Saturday, April 30, 2011

စီမံချက်ဖြင့် ဖမ်းဆီးမှုများကြောင့် မီဇိုရမ်နေ မြန်မာများပုန်းရှောင်

ဇာနည်မာန်
30 April 2011

အိန္ဒိယနိုင်ငံ မီဇိုရမ်ပြည်နယ်၊ အိုက်ဇောမြို့ရှိ တရားမ၀င် နိုင်ငံခြားသားများကို လိုက်လံဖမ်းဆီးနေသည့် စီမံချက်ကြောင့် မြန်မာရွှေ့ပြောင်းလုပ်သားများ လုပ်ငန်းခွင် ရပ်နားကာ ပုန်းရှောင်နေကြရသည်။

“မနက်ကတင် ဒီက ၄ ယောက်ဖမ်း ခံရတယ်။ နောက်ထပ်လာဖမ်းမယ် ဆိုတော့ အခု ရက်ကန်းယက်တာ တွေ လည်း ရပ်ထားပြီး ပုန်းနေကြ ရတယ်။ စနေနေ့တိုင်း တပတ်တခါ ဈေး ၀ယ်နေကျကိုတောင် ဈေးမ၀ယ်နိုင် ကြ ဘူး။ မြို့ထဲမှာ ရဲကားတွေနဲ့ လိုက် ဖမ်းနေတာ” ဟု ယက်ကန်းလုပ်ငန်း အများစု တည်ရှိရာ ဇောင်းတွီရပ်ကွက် မှ မြန်မာရွှေ့ပြောင်း လုပ်သားတဦးက ပြောသည်။

ယမန်နေ့ညက ကျော်မွှန်ရပ်ကွက်အတွင်း ရပ်ကွက်အာဏာပိုင်များက တအိမ်တက်ဆင်း လိုက်လံရှာဖွေစစ်ဆေးကာ ကလေးငယ်များအပါအ၀င် မြန်မာနိုင်ငံသား ၃၀ ဦးကို ဖမ်း ဆီးခဲ့သည်ဟု သိရသည်။

ယမန်နေ့က အိုက်ဇောမြို့အတွင်း ဖမ်းဆီးခဲ့သူ စုစုပေါင်း ၆၀ ဦးတွင် မြန်မာနိုင်ငံသား ၄၀ ကျော်ပါဝင်ကြောင်း၊ ကျန်သူများမှာ တခြားပြည်နယ်များမှ ပြည်နယ်ဖြတ်ကျော်ခွင့် ပါမစ်မရှိဘဲ လာရောက်သည့် အိန္ဒိယ နိုင်ငံသားများဖြစ်ကြောင်း၊ ယနေ့ဖမ်းဆီးမှု များနှင့်ဆိုလျှင် မြန်မာနိုင်ငံသား ၈၀ ရှိပြီဖြစ်ကြောင်း သိရသည်။

တခြားပြည်နယ်မှ အိန္ဒိယနိုင်ငံသားများကိုမူ ယနေ့နေ့လည်တွင် တရားရုံးတင်ပြီး နေရပ် ပြန်ပို့ဖွယ်ရှိသည်ဟု သိရှိရသည်။

ပြီးခဲ့သည့် သင်္ကြန်တွင်းကာလကလည်း ပွဲတော်ကျင်းပနေသည့် မြန်မာရွှေ့ပြောင်းလုပ်သား များကို ဖမ်းဆီးခဲ့ရာ ၁၃ ဦး ထိမ်းသိမ်းခံနေရဆဲဖြစ်ပြီး တရားရုံး ရုံးချိန်းများ သွားနေရ ကြောင်း၊ ၎င်းတို့ကို ဒဏ်ငွေနှင့် နေရပ်ပြန်ပို့ဖွယ်ရှိကြောင်း၊ ကျန် အဖမ်းခံရသူများကို မူ အာမခံဖြင့် ပြန်လွှတ်ပေးထားကြောင်း မြန်မာရွှေ့ပြောင်း အလုပ်သမားအရေး ကူညီ ဆောင်ရွက်ပေးနေသည့် လူမူရေးအသင်းအမှုဆောင် တဦးဖြစ်သူ ကိုထွေးက ပြောသည်။

တရားမ၀င်နေထိုင်သူများကို လိုက်လံဖမ်းဆီးခြင်းသည် ယခုနှစ်အတွင်း ၄ ကြိမ်မြောက် ဖြစ်ပြီး၊ မီဇိုရမ်ပြည်နယ် အစိုးရ၏ တရားမ၀င်နေထိုင်သူများ ပပျောက်ရေးစီမံ ချက် ကြောင့်ဖြစ်ကြောင်း သိရသည်။

ကိုထွေးက “စီမံချက်နဲ့လုပ်တာဆိုတော့ အလုပ်ရှင်တွေကလည်း ဒီကိစ္စမှာ အခက်အခဲ တွေဖြစ်နေတယ်။ အလုပ်သမားတွေ အလုပ်မလုပ်ရဲတော့ အလုပ်ရှင်တွေမှာ ထိခိုက်နစ်နာတာတွေ များတယ်လို့ ငြီးနေကြတယ်” ဟု ပြောသည်။

နိုင်ငံခြားသားဖြစ်ဖြစ်စေ၊ အိန္ဒိယနိုင်ငံသားဖြစ်စေ မီဇိုရမ်ပြည်နယ်သို့ လာရောက် နေထိုင်သူများအနေဖြင့် သက်ဆိုင်ရာ အာဏာပိုင်များထံတွင် နေထိုင်ခွင့်လက်မှတ် တောင်းခံ ကြရသည်။ နေထိုင်ခွင့်လက်မှတ်တခု၏ သက်တမ်းမှာ နေထိုင်သူ၏ အလုပ်အကိုင်၊ လာရောက်သည့် အကြောင်းအရာအရ ၁ ပတ်မှ ၁ လအထိ ရှိသည်။

“မြန်မာနိုင်ငံသား အများစုက လက်မှတ်မရှိကြဘူး။ ရေရှည်နေဖို့ကိုလည်း သက်ဆိုင်ရာက ထုတ်ပေးတာ မရှိဘူး။ ဒီလိုပဲ သဘောတူညီမှုတခုနဲ့ နေခွင့်ပေးထားတာဆိုတော့ သူတို့ ဖမ်းချင်တဲ့အချိန် ဖမ်းလို့ရတယ်လေ။ အဲလိုဖြစ်နေတာ” ဟု ကိုထွေးက ရှင်းပြသည်။

မီဇိုရမ်ပြည်နယ်တွင်းနေ မြန်မာရွှေ့ပြောင်းလုပ်သား အများစုမှာ ရက်ကန်းလုပ်ငန်း၊ ရွှေပန်းထိမ်လုပ်ငန်း၊ အိမ်ဖော်၊ ပန်းရံ၊ မြေတူး၊ လွှဆွဲ၊ လမ်းဖောက် စသည့် ကြုံရာ ကျပန်းအလုပ်များ လုပ်ကိုင်နေထိုင်ကြသည်။

မီဇိုရမ်ပြည်နယ်အတွင်း နေထိုင်သည့် တရားမ၀င်နိုင်ငံခြားသားများအနက် မြန်မာ နိုင်ငံသားအများစုမှာ ပြည်နယ်တွင်း ဖြစ်ပွားသည့် ရာဇ၀တ်မှုများ၊ အထူးသဖြင့် မူးယစ်ဆေးဝါး၊ အရက်သေစာ ရောင်းဝယ်ဖောက်ကားခြင်းတို့တွင် ပါဝင်ပတ်သက်နေရာ အဆိုပါ ပြစ်မှု များကို ထိန်းချုပ်လိုသောကြောင့် ယခုကဲ့သို့ စီမံချက်ချ ဖမ်းဆီးမှုများ ပြုလာခြင်း ဖြစ်နိုင်သည်ဟု တချို့က သုံးသပ်သည်။

မီဇိုရမ် ဒေသခံတဦးက “ပြည်နယ်အစိုးရက တရားမ၀င် နိုင်ငံခြားသားကိစ္စတွေကို ဖြေရှင်းချင်တာကြာပြီ။ တဖက်မှာလည်း ဒီအလုပ်သမားတွေကို မှီခိုနေရတဲ့အပိုင်းကလည်း ရှိ နေတယ်။ နေထိုင်ခွင့်ပေးထားပြန်တော့ ရာဇ၀တ်မှုတွေနဲ့ ပတ်သက်တာတွေ ဖြစ်လာ၊ ပြည်နယ် အေးချမ်းတည်ငြိမ်ရေးကို နှောင့်ယှက်တာတွေက ဖြစ်လာတော့ ပြည်နယ် လုံခြုံရေးအတွက်ကလည်း သူတို့အတွက် စဉ်းစားစရာတွေ ဖြစ်လာတာပေါ့” ဟု ပြော သည်။

ဖမ်းဆီးခံရသူများသည် အနည်းဆုံး ဒဏ်ငွေ ရူပီး ၅၀၀ ပေးဆောင်ရဖွယ် ရှိသည့်အပြင် အိန္ဒိယ-မြန်မာ နယ်စပ်သို့ ပြန်ပို့ခံရမည် ဖြစ်သော်လည်း မြန်မာနိုင်ငံတွင်း စီးပွားရေး ကျပ်တည်းမှုများကြောင့် အိုက်ဇောမြို့သို့ ပြန်ရောက်လာကြဦးမည့် သံသရာဖြစ်စဉ် အား သက်ဆိုင်ရာမှ မည်သို့ ဖြေရှင်းမည်ကို စောင့်ကြည့်ရဦးမည်ဟု ၎င်းက ဆိုသည်။

အိုက်ဇောမြို့တွင် ရောက်ရှိနေသော မြန်မာရွှေ့ပြောင်းလုပ်သား ၅ သောင်းထက် မနည်း ရှိကြောင်း သိ ရသည်။

Ref;Irrawaddy

Read More...

ချောင်းသာတွင် သဘာဝပတ်ဝန်းကျင် ဟောပြောပွဲ ကျင်းပမည်

ယုယမိုး
30 April 2011

ချောင်းသာကမ်းခြေ အနီးတ၀ိုက်ရှိ ဒေသခံများ၊ ရေလုပ်ငန်း လုပ်ကိုင်နေသူများအား မုန်တိုင်းအန္တရာယ် ကြိုတင် ကာကွယ်ရေးနှင့် သဘာဝပတ်ဝန်းကျင် ထိန်းသိမ်းရေးဆိုင်ရာ အချက်အလက်များနှင့် ပတ်သက်သည့် အသိပညာပေး ဟောပြောပွဲ တရပ်ကို မေလ ၁ ရက်နေ့တွင် ကျင်းပမည်ဟု သိရသည်။

ကမ်းရိုးတန်း ဒေသများတွင် ကြုံတွေ့ရ တတ်သည့် သဘာဝဘေးအန္တရာယ် များနှင့် ရာသီဥတု ပြောင်းလဲခြင်း ဆိုင် ရာ အကြောင်းအရာများကို သဘာဝ ပတ်ဝန်းကျင် ပညာရှင် ဦးအုန်းနှင့် မိုးလေ၀သနှင့် ဇလဗေဒ ပညာရှင် ဒေါက်တာ ထွန်းလွင် တို့က နံနက် ၈ နာရီအချိန်မှ စတင်၍ ချောင်းသာ ကမ်းခြေရှိ ဟိုတယ် ACE ခန်းမ ဆောင်တွင် ဟောပြောမည်ဟု ချောင်းသာကမ်းခြေ ဟိုတယ်မက်စ်မှ တာဝန်ရှိသူ တဦးက ပြောသည်။

ချောင်းသာဟိုတယ်ဇုန် အနီးတွင် ပထမအဆုံးအကြိမ် ကျင်းပသည့် သဘာဝပတ်ဝန်း ကျင်နှင့် မိုးလေ၀သဆိုင်ရာ ပညာပေး ဟောပြောပွဲကို ဟိုတယ်လုပ်ငန်းရှင်များ အသင်းက ဦးစီးကျင်းပခြင်းဖြစ်ပြီး ဒေသအနီးတ၀ိုက်မှ ရေလုပ်သားများ၊ ရေလုပ်ငန်းရှင် များ စုစုပေါင်း ၄၀၀ ကျော်တက်ရောက်မည်ဟု သိရသည်။

“ရေလုပ်ငန်း လုပ်ကိုင်နေကြတဲ့ ကျေးရွာက ပြည်သူတွေ၊ ဒေသခံတွေကို ရာသီဥတု ဖောက်ပြန်ပြောင်းလဲမှု ဖြစ်စဉ်တွေ အစဉ်မပြတ် နားစွင့်နိုင်ဖို့၊ ကြိုတင်ကာကွယ်ဖို့၊ ဒီရေတောတွေကို စောင့်ရှောက် ထိန်းသိမ်းဖို့တွေ ဟောမှာပါ။ ဒါ့အပြင် ဥတိုချောင်း အနီးတ၀ိုက်မှာ မီးသွေးဖုတ် လုပ်ငန်း လုပ်ကိုင်နေကြတဲ့သူတွေရှိတော့ သူတို့ရဲ့ ဒီလို လုပ်ကိုင်မှုတွေဟာ သဘာဝပတ်ဝန်းကျင်ကို ထိခိုက်စေနိုင်တယ်ဆိုတဲ့ အသိပညာ ဗဟုသုတတွေ ရစေချင်လို့ပါ” ဟု ဟိုတယ်မက်စ် တာဝန်ရှိသူက ဆိုသည်။

ဒေသခံ ပြည်သူလူထုအနေဖြင့် ရာသီဥတုနှင့် ပက်သက်သည့် အသိပညာ ဗဟုသုတများကို စိတ်ပါဝင်စားလာသည်မှာ ကောင်းမွန်သည့် လက္ခဏာတရပ်ဖြစ်ကြောင်း ဒေါက်တာ ထွန်းလွင်က ပြောသည်။

“အထူးသဖြင့် ချောင်းသာကမ်းခြေ အနီးတ၀ိုက်က ဒေသခံတွေက ရာသီဥတုနဲ့ ပတ်သက် လို့ ပိုပြီးတော့ အသိ၊ သတိ ရှိလာကြပါတယ်။ ဖုန်းကနေတဆင့် မုန်တိုင်းသတင်း မေးမြန်း မှုတွေ၊ ကြိုတင်ကာကွယ်ရေးနဲ့ ပြင်ဆင်မှုတွေလည်း လုပ်လာကြတာ တွေ့ရပါတယ်” ဟု ဒေါက်တာ ထွန်းလွင်က ဆိုသည်။

မြန်မာပြည်သူလူထု အနေဖြင့် ရာသီဥတု ပြောင်းလဲခြင်းဆိုင်ရာ ကိစ္စရပ်များနှင့် ပတ်သက်၍ ယခင်က လှုပ်ရှားမှု၊ လှုံ့ဆော်မှုများ နည်းပါးခဲ့သော်လည်း ၂၀၀၈ မေလ ဆန်းက နာဂစ်မုန်တိုင်း တိုက်ခတ်ခဲ့ပြီး နောက်ပိုင်းမှ စတင်ကာ သဘာဝပတ် ၀န်းကျင် ထိန်းသိမ်းရေးနှင့် ရာသီဥတု ဖြစ်စဉ်များအပေါ် စိတ်ပါဝင်စားမှု၊ သတိပြု ကာကွယ်မှုများ ပြုလုပ်ရန် စိတ်ပါဝင်စားလာကြသည်။ ထို့အပြင် သဘာဝပတ်ဝန်းကျင်နှင့် ပက်သက်သည့် အသိပညာပေး လှုံ့ဆော်သည့် ပန်းချီပြပွဲများ၊ ဟောပြောပွဲများ၊ ကာတွန်းပြပွဲများ စသည်တို့ကိုလည်း နိုင်ငံတ၀န်း ပြုလုပ်လာကြသည်။

၂၀၀၈ မေလ ၂ ရက်နေ့နှင့် ၃ ရက်နေ့က ဧရာဝတီတိုင်းနှင့် ရန်ကုန်တိုင်းအတွင်း ဝင်ရောက် တိုက်ခတ်ခဲ့သော နာဂစ် ဆိုင်ကလုန်းမုန်တိုင်းကြောင့် လူပေါင်း ၁ သိန်း ၄ သောင်းကျော် သေဆုံးခဲ့ရပြီး အိုးအိမ်၊ လယ်ယာ၊ ရေလုပ်ငန်းသုံး လှေ၊ သမ္ဗာန်၊ သင်္ဘော များစွာ ပျက်စီးဆုံးရှုံးခဲ့ရသည်။

Ref;Irrawaddy

Read More...

ဒေါ်အောင်ဆန်းစုကြည်ကို ကမ္ဘာ့ကလေးများအဖွဲ့ နာယက ခန့်အပ်

2011-04-30

ကလေးများ အခွင့်အရေးအတွက် စွမ်းစွမ်းတမံ ဆောင်ရွက်သူတွေကို ဆု ရွေးချယ် ပေးအပ်နေတဲ့ ဆွီဒင်နိုင်ငံ အခြေစိုက် ကမ္ဘာ့ကလေးများအဖွဲ့ က မြန်မာ့ဒီမိုကရေစီ ခေါင်းဆောင်ဒေါ်အောင်ဆန်းစုကြည်ကို အဖွဲ့နာယကအဖြစ် ဂုဏ်ပြုခန့်အပ်လိုက် ပါတယ်။

ပြီးခဲ့တဲ့ ကြာသပတေးနေ့က ဆွီဒင်နိုင်ငံ Mariefred မြို့ Gripsholms နန်းတော်မှာ ကမ္ဘာ့ကလေးများအဖွဲ့က ကျင်းပတဲ့ ‘ကလေးအခွင့်အရေးဆိုင်ရာ သူရဲကောင်းဆု’ ဂုဏ်ပြု ချီးမြှင့်တဲ့ အခမ်းအနားမှာ ဒေါ်အောင်ဆန်းစုကြည်ကို အဖွဲ့ရဲ့နာယကအဖြစ် ဂုဏ်ပြုခန့်အပ် ကြောင်း ကြေညာခဲ့ပါတယ်။

ကမ္ဘာ့ကလေးများအဖွဲ့ရဲ့ နာယကအဖြစ် ဒေါ်အောင်ဆန်းစုကြည်ကို အမှတ်တရ ပေးအပ်တဲ့ ဖန်ကမ္ဘာလုံးဆုကို ဆွီဒင်ဘုရင်မ ကိုယ်တိုင် တက်ရောက် ချီးမြင့်ခဲ့တယ်လို့ သိရပါတယ်။

ဒေါ်အောင်ဆန်းစုကြည်က အခုလို ကလေးအခွင့်အရေး သူရဲကောင်းဆု ချီးမြှင့်ရေးအဖွဲ့ရဲ့ နာယကအဖြစ် သူ့ကို ရွေးချယ် ဂုဏ်ပြုလိုက်တာနဲ့ ပတ်သက်ပြီး ကျေးဇူးတင်ရှိပါကြောင်း၊ အခု သူ နေအိမ်အကျယ်ချုပ်ကနေ လွတ်မြောက်လာပြီ ဖြစ်တဲ့အတွက် ကမ္ဘာ့ကလေး များအဖွဲ့ရဲ့ လှုပ်ရှားမှုတွေမှာ ပါဝင် ဆောင်ရွက်နိုင်လိမ့်မယ်လို့ မျှော်လင့်ပါကြောင်း ပြော ကြားခဲ့ပါတယ်။

မြန်မာပြည်က ကလေးတွေဟာ လုံလောက်တဲ့ ဆေးဝါးကုသမှုနဲ့ ပညာရေး မပြည့်စုံ တာတွေ ကြုံနေကြရတာကိုလည်း အားလုံး သိရှိပြီး ဖြစ်မှာပါလို့လည်း ဒေါ်အောင်ဆန်း စုကြည်က ပြောသွားပါတယ်။

ကလေးအခွင့်အရေးသူရဲကောင်း ဆုရှင်ကို ကမ္ဘာတဝှန်းက ကလေးတွေက ရွေးချယ်တာ ဖြစ်ပါတယ်။ ၂ဝ၁၁ ခုနှစ်အတွက် ကလေးအခွင့်အရေး သူရဲကောင်းဆုကို ကွန်ဂိုနိုင်ငံက Murhabazi ကို ချီးမြှင့်ခဲ့ပါတယ်။ သူဟာ စစ်သားအဖြစ် အဓမ္မ စုဆောင်းခံရတဲ့ ကလေးတွေ၊ ပြည့်တန်ဆာအဖြစ် အသုံးချခံနေရတဲ့ ကလေးတွေရဲ့ လွတ်မြောက်ရေး တွေကို အသက်အန္တရာယ် ကြုံရတဲ့အထိ စွမ်းစွမ်းတမံ ဆောင်ရွက်ခဲ့တာတွေ ကြောင့် ကမ္ဘာ့ ကလေး ၃ သန်းကျော်က သူ့ကို ရွေးချယ်ခဲ့တာ ဖြစ်ပါတယ်။

အလားတူပဲ ကလေးများ အဓမ္မ အလုပ်ခိုင်းစေခံရမှု၊ လူကုန်ကူးခံရမှုနဲ့ ပြည့်တန်ဆာအဖြစ် ခိုင်းစေခံရတဲ့ မိန်းကလေးငယ်တွေရဲ့ အရေးအတွက် ဆောင်ရွက်ခဲ့သူ ဖိလစ်ပိုင်နိုင်ငံက Cecilia Flores-Oebanda ဆိုသူနဲ့ ဘင်္ဂလားဒေ့ရ်ှနိုင်ငံမှာ ဖြစ်ပွားခဲ့တဲ့ အက်စစ်တွေ၊ ဓာတ်ဆီတွေနဲ့ တိုက်ခိုက်မှုကြောင့် ဒဏ်ရာ ပြင်းပြင်းထန်ထန် ရခဲ့ရသူတွေ၊ အထူးသဖြင့် အမျိုးသမီးငယ်တွေကို အကြောက်အရွံ့ မရှိ ကူညီပေးခဲ့တဲ့ ဘင်္ဂလားဒေ့ရ်ှနိုင်ငံသူ Monira Rahman တို့လည်း ဆု ချီးမြင့်ခံခဲ့ရပါတယ်။

Ref;RFA

Read More...

Friday, April 29, 2011

မြန်မာ ကွန်ရက်အဖွဲ့ ၁၁ ဖွဲ့က ဦးသိန်းစိန်အစိုးရကို ဝေဖန်ထောက်ပြ

2011-04-29

ဗိုလ်ချုပ်ကြီးဟောင်း ဦးသိန်းစိန်နဲ့ အစိုးရအပေါ် သုံးသပ်ချက်နဲ့ ပြည်သူလူထုသို့ အသိပေး တင်ပြချက်တစောင်ကို ဒီမိုကရေစီရေး အင်အားစု ကွန်ရက် ၁၁ ဖွဲ့က ဧပြီ ၂၉ ရက်ဒီနေ့ ထုတ်ပြန်လိုက်ပါတယ်။

ဦးသိန်းစိန်အစိုးရအဖွဲ့မှာ ၃၅ နေရာရှိတဲ့အနက် စစ်ဖက်က ၂၆ နေရာယူထားပြီး ကျန်နေရာတွေကို ကြံ့ခိုင်ဖွံ့ဖြိုးရေးပါတီက နေရာယူထားတာကို သုံးသပ် တင်ပြထား တဲ့အကြောင်း ကွန်ရက်တဖွဲ့ဖြစ်တဲ့ ရန်ကုန်တိုင်းအတွင်း ဒီမိုကရေစီရေး တက်ကြွလှုပ်ရှား သူ ကျောင်းသားလူငယ်များ အင်အားစုက ကိုရန်နိုင်က ပြောပါတယ်။

“ဦးသိန်းစိန် သမတလုပ်တဲ့ ဒီ ၂၀၁၀ အလွန် အစိုးရဟာ ဒီ ၂၀၀၈ နာဂစ် ဖွဲ့စည်းပုံနဲ့ ဥပဒေရေး၊ တရားရေးတို့၊ အုပ်ချုပ်ရေးတို့ စတဲ့ ကဏ္ဍတွေမှာ စစ်အုပ်စု ထိပ်သီး ခေါင်းဆောင်တွေကပဲ နေရာယူထားတာကို ကျွန်တော်တို့ သုံးသပ် တွေ့ရှိရတယ်။ အရပ် ဝတ် စစ်ဗိုလ်တွေ အနေနဲ့ရော နောက်တခါက စစ်ဖက်ကနေ စည်းရုံးထားတဲ့ ဒီ ကြံ့ဖွတ် ပါတီ ထိပ်သီးတွေကပဲ ဒီ အစိုးရအဖွဲ့မှာ အသီးသီး နေရာယူထားတာကို ကျွန်တော်တို့ သုံးသပ်တွေ့ရှိရတယ်။”

“နောက် တချက်က ဒီ ၂၀၁၀ ရွေးကောက်ပွဲကနေ ပေါ်ပေါက်လာတဲ့ ဒီကြံ့ဖွတ် စစ်အစိုးရဟာ စစ်အာဏာရှင်စနစ်ကို ကိုယ်စားပြုတဲ့ အစိုးရတရပ် အဖြစ်ကနေ ပြီးတော့ ဒီမိုကရေစီစနစ်ကို လမ်းကြောင်းက အမှန်တကယ် သွားမယ်ဆိုရင် တိုင်းပြည် အတွင်းမှာ ပထမဦးဆုံး အနေနဲ့ ကျွန်တော်တို့ အခု တောင်းဆိုထားတဲ့ အချက် တွေကို ပြုလုပ်ပေးဖို့ လိုအပ်တယ်ဆိုတာကို ထောက်ပြထားတယ်။”

ကြေငြာချက်မှာ နိုင်ငံရေး အကျဉ်းသားတွေအားလုံး ချွင်းချက်မရှိ လွှတ်ပေးဖို့၊ ပြည်တွင်းစစ် ရပ်စဲပြီး ပြည်တွင်း ငြိမ်းချမ်းရေး ချက်ချင်း ဆောင်ရွက်ဖို့၊ စစ်အစိုးရ လက်ထက် တလျှောက်လုံးမှာ နိုင်ငံရေး၊ စီးပွားရေး၊ ဘာသာရေး၊ လူမှုရေး၊ ယဉ်ကျေးမှု နယ်ပယ်တွေမှာ ဒီမိုကရေစီ အခွင့်အရေးတွေ တားဆီးပိတ်ပင်တဲ့ အမိန့်ကြေညာ ချက်တွေကို ဖျက်သိမ်းပေးဖို့၊ နိုင်ငံရေးပါတီတွေ ဖွဲ့စည်းခွင့် အပါအဝင် လူထု လူတန်းစား အလွှာ အသီးသီးရဲ့ အသင်းအပင်း ဖွဲ့စည်းခွင့်နဲ့ စည်းရုံး လှုပ်ရှားခွင့်တွေ ခွင့်ပြု ဖို့နဲ့ ၂၀၀၈ ဖွဲ့စည်းပုံ အခြေခံဥပဒေကို ပြန်လည် ပြင်ဆင်ရေးဆွဲရေးအတွက် သက်ဆိုင် တဲ့ အင်အားစုတွေနဲ့ တွေ့ဆုံဆွေးနွေးဖို့ ဆိုတာတွေကို တောင်းဆိုထားပါတယ်။

ဒီအချက်တွေ မဖြည့်ဆည်းဘူးဆိုရင် အစိုးရ နာမည်ကို ဘယ်လို တပ်တပ်၊ လွှတ်တော်ကို ဘယ်လို ပုံစံနဲ့ပဲ ကျင်းပကျင်းပ ဟန်ပြလုပ်ရပ်တွေပဲ ဖြစ်တာမို့ စစ်အာဏာရှင် စနစ်ကို ဆက်ကျင့်သုံးပြီး တိုင်းပြည်ကို လိမ်ညာနေတာပဲ ဖြစ်တယ်လို့ ထောက်ပြထားပါတယ်၊

ဒီ ကြေငြာချက်ကို မြန်မာနိုင်ငံလုံးဆိုင်ရာ သံဃာ့တပ်ပေါင်းစုကြီး၊ ၈၈ မျိုးဆက် ကျောင်းသားများ။ ရက္ခအလင်းတန်း၊ ရွှေဝါရောင်တော်လှန်ရေး၊ ရန်ကုန်တိုင်းအတွင်း ဒီမိုကရေစီရေး တက်ကြွလှုပ်ရှားသူ ကျောင်းသားလူငယ်များ အင်အားစု၊ ဗမာနိုင်ငံ လုံးဆိုင်ရာ ကျောင်းသားသမဂ္ဂများ အဖွဲ့ချုပ်၊ ၂၀၀၇ မျိုးဆက် ကျောင်းသားများ သမဂ္ဂ၊ ရခိုင်ကျောင်းသားများ သမဂ္ဂ၊ ဗမာနိုင်ငံလုံးဆိုင်ရာ ကျောင်းသားများ သမဂ္ဂ၊ အခြေခံပညာ ကျောင်းသားများ သမဂ္ဂနဲ့ မြေလတ် ကျောင်းသားများ အဖွဲ့တို့က ပူးပေါင်း ထုတ်ပြန်လိုက်တာပါ။

Ref;RFA

Read More...

စစ်အစိုးရနှင့် သဘောတူညီချက်များကို ဒေါ်အောင်ဆန်းစုကြည် ပထမဆုံး ထုတ်ဖော်ပြောကြား

2011-04-29

၂၀၀၃ မေလ ၃၀ ရက်နေ့မှာ ဖြစ်ပွားခဲ့တဲ့ ဒီပဲယင်း အကြမ်းဖက် တိုက်ခိုက်မှုနဲ့ ပတ်သက်ပြီး၊ အဲဒီအရေးအခင်း နောက်ပိုင်း၊ ၂၀၀၄ ခုနှစ် မေလ အမျိုးသားညီလာခံ ပြန် မစမီကာလအတွင်း စစ်အစိုးရ အာဏာပိုင်တွေနဲ့ ညှိနှိုင်း ဆွေးနွေးရရှိခဲ့တဲ့ သဘော တူညီချက်တွေကို မြန်မာ့ ဒီမိုကရေစီခေါင်းဆောင် ဒေါ်အောင်ဆန်းစုကြည်က ပထမဦးဆုံးအကြိမ်အဖြစ် RFA ကနေ ထုတ်ဖော် ပြောဆိုလိုက်ပါတယ်။

ဒီပဲယင်းအဖြစ်အပျက် အပြီး စစ်အစိုးရ ကိုယ်စားလှယ်အဖွဲ့နဲ့ NLD ခေါင်းဆောင် တွေအကြား လျှို့ဝှက် ဆွေးနွေးပွဲတွေ အကြိမ် တော်တော်များများ ရှိခဲ့ပါတယ်။ ထိခိုက်နစ်နာသူတွေကို ထိုက်သင့်တဲ့ နစ်နာကြေးပေးရေး အပါအဝင် အချက် ၄ ချက်ကို အာဏာပိုင်တွေက သဘောတူညီခဲ့ကြောင်း ဒေါ်အောင်ဆန်းစုကြည်က ပြောပါတယ်။

ဒီပဲယင်း ကိစ္စအပြီးမှာ အာဏာပိုင်တွေနဲ့ တွေ့ဆုံစကားပြော သဘောတူညီမှုယူခဲ့တဲ့ အချက်တွေက “၁။ ဒီပဲယင်း အဖြစ်အပျက် ကို စုံစမ်းစစ်ဆေးရန်၊ ၂။ အဲဒီဖြစ်စဉ်မှာ ထိခိုက် နစ်နာခဲ့သူတွေကို ထိုက်သင့်တဲ့ နစ်နာကြေးပေးရန်၊ ၃။ နောင်အခါမှာ ဒီလိုအဖြစ် အပျက်မျိုး ထပ်မံမဖြစ်ဖို့ နှစ်ဦးနှစ်ဖက် ပူးပေါင်းဆောင်ရွက်ရန်၊ ၄။ ဒီပဲယင်းနဲ့ ပတ်သက်လို့ အဖမ်းဆီးခံနေရသူတွေ အားလုံးကို ပြန်လွှတ်ပေးရန် ဆိုတာတွေ ဖြစ်ပါတယ်။”

ဒီပဲယင်းအရေးအခင်းနဲ့ ပတ်သက်ပြီး ဒေါ်အောင်ဆန်းစုကြည် ကိုယ်တိုင်ပြောကြား ချက်တွေကို မကြားရသေး တဲ့အတွက် ပြောဆိုဝေဖန်မှုတချို့ပေါ်ပေါက် နေစဉ် အတွင်း RFA က အပတ်စဉ် ထုတ်လွှင့်နေ့တဲ့ လူထုနဲ့ ဒေါ်အောင်ဆန်းစု ကြည် အစီအစဉ်အတွက် သောတရှင်တဦးက မေးမြန်းခဲ့ရာမှာ ဒေါ်အောင်ဆန်းစုကြည် က အခုလို ဖြေကြားလိုက်တာ ဖြစ်ပါတယ်။

ဗိုလ်ချုပ်မှူးကြီး သန်းရွှေ အစိုးရနဲ့ အဲဒီလို သဘောတူညီချက်တွေ ရရှိပြီးကာမှ အာဏာပိုင်တွေဖက်က ကတိဖျက်ခဲ့လို့ အမျိုးသားညီလာခံ တက်ရောက်ရေး အပါအဝင် သဘောတူညီမှု အားလုံး ပျက်ပြား ခဲ့ရတယ်လို့လည်း ဒေါ်အောင်ဆန်းစုကြည်က ပြောပါ တယ်။

“NLD ဖက်ကတော့ မိမိတို့ရွေးချယ်ထားတဲ့ ကိုယ်စားလှယ်တွေကို အမျိုးသား ညီလာခံလွှတ်ဖို့ သဘောတူလိုက်ပါတယ်။ ဒီအချက်အားလုံးကို နှစ်ဦးနှစ်ဖက် လက်ခံ ပြီးမှ အမျိုးသားညီလာခံစဖို့ ရက် အနည်းငယ်လေးအလိုမှာ အန်တီ့ကို မလွှတ်ပေးဘူး ပြောတာကစပြီး သဘောတူညီချက်တွေရော ဆွေးနွေးတာတွေရော ပျက်သွားပါတယ်။ “

၂၀၀၃ ခုနှစ်မေလက အထက်မြန်မာပြည် စည်းရုံးရေးခရီးစဉ်အတွင်း စစ်ကိုင်းတိုင်း ဒီပဲယင်းမြို့နယ် ကျည်ရွာ အနီး မှာ အာဏာပိုင်တွေရဲ့ သြဇာခံလို့ လူအများက ယုံကြည် ယူဆကြတဲ့ တုတ်၊ ဓား လက်နက်ကိုင် လူရမ်းကား အမြောက်အမြားက ဒေါ်အောင်ဆန်း စုကြည်နဲ့ အခြား NLD အဖွဲ့ဝင်တွေကို ဝိုင်းဝန်း တိုက်ခ်ိုက်ခဲ့ရာမှာ လူ ဒါဇင် ပေါင်းများစွာ သေဆုံးခဲ့တယ်လို့ မျက်မြင်သက်သေတွေက ပြောကြပါတယ်။ ဒေါ်အောင်ဆန်း စုကြည်ကတော့ ယဉ်မောင်းသူရဲ့ကျွမ်းကျင်မှု ကြောင့် အဲဒီတိုက်ခိုက်မှုက မိမိ လွတ်မြောက်ခဲ့ကြောင်း RFA ကို ပြောပါတယ်။

“အတိုချုံးပြောရမယ် ဆိုရင်တော့ ကားမောင်းတဲ့လူငယ်က အင်မတန်မှ ကျွမ်းကျင်လို့ ဘယ်သူလို့ မှန်းရခက်တဲ့သူတွေက လမ်းကို အတားအဆီးတွေနဲ့ ပိတ်ဆို့ဖို့ ကြိုးစား နေတဲ့အထဲက နေပြီးတော့ ဖောက်ထွက်နိုင်ခဲ့တာ ဖြစ်ပါတယ်။”

အခက်အခဲတွေ မည်မျှရှိပေမဲ့လည်း နောက်မျိုးဆက်သစ်တွေရဲ့အကျိုးအတွက် မြန်မာ နိုင်ငံမှာ အမျိုးသား ပြန်လည်ရင်ကြားစေ့ရေး အောင်မြင်တဲ့အထိ မဆုတ်မရွံ့ဆက်လက် ဆောင်ရွက်မှာ ဖြစ်ကြောင်းလည်း ဒေါ်အောင်ဆန်းစုကြည်က ပြောပါတယ်။

ဒီအကြောင်းတွေနဲ့ ပတ်သက်ပြီး အပြည့်အစုံကို RFA က ဒီအပတ် ထုတ်လွှင့်မဲ့ လူထုနဲ့ ဒေါ်အောင်ဆန်းစုကြည် အစီအစဉ်မှာ နားဆင်ရမှာ ဖြစ်ပါတယ်။

Ref;RFA

Read More...

တော်ဝင်မင်္ဂလာမောင်နှံ လူထုကို နန်းတော်လသာဆောင်မှ နုတ်ဆက်

29 ဧပြီ 2011
ဗြိတိန်နိုင်ငံမှာ တော်ဝင်မင်္ဂလာ မောင်နှံအသစ်ဖြစ်ကြတဲ့ ကိန်းဘရစ်ဂ်ျ မြို့စားနဲ့ မြို့စား ကတော် မင်းသား ၀ီလျံနဲ့ ကက်သရင်း မစ်ဒဲလ်တန် တို့ဟာ ဘက်ကင်ဟမ် နန်းတော် လေသာဆောင်မှာ ပရိသတ်ထောင်ပေါင်း များစွာရဲ့ တောင်းဆိုမှုအရ မင်္ဂလာအနန်း တွေပေးပြီး နုတ်ဆက်ကြတာကို ပရိသတ်ကြီးက သောင်းသောင်းဖျဖျ အော်ဟစ်အားပေး ကြပါတယ်။ နန်းတော်ရှေ့လမ်းစုံအ၀ိုင်းမှာ လူအုပ်ကြီးက စောင့်မျှော်နေပြီး တော်ဝင်စုံတွဲ လေသာဆောင်ရှေ့ထွက် နုတ်ဆက်တာနဲ့ လူအုပ်ကြီးက ၀မ်းပန်းတသာ ကောင်းချီးပေး နုတ်ဆက်ကြတာပါ။

ခင်ပွန်းသည်နဲ့အတူ လူအုပ်ကြီးကို နုတ်ဆက်ဖို့ထွက်လာတဲ့ ကက်သရင်းက လက်ပြ ဝှေ့ယမ်း နုတ်ဆက်ကြတဲ့ လူအုပ်ကိုတွေ့တဲ့အခါ အံ့အားတသင့် ဝေါင်း (Wow) ဆိုတဲ့ အာမေဋိတ်စကား ဆိုခဲ့ပါတယ်။

တော်ဝင်မောင်နှံဟာ လွတ်လပ်ပျော်ရွှင်နေပုံရပြီး ပရိသတ်က သူတို့ရဲ့အနန်းကို ၀မ်းသာ အားရ အားပေးနုတ်ဆက်တဲ့အခါ ဆက်ပြီးတော့ အနန်းရှည် ပေးခဲ့ကြတယ်လို့ ဆိုပါတယ်။ မကြာခင်မှာပဲ လေသာဆောင်ကို ဘုရင်မကြီး အယ်လိဇဘက်၊ မင်းသားကြီး ဖိလစ်၊ အိမ်ရှေ့မင်းသား ချားလ်စ်နဲ့ ကြင်ယာ ကမဲလ်လာ၊ ကက်သရင်း ရဲ့မိဘတွေနဲ့ တော်ဝင်မိသားစုဝင်တွေ ထွက်လာပြီးတော့ တော်ဝင်မောင်နှံနဲ့အတူ ပရိသတ်ကို နုတ်ဆက်ကြပါတယ်။

တော်ဝင်လေတပ်နဲ့ Britain Memorial လေကြောင်းတို့ကလည်း ဝေဟင်မှာ ပြန်ဝဲ ပြီးတော့ ဂုဏ်ပြုခဲ့ကြပါတယ်။ မင်္ဂလာမောင်နှံဟာ မိသားစုဝင်တွေ ထွက်ခွာသွားပြီးတဲ့ အထိ လေသာဆောင်ကနေ မထွက်ခင် နောက်ဆုံးမိနစ်အထိ ပရိသတ်ကြီးကို လက်ဝှေ့ယမ်း နုတ်ဆက်ခဲ့ကြတဲ့ ကြည်နူးစရာ မြင်ကွင်းကို တွေ့မြင်ကြရပါတယ်။

Ref;VOA

Read More...

မြစ်ကြီးနားမှာ ပယင်း အဝယ်လိုက်

ဆိုင်းဆွတ်
ဧပြီလ ၂၉ ရက် ၂၀၁၁ ခုနှစ်

မြန်မာနိုင်ငံရှိ ရတနာ ၉ ပါးထဲမှ တပါးဖြစ်သော တွင်းထွက်ပစ္စည်း ပယင်းကို ကချင် ပြည်နယ်တွင် တရုတ်လူမျိုးများက ဈေးကောင်းပေးပြီး ဝယ်ယူနေကြောင်း စုံစမ်းသိရှိရ သည်။

ကချင်ပြည်နယ်တွင် ကျောက်စိမ်း၊ စလင်းနှင့် ပယင်း စသည့် သတ္တုပစ္စည်းများ ထွက်ရှိရာ ကျောက်စိမ်းကဲ့သို့ပင် ပယင်းမှာလည်း ယခုနှစ်အတွင်း လူကြိုက်များလာကာ အဝယ်လိုက် ခြင်း ဖြစ်သည်။

“ပိဿာနဲ့ ဝယ်တယ်။ တပတ်ကို ပိဿာ ၂ဝ လောက် ရောင်းရတယ်။ အများဆုံးက တရုတ်ပြည်က တရုတ်လူမျိုးတွေပဲ လာဝယ် ကြတယ်” ဟု မြစ်ကြီးနားရှိ ပယင်းရောင်း ဝယ်သူ ကုန်သည်တဦးက မဇ္ဈိမကို ပြောသည်။ တနိုင်းမြို့နယ်ထွက် ပယင်းကို ပန်းပု၊ ပုတီး၊ လက်ဝတ်ရတနာ၊ အဆောင် ပစ္စည်း၊ ကျန်းမာရေးအတွက် ဆေးဘက်ဝင် ကျောက် အဖြစ် အသုံးပြုသည်ဟု ဆိုသည်။

အရောင်များမှာ လိမ္မော်ကြည်၊ အဝါကြည်၊ ဒီဇယ်ခဲ၊ ဝက်ဆီဖတ်၊ ကြက်သွေး၊ ဖန်သား၊ ရွှေရောင် စသည်များ ဖြစ်ပြီး၊ ရွှေရောင်မှာ တန်ဖိုး အရှိဆုံး ဖြစ်သည်။

တရုတ်လူမျိုးများက ပယင်းကို ဆောင်ထားပါက နှလုံးသွေးလည်ပတ်မှု အားကောင်းပြီး စုန်း၊ မကောင်းဆိုးဝါးများ မကပ်စေရန် အဆောင်အနေဖြင့် ဝတ်ဆင်ထားကြသည်ဟု ပယင်းဝတ်ဆင်သူ အမျိုးသမီးကြီး တဦးက ပြောသည်။

အလှအပအဖြစ် ဝတ်ဆင်ထားသူ မြစ်ကြီးနားမြို့ခံတဦးကမူ “ကျမကတော့ အဆောင် သဘော Fancy ပုံစံလုပ်ပြီး ဝတ်တယ်။ ဆိုင်က Fancy တွေက လူတိုင်း ဝတ်နိုင် တယ်လေ။ ပယင်းက ဒီကချင်မှာပဲ ထွက်တယ်ဆိုတော့ လူတိုင်း မဝတ်နိုင်ဘူး” ဟု မဇ္ဈိမကို ပြောသည်။

ပယင်းကို ကျောက်စိမ်းနှစ်သက်သည့် တရုတ်ပြည်က အဝယ်လိုက်သော်လည်း ကျောက်စိမ်းကဲ့သို့ ဈေးမမြင့်ပေ။ အရည် အသွေးအပေါ် မူတည်ကာ၊ ဈေးနှုန်း ကွာခြားမှုလည်း ရှိသည်။

ပယင်းကို ကချင်တိုင်းရင်းသားထဲမှ လီဆူ လူမျိုးများက အများဆုံး တူးဖော်ပြီး၊ ယခင် က ကချင်တိုင်းရင်း အဖွားအိုများ နားတောင်း အဖြစ် ရတနာတပါး၊ ဆေးသဖွယ် ဝတ်ဆင်ခဲ့ကြသည်။

ရှမ်းပြည်နယ်၊ စစ်ကိုင်းတိုင်း ခန္တီးမြို့နယ်များတွင် ပယင်းထွက်ပြီး၊ ကချင်ပြည်နယ်တွင် ဇွမ်ပရာဘွမ်၊ တနိုင်းမြို့နယ်၌ ထွက်ရှိသည်။

တနိုင်းမြို့နယ် နန်းကွမ်းရွာ၌ ထွက်ရှိသော ပယင်းမှာ အဆင့်မြင့်ဆုံးဟု လီဆူအမျိုးသား ပယင်းကုန်သည်က ပြောသည်။

နန်းကွမ်းရွာရှိ ပယင်းလုပ်ကွက်များကို ကျောက်စိမ်းသူဋ္ဌေး ကချင်အမျိုးသား ဦးခမိုင်တန် ပိုင်ဆိုင်သည့် Sea San Star ကုမ္ပဏီက လုပ်ပိုင်ခွင့် ရရှိနေသည်။

ဦးခမိုင်တန်သည် ကြံ့ခိုင်ဖွံ့ဖြိုရေးပါတီကို ကိုယ်စားပြုကာ ဆွမ်ပရာဘွမ်မြို့နယ် မဲဆ န္ဒနယ် ၂ တွင် ယှဉ်ပြိုင်ရန် ပြင်ဆင်ခဲ့ သော်လည်း ပယ်ဖျက်ထားသည့် မဲဆန္ဒနယ် ဖြစ်သွားသဖြင့် ကြံ့ဖွံ့ပါတီဝင်အဖြစ် ရှိနေ သည်။

ပယင်းတူးဖော်ရန် ကျင်းတကျင်းဝယ်လျှင် ကျပ်တသိန်း ဝန်းကျင်ဖြင့် ဝယ်ယူကြရပြီး၊ တကျင်းလျှင် ၄ ပေ ပတ်လည်နှင့် အမြင့် ၇ ပေ အထိ တူးဖော်ရသည်။

ပယင်းသည် မီးရှို့လျှင် အလွယ်တကူ လောင်ကျွမ်းနိုင်ပြီး၊ အိမ်နီးချင်း တရုတ်၊ ထိုင်းနှင့် တိဘက် နိုင်ငံများက အဓိက ဝယ်ယူသည်။

Ref;Mizzima

Read More...

စကတ်တိုဖြင့် ကစားမည်ဟု MBF ပြော

ကျော်ခ
ဧပြီလ ၂၉ ရက် ၂၀၁၁ ခုနှစ်

မြန်မာကြက်တောင်မယ်များအနေဖြင့် ကမ္ဘာ့ကြက်တောင်အဖွဲ့ချုပ်၏ စည်းမျဉ်းသစ်အတိုင်း နိုင်ငံတကာ ပွဲစဉ်များ၌ စကတ်တိုဖြင့်ပင် ကစားသွားမည်ဟု မြန်မာနိုင်ငံ ကြက်တောင် အဖွဲ့ချုပ်က ပြောဆိုသည်။

ဧပြီလ ၂၁ ရက်နေ့တွင် ကမ္ဘာ့ကြက်တောင်အဖွဲ့ချုပ် World Badminton Federation - WBF က စကတ်တို ဝတ်ဆင်ကစားရန် စည်းမျဉ်းသစ်ထုတ်ခဲ့သဖြင့် မြန်မာကြက်တောင် မယ်များလည်း ထိုစည်းမျဉ်းအရ ကစားမည်ဟု မြန်မာနိုင်ငံ ကြက်တောင်အဖွဲ့ချုပ် Myanmar Badminton Federation – MBF က ပြောဆိုခြင်း ဖြစ်သည်။

“ကျနော်တို့နိုင်ငံမှာ အရင်ကတည်းက အမျိုးသမီးရော၊ အမျိုးသားရော ဘောင်းဘီတိုနဲ့ပဲ ကစားတာဆိုတော့ ဒီစည်းကမ်းအသစ်က ကျနော်တို့အတွက် ပြဿနာမရှိပါဘူး။ အဓိက ကတော့ ကစားသမားအတွက် အဝတ်အစားက သက်တောင့်သက်သာ ဖြစ်ဖို့ပဲ အရေးကြီးတာပါ” ဟု MBF အတွင်းရေးမှူး ဦးရော်ဘင်တင်က မဇ္ဈိမကို ပြောသည်။

ယခုနှစ် ဇွန်လ ၁ ရက်နေ့မှစ၍ စည်းမျဉ်း သစ်ကို အကောင်အထည်ဖော်မည် ဟု WBF ထုတ်ပြန်ချက်၌ ပါရှိသည်။

သို့သော် ယင်းထုတ်ပြန်ချက်သည် ပါကစ္စတန် အမျိုးသမီး ကစားသမားများ အတွက် ဘာသာရေး တားမြစ်ချက်များ နှင့် ဆန့်ကျင်နေသဖြင့် လက်ခံမည် မဟုတ် ကြောင်း ပါကစ္စတန် ကြက်တောင်အဖွဲ့ချုပ် Pakistan Badminton Federation - PBF ၏ ဒုဥက္ကဋ္ဌ ဆိုက် နကီ မိုစင် Syed Naqi Mohsin က ပြောဆိုကြောင်း ပါကစ္စတန်နိုင်ငံ Daily Time သတင်းစာတွင် ဖော်ပြထားသည်။

ပါကစ္စတန်၊ အီရန်နှင့် အစ္စလာမ်နိုင်ငံများမှ အားကစားမယ်များသည် နိုင်ငံတကာ အားကစားပြိုင်ပွဲများ၌ ဝင်ရောက်ယှဉ်ပြိုင်ရာ၌ ဘောင်းဘီရှည် ဝတ်ဆင်၍ ကစားလေ့ ရှိသည်။

“WBF ကလည်း ကစားသမားတွေအတွက် လွတ်လွတ်ကျွတ်ကျွတ် ကစားရအောင်ပဲ ရွေးချယ်တယ်လို့ မြင်ပါတယ်။ ကျနော်တို့မြန်မာတွေအတွက်တော့ ဒီဝတ်စုံဟာ ပြဿနာ မဟုတ်ဘူးလို့ မြင်တယ်” ဟု ဝါရင့် အားကစား ကလောင်ရှင် ဦးခင်မောင်ထွေး (ပျဉ်းမနား) က မဇ္ဈိမကို ပြောသည်။

အင်္ဂလန်နိုင်ငံ၌ ၁၈၇၃ ခုနှစ်မှစ၍ ကစားလာခဲ့သည့် ကြက်တောင် အားကစားကို မြန်မာနိုင်ငံသို့ အင်္ဂလိပ်များ အုပ်ချုပ်စဉ်ကာလ ၁၉၁ဝ ခုနှစ်တွင် ရောက်ရှိလာခဲ့ပြီး၊ ၁၉၄၈ ခုနှစ်တွင် ကြက်တောင်အဖွဲ့ချုပ် တည်ထောင်ခဲ့သည်။

မြန်မာကြက်တောင်အဖွဲ့ လက်ရွေးစင် အသင်းအနေဖြင့် ၁၉၉၅ ခုနှစ်တွင် ထိုင်းနိုင်ငံ၌ ကျင်းပသည့် အရှေ့တောင်အာရှ ပြိုင်ပွဲတွင် တတိယ ကြေးတံဆိပ်ဆု ရရှိခဲ့သလို၊ ၂ဝဝ၅ ခုနှစ် အရှေ့တောင်အာရှ ပြိုင်ပွဲတွင် အသက် ၁၆ နှစ်အောက် ဝင်ရောက်ယှဉ်ပြိုင်ရာ တတိယ ကြေးတံဆိပ် ထပ်မံရရှိခဲ့သည်။

ယခုအခါ မြန်မာနိုင်ငံတဝှန်း ကြက်တောင်ကလပ်အသင်းပေါင်း ၈ဝ ကျော်ရှိပြီး၊ ကစား နေသူ ၃ဝဝဝ ခန့်ရှိကြောင်း ဦးရော်ဘင်တင်က ပြောသည်။ ထို့အတူ ၂ဝ၁၃ ခုနှစ် မြန်မာ နိုင်ငံ၌ ကျင်းပမည့် အရှေ့တောင်အာရှ ဆီးဂိမ်းပြိုင်ပွဲအတွက် ကြက်တောင်အဖွဲ့ချုပ် အနေဖြင့် ပြင်ဆင်နေသည်ဟု ဆိုသည်။

Ref;Mizzima

Read More...

အိုက်ဇောတွင် မြန်မာများ ရဲဖမ်းခံရ

သဲသဲ
ဧပြီလ ၂၉ ရက် ၂၀၁၁ ခုနှစ်

တရားမဝင် မြန်မာရွှေ့ပြောင်းလုပ်သားများ ရှိနေသည့် အိန္ဒိယနိုင်ငံ မီဇိုရမ်ပြည်နယ် အိုက်ဇောမြို့၌ လွှဆွဲလုပ်ငန်း လုပ်ကိုင်ရန် ရောက်ရှိလာသူ မြန်မာနိုင်ငံသား ၁၆ ဦးကို ရဲများက မြို့လယ်ဈေးကြီးအတွင်း သောကြာနေ့တွင် ဖမ်းဆီးခဲ့သည်ဟု သိရသည်။

ဒေါ်ရ်ပွီး Dawpuii ရပ်ကွက်ရှိ မြို့လယ်ဈေးကြီးတွင် ဖွင့်လှစ်ထားသည့် စားသောက်ဆိုင် တဆိုင်၌ တည်းခိုနေသည့် လွှဆွဲလုပ်သား မြန်မာ ၁၆ ဦးကို နေထိုင်ခွင့် အထောက်အထား မရှိသဖြင့် ရဲက ဖမ်းဆီးသွားခြင်းဖြစ်သည်။

“ဈေးထဲမှာလည်း ဖြစ်တယ်။ နောက်ပြီး သူတို့တွေကို မြန်မာပြည်သားဆိုတာ တန်းသိ နိုင်တယ်။ မြန်မာတွေကို ဖမ်းချင်ရင် စားသောက်ဆိုင်နဲ့ တွဲနေတဲ့ တည်းခိုခန်းတွေ မှာ သူတို့က ဝင်ဖမ်းလေ့ရှိတယ်။ ရဲတွေကလည်း ဝင်ဖမ်းတော့ ဘေးနားက ရက်ကန်းရုံက မြန်မာတွေပါ ထွက်ပြေးကုန်ရော” ဟု အိုက်ဇောမြို့ မြန်မာလူမှုရေးအသင်းမှ တာဝန်ရှိ သူတဦးက မဇ္ဈိမကို ပြောသည်။ အဖမ်းခံရသူ ၁၆ ဦးအနက် ချင်းတိုင်းရင်းသား တီးတိန်ဒေသခံ အများစု ပါဝင်သည်ဟု ဆိုသည်။

Chawlh Hmun ရပ်ကွက်အတွင်းရှိ ကျောက်ထုလုပ်သားများလည်း အဖမ်းခံရကြောင်း ကြားသိရသော်လည်း အရေအတွက် မသိရသေးကြောင်း သူက ဆက်ပြောသည်။

ပြည်နယ်အစိုးရက မြန်မာများကို ရက်သတ္တပတ် နှစ်ပတ်ကြာ တရားဝင် နေထိုင်ခွင့်ကဒ်ဖြင့် နေခွင့်ပေးသော်လည်း ရွှေ့ပြောင်းလုပ်သား မြန်မာအများအပြားသည် ထိုတရားဝင်ကဒ်ဖြင့် နေထိုင်သည်များ နည်းပါးသည်။

တရားမဝင် နေထိုင်သူများကို နိုင်ငံခြားသားအမှုဖြင့် ဖမ်းဆီးပြီး နှစ်နိုင်ငံနယ်စပ်ရှိ တီအိုချောင်းသို့ ပြန်ပို့ကာ နေရပ်ပြန်ခိုင်းသည်များ ရှိသည်။ ၂ဝ၁ဝ သြဂုတ်လတွင် မြန်မာ ၆ဝ ကျော်ကို ဖမ်းဆီးကာ ထိုသို့ပင် ပြန်ပို့ခဲ့သေးသည်။ မြန်မာများကို ဖမ်းဆီးရာ၌ ရဲများ သာမက ပြည်နယ်တွင်း သြဇာရှိသည့် မီဇိုလူငယ်အသင်း YMA က ပူးပေါင်းပါဝင် လေ့ရှိသည်။

မြိုတော်အိုက်ဇောတွင် မြန်မာများကို ဖမ်းဆီးလေ့ရှိသော်လည်း ယခုနှစ်အတွင်း အဖမ်း အဆီး ပိုစိတ်လာခြင်းမှာ မူးယစ်ဆေးဝါး ရောင်းဝယ်မှု၌ မြန်မာနိုင်ငံသားတချို့ပါဝင် ပတ်သက် မှု ရှိနေခြင်းကြောင့် ဖြစ်နိုင်ကြောင်း အိုက်ဇောရှိ မြန်မာတဦးက ပြောသည်။

“အရင်ကဖမ်းတယ်ဆိုပေမယ့် ရဲကို ငွေပေးပြီး ညှိလို့ရတယ်။ နောက်ပြီး ဖမ်းတာလည်း ပိုပြီး စိတ်လာတယ်။ မြန်မာနိုင်ငံသားထဲမှာ နယ်စပ်ကနေ မူးယစ်ဆေးဝါးတွေသယ်ပြီး ဒီမှာ ရောင်းတဲ့ သူတွေကို မိလာပြီးနောက်ပိုင်း ပိုပြီးတော့ ကျပ်လာတယ်။ ဒီနှစ်ဆို ၄ ခါလောက်ရှိပြီ၊ ဖမ်းနေတာ” ဟု သူက ဆိုသည်။

အိုက်ဇောတွင် မြန်မာနိုင်ငံသားများနှင့် ဆက်စပ်ပတ်သက်သော မူးယစ်ဆေးဝါးအမှု ၆ဝ ခန့်ရှိကြောင်း အိုက်ဇော မူးယစ်ဆေးဝါး နှိမ်နင်းရေးဌာန၏ ၂ဝ၁ဝ ခုနှစ် သြဂုတ်လထုတ် စာရင်းများအရ သိရသည်။

ချင်းပြည်နယ်နှင့် ကီလိုမီတာ ၄ဝဝ ကျော် နယ်နမိတ် ဆက်စပ်နေသည့် မီဇိုရမ်တွင် မြန်မာနိုင်ငံသား ရွှေ့ပြောင်းလုပ်သား ၅ သောင်းထက်မနည်း ရှိနေ သည်ဟုခန့်မှန်းကာ ချင်းတိုင်းရင်းသား အများဆုံးဖြစ်သည်။

အများစုမှာ ရက်ကန်း၊ ပန်းတိမ်၊ ကားဝပ်ရှော့ပ်၊ စားသောက်ဆိုင်၊ လမ်းပြင်လမ်းဖောက်နှင့် ဈေးသည်လုပ်ငန်း အပါအဝင် လုပ်ငန်းမျိုးစုံတွင် ဝင်ရောက်လုပ်ကိုင်နေကြသည်။

Ref;Mizzima

Read More...

စက်ရုံ စီးနင်းသော အလုပ်သမားများ အလုပ်ပြန်ဆင်း

သန်းထိုက်ဦး
29 April 2011

ကြက်သား စက်ရုံ ကုမ္ပဏီမှ လုံခြုံရေး အစောင့်အကျပ်များနှင့် ခိုက်ရန်ဖြစ်ပွားခဲ့သော မြန်မာ အလုပ်သမားများတွင် ထိခိုက် ဒဏ်ရာရရှိသူတဦးကို နစ်နာကြေးငွေ ပေးမည် ဟူသော အလုပ်ရှင်၏သဘောတူညီမှုဖြင့် ဆန္ဒပြမှုကို ရပ်ဆိုင်းလိုက်ပြီး ယနေ့ အလုပ်ပုံမှန် ပြန်ဆင်းနေကြောင်း သိရသည်။

ထိုင်းနိုင်ငံ မြောက်ပိုင်း ဖဲ့ချဘွန်း (Phechabun) ခရိုင် Bueng Samphan မြို့နယ် တွင်ရှိသော Saha Farms ကြက်သား စက်ရုံ ကုမ္ပဏီမှ မြန်မာ အလုပ်သမားများ အဆောင်အနီးတွင် ဂစ်တာတီးနေစဉ် ထိုင်းလုံခြုံရေး အစောင့်အကျပ်များနှင့် ခိုက်ရန်ဖြစ် ပွားခဲ့ပြီး ယခုတပတ် ဗုဒ္ဓဟူးနေ့က စတင်၍ အလုပ်သမား ၁၀၀၀ ခန့် သပိတ်မှောက် ခဲ့ကြခြင်း ဖြစ်သည်။

လုံခြုံရေး အစောင့်အကျပ်များက ၀ိုင်းရိုက်ခဲ့သော အသက် ၂၀ အရွယ်ရှိ ကိုမင်းမင်း ဆိုသူကို အလုပ်ရှင်က နစ်နာကြေး ဘတ် ငွေ ၂၀၀၀၀ ပေးမည်ဟု သဘောတူညီမှုရရှိ ကာ ဆန္ဒပြမှုများကို ရပ်ဆိုင်းပြီး အလုပ်ပြန်ဆင်းနေပြီ ဖြစ်ကြောင်း ၎င်း စက်ရုံမှ အလုပ်သမား ကိုနိုင်က ဧရာဝတီသို့ ပြောသည်။

အခင်းဖြစ်ပွားခဲ့သည့် နေ့က မြန်မာအလုပ်သမားများက ဓားစာခံအဖြစ် ဖမ်းဆီးထားသော လုံခြုံရေး အစောင့်အကျပ် တဦးကို လည်း ပြန်လွှတ်ပေးလိုက်ကြောင်း ၎င်းက ဆိုသည်။

အလုပ်သမားများက ကုမ္ပဏီ လုံခြုံရေး အစောင့်အကျပ်များ ပိုင်သော ကားနှင့် ဆိုင်ကယ် တို့ကို ဖျက်စီးမှုနှင့် ပတ်သက်ပြီး အလုပ်ပိုင်ရှင်က ဖြေရှင်းပေးခဲ့ကြောင်း၊ အလုပ်သမားများ ခိုက်ရန်ဖြစ်ပွားသောနေ့တွင် ဓာတ်ပုံလာရိုက်သည့် နယ်မြေခံ ရဲ ၅ ဦးထဲမှ တဦးကို ဖမ်းဆီးခဲ့ကြောင်း သိရသည်။

သို့သော် ဖမ်းဆီးခဲ့သည့် ရဲကို ယမန်နေ့က ပြန်လွှတ်ပေးလိုက်ပြီး ၎င်း၏ ပစ္စတိုသေနတ်၊ စကားပြောစက်နှင့် ကင်မရာ အပါအ ၀င် ဖုန်းများ ပျောက်ဆုံးခဲ့ကြောင်း အလုပ်သမား ကိုနိုင် က ရှင်းပြသည်။

“ဖုန်းနဲ့ ကင်မရာတို့ကို သူဘာမှ မပြောဘူး၊ အဓိက သူလိုချင်တာက သေနတ်ကိုပေါ့နော်၊ ကျနော်တို့လည်း ပြန်ရှာသေးတယ်၊ ဒါပေမယ့် မတွေ့ဘူး”ဟု ဆိုသည်။ သေနတ်ကို ယူသွားသူများက ပြဿနာတက်မည်ကို စိုးရိမ်သောကြောင့် ရဲကို ပြန်မပေးရဲ ခြင်း ဖြစ်နိုင် ကြောင်း ကိုနိုင်က ဆက်လက်ပြောဆိုသည်။

အလုပ်သမားများ စက်ရုံကို မစီးနင်းချိန်ကာလ အထိ ပြဿနာ အဖြေရှာ၍ရသည့် စက်ရုံ ပဋိပက္ခတခုသာဖြစ်သည်ဟု ဖဲ့ချဘွန်း ခရိုင် ၀န်ကြီး Kongekwilas Rujiwatthanaphongကို ကိုးကား၍ ယနေ့ The Nation သတင်းစာ၌ ဖော်ပြ ထားသည်။

စက်ရုံအနီးအနား၌ နေထိုင်သည့် ထိုင်း အမျိုးသမီးတဦးကလည်း“မြန်မာ အလုပ် သမားတွေကို လူလို မဆက်ဆံပါဘူး”ဟုပြော ဆိုကြောင်း The Nation တွင် ပါရှိသည်။

မြန်မာ အလုပ်သမားများသည် ကုမ္ပဏီလုံခြုံရေး အစောင့်အကျပ်များ၏ မတရား နှိပ်စက် မှုများကိုလည်း မကြာခဏခံရကြောင်း ၎င်းက ဆိုသည်။

လူ့အခွင့်အရေးနှင့် ဖွံ့ဖြိုးရေး ဖောင်ဒေးရှင်း(HRDF) က ညွှန်ကြားရေးမှူး အန်ဒီဟောလ် ကလည်း အလုပ်သမားများသည် ယာယီ နိုင်ငံကူးလက်မှတ် ရရန်အတွက် ကြိုးပမ်းနေ ကြောင်း၊ အလုပ်သမားများ အနေဖြင့် အလုပ်သမားအခွင့် အရေးကို အပြည့်အ၀ မရရှိသော ကြောင့် မကျေနပ်မှုများ တနေ့တခြား ကြီးထွားလာကြောင်း ပြောသည်။

ယင်း အခင်းဖြစ်ပွားသည့် ကိစ္စနှင့် ပတ်သက်၍ အဖြစ်မှန်ကို သေချာသိရှိနိုင်ရန် အာဏာပိုင်များက စုံစမ်း ဖော်ထုတ်ရမည် ဖြစ် ကြောင်းလည်း ၎င်းက ဆိုသည်။

အလုပ်သမားများ အဆိုအရ ဓားစာခံ အဖြစ် အဖမ်းခံရသော ရဲကို အလုပ်သမားများက ရိုက်နက်ခဲ့သည့်အတွက် အလုပ်ပိုင်ရှင် ကထိုက်တန်သော နစ်နာကြေးပေးမည် ဖြစ်ကြောင်း ပြောသည်။ အတည်မပြုနိုင်သော သတင်းများ အရ ဘတ်ငွေ ၅၀၀၀၀ ပေးမည် ဟု ကြားသိရသည်။

ယင်း အလုပ်ရုံတွင် အလုပ်လုပ်နေသူများသည် မြန်မာနှင့် ကရင်တိုင်းရင်းသားများ ဖြစ်ကြပြီး တရားဝင် အလုပ်လုပ်သမား လက်မှတ် မရှိသူ အများစုဖြစ်ကြောင်း သိရသည်။

အခင်ဖြစ်ပွားခဲ့သည့် နေ့က လုံခြုံ ရေးတင်းကျပ်ထားသော်လည်း အင်အားသုံး ဖြိုခွင်းခဲ့သည့် သတင်းများ ထွက်ပေါ်လာခြင်း မရှိပေ။ ယမန်နေ့ ညနေကလည်း စက်ရုံအနီး တွင် လုံခြုံရေး တင်းကျပ်ထားသော ရဲနှင့် လူဝင်မှု ကြီးကြပ်ရေး(လ၀က) တို့က ပြန်ရုပ်သိမ်းသွားပြီး ဖြစ်ကြောင်း အလုပ်သမားများက ပြောသည်။

ထိုင်းနိုင်ငံတွင် အလုပ်သမား လက်မှတ်ဖြင့် တရားဝင် အလုပ်လုပ်ခွင့် ပေးထားသူ မြန်မာနိုင်ငံသား တသန်းသုံး သိန်းခန့်ရှိ ကြောင်း ထိုင်းအလုပ်သမား ၀န်ကြီးဌာန၏ ထုတ်ပြန်ချက်များအရ သိရသည်။

မြန်မာ အလုပ်သမားအရေး ဆောင်ရွက်သည့် အဖွဲ့အစည်းများက ထိုင်းတွင် အလုပ်သမား လက်မှတ် ကိုင်ဆောင်ထားသူနှင့် တရားမ၀င် အလုပ်လုပ်ကိုင်နေသော မြန်မာနိုင်ငံသား၂ သန်းခွဲမှ ၄ သန်း အတွင်း ရှိနိုင်သည်ဟု ခန့်မှန်း ပြောဆိုသည်။

Ref;Irrawaddy

Read More...

ကျောက်ဖြူ ပြည့်တန်ဆာခန်းများ အာဏာပိုင်များ ကာကွယ်ပေးနေ

ခင်ဦးသာ
29 April 2011

ရခိုင်ပြည်နယ် ကျောက်ဖြူမြို့ရှိ ရပ်ကွက်တချို့၌ ကာရာအိုကေဆိုင်များ၊ ပြည့်တန်ဆာ လုပ်ငန်းများ ပေါများလာပြီး ထိုလုပ်ငန်းများ၏ လုံခြုံရေးကို သက်ဆိုင်ရာ အာဏာပိုင် များက အခကြေးငွေယူကာ တာဝန်ယူ ဆောင်ရွက်ပေးနေကြောင်း သတင်းရရှိသည်။

“ည ၉ နာရီ၊ ၁၀ နာရီလောက်ဆိုရင် ရေနက်ဆိပ်ကမ်းအတွက် ရောက်နေတဲ့ တရုတ်နိုင်ငံသားတွေက ပိုက်ဆိပ် ရပ် ကွက်ဘက်ကို အလှူသွားသလိုပဲ အစု လိုက် အပြုံလိုက် သွားနေကြတာ။ သူတို့ရဲ့ လုံခြုံရေးကို ရဲတပ်ဖွဲ့နဲ့ ရပ်ကွက်၊ မြို့နယ် အာဏာပိုင်တွေက တာဝန် ယူပေးထားတယ်” ဟု ကျောက်ဖြူမြို့ ခံ တဦးက ပြောသည်။

ကျောက်ဖြူမြို့တွင် ၂၀၁၀ ပြည့်နှစ် နှောင်းပိုင်းမှစ၍ ပြည့်တန်ဆာ လုပ်ငန်းများ ပေါများ လာကြောင်း၊ ရန်ကုန်မြို့မှ လိင်အလုပ်သမ ရာနှင့်ချီ ခေါ်ဆောင်လာကာ ပိုက်ဆိပ် ရပ်ကွက်၊ ဆားပြင်ကွင်းရပ်ကွက်၊ စေတီတောင် ရပ်ကွက်တို့၌ ဖွင့်လှစ်ထားသော ပြည့်တန်ဆာခန်းများတွင် လုပ်ကိုင်ခိုင်းထားကြောင်း သိရသည်။

ထိုလုပ်ငန်းများကို ပေါ်ပေါ်ထင်ထင် လုပ်ကိုင်နေကြသောကြောင့် ဒေသခံများက ၎င်းတို့၏ သားသမီးများ၊ ပညာသင်အရွယ် လူငယ်များအတွက် စိုးရိမ်မှုများဖြစ်နေကြသည်ဟု မြို့ခံ များက ဆိုသည်။

ကျောက်ဖြူမြို့နယ် မဒေးကျွန်းပေါ်၌ တည်ဆောက်နေသော ကျောက်ဖြူရေနက် ဆိပ်ကမ်း စီမံကိန်း၊ သဘာဝဓာတ်ငွေ့ သန့်စင် စက်ရုံစီမံကိန်း လုပ်ငန်းများအတွက် ရောက်ရှိနေသော တရုတ်နိုင်ငံသားများ၏ လိင် ဖြေဖျော်ရေးအတွက် အဆိုပါ ပြည့်တန်ဆာခန်းများကို ဖွင့်လှစ် ထားခြင်းဖြစ်သည်ဟု ဒေသခံများက ရှင်းပြသည်။

စီမံကိန်းလုပ်ငန်းများအတွက် တရုတ်နိုင်ငံသားများ ထောင်နှင့်ချီ၍ ကျောက်ဖြူမြို့သို့ ရောက်ရှိနေပြီး မေလနှင့်ဇွန်လတွင် တရုတ်နိုင်ငံသား ၁၀၀၀ ခန့် ထပ်မံရောက်ရှိဦးမည်ဟု ရခိုင်ပြည်နယ် ၀န်ကြီးချုပ် ဦးလှမောင်တင်က ပြီးခဲ့သည့်ရက်ပိုင်းက ကျောက်ဖြူမြို့သို့ ရောက်လာစဉ် ပြောဆိုသွားကြောင်း မြို့ခံ ပြည်ထောင်စု ကြံ့ခိုင်ရေးနှင့် ဖွံ့ဖြိုးရေးပါတီ (ကြံ့ဖွံ့ပါတီ) ၀င် တဦးက ပြောသည်။

“ဦးလှမောင်တင်က တရုတ်တွေရဲ့လုံခြုံရေး၊ နေထိုင်ရေးတွေကို ဒေသခံတွေ ပါဝင် ကူညီပေးဖို့လည်း ပြောသွားတယ်။ ဒီအပေါ်မှာ မြို့ခံတွေက ၀န်ကြီးချုပ်ကို မကျေမနပ် ဖြစ်နေကြတယ်” ဟု ၎င်းက ဆိုသည်။

ရခိုင်ပြည်နယ်ဝန်ကြီးချုပ် ဦးလှမောင်တင်သည် ကျောက်ဖြူမြို့သို့ ပြည်နယ်အစိုးရအဖွဲ့၏ တာဝန်ရှိသူ တဦးအနေဖြင့် လာ ရောက်ခဲ့သော်လည်း ကြံ့ဖွံ့ပါတီဝင်များနှင့်သာ တွေ့ဆုံခဲ့ပြီး တခြားသော အဖွဲ့အစည်းများ၊ နိုင်ငံရေးပါတီ ကိုယ်စားလှယ် များနှင့် တွေ့ဆုံမှုမရှိခဲ့ဟု သိရ သည်။

“သူက ကြံ့ဖွံ့ပါတီဝင်ဆိုပေမယ့် ပြည်သူ့ကိုယ်စားလှယ်ဖြစ်နေပြီလေ။ ဒါပေမယ့် ပါတီစွဲ ပုဂ္ဂိုလ်စွဲ ထားနေတုန်းပဲ။ ဒေသခံ အားလုံးနဲ့ တွေ့ဆုံ ဆွေးနွေးသင့်ပါတယ်” ဟု ကျောက်ဖြူမြို့မှ ရခိုင်တိုင်းရင်းသားများ တိုးတက်ရေး (RNDP) ပါတီဝင် တဦးက ဝေဖန် သည်။

ကျောက်ဖြူမြို့ပေါ်၌ ပြည့်တန်ဆာလုပ်ငန်းများ ပေါ်ပေါ်ထင်ထင် လုပ်ဆောင်နေသည့် ကိစ္စ ကိုမူ ပြည်နယ်ဝန်ကြီးက တစုံတရာ ပြောဆိုသွားခြင်း မရှိဟု သိရသည်။

ပြည်နယ်ဝန်ကြီးချုပ်အပြင် အဖွဲ့ဝင် ၀န်ကြီးများသည်လည်း ကျောက်ဖြူမြို့သို့ မကြာခဏ ရောက်ရှိနေသည့်တိုင် ထိုဒေသ တ၀ိုက်၌ ဒေသအာဏာပိုင်များ၏ ခြိမ်းခြောက်မှု၊ ဒေသခံ စစ်တပ်၏ ဆက်ကြေး မတရားတောင်းခံနေမှု၊ အခွန်အခ မတရားကောက်ခံနေမှု များသည် တစုံတရာ အပြောင်းအလဲမရှိဘဲ ပိုမိုဆိုးလာသည်ဟု ကျောက်ဖြူဒေသခံများ၏ ပြောဆိုချက်အရသိရသည်။

ကျောက်ဖြူရေနက်ဆိပ်ကမ်း စီမံကိန်းပေါ်ပေါက်ပြီးနောက်ပိုင်းတွင် လုံခြုံရေးအတွက်ဟု ဆိုကာ စစ်တပ်အင်အားတိုးချဲ့လာပြီး ကျောက်ဖြူ လေတပ်စခန်း ဌာနချုပ် လက်အောက်ခံ စစ်တပ်မှ စက်လှေများသည် ပင်လယ်ပြင်အား ကြီးစိုး၍ ဆက်ကြေး တောင်းခံခြင်းများ ဆက်တိုက် လုပ်နေကြောင်း သိရသည်။

“ကျောက်ဖြူဆိပ်ကမ်းကို ဘယ်လိုလှေမျိုးပဲ လာလာ ပိုက်ဆံတောင်းတယ်၊ ပင်လယ်ထဲမှာ စစ်တပ်စက်လှေတွေ ဟိုနားတစင်း၊ ဒီနားတစင်း ဖြန့်ချထားပြီး မြင်တဲ့ စက်လှေတိုင်းကို ကပ်ခိုင်းတယ်၊ လှေပေါ်တွေ့တာယူတယ်၊ ပိုက်ဆံတောင်းတယ်၊ ကပ်ခိုင်းလို့ မကပ်ပေးရင် သေနတ်နဲ့ ပစ်တယ်” ဟု ကျောက်ဖြူ - တောင်ကုတ် ပြေးဆွဲနေသော စက်လှေပိုင်ရှင် တဦးက ဆိုသည်။

“မြို့ပေါ်သွားရင် ဟိုပစ္စည်းဝယ်လာပေးပါ၊ ဒီပစ္စည်းဝယ်လာပေးပါ ဆိုပြီးမှာတယ်။ ၀ယ်လာ ပေးပြီးရင် ပိုက်ဆံပြန်မပေးဘူး၊ကျေးဇူးပဲ သွားလို့ရပြီ ဆိုပြီး ပြောတယ်” ဟု စက်လှေ ပိုင်ရှင်က ၎င်း၏ အတွေ့အကြုံကို ပြောပြသည်။

မောင်းလာသည့် စက်လှေအား ပိုက်ဆံတောင်းရန် ကမ်းကပ်ခိုင်းရာ အနည်းငယ် နောက်ကျသွား၍ ကျောက်ဖြူ မြို့နယ် အခြေစိုက် တပ်ရင်း ၅၄၂ မှ တပ်ကြပ် တဦးက သေနတ်ဖြင့် ပစ်ခတ်သောကြောင့် ကျောက်ဖြူမြို့ ကွင်းချောင်းအုပ်စု မင်းတပ်ချောင် ကျေးရွာမှ အသက် ၂၆ နှစ် အရွယ်ရှိ ကိုမောင်ဝင်း ပြီးခဲ့သည့် ၂၀၁၀ ဒီဇင်ဘာလ ကသေဆုံးခဲ့ရသည်။

ကျောက်ဖြူ ရေနက်ဆိပ်ကမ်း စီမံကိန်းအပြင် ၎င်းနှင့်ဆက်နွှယ်နေသော စီမံကိန်းများကို ကျောက်ဖြူမြို့နယ် မဒေးကျွန်း မလာကျွန်း၊ ကျောက်ဖြူမြို့ပေါ်တို့၌ အသီးသီး တည်ဆောက် နေကြပြီး သဘာဝဓာတ်ငွေ့ ပိုက်လိုင်းနှင့်အတူကျောက်ဖြူ - လားရှိုး - မူဆယ်မှတဆင့် တရုတ်နိုင်ငံသို့ ဖောက်လုပ်မည့် မီးရထားလမ်း စီမံကိန်းကိုလည်း မကြာမီ တည်ဆောက်မည်ဟု သိရသည်။

မီးရထားလမ်း စီမံကိန်းနှင့်ပတ်သက်၍ တရုတ်နိုင်ငံ China Railway Engineering Corporation ၏ ဥက္ကဋ္ဌ Mr-Li Chang Jin ဦးဆောင်သော တရုတ်အဖွဲ့နှင့် မြန်မာ အစိုးရ တို့သည် နားလည်မှု စာချွန်လွှာ လက်မှတ်ရေးထိုးခဲ့ပြီး ထိုစီမံကိန်းသည် ၃ နှစ်ခန့် ကြာမြင့်မည်ဟု ဧပြီလ ၂၈ ရက်နေ့ထုတ် အစိုးရသတင်းစာများ၌ ရေးသားထား သည်။

Ref;Irrawaddy

Read More...

ဗြီတိသျှ တော်ဝင်မင်္ဂလာပွဲ မြန်မာများလည်း စိတ်ဝင်စား

နရီလင်းလက်
29 April 2011

တကမ္ဘာလုံးမှ စိတ်ဝင်တစား စောင့်ကြည့်နေကြသည့် ဗြိတိန်ထီးနန်း၏ ဒုတိယမြောက် တော်ဝင် မင်းသား ဝီလျံ နှင့် ကိတ် မစ်ဒယ်လ်တန် တို့၏ မင်္ဂလာပွဲကို ၀က်စ်မင်စတာ ဘုရားကျောင်းတွင် ယနေ့ ပြုလုပ်ခဲ့ရာ လန်ဒန်ရောက် မြန်မာများလည်း သွားရောက် ကြည့်ရှုခဲ့သည်ဟု သိရသည်။

Prince-William

“လောလောဆယ် ၀က်စ်မင်စတာ ဘုရားကျောင်းရှေ့ဆုံးမှာရောက်နေတယ်။ ဒီနေ့ အစ်မနဲ့ အတူ အောက်စ်ဖို့ တက္ကသိုလ်၊ လန်ဒန် တက္ကသိုလ်နဲ့ တခြား တက္ကသိုလ်တွေက မြန်မာ သူငယ်ချင်း ၄၀ လောက် ပွဲလာကြည့်ကြတယ်။ နေရာတွေကတော့ တယောက်နဲ့ တယောက် မတူဘူးပေါ့”ဟု လန်ဒန်မြို့တွင် နေထိုင်သည့် မသင်းမာ က ဧရာဝတီကို ပြောပြ သည်။

အောက်စ်ဖို့် တက္ကသိုလ်တွင် Nursing Management ဘာသာရပ်သင်ကြားနေသည့် မသင်းမာက“တော်ဝင် ဘုရင်မကြီးရဲ့ မြေး မင်္ဂလာဆောင်ဖြစ်သလို ၊ ဘုရင်စနစ်ကို လေးစားတဲ့ သူတွေက စိတ်ဝင်တစား စောင့်ကြည့်တဲ့ပွဲပေါ့။ သတင်းပေါင်းစုံကို နေ့တိုင်းကြည့်နေရတော့ အခု အရှေ့အလယ်ပိုင်းမှာဆိုရင်လည်း အာဏာလုပွဲတွေ အမျိုးမျိုးဖြစ်နေတယ်။ စိတ်ညစ်စရာ သတင်းတွေရှိရင်လည်း စိတ်ညစ်ရပြီးတော့ တခါတလေ အခုလိုပျော်စရာမင်္ဂလာသတင်းကို ကြားချင်တယ်ပေါ့”ဟု ပြောသည်။

အကြီးကျယ်ဆုံးသော မင်္ဂလာပွဲဖြစ်သောကြောင့် လန်ဒန်ရှိ လူပေါင်းအားလုံးနီးပါး တက် ရောက်ခဲ့ကြကြောင်း၊ အိုင်ယာလန် ကဲ့သို့ အနီးအနားနိုင်ငံများမှလည်း မင်္ဂလာပွဲသို့ လာရောက်ကြည့်ရှုသူများ တွေ့ရကြောင်းလည်း သူက ပြောဆိုသည်။

“မင်းသား ၂ ယောက်လုံးကို ကလေးဘ၀ကတည်းက ချစ်တယ်။ ဒါ့အပြင် အင်္ဂလန် ရဲ့ဘုရင်စနစ်ကို လေးစားတာရယ်၊ သူတို့ရဲ့ အစဉ်အလာကြီးမားလွန်းတာ တွေကြောင့် ဒီပွဲကို လာကြည့်တာ။ သက်ဦးဆံပိုင် ဘုရင်စနစ်ကနေ ဒီမိုကရေစီ ဘုရင်စနစ်ကို ပြောင်းတဲ့နေရာမှာလည်း လူတွေသတ်တာ ဖြတ်တာမရှိဘဲ ညင်ညင်သာသာကူးပြောင်းခဲ့တာတွေကြောင့် လေးစားတယ်”ဟု မသင်းမာက ဆိုသည်။

အဆိုပါ တော်ဝင်မင်္ဂလာပွဲသို့ တက်ရောက်သည့် မြန်မာ အနည်းဆုံး ၅၀၀ မှ ၁၀၀၀ ကြား တွင်ရှိနိုင်သည်ဟု လန်ဒန် အနောက် ဘက်တွင် နေထိုင်သည့် မဖြူ ကလည်း ဧရာဝတီ ကို ပြောသည်။

“နှစ်ပေါင်း ၃၀ အတွင်းမှာ တော်ဝင်မင်္ဂလာပွဲကို ပထမဆုံး ကိုယ်တိုင် မြင်ရတော့ မယ်ဆိုတော့ အရမ်းပျော်မိတယ်။ ဒီနေ့ ပိတ် ရက်ဖြစ်တော့ တချို့ကလည်း နန်းတော် ရှေ့မှာ၊ တချို့ကြတော့လည်း ဘုရားကျောင်းရှေ့မှာ တော်တော်များများကိုယ့် အစီ အစဉ်နဲ့ လာကြည့်ကြမယ်လို့ထင်တယ်”ဟု သူက ပြောပြသည်။

မနက် ၇ နာရီကတည်းက ၀က်စ်မင်စတာ ဘုရားကျောင်းရှေ့ကို ရောက်ရှိနေသည့်အတွက် ရှေ့ဆုံးနေရာရရှိနေသော်လည်း များပြားလွန်းသည့် လူအုပ်ကြောင့် မတ်တတ်ရပ်ရုံမှ လွဲ၍ လှုပ်ရှားမရဟု သူက ဆက် ပြောသည်။

“၀ီလျံက ဘုရင်ဖြစ်မယ့်သူဆိုတော့ အားလုံးက နဂိုကတည်းက စိတ်ဝင်စားနေတာ၊ သူ့ မင်္ဂလာပွဲဆိုတော့ ပိုစိတ်ဝင်စားကြ တာပေါ့။ ကျမ ဘေးနားက လူတွေဆိုရင် အိုင်ယာလန် ကနေ လွန်ခဲ့တဲ့ တပတ်လောက်ကတည်းက ပွဲလာကြည့်ဖို့ ရောက် နေ တာ။ ကိုယ်တွေက နိုင်ငံခြားသား အနေနဲ့ စိတ်ဝင်စားပြီး ဗဟုသုတ ရအောင် လာကြည့်တာ”ဟု မဖြူက ဆိုသည်။

မင်္ဂလာပွဲ ကျင်းပမည့် ၀က်စ်မင်စတာ ဘုရားကျောင်းရှေ့တွင် နေရာကောင်းရရှိရန် ယမန်နေ့ကတည်းက ညအိပ်စောင့် ယာ ယီတဲများဖြင့် အုပ်စုလိုက် စောင့်အိပ်နေ ကြသည်ကို တွေ့ရသည်။

ဗြိတိန်နိုင်ငံ အခြေစိုက် မြန်မာ့အရေး လှုပ်ရှားမှုအဖွဲ့(Burma Campaign - UK )မှ နိုင်ငံတကာ ဆက်ဆံရေး တာဝန်ခံ ဇိုရာ ဖန်းက“လူအရမ်းများတော့ ကိုယ်တိုင်သွား မကြည့်ဖြစ်တော့ဘူး။ အိမ်မှာပဲ သူငယ်ချင်းတွေနဲ့ စုပြီး တီဗီကနေ စောင့်ကြည့် မယ်။ လန်ဒန်မှာကတော့ ဟိုးရက်တွေကတည်းက လန်ဒန်တမြို့လုံးမှာ မင်္ဂလာပွဲအတွက် ပြင်ဆင်နေတာတွေကို တွေ့နေရ တယ်။ ဒီပွဲနဲ့ ပတ်သက်ပြီး မြန်မာ လူငယ်တွေလည်း တော်တော်စိတ်ဝင်စားနေကြတယ်”ဟု ပြောသည်။

“ကျမသူငယ်ချင်းတွေကတော့ ဒီမင်္ဂလာဆောင်ပွဲကို ကိုယ်တိုင်သွားကြည့်မယ်လို့ ပြောတယ်။ သူတို့ကတော့ ပြီးခဲ့တဲ့ ဒိုင်ယာ နာမင်းသမီးနဲ့ ချား မင်းသား မင်္ဂလာပွဲကို ကြားပဲ ကြားခဲ့ဖူးတယ်။ ကိုယ်တိုင်မမြင်ဘူးတော့ လက်ရှိသူတို့လည်း ဒီမှာရောက် နေ တော့ မင်္ဂလာဆောင်ကို သွားကြည့်ပြီး ခံစားမယ်လို့ ပြောကြတယ်”ဟု သူကဆက်လက် ပြောဆိုသည်။

မြန်မာပြည်တွင်း၌လည်း တော်ဝင်မင်္ဂလာသတင်းနှင့် ပတ်သက်၍ ဂျာနယ်အများအပြားတွင် ဖော်ပြကြသကဲ့သို့ အဆိုပါ သတင်း အား ပြည်တွင်းစာဖတ်ပရိသတ်များလည်း စိတ်ဝင်စား နေသည်ဟု သိရသည်။

“တခြား နိုင်ငံရေးအရ အကြီးကျယ်ဆုံး လက်ထပ်ပွဲ ဖြစ်လာမှာမို့ စိတ်ဝင်စားတာထက် စာရင် မြန်မာမှာ အများစုက မင်းသမီး ဒိုင်ယာနာကို ပိုသိကြတာလေ။ သူ့သား ရဲ့ မင်္ဂလာဆောင်ပွဲဆိုတော့ လူတွေက ပိုစိတ်ဝင်စားကြတယ်”ဟု ရန်ကုန်မြို့ရှိ ခရီးသွား ကုမ္ပဏီ တခုတွင် လုပ်ကိုင်နေသူ တဦးက ပြောပြသည်။

သူက ဆက်၍“ပြည်တွင်းမှာ တိုက်ရိုက် အင်တာနက်ကနေ လွှင့်တာကို ကြည့်ဖို့ လိုင်းက အရမ်းနှေးတယ်လေ။ စလောင်း လွှင့် တဲ့ ဆိုင်ကို သွားရမှာဆိုတော့ အရင်နေ့က ပြည်ပ သူငယ်ချင်း ဒေါင်းလော့လုပ်ပြီး ပို့ပေးတဲ့ သူတို့ ၂ ယောက် အကြောင်း ဖိုင် ကို ကြည့် နေတယ်”ဟု သူက ဆက်ပြောသည်။

ဗြိတိန် ဘုရင်မကြီး ဒုတိယမြောက် အဲလိဇဘက်(Queen Elizabeth II)၏ မြေးအကြီးဆုံး ဖြစ်သကဲ့သို့ အိမ်ရှေ့ စံ မင်းသားကြီး ချားစ်နှင့် မင်းသမီး ဒိုင်ယာနာ တို့၏ သားနှစ်ယောက်အနက် အကြီးဆုံးသားဖြစ်သည့် ဒုတိယမြောက် တော်ဝင်မင်းသား ၀ီလျံ (၂၈ နှစ်)သည် တွဲဖက် လေယာဉ်မှူး (Co-Pilot) အဖြစ် တော်ဝင်လေတပ်၏ ရှာဖွေ ကယ်ဆယ်ရေး ရဟတ်ယာဉ် အုပ်စုတွင် တာဝန် ထမ်းဆောင်နေသူ ဖြစ်သည်။

ကိတ် မစ်ဒယ်လ်တန် (၂၈ နှစ်) သည် အွန်လိုင်းပေါ်မှာ ပါတီပွဲအတွက် ပြင်ဆင်သည့် ပစ္စည်းများ ရောင်းချသူ ဖခင် နှင့် လေ ယာဉ်မယ် မိခင်တို့မှ မွေးဖွားလာသည့် သာမန် မိသားစုဝင်တဦး ဖြစ်ပြီး မွေးချင်းညီအစ်မ သုံးယောက်ထဲတွင် သမီး အကြီးဆုံး ဖြစ်သည်။ ယခင်က ကိတ် သည် Jigsaw အဝတ်အစားကုမ္ပဏီတွင် အဝယ်တော်လုပ်ပြီး ယခု ကျွမ်းကျင်သည့်ဓာတ်ပုံဆရာဖြစ် ရန် ကြိုးစားနေသူ ဖြစ်သည်။

မင်္ဂလာပွဲ ကျင်းပပြီးပါက မင်းသား ၀ီလျံသည် Cambridge မြို့စားနေရာကို ရရှိမည်ဖြစ်ပြီး ကိတ် မစ်ဒယ်လ်တန်သည် Cambridge မြို့စားကတော် နေရာရရှိမည်ဖြစ်သည်ဟု ဂါးဒီယန်း သတင်းစာတွင် ရေးသား ဖော်ပြထားသည်။

တော်ဝင်မင်းသားကို လက်ထပ်ပြီးပါက ကိတ်သည် မင်းသမီး နေရာရလာမည်ဟု ထင်ခဲ့ ကြသော်လည်း ယခုလောလောဆယ် တွင် မြို့စားကတော် နေရာနှင့်သာ ကျေနပ်လိုက် ရမည်ဖြစ်ကြောင်း ယင်း သတင်းစာတွင် ဖော်ပြထားသည်။

အဆိုပါ မင်္ဂလာပွဲကို အင်္ဂလန်နိုင်ငံဆိုင်ရာ မြန်မာသံအမတ်ကြီးကိုလည်း ဖိတ်ကြားကြောင်း သိရသည်။

မြန်မာ့အရေး လှုပ်ရှားမှုအဖွဲ့(Burma Campaign - UK )မှ Mark Farmaner က “တော်ဝင်မိသားစု မင်္ဂလာပွဲကို မြန်မာပြည် လို တိုင်းရင်းသား အမျိုးသမီးတွေကို အဓမ္မ ကျင့်တဲ့ ၊ အတိုက်အခံတွေကို ညှဉ်းပန်းနှိပ်စက်တဲ့ ဒီလို နာမည်ဆိုးနဲ့ ကျော်ကြား တဲ့ အစိုးရ တရပ်ကို ဖိတ်တာ ရှက်စရာကောင်းတယ်”ဟု ပြောသည်။

Ref;Irrawaddy

Read More...

ကြံ့ဖွံ့ပါတီ ကတိမတည်ဟု ဒေသခံများပြော

4/29/2011

တာကလူး

ကြံ့ဖွံ့ ပါတီသည် ပေးထားသော ရွေးကောက်ပွဲကတိကို မတည်ကြောင်း ဒေသခံများက စွပ်စွဲ ပြောကြားလိုက်သည်။

အဆိုပါ စွပ်စွဲချက်ကို ယမန်နေ့က မောင်တောမြို့နယ် အလယ်သံကျော်တွင် ပြုလုပ်ခဲ့သော လူထု ရှင်းလင်းပွဲ အပြီးတွင် ဒေသခံ မွတ်ဆလင်များက ပြောဆိုလိုက်ခြင်း ဖြစ်သည်။

“ သူတို့က ကျွန်တော်တို့ကို လွတ်လပ်စွာ ခရီးသွားခွင့်တွေ ရအောင် လုပ်ပေးမယ်။ နိုင်ငံသား စိစစ်ရေး ကဒ်တွေ လုပ်ပေးမယ်။ ပလီတွေကို ပြင်ခွင့်ရအောင် လုပ်ပေးမယ်။ ခြင်္သေ့ (ချိန်ဟော)ကို ရွှေးကောက်ပွဲမှာ မဲပေးကြပါဆိုပြီး သူတို့က ပြောသွားတယ်။ မနေ့က လူထု ရှင်းလင်းပွဲမှာတော့ ဒီကိစ္စတွေကို ဘာမှ ပြောမသွားဘူး” ဟု လူထု ရှင်းလင်းပွဲသို့ တက်ရောက်ခဲ့သူ တစ်ဦးက ပြောသည်။

ကြံ့ဖွံ့ပါတီသည် ယမန်နေ့က လူထု ရှင်းလင်းပွဲကို အလယ်သံကျော် ကျေးရွာတွင် ပြုလုပ် ခဲ့ပြီး လူပေါင်း ၂၀၀၀ ခန့်တက်ရောက်နားထောင်ခဲ့သည်ဟု သိရသည်။

“ ပြည်သူ့ လွှတ်တော် အမတ် ဦးအောင်ဇော်ဝင်း ဦးဆောင်ပြီးတော့ မနေ့က နေ့လည် ၂ နာရီ ၀န်းကျင်မှာ အလယ်သံကျော် ဘောလုံးကွင်းမှာ လူထု ရှင်းလင်းပွဲ ပြုလုပ်ခဲ့ တာဖြစ်ပါတယ်။ သူက မိန်းခွန်းထဲမှာ သူတို့ဟာ အစိုးရပါတီဝင်ဖြစ်လို့ ဒီလို လူထု ရှင်းလင်းပွဲကို လုပ်ခွင့်ရတာ-----၊ ပြီးတော့ ရွာသူရွာသားတွေကို အစိုးရက ချမှတ်ထားတဲ့ ဥပဒေတွေနဲ့ အညီ လိုက်နာ နေထိုင်ကြပါ။ ဥပဒေ ချိုးဖောက်သူဟာ အရေးယူခံကြရမယ်။ အစိုးရ အနေနဲ့ကလည်း ဒေသတွင်း ဖွံ့ဖြိုးတိုးတက်ရေး လုပ်ငန်းစဉ်တွေကို ဖြည်းဖြည်းချင်း အကောင်အထည်ဖော် လုပ်ဆောင်သွားဖို့ စီစဉ်နေတယ်ဆိုပြီး ပြောကြားခဲ့ပါတယ်” ဟု သူက ပြောသည်။

နအဖ စစ်အစိုးရ အာဏာသိမ်းပြီး နောက်ပိုင်း ၁၉၉၁ ခုနှစ်မှစ၍ မောင်တော ဒေသတွင် မူဆလင် ဘာသာဝင်များ ခရီးသွားလာခွင့်၊ လက်ထပ်ခွင့် နှင့် ဘာသာရေး အဆောက် အဦးများ မွမ်းမံခြင်း (သို့) အသစ်တည်ဆောက်ခြင်း ဆိုင်ရာ ဒေသန္တရ ဥပဒေများကို သက်ဆိုင်ရာမှ ပြဌာန်းထားသည်။

အဆိုပါ ပြဌာန်းချက်များကို မွတ်ဆလင်များက ပယ်ဖျက်လိုနေသည်။

ယမန်နေ့က လူထု ရှင်းလင်းပွဲကို ပြည်သူ့လွှတ်တော် အမတ် ဦးအောင်ဇော်ဝင်း (ခေါ်) ဇာကီးအာမတ် ဦးဆောင်ကျင်းပခဲ့ပြီး ဒေသခံများနှင့် အတူ ကြံ့ဖွံ့ပါတီဝင် ၃၀၀ ကျော် တက်ရောက်ခဲ့သည်။ ရှင်းလင်းပွဲကို နေ့ နေ့လည် (၂)နာရီ မှ (၃)နာရီဝန်းကျင်ထိ ပြုလုပ် ခဲ့ခြင်းဖြစ်ကြောင်း သိရှိရသည်။


Ref;Narinjara

Read More...

အစိုးရပြောင်းသော်လည်း အုပ်ချုပ်ရေး ပုံစံ မပြောင်း၍ ပြည်သူများ မကျေနပ်

4/29/2011

အစိုးရ အပြောင်းအလဲ ဖြစ်သွားသော်လည်း အုပ်ချုပ်ရေး စနစ်ကို မပြောင်းသည့် အပြင် ကျေးရွာ ရယက ဥက္ကဌများကို အမည်ပြောင်းပြီး အုပ်ချုပ်ရေးမှူး အဖြစ် ဆက်ခန့်ထားသဖြင့် ပြည်သူများ အထူး မကျေမနပ် ဖြစ်နေကြကြောင်း သတင်း ရရှိသည်။

ရခိုင်ပြည်နယ်ရှိ ကျေးရွာများတွင် ယခင် ခန့်အပ်ထားခဲ့သော ရယက များမှာ ကြံ့ခိုင်ရေး ပါတီမှ သူတို့ စိတ်ကြိုက် ခန့်အပ်ထားသူများ ဖြစ်ပြီး လူထု သဘောဖြင့် ရွှေးချယ် ထားသော ရယက အဖွဲ့ဝင်များ မဟုတ်ကြောင်း ကျေးရွာသားများက ပြောသည်။

“ အခု ကျွန်တော်တို့ လူထုတွေ လို လားနေတာက ကျေးရွာ ဥက္ကဌ အသစ်တွေကို လိုလားနေပါတယ်။ အရင်စနစ်နဲ့ အရင်လူတွေကို မလိုတော့ဘူး။ သူတို့က စစ်အုပ်ချုပ် ရေးတုန်းကတည်းက တက်လာတဲ့ သူတွေ ဖြစ်တဲ့ အတွက် အဲသလို စနစ်မျိုးနဲ့ ဘဲ ရွာသားတွေကို ဆက် အုပ်ချုပ်နေတဲ့ အတွက် ရွာတွေမှာ ပြဿနာတွေ တက်နေတာ တွေ အများကြီးပါဘဲ” ဟု ပေါက်တောမြို့နယ် ဆင်ပိုက်ရွာသား တစ်ဦးက ပြောသည်။

နအဖ စစ်အုပ်စုမှ ရေးဆွဲ အတည်ပြုခဲ့သော ၂၀၀၈ ခုနှစ် ဖွဲ့စည်းပုံ အခြေခံ ဥပဒေတွင် ရပ်ကွက် (သို့မဟုတ်) ကျေးရွာ အုပ်စု၏ အုပ်ချုပ်ရေးကို ရပ်ရွာက ကြည်ညိုလေးစားပြီး သိက္ခာသမာဓိရှိသည့် ပုဂ္ဂိုလ် တစ်ဦးဦးကို ဥပဒေနှင့် အညီ ခန့်အပ် တာဝန်ပေး ဆောင် ရွက်စေရမည်ဟု ပါရှိသည်။

“ အခု သူတို့ ခန့်ထားတဲ့ ကျေးရွာ အုပ်ချုပ်ရေးမှူးတွေက တစ်ဦးမှ အဲသလို ချမှတ်ထားတဲ့ စည်းကမ်းနဲ့ ကိုက်ညီတာ မပါဘူး။ သူတို့ဟာ ရပ်ရွာက ကြည်ညိုလေးစားတဲ့ သူတွေလည်း မဟုတ်ဘူး။ အကုန်လုံးက ကြံ့ခိုင်ရေးပါတီကို ထောက်ခံသူနဲ့ ကြံ့ခိုင်ရေး ပါတီဝင်တွေသာ ဖြစ်ကြပါတယ်” ဟု အဆိုပါ ရွာသားက ဆက်ပြောသည်။

ရခိုင်ပြည်နယ် မင်းပြားမြို့နယ်တွင်မူ ကျေးရွာအုပ်ချုပ်ရေးမှူးများကို လူထုက လေးစား ကြည်ညိုပြီး သိက္ခာ သမာဓိရှိသူများကို တာဝန်ပေးအပ်ခြင်း မဟုတ်ဘဲ မြို့နယ် အုပ်ချုပ်ရေးမှူးကို ငွေပေး နိုင်သူများကိုသာ တာဝန်ပေး ခန့်အပ်နေကြောင်း သတင်း ရရှိသည်။

ရတပ ပါတီ အအတွင်းရေးမှူး အဖွဲ့ဝင် ဦးခိုင်ပြည်စိုးက “ အခု မင်းပြားမြို့နယ်မှာ ကျေးရွာ အုပ်ချုပ်ရေးမှူး ဆက်လုပ်ချင်တဲ့ ရယက ဥက္ကဌတွေဆီက မြို့နယ် အုပ်ချုပ်ရေးမှူးက တစ်ဦးကို ကျပ် ၅၀၀၀၀ ကနေ ၃၀၀၀၀၀ ထိ တောင်းခံနေတယ်။ မပေးနိုင်ရင် ဖြုတ်ပစ်မယ်ဆိုတဲ့ အတွက် တောင်းတဲ့ငွေကို ပေးနေရတယ်လို့ ကြားခဲ့ပါတယ်” ဟု ပြော သည်။

အလားတူ မြေပုံမြို့နယ်မှာလည်း ယခင်က ရယက ဥက္ကဌဟောင်းများကို ကျေးရွာ အုပ်ချုပ်ရေးမှူးများ အဖြစ် ခန့်အပ်နေသဖြင် ကျေးရွာ အတော်များများတွင် ပြဿနာများ ပေါ်ပေါက်နေကြောင်း လွှတ်တော် အမတ် ဦးဖေသန်းက အတည်ပြု ပြောကြားသည်။

Ref;Narinjara

Read More...

NDF အကွဲအပြဲ ပြဿနာ ရွေးကောက်ပွဲ ကော်မရှင် ဆုံးဖြတ်မည်

ခင်ဦးသာ
29 April 2011

အမျိုးသား ဒီမိုကရေစီ အင်အားစု ပါတီ (NDF) မှ ထုတ်ပယ်ထားခြင်းခံရသော ပြည်သူ့ လွှတ်တော် ကိုယ်စားလှယ် ဦးသိန်းညွန့်သည် ပါတီအား ကိုယ်စားပြုခြင်း ရှိမရှိကိစ္စ နှင့် ပတ်သက်ပြီး ပြည်ထောင်စု ရွေးကောက်ပွဲ ကော်မရှင်က မေလ ၉ ရက်နေ့တွင် ဆုံးဖြတ်ပေးမည်ဟု သိရသည်။

National_Democratic_Force

ဦးသိန်းညွန့်အား တသီးပုဂ္ဂလ ကိုယ်စားလှယ်အဖြစ် အသိအမှတ်ပြုရေးအတွက် ထိုနေ့၌ ဆုံးဖြတ်ပေးသွားမည်ဟု ဆိုသည်။

“ဦးသိန်းညွန့်ကို ထုတ်ပယ်တာ ဥပဒေနဲ့ညီမညီ ကို ရန်ကုန်တိုင်းကော်မရှင်က ပါတီကို မေးမြန်းတာတွေရှိတယ်၊ ကျနော်တို့က သူ့ကို ပါတီစည်းကမ်း၊ ပါတီ ဥပဒေ ကို မလိုက်နာလို့ ထုတ်ပယ်လိုက်တာပါ”ဟု NDF ပါတီ၏ ခေါင်းဆောင် ဦးခင်မောင်ဆွေက ဧရာဝတီ ကို ပြောသည်။

ရန်ကုန်တိုင်း ရွေးကောက်ပွဲကော်မရှင်သည် ယခုရက်ပိုင်းတွင် NDF ပါတီရုံးသို့ လာရောက်၍ တာဝန်ရှိသူများအား မေးမြန်း၍ သိလိုသည့်အချက်အလက်များကို စုဆောင်းနေပြီး မေလ ၉ ရက်နေ့တွင် ပြည်ထောင်စု ရွေးကောက်ပွဲ ကော်မရှင် သို့ တင်ပြ၍ နှစ်ဦးနှစ်ဘက်စလုံးကို မေးမြန်း အဆုံးအဖြတ် ပေးသွားမည်ဟု ၎င်းက ဆက်ပြောသည်။

အကယ်၍ ပြည်ထောင်စု ရွေးကောက်ပွဲကော်မရှင်မှ ပြန်လည်ပေါင်းစည်းရေး ဆုံးဖြတ် ပေးပါကလည်း ပါတီဝင်အဖြစ် လုံးဝ လက်ခံတော့မည်မဟုတ်ကြောင်း ဦးခင်မောင်ဆွေ က ဆိုသည်။

“ပါတီ စည်းကမ်း မလိုက်နာလို့ ထုတ်ပယ်ထားတာ ပြန်လည် လက်ခံစရာ အကြောင်း မရှိတော့ဘူးလေ”ဟု ၎င်းက ပြောသည်။

NDF ပါတီ၏ ဒုတိယခေါင်းဆောင်အဖြစ်မှ ထုတ်ပယ်ခံထားရသော ဦးသိန်းညွန့်ကမူ ပါတီ ဥက္ကဋ္ဌ ဒေါက်တာ သန်းငြိမ်း၊ ဦးခင်မောင်ဆွေ တို့နှင့် ၆ နှစ်တာ နိုင်ငံရေး ပူးပေါင်း လုပ်ဆောင်ခဲ့သည့်ကာလအတွက် နောင်တရမိကြောင်း တုံ့ပြန် ပြောဆိုသည်။

“ကျနော်က ကော်မရှင်ရဲ့ဆုံးဖြတ်မှုကိုပဲ အလေးထားလိုက်နာမှာပါ”ဟု ဦးသိန်းညွန့်က ဆိုသည်။

NDF ပါတီသည် အမျိုးသား ဒီမိုကရေစီ အဖွဲ့ချုပ်(NLD)မှ ခွဲထွက်ကာ ၂၀၁၀ ရွေးကောက်ပွဲ ၀င်ရောက်ယှဉ်ပြိုင်ခဲ့ကြပြီး ပါတီ ဥက္ကဋ္ဌ ဒေါက်တာ သန်းငြိမ်း၊ ဦးခင်မောင်ဆွေတို့ ဦးဆောင်သောအဖွဲ့နှင့် ဦးသိန်းညွန့် ဦးဆောင်ဆောင်သော အဖွဲ့ဟူ၍ ထပ်မံ ကွဲခဲ့ကြသည်။

NDF ပါတီ၏ ခေါင်းဆောင်များသည် ၂၀၁၀ ရွေးကောက်ပွဲဝင်ရန် မဲဆွယ်စည်းရုံးစဉ်ကာလ ကတည်းက ပါတီ၏ ငွေကြေး ပြဿနာများအား ပြင်ပသို့ ပြောဆိုသည်ဟု ဆိုကာ ဦးသိန်းညွန့်အား နိုဝင်ဘာလ ဆန်းပိုင်းတွင် ပါတီမှ ထုတ်ပယ်ခဲ့သည်။

ဦးသိန်းညွန့်သည် ၁၉၉၀ ရွေးကောက်ပွဲ၌ သင်္ဃန်းကျွန်းမြို့နယ်မှ ရွေးကောက်ခံ ခဲ့ရသောကိုယ်စားလှယ်တဦးဖြစ်ပြီး၂၀၁၀ ရွေးကောက်ပွဲ၌လည်း ပြည်သူ့လွှတ်တော် ကိုယ်စားလှယ်အဖြစ် သင်္ဃန်းကျွန်းမြို့နယ်မှ ရွေးချယ်တင်မြှောက်ခြင်း ခံထားရသည်။

၎င်းတို့နှင့် နိုင်ငံရေးလုပ်ဖော်ကိုင်ဖက် တဦးကမူ ဦးခင်မောင်ဆွေ၊ ဦးသိန်းညွန့်တို့သည် တန်းတူအနေအထားများဖြစ်နေခြင်း၊ ထိန်းကွပ်ပေးသူ မရှိခြင်း စသည်တို့ကြောင့် ယခု ကဲ့သို့ဖြစ်နေကြကြောင်း ပြောဆိုသည်။

Ref;Irrawaddy

Read More...

Uncensored Burma - Daily News ( 2011 April, 28)

News on April 28

Read More...

မြေကျင်း တူးရသူ အမျိုးသမီးနှစ်ဦး ILO ကို တိုင်

ကျော်ခ
ဧပြီလ ၂၈ ရက် ၂၀၁၁ ခုနှစ်

ရန်ကုန်တိုင်း သုံးခွမြို့နယ်မှ အသက် ၅ဝ ကျော်အရွယ် အမျိုးသမီး ၂ ဦးက ၎င်းတို့ကို မြေကျင်းပေါင်း ၃ဝ တူးခိုင်းသည့် ကျေးရွာအုပ်ချုပ်ရေး အတွင်းရေးမှူးကို အဓမ္မ လုပ်အားပေးစေခိုင်းမှုဖြင့် အပြည်ပြည်ဆိုင်ရာ အလုပ်သမားအဖွဲ့ချုပ် ILO ထံ လွန်ခဲ့သည့် ရက်ပိုင်းအတွင်းက တိုင်ကြားခဲ့ကြသည်။

ရန်ကုန်တိုင်း တောင်ပိုင်းခရိုင် သုံးခွမြို့နယ် သဲကုန်းတူးမြောင်းကျေးရွာသူ ဒေါ်မြင့်သန်းနှင့် တနှစ်ကျော်ကြာ ကွာရှင်းပြီး ခင်ပွန်းဟောင်းတို့ အချင်းများသည်ကို ဆူပူမှုဟုဆိုကာ ဒဏ် ပေးသည့်အနေဖြင့် ကျေးရွာအုပ်ချုပ်ရေး အတွင်းရေးမှူးဖြစ်သူ ဦးလှရီက အနက် ၁ ပေ၊ အကျယ် ၁ဝ ပေ ကျယ်ဝန်းသော မြေကျင်းများ တူးခိုင်းခဲ့သည်။

ခင်ပွန်းဖြစ်သူကို အရေးယူအပြစ်မပေးသော်လည်း ထိုအခင်းဖြစ်ပွားစဉ်အတွင်း ဒေါ်မြင့် သန်း၏ ညီမဖြစ်သူ ဒေါ်ဝင်းက အမဘက်မှ ဝိုင်းဝန်းကူညီပြောဆိုခဲ့သဖြင့် မြေကျင်းတူး ရာတွင် ပူးတွဲဒဏ်ပေးခံခဲ့ရခြင်း ဖြစ်သည်။

အမျိုးသမီးများနှင့် မမျှတသည့် အဆိုပါ ပြစ်ဒဏ်ပေးခြင်းကို မခံနိုင်သဖြင့် ယခုကဲ့သို့ တိုင်တန်းခြင်းဖြစ်သည်ဟု အသက် ၅၃ နှစ်အရွယ် ဒေါ်မြင့်သန်းက မဇ္ဈိမကို ပြောသည်။

“စစခြင်း ကျမတို့ကို မြေကျင်း ၅ဝ ကို ကိုယ်တိုင်တူးခိုင်းပါတယ်။ ကျမတို့က မိန်းမသားလည်း ဖြစ်တယ်၊ သက်အရွယ်အရလည်း မလုပ်နိုင်တဲ့အကြောင်း ပြောပြတော့ ရွာထဲက လူကြီးတွေကလည်း ဝိုင်းအသနားခံတယ်။ အဲဒါနဲ့ ၃ဝ ပဲ တူးခိုင်းတယ်။ ကျမတို့က မတူးနိုင်တော့ လူငှားပြီး ၃ ရက်ထဲ အပြီးတူးပေးရတယ်” ဟု သူက ဆိုသည်။

မြေကျင်းတူးခအဖြစ် တကျင်းလျှင် ၁၅ဝဝ ကျပ်ဖြင့် လူငှားတူးခဲ့ရပြီး အဆိုပါ လုပ်အားခများကိုလည်း ကျပ် ၁ဝဝ ကို ၁၅ ကျပ်တိုးဖြင့် ချေးငှား၍ တူးခဲ့ရကာ ယခုတိုင် အကြွေးမကျေသေးဟု ဆိုသည်။ ဒေါ်မြင့်သန်းသည် ထမင်းဟင်းချက်ပြုတ် ရောင်းချ သူဖြစ်ပြီး၊ ခင်ပွန်းနှင့် ကွဲကွာခဲ့စဉ်က ကလေး ၄ ယောက်ကျန်ခဲ့ကာ ယခုအခါ ညီမဖြစ်သူ ဒေါ်ခင်ဝင်းနှင့်အတူ နေထိုင်ကြသည်။

အခင်းဖြစ်စဉ်မှာ တနှစ်ခန့် ရှိခဲ့ပြီဖြစ်သော်လည်း ကာယကံရှင်ဖြစ်သူများမှာ တရား ဥပဒေအရ ဖြေရှင်းပေးနိုင်ရန် သုံးခွမြို့ပေါ်ရှိ မြို့နယ် မယက (ယခု အုပ်ချုပ်ရေးမှူးရုံး) နှင့် မြန်မာနိုင်ငံ အမျိုးသမီးရေးရာရုံးသို့ သွားရောက် တိုင်တန်းခဲ့သော်လည်း အရေးယူခြင်း မရှိခဲ့ပေ။

သုံးခွမြို့ပေါ်ရှိ အမျိုးသမီးရေးရာရုံးသို့ သွားရောက်တိုင်တန်းရာတွင် ကျေးရွာဥက္ကဋ္ဌက လုပ်အားပေးစေခိုင်းခြင်းသာ ဖြစ်သဖြင့် ဥပဒေအရ အရေးယူဆောင်ရွက်ပေး၍ မရကြောင်း ပြောဆိုသလို မယကရုံး တာဝန်ရှိသူများကလည်း ခြိမ်းခြောက်မှုများ ပြုလုပ်သဖြင့် အမျိုးသားဒီမိုကရေစီအဖွဲ့ချုပ် NLD လူငယ်များ၏ အကူအညီဖြင့် ယခုကဲ့သို့ ILO ထံသို့ တိုင်ကြားနိုင်ခဲ့ကြောင်း ဒေါ်မြင့်သန်းက ပြောပြသည်။

ယင်းဖြစ်စဉ်တွင် လိုက်လံကူညီပေးနေသည့် သုံးခွမြို့နယ် NLD လူငယ် ကိုရင်အေးက “ဒီအမျိုးသမီးတွေက တခုလပ်၊ မုဆိုးမတွေ။ သူတို့က မကျေနပ်လို့သာ ဇွဲရှိရှိနဲ့ တိုင်နေတာ။ စီးပွားရေးကလည်း အဆင်ပြေတာမဟုတ်ဘူး။ သူတို့အနေနဲ့ အကူအညီတောင်းလာ တဲ့အပေါ်မှာ ကျနော်တို့ရုံးချုပ်က ရှေ့နေရှေ့ရပ်တွေနဲ့ တိုင်ပင်ပြီး ဆက်လက်လုပ်ဆောင် ပေးသွားမှာပါ” ဟု မဇ္ဈိမကို ပြောသည်။

ဒေါ်မြင့်သန်းနှင့် ဒေါ်ဝင်းတို့ ၂ ဦး၏ တိုင်ကြားချက်များကို ရန်ကုန်မြို့ပေါ်ရှိ ILO ရုံးအနေဖြင့် ရရှိထားပြီးဖြစ်ကာ၊ စိစစ်နေဆဲဖြစ်ကြောင်း ထိုရုံး၏ တာဝန်ရှိသူတဦးက မဇ္ဈိမကို ပြောသည်။

“ဒီကိစ္စမှာ ကျနော်တို့ သိရသလောက်တော့ အတွင်းရေးမှူးက လုပ်ပိုင်ခွင့်အာဏာထက် ပိုပြီး လုပ်ထားတဲ့ သဘောပါ။ ဒီအတွက် ကျနော်တို့ဘက်က ဒီကိစ္စကို ဆက်ပြီး လုပ်ဆောင်ပေးသွားမှာပါ” ဟု သူက ဆိုသည်။

ILO အနေဖြင့် မြန်မာနိုင်ငံတွင် အဓမ္မလုပ်အားပေး ကိစ္စများ တိုင်ကြားရေးအတွက် လုပ်ထုံးလုပ်နည်းများ ပါဝင်သည့် နားလည်မှုစာချွန်လွှာကို ယခုနှစ် ဇန်နဝါရီလ ၂၄ ရက်နေ့တွင် မြန်မာအစိုးရနှင့် နေပြည်တော်၌ နောက်ထပ် တနှစ်သက်တမ်းတိုးခဲ့သည်။

စာချွန်လွှာထဲတွင် အတင်းအဓမ္မ ခိုင်းစေမှုကို ဥပဒေနှင့် ဆန့်ကျင်သည့် ကိစ္စအဖြစ် သတ်မှတ်ကာ အကယ်၍ ယခင်က ဥပဒေများသည် အတင်းအဓမ္မ ခိုင်းစေမှုကို အားပေးသလို ဖြစ်နေပါက ထိုဥပဒေများအား ပြင်ဆင်ရန်နှင့် ရုပ်သိမ်းရန်၊ ပုံစံအမျိုးမျိုးဖြင့် ရှိနေသည့် အဓမ္မ လုပ်အားပေး ပပျောက်စေရေးအတွက် အစိုးရနှင့် ပူးပေါင်း ဆောင်ရွက်ရန်၊ ကျူးလွန်သူများကို အရေးယူသည့် ဥပဒေ အပါအဝင် အဓမ္မ ခိုင်းစေမှု တိုက်ဖျက်ရေး ဥပဒေများ အသုံးချမှုနှင့် လိုက်နာမှုများ မြင့်တက်လာစေရေး ဆောင်ရွက်ရန်တို့ ဖြစ်သည်။

သို့သော် ၂ဝဝ၅ ခုနှစ်တွင် ကျော်ကြားသည့် လူ့အခွင့်အရေး လှုပ်ရှားသူ မစုစုနွေးသည် သူမနေထိုင်ရာ ရန်ကုန်တိုင်း ကော့မှူးမြို့နယ် ထန်းမနိုင်ကျေးရွာ၏ ရယက ဥက္ကဋ္ဌနှင့် ဆယ်အိမ်မှူးများကို ယခုကဲ့သို့ တိုင်တန်းခဲ့ရာ အာဏာပိုင်များကို ခြိမ်းခြောက် ကြိမ်းဝါးသည်ဟူသည့် စွပ်စွဲချက်ဖြင့် အာဏာပိုင်များက ဖမ်းဆီးထောင်ချခြင်း ကို ခံခဲ့ရသည်။

Ref;Mizzima

Read More...

ရထားလမ်းအတွက် မြန်မာ-တရုတ် လက်မှတ်ထိုး

ကိုဝိုင်း
ဧပြီလ ၂၈ ရက် ၂၀၁၁ ခုနှစ်

ရခိုင်ပြည်နယ် ကျောက်ဖြူ ရေနက်ဆိပ်ကမ်း စီမံကိန်းပါ မူဆယ်-လားရှိုး ရထား လမ်းပိုင်းကို ၃ နှစ်အတွင်း အပြီးတည်ဆောက်မည်ဟု မြန်မာ-တရုတ် အစိုးရများ အကြား ဗုဒ္ဓဟူးနေ့တွင် သဘောတူညီလိုက်သည်။

ကမ္ဘာ့အရှေ့အလယ်ပိုင်း အာရပ်ဒေသမှ ရေနံနှင့် ရခိုင်ကမ်းလွန် သဘာဝဓာတ်ငွေ့များကို တရုတ်နိုင်ငံသို့ တင်သွင်းရန် ရည်ရွယ်တည်ဆောက်မည့် ကျောက်ဖြူ-မူဆယ် ပိုက်လိုင်း တလျှောက် ရထားလမ်းစီမံကိန်း၏ ပထမအဆင့်ဖြစ်ကြောင်း မြန်မာ့အလင်းသတင်းစာ ၌ ကြာသပတေးနေ့တွင် ဖော်ပြပါရှိသည်။

မြန်မာနိုင်ငံ ရထားပို့ဆောင်ရေးဝန်ကြီး ဌာနနှင့်တရုတ်အစိုးရပိုင် China Railway Engineering Corporation အကြား “မူဆယ်-ကျောက်ဖြူ ရထားလမ်းပို့ဆောင် ရေးစနစ် စီမံကိန်း” ဆိုင်ရာ နားလည်မှု စာချွန်လွှာ လက်မှတ်ထိုးပွဲကို နေပြည် တော်၌ ဗုဒ္ဓဟူးနေ့တွင် ပြုလုပ်ခဲ့ရာ၊ အထူးစီမံကိန်းများ အကောင်အထည် ဖော်ရေးအဖွဲ့ ဒုဥက္ကဋ္ဌဖြစ်သူ ဒုသမ္မတ သီဟသူရ ဦးတင်အောင်မြင့်ဦး တက်ရောက်ခဲ့သည်။

China Railway Engineering Corporation ကုမ္ပဏီ ဥက္ကဋ္ဌ မစ္စတာ Li Chang Jin ဦးဆောင်သည့် အဖွဲ့အပြင် မြန်မာအစိုးရ ပြည်ထောင်စု ဝန်ကြီးများနှင့် ရှေ့နေချုပ်လည်း တက်ရောက်ကြသည်။

လက်ရှိအစိုးရ မြန်မာ့မီးရထား ဦးဆောင်ညွှန်ကြားရေးမှူး ဦးသိန်းဆွေနှင့် တရုတ်ကုမ္ပဏီ ကိုယ်စားလှယ် မစ္စတာ Zhao Deyi တို့က စာချုပ်များကို လက်မှတ်ရေးထိုးကြခြင်း ဖြစ် သည်။

မူဆယ်-လားရှိုး ရထားလမ်းအရှည် မိုင် ၈ဝ ခန့်၊ တံတား ၄၁ စင်း၊ ဥမင်လိုဏ် ၃၆ ခု၊ ဘူတာ ၇ ခု တည်ဆောက်မည်ဖြစ်ပြီး၊ တည်ဆောက်ချိန် ၃ နှစ် ခန့်မှန်းထားကြောင်း သတင်းစာက ဆိုသည်။

စီမံကိန်းကုန်ကျငွေကို ယခင် စစ်အစိုးရက တရားဝင် ကြေညာခဲ့ခြင်း မရှိသော်လည်း တရုတ်အစိုးရပိုင် CNPC ကုမ္ပဏီနှင့် မြန်မာ့ရေနံနှင့် သဘောဝလုပ်ငန်းတို့ အစုပိုင်သည့် ရေနံပိုက်လိုင်း တည်ဆောက်ရေးအတွက်ပင် အမေရိကန်ဒေါ်လာ သန်း ၁၅ဝဝ ခန့်ကျော် ကုန်ကျမည်ဟု ရွှေဂတ်စ် လှုပ်ရှားမှု ရခိုင်အဖွဲ့က ထုတ်ပြန်ထားသည်။

တရုတ် လောင်စာပိုက်လိုင်းကုမ္ပဏီ China Petroleum Pipeline Bureau (CPP) က တာဝန်ယူ တည်ဆောက်မည်ဖြစ်ပြီး မဒေးကျွန်းမှ စတင်မည့် မြန်မာ-တရုတ် ရေနံနှင့် သဘာဝဓာတ်ငွေ့ပိုက်လိုင်းသည် ရခိုင်ပြည်နယ် အမ်းမြို့နယ်၊ မကွေးတိုင်း၊ မန္တလေး တိုင်းနှင့် ရှမ်းပြည်နယ်မြောက်ပိုင်းကို ဖြတ်ကာ တရုတ်နိုင်ငံသို့ မူဆယ်မှ ဝင်ရောက်မည်။

“ပိုက်လိုင်းက ရှမ်းပြည်မြောက်ပိုင်းက လားရှိုး-မူဆယ်ကားလမ်းရဲ့ အရှေ့ဘက်အတိုင်း ဆင်းလာပြီး၊ ၁ဝ၅ မိုင်နားကနေ ဝမ်တိန်မြို့ဘက်၊ ကြူကုတ်-ပန်ဆန်းနဲ့ မူဆယ်မြို့ ကြားကနေဝင်မှာ။ ရထားလမ်းက ရွှေလီအထိ ရောက်မယ်” ဟု တရုတ်-မြန်မာနယ်စပ် အခြေစိုက် စစ်ရေးလေ့လာသူ ဦးအောင်ကျော်ဇောက မဇ္ဈိမကို ပြောသည်။

ပိုက်လိုင်းဖြတ်မည့် ရှမ်းပြည်မြောက်ပိုင်း လားရှိုးမှ တရုတ်နယ်စပ်ဆင်းသည့် လမ်းကြော ပေါ်တွင် ကိုးကန့် လက်နက်ကိုင်တပ်နှင့် ကချင်လွတ်မြောက်ရေးတပ် KIA တပ်မဟာ ၄ တို့ အခြေစိုက် လှုပ်ရှားနေသော်လည်း တရုတ်အစိုးရနှင့် ဆက်ဆံရေး ပျက်မည်ကို လိုလားကြမည် မဟုတ်ဟု သူက သုံးသပ်သည်။

ရခိုင်ပြည်နယ်ဘက်တွင် ပိုက်လိုင်းဖြတ်မည့်လမ်းနှင့် မလွတ်ကင်းသည့် မြေယာများကို သိမ်းဆည်းရာ၌ နစ်နာသူများ ရှိသော်လည်း ရမ်းဗြဲကျွန်း ဖွံ့ဖြိုးလာမည်ကိုမူ ကြိုဆိုသည်ဟု ရခိုင်တိုင်းရင်းသားများ တိုးတက်ရေးပါတီ RNDP ဥက္ကဋ္ဌ ဒေါက်တာဦးအေးမောင်က ပြော သည်။

“ဒါပေမဲ့ ကျောက်ဖြူမှာ ရခိုင်လူထု ပျောက်ပြီးမှ မန္တလေးလိုဟာမျိုးပေါ့ဗျာ၊ တရုတ်မြို့ကြီး ဖြစ်သွားပြီးရင် ရခိုင်တွေက တောင်ကုတ်လို ဂျိုင့်တွေ၊ တောင်တွေကြားကို ရောက်သွားပြီး လုပ်စားရမဲ့ ကိုင်စားရမဲ့ ဖြစ်သွားမှာကို ကျနော်တို့ ကြောက်ပါတယ်” ဟု သူက မဇ္ဈိမကို ပြောသည်။

ကျောက်ဖြူမြို့နှင့် မဒေးကျွန်းတို့၌ ရေနက်ဆိပ်ကမ်း၊ ရေနံသိုလှောင်ကန်စခန်း၊ သဘာဝဓာတ်ငွေ့ သိုလှောင်ရေးစခန်း၊ ဓာတ်ငွေ့သန့်စင်စက်ရုံ စသည့် တည်ဆောက်ရေး လုပ်ငန်းများ ပါဝင်ပြီး ကိုရီးယားပိုင် ဒေဝူးကုမ္ပဏီနှင့် တရုတ်ကုမ္ပဏီများက စတင်နေပြီဖြစ်သည်။ ၂ဝ၁၃ ခုနှစ်တွင် စီမံကိန်း အပြီးသတ်မည်ဟု တရားဝင် သတင်း များက ဆိုသည်။

အစိုးရအသစ်၏ အထူးစီမံကိန်းများ အကောင်အထည်ဖော်ရေးအဖွဲ့ ဥက္ကဋ္ဌ သမ္မတ ဦးသိန်းစိန်ကလည်း “တပ်မတော် အစိုးရ” လက်ထက်က မပြီးပြတ်ခဲ့သည့် လုပ်ငန်းများ ကို ၂ နှစ်၊ ၃ နှစ်အတွင်း ပြီးပြတ်စေရန် ဆောင်ရွက်ရမည်ဟု ပြောဆိုထား သည်။

တရုတ်နယ်စပ် မူဆယ်ဘက်တွင်မူ ရထားလမ်းသစ်နှင့် ပတ်သက်၍ ထူးခြားမှု မရှိ သော်လည်း သံမဏိပိုက်လုံးရှည်များ ၁ဝ ဘီးကားများဖြင့် မြန်မာဘက် တင်ဆောင်နေ သည်ကို ယခင်လမှစ၍ သတိထားမိသည်ဟု ဦးအောင်ကျော်ဇောက ပြောသည်။

Ref;Mizzima

Read More...

ရေအောက်စံ ဘုရားသုံးဆူ စေတီဟောင်း ပြန်ပေါ်

ကွန်းချမ်း
ဧပြီလ ၂၈ ရက် ၂၀၁၁ ခုနှစ်

၂၇ နှစ်ခန့်အကြာ ရေအောက်နစ်မြုပ်ခဲ့သည့် ထိုင်းနိုင်ငံ ပိုင်နက်အတွင်းရှိ ဘုရားသုံးဆူ စေတီဟောင်းနှင့် ဝင်းကရွာဟောင်းမှ သာသနိက အဆောက်အအုံများ မြစ်ရေခန်း ခြောက်နေသဖြင့် ပြန်ပေါ်လာခဲ့သည်။

ပြန်ပေါ်လာသည့် ကျောင်း၊ သိမ်နှင့် သာသနိက အဆောက်အအုံများမှာ ပျက်စီးနေပြီး၊ စေတီဟောင်းကိုလည်း အုတ်ပုံအဖြစ်သာ မြင်တွေ့ရတော့ကာ ရွာဟောင်းမှာမူ ရေအောက် တွင် နစ်မြုပ်ဆဲဖြစ်သည်။

လက်ရှိ ခေါ်တွင်နေသည့် ထိုင်း-မြန်မာ နယ်စပ်ရှိ ဘုရားသုံးဆူနှင့်ကီလို မီတာ ၂ဝ ကျော် ကွာဝေးပြီး ထိုင်းနိုင်ငံ ကန်ချန ပူရီခရိုင် စံခလပူရီမြို့နယ် ဝင်းကရွာ သစ်အနီးတွင် ထိုသို့ ပြန်ပေါ်လာပုံ ကို ဒေသခံများ မြင်တွေ့ကြသည်။

စံခလယ်ချောင်း၊ ဘီးခီး (ခေါ်) ကင်း ချောင်း၊ လန်တီချောင်း သုံးသွယ် ပေါင်းဆုံ ရာ၌ ဘုရားသုံးဆူစေတီဟောင်းနှင့် ဝင်းကရွာဟောင်း တည်ရှိသည်။

“ရွာဟောင်း ရေမြုပ်ကတည်းကဆို အခုလို ရေခန်းတာ ၅ ကြိမ် ရှိပြီ။ ၇ နှစ် တကြိမ် လောက် ဒီလိုခန်းတတ်တယ်။ ဒါပေမဲ့ မနှစ်နဲ့ ဒီနှစ်က ဆက်တိုက်ရေခန်းတယ်” ဟု ထိုင်း နိုင်ငံ၏ အရှည်ဆုံး စံခလပူရီ သစ်သားတံတားအနီး စံခလယ်ချောင်းတွင် ဖောင်အိမ်ငှား ခြင်းဖြင့် ၂၅ နှစ်ကျော် အသက်မွေးလာခဲ့သူ နိုင်ချစ်ငွေက ပြောသည်။

ထိုင်းအစိုးရက ချောင်းသုံးသွယ် ပေါင်းစုံရာမှ ဖြစ်ပေါ်လာသည့် ကွေးမြစ်လက်တက်မှ ရေများကို ထွန်ဖါဖွန် ရေကာတာဖြင့် ထိန်းသိမ်းပြီး ရေအားလျှပ်စစ် ထုတ်လုပ်သည့် စီမံကိန်းကြောင့် ရေအောက်နစ်မြုပ်ခဲ့ရာမှ ၅ ကြိမ်မြောက် ပြန်ပေါ်လာခဲ့ခြင်းလည်း ဖြစ် သည်။

ပုံမှန်နွေရာသီ ရေအနည်းဆုံးအချိန်တွင် စံခလယ်ချောင်း၌ ရေ ၁၈ ပေ ရှိပြီး ယခု နှစ်တွင် ၉ ပေသာ ကျန်ရှိကာ ဆက်လက် လျော့နည်းဖွယ် ရှိသည်ဟု နိုင်ချစ်ငွေက ပြောသည်။

စေတီဟောင်းနှင့် သာသနိက အဆောက် အဦးဟောင်းသို့ မော်တော်ကား၊ စက်လှေ များဖြင့် နေ့စဉ် လာရောက်လေ့လာ သည့် ထိုင်းနိုင်ငံသားများ နှင့် နိုင်ငံခြားသားများ ၅ဝ - ၆ဝ ဦးခန့် ရှိပြီး ရုံးပိတ်ရက်များတွင်မူ ၁ဝဝ ကျော် ရှိသည်။

“အခု ရေနည်းတော့ ဖေါင်အိမ်နဲ့ သွားလာလို့ မရတော့ဘူး။ ပဲ့ချိတ်စက်လှေတွေနဲ့ပဲ သွားကြတာ များတယ်။ ဝင်းကရွာဟောင်းနဲ့ စေတီဟောင်းကိုပဲ သွားကြတာ များတယ်” ဟု နိုင်ချစ်ငွေက ပြောသည်။

လွန်ခဲ့သော နှစ်ပေါင်း ၂၅ဝ ကျော် ဟံသာဝတီ မင်းနေပြည်တော် ပျက်သုဉ်းစဉ်က ထိုင်းနိုင်ငံသို့ ဝင်ရောက်ခိုလှုံခဲ့သည့် မွန်လူမျိုးများက အဆိုပါဘုရားသုံးဆူကို တည်ထား ခဲ့သည်ဟု သမိုင်းမှတ်တမ်းအချို့က ဆိုသည်။

ရေအောက်နစ်မြုပ်နေသည့် ရွာဟောင်းကို လွန်ခဲ့သည့် ၁၉၄၉ ခုနှစ် လွတ်လပ်ရေး ရပြီးစအချိန်က ဝင်းကဆရာတော်ဘုရားကြီးနှင့် ပြည်တွင်းစစ်ဒဏ်ကို တိမ်းရှောင်လာသည့် မြန်မာနိုင်ငံအောက်ပိုင်းမှ အိမ်ထောင်စု ၆ဝ ခန့်ရှိ မွန်လူမျိုးများက တည်ထောင်ခဲ့ကြသည်။

Ref;Mizzima

Read More...

အစိုးရသစ်လက်ထက် သတင်းလွတ်လပ်ခွင့် မျှော်လင့်ချက်မရှိ

29 April 2011

မြန်မာအစိုးရသစ် စတင် အာဏာရယူလာသည်မှာ ၁ လနီးပါး ကြာမြင့်လာပြီ ဖြစ် သော်လည်း သတင်းနှင့် စာနယ်ဇင်း လွတ်လပ်ခွင့်မရရှိသေးဘဲ အစိုးရသစ်ကို တိုက်တွန်း ဝေဖန် ထောက်ပြသော သတင်းများ၊ အစိုးရ၀န်ထမ်း လာဘ်ပေးလာဘ်ယူ သတင်းများ အပါအ၀င် သတင်းအများစုကို ဖြုတ်ပယ်မှုများ ရှိနေသေးကြောင်း သတင်းရရှိသည်။

သမ္မတ ဦးသိန်းစိန်၏ မိန့်ခွန်းများတွင် ဒီမိုကရေစီ အစိုးရအတွက် စတုတ္ထ မဏ္ဍိုင်ဟုခေါ်သော သတင်း မီဒီယာ များ၏ ကဏ္ဍ အရေးကြီးကြောင်း ထည့်သွင်းပြောဆိုခဲ့သော်လည်း ယခု အချိန်အထိ သတင်းလွတ်လပ်ခွင့် မပေး ဘဲ ပိတ်ပင်မှုများ ဆက်လက် ပြုလုပ် နေဆဲဖြစ်ကြောင်း သိရသည်။

“အရင်ထက် စာရင်တော့ စိစစ်ရေးက သတင်းတွေ လွှတ်ပေးတာရှိပါတယ်။ ဒါပေမယ့် သတင်းမီဒီယာတွေ အဓိက လုပ်ရမယ့် အစိုးရ၀န်ထမ်း လာဘ်ပေးလာဘ်ယူ ကိစ္စတွေ၊ နိုင်ငံရေးအရ ပြုပြင်ပြောင်းလဲသင့်တဲ့ အကြောင်းတွေကိုတော့ အခုအချိန်အထိ
ဖော်ပြခွင့်မပေးသေးဘူး” ဟု ရန်ကုန်အခြေစိုက် သတင်းသမားတဦးက ပြောသည်။

နိုင်ငံရေး အကျဉ်းသားများ လွတ်မြောက်ရေးအတွက် လက်မှတ်ထိုး လှုပ်ရှားမှုသတင်း၊ ဒေါ်အောင်ဆန်းစုကြည်နှင့် အမျိုးသားဒီမိုကရေစီအဖွဲ့ချုပ် (NLD) က အမေရိကန် အထူးကိုယ်စားလှယ် ခန့်အပ်မှုအပေါ် အပြုသဘော ကြိုဆိုသည်ဆိုသော သတင်း၊ ဒေါ်အောင်ဆန်း စုကြည်ကို မြန်မာ့နိုင်ငံရေးတွင် ပါဝင်ခွင့်ပေးရန် နိုင်ငံရေးအင်အားစုများက တောင်းဆိုသည့် သတင်း စသည်ဖြင့်ဖော်ပြနိုင်ရန် သတင်းဂျာနယ်တချို့က စာပေစိစစ်ရေးကို တင်ပြကြကြောင်း၊ သို့ရာတွင် စာပေစိစစ်ရေးက ယင်းသတင်းများအား လုံးဝ ဖော်ပြခွင့်မပေးဘဲ ဖြုတ်ပယ်ခဲ့ကြောင်း သိရှိရသည်။

“နိုင်ငံရေးပါတီတွေနဲ့ လွှတ်တော် ကိုယ်စားလှယ်တွေက လွတ်ငြိမ်း ချမ်းသာခွင့်နဲ့ ပတ်သက်လို့ ပြည်တွင်း မီဒီယာတွေကို ကျယ်ကျယ်လောင်လောင် ပြောလာတယ်။ စာပေ စိစစ်ရေးက အဲဒီ သတင်းတွေမှန်သမျှကို လုံးဝပယ်ချတယ်။နိုင်ငံရေး အကျဉ်းသား လွတ်မြောက်ရေး လက်မှတ်ထိုး လှုပ်ရှားမှုသတင်းတွေလည်း ဖော်ပြခွင့်မရဘူး။ ဒါက သတင်း လွတ်လပ်ခွင့် မရသေးဘူးဆိုတာ ထင်ထင်ရှားရှား ပြနေပါတယ်” ဟု သတင်းဂျာနယ် အယ်ဒီတာဦးက ဆိုသည်။

ယခုတပတ်ထုတ် သတင်းဂျာနယ်များတွင် နာရေးကူညီမှုအသင်း ၁၀ နှစ်ပြည့် အခမ်း အနားသို့ ဒေါ်အောင်ဆန်းစုကြည် တက်ရောက်သည့် ဓာတ်ပုံများကို ဂျာနယ် အတွင်း စာမျက်နှာများတွင် ဖော်ပြခွင့် ပြုခဲ့သော်လည်း ဒေါ်အောင်ဆန်းစုကြည်က နာရေးကူညီ မှုအသင်းသို့ အမေရိကန်ဒေါ်လာ ၁ သောင်းခွဲ လှူဒါန်းသည့် သတင်းနှင့် NLD မှ ဦးဝင်းတင်က ဒေါ်အောင်ဆန်း စုကြည်နှင့်အတူ နာရေးကူညီမှုအသင်း ၁၀ နှစ်ပြည့် အခမ်းအနား တက်ရောက်သည်ဆိုသော သတင်းများကိုမူ စာပေ စိစစ်ရေးက ဂျာနယ် အများစုတွင် ဖြုတ်ပယ်ခဲ့သည်။

သို့ရာတွင် ပြည်ထောင်စု ကြံ့ခိုင်ရေးနှင့် ဖွံ့ဖြိုးရေးပါတီ (ကြံ့ဖွံ့ပါတီ) ဝင် ဒေါက်တာ တင်ထွန်းဦး အမှုဆောင်ဒါရိုက်တာအဖြစ် တာဝန်ယူသော Myanmar Times ဂျာနယ် တွင်မူ ဒေါ်အောင်ဆန်းစုကြည်၏ ဓာတ်ပုံအောက်၌ ပုံစာအဖြစ် ငွေလှူသည့် အကြောင်းကို ဖော်ပြခွင့် ပြုထားသည်။

အစိုးရ ၀န်ထမ်းများအကြား ကျယ်ကျယ်ပြန့်ပြန့် ဖြစ်ပေါ်နေသော လာဘ်ပေးလာဘ်ယူ သတင်းများလည်း ဖော်ပြခွင့် မရကြောင်း ဂျာနယ်အသိုင်းအဝန်းက ပြောသည်။

“မှတ်ပုံတင်လုပ်ဖို့ လ၀က ကို ပိုက်ဆံပေးရတာ၊ ရန်ကုန်လေဆိပ်မှာ ပြန်လာတဲ့ အလုပ် သမားတွေကို ပိုက်ဆံ တောင်းနေတာ၊ ဆေးရုံတွေမှာ ပိုက်ဆံပေးမှ ခွဲစိတ်ပေးတာ အဲဒီလို သတင်းမျိုးတွေက လူထုကြားထဲက တက်လာတဲ့ သတင်းတွေပါ။ ဒါပေ မယ့် စာပေစိစစ်ရေးက ဒါမျိုးတွေကို ဖော်ပြခွင့်မပေးသေးဘူး။ ဒီသတင်းတွေက တကယ့်ကို လူထုအကျိုးပြု သတင်းတွေ ဖြစ်တဲ့အတွက် ဖော်ပြခွင့်ပေးသင့်ပါတယ်”ဟု သတင်း အယ်ဒီတာ တဦးက ဆိုသည်။

မကြာသေးမီကလည်း သာသနာရေး ဝန်ကြီးဌာနမှ သတင်းများ ပြည်ပမီဒီယာများသို့ ပေါက်ကြားမှုကြောင့် ဝန်ထမ်းများအား ခေါ်ယူစစ်မေးခြင်း၊ နယ်ပြောင်းအရေးယူခြင်းတို့ ပြုခဲ့သည်။

သတင်းဂျာနယ် အများစုက နေ့စဉ်သတင်းစာ ထုတ်ဝေခွင့်ရရှိရန် မျှော်လင့် နေကြ သော်လည်း ယခုအချိန်အထိ အစိုးရက တရားဝင် ခွင့်ပြုချက် မပေးသေးဘဲ စစ်တပ် ကျောထောက် နောက်ခံပေးထားသော မြ၀တီသတင်းစာ တစောင်ကိုသာ ထုတ်ဝေခွင့် ပေးခဲ့ခြင်း က မမျှတသော လုပ်ရပ်ဖြစ်ကြောင်း သတင်းဂျာနယ် အသိုင်းအ၀န်းက ပြောဆိုနေ ကြသည်။

မြန်မာနိုင်ငံ စာပေစိစစ်နှင့် မှတ်ပုံတင်ဌာန ဒုတိယညွှန်ကြားရေးမှူးချုပ် ဗိုလ်မှူးဟောင်း ဦးတင့်ဆွေကမူ သတင်းဂျာနယ်နှင့် ဘာသာရေး စာစောင်များမှအပ အားကစား၊ နည်းပညာ၊ ဖျော်ဖြေရေး၊ သုတ၊ ရသ၊ ကလေးစာပေ အပါအ၀င် စာပေ အမျိုးအစား ၆ မျိုးကို စာပေစိစစ်ရေး တင်ရန် မလိုဘဲ ထုတ်ဝေခွင့်ပေးမည်ဟု ပြောဆိုခဲ့သည်။

Ref;Irrawaddy

Read More...

တရားမ၀င် တပတ်ရစ်ကား တင်သွင်းမှု များပြားလာ

28 April 2011

ထိုင်းနယ်စပ်မှတဆင့် မြန်မာနိုင်ငံသို့ တရားမ၀င် သွင်းသည့် ဂျပန် တပတ်ရစ်ကား အရေ အတွက်မှာ လတ်တလော၌ တညလျှင် အစီးရေ ၁၀၀ နှင့် အထက်တွင် ရှိနေသည် ဟု ကားကုန်သည်များက ပြောသည်။

ယင်း ဂျပန်တပတ်ရစ်ကားများကို အိန္ဒိယ၊ ဘင်္ဂလားဒေ့ရှ်၊ နီပေါ နှင့် သီရီလင်္ကာ စသည့် အိမ်နီးချင်း နိုင်ငံ များသို့ တဆင့် ပြန်လည် ရောင်း ချသည့် ဈေးကွက် မြင့်မား လာသော ကြောင့် မြန်မာသို့ တင်သွင်းမှု များပြားလာခြင်း ဖြစ်ကြောင်း သိရ သည်။

မြန်မာ ကားကုန်သည် တဦးက“ထိုင်းဘက်က၀င်တဲ့ ဂျပန်တပတ်ရစ်ကားတွေကို အရင်က မြန်မာတွေ အစီးများပေမယ့် အခုနောက်ပိုင်း ဒီကားတွေကို တဆင့် ပြန်ရောင်းတဲ့ ဈေးကွက်က ကြီးလာတော့ မြန်မာဘက်ကိုဝင်တဲ့ ကားတွေ လာ သလောက် ကုန်တဲ့အထိဖြစ်နေလို့ ကားကုန်သည်တွေ အရင်ကထက် ပိုပြီး အပြိုင်သွင်းနေကြတယ်”ဟု ပြောသည်။

ထိုင်းနယ်စပ် မဲဆောက်မြို့မှ မြန်မာနိုင်ငံ မြ၀တီမြို့ဘက်သို့ တင်သွင်းနေသော အဆိုပါ ကားများမှာ ယခုလဆန်းမှစတင် ၍ ပုံမှန် ထက် ၃ ဆခန့် ရှိလာပြီး ရောင်းအား တက်လာ သော်လည်း ဈေးနှုန်းမှာ ယခင်ကအတိုင်းဖြစ်ကြောင်း၊ ယခင်က တညလျှင် ကားအစီး ၄၀ ခန့်သာ တင်သွင်းနေရာမှ လက်ရှိတွင် အမျိုးအစားစုံ ကားအစီးရေ ၁၀၀ ကျော်သည်ဟု တပတ်ရစ် ကား တင်ပို့သည့် ထိုင်းကုမ္ပဏီ တခု၏ မြန်မာ အရောင်းစာရေး တဦးက ပြောပြသည်။

တပတ်ရစ်ကား တစီး၏ မြန်မာဘက်သို့ ရောင်းချသည့် တန်ဖိုးမှာ ဘတ် ၂ သိန်း နှင့် ၃ သိန်း ၀န်းကျင်ရှိကြောင်း ကားပွဲစား တဦး၏ ပြောဆိုချက်အရ သိရသည်။

မြန်မာဘက်မှ အ၀ယ်များသောကြောင့် လက်ရှိ မဲဆောက်မြို့ဘက် ထိုင်း-မြန်မာ ချစ်ကြည်ရေးတံတားဘေးရှိ အမှတ် ၁၀၊ ၁၂၊ ၁၇၊ လှေဂိတ်များတွင် မြန်မာ ဘက် ရောင်းချမည့် ဂျပန် တပတ်ရစ်ကား အစီးရေ ၄၀၀၀ ခန့်ရှိနေသည်။

ဂျပန်နိုင်ငံမှတဆင့် ထိုင်းနိုင်ငံ ဘန်ကောက်ဆိပ်ကမ်းသို့ရောက်ရှိလာသည့် ကားများကို ထိုင်းတပတ်ရစ်ကားကုမ္ပဏီများက ၁၂ ဘီးတပ် ကားသယ်ယာဉ်များဖြင့် တင်ဆောင်ကာ တရက်လျှင်အစီးရေ ၁၀၀ ကျော်ကို မဲဆောက်ကမ်းနားရှိ လှေဆိပ်များသို့ နေ့စဉ် လာရောက်ပို့ဆောင်လျက် ရှိသည်။

၎င်းကားများကို မြ၀တီဘက်သို့ တရားဝင်တင်သွင်းခွင့်မရှိသည့်အတွက် မြ၀တီခရိုင် အာဏာပိုင်အဖွဲ့ပေါင်းစုံနှင့်ညှိနှိုင်းပြီး ကားတစီးလျှင် ဘတ်ငွေ ၁၀၀၀၀ အထက် ပေး၍ သွင်းရသည်ဟု ကားကုန်သည်များက ပြောသည်။

ယမန်နှစ်ဇူလိုင်လမှစ၍ မြန်မာအာဏာပိုင်များက လုံခြုံရေးအကြောင်းပြချက်ဖြင့် မဲဆောက်-မြ၀တီ ချစ်ကြည်ရေးတံတား အပါအ၀င်၊ တံတားဘေး ၀ဲယာရှိ တရားမ၀င် လှေဂိတ် ၃၀ ခန့်ကို ပိတ်လိုက်ပြီးနောက် တရားဝင် နယ်စပ် ကုန်သွယ်ရေး ရပ်တံ့ခဲ့သည်။

နယ်စပ်ဂိတ်များပိတ်လိုက်သောကြောင့် မြန်မာကုန်သည်များက ထိုင်းကုန်ပစ္စည်းများကို မြန်မာဘက်ခိုးသွင်းရသော် လည်း၊ ဂျပန် တပတ်ရစ် ကား တင်ပို့မှုများမှာ လုံးဝ ရပ်တံ့ ခြင်းမရှိဟု မြန်မာ ကားကုန်သည်က ပြောသည်။

၎င်းက“မြန်မာဘက်က ထိုင်းကုန်ပစ္စည်းတွေကို ပိတ်လို့ရချင်ရလိမ့်မယ်၊ ဒီကားသွင်း တာ ကိုတော့၊ ဘယ်လိုမှပိတ်လို့မရဘူး၊ ဘာဖြစ်လို့လည်းဆိုတော့ ဒီကားလုပ်ငန်းကို လုပ်နေတာ စစ်တပ်ကြီးကြီးပိုင်းက လူတွေ လုပ်နေ တာဖြစ်တယ်၊ သူတို့သား သမီးတွေ နဲ့ သူတို့ လူတွေပဲ ဒီနယ်စပ်အထိ၊ စီမံခန့်ခွဲနေတာဖြစ်တယ်၊ ဒီအလုပ်ကို သာမန်လူတွေ လုပ်လို့မရဘူး”ဟု ဆက်ပြောသည်။

မဲဆောက်မှ မြ၀တီဘက်သို့ တရားမ၀င် ကားတင်သွင်းမှုများကို ပြည်ပ သတင်းဌာနများ တွင် ဓာတ်ပုံမှတ်တမ်းများနှင့် အတူ သတင်းထုတ်လွှင့်မှုများရှိသောကြောင့် ကားများ ထားရှိသည့် ထိုင်းဘက်ခြမ်း လှေဆိပ်များတွင် ဓာတ်ပုံရိုက်ခွင့် မပြုကြောင်း တွေ့ရှိပါ က ဒဏ်ငွေ ဘတ် ၅၀၀၀၀ ပေးဆောင်ရမည် ဖြစ်ကြောင်း ဆိုင်းဘုတ်ကြီးများ ရေးသားထားသည်။

Ref;Irrawaddy

Read More...

ဓာတ်ဆီ မှောင်ခိုဈေးကွက် ပိုအလုပ်ဖြစ်လာ

28 April 2011

ပုဂ္ဂလိက စက်သုံးဆီ အရောင်းဆိုင်များ အားလုံးတွင် ကားတစီး တနေ့ ဓာတ်ဆီ နှစ်ဂါလန်သာ ရောင်းချပေးသော စနစ်ကို ဧပြီလ ၂၄ ရက်နေ့မှ တရားဝင် စတင်ကျင့်သုံး လိုက်ပြီးနောက် ဓာတ်ဆီမှောင်ခိုဈေးကွက်တွင် ဓာတ်ဆီဈေးနှုန်း မြင့်တက်သွားသည်။

Oil-Shop-black-market

ဓာတ်ဆီ မှောင်ခိုဈေးကွက်တွင် ဧပြီလ၂၄ ရက်မတိုင်မီက ဓာတ်ဆီ တဂါလန် ကျပ် ၅၀၀၀ အောက်ဝန်းကျင်တွင်သာ အရောင်း အ၀ယ်ရှိခဲ့ကြောင်း၊ စနစ်သစ်စတင်ကျင့်သုံးသော ဧပြီလ ၂၄ ရက်နောက်ပိုင်းတွင် ဓာတ်ဆီတဂါလန် ကျပ် ၅၆၀၀ အထိ ဈေးတက် သွား ကြောင်း ဓာတ်ဆီ ရောင်းဝယ်သူများက ပြောသည်။ ယနေ့ ဓာတ်ဆီဈေး အနည်းငယ် ပြန်ကျသွား၍ ကျပ် ၅၃၀၀ ခန့်ရှိသည်။

“သင်္ကြန်ပြီးတော့ မှောင်ခိုဈေး ဓာတ်ဆီတဂါလန် ကျပ် ၄၅၀၀ ကနေ ၄၉၀၀ ကြားမှာပဲ အရောင်းအ၀ယ် ဖြစ်တယ်။ အဲဒါ ကားတစီး ဓာတ်ဆီ တနေ့ နှစ်ဂါလန်ပဲ ရောင်းမယ် ဆိုတော့ မှောင်ခိုဈေးက ပြန်ထိုးတက်သွားတယ်။ အပြင်မှာ အခု ဓာတ်ဆီ တဂါလန် ရောင်း ဈေး(ဓာတ်ဆီထုတ်သူက မှောင်ခိုသမားထံပြန်ရောင်းသည့် ဈေး) ၅၄၀၀၊ ၀ယ်ဈေး(မှောင်ခိုသမားများထံမှ သုံးစွဲမည့်သူက ၀ယ် သည့်ဈေး) ၅၆၀၀ ဖြစ်နေတယ်” ဟု ရန်ကုန်မြို့မှ ကားသမားတဦးက ပြောသည်။

ပုဂ္ဂလိကသို့လွှဲပြောင်းခြင်းမပြုမီ ယခင်စစ်အစိုးရလက်ထက်က အစိုးရ စက်သုံးဆီ အရောင်းဆိုင်များအားလုံးတွင် ကားတစီး တနေ့ ဓာတ်ဆီ နှစ်ဂါလန်သာ ရောင်းချပေး ခဲ့ရာ ယခုပြန်လည်ကျင့်သုံးသော စနစ်သည် စစ်အစိုးရလက်ထက်က စနစ်ဟောင်းကို ပြန်လည် အသက်သွင်းခြင်းဖြစ်သည်ဟု ရန်ကုန် ကားသမားများက ပြောဆိုကြသည်။

ပုဂ္ဂလိက စက်သုံးဆီ အရောင်းဆိုင်များတွင် ဓာတ်ဆီ တဂါလန် အစိုးရ သတ်မှတ်ဈေး ၂၅၀၀ ကျပ်ဖြစ်သည်။

စွမ်းအင်ဝန်ကြီးဌာနနှင့် မြန်မာနိုင်ငံ စက်သုံးဆီ တင်သွင်းရောင်းချဖြန့်ဖြူးရေးအသင်းက ဆီဆိုင်များတွင် ဓာတ်ဆီထုတ်ရန် ရာနှင့်ချီ တန်းစီနေသော ကားတန်းများ ပပျောက်စေရန် ရည်ရွယ်၍ ကားတစီး တနေ့ ဓာတ်ဆီနှစ်ဂါလန် သာ ရောင်းပေးသည့် စနစ် ကျင့် သုံးသော်လည်း သုံးရက်စာ ၆ ဂါလန်အထိ ထုတ်ရောင်းကြောင်း သိရှိရသည်။

“အထက်က ညွှန်ကြားချက်အတိုင်း ရောင်းတာပါ။ ဆိုင်အားလုံး ကားတစီးတနေ့နှစ်ဂါလန်ပဲ ရောင်းခိုင်း ထားတယ်။ နှစ်ရက်၊ သုံး ရက်စာ ဆီကြိုထုတ်သွားလို့ရပါတယ်။ အခု ဆီတန်းစီတဲ့ကား လျော့သွားပါတယ်”ဟု ရန်ကုန် လှိုင်မြို့နယ်၊ ရွှေဇင်ယော် ဓာတ်ဆီ အရောင်းဆိုင်မှ တာဝန်ရှိသူ တဦးက ပြောသည်။

မှောင်ခိုဈေးကွက် ပပျောက်ရန်အတွက် ကားတစီးတနေ့ဓာတ်ဆီနှစ်ဂါလန် ရောင်းချ သည်ဆိုသော်လည်း ပုဂ္ဂလိက စက်သုံးဆီ အရောင်းဆိုင်များက မှောင်ခိုဈေးကွက် သို့ ခိုးထုတ်ရောင်းချမှုများ ဖြစ်ပေါ်နေခြင်းကြောင့် မှောင်ခိုဈေးကွက်ပို၍ ပင် ကြီးမားလာကြောင်း သိရှိရသည်။

“ဆီဆိုင်တွေနဲ့ ပေါင်းထားတဲ့ ဆီမှောင်ခိုထုတ်တဲ့ အုပ်စုတွေရှိတယ်။ သူတို့က ကားထဲမှာ ဂါလန် ၅၀ ၊ ၁၀၀ ဆန့် အောင် ဆီ တိုင် ကီ တွေကို ပြင်ရိုက်ပြီး ဆီဆိုင်တွေက သူတို့ကို ဆီတွေ ခိုးထုတ်ရောင်းပေးတယ်။ ရတဲ့အမြတ်ကို ကားသမားနဲ့ ဆီဆိုင်နဲ့ တ၀က် ဆီယူကြတယ်။ ဆီဆိုင်တိုင်းလိုလိုမှာ ဆီမှောင်ခိုသမားနဲ့ချိတ်ပြီး ဓာတ်ဆီကို တိုက်ရိုက်(သို့မဟုတ်) သွယ်ဝိုက်ရောင်းကြတယ်”ဟု အင်းစိန်မြို့နယ် ဘီအိုစီကွေ့ရှိ Denkoပုဂ္ဂလိက စက်သုံးဆီ အရောင်းဆိုင်တွင် ဓာတ်ဆီ တန်းစီလေ့ရှိသူ အငှားကား မောင်းသူ တဦး က ပြောသည်။

ဓာတ်ဆီကန့်သတ်ရောင်းချမှုကြောင့် အမှန်တကယ် အသုံးပြုမည့်သူအများစု အခက် အခဲများကြုံတွေ့ရကြောင်း သိရသည်။

“ဓာတ်ဆီသုံး အငှားကားတွေ အကုန်လုံး ဒုက္ခရောက်တယ်။ တနေ့ နှစ်ဂါလန်ဆိုတော့ ဘယ်လိုမှ မလောက်ဘူး။ မှောင်ခိုဈေးကွက် မှာက ဆီတဂါလန် ကျပ် ၅၀၀၀ ကျော်တယ်။ အော့တိန်းဓာတ်ဆီကလည်း တဂါလန်ကို ၄၁၀၀ ရှိတယ်။ CNG အငှားကားက ဓာတ်ငွေ့တအိုးဖြည့်ရင်၂၀၀၀ ပဲကုန်တယ်။ တနေကုန် မြို့ပတ်မောင်း ခရီးသည် ရှာလို့ရတယ်။ ဓာတ်ဆီသမားက မြို့ပတ် ခရီးသည် မရှာနိုင်ဘူး။ ခရီးတို တကြောင်း CNG ကားက ၁၀၀၀ လောက်နဲ့ လိုက်နိုင်ပေမယ့် ဓာတ်ဆီကားက ခရီးတို တကြောင်း အနည်းဆုံး ၂၀၀၀ လောက်ရမှ ကိုက်တယ်။ ဓာတ်ဆီ အငှားကား တွေအကုန်လုံး အတော်ကို ပြဿနာတက်နေတယ်”ဟု အထက် ပါ အငှားကား မောင်းသူ က ပြောဆိုသည်။

ပြည်တွင်း စီးပွားရေးပညာရှင်တဦးက ပုဂ္ဂလိက စက်သုံးဆီ အရောင်းဆိုင်များတွင် ဓာတ်ဆီကန့်သတ်ရောင်းချမှုသည် ဈေးကွက် စီးပွားရေးသဘာနှင့် မလျော်ညီကြောင်း ပြောသည်။

“ဓာတ်ဆီကို တဂါလန် ၂၅၀၀ နဲ့ သတ်မှတ်ရောင်းတယ်။ ကားတစီး ဓာတ်ဆီ နှစ်ဂါလန်ပဲ ကန့်သတ်ရောင်းတယ်။ ဒါတွေက ဈေး ကွက်စီးပွားရေး သဘောတရားမဟုတ်ပါဘူး။ ဈေးကွက်ကို ဖွင့်ပေးရမယ်။ ဈေးကွက်ဈေးနှုန်းအတိုင်း ဆီဆိုင်တွေက လိုက် ရောင်း ခွင့်ပြုရမယ်။ ဒါပေမယ့် အစိုးရက ဓာတ်ဆီဝယ်မသုံးနိုင်တော့တဲ့ ကားတွေအတွက် CNG သဘာဝဓာတ်ငွေ့သုံး ကားတွေ အဖြစ်ပြောင်းလဲခွင့်ပေးမယ်ဆိုရင် ဓာတ်ဆီပြဿနာ အထိုက်အလျောက် ပြေလည်သွားမယ်။ CNG က ကိုယ့်နိုင်ငံကထွက်နေတာပဲ။ ဘယ်ကမှ တင်သွင်းစရာမလိုဘူး။ ၀ယ်စရာမလိုဘူး”ဟု စီးပွားရေး ပညာရှင်က ဆိုသည်။

အစိုးရ စက်သုံးဆီ အရောင်းဆိုင် ၂၄၀ ကို ပြည်ထောင်စုမြန်မာနိုင်ငံ စီးပွားရေးဦးပိုင် လီမိတက်၊ ပြည်ထောင်စု ကြံ့ခိုင်ရေးနှင့် ဖွံ့ဖြိုးရေး ပါတီ အပါအ၀င် အစိုးရနှင့် နီးစပ်မှုရှိသော ပုဂ္ဂလိကကုမ္ပဏီပေါင်း၂၀ က စွမ်းအင်ဝန်ကြီးဌာနမှ၂၀၁၀ ခုနှစ်ဇွန်လ ၁၀ ရက်နေ့ တွင် တရားဝင် လွှဲပြောင်း ရယူ လုပ်ကိုင်ခဲ့ခြင်းဖြစ်သည်။

Ref;Irrawaddy

Read More...

ဈေးစည်ပင်ကြောင့် သီရိမင်္ဂလာဈေးသစ် ဆိုင်ခန်းရှင်များ အခက်ကြုံ

ယုယမိုး
28 April 2011

ရန်ကုန် သီရိမင်္ဂလာဈေးကြီး၏ ဈေးသူဈေးသားများ၊ ဆိုင်ခန်း ပိုင်ရှင်များသည် ဈေးများ ဌာန စည်ပင်သာယာရေး ကော်မတီ၏ မတရား အခွန်ကောက်ခံမှု၊ အဂတိလိုက်စား မှု များကြောင့် အခက်အခဲများ ရင်ဆိုင်နေရသည်ဟု သိရသည်။

ရန်ကုန်မြို့၏ အကြီးဆုံး ကုန်စိမ်းဈေး ကြီးဖြစ်သည့် သီရိမင်္ဂလာ ဈေးကြီးကို ၂၀၁၀ ပြည့်နှစ် ဒီဇင်ဘာ ၂၃ ရက်နေ့ ကတည်းက ရန်ကုန်တိုင်း လှိုင်မြို့ နယ်သို့ ပြောင်းရွှေ့ ဖွင့်လှစ် ခဲ့ သော်လည်း ဆောက်လုပ်ရေး လုပ်ငန်း များမှာ ယခုအထိ မပြီးစီး သေး ကြောင်း၊ ဆောက်လုပ်ရေး ကုန်ကျ စရိတ် များကိုလည်း ဈေးဟောင်းမှ ပြောင်းရွှေ့ရောင်းချလာသူ ဈေးသူဈေးသား များထံမှ ကောက်ခံ နေကြောင်း၊ ထို့အပြင် ဈေးစည်ပင်သာယာရေးမှ တာဝန်ယူ ကုန်ကျခံရမည့် ဈေးလုံခြုံရေး လမ်း လျှပ်စစ်မီတာခ များအား ဆိုင်ခန်း အကျယ်အ၀န်းကို လိုက်ကာ ပေးဆောင်ရမည်ဟု ဈေးစည်ပင်မှ ထုတ်ပြန်လိုက်ကြောင်း သီရိမင်္ဂလာဈေးတွင် ကုန်စိမ်းများ ရောင်းချနေသည့် ဦးချိုကြီးက ပြောသည်။

“ကျနော်တို့ ဈေးသစ်ကို မပြောင်းခင်ကတော့ ဈေးစည်ပင်သာယာရေး ဌာနမှူး ဦးတင်ကိုကို ကိုယ်တိုင်က တည်ဆောက် ရေးတွေ အားလုံးပြီးမှ ပြောင်းရမယ်၊ ဆိုင်ခန်းတွေကို အတိအကျ ပြန်နေရာ ချထားပေးမယ်၊ ဘာအခွန်အခမှ ထပ် မတောင်းဘူးလို့ မနှစ်က မတ်လမှာ အသေအချာ ပြောခဲ့ပါတယ်။ အခုတော့ ဆိုင်ခန်း ဆောက်လုပ်ရေးတွေ မပြီးသေးခင် ဈေးပြောင်းပေးရတဲ့အပြင်၊ ဆောက်လုပ်ဆဲ ဆိုင်ခန်းတွေရဲ့ ကုန်ကျစရိတ် တွေပါ ပေးရတယ်” ဟု သူက ဆိုသည်။

ယခုလ ၂၃ ရက်နေ့ကလည်း ဈေးလုံခြုံရေး လျှပ်စစ်မီးဖိုးများကို ကောက်ခံသွားကြောင်း၊ အစိုးရ ယူနစ်အတိုင်း ကောက်ခံပါက တဈေးလုံးအတွက် ကျပ် ၈ သောင်း ၀န်းကျင်သာ ကုန်ကျမည် ဖြစ်သော်လည်း ထိုစနစ်ဖြင့် ကောက်ခံခြင်း မဟုတ်ဘဲ ဆိုင်ခန်း အကျယ်အ၀န်းပေါ် မူတည်ပြီး ကောက်ခံသဖြင့် နစ်နာကြောင်း ၎င်းက ဆက်ပြောသည်။

“ဆိုင်ခန်းကျဉ်းရင် တခန်းကို ကျပ် ၅၀၀ နှုန်း၊ ကျယ်ရင် ၁၀၀၀ နှုန်းပေးရတယ်။ ဧပြီတလတည်းရဲ့မီးဖိုးမဟုတ်ဘဲ ၄ လစာ မီးဖိုး ဆိုပြီး Back Date နဲ့ ပေးရမှာပါ” ဟု ဦးချိုကြီးက ဆိုသည်။

သီရိမင်္ဂလာဈေးသစ်တွင် ဆိုင်ခန်းစုစုပေါင်း ၂၀၀၀ ကျော် ရှိသဖြင့် လုံခြုံရေး မီတာခမှာ တဈေးလုံးအတွက် ကျပ် သိန်း ၁၀ ဂဏန်းချီ ပေးဆောင်နေရသည်ဟု သူက ပြောသည်။

အဆိုပါကိစ္စရပ်နှင့် ပတ်သက်၍ ဧရာဝတီက ဈေးဌာနမှူး ဦးတင်ကိုကို အား ဆက်သွယ် မေးမြန်းရာ ဖြေဆိုခြင်း မရှိပေ။

ဆိုင်ခန်းပိုင်ရှင်များသည် ဈေးစည်ပင်မှ သတ်မှတ်ပေးသော နေရာများတွင်သာ ရောင်းချ ရပြီး နေရာကောင်းသည့် ဆိုင်ခန်းများ အား ဈေးစည်ပင်က လေလံတင် ရောင်းစားထား မှုများလည်း ရှိကြောင်း သိရသည်။

“ကျမတို့ ဆိုင်ခန်းတွေဆို ဈေးဝင်ပေါက်နဲ့ နီးတဲ့နေရာမျိုး မဟုတ်ဘဲ ချောင်ကျတဲ့ အနောက်ဘက် နားလောက်ကို ပေးထားတယ်။ ဆိုင်ခန်းပိုင်ရှင် တော်တော်များများလည်း ကျမလိုပဲ။ ဆိုင်ခန်းနေရာ ကောင်းတွေကိုတော့ ဈေးစည်ပင်က လေလံတင် ရောင်းစားဖို့ သိမ်းထားတယ်။ ဇန်န၀ါရီ လတုန်းကတောင် ဆိုင်ခန်းတချို့လေလံတင်သေးတယ်” ဟု ငှက်ပျောသီး ပွဲရုံပိုင်ရှင် အမျိုးသမီးတဦးက ပြောသည်။

ဈေးသစ်တွင် ယခင် ဈေးဟောင်းကဲ့သို့ အရောင်းအ၀ယ် မကောင်းကြောင်း၊ ဈေးသစ်သို့ ပြောင်းရွှေ့ လာသည်မှာ ၄ လခန့် ရှိပြီဖြစ်သော်လည်း ပုံမှန် မဖြစ်သေးဘဲ ယခင် ၀ယ် နေကြ ဖောက်သည်များမှာ ဆိုင်ခန်းနေရာများကို မမှတ်မိသဖြင့် နီးစပ်ရာ ဆိုင်များ တွင်သာ ဝယ်ယူကြသောကြောင့် နစ်နာရကြောင်း ၎င်းက ဆိုသည်။

ဆက်လက်၍ သူက “ကုန်တင်ကုန်ချ အလုပ်သမား စရိတ်များလည်း ယရင်ထက် ၂ ဆပို ပေးနေရတယ်။ အခုလို လမ်းမီး မီတာခတွေကို ကျမတို့ ဈေးသူဈေးသားတွေကပဲ အကုန်အကျ ခံရမယ်ဆိုတော့ အခက်အခဲ တွေ့နေကြပါတယ်” ဟု ပြောသည်။

သီရိမင်္ဂလာ ဈေးသူဈေးသားများသည် ယခင် ရန်ကုန် မြို့တော်ဝန် ဦးအောင်သိန်းလင်း လက်ထက်က ယာဉ်ကျောပိတ်ဆို့သည် ဆိုသည့် အကြောင်းပြချက်ဖြင့် အဓမ္မ ပြောင်းရွှေ့ ခိုင်းမှုကြောင့် ကြည့်မြင်တိုင်မြို့နယ် ဈေးဟောင်းနေရာမှ ယခုလှိုင်မြို့နယ် ပိတောက်ချောင်း အနီးသို့ ပြောင်းရွှေ့ဖွင့်လှစ်ခဲ့ရသည်။

Ref;Irrawaddy

Read More...

နယ်စပ်အခြေစိုက် အတိုက်အခံများ ထိုင်း နှိမ်နင်းဖွယ်ရှိ

28 April 2011

ထိုင်း-မြန်မာ နယ်စပ် မဲဆောက်မြို့အခြေစိုက် မြန်မာအတိုက်အခံ အဖွဲ့အစည်းများ၏ ရုံးများနှင့် လူနေအိမ်များကို ထိုင်း ရဲတပ်ဖွဲ့က မကြာမီ ၀င်ရောက် ဖမ်းဆီးမှုများ ပြုလုပ် နိုင်သည်ဟု ကရင်ပြည်နယ် မြ၀တီခရိုင် ရဲ တပ်ဖွဲ့နှင့်နီးစပ်သည့် အစိုးရ ၀န်ထမ်း တဦးက ပြောသည်။

မြန်မာနိုင်ငံ မြ၀တီမြို့တွင် ယမန်နေ့က ထိုင်းနိုင်ငံ တာ့ခ်ခရိုင် ရဲချုပ်ဦးဆောင်သည့်အဖွဲ့နှင့် မြ၀တီခရိုင် ရဲမှူး ဦးဆောင် သောအဖွဲ့တို့ ပြုလုပ်သည့် နှစ်နိုင်ငံ နယ်စပ်ဆိုင်ရာ ပူးတွဲ မှုခင်းတိုက်ဖျက်ရေး စည်းဝေးပွဲတွင် ယင်းသို့ မြန်မာ အတိုက် အခံများနှင့် ပတ်သက်၍ ထည့်သွင်း ဆွေးနွေးခြင်းဖြစ်ကြောင်း သိရသည်။

“မနေ့ကမြ၀တီမှာ ထိုင်းနဲ့မြန်မာရဲတွေ အထူးစည်းဝေးပွဲလုပ်ကြတယ်၊ လူကုန်ကူးမှု တိုက်ဖျက်ရေး၊ မူးယစ်ဆေးဝါး နှိမ်နင်းရေး ကိစ္စ၊ နယ်စပ်ရေးရာနဲ့ မဲဆောက်မှာရှိနေတဲ့ မြန်မာ အတိုက်အခံအဖွဲ့တွေကို ထိုင်းဘက်ကအရေးယူပေးဖို့ ကိစ္စတွေ ပါတယ်၊ မြန်မာ ရဲဘက်က ထိုင်းရဲကိုပေးတဲ့ သက်သေခံအထောက် အထားတွေထဲမှာ မြန်မာအတိုက်အခံ တွေရဲ့ရုံး တွေနဲ့ လူနေအိမ်တွေကို ရပ်ကွက်အလိုက် လမ်းအလိုက် ဓာတ်ပုံအထောက်အထား တွေနဲ့ ပေးလိုက်တယ်”ဟု အထက်ပါ အစိုးရ ၀န်ထမ်းက ပြောသည်။

မြန်မာဘက်က အဓိကဆွေးနွေးသည့်အချက်တွင် မြ၀တီခရိုင်အတွင်းဖြစ်ပွားနေသည့် အကြမ်းဖက်မှုနှင့် ဗုံးခွဲတိုက်ခိုက်မှုများသည် ထိုင်းဘက်တွင်အခြေစိုက်သည့် မြန်မာ အတိုက်အခံအဖွဲ့များက ပြုလုပ်နေခြင်းဖြစ်သည့်အတွက် ထိုင်းဘက်မှအမြန်ဆုံး အရေးယူ မှုများပြုလုပ်ပေးရန်ပါရှိသည်ဟု သိရသည်။

ယမန်နေ့ကပြုလုပ်သည့် ထိုအထူးစည်းဝေးပွဲသို့ ထိုင်းနိုင်ငံတာ့ခ်ခရိုင်ရဲမှူးကြီး Pol. Maj.Gen Chamlong Nomsian နှင့် အတူ ခရိုင်အဆင့် အကောက်ခွန်ဌာန၊ ထိုင်း လ၀က၊ ကာကွယ်ရေးဌာန၊ နယ်ခြားကော်မတီ စသည့်အဖွဲ့များမှ အဆင့်မြင့် အရာရှိ များ တက်ရောက် ဆွေးနွေးခဲ့ကြသည်။

မြန်မာဘက်မှ မြ၀တီခရိုင် ရဲမှူး ဒုရဲမှူးကြီး ခင်ကျော်၊ ရဲမှူး လေးစိုး(ဦးစီး)၊ ရဲမှူး လင်းဦး (သတင်းတပ်ဖွဲ့)၊ ဒုရဲမှူး အောင်ငွေ၊ ဒုရဲမှူး ကြီးရွှေ(လူကုန်ကူး-အထူး)၊ ဒုရဲမှူး စောလေးဝါး(မူးယစ် အထူး)၊ ရဲအုပ်သိန်းလွင်(မူးယစ်အထူး-BLO)၊ ရဲအုပ် အောင် မျိုးလွင် နှင့် ဒုရဲအုပ် ဆွေလတ် တို့ တက်ရောက်ဆွေးနွေးခဲ့ကြကြောင်း သိရသည်။

အဆိုပါ အစည်းအဝေးမှ နှစ်နိုင်ငံ တာဝန်ရှိသူများ သဘောတူညီချက်အရ မကြာမီ ထိုင်း-မြန်မာ နယ်စပ် မဲဆောက်မြို့နှင့် မြ၀တီခရိုင်အတွင်း ရာဇ၀တ်မှုနှိမ်နှင်းရေးဆိုင်ရာ စစ်ဆင်ရေးများကို တိုးမြှင့်လုပ်ဆောင်လာနိုင်သည်ဟု မဲဆောက်ရှိဝါရင့် ထိုင်း သတင်း ထောက် တဦးက ပြောဆိုသည်။

Ref;Irrawaddy

Read More...

ဒေါ်အောင်ဆန်းစုကြည် အယ်လယ်နာ ရုစဗဲ့ ဆု ရရှိ

မခင်ဖြူထွေး
28 ဧပြီ 2011

အမေရိကန်ပြည်ထောင်စု၊ လော့စ်အိန်ဂျယ်လိစ်မြို့မှာ အခြေစိုက်တဲ့ Feminist Majority Foundation လို့ခေါ်တဲ့ အမျိုးသမီး အခွင့်အရေး လှုပ်ရှားမှု အဖွဲ့က မြန်မာ့ဒီမိုကရေစီ ခေါင်းဆောင် ဒေါ်အောင်ဆန်းစုကြည်ကို ဒီနှစ်အတွက် အယ်လယ်နာ ရုစဗဲ့ (Eleanor Roosevelt) ဆု ချီးမြှင့်လိုက် ပါတယ်။ ဧပြီလ ၂၆ ရက်နေ့ညက ပြုလုပ်ခဲ့တဲ့ ဒီအဖွဲ့ရဲ့ ဆုပေးပွဲ အခမ်းအနားကို ဒေါ်အောင်ဆန်းစုကြည် ကလည်း ဗွီဒီယိုကနေတဆင့် မိတ်ဆက်စကားနဲ့ ကျေးဇူးတင်စကားတွေ ပြောကြားခဲ့ပါတယ်။ အပြည့်အစုံကို မခင်ဖြူထွေးက တင်ပြပေးထားပါတယ်။

မြန်မာ့ဒီမိုကရေစီ ခေါင်းဆောင် ဒေါ်အောင်ဆန်းစုကြည် အပါအ၀င် အာဖဂန်နစ္စတန်နဲ့ ဟေတီနိုင်ငံတို့က အမျိုးသမီး လှုပ်ရှားသူ ၂ ဦးနဲ့အတူ အမေရိကန် NPR ရေဒီယို သတင်းထောက်တဦး စုစုပေါင်း ၄ ဦးတို့ဟာ အမေရိကန်ပြည်ထောင်စု လော့စ် အိန်ဂျယ်လိစ်မြို့ အခြေစိုက် အမျိုးသမီး အခွင့်အရေး လှုပ်ရှားမှုအဖွဲ့ Feminist Majority Foundation ရဲ့ဒီနှစ်အတွက် အယ်လယ်နာ ရုစဘဲ့ဆုကို ဂုဏ်ပြု ချီးမြှင့်ခံခဲ့ကြရ တာပါ။

မြန်မာပြည်သူလူထုရဲ့လူ့အခွင့်အရေး၊ အမျိုးသမီး အခွင့်အရေးတွေ ရရှိဖို့ ဦးဆောင် ကြိုးပမ်းနေတဲ့ ဒေါ်အောင်ဆန်းစုကြည်ရဲ့လှုပ်ရှားမှုတွေအတွက် သူ့ကို အခုလို ဂုဏ်ပြုဖို့ ဖြစ်လာခဲ့ရတယ်လို့ Feminist Majority Foundation အဖွဲ့ရဲ့ဒုတိယ အမှုဆောင် ညွှန်ကြားရေးမှူး ကက်သရင်း ပေလာ (Katherine Piller) က ပြောပါတယ်။

“ဒေါ်အောင်ဆန်းစုကြည်ရဲ့ လူ့အခွင့်အရေးနဲ့ အမျိုးသမီး အခွင့်အရေးဆိုင်ရာ လှုပ်ရှား နေမှုတွေ အတွက် အခုလို ဂုဏ်ပြုရတာပါ။ ဒေါ်အောင်ဆန်းစုကြည်ဟာ မြန်မာနိုင်ငံ ဒီမိုကရေစီ ရရှိဖို့ ဦးဆောင် လှုပ်ရှားနေသူပါ။ ဒါဟာ အဓိကကျတဲ့ လူ့အခွင့်အရေးနဲ့ အမျိုးသမီး အခွင့်အရေးတွေအတွက် လှုပ်ရှား တိုက်ပွဲဝင်နေတာပဲ ဖြစ်ပါတယ်။ ပြည့်ဝတဲ့ ဒီမိုကရေစီ စနစ်တရပ် ဖြစ်ဖို့ဆိုရင် လူ့အဖွဲ့အစည်းရဲ့လှုပ်ရှားမှုတွေမှာ အမျိုးသမီးတွေ ပါဝင်ခွင့်ရဖို့ အရေးကြီးပါတယ်။

“ကျမတို့ အခမ်းအနားကို ပေးပို့တဲ့ သူ့ရဲ့ စကားထဲမှာလည်း ဒေါ်အောင်ဆန်းစုကြည်က အမျိုးသမီးတွေရဲ့ အရေးပါတဲ့ အခန်းကဏ္ဍကို ထောက်ပြ ပြောဆိုခဲ့ပါတယ်။ မြန်မာနိုင်ငံက ဖိနှိပ်ခံ အမျိုးသမီးတွေ၊ မိန်းကလေးငယ်တွေ အားလုံးရဲ့အခွင့်အရေးအတွက် ဦးဆောင် တိုက်ပွဲဝင်နေတဲ့ ဒေါ်အောင်ဆန်းစုကြည်ရဲ့ လှုပ်ရှား ဆောင်ရွက်မှုတွေဟာ မြန်မာ နိုင်ငံသားတွေအတွက် သာမက ကမ္ဘာပေါ်က အမျိုးသမီးထု အားလုံးအတွက် အတုယူ စရာ စံပြပုဂ္ဂိုလ်တဦး ဖြစ်ပါတယ်။”

Feminist Majority Foundation အဖွဲ့ရဲ့ ဒုတိယ အမှုဆောင် ညွှန်ကြားရေးမှူး ကက်သရင်း ပေလာ ပြောသွားတာ ဖြစ်ပါတယ်။

မြန်မာ့ဒီမိုကရေစီ ခေါင်းဆောင် ဒေါ်အောင်ဆန်းစုကြည် အနေနဲ့ အခမ်းအနားကို ကိုယ်တိုင် မတက်ရောက် နိုင်တဲ့အတွက် ရုပ်သံနဲ့ ကြိုတင်ရိုက်ယူထားတဲ့ ဗွီဒီယိုခွေကနေ တဆင့် ဆုပေးတဲ့ အဖွဲ့အစည်းနဲ့အတူ အခမ်းအနား တက်ရောက်လာသူတွေကို အခုလို နှုတ်ဆက် စကား ပြောဆိုခဲ့ပါတယ်။

“အမျိုးသမီးတွေကို ကူညီတာဟာ လူသားတွေ အားလုံးကို ကူညီတာနဲ့ အတူတူပါပဲ။ ဘာဖြစ်လို့လဲဆိုတော့ ကမ္ဘာကြီးမှာ အမျိုးသမီးတွေဟာ အရေးကြီးတဲ့ အခန်းကဏ္ဍတွေမှာ ရှိနေကြလို့ပါ။ သူတို့ကျွမ်းကျင်ရာ လုပ်ငန်းခွင်တွေမှာတင် မဟုတ်ဘဲ အိမ်တွင်း၊ မိသားစု အတွင်းမှာပါ သူတို့ဟာ အဓိကကျတဲ့ အခန်းကဏ္ဍမှာ ရှိနေကြတာပါ။ အခုလို အမျိုး သမီးတွေဘက်က လိုက်ပြီး ကျမ ပြောနေတာကို အခမ်းအနား တက်ရောက် လာတဲ့ အမျိုးသားတွေ နားလည်နိုင်လိမ့်မယ်လို့ မျှော်လင့်ပါတယ်။

“အမျိုးသမီးတွေ ကြုံတွေ့နေရတဲ့ အခက်အခဲ၊ ပြဿနာတွေ၊ အမျိုးသမီးတွေ ရင်ဆိုင် နေရတဲ့ ခွဲခြား ဆက်ဆံ ခံရမှုတွေကို အမျိုးသမီးတွေ အချင်းချင်းကပဲ နားလည်မှု အရှိဆုံးပါ။ ဒါကြောင့်လည်း ကျမတို့အားလုံး၊ အထူးသဖြင့် အမျိုးသမီးတွေ အနေနဲ့ မိမိတို့ရဲ့ ကိုယ်ပိုင် လုပ်နိုင်ရည် စွမ်းအားတွေနဲ့ ကိုယ့်ရဲ့ အခွင့်အရေး တွေ အပြည့်အ၀ ခံစားခွင့်ရတဲ့ အချိန်အထိ ညီအမရင်းတွေလို စိတ်ထားပြီး အတူတကွနဲ့ အနီးကပ် ပူးပေါင်း ဆောင်ရွက် သွားကြဖို့ ကျမ မျှော်လင့်ပါတယ်။”

လူ့အခွင့်အရေးမှာ ယုံကြည်သူတယောက် အနေနဲ့ အခုလို လူ့အခွင့်အရေးနဲ့ အမျိုးသမီး အခွင့်အရေးအတွက် ရှေ့တန်းကနေ ဦးဆောင် လှုပ်ရှားခဲ့သူ အယ်လယ်နာ ရုစဘဲ့ကို ဂုဏ်ပြုချီးမြှင့်တဲ့ဆု ချီးမြှင့်ခံရတာဟာ တကယ့်ကို ဂုဏ်ယူစရာပါပဲလို့လည်း ဒေါ်အောင် ဆန်းစုကြည်က ပြောပါတယ်။ မြန်မာနိုင်ငံ လူ့အခွင့်အရေး လှုပ်ရှားမှုကို နိုင်ငံတကာ က ကူညီ ထောက်ပံ့နေကြတဲ့အတွက် ကျေးဇူးတင်တဲ့ အကြောင်းနဲ့ ဆက်ပြီးတော့ အားပေး ကူညီသွားကြဖို့ကိုလည်း ဒေါ်အောင်ဆန်းစုကြည်က တိုက်တွန်း ပြောဆိုသွားခဲ့ပါတယ်။

ကမ္ဘာတ၀န်းက အမျိုးသမီး အခွင့်အရေး လှုပ်ရှား တက်ကြွသူတွေကို Feminist Majority Foundation အဖွဲ့က အခုလို အယ်လယ်နာ ရုစဘဲ့ ဂုဏ်ပြုဆု ချီးမြှင့်လာခဲ့တာဟာ ဒီနှစ် ၇ ကြိမ်မြောက် ဖြစ်ပါတယ်။ လူသားတိုင်းဟာ လူသား ဖြစ်တဲ့အတွက် အသက်ရှင် နေထိုင်ခွင့် အပါအ၀င် အခြေခံ အခွင့်အရေးတွေ ခံစားခွင့်ရှိရမယ် ဆိုတာကို ဖော်ပြထားတဲ့ ကုလသမဂ္ဂ လူ့အခွင့်အရေး ကြေညာစာတမ်း ရေးဆွဲပြဋ္ဌာန်း နိုင်အောင် ဦးဆောင် ကြိုးပမ်းခဲ့သူ အမေရိကန် သမ္မတဟောင်း ဖရန်ကလင် ရုစဘဲ့ (Franklin Roosevelt) ကတော် အယ်လယ်နာ ရုစဘဲ့ကို ဂုဏ်ပြုတဲ့ အနေနဲ့ ဒီဆုကို ချီးမြှင့်တာ ဖြစ်ပါတယ်။

ဒီနှစ် ဆုပေးပွဲ အခမ်းအနားကို လော့စ်အိန်ဂျလိစ်မြို့က Beverley Hills ဟိုတယ်မှာ ဧပြီလ ၂၆ ရက်နေ့ ညက ကျင်းပခဲ့တာဖြစ်ပြီး ဒီနှစ် ဆုချီးမြှင့်ခံရသူတွေထဲမှာတော့ ဒေါ်အောင်ဆန်းစုကြည် အပြင် အာဖဂန် နစ္စတန်နဲ့ ဟေတီနိုင်ငံက အမျိုးသမီး အခွင့်အရေး တက်ကြွလှုပ်ရှားသူ ၂ ဦးနဲ့ အမေရိကန်ပြည်ထောင်စု NPR ရေဒီယိုဌာနက သတင်း ထောက် တဦးတို့ ပါဝင်ကြပါတယ်။

Ref;VOA

Read More...

အိုဘားမားရဲ့အမျိုးသား လုံခြုံရေးအဖွဲ့ပြောင်းလဲဖွဲ့စည်း

28ဧပြီ2011
အမေရိကန်နိုင်ငံရဲ့လုံခြုံရေးဆိုင်ရာ တာဝန်တွေအတွက် သမ္မတ ဘရက်ခ် အိုဘားမား (Barack Obama) က အပြောင်းအလဲတွေကို ကြာသပတေးနေ့မှာ ကြေညာ လိုက်ပါတယ်။

အနားယူတော့မယ့် အမေရိကန် ကာကွယ်ရေးဝန်ကြီး ရောဘတ် ဂိတ်စ် (Robert Gates) နေရာမှာ အစားထိုး ခန့်အပ်ဖို့အတွက် အမေရိကန် ထောက်လှမ်းရေး CIA ရဲ့အကြီးအကဲ လီယွန် ပန်နက်တာ (Leon Panetta) ကို သမ္မတက အမည်စာရင်း တင်သွင်းလိုက်ပါတယ်။ မစ္စတာ ပန်နက်တာရဲ့မျိုးချစ်စိတ်ဓာတ်နဲ့ စီမံခန့်ခွဲမှုစွမ်းရည် ထက်မြက်မှုဟာ အမေရိကန် ကာကွယ်ရေးဝန်ကြီး တဦး ဖြစ်ဖို့အတွက် လိုအပ်ချက်တွေနဲ့ ကိုက်ညီနေတယ်လို့ သမ္မတ အိမ်ဖြူရဲ့ထုတ်ပြန် ကြေညာချက်မှာ ဖော်ပြထားပါတယ်။

ဒါ့အပြင် မစ္စတာ ပန်နက်တာဟာ အမေရိကန်နိုင်ငံရဲ့အစွန်းရောက် အကြမ်းဖက်မှု ဆန့်ကျင်ရေး လုပ်ဆောင်နေမှုမှာ ပြတ်ပြတ်သားသား ပါဝင် လုပ်ဆောင်ခဲ့တယ်လို့လည်း သမ္မတက ပြောပါတယ်။

မစ္စတာ ပန်နက်တာရဲ့CIA အကြီးအကဲ ရာထူးအတွက် လက်ရှိ အာဖဂန်နစ္စတန်နိုင်ငံမှာ စစ်ရေး တာဝန်ယူ ကြီးကြပ်နေတဲ့ အမေရိကန် တပ်မှူးကြီး ဗိုလ်ချုပ်ကြီး ဒေးဗစ် ပက်ထရီးယာ့စ် (David Petraeus) ကို သမ္မတ အိုဘားမားက အမည်စာရင်း တင်သွင်းလိုက်ပါတယ်။

ဗိုလ်ချုပ်ကြီး ပက်ထရီးယာ့စ်ဟာ ဗျူဟာမြောက် တွေးခေါ် ကြံဆသူတွေထဲမှာ ထိပ် တန်းပုဂ္ဂိုလ်တဦး ဖြစ်သလို အကောင်းဆုံး စစ်ဘက်အရာရှိ တဦးအဖြစ် ရာဇ၀င် တွင်မယ့်သူတဦး ဖြစ်ပြီး အရှေ့အလယ်ပိုင်း အရေးနဲ့ အာဖဂန်အရေးကို ထဲထဲဝင်ဝင် နားလည် ကျွမ်းဝင်သူတဦး ဖြစ်တယ်လို့လည်း သမ္မတက အမွှမ်းတင်ပါတယ်။

ဗိုလ်ချုပ်ကြီး ပက်ထရီးယာ့စ် နေရာအတွက် အမေရိကန် အလယ်ပိုင်း စစ်ဌာနချုပ်က မရိမ်းတပ်ဖွဲ့ဒု-ဗိုလ်ချုပ်ကြီး ဂျွန် အလန် (John Allen) ကို ရွေးချယ်လိုက်သလို ၀ါရင့် သံတမန် ရိုင်ယန် ခရော့ကာ (Ryan Crocker) ကိုတော့ အာဖဂန်နစ္စတန် နိုင်ငံဆိုင်ရာ အမေရိကန် သံအမတ်ကြီးအဖြစ် ရွေးချယ်လိုက်ပါတယ်။

အခုရွေးချယ်လိုက်တဲ့ ပုဂ္ဂိုလ် ၄ ဦးဟာ ခေါင်းဆောင်ကောင်းတွေ ဖြစ်ကြပြီး အရေးပေါ် စိန်ခေါ်မှု မှန်သမျှကို ဖြေရှင်းနိုင်မယ့်သူတွေလို့လည်း သမ္မတက ပြောပါတယ်။

Ref;http://www.voanews.com/burmese/news/obama-change-cabinet-120922749.html

Read More...

ဘာသာရေး လွတ်လပ်ခွင့် မရှိဆုံးနိုင်ငံထဲ မြန်မာနိုင်ငံ ပါဝင်

ဦးစံမိုးဝေ
28 ဧပြီ 2011

မြန်မာနိုင်ငံဟာ ဘာသာရေး လွတ်လပ်ခွင့် အပိတ်ပင်ဆုံးနဲ့ အစိုးရိမ်ရဆုံး နိုင်ငံတနိုင်ငံ ဖြစ်တယ်လို့ အမေရိကန် ပြည်ထောင်စု နိုင်ငံတကာ ဘာသာရေး လွတ်လပ်ခွင့်ဆိုင်ရာ ကော်မရှင်ရဲ့၂၀၁၁ ခုနှစ်အတွက် ထုတ်ပြန်လိုက်တဲ့ အစီရင်ခံစာမှာ ရေးသား ဖော်ပြ ထားပါတယ်။ ဒါနဲ့ပတ်သက်လို့ မြန်မာနိုင်ငံက ဘာသာရေး လွတ်လပ်ခွင့် အခြေအနေ တွေကို ဦးစံမိုးဝေက တင်ပြပေးထားပါတယ်။

ဘာသာရေး လွတ်လပ်ခွင့် ပိတ်ပင်မှု အဆိုးဆုံးနဲ့ အစိုးရိမ်ရဆုံး နိုင်ငံတွေအဖြစ် နိုင်ငံပေါင်း ၁၄ နိုင်ငံ သတ်မှတ်ထားတာဖြစ်ပြီး အဲဒီအထဲမှာ မြန်မာနိုင်ငံဟာ တနိုင်ငံ အပါအ၀င် ဖြစ်ပါတယ်။ မကြာခင်ကပဲ အရပ်သား အစိုးရနဲ့ အာဏာ အလွှဲအပြောင်း လုပ်ခဲ့တဲ့ နိုင်ငံတော် အေးချမ်းသာယာရေးနဲ့ ဖွံ့ဖြိုးရေးကောင်စီဆိုတဲ့ အဖွဲ့ဟာ ကမ္ဘာပေါ်မှာ အဆိုး ရွားဆုံး လူ့အခွင့်အရေး ဖောက်ဖျက်တဲ့ အစိုးရ ဆိုပြီးတော့ အမေရိကန် ပြည်ထောင်စု နိုင်ငံတကာ ဘာသာရေး လွတ်လပ်ခွင့်ဆိုင်ရာ ကော်မရှင် အဖွဲ့ရဲ့အစီရင် ခံစာမှာ ရေးသားထားပါတယ်။

ဘာသာရေး ခေါင်းဆောင်တွေကို ဖမ်းဆီးတာ၊ မတော်တလျော် ဆက်ဆံတာ၊ ဖိနှိပ်တာ မျိုးစုံကို စုံစမ်း တွေ့ရှိထားတယ်လို့လည်း ရေးသားထားပါတယ်။ သာသနာ့ဥသျှောင်အဖွဲ့၊ အပြည်ပြည်ဆိုင်ရာ မြန်မာ ရဟန်းတော်များ အဖွဲ့ချုပ်ရဲ့ပြည်တွင်းရေးရာ တာဝန်ခံ ဆရာတော် ဦးပညာနန္ဒကတော့ တရားဟောမယ် ဆိုရင် ခွင့်ပြုချက် ယူနေရတဲ့ တိုင်းပြည်လောက် ဆိုးရွားတာ ဘာရှိအုံးမလဲလို့ ဗွီအိုအေကို အခုလို မိန့်ကြားပါတယ်။

“အခု မြန်မာပြည်မှာ ဘာသာရေး လွတ်လပ်ခွင့်ဆိုတာ တကယ့် အဆိုးဆုံး အခြေအနေကို ရောက်နေတယ်။ ဥပမာ လက်ရှိ တရားပွဲတွေ ဘာတွေ လုပ်ချင်တယ်ဆိုရင် သက်ဆိုင်ရာရဲ့ ခွင့်ပြုချက် မရရင် ဘာမှ လုပ်လို့မရဘူး။ တရားပွဲ လုပ်ချင်တယ် ဆိုရင်တောင် ရိုးရိုးသားသား သူတို့ပြောတဲ့ အင်္ဂါတွေ ပြည့်စုံတယ်၊ စာရွက်စာတမ်းတွေ ပြည့်စုံတယ် ဆိုရင်တောင်မှ ဟောမယ့် တရားကို ကြိုတင်ပြီး အစိုးရဆီကို တင်ရတယ်။ ခွင့်ပြုချက်ရမှ တင်ရတာ။ အဲဒီတော့ ဒီလို ဘုရား တရားတွေ ဟောတာတောင်မှ လွတ်လွတ်လပ်လပ် ဟောခွင့်မရှိဘူး၊ မှန်တာတွေကို ပြောခွင့်မရှိဘူး ဆိုတော့ ဒီဟာတွေက မြန်မာပြည်မှာ တော်တော်ဆိုးတဲ့ အခြေအနေကို ရောက်နေတာပေါ့။

“လွတ်လပ်မှုတွေ ပျောက်ဆုံးပြီးတော့ နည်းမျိုးစုံနဲ့ ဘုန်းကြီးတွေကို နှိပ်ကွပ်နေတာ၊ ဘာသာရေးသမားတွေကို နှိပ်ကွပ်နေတာ။ ဒါ ဗုဒ္ဓဘာသာတင်လားဆိုတော့ မဟုတ်ဘူးနော်၊ မြန်မာပြည်မှာရှိတဲ့ ခရစ်ယာန်ရော၊ အစ္စလာမ်ရော ထိုနည်းလည်းကောင်းပဲ၊ အကုန်လုံး၊ ဘာသာရေးတွေ အကုန်လုံးကို ဖိနှိပ်နေတာ။”

ဗုဒ္ဓဘာသာတွေတင် မဟုတ်ပါဘူး၊ အစ္စလာမ် ဘာသာဝင်တွေမှာလည်း နေရာတိုင်းမှာ ခွဲခြားဆက်ဆံ ခံနေရတာဟာ ဆယ်စုနှစ်နဲ့ ချီနေပါပြီလို့ ပြောလာသူကတော့ မြန်မာ မွတ်ဆလင် အစည်းအရုံးရဲ့ အထွေထွေ အတွင်းရေးမှူး ဦးအောင်တင်ပါ။

“မြန်မာပြည်မှာကတော့ ဘာသာပေါင်းစုံ ဖိနှိပ်ခံနေရတာပဲဗျ။ ဒါပေမဲ့ အဲဒီအထဲမှာ အဖိနှိပ်ခံရဆုံးကတော့ အစ္စလာမ်ဘာသာပဲဗျ။ ကမ္ဘာကို သူတို့ပြောတဲ့ အခါကျတော့ ဆူးလေဘုရားကြီး ဘေးနားမှာ ဗလီကျောင်းကြီး ရှိပါတယ် ဆိုတာမျိုးတော့ သူတို့ လက်ညှိုးထိုးပြတာပေါ့ဗျာ။ တကယ်တမ်းကျတော့ အစ္စလာမ် ဘာသာဝင်တွေဟာ အစ္စလာမ် ဘာသာကို ကိုးကွယ်လို့ ဆိုပြီးတော့ နိုင်ငံသားအဖြစ် အသိအမှတ် မပြုတာတို့၊ အလုပ်ခွင်တွေ၊ လူမှုအဖွဲ့အစည်းတွေ၊ တရားရုံးတွေမှာ ခွဲခြား နှိမ့်ချခံရတာတွေကတော့ နိစ္စဓူဝ ဆယ်စုနှစ်ပေါင်းများစွာ စစ်အာဏာရှင် အဆက်ဆက်မှာ ခံစားနေရတာပဲဗျ။”

ဘာသာရေး လွတ်လပ်ခွင့် အဖိနှိပ်ဆုံးလို့ သတ်မှတ်ခံရတဲ့ တခြားနိုင်ငံတွေကတော့ တရုတ်၊ အီရစ်တီးယား၊ အီရန်၊ အီရတ်၊ နိုင်ဂျီးရီးယား၊ မြောက်ကိုရီးယား၊ ပါကစ္စတန်၊ ဆော်ဒီအာရေးဗီးယား၊ ဆူဒန်၊ တာ့ခ်မင်နစ္စတန်၊ ဥဇဘက်ကစ္စတန်နဲ့ ဗီယက်နမ်နိုင်ငံတို့ ဖြစ်ပါတယ်။

မြန်မာအစိုးရရဲ့ရိုဟင်ဂျာတွေနဲ့ လူနည်းစုတွေ အပေါ်မှာ ဖိနှိပ်ခွဲခြား ဆက်ဆံမှုတွေကိုလည်း ထုတ်ပြန် ကြေညာချက်မှာ ရေးသားထားပါတယ်။

နယ်စပ်ဒေသ တိုင်းရင်းသားတွေ နေထိုင်ရာ ဒေသတွေမှာ ဖြစ်ပျက်နေတဲ့ ဘာသာရေး ဖိနှိပ်မှုတွေကိုတော့ ချင်းအမျိုးသား ခရစ်ယာန် သင်းအုပ်ဆရာတဦး ဖြစ်တဲ့ ဂျွန်ဘူ ဟီးနားက အခုလို ရှင်းပြပါတယ်။

“ကျနော်တို့ တိုင်းရင်းသားလူမျိုး နယ်မြေဒေသမှာဆိုရင် ဗမာစစ်အစိုးရက အမျိုးမျိုး ဖိနှိပ်ချုပ်ချယ်ခြင်း၊ ညှဉ်းပန်းနှိပ်စက်ခြင်း ခံနေရတယ်။ အထူးသဖြင့် သင်းအုပ်ဆရာများ၊ ဘာသာရေး ဆရာများကို ဖမ်းဆီးပြီး ထောင်ချခြင်း၊ ဘုရားကျောင်းကို မီးရှို့ခြင်း၊ ခရစ်ယာန် ဘုရားကျောင်းတွေကို သော့ခတ်ခြင်း၊ လက်ဝါးကပ်တိုင်ကို ဖြိုချခြင်း၊ လွတ်လွတ်လပ်လပ် ဘာသာရေး ကိုးကွယ်ခြင်းကို မရဘူး၊ တိုင်းရင်းသား နယ်မြေဒေသတွေမှာ။”

သင်းအုပ်ဆရာ ဂျွန်ဘူဟီးနားက ချင်းပြည်နယ် မတူပီမှာ နေထိုင်ခဲ့သူ ဖြစ်ပါတယ်။ အခုတော့ အမေရိကန် ပြည်ထောင်စု မြောက်ကယ်ရိုလိုင်းနား ပြည်နယ်ကို ရွှေ့ပြောင်း ရောက်ရှိနေသူပါ။

မြန်မာနိုင်ငံဟာ ၁၉၉၉ ခုနှစ်ကတည်းက အမေရိကန် နိုင်ငံခြားရေး ၀န်ကြီးဌာနရဲ့ ဘာသာရေး ချိုးဖောက်မှုအတွက် အစိုးရိမ်ရဆုံး နိုင်ငံစာရင်းမှာ ထည့်သွင်းထားခြင်း ခံထားရတာ ဖြစ်ပါတယ်။

အစီရင်ခံစာမှာ အာဖဂန်နစ္စတန်၊ ဗင်နီဇွဲလား၊ အိန္ဒိယ၊ အင်ဒိုနီးရှားနဲ့ လာအိုနိုင်ငံ တွေကိုလည်း ဘာသာရေး လွတ်လပ်မှု ပိတ်ပင်မှုအတွက် စောင့်ကြည့်ရမယ့် နိုင်ငံတွေ စာရင်းမှာ ထည့်သွင်းထားပါတယ်။

အခု အစီရင်ခံစာကို ထုတ်ပြန်တဲ့ အမေရိကန် ပြည်ထောင်စု နိုင်ငံတကာ ဘာသာရေး လွတ်လပ်ခွင့်ဆိုင်ရာ ကော်မရှင်ဟာ အစိုးရရဲ့အဓိက ပါတီကြီး ၂ ရပ်က ပါတီဝင်တွေနဲ့ ဖွဲ့စည်းထားတာဖြစ်ပြီး သီးခြား လွတ်လပ်တဲ့ အဖွဲ့အစည်း ဖြစ်ပါတယ်။

Ref;VOA

Read More...

လူထု အခြေပြု သဘာဝဘေးဒဏ် စီမံခန့်ခွဲမှု တာလေမြို့နယ်မှာ ပြုလုပ်

2011-04-28

ပြီးခဲ့တဲ့ မတ်လက မြေငလျင်ဒဏ် ကြုံတွေခဲ့ရတဲ့ ရှမ်းပြည်နယ် အရှေ့ပိုင်း တာလေဒေသ လူထု အခြေပြု သဘာဝ ဘေးဒဏ် စီမံခန့်ခွဲမှု ဆွေးနွေးပွဲတရပ်ကို မြို့နယ်အာဏာပိုင်တွေနဲ့ မြေငလျင် ဒုက္ခသည်များ ကယ်ဆယ်ရေး ကော်မတီတို့ ပူးပေါင်းပြီး ဧပြီလ ၂၅ ရက်နေ့က တာလေမြို့နယ်ခွဲ အထက်တန်းကျောင်း ကယ်ဆယ်ရေးစခန်းမှာ ကျင်းပခဲ့ပါတယ်။

ဆွေးနွေးပွဲကို သူနာပြုဆရာမတွေ၊ကျောင်းဆရာ ဆရာမတွေနဲ့ ငလျင်ဒဏ် ကယ်ဆယ် ရေး ကော်မတီနဲ့ အစိုးရ မဟုတ်တဲ့ NGO အဖွဲ့ဝင်တွေ ၂၀ ကျော် တက်ရောက် ခဲ့ ကြပါတယ်။

တက်ရောက်သူအားလုံးဟာ ဒေသခံ ဘာသာစကားကို ကောင်းကောင်း ပြောနိုင်သူတွေ ဖြစ်တဲ့အတွက် လာမဲ့ အနာဂတ်မှာ ကျေးရွာတွေကို ပုံမှန် လှည့်လည် သွားရောက်ပြီး ပညာပေး ဟောပြောပွဲတွေ လုပ်သွားမယ်လို့လည်း သိရပါတယ်။

အဲဒီဆွေးနွေးပွဲမှာ မြေငလျင်လှုပ်မှု၊ မြေပြိုမှု စတဲ့ သဘာဝ ဘေးဒဏ်တွေအတွက် ပြင်ဆင်မှုလုပ်ငန်းတွေ၊ ဘေးဒဏ် ကျရောက်လာချိန်မှာ ဒေသခံတွေအနေနဲ့ ပါဝင်နိုင်မှုနဲ့ ရသင့်တဲ့ အခွင့်အရေးတွေ၊ ကယ်ဆယ်ရေး လုပ်ငန်းတွေ ချမှတ် လုပ်ဆောင်တဲ့အခါ လိုက်နာဆောင်ရွက်ရမဲ့ အချက်တွေကို ဆွေးနွေးခဲ့ကြပါတယ်။

Ref;RFA

Read More...

အမေရိကန်နိုင်ငံခြားရေးဌာန ဘာသာရေးလွတ်လပ်ခွင့် အစီရင်ခံစာ ထုတ်ပြန်

2011-04-28

မြန်မာနိုင်ငံဟာ ဘာသာရေး လွတ်လပ်ခွင့် ဆိုးဆိုးရွားရွား ချိုးဖောက်နေဆဲ နိုင်ငံ ဖြစ် တယ်လို့ အမေရိကန် အစိုးရက ထုတ်ဖော် ပြောဆိုလိုက်ပါတယ်။

အမေရိကန် နိုင်ငံခြားရေးဌာန နိုင်ငံတကာ ဘာသာရေး လွတ်လပ်ခွင့်ဆိုင်ရာ ကော်မရှင်က ဒီကနေ့ ဧပြီလ ၂၈ ရက် နေ့စွဲနဲ့ အစီရင်ခံစာ ထုတ်ပြန်ရာမှာ အခုလို ရေးသား ဖော်ပြ လိုက် တာပါ။

မြန်မာနိုင်ငံဟာ ဘာသာရေး လွတ်လပ်ခွင့် အချိုးဖောက်ဆုံး နိုင်ငံတွေထဲမှာ ထိပ်ဆုံးက ရှိနေတဲ့အတွက် အမေရိကန်အစိုးရက စောင့်ကြည့် ကြီးကြပ်ရမဲ့ (CPC) ခေါ် အထူး စိုးရိမ်ဖွယ် နိုင်ငံများ စာရင်း ထဲမှာ ဆက်လက် ထားရှိပါတယ်။

ပြီးခဲ့တဲ့ တနှစ်တာအတွင်း မြန်မာနိုင်ငံမှာ အပြောင်းအလဲတချို့ ရှိခဲ့ပေမဲ့ ဘာသာရေးအရ ဆိုးဆိုးရွားရွား ဖိနှိပ်တာတွေ ဆက်ရှိနေဆဲဖြစ်တဲ့ အတွက် မြန်မာဟာ အထူးစိုးရိမ်ရတဲ့ နိုင်ငံအဖြစ် ဆက်ရှိနေတာ ဖြစ်တယ်လို့ ဒီကော်မရှင်က မူဝါဒရေးရာ ဒုတိယ ညွန်ကြား ရေးမှူး Scott Flipse က RFA ကို ပြောပါတယ်။

မြန်မာနိုင်ငံမှာ ဘာသာရေး လွတ်လပ်ခွင့် ချိုးဖောက်မှုတွေ ဆက်ရှိနေတဲ့အတွက် မြန်မာ နိုင်ငံ ကို အထုးစိုးရိမ်ရတဲ့ နိုင်ငံများစာရင်းမှာ ကျနော်တို့ ဆက်ပြီးထားတာပါ။ ပြီးခဲ့တဲ့ နှစ်ထဲမှာ ဒေါ်အောင်ဆန်းစုကြည်ကို လွှတ်ပေးခဲ့ပေမဲ့ မြန်မာအစိုးရဟာ ဗုဒ္ဓဘာသာ ရဟန်းတော်တွေ၊ နိုင်ငံရေး အကျဉ်းသားတွေ၊ နောက် ဟိန္ဒူ၊ မူဆလင်နဲ့ ခရစ်ယာန် ဘာသာဝင်တွေအပေါ်မှာ ဆိုးရွားတဲ့ ချိုးဖောက်မှုတွေ ရှိခဲ့ပါတယ်လို့ Mr. Felipse က ပြောသွားပါတယ်။

မြန်မာနိုင်ငံက ဘာသာရေး လွတ်လပ်ခွင့်နဲ့ ဒီမိုကရေစီ အသွင်ကူးပြောင်းရေးဟာ ဆက်စပ် နေတဲ့အတွက် ဒီအခြေအနေတွေ တိုးတက်လာအောင် မြန်မာအစိုးရဖက်က မဆောင် ရွက်မချင်း မြန်မာနိုင်ငံအပေါ် အမေရိကန်အစိုးရက ပိတ်ဆို့ အရေးယူထားတာကို မဖယ်ရှားသင့်ဘူးလို့လည်း အစီရင်ခံစာက အကြံပြုထားပါတယ်။ ပိတ်ဆို့ အရေးယူ မှုတွေကို ဥရောပနဲ့ အာဆီယံနိုင်ငံတွေနဲ့ ညှိနှိုင်းပြီး ထိရောက်အောင် ဆောင်ရွက်သင့် တယ်လို့လည်း ဖော်ပြထားပါတယ်။

ဒီနှစ်အစီရင်ခံစာအရ အထူးစိုးရိမ်ရတဲ့နိုင်ငံ ၉ နိုင်ငံကို ဖော်ပြထားရာမှာ အာရှက မြန်မာ၊ တရုတ်၊ မြောက်ကိုရီးယားနဲ့ ဗီယက်နမ်တို့ ပါဝင်ပါတယ်။

Ref;RFA

Read More...

အပေါ်သို့