ဝိမုတ္တိ

Wednesday, December 3, 2008

ထိုင်း တရားရုံးချုပ်က ထိုင်းဝန်ကြီးချုပ်၏ ပါတီကို ဖျက်သိမ်း

ထိုင်းနိုင်ငံ တရားရုံးချုပ်က လက်ရှိ ထိုင်းဝန်ကြီးချုပ်၏ ပြည်သူ့စွမ်းအား (ပီပီပီ) ပါတီ အပါအဝင် ပါတီသုံးခုကို ဖျက် သိမ်းလိုက်ပြီး ဝန်းကြီးချုပ် ဆုံချိုင်းဝမ်စဝတ်နှင့် ၎င်းပါတီ၏ ခေါင်းဆောင်များကို နိုင်ငံရေးလုပ်ခွင့် ၅ နှစ် ပိတ်ပင်လိုက် ကြောင်း ယခု မွန်းလွဲပိုင်းတွင် စီရင်ချက်ချမှတ်လိုက်သည်။

ယမန်နေ့က ချင်းမိုင်ခရိုင်ရှိ ဗုဒ္ဓဘာသာ ဘုရားကျောင်း တခုတွင် တွေ့ရသော
ထိုင်းဝန်ကြီးချုပ် ဆုမ်ချိုင်း ၀မ်စ၀တ် (ဓာတ်ပုံ - အေပီ)

အေးချမ်းမြေ့
REF: ဧရာဝတီ

၂၀၁၀ ရွေးကောက်ပွဲအတွက် ရပ်ကွက်အဆင့် သင်တန်းများ ပို့ချ

စစ်အစိုးရက လာမည့် ၂၀၁၀ ရွေးကောက်ပွဲအတွက် လူဦးရေစာရင်းများ ပြန်လည်စိစစ် ကောက်ခံခြင်းနှင့် အောက်ခြေ အဆင့် ရပ်ကွက်အာဏာပိုင်များကို စီမံခန့်ခွဲရေးနှင့် အုပ်ချူပ်ရေးသင်တန်းများ ပို့ချခြင်းများ စတင် ဆောင်ရွက်နေ ကြောင်း ရန်ကုန်မြို့ခံများ၏ ပြောဆိုချက်အရ သိရှိရသည်။

လာမည့် ၂၀၁၀ ရွေးကောက်ပွဲတွင် မဲပေးကြမည့် လူဦးရေ စာရင်းများကို ပြန်လည် စိစစ်သည့်အနေဖြင့် ရန်ကုန် အပါအ၀င် မြို့ပြဒေသ ကြီးများတွင် ယခုနှစ် နိုဝင်ဘာ လကုန်မှစပြီး လူဦးရေ စာရင်းများ စတင်ကောက်ခံနေကြောင်း ရန်ကုန်တိုင်း လှိုင်မြို့နယ်အေးချမ်းသာယာရေးနှင့် ဖွံ့ဖြိုးရေးကောင်စီမှ တာဝန်ရှိသူတဦးက ပြောသည်။

လမ်းပြမြေပုံအတိုင်း ၂၀၁၀ ရွေးကောက်ပွဲကို ကျင်းပပြုလုပ်သွားမည်ဆိုသည့်
စစ်အစိုးရ ခေါင်းဆောင် ဗိုလ်ချုပ်မှူးကြီး သန်းရွှေ (ဓာတ်ပုံ - အေအက်ဖ်ပီ)

အောင်သက်ဝိုင်း
REF: ဧရာဝတီ

Tuesday, December 2, 2008

အရေးနိမ့်ခဲ့ရသော မြန်မာ့ အကြမ်းမဖက် တော်လှန်ရေး (အပိုင်း ၂) - နော်မန် ရိုဘက်စ် စပီရီ

အယ်လ်ဘတ် အိန်းစတိန်း အင်စတီကျု အဖွဲ့ (The Albert Einstein Institute) ၏ အင်တာနက် ၀က်ဘ်ဆိုက် စာမျက်နှာတွင် "အကြမ်းမဖက် လှုပ်ရှားမှုကြောင့် မြန်မာ၊ တရုတ်၊ တိဘက် ဒေသတို့တွင် အုပ်ချုပ်နေသည့် အာဏာ ရှင် စနစ်များ၊ ကျုးကျော် သိမ်းပိုက်ထားမှုများကို နိဂုံးချုပ်ပစ်နိုင်ခြင်း မရှိသေးသော်လည်း ဤအစိုးရများ၏ ရက်စက် ကြမ်းကြုတ်မှု သဘောသဘာဝကို ကမ္ဘာက သိရှိအောင် ဖော်ထုတ် ဖွင့်ချနိုင်ခဲ့သည်။ ဤ အကြမ်းမဖက် တော်လှန်ရေး ၏ တန်ဖိုးမဖြတ်နိုင်သည့် အတွေ့အကြုံများကို လူအများသို့ ထောက်ပံ့ပေးနိုင်ခဲ့သည်" ဟု ဖော်ပြထားသည်။

REF: ဧရာဝတီ

မော်လမြိုင် အမှတ် (၁) ဈေးကြီး မီးလောင်ပြာကျ

မွန်ပြည်နယ် မော်လမြိုင်မြို့၏ အစည်ကားဆုံးဈေးကြီးဖြစ်သည့် အမှတ် (၁) ဈေးကြီးသည် ဒီဇင်ဘာ (၁) ရက်နေ့ ညနေပိုင်းက လောင်ကျွမ်းသည့်မီးကြောင့် ဈေးတခုလုံးပြာကျသွားသည်။

ဈေးဆိုင်ပိုင်ရှင်တဦးက “တနင်္လာနေ့ဈေးသိမ်းပြီး ညနေ (၅) နာရီခွဲလောက်က စလောင်တာ၊ ဈေးရဲ့ အနောက်ဘက် ခြမ်း ရေပေါ်ဈေး စားသောက်ဆိုင်တန်းဘက်က စလောင်တာပါ။ ဘာကြောင့် လောင်သလဲတော့ မသိရသေးဘူး” ဟု ပြောသည်။

ဈေးသိမ်းချိန် အလင်းရောင်ရှိသေးသည့်အတွက် မီးလောင်ပြီးမကြာခင် ဈေးဆိုင်ပိုင်ရှင်အချို့ရောက်လာပြီး ပစ္စည်းများ သယ်ထုတ်နိုင်သော်လည်း ဆိုင်ခန်းအများစုမှာ မီးထဲပါသွားသည်။ မကြာခင် မီးသတ်ကားများ ရောက်လာသော်လည်း ဈေးထဲကားဝင်မရခြင်း၊ မီးစတင်လောင်သည့်နေရာမှာ လောင်စာပစ္စည်းများ ထားသိုရာဖြစ်ခြင်း၊ လေကြမ်းနေခြင်း စ သည့် အချက်များကြောင့် ည (၁၀) နာရီကျော် ဈေးတခုလုံးပြာကျပြီးမှ မီးငြိမ်းသွားသည်။

ရပ်ဝေးနေ ဆိုင်ပိုင်ရှင်များ မီးလောင်ရာသို့ အချိန်နှောင်းမှ ရောက်လာပြီး ပစ္စည်းများဆုံးကုန်သည့်အတွက် လမ်းဘေး မှာ ထိုင်ငိုယိုနေသူလည်း အများအပြားရှိသည်ဟု မျက်မြင်သက်သေများက ပြောသည်။ မီးလောင်သည့် အမှတ်(၁) ဈေးသည် ထိုင်းနိုင်ငံမှ သွင်းလာသည့် စားသောက်ကုန်၊ အချိုရည်၊ အထည်အလိပ် စသည့်ကုန်စည်များ လက်ကား သိုလှောင်ရာ ဈေးကြီးဖြစ်သည့်အတွက် ဆုံရှုံးမှုပမာဏမှာ သိန်းပေါင်း ထောင်နှင့်ချီနိုင်သည်ဟု မြို့ခံများက ပြော သည်။

ဈေးမီးကြောင့် ဖက်တန်းရပ်၊ အောက်လမ်းမကြီး တိုက်တန်းများ၊ သထုံတံတားလမ်းမှ တိုက်တန်းများ အန္တရာယ်ရှိခဲ့ သော်လည်း လမ်းခြားထားသည့်အတွက် မီးကူးစက်လောင်ကျွမ်းခြင်းမရှိဟု စုံစမ်းသိရသည်။

မီးလောင်ကျွမ်းနေစဉ်အတွင်း မော်လမြိုင်တောင်ရိုးတန်းဘက်မှာ သီတင်းသုံးတော်မူသည့် သံဃာတော်များ ရောက် လာပြီး ဈေးသူဈေးသားများ၏ ကုန်ပစ္စည်းများကို မီးလွတ်ရာရောက်အောင် ကူညီသယ်ယူပေးခဲ့ကြောင်း မျက်မြင် သက်သေများက ပြောသည်။

အဆိုပါဈေးသည် ၁၉၈ဝ ဝန်းကျင်က တကြိမ် မီးလောင်ကျွမ်းခဲ့ပြီး ဈေးဧရိယာတဝက်ခန့် မီးလောင်ပြာကျခဲ့ဖူးသည်။ ၁၉၈၈ အရေးအခင်းနောက်ပိုင်း နဝတ စစ်အစိုးရလက်ထက်မှာ ယခု မီးလောင်ကျွမ်းသွားသည့် တထပ်ဈေးအဖြစ် ပြန်လည်တည်ဆောက်ပြီး မူလဈေးဆိုင်ပိုင်ရှင်များကို ပြန်လည်နေရာချထားပေးခဲ့ခြင်း ဖြစ်သည်။

မြို့ခံတဦးက “ဒီဈေးကို နဝတ၊ နအဖ စစ်အစိုးရလက်ထက် အရှေ့တောင်တိုင်းစစ်ဌာနချုပ် တိုင်းမှူးအဆက်ဆက်နဲ့ အလိုတော်ရိ စီးပွားရေးသမားတွေ ပူးပေါင်းပြီး ဈေးကိုဖျက်ကာ ဈေးအသစ်ပြန်ဆောက်ပြီး ဆိုင်ခန်းတွေ ရောင်းစား၊ ကိုယ်ကျိုးစီးပွားရှာဖို့ နည်းပေါင်းစုံနဲ့ အကြိမ်ကြိမ် ကြိုးစားခဲ့ဖူးပါတယ်။ ဒါပေမယ့် ဈေးဟာ စစ်အစိုးရလက်ထက် ဆောက်ထားတဲ့ ဈေးဖြစ်နေတာ၊ ဈေးသူဈေးသားတွေက အကြီးအကျယ် ဆန့်ကျင်ခဲ့တာကြောင့် ဖျက်သိမ်းခြင်း မခံခဲ့ ရတာ ဖြစ်ပါတယ်” ဟု ပြောသည်။

၂ဝဝဝ ပြည့်နှစ်မတိုင်ခင်၌ ဈေးကော်မတီဝင်များက ဈေးကိုဖျက်သိမ်းခြင်း မပြုရန် ရန်ကုန်ရှိ စစ်အစိုးရ ထိပ်ပိုင်း အာဏာပိုင်များအထိ သွားရောက်ပြီး အသနားခံ တင်ပြခဲ့ဖူးသည်။

REF: ခေတ်ပြိုင်

ထောင်ဒဏ်နှစ်ရှည်ချမှတ်ခံရသူများတွင် အကောင်းဆုံးမြေသြဇာလူငယ်အဖွဲ့ဝင်များလည်းပါ

ပြီးခဲ့သည့်ရက်များအတွင်း ပြည်တွင်းဒီမိုကရေစီရေးလှုပ်ရှားသူ လူငယ်များဖြင့် ပေါင်းစပ်ဖွဲ့စည်းထားသည့် “အကောင်း ဆုံးမြေသြဇာ” ဟု နာမည်တပ်ထားသောအဖွဲ့မှ ကြေညာချက်တစောင်ထုတ်ပြန်ခဲ့ပြီး ထောင်ဒဏ်နှစ်ရှည် ချမှတ်ခံရ သူများထဲတွင် ၎င်းတို့အဖွဲ့ဝင်များလည်း ပါဝင်ခဲ့သည်ဟု ဖော်ပြထားသည်။

အဆိုပါအဖွဲ့သည် ပြည်တွင်းမှ ဒီမိုကရေစီရေးတက်ကြွလှုပ်ရှားသူများဖြင့် ပေါင်းစပ်ဖွဲ့ စည်း ထားသည့်အဖွဲ့ဖြစ်သည်။

“(၂၅-၁၁-၀၈) ရက်နေ့မှာ ကျနော်တို့ လူထုတရပ်လုံးအတွက် စတေးခံ အကောင်းဆုံးမြေသြဇာအဖွဲ့မှ ရဲဘော်(၃) ဦး ဖြစ်တဲ့ ကိုဇင်မင်းရှိန် (၂၅) နှစ်၊ ကိုတေဇာစိုး(၂၂) နှစ်၊ ကိုထွန်းလင်းအောင် (၂၀) နှစ်၊ လှိုင်သာယာမြို့နယ် (၉) ရပ်ကွက်မှာ နေထိုင်တဲ့သူတွေကို မတရားတဲ့ပုဒ်တွေတပ်ကာ ထောင်ချခဲ့ပါတယ်” ဟု အဆိုပါမြေသြဇာအဖွဲ့မှ အမည် မဖော်လိုသူ လူငယ်တဦးမှ ခေတ်ပြိုင်သို့ ပြောကြားသည်။

“ကျနော်တို့အဖွဲ့ဝင်တွေကို ၂၀၀၆ မတ်လမှာတကြိမ် နှစ်ရှည်ထောင်ဒဏ်တွေ ချမှတ်တာ၊ အခု ၂၀၀၈ နိုဝင်ဘာမှာ တကြိမ် နှစ်ရှည်ထောင်ဒဏ်တွေ ချမှတ်တာနဲ့ ပတ်သက်လို့ အဖွဲ့ဝင်လူငယ်တွေဟာ မိမိတို့ ရဲ့မွေးရာပါအခွင့်အရေး တွေကို အကြောက်တရား ဘေးဖယ်ထားပြီး ပြည်သူလူထုတရပ်လုံး ပါဝင်လာဖို့ စတေးခံ စည်းရုံးခြင်း၊ နအဖ စစ် အာဏာရှင်အစိုးရအား မကြိုက်ခြင်း၊ ရွံမုန်းခြင်း၊ မနှစ်မြို့ခြင်းများအား၊ ကဗျာများ၊ စာရွက်စာတမ်းများနှင့် ကျန်လှုပ်ရှား မှု အမျိုးမျိုးတို့ဖြင့် ထုတ်ဖော်ပြသတာတွေကို လှုပ်ရှားဆောင်ရွက်ခဲ့ပါတယ်” ဟု အဆိုပါ အမည်မဖော်လိုသူလူငယ်မှ ဆက်လက်ပြောကြားသည်။

အကောင်းဆုံးမြေသြဇာအဖွဲ့ ကြေညာချက်၌ ဒေါ်အောင်ဆန်းစုကြည် အပါအ၀င် နိုင်ငံရေးအကျဉ်းသားများအား ခြွင်းချက်မရှိ အမြန်ဆုံးပြန်လွှတ်ရန်လည်း တောင်းဆိုထားသည်။ ဖမ်းဆီးထောင်ချရုံနှင့် လူငယ်များ၏ လှုပ်ရှားမှု ရပ်တန့်သွားမည် မဟုတ်ကြောင်းလည်း ဖော်ပြထားသည်။

မူရင်းထုတ်ပြန်ကြေညာချက်

(နေ့စွဲ၊ ၂၇-၁၁-၀၈)
အကြောင်းအရာ။ သတိပေး ထုတ်ပြန်ကြေညာချက်
(၂၅-၁၁-၀၈) ရက်နေ့တွင် ကျွန်ုပ်တို့ လူထုတရပ်လုံးအတွက် စတေးခံ အကောင်းဆုံးမြေသြဇာအဖွဲ့မှ ရဲဘော် (၃) ဦး ဖြစ်သည့် ကိုဇင်မင်းရှိန် (၂၅) နှစ်၊ ကိုတေဇာစိုး (၂၂) နှစ်၊ ကိုထွန်းလင်းအောင် (၂၀) နှစ် လှိုင်သာယာမြို့နယ် (၉) ရပ်ကွက်တွင် နေထိုင်သူများကို မတရားပုဒ်မတွေတပ်ပြီး ထောင်ဒဏ် (၁၃) နှစ် ချမှတ်လိုက်ခြင်းအား ကျွန်ုပ်တို့အဖွဲ့က သန်းရွှေဦးဆောင်သော နအဖစစ်အုပ်စုအား ပြင်းထန်စွာ ပြစ်တင်ရှုတ်ချသည်။

ကျွန်ုပ်တို့အဖွဲ့ဝင်များအား ၂၀၀၆ မတ်လတွင်တကြိမ် နှစ်ရှည်ထောင်ဒဏ်များ ချမှတ်ခြင်း၊ ယခု ၂၀၀၈ နိုဝင်ဘာတွင် တကြိမ် နှစ်ရှည်ထောင်ဒဏ်များ ချမှတ်ခြင်းနှင့် စပ်လျဉ်းပြီး အဖွဲ့ဝင်လူငယ်များသည် မိမိတို့၏ မွေးရာပါအခွင့်အရေး များကို အကြောက်တရားများ ဘေးဖယ်ထားပြီး ပြည်သူလူထုတရပ်လုံး ပါဝင်လာရန် စတေးခံစည်းရုံးခြင်း၊ နအဖ စစ်အာဏာရှင်အစိုးရအား မကြိုက်ခြင်း၊ ရွံမုန်းခြင်း၊ မနှစ်မြို့ခြင်းများအား ကဗျာများ၊ စာရွက်စာတမ်းများနှင့် ကျန်လှုပ်ရှားမှုအမျိုးမျိုးတို့ဖြင့် ထုတ်ဖော်ပြသခြင်းများအား ယခုကဲ့သို့ ထောင်ဒဏ်နှစ်ရှည်များ ချမှတ်ရန်မလိုအပ်ပါ။ ဒီ လူငယ်တွေကို ထောင်ဒဏ်နှစ်ရှည်ချမည့်အတူတူ မိမိတို့လုပ်ဆောင်နေသော လုပ်ရပ်များသည် မှန်သည်/မှားသည် စဉ်းစားပြီး အရှက်ရှိ၊ လူကြီးလူကောင်းပီသစွာဖြင့် ဖြေရှင်းသင့်သည်။ ထို့ကြောင့် နအဖ စစ်အာဏာရှင်လူတစုအား ကျွန်ုပ်တို့အဖွဲ့မှ စိမ်ခေါ်သတိပေးလိုက်သည်။

ဒေါ်အောင်ဆန်းစုကြည်အပါအ၀င် နိုင်ငံရေးအကျဉ်းသားများအား ခြွင်းချက်မရှိ အမြန်ဆုံး ပြန်လွှတ်ပေးပါ။ ယခုကဲ့သို့ ဖမ်းဆီးထောင်ချ နှိပ်စက်နေရုံနှင့် ကျွန်ုပ်တို့မြန်မာပြည်လွတ်မြောက်အောင်၊ တိုးတက်အောင် နအဖ စစ်အာဏာရှင် အား ဖယ်ရှားနေသူ လူငယ်များသည် ရပ်မသွားပါ၊ ကုန်မသွားပါ။ နအဖစစ်အာဏာရှင်တစုအနေနှင့် တကမ္ဘာလုံးက လေးစားတန်ဖိုးထားသည့် သံဃာတော်များအား ပစ်သတ်ခြင်း၊ မိဘတွေရဲ့ရင်နှစ်သည်းချာ ကျောင်းသား/သူများအား ပစ်သတ် နှိပ်စက် ရိုက်နှက်၊ ဖမ်းဆီး၊ ထောင်ချခြင်းများနှင့်စာလျှင် ကျွန်ုပ်တို့အဖွဲ့မှ မည်သည့်နည်းနာနှင့်မဆို တော်လှန်တိုက်ခိုက်ဖယ်ရှားသည်မှာ မှန်ကန်တယ်လို့ ယူဆသည့်အတွက် ယနေ့အချိန်မှ စတင်ပြီး နအဖစစ်အာဏာ ရှင်အား နည်းလမ်းပေါင်းစုံဖြင့် ရသလို အရှိန်မြှင့်သထက်မြှင့်ပြီး တော်လှန်ဖယ်ရှားသွားမှာဖြစ်ကြောင်း အသိပေးသည်။

မည်သည့်စစ်အာဏာရှင်မှ လူထုကို မအုပ်ချုပ်စေရ။

မြင့်မိုးဇော်
REF: ခေတ်ပြိုင်

နိုင်ငံရေးအကျဉ်းသားများကို နယ်ထောင်များသို့ပြောင်းရွှေ့

အင်းစိန်ထောင်က ထောင်ဒဏ်နှစ်ရှည်များချမှတ်ခဲ့သည့် ဇိုမီးအမျိုးသားကွန်ဂရက် ဥက္ကဋ္ဌ ဦးပူကျင့်ရှင်းထန်၏ သားဖြစ် သူ ကမ်လမ်ခုပ် ခေါ် ကိုကျော်စိုးနှင့် တူဖြစ်သူ ကပ်ခန့်ခွာလ်တို့နှစ်ဦးကို ယခင်လ (၂၉) ရက်နေ့က နယ်ထောင်များသို့ ပြောင်းရွှေ့လိုက်ကြောင်း ဦးပူကျင့်ရှင်းထန်က ခေတ်ပြိုင်သို့ပြောသည်။

ဦးပူကျင့်ရှင်းထန်က “ကျနော့်သားကတော့ မြောင်းမြ။ ကျနော့်တူကတော့ ပုသိမ်။ စနေနေ့ (၂၉) ရက်နေ့မှာပို့တယ်။ အင်းစိန်ထောင်မှာ သားတွေက ထောင်ဝင်စာပို့တော့ ဒီမှာ မရှိတော့ဘူးတဲ့။ ပုသိမ်တို့၊ မြောင်းမြတို့ကတော့ အသံဘာမှ မလာသေးဘူးလေ။ ကျနော်တို့လည်း မသွားနိုင်သေးဘူး။ သားနဲ့ တူအတွက် အယူခံရှေ့နေပါဝါပေးဖို့၊ လက်မှတ်ထိုး ခိုင်းဖို့ လည်း အစီအစဉ်ရှိတယ်” ဟု ပြောသည်။

အင်းစိန်ထောင်မှ ထောင်အပြောင်းအရွှေ့နှင့် စီရင်ချက်ချမှတ်မှုများကို ယခင်ကနှင့်မတူဘဲ မိသားစုများကိုယ်တိုင် သွားရောက်စုံစမ်းမှသာ သိခွင့်ရသဖြင့် သားနှင့် တူဖြစ်သူတို့၏ အမှုတွဲ ကိုတင်ထွန်းအောင်အား မည်သည့်ထောင်သို့ ပို့သည်ကို သေချာမသိကြောင်း ဦးပူကျင့်ရှင်းထန်က ပြောသော်လည်း အင်းစိန်ထောင်နှင့် နီးစပ်သူများကမူ ကိုတင်ထွန်းအောင်ကို ခန္တီးထောင်သို့ အဆိုပါနေ့ကပင် ပို့လိုက်ပြီဖြစ်ကြောင်း ပြောသည်။

ထို့အပြင် ထောင်ဒဏ် (၆၈) နှစ်ချခံရသော မြန်မာနိုင်ငံလုံးဆိုင်ရာသံဃာ့တပ်ပေါင်းစု ဦးဆောင်ဆရာတော် အသျှင် ဂမ္ဘီရကို ခန္တီးထောင်၊ နောင်တော် ကိုအောင်ကျော်ကျော်ကို တောင်ကြီးထောင်၊ ၎င်းတို့၏အမှုတွဲ မန္တလေးမှ ကိုဝဏ္ဏ အောင်ကို ပဲခူးထောင် စသည်ဖြင့် ယနေ့မနက်တွင် အသီးသီးပြောင်းရွှေ့လိုက်ကြောင်း အင်းစိန်ထောင် နှင့်နီးစပ်သူ များက ပြောသည်။

ယခင်လ (၂၈) ရက်နေ့ကလည်း မြန်မာနေးရှင်းဂျာနယ် အယ်ဒီတာချုပ် ဦးသက်ဇင်နှင့် မန်နေဂျာဖြစ်သူ ဦးစိန်ဝင်း မောင်တို့နှစ်ဦးကို တရားမ၀င်ပုံနှိပ်ထုတ်ဝေမှုဖြင့် ထောင်ဒဏ် (၇) နှစ်စီချမှတ်လိုက်ပြီး ၈၈ မျိုးဆက်ကျောင်းသားများ အဖွဲ့မှ (၁၃) ဦးကို နိုင်ငံတော်ငြိမ်ဝပ်ပိပြားရေးထိခိုက်စေမှုဖြင့် ထောင်ဒဏ် (၆) နှစ်စီ ချမှတ်လိုက်ကြောင်း အင်းစိန် ထောင်နှင့် နီးစပ်သူများက ပြောသည်။

ထောင်ဒဏ်ချမှတ်ခံရသူ ၈၈ မျိုးဆက်ကျောင်းသားများမှာ ကိုသိန်းသန်းထွန်း၊ ကိုဇော်သက်ကိုကို၊ ကိုချစ်ကိုလင်း၊ မလေးလေးမွန်၊ မနိုဘဲလ်အေး၊ မနိုးနိုး၊ မသရဖီသိမ့်သိမ့်ထွန်း၊ မအေးသီတာ၊ ကိုသော်ဇင်ထွန်း၊ ကိုကြည်သန်း၊ စောမျိုးမင်းလှိုင်၊ ကိုအောင်သိုက်စိုး၊ ဒေါ်စန်းစန်းတင်တို့ဖြစ်ပြီး ၎င်းတို့အား ယခင်ကလည်း ထောင်ဒဏ် (၃) နှစ်မှ (၅) နှစ်အတွင်း ချမှတ်ထားပြီးဖြစ်ကြောင်း သိရသည်။

ယခုအခါ နအဖစစ်အာဏာပိုင်များက ၈၈ မျိုးဆက်ကျောင်းသားခေါင်းဆောင်များ၊ ရဟန်းသံဃာများ၊ အန်အယ်လ်ဒီ ပါတီဝင်များ၊ ဒီမိုကရေစီထောက်ခံလှုပ်ရှားသူများကို ထောင်ဒဏ်များ အလျင်အမြန်ချမှတ်လျက်ရှိပြီး မိသားစုများနှင့် ဝေးရာထောင်များသို့ ပြောင်းရွှေ့လျက်ရှိသည်။

သို့သော် ထောင်ပြောင်းရွှေ့ခံရသူ ၈၈ မျိုးဆက်ကျောင်းသားများ၏ မိသားစုအချို့က ထောင်ပြောင်းခံရသူများသည် ပြောင်းရွှေ့ခံရသည့် ထောင်များသို့ အမှန်တကယ် ရောက်ရှိခြင်း ရှိမရှိ စုံစမ်းရာ သက်ဆိုင်ရာထောင်တာဝန်ရှိသူများက ပြန်လည်ဖြေ ကြားခြင်းမရှိကြောင်း အဆိုပါ မိသားစုဝင်များထံမှ သိရသည်။

ကိုဝိုင်း
REF: ခေတ်ပြိုင်

ဒီတခါ နက္ခတ်စုံရင်တော့ ပြန်ဆုံကြရအောင်ဒေလီယာ

ပြန်သောက်မိတဲ့စီးကရက်တွေကလည်း
ငယ်ငယ်တုန်းက
စီးကရက်တွေမဟုတ်တော့ဘူး

ပြန်ထိုင်မိတဲ့
လဘက်ရည်ဆိုင်တွေကလည်း
ငယ်ငယ်တုန်းက လဘက်ရည်ဆိုင်တွေ
မဟုတ်တော့ဘူး

ပြန်နားထောင်မိတဲ့ သီချင်းတွေကလည်း
ငယ်ငယ်တုန်းက
သီချင်းတွေ မဟုတ်တော့ဘူး

ပြန်ပေါင်းမိတဲ့ သူငယ်ချင်းတွေကလည်း
ငယ်ငယ်တုန်းက
သူငယ်ချင်းတွေမဟုတ်တော့ဘူး

သစ်ကောင်းအိမ်
REF: မတ်လ၊ ၂၀၀၆၊ အမှတ် (၇၁)၊ မိုးကြိုးသတင်းစဉ်

တတိယလှိုင်းခေတ် ပြောက်ကျားစစ် (၂) - ဂါမဏိ

၂ဝဝ၃ ဇွန်လ၊ ၂၄ ရက်မှာ အမေရိကန်သမတဘွတ်ရ်ှက အယ်လ်ကေဒါခေါင်းဆောင်ပိုင်းဟာ လုံးဝနီးနီး အစွယ် ကျိုးသွားပြီလို့ ကြေညာခဲ့ပါတယ်။ ဘင်လာဒင်ကို မဖမ်းမိသေးပေမဲ့ အမေရိကန်ကိုရော၊ ကမ္ဘာကိုပါ အန္တရာာယ် ပေးနိုင်တဲ့ အနေအထားမရှိတော့ဘူးလို့လည်း ဆက်ပြောခဲ့ပါတယ်။ ဥရောပတိုက်နဲ့ အရှေ့အလယ်ပိုင်းက ဗုံးခွဲမှု တွေဟာ ဘင်လာဒင်ကြောင့်မဟုတ်ဘဲ ဒေသခံစစ်သွေးကြွတွေကြောင့်သာ ဖြစ်ခဲ့တယ်လို့ သုံးသပ်ခဲ့ပါတယ်။

REF: အတွဲ (၁)၊ အမှတ် (၇)၊ အောက်တိုဘာ ၂၀၀၈၊ ဒေါင်းအိုးဝေ

နိုဝင်ဘာလအတွင်းက ယုံကြည်ချက်ကြောင့် မတရားစီရင်ခံရသူ ၂၁၅ ဦးရှိ

မြန်မာစစ်အစိုးရဟာ နိုဝင်ဘာလအတွင်း အနည်းဆုံး ယုံကြည်ချက်ကြောင့် အကျဉ်းကျနေသူ ၂၁၅ ဦးကို မတရားစီရင်ကာ အပြစ်ပေးလိုက်ကြောင်း ထိုင်း မြန်မာနယ်စပ် အခြေစိုက် နိုင်ငံရေးအကျဉ်းသားများ ကူညီစောင့် ရှောက်ရေးအဖွဲ့ (မြန်မာနိုင်ငံ) က ၂၀၀၈ ခု ဒီဇင်ဘာလ ၁ ရက်နေ့မှာ သတင်းထုတ်ပြန်လိုက်ပါတယ်။

၂၀၀၇ ခုနှစ် သြဂုတ်လနဲ့ စက်တင်ဘာလတွေမှာ ဖြစ်ပွားခဲ့တဲ့ လှုပ်ရှားမှုများနဲ့ပတ်သက်ပြီး မြန်မာစစ်အစိုးရဟာ ၂၀၀၇ ခုနှစ် အောက်တိုဘာ ၈ ရက်နေ့က စတင်စစ်ဆေးမှုတွေပြုလုပ်ခဲ့ကြောင်း၊ ထိုအချိန်ကစတင်ပြီး ဒီကနေ့အ ထိ ယုံကြည်ချက်ကြောင့် အကျဉ်းကျနေသူ ၃၈၄ ဦးကို မတရားစီရင်ချက်ချခဲ့ပြီး ထိုသူများထဲက တဝက်ကျော် ဟာ ပြီးခဲ့တဲ့လအတွင်းက မတရားစီရင်ခဲ့တာဖြစ်ကြောင်း၊ သူတို့ရရှိတဲ့ သတင်းများအရ မြန်မာစစ်အစိုးရဟာ မတ ရားစီရင်မှုများကို အဆောတလျင်ပြုလုပ်ချင်နေကြောင်း နိုင်ငံရေးအကျဉ်းသားများကူညီစောင့်ရှောက်ရေးအဖွဲ့ရဲ့ ထုတ်ပြန်ချက်ထဲမှာ ဖော်ပြထားပါတယ်။

မြန်မာစစ်အစိုးရဟာ လူငယ်ရှေ့နေ ၂ ဦးနဲ့ အမျိုးသားဒီမိုကရေစီအဖွဲ့ချုပ်ရှေ့နေ ဦးခင်မောင်ရှိန်နဲ့ ဦးအောင်သိန်း တို့ကို တရားရုံးအား မထေမဲ့မြင်မှုနဲ့ ထောင်ဒဏ် ၄ လ၊ လူ့အခွင့်အရေးလှုပ်ရှားသူ ဦးမြင့်အေးကို ပေါက်ကွဲမှု တချို့နဲ့ ဆက်စပ်ပြီး ထောင်ဒဏ် ၈ နှစ်၊ နာဂစ်စ် မုန်တိုင်းသင့်သူတွေကို အကူအညီပေးခဲ့တဲ့ လူရွှင်တော် ကိုဇာဂနာကိုထောင်ဒဏ် ၅၉ နှစ်၊ သံဃာ့ခေါင်းဆောင် ဦးဂန္ဘီရကို ၂၀၀၇ ခှနှစ် သံဃာ့လှုပ်ရှားမှုအား ဦးဆောင်မှု နဲ့ ထောင်ဒဏ် ၆၈ နှစ်၊ လောင်စာဆီဈေးနှုန်းမြှင့်တင်ခြင်းကို ၂၀၀၇ ခုနှစ် သြဂုတ်လအတွင်းကလမ်းလျှောက်ဆန္ဒ ပြခဲ့တဲ့ ၈၈ မျိုးဆက်ကျောင်းသား အဖွဲ့ဝင်များကို ထောင်ဒဏ် ၆၅ နှစ်စီအပါအဝင် ထောင်ဒဏ်နှစ်ရှည်၊ နှစ်တိုများ စွာ မတရားစီရင်ခဲ့ပါတယ်။

နိုင်ငံရေးအကျဉ်းသားများ ကူညီစောင့်ရှောက်ရေးအဖွဲ့ (မြန်မာနိုင်ငံ) မှ တွဲဘက်အတွင်းရေးမှူး ကိုဘိုကြည်က ”အခုချမှတ်တဲ့ ထောင်ဒဏ်တွေဟာ ဆယ်စုနှစ်တနှစ်ကျော် စစ်အစိုးရ မတရားစီရင်ခဲ့တဲ့ ထောင်ဒဏ်တွေထဲက တချို့ဖြစ်ပါတယ်။ နိုင်ငံရေးလှုပ်ရှားသူတွေကြောက်လန့်သွားအောင် သူတို့ဘဝရဲ့ အချိန်တော်တော်များများကို ထောင်ထဲမှာ ကုန်ဆုံးစေတာဖြစ်ပါတယ်။” လို့ စစ်အစိုးရရဲ့ မတရားစီရင်မှုများနဲ့ ပတ်သက်ပြီး ဝေဖန်ချက်ပေးပါ တယ်။

မြန်မာစစ်အစိုးရဟာ မတရားစီရင်ချက်များ ချမှတ်ခဲ့တဲ့နည်းတူ နိုဝင်ဘာ ၁၅ ရက်နေ့ကစတင်ပြီး အနည်းဆုံး ယုံကြည်ချက်ကြောင့် အကျဉ်းကျနေသူ ၁၃၆ ဦးကို မိသားစုနဲ့ဝေးကွာအောင် နိုင်ငံအနှံ့ရှိထောင်တွေဆီကို ပို့ ဆောင်ခဲ့ပါတယ်။ ၈၈ မျိုးဆက်ကျောင်းသားအဖွဲ့ရဲ့ ခေါင်းဆောင်များဖြစ်ကြတဲ့ ကိုမင်းကိုနိုင်၊ ကိုကိုကြီး၊ ကိုမင်းဇေယျတို့ကို ရှမ်းပြည်နယ်က ကျိုင်းတုံ၊ မိုင်းဆတ်နဲ့ လားရှိုးအကျဉ်းထောင်တွေဆီပို့ဆောင်ခဲ့သလို ကိုဌေးကြွယ်ကို ရခိုင်ပြည်နယ်ဘူးသီးတောင်ထောင်၊ ကိုပြုံးချိုကို တနင်္သာရီတိုင်း ကော့သောင်းထောင်တွေဆီကို ပြောင်းရွှေ့ခဲ့ပါတယ်။

ယုံကြည်ချက်ကြောင့် အကျဉ်းကျနေသူများကို ဝေးလံတဲ့ အကျဉ်းထောင်များဆီ ပို့ဆောင်ခြင်းနဲ့ ပတ်သက်ပြီး ”၈၈ မျိုးဆက်ကျောင်းသားခေါင်းဆောင်တွေကို သူတို့မိသားစုတွေနဲ့ ဝေးလံတဲ့ အကျဉ်းထောင်တွေဆီကို ပို့လိုက်ခြင်းဟာ စစ်အစိုးရရဲ့ စိတ်ပိုင်းဆိုင်ရာနှိပ်စက်မှုဖြစ်ကြောင်း၊ အခုလိုပို့ဆောင်လိုက်တဲ့အတွက် မိသားစု ဝင်တွေအဖို့ သူတို့လိုအပ်တဲ့ အစားအသောက်၊ ဆေးဝါးတွေ ပို့ဆောင်နိုင်ဖို့ အချိန်ကုန် ငွေကုန်ဖြစ်အောင် လုပ် ဆောင်လိုက်တာဖြစ်ကြောင်း၊ ဒါဟာ မြန်မာပြည်လွတ်လပ်ရေးလှုပ်ရှားသူတွေကို လူမြင်ကွင်းက ပျောက်သွား အောင်၊ သူတို့ကို မေ့ပျောက်သွားအောင်လုပ်တာဖြစ်ကြောင်း၊ ကျွန်တော်တို့ကတော့ ဒီလိုအဖြစ်မျိုးကို ဘယ်တော့မှ အဖြစ်ခံမှာ မဟုတ်ကြောင်း။” နိုင်ငံရေးအကျဉ်းသားများကူညီစောင့်ရှောက်ရေးအဖွဲ့ (မြန်မာနိုင်ငံ) မှ ကိုဘိုကြည်က ပြောကြားလိုက်ပါတယ်။

REF: Burmatoday

မြန်မာစစ်တပ်မှ ဒု-တပ်ကြပ် (၃) ဦး ကေအန်ယူထံ လက်နက်ချ

မြန်မာစစ်တပ်မှ ဒု-တပ်ကြပ် (၃) ဦး လက်နက်များနှင့်အတူ ကရင်အမျိုးသားလွတ်မြောက်ရေးတပ်မတော် (ကေအန်အယ်လ်အေ) တပ်မဟာ (၆) လက်အောက်ခံ တပ်ရင်း (၁၆) တပ်စခန်းသို့ မကြာခင်က လာရောက်ပူး ပေါင်းခဲ့ကြသည်။

အဆိုပါ စစ်သည် (၃) ဦးသည် ထိုင်း-မြန်မာနယ်စပ်ရှိ ကရင်အမျိုးသားအစည်းအရုံး (ကေအန်ယူ) တပ်စခန်းတခု သို့ ယမန်နေ့က ရောက်ရှိလာခဲ့သော်လည်း ကရင်အမျိုးသားလွတ်မြောက်ရေးတပ်မတော်၊ တပ်မဟာ (၆) လက်အောက်ခံ၊ ရှေ့တန်းစခန်း တပ်ရင်း (၁၆) သို့ ယခုလ (၁၁) ရက်နေ့က ရောက်ရှိလာကြသူများ ဖြစ်သည်။

လာရောက်ပူးပေါင်းကြသည့် စစ်သည်များမှာ ကေအန်အယ်လ်အေ တပ်မဟာ (၆) အခြေစိုက်ရာ ဘုရားသုံးဆူ ဒေသအတွင်းရှိ မြန်မာစစ်တပ် ခလရ (၂၀)၊ အနန်းကွင်းဗျူဟာ လုံခြုံရေးတပ်ဖွဲ့မှ ဒု-တပ်ကြပ် အောင်ကိုဦး (ကိုယ်ပိုင်အမှတ် တ/ ၂၆၈၆၄၀)၊ ဒု-တပ်ကြပ် စိန်ကြာထွန်း (ကိုယ်ပိုင်အမှတ် တ/ ၈၆၆၇၆၁) ဒု-တပ်ကြပ် မောင်ဋ္ဌေး (ကိုယ်ပိုင်အမှတ် တ/၂၆၈၀၃၆) တို့ ဖြစ်ကြသည်။

ယမန်နေ့က တပ်မဟာ (၆) လက်အောက်ခံ တပ်စခန်းတခုသို့ ရောက်ရှိလာသည့် အဆိုပါ စစ်သည် (၃) ဦးက မြန်မာစစ်တပ်အတွင်း ကြီးနိုင်ငယ်ညှဉ်း ဖိနှိပ်မှုမျိုးစုံနှင့် အထက်ကပေးသည့် အမိန့်အတိုင်း လူထုဆန့်ကျင်ရေး လုပ်ငန်းများ နေ့စဉ်လုပ်နေကြရသည်ကို ဆက်လက်မလုပ်ကိုင်လိုတော့သဖြင့် ယခုကဲ့သို့ တပ်ကိုစွန့်ခွာခဲ့ရခြင်း ဖြစ်ကြောင်း၊ အလားတူ တပ်ကိုစွန့်ခွာလိုသည့် စစ်သည်များလည်း အများအပြားရှိသည်ဟု ၎င်းတို့ လာရောက် ရခြင်းအကြောင်းကို ရှင်းပြခဲ့ကြသည်။

၎င်းတို့နှင့်အတူ M-79 (၁) လက်၊ MA-11 (၃) လက်၊ D6M စကားပြောစက် (၁) လုံး ပါရှိပြီး ၎င်းတို့အား ကရင် အမျိုးသားလွတ်မြောက်ရေး တပ်မတော်၊ တပ်မဟာ (၆) မှ လက်ခံကူညီစောင့်ရှောက်ထားသည်။

လာရောက်ပူးပေါင်းကြသည့် မြန်မာစစ်သည်များနှင့် ပတ်သက်၍ တပ်မဟာ (၆) တပ်မဟာစစ်ရုံးမှ ဒု-ဗိုလ်မှူး ကြီးတဦးက “ကျနော်တို့ကတော့ သူတို့ကို နွေးနွေးထွေးထွေး ကြိုဆိုတယ်။ တော်လှန်ရေး ဆက်လုပ်ချင်ရင် လည်း ခွင့်ပြုတယ်။ သာမန်အရပ်သားလို နေထိုင်သွားမယ်ဆိုရင်လည်း ကူညီပေးတယ်။ ဒီထက်တဆင့် တတိယ နိုင်ငံတို့ ဘာတို့ သွားမယ်ဆိုလို့ရှိရင်လည်း သူတို့ဆန္ဒအတိုင်း အကောင်းဆုံးဖြစ်အောင် ဆောင်ရွက်ပေးဖို့ အစီ အစဉ်ရှိပါတယ်” ဟု ခေတ်ပြိုင်သို့ပြောသည်။

REF: ခေတ်ပြိုင်

၈၈ ကျောင်းသားများ

ယနေ့ဖတ်စရာများ

Wednesday, December 3, 2008

ထိုင်း တရားရုံးချုပ်က ထိုင်းဝန်ကြီးချုပ်၏ ပါတီကို ဖျက်သိမ်း

၂၀၁၀ ရွေးကောက်ပွဲအတွက် ရပ်ကွက်အဆင့် သင်တန်းများ ပို့ချ

Tuesday, December 2, 2008

အရေးနိမ့်ခဲ့ရသော မြန်မာ့ အကြမ်းမဖက် တော်လှန်ရေး (အပိုင်း ၂) - နော်မန် ရိုဘက်စ် စပီရီ

မော်လမြိုင် အမှတ် (၁) ဈေးကြီး မီးလောင်ပြာကျ

ထောင်ဒဏ်နှစ်ရှည်ချမှတ်ခံရသူများတွင် အကောင်းဆုံးမြေသြဇာလူငယ်အဖွဲ့ဝင်များလည်းပါ

နိုင်ငံရေးအကျဉ်းသားများကို နယ်ထောင်များသို့ပြောင်းရွှေ့

ဒီတခါ နက္ခတ်စုံရင်တော့ ပြန်ဆုံကြရအောင်ဒေလီယာ

တတိယလှိုင်းခေတ် ပြောက်ကျားစစ် (၂) - ဂါမဏိ

နိုဝင်ဘာလအတွင်းက ယုံကြည်ချက်ကြောင့် မတရားစီရင်ခံရသူ ၂၁၅ ဦးရှိ

မြန်မာစစ်တပ်မှ ဒု-တပ်ကြပ် (၃) ဦး ကေအန်ယူထံ လက်နက်ချ

Monthly Chronology

ကျမ္မာရေး

အားကစား

မဲဆွယ်စည်းရုံးရေးမိန့်ခွန်း

ဒေါ်အောင်ဆန်းစုကြည် ခရီးစဉ်များ

Blog Archive

Subscribe via email

၈၈ ကျောင်းသားများ

ယနေ့ဖတ်စရာများ

Wednesday, December 3, 2008

Tuesday, December 2, 2008

Monthly Chronology

ကျမ္မာရေး

အားကစား

မဲဆွယ်စည်းရုံးရေးမိန့်ခွန်း

ဒေါ်အောင်ဆန်းစုကြည် ခရီးစဉ်များ

Blog Archive

Subscribe via email

Subscribe To