နယ်စပ် ဘုရားသုံးဆူ တပ်မြေအတွင်း ဖယ်ရှားခံအိမ်ခြေ(၁၀၀)ကျော် ရှိနေ

အောင်ညိမ်းဝေ-ချင်းမိုင်(မြစ်မခ)
13 Jul, 2012

ထိုင်းမြန်မာနယ်စပ် ဘုရားသုံးဆူ မြို့ တပ်ပိုင်နယ်မြေအတွင်းရှိ နေအိမ်တစ်ရာကျော်မှာ အောက်တိုဘာလ (၁)ရက်နေ့ နောက်ဆုံး ရွှေ့ပြောင်းရန် ခံဝန်လက်မှတ်ထိုးခဲ့ရသော်လည်း ပြောင်းရွှေ့ရမည့်နေရာ သတ်မှတ် ပေးခြင်းမရှိသဖြင့် အခက်အခဲဖြစ်နေကြောင်း နယ်ခံများထံက သိရှိရသည်။

ရပ်ကွက်အုပ်ချုပ်ရေးမှူးများနှင့် တပ်မှအရာရှိငယ်အချို့ ပူးပေါင်း၍ မြေနေရာရောင်းစားနေခြင်းက အဆိုပါအိမ်ခြေ(၁၀၀)ကျော်ကို အထက်အမိန့်အရ(၃)လအတွင်း အပြီး ပြောင်းရွှေ့ရမည်အမိန့် ထွက်ပေါ်စေခြင်း ဖြစ်သည်ဟု ဒေသခံများက ဆိုသည်။

“အဓိကကတော့ တပ်က ဆာဂျင်အဆင့်တွေနဲ့ ဆယ်အိမ်မှူး၊ ရာအိမ်မှူးတွေက ဒီနေရာတွေကို ရောင်းစား နေတာကို တပ်ရင်းမှူးက သိသွားတယ်လေ။ အုတ်တံတိုင်းတွေ၊ သံဆူးကြိုးတွေနဲ့ ခြံစည်းရိုးတွေ အခိုင်အမာ ကာထားကြတာကလည်း တပ်ရင်းမှူး အိမ်နားထိ ရောက်သွားတယ်။ အဲလိုမျိုး အပိုင်ခတ်ထားတာတွေ တွေ့ သွားလို့ ပြောင်းခိုင်းတာ။” ဟု ဘုရားသုံးဆူ မြို့ တပ်ပိုင်နယ်မြေအတွင်းမှ ဒေသခံအမျိုးသမီးတစ်ဦးက ပြောသည်။

အဆိုပါနေရာသည် ဘုရားသုံးဆူမြို့ရပ်ကွက်(၂)နှင့်(၃)အတွင်းပါဝင်၍ တပ်မတော်မှ ကွယ်လွန်သူစစ်မှုထမ်း ဟောင်းများ၏ ဇနီးသား သမီးများအပါအ၀င် ၀န်ထမ်းအချို့နှင့် ရပ်ဝေးမှလာရောက်အခြေချသူလူဦးရေ (၈၀၀)၀န်းကျင် နေထိုင်သောနေရာလည်း ဖြစ်သည်။

ဘုရားသုံးဆူမြို့တွင် တာဝန်ကျသည့်တပ်ရင်းမှူး အစဉ်အဆက်ထံ လွန်ခဲ့သည့် (၁၀) နှစ်ခန့်ကတည်းက မြေယာတောင်းခံ၍ နေထိုင်ခဲ့ရာ ပြဿနာ မရှိခဲ့သော်လည်း နောက်ပိုင်းတွင် တာဝန်ရှိသူ အချို့က ရပ်ဝေးမှ ရောက်ရှိလာသူများအား ပေ (၄၀ X ၆၀) အကျယ်အ၀န်းခန့် မြေတကွက်လျင် ထိုင်းဘတ်ငွေ (၁၅၀၀) နှင့် (၂၀၀၀) ကြား သတ်မှတ်၍ ရောင်းချခဲ့ခြင်းဖြစ်ကြောင်း ဒေသခံများက ဆိုသည်။

ယင်းကိစ္စ သက်ဆိုင်ရာ ရပ်ကွက်အုပ်ချုပ်ရေးမှူးတစ်ဦးထံ ဆက်သွယ် မေးမြန်းကြည့်ရာ ၎င်းအနေဖြင့် ပြောဆို ပိုင်ခွင့်မရှိကြောင်း ယခုကဲ့သို့ဖြေကြားခဲ့သည်။

“ကျွန်တော်လည်း ဂဃနဏ မသိသေးဘူး။ ခရီးက ပြန်ရောက်တာလည်း မကြာသေးလို့ပါ။ ပြီးတော့ ပြောဆို ခွင့်လည်း မရှိလို့ပါ ခင်ဗျာ။” ဟု ရပ်ကွက်အုပ်ချုပ်ရေးမှူးက ပြောသည်။

လက်ရှိနေရာမှ ပြောင်းရွှေ့ရန် လက်မှတ်ထိုးခဲ့ရသော်လည်း ပြောင်းရွှေ့ရမည့် နေရာအတည်တကျ သတ်မှတ်ပေးခြင်း မရှိသည့် အတွက် အခက်အခဲ ဖြစ်နေကြောင်း ဒေသခံများက ဆိုသည်။

“အစကတည်းက ကျမတို့နေလာတာ ဘာပြဿနာမှ မရှိခဲ့ဘူး။ အေးအေးဆေးဆေးပဲ။ အခုသူတို့ပေါင်းပြီး လုပ်စားကြလို့ ကျမတို့ ပြောင်းရတော့မယ်။ ဘယ်ကို ပြောင်းရမလဲ ဆိုတာလည်း မသိသေးဘူး။ မြေ၀ယ်ရ အောင်ကလည်း ပိုက်ဆံကမရှိတော့ ဘယ်လို လုပ်ရမလဲ မသိတော့ပါဘူး။” ဟု အဆိုပါ ဒေသခံအမျိုးသမီးတစ်ဦးက ပြောသည်။

လက်ရှိအနေအထားအရ ရပ်ကွက်အုပ်ချုပ်ရေးမှူးအချို့မှာ ၎င်းတို့ကိုယ်ပိုင် မြေယာများအား ခုတ်ထွင် ရှင်း လင်း၍ ပြောင်းရွှေ့ လာမည့်သူများအား ရောင်းချရန် ပြင်ဆင်နေကြောင်းနှင့် နေရာအကျယ်အ၀န်းအလိုက် ထိုင်းဘတ်ငွေ တစ်သောင်းမှ သုံးသောင်းအထိ ဈေးသတ်မှတ်ထားရှိသည်ဟု သတင်းများထွက်ပေါ်လျက် ရှိသည်။

Ref: မြစ်မခ