နှစ်မကုန်မီ UNFC နှင့် နှစ်ကြိမ် တွေ့နိုင်ရန် ဦးအောင်မင်း ကမ်းလှမ်းထား

ဟင်္သာနီ (မွန်မြေ)
အောက်တိုဘာလ ၂၂ ရက် ၂၀၁၂ ခုနှစ်

ညီညွတ်သော တိုင်းရင်းသား လူမျိုးများ ဖက်ဒရယ် ကောင်စီ (UNFC) အဖွဲ့အား ၂ဝ၁၂ ခုနှစ် အတွင်း နှစ်ကြိမ် တွေ့ဆုံနိုင်ရန် ပြည်ထောင်စု ငြိမ်းချမ်းရေး ဖော်ဆောင်ရေးအဖွဲ့ ဒု-ဥက္ကဋ္ဌ ဝန်ကြီး ဦးအောင်မင်း က ကမ်းလှမ်း ထားကြောင်း သိရှိရသည်။

နိုဝင်ဘာလ ၅ ရက်နေ့ နောက်ပိုင်း၌ တကြိမ်နှင့် ဒီဇင်ဘာလ ခန့်တွင် တကြိမ် နိုင်ငံရေး ဆွေးနွေးပွဲအသွင် အလွတ်သဘော တွေ့ဆုံနိုင်ရန် သမ္မတရုံးဝန်ကြီး ဦးအောင်မင်း က ကမ်းလှမ်းထားကြောင်း ငြိမ်းချမ်းရေး အကျိုးဆောင် ဦးညိုအုန်းမြင့် က ပြောသည်။

“ပထမ အောက်တိုဘာ ၂၁ တွေ့နိုင်ဖို့ ကျနော်တို့ အရင်ချိန်းကြတယ် အဆင်မပြေဘူး။ နောက်တော့ အောက်တိုဘာ ၂၈ နောက်ပိုင်းနဲ့ နိုဝင်ဘာ ၁ လောက်ကြား တွေ့နိုင်ဖို့ ထပ်စီစဉ်တယ်။ ဒါလည်း အဆင်မပြေသေးလို့ အခုနောက်ဆုံး ကျနော် သိရထားသလောက်ကတော့ ဦးအောင်မင်း က နိုဝင်ဘာလ ၁ ရက်ကနေ ၄ ရက်နေ့ အထိက နိုင်ငံခြား ဧည့်သည်တွေနဲ့ ရှိတယ်ဆိုတော့ အဲဒီနောက်ပိုင်းမှ တွေ့ဖြစ်နိုင်မယ်။ ဒီကိစ္စကိုလည်း UNFC အတွင်းရေးမှူး နိုင်ဟံသာ ထံ ကျနော် အကြောင်း ပြန်ထားပါတယ်” ဟု ဦးညိုအုန်းမြင့် က မဇ္ဈိမကို ပြောသည်။

၂ဝ၁၁ နှစ်ကုန်ပိုင်း၌ UNFC နှင့် ဦးအောင်မင်းတို့ အလွတ်သဘော တကြိမ် တွေ့ဆုံခဲ့ကြပြီး ဖြစ်၍ ယခုစီစဉ်ထားသည့် တွေ့ဆုံပွဲ သည် ဒုတိယမြောက် အလွတ်သဘော ထပ်မံ တွေ့ဆုံကြခြင်း ဖြစ်မည်။

အဓိကအားဖြင့် နိုင်ငံတော် သမ္မတ၏ All Inclusive Discussing ဆိုသည့် အားလုံး ပါဝင်သည့် ငြိမ်းချမ်းရေး တွေ့ဆုံမှု
ပြုလုပ်ရန် ညွှန်ကြားထားမှုပေါ် အခြေခံ၍ တွေ့ဆုံခြင်း ဖြစ်ကြောင်း ဦးညိုအုန်းမြင့် က ပြောသည်။

ထိုတွေ့ဆုံပွဲသို့ တက်ရောက်ကြမည့် ကိုယ်စားလှယ်များမှာလည်း UNFC အပေါ်၌သာ မူတည်ပြီး အပစ်အခတ် မရပ်စဲရသေး သော်ငြားလည်း ကချင်လွတ်လပ်ရေးအဖွဲ့ KIO ကိုယ်စားလှယ်များ တက်ရောက်လိုသည့် ဆန္ဒ ရှိပါက တက်ရောက်နိုင်သည်ဟု ဆိုသည်။

“UNFC ရဲ့ ဥက္ကဋ္ဌ လည်းဖြစ်၊ KIO ရဲ့ ဒု-ဥက္ကဋ္ဌလည်း ဖြစ်တဲ့ ဗိုလ်ချုပ် အင်ဘန်လ တို့လို ကိုယ်စားလှယ်တွေ တက်နိုင် ရင် ပိုကောင်းပါတယ်။ အခုလက်ရှိ ကချင်မှာ ဖြစ်နေတဲ့ ပြဿနာ ဖြေရှင်းနိုင်ဖို့ နည်းလမ်းတွေ ရှာကြဖို့နဲ့ နှစ်ဖက် ယုံကြည်မှု တည်ဆောက်ဖို့ အတွက်ကို အခြေအနေ တခုအထိကို ဆွေးနွေးနိုင်လိမ့်မယ်လို့ ကျနော် ထင်ပါတယ်” ဟု ဦးညိုအုန်းမြင့် က ဆိုသည်။

သို့သော်လည်း တွေ့ဆုံပွဲတွင် မည်သည့် လုပ်ငန်းစဉ်များ၊ အကြောင်းအရာများကို ဆွေးနွေးကြနိုင်မည်နှင့် ပတ်သက် ၍ နှစ်ဖက် အကြား အသေးစိတ် အစီအစဉ်များကို ချမှတ်ထားခြင်း မရှိသေးကြောင်း UNFC အထွေထွေ အတွင်းရေးမှူး နိုင်ဟံသာ က ပြောသည်။

“တွေ့ဆုံမယ် ဆိုတဲ့နေရာမှာ ဘယ်လို အချက်တွေ၊ အကြောင်း အရာတွေ ဆွေးနွေး ကြမလဲ ဆိုတာတော့ ကျနော် မပြော နိုင်သေးဘူး။ သိလည်း မသိရ သေးဘူး။ ဒီတွေ့ဆုံပွဲက အလွတ်သဘောလို့တော့ ပြောလို့ရတယ်။ ဆွေးနွေးတဲ့ အကြောင်းအရာ တွေကတော့ ပထမတကြိမ် အလွတ်သဘော တွေ့ကြပြီးမှ ဒီဇင်ဘာလလောက် ဒုတိယ အကြိမ် ပြန်တွေ့ကြရာမှာ ဘာတွေ ဆွေးနွေးကြမယ်ဆိုတာ ပြောနိုင်ပါမယ်” ဟု မဇ္ဈိမကို ပြောသည်။

လတ်တလော ဖြစ်နေသည့် ကချင်ပြည်နယ်တွင်း ထိုးစစ်များမှာ အစိုးရအဖွဲ့မှ စစ်တပ်အပေါ် အာဏာသက်ရောက်မှု နည်းနေ သည်ကို ပြသနေကြာင်း UNFC မှ သုံးသပ်ထားသည်။ နှစ်ဖက် တရားဝင် တွေ့ဆုံ ဆွေးနွေးမှု ဖြစ်မြောက်နိုင် ရေးအတွက်မူ လတ်တလော အနေအထားအရ အလားအလာ မမြင်သေးကြောင်း နိုင်ဟံသာ က သုံးသပ်ပြောဆို သွားသည်။

ကချင်ပြည်နယ် အတွင်း ထိုးစစ်များကို ဇွန်လ ၁ဝ ရက်နေ့အထိ အစိုးရဘက်မှ မရပ်ဆိုင်း ပါက အဖွဲ့ဝင် အဖွဲ့အစည်း များဖြင့် ရရှိထားသော အပစ်အခတ် ရပ်စဲရေး သဘောတူညီ မှုများကို ပြန်လည် သုံးသပ်သွားရမည်ဟု UNFC မှမေလ ၁ဝ ရက်နေ့က ကြေညာချက် ထုတ်ပြန်ခဲ့ဖူးသော်လည်း ထိထိရောက်ရောက် သုံးသပ်နိုင်ခြင်း မရှိခဲ့ပေ။

ထိုင်းနိုင်ငံတွင် နေထိုင်သည့် ဦးညိုအုန်းမြင့် အနေနှင့် UNFC နှင့် တွေ့ဆုံဆွေးနွေးနိုင်ရေး အစီအစဉ် အပါအဝင် ထားဝယ် ရေနက်ဆိပ်ကမ်းကိစ္စ၊ တိုင်းရင်းသားဒေသ ပြန်လည်ထူထောင်ရေးကိစ္စများနှင့် ပတ်သက်၍ ဆွေးနွေးမှုများ ပြုလုပ်နိုင်ရန် အတွက် အင်္ဂါနေ့၌ မြန်မာနိုင်ငံသို့ သွားရောက်ရန်ရှိသည်ဟု သိရှိရသည်။

Ref: မဇ္ဈိမ