ရွှေဝါရောင်တော်လှန်ရေး တိမ်းရှောင်လာသူများကို အထူးအစီအစဉ် အဖြစ် အမေရိကန်က ခေါ်မည်

NEJ / ၁ ဇွန် ၂၀၀၉

ရွှေဝါရောင်တော်လှန်ရေးတွင် ပါဝင်ခဲ့ပြီးနောက် ထိုင်း-မြန်မာနယ်စပ်သို့ တိမ်းရှောင် လာခဲ့ကြ သူများထဲမှ (၁၀၁) ဦးကို အမေရိကန် သံရုံးမှ အထူးအစီအစဉ် တရပ်အဖြစ် အမေရိကန်နိုင်ငံသို့ အမြန်ဆုံး ပို့ဆောင်ပေးမည်ဟု သံရုံး တာဝန်ခံတဦးက ပြောသည်။

တတိယနိုင်ငံသို့ ထွက်ခွာရန် ထိုင်း-မြန်မာနယ်စပ်တွင် ရောက်ရှိပြီးသူများ ထဲမှ ကျန်ရှိသူ (၁၀၁) ဦးကို ယနေ့ နေ့လယ်က မဲဆောက်မြို့ရှိ ၀ပ်ဘိုးလဖား ဘုန်းတော်ကြီး ကျောင်းတွင် ထိုင်းနိုင်ငံဆိုင်ရာ အမေရိကန်သံရုံး၊ IOM၊ UNHCR၊ JRS နှင့် ထိုင်းပြည်ထဲရေး ဌာနမှ တာဝန်ရှိသူအချို့ လာရောက် တွေ့ဆုံခဲ့ပြီး အမေရိကန်သံရုံးမှ တာဝန်ခံ အရာရှိက ၎င်းတို့အား အမေရိကန်နိုင်ငံသို့ အမြန်ဆုံး ပို့ဆောင်ပေးမည်ဟု ပြောသည်။

၎င်းအရာရှိက “ခင်ဗျားတို့ကို အထူးအစီအစဉ်တရပ်အနေနဲ့ အမေရိကန်နိုင်ငံက လက်ခံပြီး အမြန်ဆုံး ပို့ဆောင်ပေး မှာ ဖြစ်တယ်။ ဒါကြောင့် အခုသွားရမယ့်လူတွေအနေနဲ့ မဲဆောက်မှာ ဆန္ဒပြပွဲတွေမလုပ်ဖို့ ပြောချင်တယ်။ ဆန္ဒပြပွဲ တွေမှာ ပါဝင်မယ် ဆိုရင်တော့ အခုရရှိမယ့် အခွင့်အရေးတွေ ပယ်ဖျက်ခံရမယ်။ ခင်ဗျားတို့ ကို ဆန္ဒပြဖို့၊ မပြဖို့တော့ မပြောလိုပါဘူး” ဟု ပြောသည်။

အမေရိကန်သို့ ထွက်ခွာခွင့်ရရှိသူများထဲမှ ဆရာဝန်တဦးက သံရုံးတာဝန်ခံအား “အခုလူတွေ အကုန်လုံးသွား ရမှာလား၊ မသွားရမယ့် လူတွေကော ရှိနိုင်ပါသလား” ဟု မေးမြန်းရာ သံရုံးတာဝန်ခံက အကုန်သွားရမည်ဟု ပြန်လည် ဖြေကြားခဲ့သည်။ ဒုက္ခသည် စခန်းသို့ ၀င်ရောက်ရမည့် ကိစ္စနှင့် ပတ်သက်၍ မ၀င်ရောက်လိုသူများအနေဖြင့် ယခုအစီ အစဉ်မှ ပယ်ဖျက်ခြင်း ခံရမည်ဟု သံရုံးတာဝန်ခံက ပြောသည်။

အဆိုပါ (၁၀၁) ဦးမှာ ယခုအပတ်အတွင်း မဲဆောက်မြို့ရှိ ဒုက္ခသည်များအတွက် အဆင့်ဆင့် လုပ်ဆောင်ခြင်း ဌာနတွင် သွားရောက် နေထိုင်ရမည်ဖြစ်ပြီး ၎င်းဌာနမှတဆင့် မယ်လဒုက္ခသည်စခန်းသို့ ပြောင်းရွှေ့ နေထိုင်ရမည် ဖြစ်သည်။ ၎င်းတို့သည် မယ်လ ဒုက္ခသည်စခန်းမှ တဆင့် ဇူလိုင်လ (၁၀) ရက်နေ့ မတိုင်ခင် အမေရိကန်နိုင်ငံသို့ ထွက်ခွာရမည်ဖြစ်သည်ဟု UNHCR မှ ပေးသည့် ကြေညာချက်တွင် ဖော်ပြထားသည်။

မယ်လဒုက္ခသည်စခန်းတွင် သွားရောက်နေထိုင်စဉ်ကာလအတွင်း ၎င်းတို့၏ စားဝတ်နေရေး ကိစ္စများကို ထိုင်းအစိုးရ မှ စီစဉ် ဆောင်ရွက်သွားမည်ဖြစ်သည်။

၂၀၀၇ စက်တင်ဘာ ရွှေဝါရောင်တော်လှန်ရေးတွင် ပါဝင်ခဲ့ပြီး နအဖ၏ လိုက်လံ နှိမ်နှင်းမှုကြောင့် လူ (၂၀၀) ခန့် ထိုင်း-မြန်မာနယ်စပ်သို့ ထွက်ပြေး ရောက်ရှိလာပြီး သံဃာတော် အပါး (၃၀) နှင့် ကဗျာဆရာ အောင်ဝေး အပါအ၀င် လူ (၈၀) ခန့်မှာ တတိယ နိုင်ငံများသို့ ရောက်ရှိသွားပြီး ယခုထွက်ခွာရမည့် (၁၀၁) ဦးမှာ အထူး အစီအစဉ်အဖြစ် အမေရိကန်သို့ ထွက်ခွာရမည်ဖြစ်သည်။

Ref: ခေတ်ပြိုင်