ပြည်ပရင်းနှီးမြှုပ်နှံမှု ရာခိုင်နှုန်းပြည့် ခွင့်ပြုပါက ပြည်တွင်းလုပ်ငန်းရှင်များ ထိခိုက်နိုင်

ဂျူးအယ်
July 7, 2012

မြန်မာနိုင်ငံ နိုင်ငံခြားရင်နှီးမြှုပ်နှံမှု ဥပဒေတွင် ပြည်ပမှ လာရောက်ရင်းနှီးမြှုပ်နှံမည့် လုပ်ငန်းရှင်ကုမ္မဏီများကို ရင်းနှီးမြှုပ်နှံမှု ၁၀၀ ရာခိုင်နှုန်းပေးပါက ပြည်တွင်းတိုင်းရင်းသား လုပ်ငန်ရှင်များ ယှဉ်ပြိုင်မှုတွင် အခက်အခဲများစွာနှင့် ရင်ဆိုင်ရပြီး အခွင့်အလမ်းများ ပျောက်ပျက်သွားနိုင်ကြောင်း ပြည်တွင်းလုပ်ငန်းရှင်များက ပြည်သူ့လွှတ်တော်ဥက္ကဋ္ဌ သူရဦးရွှေမန်းထံ တင်ပြခဲ့ကြောင်း သိရသည်။

ရန်ကုန်မြို့ ကမာရွတ်မြို့နယ် MICT ခန်းမ၌ ဇွန်လ ၃၀ ရက်နေ့က တင်ပြသော အစည်းအဝေး၌ မြန်မာနိုင်ငံ စားသောက်ကုန် ထုတ် လုပ်တင်ပို့ရောင်းချသူများ အသင်း ဒုဥက္ကဋ္ဌ ဦးဝေဖြိုးက “နိုင်ငံခြားရင်းနှီးမြှုပ်နှံသူများသည် ပင်ကိုငွေကြေး အလွန်တောင့်တင်းပြီး နေရာမျိုးစုံမှ ချေးငွေ၊ ထောက်ပံ့ငွေများကို ဈေးနှုန်း အလွန်ချိုသာစွာဖြင့် ရရှိနိုင်ပါတယ်။ ပြည်တွင်းလုပ်ငန်းရှင်များအနေဖြင့် ငွေကြေကဏ္ဍတွင် အလွန်နည်းပါတယ်” ဟု ပြောသည်။

နိုင်ငံခြားရင်းနှီးမြှုပ်နှံသူများသည် တခြားနိုင်ငံများတွင်လည်း လုပ်ငန်းများရှိသည့်အတွက် ဈေးကွက်တခုတည်း အားကိုးရန် မလို အပ်သည့် ထုတ်ကုန်များအား ကမ္ဘာတ၀ှမ်း ဖြန့်ချိရောင်းချနိုင်စွမ်းရှိပြီး ပြည်တွင်းလုပ်ငန်းရှင်များသည် ပြည်တွင်းဈေးကွက်ကိုသာ အဓိက အသက်သွေးကြောအနေဖြင့် အားကိုးရှင်သန်နေရကြောင်း အစည်းအဝေးတွင် တင်ပြသည်ဟု သိရသည်။

မြန်မာနိုင်ငံတွင် အသေးစားနှင့် အလတ်စားစက်မှုလုပ်ငန်းများ လက်ရှိကြုံတွေနေရသည့် အခက်အခဲများကို မြန်မာနိုင်ငံ SMEs မှ ဦးခင်ဇော်က “ကျနော်တို SMEs တွေဟာ အားငယ်ပြီးတော့ သိမ်ငယ်နေစရာ မလိုပါဘူး။ SMEs အတွက် မြန်မာနိုင်ငံသည် ကုန်း ဘောင်ခေတ်ကတည်းက စခဲ့တဲ့အတွက် ကျနော်တို့လူမျိုးတွေသည် စက်မှုလက်မှုနှင့် ပတ်သက်တဲ့နေရာမှာ နောက်မကျဘူး။ မြန်မာနိုင်ငံသည် SMEs နဲ့ ပတ်သက်ရင် ရေခံမြေခံကောင်းတဲ့ နိုင်ငံတစ်ခုလို့ နှိုးဆော်လို့ရပါတယ်။ ကျနော်တို့ SMEs တွေဟာ နိုင်ငံတနိုင်ငံရဲ့ စီးပွားဖွံ့ဖြိုးမှုအတွက် မီးရထားစက်ခေါင်းပါ” ဟု ဦးရွှေမန်းသို့ တင်ပြခဲ့သည်။

မြန်မာနိုင်ငံရှိ SMEs များ လက်ရှိကြုံတွေနေရသည့် မှုဝါဒအခတ်အခဲသည် လုပ်ထုံးလုပ်နည်း များနေခြင်း၊ စိစစ်ခွင့်ပြုချိန် ကြာသည့်အတွက် အခွင့်အလမ်းများ ဆုံးရှုံးခြင်း၊ မလိုအပ်သော ကုန်ကျစရိတ်များနေခြင်း၊ မှုဝါဒများ မကြာခဏပြောင်းလဲခြင်း တို့ဖြစ်ကြောင်း ဦးခင်ဇော်က ပြောသည်။

ပြည်ပနိုင်ငံများမှ တိုက်ရိုက် ရင်းနှီးမြှုပ်နှံမှု (FDI) များ ၀င်ရောက်လာပါက ရရှိနိုင်သည့်အားသာချက်များမှာ ရင်းနှီးမြှုပ်နှံမှု တိုးတက် လာခြင်း၊ ပြည်တွင်းထုတ် ကုန်ပစ္စည်းအမယ် ပိုမိုများပြားလာနိုင်ခြင်း၊ ပြည်တွင်းကုန်ကြမ်းများ ပိုမိုအသုံးချလာနိုင်ခြင်း၊ ရင်းနှီးမြှုပ်နှံမှု နည်းပညာအသစ်များ ရရှိလာနိုင်ခြင်း၊ ပို့ကုန်များ တိုးတက်လာနိုင်ခြင်း၊ နိုင်ငံတော် အနေဖြင့် အခွန်အခများ ပိုမိုရရှိနိုင်ခြင်း၊ အလုပ်အကိုင်အခွင့်အလမ်း ပိုမိုရရှိနိုင်ခြင်းတို့ဖြစ်ကြောင်း ဦးဝေဖြိုးက တင်ပြသည်။

ထို့အပြင် အားနည်းချက်များမှာ နိုင်ငံမှ ရင်းနှီးမြှုပ်နှံသူများ၏ အခွင့်အရေးသည် ပြည်တွင်းလုပ်ငန်းရှင်များထက် ပိုမိုသာလွန်ပါက ယှဉ်ပြိုင်သည့်အခါတွင် ပြည်တွင်းလုပ်ငန်းများ ရှုံးနိမ့်ပပျောက်သွာနိုင်ခြင်း၊ အကြောင်းအမျိုးမျိုးပြ၍ ပြည်ပမှ ကုန်ကြမ်းများကို အများစု တင်သွင်းအသုံးချဖြင့် ပြည်တွင်း၌ အလုပ်အကိုင်အခွင့်အရေးများ မတိုးတက်လာခြင်း၊ လူအား အစား စက်များအသုံးချခြင်းဖြင့် ပြည်သူ မျာအတွက် အလုပ်အကိုင်အခွင့်အရေး ဆုတ်ယုတ်သွာနိုင်ခြင်း၊ ရာနှုန်းပြည့် နိုင်ငံခြားသားပိုင်ဆိုင်ခွင့်ပြုခြင်းနှင့် စီပွာရေးကဏ္ဍတွင် အကန့်အသတ်မရှိ ပါဝင်လုပ်ဆောင် ခွင့်ပြုပါက ယှဉ်ပြိုင်မှု သဘောသဘာဝအရ ခွန်အားနည်းသည့် ပြည်တွင်းစားသောက်ကုန် လုပ်ငန်းအများစု ပပျောက်သွား နိုင်မည်ဖြစ်ကြောင်းလည်း ဦးဝေဖြိုးက အစည်းအဝေးတွင် တင်ပြခဲ့သည်ဟု သိရသည်။

ဦးရွှေမန်းက ပြန်လည်ဆွေးနွေးရာတွင် “လုပ်ငန်းရှင် စီးပွားရေးသမားတွေ အခုလောက် အမြော်အမြင် ရှိလောက်ပြီဆိုရင်၊ မြန်မာနိုင်ငံ ကုန်သည်ကြီးအသင်းအောက်မှာ ရှိနေတဲ့အတွက် ပိုကောင်းအောင်လုပ်မယ်ဆိုရင် အကျိုးသက်ရောက်မှု ရှိပါတယ်။ ကိုယ့်အလုပ်က ဘာလဲဆိုရင် အသင်းကို တာဝန်ခံထားရင် အသင်း ဥက္ကဋ္ဌတွေ၊ အမှုဆောင်တွေက ပြောရမှာ ကိုယ့်အလုပ်။ ကျန်တဲ့ ဌာနတွေမှာရှိတဲ့ ပုဂ္ဂိုလ်များဟာလည်း ကိုယ်နဲ့ သက်ဆိုင်ရာကို ပြောရမှာကိုယ့်အလုပ်။ နားထောင်တာ နားမထောင်တာ သူ့အလုပ်။ လုပ်ငန်းရှင်တွေ ဘက်ကလည်း အမှန်တရားကို ရဲရဲဝံ့ဝံ့ မှန်မှန်ကန်ကန် တင်ပြဖို့လိုတယ်” ဟု ပြောသည်။

တိုင်းဒေသကြီးလက်အောက်တွင် ဖြေရှင်းနိုင်သည်များကို တိုင်းဒေသကြီးအဆင့်တွင် ဖြေရှင်းသင့်ကြောင်း၊ ပင်လယ်စာလုပ်ငန်း အအေးခန်းများ မီးမရသည့် ကိစ္စမျိုးကို တိုင်းအဆင့်တွင် ဖြေရှင်း၍ ရနိုင်ကြောင်း၊ လွှတ်တော်အထိ တက်ရန် မလိုကြောင်း၊ လွှတ်တော်တွင် ဖြေရှင်းရမည့် ကိစ္စများကို လွှတ်တော်တွင် တင်ပေးမည်ဖြစ်ကြောင်း ဦးရွှေမန်းက ဆက်လက်ပြောသည်။

ပြည်တွင်း၌ မှတ်ပုံတင်ထားသည့် စက်မှုလုပ်ငန်း ၄၄၀၀၀ ခန့်ရှိပြီး အကြီးစာလုပ်ငန်း ၉ ရာခိုင်နှုန်း၊ အလတ်စား လုပ်ငန်း ၁၆ ရာခိုင်နှုန်း၊ အသေးစားလုပ်ငန်း ၇၅ ရာခိုင်နှုန်းကြောင်း၊ စုစုပေါင်း စက်မှုလုပ်ငန်းများ၏ ၆၅ ရာခိုင်နှုန်းသည် စားသောက်ကုန်လုပ်ငန်းများ ဖြစ် ကြောင်း၊ စားသောက်ကုန်လုပ်ငန်းများသည် ရင်းနှီးမြှုပ်နှံမှုနှင့် နည်းပညာ လိုအပ်ချက် အသင့်အတင့်သာရှိခြင်းနှင့် ပြည်တွင်းမှ ကုန်ကြမ်းများ အလွယ်တကူ ရရှိနိုင်ခြင်းတို့ကြောင့် အနာဂတ်တွင် အလားအလာ အလွန်ကောင်းသည့် ကဏ္ဍတခုဖြစ်ကြောင်း သိရသည်။

Ref: ဧရာဝတီ