အဖိနှိပ်ခံပါတီ အင်အားစုတွေကို NLD ဦးဆောင် တိုက်ပွဲဝင်သင့် မသင့်

ဇူလိုင် ၁၇၊ ၂၀၁၀
(ဇူလိုင် ၁၄ ရက်နေ့ VOA မြန်မာပိုင်း ထုတ်လွှင့်ချက်)

မြန်မာနိုင်ငံ စစ်အစိုးရဟာ သူတို့ ကျင်းပ ပြုလုပ်ပေးမယ့် ရွေးကောက်ပွဲမှာ ကြံ့ခိုင်ဖွံ့ဖြိုးရေး အမည်ခံ ပါတီကို အနိုင်ရအောင် တဖတ်သတ် ဆောင်ရွက်နေတာ အခုအခါမှာတော့  ပိုမို ထင်ရှားလာနေပါပြီ။ ဒီလို အခြေ အနေမျိုးမှာ အမျိုးသား ဒီမိုကရေစီ အဖွဲ့ချုပ် (NLD) က အဖိနှိပ်ခံ ပါတီတွေ အင်အားစုတွေကို ဦးဆောင် တိုက်ပွဲဝင်ခဲ့ရင် ပိုမကောင်းပေဘူးလား ဆိုတဲ့ အချက်နဲ့ ပတ်သက်လို့ ပိုမို သိရှိနိုင်ဖို့ ဦးကျော်ဇံသာ က အမျိုးသား ဒီမိုကရေစီ အဖွဲ့ချုပ် ခေါင်းဆောင်တဦး ဖြစ်သူ ဦးဝင်းတင် ကို ဆက်သွယ် မေးမြန်း ဆွေးနွေး တင်ပြထားပါတယ်။

ဦးကျော်ဇံသာ ။ ။ အခု မြန်မာနိုင်ငံမှာ ရွေးကောက်ပွဲနဲ့ ပတ်သက်ပြီးတော့ စစ်အစိုးရရဲ့ ဖိနှိပ်ချုပ်ချယ်မှုတွေက ပိုပြီးတော့ ပေါ်လွင် ထင်ရှား လာတယ်လို့ ပြောနိုင်ပါတယ်။ အဲဒီအချိန်မှာ နိုင်ငံရေးပါ တီတချို့က ဒါကို ဆန်ကျင်ဖို့၊ ရုန်းကန်ဖို့ ကြိုးစား နေကြပါတယ်။ အဲဒီအခါမှာ လူတွေ တွေးကြတဲ့ နှစ်ချက်ကို တွေ့ရပါတယ်။ ပထမတချက်က ဒီလို ဖိနှိပ် ချုပ်ချယ်ပြီး အဓိပ္ပာယ်မရှိတဲ့ ရွေးကောက်ပွဲ ဖြစ်လာမယ် ဆိုတာကို သိလို့ NLD က အစကတည်းက မဝင်ခဲ့တာ၊ NLD ရပ်တည်ချက် မှန်တယ်လို့ ပြောကြတဲ့လူတွေ ရှိကြပါတယ်။ တချိန်တည်းမှာ ဒီလို ဖိနှိပ်ချုပ်ချယ်မှု ပြင်းထန်လာတဲ့ အချိန်မှာ ကျန်တဲ့ နိုင်ငံရေးပါတီတွေက ရုန်းကန်တာထက် NLD က ဦးဆောင် လုပ်ခဲ့ရင် မကောင်းပေဘူးလား၊ NLD က ဘေးထွက်နေသလို ဒီလို အရေးကြီးတဲ့ အချိန်မှာ ဆိုတဲ့ အယူအဆလည်း ပေါ်ထွက်နေပါတယ်။ ပထမအချက်ကတော့ ဆရာတို့ စိတ်ကြိုက် ဆုံးဖြတ်ခဲ့တဲ့ အချက်ဆိုတော့ အထွေအထူး ပြောစရာ မရှိပါဘူး။ ဒုတိယအချက် ဒီလို အရေးကြီးတဲ့ အခက်အခဲတွေ ရင်ဆိုင်နေရတဲ့ အချိန်မှာ NLD ဘေးထွက်သလို ဖြစ်နေတယ် ဆိုတဲ့ ပြောဆိုချက်ကို ဘယ်လို ပြန်ပြောချင်ပါသလဲ။

ဦးဝင်းတင် ။ ။ ကျနော်ကတော့ ဒီလိုပြောချင်ပါတယ် - NLD ဘေးထွက်နေတယ်လို့ ပြောရင်လည်း ပြောပေါ့။ ဘာဖြစ်လို့လဲ ဆိုတော့ အမှန်တိုင်း ပြောရရင် NLD က ဘေးထွက် နေတာကို။ သူတို့တွေ လုပ်တဲ့ ရွေးကောက်ပွဲဝင်တာ၊ ပါတီများ မှတ်ပုံတင်တာ၊ သို့မဟုတ် ၂၀၀၈ အခြေခံဥပဒေကို သစ္စာခံတာကို ကျနော်က လုံးဝ လက်မခံနိုင်ဘူး။ လက်မခံနိုင်တဲ့ အတွက်ကြောင့် သူတို့ရဲ့ အကျပ်အတည်းတွေ ပေါ်လာလို့ ရှိရင် ကျနော်တို့ NLD ကတော့ ဦးဆောင် မလုပ်ဘူး။ ဒါပေမဲ့ သူတို့ကြိုးပမ်းမှု၊ ရုန်းကန်မှုနဲ့ ပတ်သက်ပြီးတော့ NLD က sympathize ဖြစ်တာကတော့ နိုင်ငံရေးပါတီများ ဖြစ်ရဲ့သားနဲ့ ဒီလို အလှည့်စား ခံရပါလား။ သို့မဟုတ် ဒီလို အကျပ်အတည်း ဆိုက်ကြ ပါပြီလား ဆိုတာနဲ့ ပတ်သက်လို့ ကျနော်တို့ကို ပြောရင် ကျနော်တို့မှာ ရှိတဲ့ စေတနာ၊ သဘောထားကို ပြောနိုင်မယ်။ ဒါပေမဲ့ ကျနော်တို့က ဦးဆောင် လှုပ်ရှားဖို့ ဆိုတာတော့ မဖြစ်နိုင်ဘူး။ ဘာဖြစ်လို့လဲ ဆိုတော့ သူတို့ သွားနေတဲ့ လမ်းကြောင်းက ၂၀၀၈ အခြေခံ ဥပဒေကို သစ္စာခံတဲ့ လမ်းကြောင်းကို သွားတဲ့ အခါကြတော့ ဒီလမ်းကြောင်းမှာ အဖုအထစ်တွေ၊ အခက်အခဲတွေ၊ အဟန့် အတားတွေ၊ အပိတ်အဆို့တွေ တွေ့တဲ့အခါမှာ ကျနော်တို့က ဒါတွေကို ဝင်ဖြေရှင်းဖို့၊ တိုက်ဖျက်ဖို့၊ ကျော်လွှားဖို့တွေ ဝင်ပြောမယ် ဆိုရင် ကျနော်တို့က သူတို့ကို ၂၀၀၈ အခြေခံဥပဒေ လမ်းကြောင်းပေါ်ကို မြန်မြန် ရောက်ဖို့၊ ၂၀၀၈ အခြေခံဥပဒေကို သစ္စာခံရင် ဖြောင့်ဖြောင့် တန်းတန်း သစ္စာခံနိုင်အောင် ကူညီတာမျိုး ကျနော်တို့အနေနဲ့ လုပ်နိုင်မယ်လို့ မထင်ပါဘူး။ သို့သော် နိုင်ငံရေး ပါတီများ အနေနဲ့ အခက်အခဲ sympathize ဖြစ်မယ်။ ကျနော်တို့ စေတနာထားတယ်။ သူတို့ဒါတွေ လုပ်တာနဲ့ ပတ်သက်လို့ လုပ်ပါလို့ အားပေးချင်တယ်။

ဦးကျော်ဇံသာ ။ ။ ဆရာတို့ အမျိုးသား ဒီမိုကရေစီ အဖွဲ့ချုပ်က ဒီလိုအခြေအနေမျိုးမှာ ဦးဆောင်မှုပေးရင် ၂၀၀၈ အခြေခံဥပဒေ ဖော်ဆောင်ရေးထက် အဲဒီ ဥပဒေမှာ ပြုပြင်စရာတွေကို ပြုပြင်သင့်သော အခြေအနေ မရောက်လာ နိုင်ဘူးလား။

ဦးဝင်းတင် ။ ။ ဒါကတော့ ကျနော် အဲဒီလို မထင်ဘူးဗျား။ ဘာကြောင့်လဲ ဆိုတော့ ဒီ အခြေခံဥပဒေ ပြင်ဆင်ရေး ကိစ္စတွေကို ကျနော်က တွေ့ဆုံ ဆွေးနွေးရေး လမ်းကြောင်းနဲ့ ရှင်းမယ်လို့ တွက်ထားတာ။ အခု ဒီကိစ္စက ဘယ်လိုဖြစ်မလဲ ဆိုရင် သူတို့က ဒီအခြေခံဥပဒေ လမ်းကြောင်း၊ ရွေးကောက်ပွဲ လမ်းကြောင်းပေါ်မှာ လျှောက်နေပြီး အခြေခံဥပဒေကို ပြင်ဖို့ကြိုးစားမှာ။ ကျနော်တို့က အဲဒါကို မလုပ်နိုင်ဘူး။ သို့သော် ကျနော်တို့က ပြင်ဆင်ရေးကို လက်ခံတဲ့ အတွက်ကြောင့် အကြံ ဘယ်လိုပေးချင်သလဲ ဆိုတော့ အဲဒါဆို ခင်ဗျားတို့ တတွေက ဒီရွေးကောက်ပွဲကို သပိတ်မှောက်ထားမယ်၊ ရွေးကောက်ပွဲကို ရပ်ဆိုင်းထားမယ်၊ ပြီးတဲ့ အခါကြမှ ခင်ဗျားတို့က စစ်အစိုးရနဲ့ တွေ့ဆုံ ဆွေးနွေးရေး လုပ်နိုင်အောင်။ ဒေါ်အောင်ဆန်းစုကြည်လို ဆုံးဖြတ်ပေးနိုင်တဲ့ ခေါင်းဆောင်များ၊ တိုင်းရင်းသား ခေါင်းဆောင်များ နဲ့ သို့မဟုတ် သူတို့ထဲက ခေါင်းဆောင်များနဲ့ တွေ့ဆုံ ဆွေးနွေးရေး လုပ်ပါ၊ တွေ့ဆုံ ဆွေးနွေးရေးလုပ်ပြီး အခြေခံဥပဒေ ပြင်ဆင်ရေး အတွက် ညှိနှိုင်းကြမယ် ဆိုရင်တော့ ကျနော်တို့ ပူးပေါင်းဆောင်ရွက်တဲ့ အနေနဲ့ ရပ်တည်နိုင်တယ်လို့ ထင်ပါတယ်။

ဦးကျော်ဇံသာ ။ ။ နောက်တခုက အမျိုးသား ဒီမိုကရေစီ အဖွဲ့ချုပ်က ရွေးကောက်ပွဲ မဝင်ဘူး။ ၂၀၀၈ အခြေခံ ဥပဒေကို လုံးဝ လက်မခံဘူး။ မပြုပြင်ရင်ဆိုပြီး ဆုံးဖြတ်ချက် ချခဲ့တဲ့ အချိန်မှာ နိုင်ငံရေး အင်အားစု တချို့ကတော့ အဲဒါနဲ့ ခွဲပြီးတော့ ဥပဒေကို လက်ခံသည် မခံသည်ထက် ရွေးကောက်ပွဲ လုပ်မယ်လို့ ဆုံးဖြတ် ခဲ့ကြပါတယ်။ အဲဒီမှာ နိုင်ငံရေးအင်အားစု နှစ်ခြမ်းကွဲ ခဲ့ကြပါတယ်။ တကယ်လို့သာ အမျိုးသား ဒီမိုကရေစီ အဖွဲ့ချုပ်က ငါတို့ ဦးဆောင်ပြီး စစ်အစိုးရကို တိုက်မယ်။ ဥပဒေဘောင် အတွင်းက ရွေးကောက်ပွဲ ဝင်မယ်လို့ ဆုံးဖြတ်ခဲ့ရင် နိုင်ငံရေး အင်အားစုတွေ ကွဲကြမယ်လို့ မယူဆကြပါဘူး။ ဆရာတို့ ဘယ်လို သဘောရပါသလဲ။ ဆရာတို့ အဲဒီလို လုပ်ခဲ့ရင် ဆရာတို့ ဦးဆောင်မှု အောက်မှာ ကျန်တဲ့ပါတီတွေ တညီ တညွတ်တည်း လိုက်ပါလာလိမ့်မယ်လို့ လူတိုင်း တွက်ကြပါတယ်။

ဦးဝင်းတင် ။ ။ ဒီဟာအထိ ကျနော်တို့ သဘောတူတယ်။ နိုင်ငံရေးပါတီတခု လူထု ထောက်ခံမှု အများကြီး ရတယ် ဆိုရင် လူထု ဆိုတဲ့ အထဲမှာ ပါတီများလည်း ပါတဲ့အတွက် ကျနော်တို့က လူထုကို ကိုယ်စားပြုပြီးတော့ ဒီပါတီတွေနဲ့ တွဲလုပ်ဖို့ ဝန်မလေးဘူး။ သို့သော် အခုန ပြောသလို သူတို့က အခြေခံဥပဒေ လမ်းကြောင်းပေါ်မှာ ရွေးကောက်ပွဲ လမ်းကြောင်းကို တက်လျှောက်ပြီ။ ကျနော်တို့က ဒီရွေးကောက်ပွဲ လမ်းကြောင်းကို လက်မခံနိုင်ဘူး။ အဲဒီတော့ ကျနော်တို့က ဒီအခြေခံဥပဒေ ပြင်ဆင်ရေးကို ဦးဆောင်ရမယ် ဘာညာ ဆိုရင် အပြင်မှာ လုပ်နိုင်ရမယ်။ ကျနော်တို့လိုပဲ မှတ်ပုံ မတင်ကြပါနဲ့၊ ရွေးကောက်ပွဲကို သပိတ်မှောက်ကြပါ ဆိုတဲ့ နည်းနဲ့သာ ကျနော်တို့ ပူးပေါင်း လုပ်ဆောင်လို့ ရမယ်။ အခု ကိုဖြိုးမင်းသိန်းတို့ ပြောနေသလို သူတို့ ရွေးကောက်ပွဲဝင်မယ် ပါတီချင်းသာ တွဲလုပ်ဖို့ ကိစ္စသာ ရှိမယ်လို့ ထင်တယ်။

ဦးကျော်ဇံသာ ။ ။ လူတွေက အမျိုးသား ဒီမိုကရေစီ အဖွဲ့ချုပ်ကို ဝန်းရံနိုင်ရမယ် ဆိုတဲ့ လူတွေ အများကြီးပါ။ ဒါပေမဲ့ အခုအခါမှာ အမျိုးသား ဒီမိုကရေစီ အဖွဲ့ချုပ်ကို သူတို့က မြတ်နိုးလွန်းလို့ ထိခိုက်မှာဆိုလို့ ဝေဖန်ခြင်း၊ ပြောဆိုခြင်း တခုမှမရှိပါဘူး။ ဒါပေမဲ့ သူတို့က ကွယ်ရာမှာ ဘာပြောကြသလဲဆိုရင် အခုအခါ ဘယ်မှာ သွားပြီး ဝန်ရံရမလဲ။ အမျိုးသား ဒီမိုကရေစီ အဖွဲ့ချုပ် က နိုင်ငံရေး အကျဉ်းသား အိမ်တွေကို သွားရောက် လည်ပတ်တယ်။ နိုင်ငံခြား ကိုယ်စားလှယ် တချို့ကို သံရုံးတွေမှာ သွားရောက် တွေ့ဆုံတယ်။ ဒီနေရာတွေက လွဲလို့ တခြား ဝန်းရံစရာ မရှိဘူးလို့ ပြောနေကြပါတယ်။

ဦးဝင်းတင် ။ ။ အဲဒါကတော့ ဒီလိုရှိတယ် - အခု ကျနော်တို့ လုပ်နေရတာ အမှန်အတိုင်း ပြောရရင် ကျနော်တို့က အစိုးရရဲ့ ရွေးကောက်ပွဲ ဥပဒေတွေကို လက်မခံဘူး ဆိုကတည်းက ရွေးကောက်ပွဲတို့ ဘာတို့ကို သပိတ်မှောက် ပြီသား ဖြစ်နေတယ်။ အခြေခံဥပဒေကို ငြင်းပယ်တဲ့ သဘော ဆောင်နေတယ်။ အဲဒီအခါကြတော့ အစိုးရဘက်က ပြန်ပြီး တုံ့ပြန်ချက်က ဘာလဲဆိုတော့ ခင်များတို့က ပါတီ မဟုတ်တော့ဘူး၊ ပါတီအနေနဲ့ ပျက်ပျယ်သွားပြီ။ ပါတီအနေနဲ့ အသိအမှတ် မပြုဘူးဆိုတဲ့ အနေအထားမှာ ကျနော်တို့ရဲ့ ပြောဆိုချက်က ဘာလဲ ဆိုတော့ (တစ်) နိုင်ငံရေး အစိုင်အခဲ အနေနဲ့ နိုင်ငံရေး အင်အားစု တခု အနေနဲ့ ရှိနေတယ် ဆိုတာကို ပြောတယ်။ ဒါကြောင့် နိုင်ငံရေးလုပ်မယ် ဆိုတာကို ပြောတယ်။ အဲဒီလိုဟာမျိုး ပြောနေတဲ့ အချိန်နဲ့ အတူ ကျနော်တို့ပါတီ လုပ်ငန်းတွေ လုပ်ပိုင်ခွင့် မရှိတော့ဘူး။ ပါတီလုပ်လို့ မရတော့ဘူး။ ပါတီလုပ်ငန်းတွေ လုပ်လို့မရဘူး ဆိုကတည်းက ရှင်းရှင်း ပြောရရင် အရပ်စကားနဲ့ ပြောရရင် ဒီပါတီက သေသွားနိုင်တဲ့ အနေအထား ရောက်နိုင်တယ်။ သို့မဟုတ် သေငယ်ဇော မြောတဲ့ အနေအထား ရောက်သွားနိုင်တယ်။ အဲဒီတော့ ကျနော်တို့ လုပ်နေတဲ့ ဟာတွေက ဒါတွေ အကုန်လုံး လုပ်နိုင်ဖို့ အခုနပြောတဲ့ နယ်တွေ အောက်ခြေ ဆင်းပြီးတော့ သွားတယ်၊ သံတမန်တွေနဲ့ တွေ့တယ်၊ ရှစ်လေးလုံး ကျောင်းသား မိသားစုတွေနဲ့ ကျောင်းသားချင်း၊ လူငယ်ချင်း ချိတ်ဆက်မိအောင် ကျနော်တို့ လုပ်နေတယ်။ ဒီလုပ်ငန်းတွေ လုပ်တယ်ဆိုတာ အဓိက လုပ်တာ ရှင်းရှင်းပြောရရင် အရပ်စကားနဲ့ ပြောရရင် ပါတီ မသေအောင် လုပ်နေတယ်။ ကျနော်တို့ လုပ်ငန်းစဉ်က ဘာလဲ ဆိုတော့ နှစ်ခု - လွယ်လွယ်လေး ပြောရရင် ဒေါ်အောင်ဆန်းစုကြည် လွတ်တဲ့ ကာလအထိ ပါတီကို မသေအောင် လုပ်တယ်။ ဘာဖြစ်လို့လဲ ဆိုတော့ လက်တွေ့ ကြည့်မယ်ဆိုရင် ဒီရွေးကောက်ပွဲ ဥပဒေအရ ကျနော်တို့ ပါတီအနေနဲ့ မရှိတော့ဘူး။ အခု ကျနော်တို့ လုပ်နေတာ ပါတီနိုင်ငံရေး လုပ်နေတာ မဟုတ်ဘူး။ ကျနော်တို့ လုပ်နိုင်တာက လူထု နိုင်ငံရေးသာ လုပ်နိုင်တယ်။ အဲဒီအနေအထားမှာ ရှိတယ်။ ကျနော့် အယူအဆ ပြောနေတာ - ပါတီ မသေရဘူး။ ဒါပဲပြောတယ်။

ကောင်းပြီ ဘာကြောင့် ဒေါ်အောင်ဆန်းစုကြည် လွတ်မြောက်ချိန်ကို ဗဟိုပြု ပြောနေသလဲ ဆိုတော့ အမှန်အတိုင်း ပြောရရင် လူတယောက် ကျနော်တို့လိုမျိုး လွတ်မြောက်လာတဲ့ အခါမှာ လူတွေ လက်ခုပ်တီးတဲ့ လူတွေ ရှိတယ်။ ဦးတင်ဦး လွတ်လာတဲ့ အခါမှာ လက်ခုပ်တီးတဲ့ လူတွေ ရှိတယ်။ အဲဒီလူတွေ လက်ခုပ်တီးခြင်း၊ အားပေးခြင်း၊ ကျနော်တို့ဘက်က ဝိုင်းဝန်းခြင်း အားပေးခြင်း ဆိုတာဟာ ပန်းအိုးထဲမှာ ရှိတဲ့ ရေငတ်နေတဲ့ ပန်းကို ရေလောင်းပေးတဲ့ သဘောလောက်ပဲ ရှိတယ်။ ဒေါ်အောင်ဆန်းစုကြည် လွတ်တဲ့ဟာက ဘာနဲ့တူသလဲ ဆိုတော့ မိုးကြီး သဲကြီးမဲကြီး ရွာလိုက်တဲ့ အောက်မှာ တလောကလုံး စိမ်းလန်း စိုပြေပြီး ရုန်းထလာတဲ့ ဟာမျိုးလို political awakening နိုင်ငံရေးနိုး ကြားမှုတွေ ပေါ်လာမယ်။ အဲဒီလို ပေါ်လာတာနဲ့ အတူ အဲဒီအချိန်မှာ ရှေ့မှာ ပါတီ ရှင်သန်ရေးတို့ ဘာတို့ လုပ်ဖို့ ဒေါ်အောင်ဆန်းစုကြည်သာ ဦးဆောင်နိုင်တယ်။ ကျနော်တို့ ဒီအချိန်မှာ တတ်နိုင်တဲ့ ဟာက ပါတီ မသေရေးဘဲ။ လွတ်လာတဲ့ နောက်ပိုင်းမှာ ပါတီ ရှင်သန်ရေးကို လုပ်မယ်။

ဦးကျော်ဇံသာ ။ ။ ကျနော် နောက်ဆုံး မေးချင်တာက နိုင်ငံတကာနဲ့ တွေ့တယ် ဆိုတာနဲ့ ပတ်သက်ပါတယ်။ နိုင်ငံတကာ ကတော့ ဆရာတို့နဲ့ တွေ့ဆုံတဲ့ အခါမှာ သူတို့ သဘောထားကို ဘယ်လောက် ပြောသလဲ ဆိုတာကို ကျနော်တို့ မသိရပါဘူး။ ဆရာတို့ ပြောနိုင်ရင် ပြောပါ။ ဒါပေမဲ့ နိုင်ငံတကာက လူတချို့က ဘယ်လို ပြောကြသလဲ ဆိုရင် အမျိုးသား ဒီမိုကရေစီ အဖွဲ့ချုပ် က ဒီလမ်း မရွေးဘဲနဲ့ နိုင်ငံရေး အင်အားစုတွေ နောက်မှာ အားလုံး ပါလာရင် ပြည်သူ တရပ်လုံး ပါလာမယ်။ အဲဒီလမ်းကို ရွေးပြီး ရွေးကောက်ပွဲကို ဝင်မယ်။ အဲဒီ ဘောင်အတွင်းက ဒီဟာကို ပြင်ခိုင်းမယ်၊ ဒီဟာကို လက်မခံဘူး ဘာညာ လုပ်ခဲ့ရင် နိုင်ငံတကာ ကလည်း မြန်မာ့ ဒီမိုကရေစီ အရေးမှာ ဝင်စွက်ရ ပိုကောင်းလိမ့်မယ်လို့ သုံးသပ်သူ တချို့က ဆိုကြပါတယ်။ ဆရာ ဘယ်လို သဘော ရပါသလဲ။

ဦးဝင်းတင် ။ ။ ဦးကျော်ဇံသာ စကားနဲ့ပြောရရင် သုံးသပ်သူတချို့ရဲ့ သဘောထားသာ ဖြစ်ပါတယ်။ အနောက် နိုင်ငံတွေက ပြောတာ၊ ဗမာပြည်က စာနယ်ဇင်းတွေက ပြောတာ၊ သို့မဟုတ် နိုင်ငံရေးပါတီ တချို့က ခေါင်းဆောင်တွေက ပြောတာ ဘာလဲ ဆိုတော့ တခြားလမ်း မရှိတော့ဘူး၊ ရွေးကောက်ပွဲလမ်းပဲ ရှိတော့တယ်။ ရွေးကောက်ပွဲ လမ်းကနေ ပြင်မယ်၊ ပြောင်းမယ်၊ နိုင်ငံရေး ပြုပြင်ပြောင်းလဲမှုတွေ လုပ်မယ်။ ကာလပေါ် စကားနဲ့ ပြောရရင် နိုင်ငံရေး ကွက်လပ်တို့၊ political space နိုင်ငံရေး ဘာညာတွေ ဖြစ်မယ်လို့ ပြောနေကြတယ်။ ကျနော်က နဂိုကတည်းက အဲဒါတွေကို အယုံအကြည် မရှိဘူး။ ကျနော်တို့ ယုံတာ လူထုနည်းနဲ့ နိုင်ငံရေးနည်းနဲ့ တွေ့ဆုံ ဆွေးနွေးကြမယ်၊ ညှိနှိုင်းကြမယ်။ ရွေးကောက်ပွဲက အဖြေ မဟုတ်ပါဘူး။

အနောက်နိုင်ငံတွေ မျက်စိလည်နေတာက ရွေးကောက်ပွဲလမ်းကို ကျနော်တို့ကိုပါ တက်ပြီး လျှောက်ခိုင်း နေတယ်။ ကျနော်တို့ တက်လျှောက်လို့ ဘာမှမဖြစ်ဘူး။ ကျနော်တို့ လက်မခံနိုင်ဘူး။ လျှောက်လည်း ဂိတ်ဆုံးမယ့် နေရာက ၂၀၀၈ အခြေခံ ဥပဒေ အတည်ပြုပြီးတော့ အောင်စည်ရွမ်းမယ့် ဂိတ်မှာ သွားဆုံးမယ်။

ကျနော်တို့က အဲဒီကို သွားနေတာ မဟုတ်ဘူး။ ကျနော်တို့ သွားနေတဲ့ လမ်းက စစ်မှန်သော ဒီမိုကရေစီ၊ စစ်မှန်သော ပြည်ထောင်စု၊ စစ်မှန်သော လူ့အခွင့်အရေး ပန်းတိုင်ကို ဦးတည်သွားနေတာ။ လမ်းကို လျှောက်နေတယ်။ ဟိုလမ်းပေါ်မှာ လျှောက်မှသာ မဟုတ်ပါဘူး။ ဟိုလမ်းက နေပြည်တော်က လမ်းလို ကျယ်ပြန့်တဲ့ လမ်းကြီး ဖြစ်ကောင်းဖြစ်မယ်။ ဒီရွေးကောက်ပွဲလမ်း ဖြစ်မယ်။ ကျနော်တို့ လျှောက်နေတဲ့ လမ်းက နယ်က ပျက်တဲ့လမ်း ဖြစ်ကောင်း ဖြစ်မယ်။ သို့သော် ကျနော်တို့ကတော့ ကျနော်တို့ ပန်းတိုင်နဲ့ ဦးတည်ချက် ရှိပါတယ်။ လမ်းမလျှောက်ဘဲ နေတာ မဟုတ်ပါဘူးလို့ ပြောချင်ပါတယ်။ ။

Ref: မိုးမခ