အမတ် ဂျင်မ်ဝက်ဘ်နဲ့ ဒီမိုကရေစီ အင်အားစု မြန်မာ့အရေး အမြင်ချင်း ဖလှယ်

20 October 2009

မကြာသေးခင်က မြန်မာနိုင်ငံကို သွားရောက်ခဲ့ပြီး မြန်မာ့ ဒီမိုကရေစီ ခေါင်းဆောင် ဒေါ်အောင်ဆန်းစုကြည်၊ ဗိုလ်ချုပ်မှူးကြီး သန်းရွှေတို့နဲ့ တွေ့ခဲ့တဲ့ အမေရိကန် အထက် လွှတ်တော်အမတ်၊ အာရှနဲ့ ပစိဖိတ်ရေးရာ ဆပ်ကော်မတီ ဥက္ကဋ္ဌ၊ ဒီမိုကရက်အမတ် ဂျင်မ်ဝက်ဘ် (Jim Webb) ကို မြန်မာ့ ဒီမိုကရေစီရေး လှုပ်ရှားတဲ့ အတိုက်အခံ ခေါင်းဆောင်တွေ မနေ့က ၀ါရှင်တန်ဒီစီမှာ တွေ့ဆုံခဲ့ပါတယ်။

အခုလို မစ္စတာဂျင်မ်ဝက်ဘ်နဲ့ တွေ့ဆုံခဲ့ကြတဲ့ ပြည်ထောင်စု မြန်မာနိုင်ငံ အမျိုးသားကောင်စီ (NCUB) အထွေထွေ အတွင်းရေးမှူး ဦးမောင်မောင်နဲ့ အမျိုးသား ညွန့်ပေါင်းအစိုးရ (NCGUB) ၀န်ကြီး တဦးဖြစ်သူ ဦးဘိုလှတင့် တို့ကို ဗွီအိုအေ ၀ိုင်းတော်သား ကိုရော်နီညိမ်းက ဆက်သွယ် မေးမြန်းခဲ့ပါတယ်။ မြန်မာနိုင်ငံမှာ အပြောင်း အလဲတွေ ဖြစ်ပေါ်ရေး အတွက် အရေးပါဆုံး ကိစ္စဟာ ဘယ်ကိစ္စလို့ မစ္စတာ ဂျင်မ်ဝက်ဘ်က ယုံကြည် ထားပါသလဲလို့ မေးမြန်းတော့ ဦးမောင်မောင်က အခုလို စပြီး ပြောပါတယ်။

“ကျနော်တို့ လိုချင်တဲ့ ဗမာပြည် ပြောင်းလဲရေး ဆိုတာကို သူလည်း လိုလားတယ်၊ သူတို့နိုင်ငံ အစိုးရကလည်း လိုလားတယ်။ နောက်တခါ ပြုပြင်ပြောင်းလဲရေး လုပ်ဖို့ဆိုတာ သူတို့အနေနဲ့ ဒါက အားလုံး ၀ိုင်းလုပ်ရမယ့် ကိစ္စဆိုတာ သူလက်ခံတယ် ဆိုတာ ပြောတယ်။ စီးပွားရေး ပိတ်ဆို့မှုနဲ့ ပတ်သက်လို့ သူ့အနေနဲ့ ဒါကို ပြောင်းလဲဖို့ သူ မပြောပါဘူး ဆိုတဲ့ အကြောင်း ရှင်းလင်းပြောပြတယ်။”

ဒါဆိုရင်က သူက ၂၀၁၀ ရွေးကောက်ပွဲကို ဆက်လက် စွဲကိုင်ထားတဲ့ ပေါ်လစီကနေ ပြောင်းလဲချင်တဲ့ သဘောမျိုး ပြသတာလားခင်ဗျ။

“ကျနော်တို့ ဒီနေ့ ပြောတာကတော့ အခြေခံဥပဒေနဲ့ ပတ်သက်လို့ လက်မခံတဲ့ အချက်တွေ ရှိတယ်။ ဥပမာ တိုင်းရင်းသား ဒေသတွေပေါ့၊ ကိုယ်ပိုင်အုပ်ချုပ်မှု Self Administration Zone ဆိုတာကို နအဖအနေနဲ့ အမျိုးသား ညီလာခံမှာတုန်းက သဘော တူထားတယ်။ အခု နိုင်ငံရေးအရ ပြောဆိုလို့ အဆင်မပြေတဲ့ အချိန်မှာ ၀င်တိုက်တဲ့ ကိစ္စမျိုးက လုံးဝ အာမခံချက် မရှိဘူး၊ ဗမာပြည် အရေးကို စဉ်းစားရင် ဒါတွေဟာ စဉ်းစားဖို့ လိုတယ်ဆိုတဲ့ အကြောင်း ဆိုတာရယ်၊ နောက်တခါ ၂၀၁၀ ရွေးကောက်ပွဲ ရလဒ်ကို အတည်ပြုမယ် ဆိုရင် နျူကလီးယား ဖော်ထုတ်မယ့် နိုင်ငံတခုရဲ့ အစိုးရကို သွားပြီး အတည်ပြုတာ ဖြစ်မှာမို့ ဒါက သတိ ချပ်သင့်တယ်လို့ တင်ပြတော့ ဘာမှ တုံ့ပြန်မှု မရှိပါဘူး။”

ပိတ်ဆို့အရေးယူ ဒဏ်ခတ်မှုတွေ ရုပ်သိမ်းမှ ဖြစ်မယ် ဆိုတာ သူကပဲ စပြီး အမေရိကန် နိုင်ငံရေး အသိုင်းအ၀ိုင်းမှာ ဆော်သြသူ အဖြစ် အများက သိရှိ နေကြတာပါ။ အခု ပိတ်ဆို့ အရေးယူ ဒဏ်ခတ်မှုတွေဟာ မထိရောက်ဘူး ဆိုတဲ့ သဘောမျိုး သူ ဆက်ပြီး မြင်နေတုန်းပဲလား ခင်ဗျ။

“ကျနော်တို့လည်း ကျနော်တို့မှာရှိတဲ့ အချက်အလက်တွေ တင်ပြသလို သူကလည်း သူသိတဲ့ အချက် အလက်တွေ ပြန်တင်ပြပါတယ်။ ပိတ်ဆို့မှုကြောင့်တော့ အဖြေ မရနိုင်ဘူး၊ သို့သော် ပိတ်ဆို့မှုက လိုအပ်တယ်ဆိုတဲ့ အနေအထား ကိုတော့ သူ လက်ခံပါတယ်။ ဗီယက်နမ်မှာ တုန်းကလည်း ပိတ်ဆို့မှုကို ဖွင့်လိုက်တဲ့ အချိန်မှာ တိုးတက် ပြောင်းလဲမှု နှုန်းနဲ့ ပိတ်ဆို့ထားတဲ့ အချိန်မှာ ရှိတဲ့ တိုးတက် ပြောင်းလဲမှုနှုန်း ကွာတယ်။ ဒါကို သူက သူ့အတွေ့အကြုံ အရ ရှင်းပြသွားတာ ကျနော်တို့လည်း လက်ခံပါတယ်။ ကျနော်တို့ပြောတဲ့ ပိတ်ဆို့မှုကို လက်ရှိ ထားရှိရမယ် ဆိုတာကိုတော့ သူ့အနေနဲ့ ပြန်ပြီး ငြင်းပယ်တဲ့ကိစ္စ မရှိဘူးလို့တော့ ကျနော် ပြောနိုင်ပါတယ်။”

ဒီနေ့ဆွေးနွေးမှုမှာ အဓိကကျတဲ့ အချက်က ဘာလဲခင်ဗျ။ သူရော ဦးမောင်မောင် တို့ရော ဆုံချက် တရပ်ကို ရောက်ရှိပြီးတော့ အခရာကျတဲ့ အချက်က ဘာလို့ ပြောလို့ ရပါသလဲ။

“ကျနော်တို့ဘက်က တင်ပြတာကတော့ ရွှေဂုံတိုင် ကြေညာချက်ရယ်၊ တိုင်းရင်းသား အစုအဖွဲ့ ၁၃ ဖွဲ့က နအဖ အမျိုးသား ညီလာခံမှာ တင်ပြထားတဲ့ အချက်တွေပေါ်မှာ ရေးဆွဲထားတဲ့ အချက် ရှိပါတယ်။ ဒီအပေါ်မှာ အခြေခံပြီး ရေးထားတဲ့ အမျိုးသား ပြန်လည် သင့်မြတ်ရေး ဆိုတာ ကျနော်တို့မှာ ရှိတယ်။ ဒါကို သူ လက်ခံတယ်၊ လေ့လာပါမယ်လို့ ကျနော်တို့ကို ပြောတယ်။ ဒီ့အပြင် ထပ်ပြီး ပြောတာက သူလည်း ဗမာပြည် တိုးတက်ဖို့၊ ပြုပြင်ပြောင်းလဲဖို့ အတွက် အခြေအနေရှိတယ် ဆိုရာမှာတော့ နှစ်ဦးနှစ်ဘက် သဘောတူပါတယ် ဆိုတဲ့ အနေအထား ထိပဲ သူပြောသွားပါတယ်။”

ဦးမောင်မောင်အနေနဲ့ရော ဒီနေ့ ဆွေးနွေးပွဲကို ဘယ်လို သုံးသပ် မိပါသလဲ။ အားရမှု ရှိပါသလား။ နောက်ထပ်ရော ဆက်လက် ဆွေးနွေးဖို့ ရှိပါသလား။

“ကျနော်တို့ကတော့ ပထမဦးဆုံးအကြိမ် တွေ့တာ ဖြစ်ပါတယ်။ ဒါပေမဲ့ နောက်တခါ ကျနော် သူ့ကို ရှင်းပြလိုက် ပါသေးတယ်။ ကျနော်တို့ အနေနဲ့၊ နိုင်ငံရေး အစုအဖွဲ့တွေကို တာဝန်ခံတဲ့ ပုဂ္ဂိုလ်တွေ အနေနဲ့ သူ့ကို အခုထက်ထိ ပုတ်ခတ် ပြောဆိုခြင်း မရှိဘူး ဆိုတဲ့ အကြောင်း၊ ကျနော်တို့ အနေနဲ့ နိုင်ငံရေးအရ ပြောစရာရှိတဲ့ ကိစ္စတွေ ပြောမယ်၊ နောင်ကိုလည်း ဆက်လက် ဆွေးနွေးဖို့ ကိစ္စကို လုပ်ဖို့ အာသီသ ရှိပါတယ် ဆိုတဲ့ဟာကို ကျနော် ပြောပြထားတယ်။ သူလည်း ကျနော်တို့နဲ့ ဆက်လက် ဆွေးနွေးဖို့ စိတ်အနေအထား ရှိတယ် လို့တော့ သုံးသပ် မိပါတယ်။”

ပြည်ထောင်စု မြန်မာနိုင်ငံ အမျိုးသား ညွန့်ပေါင်းအစိုးရရဲ့ ၀န်ကြီး ဖြစ်တဲ့ ဦးဘိုလှတင့်ဟာ ဒီကနေ့ အထက် လွှတ်တော် အမတ် ဂျင်မ်ဝက်ဘ်နဲ့ တွေ့ဆုံ ခဲ့ရာမှာ ဂျင်မ်ဝက်ဘ်က မြန်မာ့အရေး ပြောင်းလဲရေးမှာ ဘာက အဓိက ကျတယ်လို့ ဦးဘိုလှတင့် တို့ကို ဆွေးနွေး ပြောကြား သွားပါသလဲ။

“သူကတော့ စီးပွားရေးအရ ပိတ်ဆို့အရေးယူမှုနဲ့ ပတ်သက်လို့ သဘောထား ကွဲကောင်း ကွဲနိုင်တယ်၊ ဒါပေမဲ့ တကယ့် ဗမာနိုင်ငံမှာ ဖြစ်သင့်တဲ့ ဒီမိုကရေစီနဲ့ လူ့အခွင့်အရေး ဖွံ့ဖြိုးမှုတွေ၊ တကယ် ပွင့်လင်းတဲ့၊ လွတ်လပ်တဲ့ လူ့ အဖွဲ့အစည်း ဖြစ်လာရေး ကိစ္စတွေမှာတော့ မကွဲပြားတဲ့ အကြောင်းပဲ သူပြောပါတယ်။”

အမျိုးသားဒီမိုကရေစီ အဖွဲ့ချုပ်ကရော၊ မြန်မာ့ ဒီမိုကရေစီ ခေါင်းဆောင် ဒေါ်အောင်ဆန်း စုကြည် ကရော ပြောတဲ့ သမ္မတ အိုဘားမား အစိုးရက မြန်မာ စစ်အစိုးရနဲ့ ထိတွေ့ ဆက်ဆံရေး လုပ်တဲ့ တပြိုင်တည်းမှာပဲ အတိုက်အခံ အဖွဲ့အစည်း တွေနဲ့လည်း ထိတွေ့ ဆက်ဆံပါ ဆိုတာနဲ့ ပတ်သက်ပြီးတော့ ဂျင်မ်ဝက်ဘ်ရဲ့ သဘောထားက ဘယ်လို ရှိပါသလဲ ခင်ဗျ။

“သူကတော့ လက်ရှိ အမေရိကန် အစိုးရရဲ့ ပေါ်လစီနဲ့ ပတ်သက်ပြီးတော့ သူ့အနေနဲ့ သဘော တူတယ်လို့ ပြောပါတယ်။ ဘာကြောင့်လဲ ဆိုတော့ တဖက်မှာ စီးပွားရေး အရ ပိတ်ဆို့မှုတွေကို ဆက်ပြီး ထိန်းထားမယ်၊ တဖက်မှာလည်း အဆင့်မြင့် တိုက်ရိုက် ညှိနှိုင်း ဆောင်ရွက်မှုတွေ လုပ်သွားမယ်ဆိုတဲ့ ကိစ္စကို သူ သဘောတူတယ် ဆိုတာ ပြောပါတယ်။”

အမေရိကန် အထက်လွှတ်တော် အာရှနဲ့ ပစိတ်ဖိတ်ရေးရာ ဆပ်ကော်မတီ ဥက္ကဋ္ဌ၊ ဒီမိုကရက်အမတ် မစ္စတာ ဂျင်မ်ဝက်ဘ်ကို မနေ့က သွားတွေ့ခဲ့တဲ့ ပြည်ထောင်စု မြန်မာနိုင်ငံ အမျိုးသားကောင်စီ အထွေထွေ အတွင်းရေးမှူး ဦးမောင်မောင်နဲ့ အမျိုးသား ညွန့်ပေါင်းအစိုးရ ၀န်ကြီး ဦးဘိုလှတင့်တို့ကို ကိုရော်နီညိမ်းက ဆက်သွယ်မေးမြန်းခဲ့တာ ဖြစ်ပါတယ်။

Ref: VOA News