က လာလည်း လာစေချင်တယ်။ ရင်းနှီးမြှုပ်နှံမှုတွေလည်း ဖြစ်စေချင်တယ်။ အဲသလို လာတဲ့အချိန်မှာ ကျနော်တို့ နိုင်ငံ သားတွေရဲ့ အခွင့်အရေး ကိုလည်း အာမခံချက်ရှိတဲ့- အနိမ့်ဆုံးအဆင့် အိမ်နီးချင်းနိုင်ငံတွေမှာ ရှိတဲ့ လုပ်ခ လစာတွေနဲ့ နှိုင်းယှဉ်နိုင်တဲ့ အခြေအနေမျိုးပေါ့။ အဲဒါမျိုးတော့ ဖြစ်စေချင်တယ်။"

မနေ့က ဆန္ဒပြမှုတွေမှာ အကြမ်းဖက်မှုတွေ ပါလာတယ် ဆိုတဲ့သတင်းတွေ ထွက်လာနေတာကြောင့် အဲလိုမျိုး အကြမ်း ဖက်မှုတွေဖြစ်မလာအောင်နှစ်ဘက် စလုံးက သတိထားကြဖို့ လိုအပ်တယ် ဆိုတာကိုလည်း ဦးကိုကိုကြီးက ပြောပါတယ်။

"ကျနော်တို့ကတော့ အကြမ်းဖက်တာကို ဘယ်လို အကြမ်းဖက်တာမျိုးကိုမှ လက်မခံဘူး။ အဲဒီတော့ အလုပ်သမားတွေ ဘက်ကလည်း သူတို့ သပိတ်မှောက်တယ်၊ ဆန္ဒပြတယ် ဆိုတာဟာ သူတို့ရဲ့နေ့စဉ် လုပ်ခ လစာတွေကို စွန့်လွှတ်ပြီးတော့ ပြကြတာ။ နေ့စဉ် စားရေးသောက်ရေးကအစ တော်တော် အခက်အခဲရှိပါတယ်။ သပိတ်ရက် ရှည်လာတာနဲ့အမျှ အလုပ်သမားတွေရဲ့ အခက်အခဲတွေကလည်း ပိုပိုပြီး ကြီးကြီးလာပါတယ်။ ဒါကြောင့်မို့လို့ လည်း ကျနော်တို့က နိုင်ငံတော်အဆင့်ကပါ တာဝန်ရှိတဲ့သူတွေ အနေနဲ့ အလေးအနက် ထားပြီးတော့ ကိုယ့်နိုင်ငံသားတွေ ဘက်ကနေ ခိုင်ခိုင်မာမာ ရပ်တည်ပေးဖို့၊ တချိန်တည်းမှာပဲ အလုပ်ရှင်တွေ အနေနဲ့လည်း ဒီမှာ ရင်းနှီးမြှုပ်နှံတဲ့ အခွင့်အလမ်းကို မထိခိုက်အောင် နှစ်ဘက် မျှမျှတတနဲ့ဆောင်ရွက်ပေးဖို့ - အဲဒါကို ကျနော်တို့ အဓိက လိုလားတာပါ။"

မြန်မာနိုင်ငံဟာ လက်ရှိအနေအထားမှာ ဒီမိုကရေစီအသွင်ကူးပြောင်းရေးကာလကို ဖြတ်သန်းနေတဲ့ အချိန်ဖြစ်တာကြောင့် ဆန္ဒဖော်ထုတ်ကြတဲ့ အလုပ်သမားတွေရဲ့အခွင့်အရေးကို အသိအမှတ်ပြုသင့်တဲ့ တချိန်တည်းမှာပဲ လက်ရှိ လုပ်ဆောင်နေတဲ့ ပြုပြင်ပြောင်းလဲရေး လုပ်ငန်းတွေ ထိခိုက်မသွားအောင်လည်း ထိန်းသိမ်းဖေးမ ပေးသင့်တယ်လို့ ဆိုပါတယ်။

"ကျနော်တို့ကိုယ်တိုင်လည်း လူထုဆန္ဒ ထုတ်ဖော်ပြောကြားခွင့်တွေနဲ့ ပတ်သက်လို့ အလေးအနက် ထားတယ်။ ကျနော်တို့ လူထုက တလျှောက်လုံး ငြိမ်ခံနေခဲ့ကြရာက ကိုယ့်ရဲ့ နစ်နာမှုတွေလည်း မပြောရဲ၊ ပြောခွင့်မရ၊ ကိုယ့်လိုအပ်ချက်တွေကိုလည်း ထုတ်ဖော်ခွင့်မရဆိုတဲ့ အခြေအနေမျိုးကနေ ဒီမိုကရေစီ လူ့အဖွဲ့အစည်းကို ပြောင်းတော့မယ်ဆိုရင်တော့ လူထုရဲ့ငြိမ်းချမ်းစွာဆန္ဒထုတ်ဖော်ခွင့်တွေကို အသိအမှတ်ပြုရမယ်။ ဒါက အရေးကြီးပါတယ်။ တချိန်တည်းမှာပဲ အခုဖြစ်နေတဲ့ အသွင်ကူးပြောင်းရေးကာလ ဖြစ်စဉ်တွေကို လမ်းကြောင်းပြောင်းမသွားအောင်လည်း ဝိုင်းပြီးတော့ ဂရုစိုက်သင့်တယ်၊ ထိန်းသိမ်းသင့်တယ်လို့ မြင်ပါတယ်။"

၈၈ မျိုးဆက်ကျောင်းသားတွေအနေနဲ့ ဆန္ဒပြသူတွေကို ကိုယ်တိုင်သွားရောက်တွေ့ဆုံပြီး အခြေအနေတွေ ကို လက်တွေ့လေ့လာ ခဲ့ကြတာ ဖြစ်ပါတယ်။ အခုအချိန် အထိတော့ အလုပ်ရှင်တွေ ဘက်ကရော အလုပ် သမားတွေ ဘက်ကပါ သူတို့ရဲ့ မူလ ရည်ရွယ်ချက်တွေ အတိုင်း ဆက်လက် ရပ်တည်နေကြပြီး အလုပ်သမားတွေရဲ့ တောင်းဆိုချက်တွေကိုလည်း အလုပ်ရှင်တွေ ဘက်က လိုက်လျောပေးတာမျိုး မရှိသေးပါဘူး။ ဆန္ဒပြပွဲတွေ ငြိမ်းငြိမ်းချမ်းချမ်းနဲ့ စည်းကမ်းတကျ ဖြစ်စေဖို့ အတွက်လည်း ၈၈ မျိုးဆက် ကျောင်းသားခေါင်းဆောင် တချို့က ဖေးမဆောင်ရွက်ပေးနေကြတာဖြစ်ပါတယ် ခင်ဗျာ။

Ref: VOA News

Read More...

Collapse...

ရန်ကုန်၊ မန္တလေး လူစုလူဝေး ဟန့်တားခံရ

မနန္ဒာချမ်း
ဗုဒ္ဓဟူး, 23 မေ 2012

၂၄ နာရီ လျှပ်စစ်မီးရရှိရေး ဆန္ဒပြ တောင်းဆိုလှုပ်ရှားမှုတွေကို ဒီကနေ့ သက်ဆိုင်ရာရဲ့ တားမြစ် မှုတွေကြားက ရန်ကုန်မြို့မှာ ဒုတိယမြောက်နေ့ အဖြစ် ဆက်ပြီး ဆန္ဒ ထုတ်ဖော်ခဲ့ကြပါတယ်။ မန္တလေးမြို့ မှာလည်း လုံခြုံရေးတွေ တင်းတင်း ကျပ်ကျပ် ချထားတယ်လို့ မြို့ခံတွေက ပြောပါတယ်။ အခုလို အခြေအနေတွေကိုတော့ ဆက်သွယ် စုံစမ်းထားတဲ့ မနန္ဒာချမ်း က တင်ပြပေးထားပါတယ်။

၂၄ နာရီ လျှပ်စစ်မီး ရရှိရေး ဒုတိယမြောက်နေ့မှာ ဆက်လက် ဆန္ဒထုတ်ဖော်ဖို့အတွက် ထောင်နဲ့ချီတဲ့ ရန်ကုန်မြို့ခံတွေဟာ မြို့လယ်မှာရှိတဲ့ ဆူးလေဘုရားအနီးမှာ ညနေ ၆ နာရီဝန်းကျင်က စုဝေးခဲ့ကြတာပါ။ ဒါပေမဲ့ အာဏာပိုင်တွေ ရောက်ရှိလာပြီး - ဦးဆောင်သူတချို့နဲ့တွေ့ဆုံပြီး - ဆန္ဒပြတောင်းဆိုမှုတွေ ဆက် မလုပ်ဖို့နဲ့ ရဲချုပ်ရဲ့ စာကို ပေးအပ်ခဲ့တယ်လို့ ဆန္ဒပြပွဲမှာ ပါဝင်သူ နိုင်ငံရေးအကျဉ်းသား ဟောင်းများအဖွဲ့မှ ကိုခင်ဇော် က ပြောပြပါတယ်။

“ဖယောင်းတိုင်မီးထွန်းပြီး ချီတက်ပွဲလုပ်မယ့်အချိန်မှာပဲ အနောက်ပိုင်းခရိုင်၊ ဒု-ရဲမှူးကြီး ဦးမျိုးအောင် ကနေပြီးတော့ စာတစောင်ထုတ်ပြတယ်ဗျ။ စာတစောင်လာပေးတယ်ပေါ့နော်၊ ဒီ ဆန္ဒပြအဖွဲ့ခေါင်းဆောင် ကိုဟန်ဝင်းအောင်ကိုလေ- လျှပ်စစ်မီးပြတ်တဲ့ ကိစ္စနဲ့ပတ်သက်ပြီးတော့ သူတို့ကနေပြီးတော့ သတင်းစာမှာ အတိ အလင်း ကြေညာထားပြီးတော့ ပြည်သူလူထုကို မေတ္တာရပ်ခံ ထားပြီးလည်း ဖြစ်တယ်ဆိုတဲ့ အကြောင်း၊ နောက်ပြီးတော့ တည်ဆဲဥပဒေတွေအရ ၅ ယောက်ထက်ပိုပြီးတော့ စီတန်း လမ်းလျှောက်မယ် ဆိုလို့ရှိရင် ဥပဒေ အရ ဆောင်ရွက်ရမယ် ဆိုတဲ့အကြောင်းကို ပြောတယ်ခင်ဗျ။ အဲဒီစာကို လာပေးသွားတဲ့ အချိန်မှာ ကိုဟန်ဝင်းအောင်က အဲဒီစာကို ဖတ်ပြလိုက်တယ်။ ဖတ်ပြပြီးသွားတော့ လုပ်မယ်ဆိုတဲ့ အတိုင်းပဲ ဆက်ပြီးတော့ ကျနော်တို့ လုပ်တယ်ခင်ဗျ။ အဲလိုလုပ်တဲ့အခါမှာ ကျနော်တို့ ဘယ်ကနေ စသွားသလဲ ဆိုတော့- လက်ရွေးစင်ရှေ့ကနေပြီး ဖရေဇာလမ်းဘက်ကို ပြန်ထွက်လာပြီးတော့ ဖရေဇာ လမ်းဘက်မှာ ဂုံးကျော်တံတားရှိတယ်။ အဲဒီ ဂုံးကျော်တံတားကနေ ပတ်ပြီးတော့ ဆူးလေးဘုရားပေါ်ကို တက်လာတယ်။ ဆူးလေဘုရားကို သုံးပတ်ပတ်ပြီးတော့ ကျနော်တို့ အခု အဆုံးသတ်ပွဲကို လုပ်နေတယ်ခင်ဗျ။”

အရင်က သတ်မှတ်ထားတဲ့ ဗန္ဓုလပန်းခြံရှေ့ စုဝေးပြီး ဖယောင်းတိုင် ထွန်းညှိ ဆန္ဒပြမယ့် အစီအစဉ်တော့ ပျက်သွားခဲ့ရတယ်လို့ ကိုခင်ဇော်က ပြောပါတယ်။ လုံခြုံရေးတွေ ကတော့ အနှောင့်အယှက်ပေးတာမျိုး မရှိဘဲ - ဆန္ဒပြသူ အရေအတွက်ဟာ အင်္ဂါနေ့ကထက် ပိုများခဲ့တာကြောင့် ယာဉ်ကျောပိတ်ဆို့မှု အခြေအနေကို ရှင်းပေးတာမျိုး၊ အဝေးကနေ စောင့်ကြည့်တာမျိုးလောက်သာ လုပ်ခဲ့တယ်လို့လည်း ဆိုပါတယ်။ ပြည်သူ တွေဘက်ကလည်း အော်ဟစ်တောင်းဆိုမှု မလုပ်ဘဲ တိတ်တိတ် ဆိတ်ဆိတ်နဲ့ ဖယောင်းတိုင်မီး ကိုင်ဆောင်ပြီး စီတန်း လမ်းလျှောက်ကြသလို တချို့ကလည်း ပိုစတာတွေကို ကိုင်ဆောင် ထားကြတယ် လို့လည်း ကိုခင်ဇော် က ဆက်ပြောပြပါတယ်။

“ ‘ဘက်ထရီလည်းမဝယ်နိုင်၊ အင်ဗာတာလည်း ငါမပိုင်၊ ဖယောင်းတိုင်မီးနဲ့မှိုင်’ - ဆိုတာလည်း ပါတယ်ဗျာ- နောက်တခုက ‘ရန်ကုန်မြို့ကြီး နေပြည်တော်လို မီးလင်းပါစေ၊ မြန်မာပြည်တဝှမ်း မီးလင်းပါစေ’ တရုတ်နဲ့ ပတ်သက်တဲ့ဟာလည်း ပါတယ်ဗျ။ တရုတ်ပြည်ကြီးကျတော့ ဗမာပြည်က gas တွေနဲ့ မီးလင်းနေတယ်ဗျာ။ ဗမာပြည်မှာကတော မီးမှောင်နေတယ်ဆိုတဲ့ အကြောင်းကို ရေးထားတာ ဗျ။ နောက်တခု ကျနော် ဖတ်ပြမယ်ဗျ။ ‘ဘယ်ဝန်ကြီးအိမ် မီးပျက်နေပါသနည်း’- တဲ့။”

အလားတူပဲ ရန်ကုန် - တောင်ဒဂုံမြို့နယ်ဘက်မှာလည်း လျှပ်စစ်မီးရရှိရေး ဆန္ဒထုတ်ဖော်တောင်းဆို မှုတွေ ဖြစ်ခဲ့တယ်လို့ ရန်ကုန်မြို့ခံတွေက ပြောပြပါတယ်။ မန္တလေးမှာတော့ ပြီးခဲ့တဲ့ ရက်ပိုင်းက လုပ်ခဲ့တဲ့ လျှပ်စစ်မီး ရရှိရေး ဆန္ဒ ထုတ်ဖော်သူတွေထဲက တချို့ ခေါ်ယူမေးမြန်းခံခဲ့ရပြီး နောက် ဗုဒ္ဓဟူးနေ့မှာတော့ ဒီလို ဆန္ဒထုတ်ဖော်မှုတွေကို ဆက်လုပ်မယ် မလုပ်ဘူးဆိုတာ မသိရသေးပါဘူး။ အင်္ဂါနေ့ည ၁၀ နာရီလောက်ကတော့ ဆိုင်ကယ်လ်တွေနဲ့ ဖယောင်းတိုင်မီးအစား မီးဒုတ်တွေကို ကိုင်ဆောင်ပြီး လှည့် လည်ခဲ့ကြတယ်လို့ မန္တလေးမြို့ခံတဦးက ပြောပြခဲ့ပါတယ်။ ဒီလို ဆန္ဒထုတ်ဖော်မှုတွေဖြစ်ခဲ့တဲ့ အခုရက်ပိုင်း အတွင်း မန္တလေးမြို့က လုံခြုံရေးအခြေအနေနဲ့ပတ်သက်ပြီးတော့ - သတင်းထောက်တဦးက အခုလို ပြောပြပါတယ်။

“လျှပ်စစ်မီးကိစ္စနဲ့ပတ်သက်ပြီးတော့ အဲဒီ ကျုံးဘေးမှာ ဆန္ဒဖော်ထုတ်တဲ့နေ့တွေတုန်းကတော့ ရဲတွေ၊ အချုပ်ကားတွေ အများကြီး သိသိသာသာ ချထားတယ်။ ဒီနေ့အခြေအနေမှာတော့ သိပ်ပြီးတော့ အဲဒီလို မမြင်မတွေ့ရပါဘူးဗျ။ သိသိသာသာ အချုပ်ကားတွေနဲ့ မတွေ့ရတော့ပါဘူး။ ဒါပေမဲ့ ကျုံးဘေးမှာ ရဲတွေ ကိုတော့ တယောက်စ၊ နှစ်ယောက်စတော့ မြင်တွေ့နေရပါတယ်။ ဒါပေမဲ့ လူတွေလည်း ဆန္ဒဖော်ထုတ်ဖို့ သိပ်ပြီး များများစားစား လာကြတာ မရှိတော့ အရင်ရက်တွေလောက် ရဲတွေကို ကျုံးဘေးမှာ ချထားတာ မတွေ့ရတော့ပါဘူး။”

မြန်မာအစိုးရက လျှပ်စစ်မီး အလုံအလောက် မရှိတဲ့အတွက် ဖြန့်ဝေမှုတွေကို ဖြတ်တောက်မယ် လို့ ကြေညာခဲ့ရာက မန္တလေးမြို့ကစလို့ ဆန္ဒပြပွဲတွေ ပေါ်ပေါက်ခဲ့တာပါ။ ရေနံ၊ သဘာဝဓာတ်ငွေ့ သာမက ရေအားလျှပ်စစ် ထုတ်လုပ်မှုတွေ အကြီးအကျယ် ရှိနေပေမဲ့လည်း အများစုကိုတော့ အိမ်နီးချင်း ထိုင်း၊ တရုတ် စတဲ့ နိုင်ငံတွေကို တင်ပို့ရောင်းချနေတာလည်း ဖြစ်ပါတယ်။

လူဦးရေ သန်း ၆၀ ရှိတဲ့ မြန်မာနိုင်ငံမှာ လူ ၄ ယောက်မှာ ၁ ယောက်နှုန်းသာ လျှပ်စစ်မီးကို သုံးစွဲနိုင်တဲ့ အဆင့်မှာသာ ရှိနေတာလည်း ဖြစ်ပါတယ်။ ဒီအတွက်လည်း ၂၄ နာရီ မီးရရှိရေး မန္တလေးမြို့မှာ ဆန္ဒပြ ပွဲတွေ ၂ ရက်ဆက်တိုက်ဆိုသလို ဖြစ်ပွားခဲ့တာမို့ လူတချို့ကို ခေါ်ယူစစ်ဆေး မေးမြန်း ခံရတာတွေလည်း ရှိခဲ့တာပါ။ မြန်မာနိုင်ငံမှာ အစိုးရသစ် တက်လာပြီးနောက်မှာတော့ အစိုးရက လွတ်လပ်စွာ စုဝေး ဆန္ဒပြ ခွင့်တွေ ပြုခဲ့တာ ဖြစ်ပေမဲ့ ကြိုတင်ခွင့်ပြုချက် ရယူဖို့လည်း သတ်မှတ်ထားတာ ဖြစ်ပါတယ်။ လိုက်နာဖို့ ပျက်ကွက်တယ်ဆိုရင် ဖမ်းဆီး ခွင့်လည်း ရှိနေတာဖြစ်ပါတယ်ရှင်။

Ref: VOA News

Read More...

Collapse...

ကျန်းမာရေး အထူးစိုးရိမ်ရတဲ့ နိုင်ငံရေးအကျဉ်းသား အမြန်ဆုံးလွှတ်ပေးဖို့ AAPP တောင်းဆို

2012-05-23

ကျန်းမာရေး အထူးစိုးရိမ်စရာ ဖြစ်နေတဲ့ နိုင်ငံရေးအကျဉ်းသား ၃ ယောက်ကို အမြန်ဆုံးလွှတ်ပေးဖို့ ထိုင်း မြန်မာနယ်စပ်အခြေစိုက် AAPP ခေါ် နိုင်ငံရေး အကျဉ်းသားများ ကူညီစောင့်ရှောက်ရေး အသင်းက တောင်းဆို လိုက်ပါတယ်။

အဲဒီ ၃ ယောက်ကတော့ အင်းစိန်ထောင်မှာ သေဒဏ်ချမှတ်ခံထားရတဲ့ ကိုဖြိုးဝေအောင်၊ တသက်တကျွန်း ချမှတ်ခံထားရတဲ့ ကိုဆန်နီ ခေါ် ကိုစံရှားနဲ့ ဘူးသီးတောင်ထောင်မှာ ထောင်ဒဏ် ၃ နှစ် ချမှတ်ခံထားရတဲ့ ဦးမရ (ဦးမြ) တို့ ဖြစ်ပါတယ်။

အကျဉ်းထောင်ထဲ ကျန်းမာရေးချို့တဲ့နေသူကို အချိန်မီ ပြန်မလွှတ်ပေးတဲ့အတွက် ထောင်တွင်း အသက်ဆုံးရှုံးရတဲ့သူတွေ ရှိခဲ့သလို၊ ထောင်ကလွတ်ပြီး မကြာခင် သေဆုံးရသူတွေလည်း ရှိခဲ့တဲ့အတွက် အခုလိုတောင်းဆိုရတာ ဖြစ်တယ်လို့ AAPP တွဲဘက်အတွင်းရေးမှူး ကိုဘိုကြည်က ပြောပါတယ်။

" သူ့မိသားစုရဲ့ပြောပြချက်တွေအရ ကိုဖြိုးဝေအောင်ရဲ့ ကျန်းမာရေး အခြေအနေ အရ အတော် ဆိုးဝါးတယ်။ လပိုင်းအတွင်း အသက် ဆုံးရှူံး သွားနိုင်တယ်။ နောက်အဲဒီလိုပဲ ကျွန်တော်တို့ တချက်တွေ့ရတာ ဆန်နီ ခေါ် စံရှားတို့၊ တခြားရခိုင်က အသက် ၆၉ နှစ်ရှိပြီဖြစ်တဲ့ ဦးမရတို့ ဒီနှစ်ယောက်ကလည်း ကျန်းမာရေး အခြေအနေ တော်တော် ဆိုးနေတာကို တွေ့ရတယ်။ အရင်တုန်းကလည်း ထောင်ထဲမှာ အဲဒီလိုပဲ ကင်ဆာဝေဒနာ ခံစားရတာတွေ ရှိတယ်။ ရှိပြီးတော့ခါကျတော့ ထောင်က ထွက်ပြီး တော့ ၁ လလောက် အတွင်းမှာ၊ ဒါမှမဟုတ် ၂ ပတ်လောက် အတွင်းမှာ၊ ၂ လလောက် အတွင်းမှာ သေသွားရတဲ့ နိုင်ငံရေး အကျဉ်းသားတွေလည်း ရှိပါတယ်။ ဒါကြောင့်မို့လို့ ကျွန်တော်တို့ကလည်း ဒီလူတွေရဲ့ ကျန်းမာရေး အခြေအနေတွေကို အတော်လေးတော့ စိုးရိမ်တယ်။ အဲဒီလိုမျိုးကြောင့် ဒီလူတွေကို အမြန်ဆုံး လွှတ်ပေးဖို့ မေတ္တာရပ်ခံ တောင်းဆိုတာ ဖြစ်ပါတယ်"

ဒီစာကို မြန်မာနိုင်ငံ လူ့အခွင့်အရေး ကော်မရှင်အပါအဝင်၊ ကုလသမဂ္ဂ လူ့အခွင့်အရေးကော်မရှင်၊ အမေရိကန်နဲ့ ဥရောပသမဂ္ဂ အဖွဲ့ဝင် အစိုးရတွေဆီကို ပေးပို့လိုက်တယ်လို့ ပြောပါတယ်။

ထောင်ထဲမှာ အသည်းကင်ဆာ ရောဂါခံစားနေရတဲ့ ကိုဖြိုးဝေအောင်ကို အမြန်ဆုံး ပြန်လွှတ်ပေးဖို့ကို AHRC ခေါ် အာရှ လူ့အခွင့်အရေး ကော်မရှင်ကလည်း ဒီနေ့ တိုက်တွန်းတောင်းဆို လိုက်ပါတယ်။

မြန်မာနိုင်ငံမှာ နိုင်ငံရေးနဲ့ ဆက်နွယ်ပြီး အကျဉ်းချခံထားရတဲ့ နိုင်ငံရေး အကျဉ်းသား အနည်းဆုံး ၄၀၀ ကျော် ကျန်နေသေးတယ်လို့ ပြည်တွင်း၊ ပြည်ပနိုင်ငံရေး အကျဉ်းသား ဆိုင်ရာ အဖွဲ့တွေက ပြောဆိုကြပါတယ်။

၂၀၁၀ သင်္ကြန်တွင်းမှာ X2O မဏ္ဍပ်ဗုံးခွဲမှုနဲ့ စွပ်စွဲခံရပြီး သေဒဏ်ချမှတ် ခံလိုက်ရတဲ့ ကိုဖြိုးဝေအောင်ဟာ အသည်း ကင်ဆာရောဂါနဲ့ နောက်ဆုံး အဆင့် ရောက်နေပြီလို့ မိသားစုကနေ တဆင့်သိရပါတယ်။

Ref: RFA News

Read More...

Collapse...

မြန်မာစစ်တပ် လူ့အခွင့်အရေးချိုးဖောက်မှုများ ကျူးလွန်ဆဲ၊ AI ဝေဖန်

ဗုဒ္ဓဟူး, 23 မေ 2012

လန်ဒန်အခြေစိုက် Amnesty International လူ့အခွင့်အရေး အဖွဲ့ကြီးရဲ့ ၂၀၁၂ ခုနှစ် နှစ်ပတ်လည် လူ့အခွင့်အရေး အစီရင်ခံစာ ထဲမှာတော့ မြန်မာနိုင်ငံ အတွင်း မြန်မာ စစ်တပ်ဟာ တိုင်းရင်းသားဒေသတွေမှာ လူသားမျိုးနွယ် အပေါ် ဆန့်ကျင်တဲ့ ရာဇ၀တ်မှုတွေ ကျူးလွန်နေတယ်လို့ ဝေဖန် လိုက်ပါတယ်။

စစ်ပွဲတွေဖြစ်နေတဲ့ဒေသက ထောင်နဲ့ချီတဲ့ဒုက္ခသည်တွေကို လူသားချင်း စာနာမှု အကူအညီတွေပေးဖို့ လည်း အာဏာပိုင်တွေ ဘက်က ပိတ်ပင်ထားပြီး မြန်မာ စစ်တပ်က စစ်သားတွေဟာ အရပ်သားတွေပေါ် လိင်ပိုင်းဆိုင်ရာ စော်ကားမှုတွေလည်း ကျူးလွန်ကြတယ်လို့ ဆိုပါတယ်။ မြန်မာ အစိုးရဟာ နိုင်ငံရေးနဲ့ စီးပွားရေး ပြုပြင်ပြောင်းလဲမှုတွေ အကန့်အသတ်နဲ့ လုပ်ဆောင်နေပေမဲ့ အခုနှစ် အတွင်းမှာပဲ တိုင်းရင်းသား လူနည်းစုဒေသတွေမှာ နိုင်ငံတကာဥပဒေတွေနဲ့ လူ့အခွင့်အရေးတွေကို ချိုးဖောက်မှုတွေ ရှိနေတယ်လို့ Amnesty International လူ့အခွင့်အရေးအဖွဲ့က ဝေဖန်ထားပါတယ်။

အဲဒီအထဲ အချို့အမှုတွေဟာ စစ်ရာဇ၀တ်မှုတွေနဲ့ လူသားမျိုးနွယ်အပေါ် ဆန့်ကျင်တဲ့ ရာဇ၀တ် မှုတွေ ဖြစ်တယ်လို့ ဆိုပါတယ်။ အထူးသဖြင့် ကချင်ပြည်နယ် အတွင်းက အခြေအနေတွေ ကို ထောက်ပြဝေဖန်ထားရာမှာ ဖြစ်ရပ်တွေကိုပါ အသေးစိတ်ရေးသားထားပါတယ်။ ရှမ်းပြည်နယ်အတွင်း မှာ အရပ်သားတွေကို ညှင်းပမ်းနှိပ်စက်မှု မတရားဖမ်းဆီး ချုပ်နှောင်မှုတွေရှိတဲအ့ပြင် ကျေးရွာတွေကို အတင်းအကျပ် ရွှေ့ပြောင်းမှုတွေပါ ရှိခဲ့တယ်လို့ ဆိုပါတယ်။

ခိုင်မာတဲ့ အထောက်အထားတွေအရ စစ်တပ်ဟာ အကျဉ်းသားတွေကို ပေါ်တာအဖြစ် အသုံးပြုတာ၊ မိုင်းရှင်းတဲ့နေရာ လူသားဒိုင်းလို အသုံးပြုတာမျိုးတွေ ရှိတယ်လို့လည်း ဝေဖန်ပါတယ်။ ပြီးခဲ့တဲ့နှစ် အတွင်း နိုင်ငံရေးအကျဉ်းသားတွေ လွတ်မြောက်လာတာရှိပေမယ့်လည်း နိုင်ငံရေးအရလှုပ်ရှားသူတွေကို အပြစ်ပေးထောင်ချတာတွေ ဆက်ရှိနေသလို နိုင်ငံရေးအကျဉ်းသားတွေ လူမဆန်စွာ ညှင်းပမ်းနှိပ်စက် မှုတွေလည်း ရှိနေတယ်လို့ ဆိုပါတယ်။ အကျဉ်းထောင်တွင်း အခြေအနေဟာလည်း အတော်လေး ဆိုးဝါးနေဆဲပဲလို့ ထောက်ပြပါတယ်။

မြန်မာနိုင်ငံဟာ လက်ရှိမှာ နိုင်ငံရေးအရ ပြုပြင်ပြောင်းလဲမှုတွေရှိပေမဲ့ လူ့အခွင့်အရေးအရ တိုးတက်ဖို့ လုပ်ဆောင်စရာတွေ ကျန်နေသေးတယ်လို့ နိုင်ငံတကာက ဝေဖန်တာခံနေရဆဲပါ။ ဒီနေ့ဆိုရင်တော့ အမေရိကန်နိုင်ငံခြားရေးဌာနရဲ့ နှစ်စဉ် လူ့အခွင့်အရေး အစီရင်ခံစာ ထုတ်ပြန်ဖို့ရှိပါတယ်။ အဲဒီအထဲ မြန်မာနိုင်ငံအခြေအနေကိုလည်း ထည့်သွင်းဖော်ပြမယ်လို့ မျှော်လင့်ရပါတယ်။

Ref: VOA News

Read More...

Collapse...

အမည်ခံ ရင်းနှီးမြှုပ်နှံမှုများ တရားဝင် အသွင်ပြောင်းရန် ထပ်မံသတိပေး

ကျော်ခ
May 23, 2012

နိုင်ငံခြားသား ရင်းနှီးမြှုပ်နှံသူများက မြန်မာနိုင်ငံသားများကို အမည်ခံစေကာ လုပ်ကိုင်နေသည့် လုပ်ငန်းများကို တရားဝင် နိုင်ငံခြား ရင်းနှီးမြှုပ်နှံမှုများ အဖြစ် ပြောင်းလဲ လုပ်ကိုင်ရန် အသိပေး ထားသော်လည်း အသွင်ပြောင်း လုပ်ကိုင်သူ နည်းပါးနေသဖြင့် မြန်မာ အစိုးရက ထပ်မံသတိပေး ပြောဆိုလိုက်သည်။

အမည်ခံကုမ္ပဏီများအနေဖြင့် တရားဝင် တိုက်ရိုက်ရင်းနှီးမြှုပ်နှံကြရန် ယခုနှစ် မတ်လမှ မေလအထိ ရက် ၉၀ အတွင်း လုပ်ဆောင် ရန် သတိပေး ထားသော်လည်း မေလ၂၂ ရက်နေ့အထိ ကုမ္ပဏီ ၁၀ ခုကျော်သာ ရှိသေးကြောင်း အမျိုးသား စီမံကိန်းနှင့် စီးပွားရေး ဖွံ့ဖြိုး တိုးတက်မှု ဝန်ကြီးဌာန ဒုတိယ ညွန်ကြားရေးမှူး ဦးအောင်နိုင်ဦး က ပြောသည်။

“နာမည်ခံထားတဲ့နိုင်ငံခြားသားအားလုံးကို ကျနော်တို့က မြန်မာနိုင်ငံသား ရင်းနှီးမြှုပ်နှံမှု ဥပဒေနဲ့ အညီ ပေးထားတဲ့ Permit (ခွင့်ပြုချက်) ကို ပြန်သိမ်းပြီးတော့မှ Foreign Investment Law နဲ့အညီ ကျနော်တို့ လုပ်ပေးနေပါတယ်။ အခုလာပြီး လုပ်နေတဲ့ အရေ အတွက်တော့ ၁၂ ခုလောက်ပဲ ရှိနေသေးတယ်”ဟု ဦးအောင်နိုင်ဦး က ဧရာဝတီသို့ ပြောသည်။

မြန်မာနိုင်ငံတွင် စက်ရုံပေါင်း၂၀၀ ကျော်ရှိသော အထည်ချုပ်လုပ်ငန်း အမျိုးအစား တခုတည်းတွင်ပင် မြန်မာနိုင်ငံသားများကို အမည်ခံ၍ ရင်းနှီးမြှုပ်နှံနေသော နိုင်ငံခြား ကုမ္ပဏီ ထက်ဝက်ကျော် ရှိနေပြီး တရားဝင် အသွင်ပြောင်း လုပ်ဆောင်ရန် ရာခိုင်နှုန်း နည်းပါးနေခြင်းကို ထောက်ပြ၍ ထပ်မံသတိပေး ပြောဆိုခြင်းဖြစ်ကြောင်း သိရသည်။

နိုင်ငံသားအမည်ခံ ရင်းနှီးမြှုပ်နှံမှုများသည် အနာဂတ်ကာလတွင် မြန်မာနိုင်ငံ၏ ရင်းနှီးမြှုပ်နှံမှု စီမံကိန်းကို ထိခိုက်ရုံ မက နိုင်ငံ၏ အကျိုးစီးပွား ကိုလည်း ထိခိုက်စေနိုင် သဖြင့် ယခုလို ပြောင်းလဲရန် ပြင်ဆင်ရခြင်း ဖြစ်ကြောင်း၊ အကြောင်းကြောင်းကြောင့် အသွင် ပြောင်း လုပ်ကိုင်ရန်နှောင့်နှေးနေရသော ကုမ္ပဏီများအတွက် လိုအပ်ပါက ရက်တိုးပေးဖွယ် ရှိကြောင်း ဦးအောင်နိုင်ဦး က ပြော သည်။

မြန်မာနိုင်ငံသားအမည်ခံလုပ်ကိုင်ကြသော ကုမ္ပဏီများကလည်း ရေခ၊ မီး ခ များကစ၍ နိုင်ငံခြားငွေဖြင့် အခွန်ဆောင်စရာမလိုဘဲ ဆယ်စုနှစ်ကြာ အထိုင် ကျလာခဲ့သဖြင့် လက်ရှိ အခြေအနေအရ ပြောင်းလဲလိုခြင်း မရှိကြသေးဘဲ ဥပဒေသစ် ထွက်လာမည့် အချိန်ကို စောင့်မျှော်နေကြသည်ဟု လုပ်ငန်းရှင်များ ကလည်း ပြောသည်။ သို့သော်လည်း အနာဂတ်တွင် အရေးယူဆောင်ရွက်ခံရမည် ကို စိုးရိမ်နေကြသည်။

“သူတို့ကတော့ လုပ်ပါ၊ မလုပ်ရင် အရေးယူမယ်ဆိုတဲ့ အတင်းအကျပ်ကြီး ပြောတာမျိုးတော့ မဟုတ်ဘူးဗျ။ ရင်းနှီးမြှုပ်နှံမှု ဥပဒေ ထွက်လာပြီးတဲ့အခါ၊ နိုင်ငံတကာကုမ္ပဏီတွေ ပစ်ဝင်လာတဲ့အခါ ကြလို့ရှိရင်တော့ မလုပ်တဲ့ကုမ္ပဏီတွေကို အရေးယူတဲ့ အဆင့်ထိ လုပ်လာနိုင်တယ်”ဟု လှိုင်သာယာ စက်မှုဇုန် အထည်ချုပ်လုပ်ငန်းရှင်တဦး က ဧရာတီသို့ ပြောသည်။

နိုင်ငံခြားရင်းနှီးမြှုပ်နှံမှု ဥပဒေကို ယခုအချိန်တွင် လွှတ်တော် သုံးခုအနက် ပြည်သူ့လွှတ်တော်နှင့် အမျိုးသား လွှတ်တော်တို့တွင် အတည်ပြုထားပြီးဖြစ်ကာ ပြည်ထောင်စုလွှတ်တော် က အတည်ပြုပြီးလျင် သမ္မတ က ခွင့်ပြုချက်ရရှိပါက တရားဝင် ပြဌာန်း နိုင်တော့မည် ဖြစ်သည်။ စတုတ္ထအကြိမ် လွှတ်တော်ကို ဇွန်လတွင် ကျင်းပမည်ဖြစ်သည်။

အဆိုပါ နိုင်ငံခြား ရင်းနှီးမြှုပ်နှံမှု ဥပဒေတွင် ရင်းနှီးမြှုပ်နှံလိုသူများအတွက် ဆွဲဆောင်မှုအဖြစ် ၅ နှစ်အခွန် ကင်းလွတ်ခွင့် ပြုထားကြောင်း၊ ထို့ပြင် ပြည်ပမှ လုပ်ငန်းရှင်များအတွက် ပြည်တွင်းမှ မြေနေရာများ ငှားရမ်း ခွင့်၊ ပထမ ငှားရမ်းမှုကို နှစ် ၅၀ ခွင့်ပြုထားပြီး ထပ်မံ သက်တမ်းတိုး ငှားရမ်းမှု ကို ၁၀ နှစ် ၂ ကြိမ် ခွင့်ပြုကြောင်း ဦးအောင်နိုင်ဦး က ပြောသည်။

၁၉၉၈ ခုနှစ်က ပြဌာန်းခဲ့သော ဥပဒေဟောင်းကြောင့် နိုင်ငံခြားကုမ္ပဏီများအနေဖြင့် မြန်မာနိုင်ငံတွင် ရင်းနှီးမြှုပ်နှံမှု အားနည်း ခြင်းနှင့် အမည်ခံ ရင်းနှီးမြှုပ်နှံမှုများ ပြုလုပ်ခြင်းမှာ အမေရိကန် ၁ ဒေါ်လာလျင် မြန်မာငွေ ၆ ကျပ်ဖြင့် လဲလှယ်ရခြင်း၊ အလုပ် သမားခန့်ထားရေးနှင့် လုပ်ငန်းပိုင်ဆိုင်မှု၊ အငြင်းပွားဖွယ်ရာများကို တိတိကျကျ ပြဌာန်းမှုမရှိခြင်းနှင့် လွတ်လပ်စွာလုပ်ပိုင်ခွင့်များကို ကန့်သတ် ခဲ့ခြင်းကြောင့်လည်း ဖြစ်သည်ဟု သိရသည်။

“အရင်ပြဌာန်းခဲ့တဲ့ဥပဒေက မြန်မာနိုင်ငံမှာလာပြီး လုပ်မယ်ဆိုရင် ပုဂ္ဂလိကတွေပိုင်တဲ့ မြေမှာ လုပ်ခွင့်မရှိဘူး။ အစိုးရမြေ ငှားလုပ်မှ ရမယ်။ တချို့လုပ်ငန်းရှင်တွေက မြန်မာနိုင်ငံမှာ လာလုပ်ချင်ပေမယ့်လဲ အစိုးရမြေငှားဖို့ကလည်း သူတို့မှာ အခက်အခဲတွေရှိတယ်။ ပုဂ္ဂလိကမြေငှားဖို့ကလည်း ခွင့်မပြုတော့ သူ့နည်းသူ့ဟန်နဲ့ သူတို့က ယုံကြည်စိတ်ချရတဲ့ မြန်မာနိုင်ငံသားကို Back Up (ကျောထောက် နောက်ခံ)ပေးပြီးတော့မှ ဒီမှာလာပြီး ထူထောင်ခဲ့ကြတာပဲ”ဟု သူက ဆက်ပြောသည်။

ထွက်ရှိလာမည် ဥပဒေသစ်တွင် ဥပဒေဟောင်းတွင်ပါသော အားနည်းချက်များ ပါဝင်တော့မှာမဟုတ်ကြောင်း၊ ပြည်ပမှ လာရောက် ရင်းနှီးမြှုပ်နှံလိုသော နိုင်ငံတကာကုမ္ပဏီများကလည်း စောင့်ကြည့်လျက်ရှိပြီး ဥပဒေသစ်ပြဌာန်းပြီးပါက ရင်းနှီးမြှုပ်နှံမှုများ အလုံး အရင်းနှင့် ဝင်ရောက်လာဖွယ်ရှိကြောင်း မြန်မာအစိုးရဘက်က မျှော်မှန်းထားသည်။

“အခုနောက်ပိုင်း ၆ လအတွင်းမှာ အရင်ကနဲ့ မတူဘဲ လာစုံစမ်းနေတဲ့နိုင်ငံခြား ကုမ္ပဏီတွေများတယ်။ အရင်တုန်းက တလလုံးနေမှ ၂ ခုလောက်လာတာ။ အခုဆို တရက်ကို ၁၅ ခုလောက်လာစုံစမ်းနေတာ” ဟု ဦးအောင်နိုင်ဦး ကပြောသည်။

မြန်မာနိုင်ငံတွင် တိုက်ရိုက် နိုင်ငံခြားရင်းနှီးမြှုပ်နှံမှု အမေရိကန်ဒေါ်လာ ဘီလီယံ ၄၀ ကျော်ရှိခဲ့ပြီး အမေရိကန်က မြန်မာနိုင်ငံအပေါ်စီးပွားရေးပိတ်ဆို့မှုများ ဖွင့်လှစ်ပေးပြီးနောက် ဆက်လက်မလုပ်နိုင်တော့ဘဲ ၁၀ ဘီလီယံခန့် ပြန်ရုပ်သိမ်း သွားကြသဖြင့် လက်ရှိတွင် ဘီလီယံ ၃၀ ကျော် ရင်းနှီးမြှုပ်နှံနေကြောင်း ဦးအောင်နိုင်ဦးက ပြောသည်။

မြန်မာနိုင်ငံတွင် အမည်ခံနှင့် တိုက်ရိုက်ရင်းနှီမြှုပ်နှံလုပ်ကိုင်နေမှုတွင် တရုတ်နိုင်ငံက အများဆုံး လုပ်ကိုင်လျက်ရှိပြီး ထိုင်း၊ ဟောင်ကောင်နှင့် တောင်ကိုရီးယားနိုင်ငံများ ပါဝင်ကြောင်း သိရသည်။

မြန်မာနိုင်ငံသည် စီးပွားရေး ရင်းနှီးမြှုပ်နှံမှုဆိုင်ရာ ကဏ္ဍများ၌ ဥပဒေအရ အကာအကွယ်ပေးမှု အားနည်းသည့် နိုင်ငံတနိုင် ဖြစ် ကြောင်း ဗြိန်တိန်နိုင်ငံ အခြေစိုက် Maplecroft အဖွဲ့ ၏ ၂၀၁၂ ခုနှစ် ဖေဖော်ဝါရီလအတွင်းက ထုတ်ပြန်သည့် ဥပဒေစိုးမိုးမှုဆိုင်ရာ အစီရင်ခံစာ တစောင်၌ ဖော်ပြထားသည်။

ထိုအစီရင်ခံစာသည် ကမ္ဘာ့နိုင်ငံပေါင်း ၁၉၇ နိုင်ငံအား လေ့လာထားသည့် အစီရင်ခံစာဖြစ်ပြီး ရင်းနှီးမြှုပ်နှံမှုတွင် ဥပဒေအရ ကာကွယ်ပေးမှု အနည်းဆုံး ၁၀ နိုင်ငံတွင် မြန်မာနိုင်ငံသည် ထိပ်ဆုံးမှ ပါဝင်နေသည်ဟု ဆိုသည်။

Ref: ဧရာဝတီ

Read More...

Collapse...

ပြည်မြို့မှာလည်း လျှပ်စစ်မီးရရှိရေး ဆန္ဒပြ

2012-05-22

ပဲခူးတိုင်း ပြည်မြို့ မှာ မနေ့ ည ရှစ်နာရီခွဲခန့် က ပြည်သူလူထု ၁၀၀ ခန့် က လျှပ်စစ်မီး ရရှိရေးအတွက် ဖယောင်းတိုင်များ ထွန်းညှိကာ ချီတက် ဆန္ဒပြကြ တယ်လို့ သိရပါတယ်။

မြို့နယ်လျှပ်စစ်ရုံးကနေ ဗိုလ်ချုပ်ကြေးရုပ်အထိ ဗိုလ်ချုပ်လမ်းအတိုင်း ဆန္ဒပြကြပုံကို ပါဝင်ခဲ့တဲ့ မြို့ခံတစ်ဦးက အခုလို ပြောပြပါတယ်။

" ညတုန်းက ရှစ်နာရီခွဲ ကိုးနာရီခန့်မှာ မီးရုံးရှေ့ကနေ ဗိုလ်ချုပ်လမ်းအတိုင်း လာပြီးတော့ မြင်းစီးကျောက်ရုပ်ကို ပတ်ပြီးတော့ မြင်းစီးကျောက်ရုပ်မှာ မီးတိုင်တွေ ကိုင်ပြီးတော့ လျှပ်စစ်မီးရရှိရေး ဒို့အရေး ဆိုပြီးတော့ နည်းနည်းကြွေးကြော်တယ်။ လူကတော့ ၁၀၀ လောက်ရှိပါတယ်။ မြို့လူထုက ဘေးနားကနေ အများကြီး လိုက်လာတယ်။ အုပ်လိုက်ကြီး လိုက်လာတယ်။ လက်ခုပ်လက်ဝါး တီးပြီး ဘေးကနေ အားပေးပြီး လိုက်လာတယ်။ တလျှောက်လုံး လိုက်လာပါတယ်။ ဘေးကနေပြီးတော့ ရဲတွေ အများကြီး ကားနဲ့ လိုက်လာပါတယ်။ ဘာမှတော့ အနှောင့်အယှက် မပေးဘူး။ အခုချိန်အထိတော့ ဖမ်းတာ ဆီးတာ မရှိသေးပါဘူး"

ဆန္ဒပြသူတွေဟာ ဖယောင်းတိုင်မီးတွေကို ဗိုလ်ချုပ် မြင်းစီးကျောက်ရုပ် ပတ်ပတ်လည်မှာ စိုက်ထူထွန်းညှိပြီး ဆယ်နာရီခန့်မှာ လူစုခွဲခဲ့တယ်လို့ သိရပါတယ်။

နဂိုစီစဉ် ထားခြင်းမရှိဘဲ မိမိတို့ သဘောအလျောက် ရုတ်တရက် အခုလို ဆန္ဒပြပွဲ ဖြစ်လာတဲ့အကြောင်း စောစောက မြို့ခံကပဲ အခုလို ရှင်းပြပါတယ်။

" မီးရုံးရှေ့မှာ ဆန္ဒပြမယ်၊ ဆန္ဒပြမယ်ဆိုပြီးတော့ ဒီအတိုင်း အသံတွေထွက်နေကြတယ်ပေါ့။ အဲတာကလည်း မန္တလေးမှာ ဖြစ်တာရယ်၊ ရန်ကုန်မှာ ဖြစ်တာရယ်ကိုကြည့်ပြီး ဒီကလူတွေက လုပ်ဖို့စချင်တယ်။ ဘယ်သူကစရမှန်း မသိဘူးဖြစ်နေတယ်။ အဲလိုဖြစ်နေပြီးတော့ မီးရုံးရှေ့ကို သွားသွားပြီးတော့ ကြည့်နေကြတာ၊ လူတွေက၊ သွားကြည့်ပြီးတော့ ညက မီးရုံးပတ်ဝန်းကျင်မှာ မလိုအပ်ပဲ တအားစည်ကားနေတာ၊ ဆိုင်ကယ်တွေ၊ ကားတွေ၊ စက်ဘီးတွေနဲ့ စည်ကားနေတော့ ရဲတွေ အများကြီး ရောက်လာတယ်။ ရောက်လာတော့ လူတွေက ထိုင်ရင်း၊ ထိုင်ရင်းနဲ့ စဖြစ်သွားကြတာတဲ့"

ပြည်မြို့ခံ သီးခြားအဖွဲ့တဖွဲ့ကလည်း မီးရရှိရေး ဆန္ဒပြပွဲ ပြုလုပ်ဖို့ စီစဉ်နေပေမဲ့ အခုထိ ခွင့်ပြုမိန့်  မရသေးဘူးလို့ သိရပါတယ်။

Ref: RFA News

Read More...

Collapse...

ပဲခူး လျှပ်စစ်မီး ရရှိရေး ဆန္ဒပြမှု ရက်ရွှေ့ဆိုင်းထား

ဟင်္သာနီ (မွန်မြေ)
ဗုဒ္ဓဟူးနေ့၊ မေလ ၂၃ ရက် ၂၀၁၂

စံခလပူရီ (မဇ္ဈိမ)။ ။ ပဲခူးမြို့၌ လျှပ်စစ်မီး ရရှိရေးအတွက် ဖယောင်းတိုင် ထွန်း၍ ဆန္ဒပြမည့် အစီအစဉ်အား ရွှေ့ဆိုင်း လိုက်ပြီဖြစ်ကြောင်း ဆန္ဒပြပွဲ ဖြစ်မြောက်ရေး အဖွဲ့ခေါင်းဆောင် တဦးဖြစ်သူ ကိုအောင်မျိုးဝင်း က ပြောသည်။

“ကျနော်တို့ အားလုံး စီစဉ်ထားပြီးတော့မှ ရွှေ့လိုက်ရတာ။ သတင်းက ဘယ်လို ထွက်သွားမှန်း မသိဘူးဗျ။ သူတို့ဘက်က လက်ဦးမှု ရသွားတယ်။ လုံခြုံရေးတွေ ဘာတွေ ယူထားတယ် ဆိုတော့၊ ကိုယ်တွေက ဒါတွေလုပ်တာ အနောက်က လူထုပါမှ ကောင်းတာလေ။ အခု ဒီလိုဖြစ်သွားတော့ လူထုက နည်းနည်းလေး ကြောက်ရွံ့သွားတဲ့ အခါကျတော့ အစီအစဉ် ပြောင်းလိုက်တာပါ။ အာဏာပိုင်တွေ ဘက်က တားမြစ် ပိတ်ပင်လို့ ရက်ရွှေ့ရတာ မဟုတ်ပါဘူး။ အခုလည်း မီးပြန်မှန်နေလို့ ဆန္ဒပြဖို့ကို ရွှေ့ဆိုင်း ထားပါသေးတယ်” ဟု မဇ္ဈိမကို ပြောသည်။

ဆန္ဒပြရန် အစီအစဉ်အား ရက်အကန့်အသတ် မရှိရွှေ့ဆိုင်းလိုက်ခြင်းဖြစ်ကြောင်းလည်း ၎င်းက ဆိုသည်။ ပဲခူးမြို့ရှိ လျှပ်စစ်မီး ပြတ်တောက် မှုများကို အာဏာပိုင်များမှ ထိန်းထိန်း သိမ်းသိမ်းဖြင့် ကိုင်တွယ်လျက် ရှိသည်။ နောက်ဆုံး အတည်ပြု မေးမြန်းချိန်အထိတွင် ပဲခူးတွင် တနေ့လျှင် ၈ နာရီ လျှပ်စစ်မီး ရရှိနေသည်ဟု သိရှိရပါသည်။ ရန်ကုန်တွင် ၆ နာရီသာ မီးပေးဝေ နေပါသည်။ မန္တလေး မြို့၌မူ ၁ နာရီခန့်သာ လျှပ်စစ်မီး ပေးဝေလျက် ရှိနေသည်။

“မနေ့က မြို့နယ် ရဲမှူးက ကျနော့်ကို ခေါ်တွေ့တယ်။ သူက ရှင်းပြတာက မီးပျက်တာက တနိုင်ငံလုံး အတိုင်းအတာနဲ့ ပျက်နေတာပါ။ လျှပ်စစ်မီး ပြန်လည် ရရှိဖို့ကို အတတ်နိုင်ဆုံး ကြိုးစား နေပါတယ်။
နောက်တခုက ဆန္ဒပြခွင့်က ဥပဒေပဲ ထွက်သေးတယ်။ နည်းဥပဒေ ဆိုတာ မထွက်သေးဘူး။ ဒါကြောင့် သူတို့ဘက်မှာလည်း အခြေအနေတွေကို ကိုင်တွယ်ရတာ အခက်အခဲ ရှိပါတယ်လို့ ရှင်းပြတယ်။ မနေ့တုန်းကလည်း သတင်းစာမှာ ကြေငြာချက်လည်း ပါလာတယ်လေ၊ ဟု” ကိုအောင်မျိုးဝင်း က ပြောသည်။

မန္တလေးမြို့မှ စတင်ခဲ့သည့် မီးရရှိရေးအတွက် ဖယောင်းတိုင်ထွန်း၍ ဆန္ဒဖော်ထုတ် ပွဲများသည် အခြား မြို့ကြီးများသို့ ကူးစက်ခဲ့ပြီး ရန်ကုန်၊ မုံရွာ၊ ပြည်များ၌လည်း ဖြစ်ပွားခဲ့ကြသည်။

မန္တလေးမြို့၏ ဒုတိယနေ့ ဆန္ဒပြပွဲ၌ ပါဝင်သည့် ခေါင်းဆောင်အချို့နှင့် လှုံ့ဆော်သူ ၅၀ ခန့်အား မန္တလေးတိုင်း ရဲသတင်း တပ်ဖွဲ့မှ ခေါ်ယူ မေးမြန်း ခဲ့သော်လည်း ဖမ်းဆီး ထိမ်းသိမ်းခဲ့ခြင်း မရှိကြောင်း သိရှိရသည်။

နေပြည်တော်တွင်လည်း မေလ ၂၂ ရက်နေ့က စစ်ဖက်ထိပ်တန်းခေါင်းဆောင် များနှင့် လွှတ်တော် ကိုယ်စားလှယ် အချို့ တက်ရောက်သည့် အရေးပေါ် အစည်းအဝေး တရပ် ခေါ်ယူ
ကျင်းပကာ နိုင်ငံအ၀ှန်း ဖြစ်ပေါ်နေသည့် လျှပ်စစ်မီး ရရှိရေး ကိစ္စအား ညင်ညင်သာသာ ကိုင်တွယ် သွားကြရန် ဆွေးနွေး ခဲ့ကြသည်ဟု အတည် မပြုနိုင်သေးသည့် သတင်းတရပ်က ဆိုသည်။

မြန်မာပြည် လျှပ်စစ်ဓါတ်အား ထုတ်လုပ်မှု၏ ၇၀ % ကျော်မှာ ရေအားလျှပ်စစ်မှ ထုတ်လုပ်ပြီး ၂၀ % နှုန်း ကျော်မှာ သဘာဝ ဓာတ်ငွေ့မှ ထုတ်လုပ်လျက် ရှိသည်။ အခြား နည်းလမ်းများဖြင့် ထုတ်လုပ်မှုမှာ ၁ % အောက်တွင်သာ ရှိကြောင်း သိရှိရသည်။

ပဲခူးမြို့၏ လျှပ်စစ်မီး ရရှိရေးအတွက် ဆန္ဒပြမှု အစီအစဉ်အား မီးများ ပြန်ပျက်ခဲ့ပါက ဆက်လက်၍ ဆန္ဒပြသွားနိုင်ရန် စီစဉ်ဆောင်ရွက် ထားသည်ဟုလည်း ကိုအောင်မျိုးဝင်း က မဇ္ဈိမကို ပြောကြားသွားသည်။

Ref: မဇ္ဈိမ

Read More...

Collapse...

လျှပ်စစ်မီးကိစ္စ ဆန္ဒပြမှုနဲ့ ကိုကိုကြီးရဲ့ သဘောထား

ဦးသန်းလွင်ထွန်း
အင်္ဂါ, 22 မေ 2012

မြန်မာနိုင်ငံမှာ ကြုံတွေ့နေရတဲ့ လျှပ်စစ်ဓါတ်အား ပြတ်တောက်မှုပြဿနာဟာ အချိန်တို အတွင်း ပြေလည် သွားနိုင်မယ့် အရေး မဟုတ်ဘူးဆိုတာ သိနားလည်ပေမဲ့ လက်တွေ့ ခံစားနေရတဲ့ နစ်နာမှုနဲ့ လိုလားချက်တွေကို အစိုးရက ကူညီ ဖြေရှင်းပေးနိုင်လိမ့်မယ်လို့ မျှော်လင်ချက်နဲ့ ဆန္ဒပြနေသူတွေရဲ့ ယုံကြည်ချက်ကို ချိုးနှိမ် မပစ်ဘဲ ထိထိရောက်ရောက် စီမံဆောင်ရွက်ပေးသင့်တယ်လို့ ၈၈ မျိုးဆက်ကျောင်းသားခေါင်းဆောင် ကိုကိုကြီး က မြန်မာ အစိုးရကို တိုက်တွန်း လိုက်ပါတယ်။ ဦးသန်းလွင်ထွန်းက ဆက်သွယ်မေးမြန်းထား ပါတယ်။

++++

ကိုကိုကြီး။ အခု ဒီမီးပျက်တဲ့ကိစ္စတွေကတော့ အထူးသဖြင့်တော့မြို့ ကြီးတွေမှာပေါ့လေ။ ဒီဒုက္ခ ခံနေရ တာတော့ တော်တော် ကြာပြီပေါ့၊ အဲဒီတော့ တိုင်းပြည်က နည်းနည်း အထိုက် အလျောက်လေး ပွင့်လင်း လာတော့ လူထုကလည်း သူတို့ နစ်နာချက်တွေ သူတို့ လိုအပ်ချက်တွေကို တင်ပြတောင်းဆိုတာတွေ ဆန္ဒ ထုတ်ဖေါ်တာတွေ လုပ်လာတော့ ဒါဟာ ပွင့်လင်းတဲ့လူ့ အဖွဲ့ အစည်းမှာ ဒါ ကြိုဆိုရမယ့် ကိစ္စပေါ့။ နောက် တချိန်တည်းမှာပဲ သတင်းစာ ထဲမှာ ၀န်ကြီးက လျှပ်စစ်နဲ့  ပတ်သက်လို့ လူထုရဲ့ တင်ပြမှုတွေ ဆန္ဒပြမှုတွေ အပေါ်မှာ တုံ့ပြန်တဲ့ ကြေညာချက်လည်း ပေးတယ်ပေါ့ ။ ဘာပဲဖြစ်ဖြစ် ဒါ လူထုရဲ့ လိုအပ်ချက်ကို အလေး ထားလာတယ် ဂရုတစိုက်နဲ့ ပြန်ပြီး တုံ့ပြန်လာတယ်ဆိုတော့ ဒါလည်း ကြိုဆိုရမယ့် အချက် ပါ၊

ဦးသန်းလွင်ထွန်း။ ဟုတ်ကဲ့။ လွန်ခဲ့တဲ့ ငါးနှစ်ကျော်ကျော်လောက်ကပေါ့နော်၊ ၂၀၀၇ နှစ်လောက်က ဆိုရင် လည်း ကုန်ဈေးနှုန်းကြီးတဲ့ကိတ်စ ဓါတ်ဆီဈေးတက်တဲ့ကိစ္စနဲ့ ပတ်သက်ပြီးတော့ ကိုထင်ကျော်တို့ ဆန္ဒပြတဲ့ ကိစ္စတွေ အလားတူပဲ၊ ကိုကိုကြီးတို့  ခင်ဗျားတို့ပေါ့နော်၊ မင်းကိုနိုင်တို့ အပါအ၀င် ကျောင်သားထုလည်း ထွက်ပြီးတော့ စီတန်း ဆန္ဒပြတဲ့ ကိစ္စလေးတွေဖြစ်ခဲ့တယ်။ ဖြစ်တဲ့အချိန်တုန်းကတော့ အစိုးရအနေ နဲ့က အားလုံးကို ထိန်းသိမ်းခဲ့၊ ဖမ်းဆီးခဲ့တဲ့ ကိစ္စမျိုးတွေ ဖြစ်လာတယ်လေ။ အဲတော့ ဒီလိုဖြစ်လာနိုင်မယ့် အလားအလာတွေရော ရှိမယ်လို့ ယူဆပါသလား။

ကိုကိုကြီး။ အခြေအနေချင်း နည်းနည်းတော့ ကွာသွားတယ်၊ ကွာသွားတယ် ဆိုတာက ကျွန်တော်တို့ အဲဒီ ကာလတုန်းက စစ်အစိုးရပေါ့။ အခုကတော့ ဖွဲ့ စည်းပုံ အခြေခံဥပဒေ အရ လွှတ်တော်တွေ ပေါ်လာတယ်။ လွှတ်တော်ကနေ ရွေးကောက် တင်မြှောက်တဲ့ အစိုးရအဖွဲ့ ပေါ်လာတယ်ဆိုတော့၊ ဒီလို ပြဿနာတွေကို ကိုင်တွယ်တဲ့ ပုံစံလည်း ပြောင်းလာလိမ့်မယ်လို့ ကျွန်တော်တို့ မျှော်လင့်ပါတယ်။ တဘက်ကလည်းပဲ အခု သူက လူထုကို သည်းခံဖို့ပေါ့လေ။ မေတ္တာရပ်ခံတဲ့ ကြေညာ ချက်လည်း ထွက်လာတော့ သည်းခံဖို့ ဆိုတာ ကတော့ ကျွန်တော်တို့က သည်းခံလာခဲ့တာ တလျှောက်လုံးပဲ အဲတော့ အခုလည်းပဲ ညတွင်းချင်း နေ့ချင်း ညချင်း ဒီပြဿနာတွေကို မဖြေရှင်းနိုင်ဘူးဆိုတာတော့ ကျွန်တော်တို့လည်း ဒါ နားလည်ပါတယ်။ အဲ ဒါပေမဲ့ လို့ သာမန်လူထုရဲ့ အမြင်မှာကတော့ ကျွန်တော်တို့ နိုင်ငံမှာ သဘာဝဓါတ်ငွေ့တွေ အပြင် ထုတ်ရောင်းနေ တယ်။ ရေအားလျှပ်စစ်တွေ အရင်းအမြစ်တွေ အများကြီးရှိနေတယ်။ ပြည်ပကို ထုတ်ရောင်းနေတဲ့ အခြေ အနေမှာ ပြည်တွင်းမှာ မှောင်ထဲငုတ်တုတ်ထိုင်နေရမယ်ဆိုတာကတော့ မကျေနပ် တာအမှန်ပဲ၊ အဲတော့ နိုင်ငံတော် အနေနဲ့က ဒီ Good Governance ပေါ့၊ ကောင်းမွန်တဲ့ အုပ်ချုပ်ရေးစနစ် ဒါ သမ္မတ ကလည်း အကြိမ်ကြိမ် ပြောထားတော့ အဓိက နိုင်ငံသားတွေရဲ့ လိုအပ်ချက်ကို အထူးပြုပြီးတော့ ဆောင်ရွက် တဲ့ စီမံချက်တွေ၊ အဲဒါ ရှေ့ဆက် ပြီးတော့ ဒီလိုမျိုး လျှပ်စစ်မီးတင် မဟုတ်ဘဲ နေ့စဉ် ကြုံတွေ့နေရ တဲ့ ပြဿနာ တွေ ကို ဘယ်လို ဘယ်ပုံ ဖြေရှင်းမယ် ဆိုတာကို ဒါ လူထု နားလည် လက်ခံလာအောင် ရှင်းပြတာမျိုးတွေပါ။ ကောင်းမွန်တဲ့ စီမံအုပ်ချုပ်ရေးကို ကျင့်သုံးတာတွေပါ ဆက်ပြီးတော့ လုပ်သင့်တယ် လို့ ကျွန်တော်တော့မြင်ပါတယ်။

ဦးသန်းလွင်ထွန်း။ ဟုတ်ကဲ့ ခင်ဗျ။ ကျွန်တော်တို့ ကြားရသလောက်တော့ ဥပမာအားဖြင့် မန္တလေးမှာ ဆိုလို့ရှိရင် ဆန္ဒပြတဲ့ လူတချို့ ကို ရဲကနေပြီးတော့ စစ်ဆေး မေးမြန်းခဲ့တာလေးတွေ ရှိပါတယ်။ အဲဒီအခါမှာ သူတို့သိချင်တဲ့ ကိစ္စကတော့ ဒီ ကိစ္စတွေ၊ ဆန္ဒပြမှူတွေ၊ လှုပ်ရှားမှူတွေရဲ့ နောက်ကွယ်မှာ ဘယ်သူရှိသလဲ ဆိုတဲ့အချက်ကို မေးတယ်ဆိုတဲ့၊ စုံစမ်းတယ် ဆိုတဲ့ဟာလေးတွေ ကျွန်တော်တို့ ကြားရပါတယ်၊ သဘော ကတော့ ဒီသက်ဆိုင်ရာ အာဏာပိုင်တွေအနေနဲ့ အခုလို ကိစ္စတွေအပေါ်မှာ ဒီအာဏာပိုင်တွေရဲ့ အခု လက်ရှိ ဖြစ်နေတဲ့ အားနည်းချက်ပေါ့နော်။ ဒါကိုထောက်ပြီးတော့ နိုင်ငံရေး အမြတ် ထုတ်လိုတဲ့ သူအချို့  ရှိနေတယ်လို့များ အာဏာပိုင်တွေက ယူဆလာတာများ ဖြစ်လာနိုင်သလားခင်ဗျ။

ကိုကိုကြီး။ ကျွန်တော့်အနေနဲ့ကတော့ နိုင်ငံတော်အကြီးအကဲတွေရဲ့ မိန့်ခွန်းမှာ ထပ်ခါတလဲလဲ ပြောနေတဲ့ အချက်က အမူအကျင့် အဟောင်းတွေ အတွေးအခေါ် အဟောင်းတွေကို ပြင်ဆင်ဖို့ဆိုတာက ကျွန်တော်လည်း သတိထားမိပါတယ်၊ အဲတော့ ဒီလိုမျိုးနိုင်ငံသားတွေ ပြည်သူတွေရဲ့ လိုအပ်ချက်ကို ထုတ်ဖော်တဲ့ နေရာမှာ တဘက်က တာဝန်ရှိသူတွေ ကိုယ်၌ကလည်း ရှုမြင်တဲ့ပုံစံတွေ ပြောင်းသင့်တယ်လို့ ကျွန်တော်တော့ မြင် တယ်။ သူက တခုခု ဖြစ်တိုင်းဖြစ်တိုင်း မှာ နောက်ကွယ်ကနေ ပြီးတော့ ဘယ်သူ လှုံ့ဆော် သလဲ၊ ဘယ်သူ ကနေပြီးတော့ စီမံ ဖန်တီး သလဲဆိုတာကို သဘောက အပြစ်ရှာတဲ့ ပုံစံ၊ တရားခံရှာတဲ့ ပုံစံ ချဉ်းကပ်တာ ထက်ကို ဒီပြဿနာတွေဟာ တိုင်းပြည်မှာ တကယ်ဖြစ်ပျက်နေတဲ့ ပြဿနာဆိုတာတွေကို အရှိအတိုင်း လက်ခံ ဖို့  လိုတယ်၊ အဲဒါကို ဖြေရှင်းမယ့် နည်းလမ်းတွေကို စနစ်တကျနဲ့ ထိထိ ရောက်ရောက် ကြိုးပမ်းသင့် တယ်၊ ပြင် ဆင် သင့်တယ်လို့ မြင်တယ်၊ အဲသလိုမှမဟုတ်ဘဲနဲ့ ဒါ လူထုဟာ တခါမှ ဆန္ဒ ထုတ်ဖော်ခွင့် မရခဲ့ဘူး။ အခု အစိုးရသစ်ပေါ်မှာ ယုံကြည်မျှော်လင့်ပြီးတော့ သူတို့ ဒီလိုမျိုး ဆန္ဒ ထုတ်ဖော် ပြသ လိုက် ရင်တော့ ထိထိရောက်ရောက် ကိုင်တွယ် ဖြေရှင်းပေးမှာပဲဆိုတဲ့ မျှော်လင့်ချက်ကို ချိုးနှိမ်ပစ်တဲ့ ချဉ်းကပ်မှု မျိုး ဖြေရှင်းမှု မျိုးတော့ မလုပ်သင့်ဘူးလို့လည်း ကျွန်တော် မြင်ပါတယ်။

ဦးသန်းလွင်ထွန်း။ ဟုတ်ကဲ့၊ ဒါဆိုလို့ ရှိရင် ဆန္ဒပြတဲ့ လူထုဘက်ကရော၊ ဒီဆန္ဒပြတဲ့ ကိစ္စတွေမှာ ငြိမ်းငြိမ်း ချမ်းချမ်းနဲ့ ဆန္ဒ ထုတ်ဖော်ဖို့ပဲ ပြင်ဆင်ထားကြသလား၊ တခြား ဘာတွေများ ထပ်ပိုပြီးတော့ နိုင်ငံရေး အရ တောင်းဆိုမှုတွေ တိုးတက်လာဖို့ ရှိလာနိုင်သလား ခင်ဗျ။

ကိုကိုကြီး။ အဲဒါကတော့ ဒီကျွန်တော်တို့ ဆန္ဒ ထုတ်ဖော်တဲ့ သူတွေ အပိုင်းကလည်း သတိထားရမှာက ကျွန်တော်တို့က ကျွန်တော်တို့ တကယ် လိုအပ်တဲ့ တကယ်နစ်နာတဲ့ ဟာကို အထက်အဖွဲ့အစည်း အဆင့်ဆင့် ကနေ အရေးတယူ ဆောင်ရွက်ပေးအောင် ဆန္ဒထုတ်ဖော်တာပဲ ဖြစ်သင့်တယ်၊ အဲဒီကနေပြီးတော့ မလိုလား အပ်တဲ့ အကြမ်းဖက်မှုတွေ ဒါက ကိုယ် ကိုယ်တိုင်က မလုပ်ရုံ တင်မကဘူး။ အဲလို အခြေအနေ ရောက်အောင် တွန်းပို့နိုင်တဲ့ ဖန်တီးမှုမျိုးတွေဟာ ဘက် အသီးသီးက ဖြစ်လာနိုင်တယ်၊ အဲဒါမျိုးတွေကိုလည်း သတိကြီးစွာ ထားပြီးတော့ ရှောင်ရှားသင့်တယ်လို့ ကျွန်တော်တော့ မြင်ပါတယ်။

Ref: VOA News

Read More...

Collapse...

လျှပ်စစ်မီး အချိန်ပြည့်ရရှိရေး ဆန္ဒထုတ်ဖော်ပွဲများ ပျံ့နှံ့လာ

2012-05-22

လျှပ်စစ်မီး (၂၄) နာရီ ရရှိရေးအတွက် ဒီကနေ့ ရန်ကုန်နဲ့ ပဲခူးမြို့တွေမှာလည်း ဆန္ဒထုတ်ဖော်ဖို့ ပြင်ဆင်နေကြ ပါတယ်။ ရန်ကုန်မြို့က ဆန္ဒထုတ်ဖော်ပွဲကို နိုင်ငံရေး အကျဉ်းသား မိသားစုတွေ၊ ကွန်ယက် အဖွဲ့ဝင်တွေ၊ လူ့အခွင့်အရေးနဲ့ အလုပ်သမား အခွင့်အရေး ကာကွယ်စောင့်ရှောက်သူ အဖွဲ့ဝင်တွေ ပါဝင်မှာဖြစ်သလို အဖွဲ့အစည်းဝင် မဟုတ်သူတွေလည်း ပါဝင်ဖွယ်ရှိတယ်လို့ ဆော်သြသူတွေက ပြောပါတယ်။

ဆန္ဒထုတ်ဖော်ပွဲကို ရန်ကုန်မြို့ ဆူလေဘုရားအနီး ညပိုင်း (၇) နာရီလောက်မှာ စတင်မယ်လို့ သိရပါတယ်။ နိုင်ငံရေး အကျဉ်းသား မိသားစု ကွန်ယက်အဖွဲ့ဝင် ကိုအောင်ဇော်ထွန်းက အစီအစဉ်ကို ပြောပြပါတယ်။

" ဆူးလေဘုရားလမ်းမကြီးမှာရှိတဲ့ ဆူးလေဘုရား မှတ်တိုင်ပေါ့နော်၊ အဲနားလေးမှာ ကျွန်တော်တို့ လူစုကြမယ်။ ညနေ ၆ နာရီခွဲလောက်မှာ။ ပြီးတဲ့အခါမှာ ၇ နာရီထိုးတဲ့ အခါမှာ ကျွန်တော်တို့ ဝေငှထားတဲ့ ဖယောင်းတိုင်တွေကို ထွန်းညှိပြီးတော့ ငြိမ်းငြိမ်းချမ်းချမ်းနဲ့ စီတန်းပြီး ပတ်မယ်။ ပတ်ပြီးတော့ ဘုရားပေါ်မှာ တက်မယ်။ ပြီးရင် ကျွန်တော်တို့ လူစုခွဲပါမယ်"

အလားတူ ပဲခူးမြို့ မြို့နယ်လျှပ်စစ်ရုံးရှေ့မှာလည်း ည ( ၇) နာရီခွဲမှာ လူစုကြမယ်လို့ ပဲခူးမြို့ခံတွေက ပြောပါတယ်။ မြန်မာ စံတော်ချိန် ညနေ (၅) နာရီလောက်ကတော့ ပဲခူးမြို့လူစည်ကားတဲ့နေရာ (၃) နေရာမှာ ရဲတပ်ဖွဲ့ တွေ နေရာယူထားတာ တွေ့ရတယ်လို့ မြို့ခံတွေက ပြောပါတယ်။ မြို့နယ်လျှပ်စစ်ရုံးရှေ့က အခြေအနေကိုတော့ မြို့ခံတစ်ယောက်က အခုလိုပြောပါတယ်။

" ကျွန်တော်မြင်နေရတာကတော့ အကုန်လုံး ယူနီဖောင်းတွေဝတ်တဲ့ ရဲတွေအကုန်လုံး အဆင်သင့် ရှိနေကြတယ်။ သုံးနေရာလုံးမှာလေ။ လူတွေကလည်း စောင့်ကြည့်နေတယ်ဗျ။ ဆန္ဒပြဖို့လို့ ထင်ရတဲ့ ပုဂ္ဂိုလ်များ ကလည်း အဲဒီမှာ အယောက် ၄၀၊ ၅၀ လောက် စောင့်နေကြတယ်။ ဈေးထဲပေါ့။ ကျွန်တော်တို့ ပဲခူးဈေးကြီး သွန်းဘုရား အနီးပေါ့ဗျာ။ မြို့နယ်လျှပ်စစ်ရုံး ဆိုတာရှိတယ်။ အဲဒီမှာ ဒေါ်ရီ စားသောက်ဆိုင် ဆိုတာ ရှိတယ်။ အဲဒီမှာ အယောက် ၂၀ လောက်ရှိတယ်။ ဒီဘက်မှာ သွန်းဘုရား ထဲမှာလည်း ရှိကြတယ်ဗျ။ အဲဒီမှာ သူတို့ ဖယောင်းတိုင်လေးတွေ ကိုင်ထားတာ ကျွန်တော်တွေ့နေရတယ်"

အလားတူ ဒီကနေ့ ညပိုင်းမှာ ပြည်မြို့မှာလည်း ဆန္ဒဖော်ထုတ်ပွဲကျင်းပကြဖို့ ပြင်ဆင်နေကြောင်း သိရပါတယ်။

လျှပ်စစ်မီး ပုံမှန်မရတာနဲ့ ပတ်သက်ပြီး ပြီးခဲ့တဲ့ အပတ်အတွင်းက ရခိုင်ပြည်နယ် ကျောက်တော်မြို့မှာ အိမ်ရှင်မတွေက ဆန္ဒ ထုတ်ဖော် ခဲ့ကြပြီးတဲ့နောက် မန္တလေးနဲ့ မုံရွာမြို့တွေမှာ ဆန္ဒထုတ်ဖော် ပြသခဲ့ကြသလို အောက်မြန်မာပြည်မြို့တွေမှာ ဆက်တိုက် လုပ်ဆောင်လာကြတာ ဖြစ်ပါတယ်။

နောက်ဆုံးရရှိတဲ့ သတင်းအရ ပဲခူးမြို့မှာ လုံခြုံရေး အထူးတင်းကြပ် ထားတာကြောင့် ဆန္ဒ ထုတ်ဖော်ပွဲ မကျင်းပဖြစ်ခဲ့ဘူးလို့ သိရပါတယ်။

Ref: RFA News

Read More...

Collapse...

လျှပ်စစ်မီး ရရှိရေး ရန်ကုန်မှာ ဆန္ဒပြ

သင်းသီရိ
အင်္ဂါ, 22 မေ 2012

ပြီးခဲ့တဲ့ ရက်ပိုင်းအတွင်း မန္တလေးမြို့မှာ ၂၄ နာရီ လျှပ်စစ်မီး ရရှိရေး ဆန္ဒပြ တောင်းဆိုမှုတွေဟာ အခုအခါ ရန်ကုန်မြို့ကို ကူးစက် လာပါပြီ။ လျှပ်စစ်မီး မရရှိတဲ့အတွက် ရန်ကုန်မြို့မှာ ရာနဲ့ချီတဲ့ လူတွေဟာ အခုဗွီအိုအေက အသံလွှင့်ကာနီး အချိန်မှာပဲ စုဝေး ဆန္ဒပြခဲ့ကြတာ ဖြစ်ပါတယ်။ မန္တလေးမြို့ လူထုက ၂ ရက်ဆက်တိုက် ဖယောင်းတိုင်မီး ကိုင်ဆောင်ပြီး ဆန္ဒထုတ်ဖော်ခဲ့ သလိုပဲ ရန်ကုန် လူထုတွေကလည်း ဒီကနေ့မှာ ဖယောင်းတိုင်မီး ကိုယ်စီ ထွန်းညှိပြီး မြို့တော်ခမ်းမ ရှေ့မှာ ဆန္ဒပြနေတဲ့ အခြေအနေနဲ့ ပတ်သက်လို့ ကိုယ်တိုင် သွားရောက် သတင်းယူနေတဲ့ သတင်းထောက် တဦးကို မသင်းသီရိ က ဆက်သွယ်မေးမြန်း တင်ပြထားပါတယ်။

မေလ ၂၂ ရက် အင်္ဂါနေ့ညက ရန်ကုန်မြို့တော် ခမ်းမနဲ့ ဆူးလေဘုရား အနီးတ၀ိုက်မှာတော့ ရန်ကုန်မြို့ အတွင်းမှာ ၂၄ နာရီ လျှပ်စစ်မီး အပြည့်အ၀ ရရှိရေးအတွက် ဖယောင်းတိုင်မီး ထွန်းညှိပြီး စီတန်း လမ်းလျှောက်တာတွေ ရှိခဲ့တဲ့ အကြောင်းကိုတော့ ပြည်ပ သတင်းဌာနအတွက် လုပ်ကိုင်ပေးနေတဲ့ မြန်မာသတင်းထောက် ကိုသီဟဆွေ ကပြောပြပါတယ်။

“အခုရန်ကုန်မြို့ မြို့တော်ခမ်းမကနေ စတာပေါ့နော်။ မြို့တော်ခမ်းမ ဘေးကနေ ၇ နာရီလောက်က စပြီးတော့ သူတို့ ဖယောင်းတိုင်တွေ ထွန်းပြီးတော့ လမ်းလျှောက်တဲ့ အချိန်မှာ လူက တဖြည်းဖြည်း တိုးလာတာပေါ့။ သူတို့က မြို့တော်ခမ်းမ ဘေးကနေစပြီး ထွက်လာတယ်၊ ဒါပေမဲ့ အဝေးကြီး မသွားဘူး။ ဆူးလေ ဘုရားကိုပဲ ပတ်ပြီးတော့၊ ဘုရားပေါ်တက်ပြီး ၀တ်ပြုတဲ့ သဘောမျိုးပေါ့နော် လုပ်တယ်။ ကြေညာချက် သဘောမျိုး သတင်းထောက်တွေကို ပြောပြီးတော့ ပြီးသွားပါတယ်။ အားလုံးပေါင်းတော့ ၁၀၀ နီးပါးလောက်တော့ ရှိမယ် ထင်ပါတယ်။”

ရန်ကုန်မြို့ခံ လူထုတွေဟာ သူတို့ရဲ့ ဆန္ဒတွေကို ဖော်ထုတ်ဖို့အတွက် မြို့တော်ခမ်းမဘေးကို လူစုဝေးချိန်မှာတော့ လုံခြုံရေး စောင့်ကြပ်မှုတွေ ရှိနေပေမဲ့ ဖမ်းဆီးတာမျိုး၊ အနှောက်အယှက် ပေးတာမျိုးတော့ မရှိခဲ့ဘူးလို့လည်း ပြောပါတယ်။

“အဓိကကတော့ ဒီသတင်းက နဂိုကတည်းက ရှိနေတဲ့အတွက် လုံခြုံရေးက ကြိုပြီးတော့ နေရာ ယူထားတာပေါ့။ တကယ်တမ်း စပြီး ထွက်လာတဲ့ အချိန်မှာတော့ မြို့နယ်မှူးကနေပြီးတော့ မေးတယ်၊ တားတယ်ပေါ့နော်။ မလုပ်ဖို့ တားတယ်ပေါ့နော်။ ကျနော်တို့ လုပ်ထုံး လုပ်နည်းတွေ ဘာတွေလည်း မရှိသေးတဲ့ အတွက် လုပ်လို့ မရဘူးလို့ တားတယ်။ ဒါပေမဲ့ ဒါဟာ ဆန္ဒပြတာ မဟုတ်ဘူး၊ ကျနော်တို့ ဆန္ဒကို ထုတ်ဖော်တာပေါ့နော်။ အဲဒီလို စကားလုံး ကိစ္စတွေ ပြောကြပြီး နောက်မှာတော့ သွားတဲ့ လမ်းကြောင်းလေးပဲ သိချင်ပါတယ်။ သွားတဲ့ လမ်းကြောင်းအတိုင်း သဘောတူပြီးတော့ အစောင့်အကြပ်နဲ့ပေါ့နော် လုံခြုံရေးတွေ ကလည်း ဘေးက လိုက်ပြီးတော့ ဘုရားအထိ လိုက်ရံပေးတာပေါ့။ အဲဒီလိုနဲ့ အခြေအနေက အေးအေးဆေးဆေးနဲ့ ပြီးသွားတဲ့ အနေအထားပါ။”

မြို့ခံလူထု ၁၀၀ ကျော်က စီတန်းလမ်းလျှောက်ပြီး လျှပ်စစ်မီး အချိန်ပြည့် ရရှိရေးအတွက် တောင်းဆိုကြသူတွေ အားလုံးရဲ့ ဆန္ဒကတော့ ပြည်တွင်းက စွမ်းအင် အရင်းအမြစ်ကို ပြည်သူတွေက ခံစားနိုင်ခွင့် ရရှိရေး ဖြစ်တယ်လို့လည်း ပြောပါတယ်။

"အဓိကကတော့ သူတို့က လျှပ်စစ်မီး အပြည့်အ၀ ရရှိရေးပါပဲ။ နောက်တခုကတော့ ဒီကနေ့ သတင်းစာမှာပါတဲ့ လျှပ်စစ် ၀န်ကြီးဌာနရဲ့ မေတ္တာ ရပ်ခံချက်ကလည်း ရှိနေတော့ သတင်းထောက် အများစုကတော့ ဒါနဲ့ ပတ်သက်ပြီးတော့ မေးတာပေါ့နော်။ မေးတော့ အဓိကက သူတို့ ၂ ချက်ပြောတယ်။ တချက်က ဘာလဲဆိုတော့ ဘယ်လိုပဲဖြစ်ဖြစ် ၂၄ နာရီ ရရမယ်ပေါ့နော်။ သူများကို ရောင်းနိုင်ရင် ဒီမှာလည်း ရရမယ် ဆိုတာကို သူတို့ ပြောပါတယ်။"

ဒါကတော့ မေလ ၂၂ ရက်နေ့ ညပိုင်းက ရန်ကုန်မြို့တော် ခမ်းမနဲ့ ဆူးလေဘုရား အနီးတ၀ိုက်မှာ လျှပ်စစ်မီး အချိန်ပြည့် ရဖို့အတွက် ရန်ကုန်မြို့ခံတွေ ဆန္ဒဖော်ထုတ် တောင်းဆိုတဲ့ အကြောင်းကို ကိုယ်တိုင် သတင်းသွားယူခဲ့တဲ့ သတင်းထောက် ကိုသီဟဆွေ ပြောပြခဲ့တာ ဖြစ်ပါတယ်။ ဒါဟာ ရန်ကုန်မှာ လျှပ်စစ်မီး အချိန်အပြည့်အ၀ ရဖို့အတွက် ပထမဆုံး ဆန္ဒဖော်ထုတ်မှု ဖြစ်ပြီးတော့ မန္တလေးမြို့မှာတော့ မေလ ၂၀ နဲ့ ၂၁ ရက် ၂ ရက်ကြာ အလားတူ ဆန္ဒဖော်ထုတ်မှုတွေလည်း ရှိခဲ့တာ ဖြစ်ပါတယ်။

Ref: VOA News

Read More...

Collapse...

မြစ်ဆုံစီမံကိန်း ပြန်စနိုင်ဖို့ တရုတ်ကြိုးပမ်းနေတယ်လို့ ကချင် ဖွံဖြိုးရေး အဖွဲ့ ပြောဆို

2012-05-21

တရုတ်အစိုးရပိုင် လျှပ်စစ်ဓာတ်အား ရင်းနှီးမြှုပ်နှံရေး ကော်ပိုရေးရှင်း (CPI) ဟာ သမ္မတ ဦးသိန်းစိန် လက်ထက်မှာ ယာယီ ရပ်ဆိ်ုင်းထားတယ် ဆိုတဲ့ ဧရာဝတီမြစ်ဆုံ ရေကာတာ စီမံကိန်း ပြန်သက်ဝင်လှုပ်ရှားဖို့ နိုင်ငံတကာ ရေကာတာကြီးများ တည်ဆောက်ရေး လုပ်ငန်း ICOLD (အိုင်ကိုးဒ်) အကူအညီ ရယူဖို့ ကြိုးပမ်းနေတယ်လို့ KDNG ကချင် ဖွံ့ဖြိုးတိုးတက်ရေး ကွန်ယက် အဖွဲ့က ဒီနေ့ ပြောကြား လိုက်ပါတယ်။

မြစ်ဆုံရေကာတာ စီမံကိန်းပြန်လည် စတင်နိုင်ဖို့ အိုင်ကိုးဒ်အဖွဲ့ကို တရုတ် (CPI) က ချဉ်းကပ်တာလို့ KDNG ထိုင်းနိုင်ငံ ချင်းမိုင်တာဝန်ခံ ဆိုင်းမိုင်က ပြောပါတယ်။

" ဒီမြစ်ဆုံရေကာတာကို Third Party အနေနဲ့ လေ့လာဖို့ ပေါ့နော်။ ဒီ ICOLD အိုင်ကိုးဒ်ပေါ့နော်၊ ဒီအဖွဲ့ကို သူတို့ ဖိတ်ခေါ်ထားတယ်။ မြန်မာ အစိုးရကနေ တောင်းဆိုလို့ လုပ်တယ်လို့ သူတို့ပြောထားတယ်"

CPI ပြောသလို မြန်မာ အစိုးရက ခုလို တိုက်တွန်းတာ ရှိမရှိ သီးခြား အတည်မပြုနိုင်သေးပါဘူး။ ပြင်သစ် အခြေစိုက် အိုင်ကိုး အဖွဲ့မှာ အဖွဲ့ဝင်နိုင်ငံ ၉၀ ရှိပြီး အဖွဲ့ ဥက္ကဋ္ဌဟာ တရုတ်နိုင်ငံသားဖြစ်ပြီး ဒီအဖွဲ့ဟာ ရေကာတာ ဆောက်လုပ်ရေး လုပ်ငန်းတွေ အတွက် အဓိက စည်းရုံး လှုပ်ရှားနေတာလည်း ဖြစ်ပါတယ်။

တရုတ်နိုင်ငံဟာ အိုင်ကိုးလ် အဖွဲ့ဝင်နိုင်ငံဖြစ်ပြီး အစိုးရပိုင် (CPI) ဟာ အိုင်ကိုးနဲ့ အတော်လေး နီးစပ်တယ်လို့ သိရပါတယ်။ (CPI) နဲ့ မူးယစ်ရာဇာ လောစစ်ဟန် ရဲ့သား ဦးထွန်းမြင့်နိုင်ပိုင် အေရှားလ်ဝေါလ် ကုမ္ပဏီက အကောင်အထည်ဖော်နေတဲ့ မြစ်ဆုံရေကာတာ စီမံကိန်းဟာ လုံးဝ လုံခြုံစိတ်ချရပြီိး အကျိုးကျေးဇူး ရှိတဲ့အကြောင်း သက်သေထူဖို့ အိုင်ကိုးလ်ဟာ ဧရာဝတီမြစ်ဆုံ ရေကာတာကို သီးခြား အလွတ်သဘော စစ်ဆေးနေတယ်လို့ တရုတ် သတင်းဌာနက ပြီးခဲ့တဲ့ သီတင်းပတ်မှာ သတင်းထုတ်ပြန်ထားတာ ရှိတယ်လို့လည်း KDNG က ပြောပါတယ်။

Ref: RFA News

Read More...

Collapse...

အလုပ်သမားပြဿနာ ဖြေရှင်းရေးကော်မတီဖွဲ့ဖို့ ၈၈ ကျောင်းသားများ တောင်းဆို

2012-05-21

မြန်မာနိုင်ငံမှာ လက်ရှိဖြစ်ပေါ်နေတဲ့ အလုပ်သမားရေး ပြဿနာတွေကို ကိုင်တွယ်ဖြေရှင်းနိုင်ရေး အတွက် နိုင်ငံတော် အစိုးရ အနေနဲ့ အလုပ်ရှင် အလုပ်သမား ပဋိပက္ခဖြေရှင်းရေး ကော်မတီ တစ်ရပ် အမြန်ဆုံးဖွဲ့စည်း ဆောင်ရွက်ပေးဖို့ ၈၈ မျိုးဆက် ကျောင်းသားခေါင်းဆောင်တွေက တိုက်တွန်း တောင်းဆို လိုက်ပါတယ်။

ကိုမင်းကိုနိုင်၊ ကိုဌေးကြွယ်၊ ကိုမြအေး အပါအ၀င် ၈၈ မျိုးဆက် ကျောင်းသားများအဖွဲ့က ဒီကနေ့ လှိုင်သာယာမြို့နယ် ဆန္ဒပြ စက်ရုံတွေက အလုပ်အမားတွေနဲ့ တွေ့ဆုံပြီးနောက် အလုပ်သမားတွေရဲ့ အခွင့်အရေး အတွက် အခုလို တောင်းဆိုလိုက်တာပါ။ ကိုမင်းကိုနိုင်က အခုလိုပြောပါတယ်။

" ကျွန်တော်တို့ကတော့ အလုပ်သမားဘက်က၊ အလုပ်ရှင်ဘက်ကရယ်လို့ ဆိုလိုတာ မဟုတ်ဘူး။ ဒီ ပြဿနာတွေကို ဖြေရှင်းပေးနိုင်စွမ်း ရှိဖို့ လိုတယ်ဗျ။ အထူးသဖြင့် အလုပ်သမားရေးရာ ဝန်ကြီးဌာနကနေပြီးတော့ ဒီကိစ္စကို အခြေခံလစာ သတ်မှတ်ပေးတာက အစ ကိုင်တွယ်ဖြေရှင်း သင့်တယ်။ နို့မဟုတ်ရင် ကျွန်တော်တို့ တောင်းပွဲ၊ တိုက်ပွဲတွေကနေ တဆင့် မတည်ငြိမ်မှုတွေ ဖြစ်လာလို့ရှိရင် အားလုံး တည်ဆောက်ထားတဲ့ အခြေအနေတွေ ပျက်ဆီး သွားမှာကိုလည်း ကျွန်တော်တို့ မလိုလားဘူး။ စိုးရိမ်ပူပန်မှုတွေလည်း ရှိပါတယ်။ ဒါကြောင့် ငြိမ်းငြိမ်းချမ်းချမ်းနဲ့ အားလုံးဖြေရှင်းနိုင်ဖို့ အတွက် ကျွန်တော်တို့ သာမန်ပြည်သူတွေ အပါအဝင် စ်ိတ်ဝင်စားတဲ့၊ ရတဲ့အချိန်မှာ ဒီကိစ္စကို အစိုးရ အဖွဲ့က၊ တိုင်းဒေသကြီး အစိုးရက မဖြေရှင်း နိုင်ရင်လည်း ပြည်ထောင်စု အစိုးရ အဆင့်ပေါ့လေ၊ ငြိမ်းငြိမ်းချမ်းချမ်း ဝင်ပြီးဖြေရှင်းပေးဖို့ လိုပြီလို့ ကျွန်တော်တို့ မြင်ပါတယ်"

၈၈ မျိုးဆက် ကျောင်းသားများအနေနဲ့ အလုပ်သမား ပဋိပက္ခဖြေရှင်းရေး ကော်မတီတစ်ရပ် ပေါ်ပေါက်ရေး အတွက် သက်ဆိုင်ရာ အစိုးရ အဖွဲ့အစည်း အသီးသီးကို တင်ပြတောင်းဆို သွားမယ်လို့လည်း ၈၈ မျိုးဆက် ကျောင်းသားခေါင်းဆောင် ကိုမင်းကိုနိုင်က ပြောပါတယ်။

အလုပ်သမားတွေ အနေနဲ့လည်း မိမိတို့ ရပိုင်ခွင့်တွေအတွက် တောင်းဆိုရာမှာ အကြမ်းမဖက်ဘဲ ငြိမ်းချမ်းတဲ့နည်းနဲ့ ညီညီညွတ်ညွတ် ဆောင်ရွက်ကြဖို့ တိုက်တွန်း ခဲ့တယ်လို့လည်း ဆိုပါတယ်။

၈၈ မျိုးဆက် ကျောင်းသားခေါင်းဆောင်များ အဖွဲ့နဲ့အတူ၊ မြန်မာနိုင်ငံ လူငယ်များအစည်းအရုံး၊ ဗမာနိုင်ငံလုံးဆိုင်ရာ ကျောင်းသား သမဂ္ဂများ အဖွဲ့ချုပ်နဲ့ မျိုးဆက်သစ် လူငယ်များ အစည်းအရုံး Generation Wave စတဲ့ အဖွဲ့အစည်း အသီးသီးက လူငယ်အဖွဲ့ဝင်တွေလည်း ဆန္ဒပြ အလုပ်သမားတွေနဲ့ တွေ့ဆုံပြီး အလုပ်သမား အခွင့်အရေးအတွက် ကူညီတိုက်တွန်း တောင်းဆိုသွားမှာ ဖြစ်ကြောင်း ပြောကြားခဲ့တယ်လို့ သိရပါတယ်။

လှိုင်သာယာ စက်မှုဇုန် စက်ရုံ ၆ ရုံက အလုပ်သမားတွေဟာ အခြေခံလုပ်ခလစာ တိုးမြှင့်ရေးအတွက် ပြီးခဲ့တဲ့ သီတင်းပတ်တွေက စပြီး နေ့စဉ်လို ဆန္ဒပြ တောင်းဆိုနေခဲ့ကြပါတယ်။ အလုပ်ရှင်နဲ့ အလုပ်သမားတွေကြား အလုပ်သမားရေး ၀န်ကြီးဌာနက ၀င်ရောက်ညှိနှိုင်း ဆောင်ရွက်ခဲ့ပေမဲ့ ပြေလည်မှု မရရှိသေးပါဘူး။

Ref: RFA News

Read More...

Collapse...

ဒေါက်တာဦးမြင့်၏ “ရန်ကုန်တက္ကသိုလ်ရဲ့ အစဉ်အလာ ဂုဏ်သိက္ခာကို ပြန်လည်တည်ဆောက်ရေး ပြည်သူသို့ အိတ်ဖွင့်ပေးစာ”

Dr. U Myint's Open Letter

Read More...

Collapse...