ရဲဘော်ဖိုးသံချောင်း
၃၀ ဇွန် ၂၀၁၀
နအဖ အစိုးရဟာ ရွေးကောက်ပွဲလုပ်မယ့် ရက်ကိုတော့ မကြေညာ၊ ကန့်သတ် ချုပ်ချယ်မှုတွေပဲ တခုပြီးတခု ကြေညာ နေပါတယ်။ တနေ့ တုန်းကပဲ နအဖ “ပြည်ထောင်စု ရွေးကောက်ပွဲ ကော်မရှင်ရဲ့ ညွှန်ကြားချက် အမှတ် (၂)” ဆိုတာကို ကြေညာ လိုက်တော့ ရွေးကောက်ပွဲ ၀င်မယ်လို့ အားခဲ ထားသူတွေဆီက စိတ်ပျက်သံတွေ စီကနဲ ထပ်ပေါ်ထွက် လာပါတယ်။ နအဖရဲ့ ၀ှက်ဖဲတွေက ကုန်-မကုန်နိုင်ဘူးလို့ ပြောရ မလိုပါပဲ။ စည်းကမ်းရှိတဲ့ ဒီမိုကရေစီက ပေးတဲ့ စပေ့စ်လေးကို လည်ပင်း ကိုးတောင်ကျော် မျှော်ကိုးနေသူတွေမှာ လည်ပင်းကို တပတ်ပြီးတပတ် မြွေပတ် ခံရသလို ဖြစ်နေပါတယ်။
ဒီလိုအခါမှာ နအဖရဲ့ပိုက်ဆံမပေးရတဲ့ ရှေ့နေတွေဟာ ဒီအချင်းအရာတွေကို မသိကျိုးကျွန် ပြုပြီး တခြား အကြောင်း အရာ တွေကိုပဲ ပုံကြီးချဲ့ ပြောဆို နေကြပါတယ်။ အခုတလော သူတို့ပြောတဲ့ အထဲမှာရော၊ တချို့အလားတူ “ပညာရှင်" များထဲကရော အတော် အပြောများလာတဲ့ အသုံးအနှုန်းသစ် တခုကို သတိထားမိပါတယ်။ အဲဒါကတော့ “မျိုးဆက်သစ်" ဆိုတာ ဖြစ်ပါတယ်။ မြန်မာ “နိုင်ငံရဲ့ ကံကြမ္မာဟာ မျိုးဆက်သစ်တွေ အပေါ် တည်နေတယ်” လို့ ပြောတဲ့ လေသံမျိုးတွေရဲ့ နောက်ကွယ်မှာ စဉ်းစားစရာတွေ အများကြီး ရှိနေပါတယ်။
နိုင်ငံတနိုင်ငံမှာ နိုင်ငံရေးအကျပ်အတည်းကြီး ဖြစ်ပြီဆိုရင် မျိုးဆက်သစ် ဆိုတဲ့ အသုံးအနှုန်းကို အတော်လေး ကြားလာရ တတ်ပါတယ်။ တော်တော် အသုံးတည့်တဲ့ ဝေါဟာရ တခုပါပဲ။ ဒါပေမယ့်ေ၀၀ါးလှတယ်၊ ရှင်းဖို့လိုတယ်လို့ ထင်ပါတယ်။ မျိုးဆက်သစ် ဆိုတာ ဘယ်လိုလူတွေကို ရည်ညွှန်းတာလဲ။ နောက်ပြီး ဘယ်မျိုးဆက်ရဲ့မျိုးဆက်သစ်လဲ။ နအဖက မပြတ် မွေးမြူနေတဲ့ စစ်အာဏာရှင် စနစ်ရဲ့ မျိုးဆက်သစ်တွေကို ပြောတာလား။ ခေတ်အဆက်ဆက်မှာ ဖိနှိပ်မှု အမျိုးမျိုးနဲ့ စစ်အာဏာရှင် စနစ်တွေကို ဆန့်ကျင် တိုက်ပွဲ ၀င်ခဲ့သူတွေနဲ့ လုံးဝ မပတ်သက်တဲ့ အုတ်ကြားမြက်ပေါက် မျိုးဆက်သစ်လား။ အမျိုးသား ဒီမိုကရေစီ အဖွဲ့ချုပ်နဲ့ မပတ်သက်ဖူးတဲ့ လူကို မျိုးဆက်သစ်လို့ ဆိုချင်တာလား။ အဲဒီလူတွေဆိုလိုတဲ့ မျိုးဆက်သစ် ဆိုတာက မြန်မာပြည်ရဲ့ နယ်ချဲ့ ဆန့်ကျင်ရေး၊ ဖက်ဆစ် ဆန့်ကျင်ရေး၊ အာဏာရှင် ဆန့်ကျင်ရေး အစဉ်အလာတွေ ကနေ ခွဲထွက်တဲ့၊ အဲဒီ မျိုးဆက်တွေနဲ့ ကင်းလွတ်တဲ့ နအဖ အုပ်စိုးမှုနဲ့ ရင်အုပ်မကွာ ကြီးပြင်းတဲ့ မျိုးဆက်ကို ပြောနေတာလို့ တွေးစရာ ဖြစ်နေပါတယ်။
ဒါဖြင့် သူတို့ရည်ညွှန်းတဲ့ မျိုးဆက်သစ်နဲ့မတူတဲ့ တခြားမျိုးဆက် ဆိုတာကကော ရှိပါသလား။ ဒီနေ့လို အခြေအနေမှာ ရှိနိုင် ပါသလားလို့ မေးကောင်း မေးလာပါမယ်။ ရှိပါတယ်။ တောက်လျှောက် ပေါ်နေမှာပါလို့ပဲ ဖြေရပါမယ်။ ဆရာဗန်းမော် တင်အောင် ပြောတဲ့ ခေတ်က ပေးအပ်တဲ့ တာဝန်ကို ထမ်းဆောင်မယ့် မျိုးဆက်သစ် ဆိုတာ ခေတ်ရဲ့လိုအပ်ချက်၊ တောင်းဆိုချက် အရ မုချ ပေါ်ကို ပေါ်နေမှာ ဖြစ်ပါတယ်။ နည်းတာ၊ နှေးတာတော့ ရှိကောင်း ရှိပါမယ်။
မြန်မာပြည် ပြည်သူတွေရဲ့အရေးတော်ပုံဟာ ခက်ခဲကြမ်းတမ်းတဲ့ ခရီးစဉ်ကြီးကို ရာစုနှစ်နဲ့ချီပြီး မျိုးဆက် တဆက်ကို နောက်တဆက်က ဆက်ခံပြီး တိုက်ပွဲ ၀င်ခဲ့ကြတာ ဖြစ်ပါတယ်။ အင်္ဂလိပ်နယ်ချဲ့သမားကို မျိုးဆက် တဆက်ပြီး တဆက် ဆယ်စုနှစ်နဲ့ ချီပြီး တွန်းလှန် ခဲ့ရသလို စစ်အာဏာရှင်တွေ ကိုလည်း ဆယ်စုနှစ်နဲ့ချီ တိုက်ပွဲ ၀င်နေကြပါတယ်။ ရှေ့မှာလည်း အဲဒီလိုပဲ ဆက်ပြီး တိုက်ချင် တိုက်ရဦးမှာ ဖြစ်ပါတယ်။ ဒီလို တိုက်ပွဲ ၀င်ကြရာမှာ ရှေ့က တိုက်ပွဲ ၀င်သွားသူတွေ၊ စွန့်လွှတ်မှုမျိုးစုံ ပြုသွားသူတွေနဲ့ အဆက်ဖြတ်လို့ ဖြစ်ပါ့မလား။ အလွယ်လေး စဉ်းစားကြည့်ပါ။ ရှေ့က တိုက်ပွဲ ၀င်ခဲ့တာတွေ မရှိဘဲနဲ့ ဒီနေ့ တိုက်ပွဲတွေ ရှိနိုင်ပါ့မလား။ ရှစ်လေးလုံး အရေးတော်ပုံ မရှိခဲ့ရင် အမျိုးသား ဒီမိုကရေစီ အဖွဲ့ချုပ်တို့၊ န၀တ-နအဖတို့ ရှိနိုင်ပါ့မလား။ ၁၉၇၄-၇၅-၇၆ တိုက်ပွဲတွေနဲ့ တခြားမြေအောက်-တောတွင်း လှုပ်ရှားမှုတွေ မရှိရင် ရှစ်လေးလုံး အရေးတော်ပုံ ပေါ်ပေါက်နိုင်ပါ့မလား။ အကုန်လုံးဟာ ဆက်နေတာပါ။ သမိုင်းကြောင်းကို ဖြတ်တောက်ဖို့ ကြံစည်-ကြံဆတဲ့ အာဏာရှင်တွေ အနိုင်နိုင်ငံမှာ ပေါ်ခဲ့ဖူးပါတယ်။ တခြားမပြောနဲ့ ဗိုလ်နေ၀င်းက အစ ဗိုလ်သန်းရွှေအထိ ဆရာကြီး သခင်ကိုယ်တော်မှိုင်းနဲ့ ဗိုလ်ချုပ်အောင်ဆန်း အခန်းကို ဖျောက်ဖျက်ဖို့ ကြိုးပမ်း ခဲ့ကြတာ အသေအလဲပဲ မဟုတ်လား။ ဒါပေမယ့် ဒင်းတို့ ဘယ်မှာ အောင်မြင်လို့လဲ။ အခုဆိုရင် နအဖဟာ ဒါကို လက်တောင် လျှော့လိုက်ရပြီ မဟုတ်ပါလား။
ဒီသမိုင်းအကွေ့မှာ လူငယ်တွေကို ဘယ်လိုမျိုးဆက်သစ်လဲလို့ စမ်းသပ်မယ့် အဓိက မှတ်ကျောက်ကတော့ နအဖရဲ့ ၂၀၀၈ ခုနှစ် ဖွဲ့စည်းပုံ အခြေခံဥပဒေ အပေါ် ဘယ်လို သဘောထားသလဲ ဆိုတဲ့ အချက်ပဲဖြစ်ပါတယ်။
ဒါကြောင့် နအဖနဲ့ သူတို့တပည့်လက်သားတွေနဲ့ မတူဘဲ မျိုးဆက်သစ်လို့ ပြောနေကြသူတွေက ဒီမျိုးဆက်သစ် ဆိုတဲ့ အသုံး အနှုန်းကို ဒီလို အဓိပ္ပာယ် ဖွင့်ပါတယ်။ အဓိက အားဖြင့် အရင် မျိုးဆက်ဟောင်းတွေဟာ အသက်အရွယ်ကြောင့် အပါအ၀င် အကြောင်း အမျိုးမျိုးကြောင့် ဆက်လက် တိုက်ပွဲဝင်ရာမှာ အကန့် အသတ် အမျိုးမျိုး ရှိနေလို့ သူတို့ထက်ပိုပြီး ထက်ထက် မြက်မြက် လုပ်ကိုင်နိုင်မယ့် လွန်ခဲ့တဲ့ အရေးတော်ပုံတွေရဲ့ အစဉ်အလာတွေ၊ ကောင်းမွန်ချက်တွေနဲ့ သင်ခန်း စာတွေကို ဆက်ခံထားတဲ့ မျိုးဆက်သစ်ကို ဆိုလိုတာ ဖြစ်ပါတယ်။ သမိုင်းပေး တာဝန်လို့ ပြောလေ့ရှိကြတဲ့ အရာဟာ ရှေ့က သွားနှင့် သူတွေနဲ့ ပြည်သူလူထု တရပ်လုံးက ပေးတဲ့တာဝန်ကို ဆိုလိုတာ ဖြစ်ပါတယ်။ ဒါကြောင့် ပြည်သူတွေ လိုလားတဲ့ မျိုးဆက်သစ် ဆိုတာက ရှစ်လေးလုံး အရေးတော်ပုံနဲ့ ချက်ကြိုး ပြတ်ပါတယ်လို့ အသားယူ ပြောနေတဲ့၊ (၇) ရက် ဇူလိုင် အရေးတော်ပုံနဲ့ ၁၉၇၄ အလုပ်သမား အရေးတော်ပုံ၊ ဦးသန့် ဈာပနတိုက်ပွဲ၊ ဆရာကြီး မှိုင်းရာပြည့် လှုပ်ရှားမှုတွေဟာ တောထဲက သွေးထိုး လှုံ့ဆော်လို့ ဖြစ်ပေါ်တာလို့ သခင်အားရ ကျွန်ပါးဝ ပြောနေတဲ့ “မျိုးဆက်သစ်” မျိုးကို ဆိုလိုတာ မဟုတ်ပါဘူး။ အဲဒီဟာတွေက ခေတ်အဆက်ဆက် လက်နက်ချတွေရဲ့ ဆိုးမွေနဲ့ အစဉ်အလာကို ဆက်ခံထားကြတဲ့ အလိုတော်ရိ မျိုးဆက်သစ်တွေသာ ဖြစ်ပါတယ်။
ဒီသမိုင်းအကွေ့မှာ လူငယ်တွေကို ဘယ်လိုမျိုးဆက်သစ်လဲလို့ စမ်းသပ်မယ့် အဓိက မှတ်ကျောက်ကတော့ နအဖရဲ့ ၂၀၀၈ ခုနှစ် ဖွဲ့စည်းပုံ အခြေခံဥပဒေ အပေါ် ဘယ်လို သဘောထားသလဲ ဆိုတဲ့ အချက်ပဲဖြစ်ပါတယ်။ အဲဒီ တနိုင်ငံလုံး မျိုးဆက်ပေါင်းများစွာ စစ်ကျွန် ဖြစ်စေမယ့် ဖွဲ့စည်းပုံ အခြေခံဥပဒေကို တိုက်ဖျက်မလား၊ ဒါကြီးကိုမှီပြီး ကိုယ့်တကိုယ် ကောင်းစားမယ့်လမ်းကို ရှာမလား ဆိုတာဟာ နိုင်ငံရေး အင်အားစုတွေ အားလုံးအတွက် ဓာတုဗေဒ စမ်းသပ်ခန်းထဲက လစ်တ်မတ်စ်ပေပါ ပါပဲ။ ဗိုလ်သန်းရွှေတို့ နအဖ စစ်အုပ်စုရဲ့ အရေးတော်ပုံကို ဆက်ခံမယ့် မျိုးဆက်သစ်လား၊ အာဇာနည် သူရဲကောင်း အထောင် အသောင်းရဲ့ အရေးတော်ပုံကို ဆက်ခံမယ့် မျိုးဆက်သစ်လား ဆိုတာ ကိုယ့်အခန်းကိုယ် ရွေးချယ် ဆုံးဖြတ်ရမှာပါ။
ပြန်ကြည့်လိုက်ရင် မြန်မာပြည်ရဲ့သမိုင်းမှာ ဖွဲ့စည်းပုံတွေဟာ ဖြိုဖျက်လို့ ပြိုပျက်ရတာတွေ ချည်းပါပဲ။ ၁၉၄၇ ခုနှစ် အခြေခံ ဥပဒေဟာ ဗိုလ်နေ၀င်းတို့ ခြေနဲ့ဖျက်လို့ ပျက်သွားတာဖြစ်ပြီး မဆလ စစ်အစိုးရရဲ့ ၁၉၇၄ ခုနှစ်ဖွဲ့စည်းပုံ အခြေခံ ဥပဒေကတော့ ရှစ်လေးလုံး အရေးတော်ပုံကြီးနဲ့ မျိုးဆက်သစ်တွေက တိုက်ဖျက်လိုက်လို့ ပျက်သုဉ်းသွားတာ ဖြစ်ပါတယ်။ ၁၉၃၅ ခုနှစ်မှာ အင်္ဂလိပ် ကိုလိုနီ အစိုးရက ချမှတ်ခဲ့တဲ့ မြန်မာပြည်ရဲ့ ပထမဆုံး ဖွဲ့စည်းပုံ အခြေခံ ဥပဒေလို့ ဆိုရမယ့် ဥပဒေဟာလည်း (ကမ္ဘာစစ်ကြီးကို ကျော်ပြီးနောက်) ၁၉၄၆ ခုနှစ်မှာ ပျက်သွားခဲ့ပါတယ်။ အဲဒီလို ပျက်စေခဲ့တာမှာ အဲဒီတုန်းက မျိုးဆက်သစ် နိုင်ငံရေး သမားတွေလို့ ပြောရမယ့် သခင်အောင်ဆန်း၊ သခင်သန်းထွန်း စသူတွေ ဦးဆောင် တိုက်ပွဲဝင်ခဲ့လို့ ဖြစ်ပါတယ်။ အခုနအဖရဲ့ ၂၀၀၈ ခုနှစ် ဖွဲ့စည်းပုံ အခြေခံဥပဒေကို ဖျက်သိမ်းဖို့တာဝန်ဟာ မျိုးဆက်သစ်တွေရဲ့ ခေါင်းပေါ်ကို ရောက်လာပါပြီ။
မြန်မာပြည်လိုနိုင်ငံမှာ ဖွဲ့စည်းပုံ အခြေခံဥပဒေ ဆိုတာဟာ မဖျက်ရင် မပျက်ပါဘူးဆိုတာ ရှင်းနေပါတယ်။ နအဖက လှံစွပ်နဲ့ ရေးထားတဲ့ ၂၀၀၈ ခုနှစ် အခြေခံ ဥပဒေကို ပြည်သူတွေဟာ ညီညွတ်မှု အင်အားနဲ့ တိုက်ဖျက်ရပါလိမ့်မယ်။ ဒီတာဝန်ဟာ ပြည်သူ တရပ်လုံးမှာ သာမက အထူးသဖြင့် မျိုးဆက်သစ်တွေရဲ့ ပခုံးပေါ်မှာ အထင်အရှား ကျရောက်နေပါတယ်။
Ref: ခေတ်ပြိုင်
Posts
0 comments:
Post a Comment