မင်းဆွေ (ပေါက်)
January 6, 2010
( ၆၂ - နှစ်မြောက် လွတ်လပ်ရေးနေ့ ဂါရ၀ပြု ဆောင်းပါး )
ဒီကနေ့ဟာ ၂၀၀၉ခုနှစ်ရဲ့ နောက်ဆုံးရက် ဖြစ်ပါတယ်။ နှစ်ဟောင်းတခု ကုန်ဆုံးလို့ နှစ်သစ်တခုကို ကူးပြောင်း ၀င်ရောက်ကာနီး အခါသမယဆို လူတိုင်းလူတိုင်း ရင်ထဲမှာ တမျိုးတမည် ဝေဒနာတမျိုး ခံစားကြရ မယ်လို့ ထင်ပါတယ်။ ခံစားကြရတဲ့ ပုံစံချင်းတော့ တူညီကြမှာ မဟုတ်ပါဘူး။ များသောအားဖြင့်တော့ နှစ်ဟောင်းရဲ့ နောက်ဆုံးအချိန်၊ နှစ်သစ်သို့ ကူးပြောင်းဝင်ရောက်မယ့် အချိန်ဖြစ်တဲ့ ည(၁၂)နာရီ တိတိကို စောင့်ပြီး အော်ဟစ်နှုတ်ဆက် ဆုတောင်းကြပါတယ်။ ကောင်းမွန်ပြီး အေးချမ်းပျော်ရွှင်တဲ့ နှစ်သစ် ဖြစ်ပါ စေလို့ ကောင်းချီးသြဘာပေး ချီးမြှောက်ကြလေ့ ရှိပါတယ်။
ကျနော်တို့အဖို့တော့ ဒီနှစ်သစ်ဟာ အောင်စည်အောင်မောင်းနဲ့ တိုက်ပွဲဝင်စည်တော်ရွှမ်းပြီး လွတ်မြောက် ရေးတိုက်ပွဲဆီကို ခြေလှမ်းပြင် ထွက်ခွာသွားကြတော့မယ့် ရဲသွေးဇာနည် သူရဲကောင်းများ တဖန် ပေါ်ထွန်း မွေးဖွားလာမယ့် နှစ်သစ်ဦး၊ အိုးဝေ အိုးဝေ အိုးဝေလို့ ဥဒါန်းကျူးမယ့် ခွပ်ဒေါင်းကြီး တဟုန်ထိုး ထိုးဖေါက် ပျံသန်းမယ့် နှစ်သစ်ဦး၊ ၈၈မှာ အသက်ပေးဆက် ကျဆုံးသွားတဲ့ အာဇာနည်သူရဲကောင်း အထောင် အသောင်းအတွက် သွေးသစ္စာ မော်ကွန်းထိုး ကဗျည်းမှတ်ကျောက် တင်ရမယ့်နှစ်သစ် ဖြစ်ပါတယ်။
ခံနိုင်ရည် ဇွဲနဘဲကြီးစွာ ကိုယ်ခံအားကောင်း စိတ်မာန်ခွန်အားအပြည့်နဲ့ တပ်ဦးအလံကိုင် ရှေ့ဆောင်ပါတီ ဖြစ်တဲ့ အမျိုးသားဒီမိုကရေစီအဖွဲ့ချုပ် အောင်လံတော်နဲ့အတူ အရှေ့နေ၀န်းနီမှာ ပေါ်ထွက်လာမယ့် ရောင်ခြည်တန်းဆီ အားကုန် ရုန်းကြွ မောင်းထွက်မယ့် မြင်းကောင်းခုနှစ်ကောင် ကကြိုးစီတဲ့ မြင်းရထားလိုမျိုး ထောင်းထောင်းထ သောင်းသောင်းဖျ ချီတက်လိုက်ပါ ၀န်းရံကြရမယ့် အခါသမယနဲ့အညီ အထူးအခြား ဖြစ် ပေါ်ပြောင်းလဲမယ့် တိုက်ပွဲဝင်နှစ်သစ် ဖြစ်ပါတယ်။
ရှစ်လေးလုံးစိတ်ဓါတ် အပြည့်နဲ့ တဗိုလ်ကျ တဗိုလ်တက်စနစ်ကို ဆုပ်ကိုင်တက်လှမ်းသွားပြီး အောင်ပွဲရယူ မယ့်နှစ်သစ် ဖြစ်ပါလိမ့်မယ်။ ဓမ္မနဲ့ အဓမ္မ အားချင်းပြိုင် စီးချင်းထိုးမယ့် ၂၀၀၈ ဖျက်သိမ်းရေး၊ ၂၀၁၀ ရွေးကောက်ပွဲ ဆန့်ကျင်ရေး တိုက်ပွဲဝင် နီစွေးမယ့် တော်လှန်နှစ်သစ်ပါ။
ကျနော်တို့နဲ့အတူ တော်လှန်တိုက်ပွဲ ခရီးစဉ်တိုင်းမှာ ရှေ့ဆုံးတန်းက ပါဝင်မြဲဖြစ်တဲ့ လူမျိုးစုံပြည်သူလူထု တရပ်လုံးလည်း ခိုင်မြဲလက်တွဲ ညီညာစွာနဲ့ တိုက်ပွဲသံတွေဆီ မမှိန်မသုံ လိုက်ပါလာနေပြီဆိုတာကိုလည်း အကြွင်းမဲ့ ယုံကြည်မိနေပါတယ်။ အခိုင်အမာကို ယုံကြည်မိနေတာ။ ဒါဆို အောင်ပွဲဟာ ကျနော်တို့ လက်ထဲ မှာ ရောက်ရှိနေပြီပေါ့။ ဘာကြောင့်ဆို ပြည်သူလူထုတရပ်လုံးရဲ့ ထောက်ခံပါဝင်မှုရှိရင် တော်လှန်ရေးတရပ် ဟာ အောင်ပွဲခံရစမြဲဆိုတာ ကျနော် နားလည်သဘောပေါက်ထားလို့ ဖြစ်ပါတယ်။ သေချာတယ်၊ ဒီနှစ် ၂၀၁၀ဟာ ကျနော်တို့ အနိုင်ရမယ့်နှစ်၊ အောင်ပွဲခံမယ့် နှစ်သစ်။
ကျနော်တို့ရဲ့ ကနေ့ခေတ် အာဇာနည်သူရဲကောင်းတွေ ဖြစ်ကြတဲ့ ဗမာနိုင်ငံလုံးဆိုင်ရာ ကျောင်းသားသမဂ္ဂ များအဖွဲ့ချုပ်(ဗကသ)ရဲ့ ရဲရဲတောက် ခေါင်းဆောင်တွေဖြစ်တဲ့ ရဲဘော်မင်းကိုနိုင်၊ ရဲဘော် ကိုကိုကြီး၊ ရဲဘော် မြအေး၊ ရဲဘော်ဌေးကြွယ်၊ ရဲဘော်ဂျင်မီနဲ့ အစရှိတဲ့ ကျန်ကျောင်းသားခေါင်းဆောင်များကလည်း မြန်မာ ပြည်ရဲ့ အော့စ်ဝပ် ငရဲခန်း အကျဉ်းထောင်အသီးသီးမှာ စစ်အာဏာရှင်စနစ်အောက်က မြန်မာပြည်သူတရပ် လုံး လွတ်မြောက်ရေးအတွက် အနိုင်မခံ အရှုံးမပေး စိတ်ဓါတ်ကိုင်စွဲပြီး ကြံ့ကြံ့ခံ ကိုယ်ကျိုးစွန့် အနစ်နာခံ အသက်ပေးဆပ်နေကြလေရဲ့။
၁၉၃၇ခုနှစ်လောက်ဆီက ဗကသရဲ့ ဥက္ကဌဖြစ်တဲ့ သခင်အောင်ဆန်းကလည်း ----
တော်လှန်ရေးဆိုတာ လူထုကံကြမ္မာကို ဖန်တီးရာမှာ လူထုကိုယ်တိုင်ပါဝင်ပြီး ဘယ်လိုဖြစ်ဖြစ် ဆောင်ရွက် တာကို ဆိုလိုတယ်။ တော်လှန်ရေးရဲ့ အခြေခံအချက်က လွတ်လပ်မှုကို လူထုကြီးက ပါဝင်ဆောင်ရွက်မှု၊ နိုးကြားမှုများနှင့် ပြောင်းလဲမှုများကို ဖြစ်စေတာကို တော်လှန်ရေး ခေါ်တယ်လို့ ပြောကြားခဲ့တာကို ပြန် ပြောင်း ကြားယောင်နေမိပါတယ်။
အလားတူ အမျိုးသမီး သူရဲကောင်းတွေဖြစ်တဲ့ ရဲဘော်နီလာသိန်း၊ ရဲဘော်မီးမီး၊ ရဲဘော်နီမိုလိုင်၊ ရဲဘော် စုစုနွေးအပါအ၀င် အခြားအမျိုးသမီး သူရဲကောင်းများကလည်း အနိုင်မခံ အရှုံးမပေး စိတ်ဓါတ်ကို ကိုင်ဆွဲပြီး မြန်မာပြည်ရဲ့ နရသိန် ငရဲခန်း အကျဉ်းထောင်အသီးသီးမှာ ကိုယ်ကျိုးစွန့် အနစ်နာခံ အသက်ပေးဆက် တော်လှန်ရေးအတွက် တိုက်ပွဲဝင်နေကြလေရဲ့။
ရှေ့ဆောင်လမ်းပြ မီးရှုးတန်ဆောင်တွေ ဖြစ်ကြတဲ့ အမေ လူထုဒေါ်အမာ၊ အမေ ဒေါ်ကြည်ကြည် တို့က တဆင့် လူထုခေါင်းဆောင် ဒေါ်အောင်ဆန်းစုကြည်အဆုံး လွတ်မြောက်ရေးလမ်းဆီ ထိုးထွင်းခဲ့တဲ့နောက် အမျိုးကောင်း သမီးရတနာ သူရဲကောင်းတွေဟာ အမျိုးမျိုးသော အခက်အခဲ အဟန့်အတား အကာအဆီး တွေကို မကြောက်တရားနဲ့ အာခံဆန့်ကျင် ကျော်ဖြတ်ရင်း အရှေ့ဆီကို ရဲရဲတိုးထွက် ဆက်လက်ချီတက် ခရီးပြင်းနှင် နေကြလေရဲ့။
ဒီနေရာမှာ မြန်မာနိုင်ငံရဲ့ အမျိုးသားအင်အားစုတွေကို အစောဆုံး နိုင်ငံရေးမျက်စိဖွင့်ပေးခဲ့သူများအနက် ရှေ့ဆုံးတန်းက ပါဝင်ခဲ့တဲ့ ရဲရဲတောက် သံဃာ့အာဇာနည် သူရဲကောင်း ရခိုင်အမျိုးသား ဆရာတော် အသျှင် ဦးဥတ္တမရဲ့ အောက်ပါ သြ၀ါဒ မိန့်ခွန်းကို ကောက်နှုတ်ကိုးကား ဖော်ပြချင်ပါတယ်။
“ဘယ်လိုအင်အားကြီးပြီး ရက်စက်ကြမ်းကြုတ်တဲ့ အစိုးရဖြစ်ဖြစ် တိုင်းရင်းသားအပေါင်း စည်းလုံးညီညာစွာ နဲ့ တွန်းလှန် နိုင်ကြရင် တာရှည် ခံနိုင်မယ် မဟုတ်ပါဘူး၊ ကိုယ့်ရည်မှန်းချက် အောင်စေချင်ရင် နောက်မတွန့် ကြနဲ့။ ကြောက်အားမပိုကြနဲ့၊ ဒုက္ခကို ပဓာနမထားကြနဲ့၊ ဟုမ္မရူးတို့ လွတ်လပ်ရေးတို့ဆိုတာ ကျုပ်တို့ရထိုက် တဲ့ ကမ္ဘာ့အမွေအနှစ်ကြီးများဖြစ်တယ်။ စစ်ဗျူရိုကရက်အာဏာရှင် လူသတ်ဝါဒီတွေက ဘယ်လောက်ပဲ နှောင့်ယှက်နှောင့်ယှက် တကယ်ရအောင် လုပ်နိုင်တဲ့ သဘောမှန်ဟာ တိုင်းသူပြည်သားတို့ လက်ထဲမှာသာရှိတယ်”
ဒီမိန့်မှာချက်အတိုင်း ကနေ့ မျိုးဆက်သစ် ကျောင်းသားလူငယ်အများက ရက်စက်ကြမ်းကြုတ် ယုတ်မာ ပက်စက်လွန်းတဲ့ စစ်အာဏာရှင်စနစ်ကို မြန်မာ့မြေပေါ်က အပြီးတိုင်မောင်းထုတ်ပစ်ဖို့၊ ဒုတိယ လွတ်လပ် ရေးကို မရအရယူဖို့ သက်စွန့်ပေးဆက် လက်ဆင့်ကမ်း ရဲရဲတောက် ချီတက်နေကြတာဟာ အင်မတန်မှ ဂုဏ်ယူနှစ်လိုဖွယ် ကောင်းလှပါတယ်။ အတုယူဖွယ်လည်း ဖြစ်ပါတယ်။ ခေတ်စနစ်ရဲ့ သမိုင်းတာဝန်ကို ထမ်းဆောင်နေကြတာ ဖြစ်သလို ဒီလိုသမိုင်းတာဝန်ဟာ ငါတို့အားလုံးအပေါ်မှာ ကျရောက်နေတယ် ဆိုတာ ကို နားလည်သိရှိတတ်ခြင်းကိုက အင်မတန် အတုယူအားကျစရာ ဖြစ်ပါတယ်။ ဂုဏ်ယူဝင့်ကြွားစရာ ကောင်းလှပါတယ်။
တပ်မတော်ကို ဦးစီးတည်ထောင်ခဲ့သူ တပ်မတော်ဖခင်ကြီး ဗိုလ်ချုပ်အောင်ဆန်းကလည်း တပ်မတော်ဟာ ပြည်သူတွေရဲ့ စိတ်ထဲမှာ အော့နှလုံးနာစရာ ဖြစ်နေမယ်ဆိုရင် ဒီတပ်မတော်ကို တည်ထောင်ရတဲ့ ရည်ရွယ် ချက်ဟာ အလကားပဲ။ စစ်သားမဟုတ်ပေမဲ့လည်း နိုင်ငံအတွက် အမျိုးမျိုး အနစ်နာခံ ကြိုးပမ်းခဲ့သူတွေ ရှိ တယ်။ ဒါကြောင့် စစ်သားမှ စစ်သားဆိုတဲ့ စိတ်ကို ဖျောက်ရမယ်လို့ မိန့်ကြားခဲ့ဘူးပါတယ်။
မကြာသေးခင် ရက်ပိုင်းလေးအတွင်းက ဖြစ်ပွားခဲ့တဲ့ နအဖစစ်တပ် တပ်မ(၆၆)နဲ့ တပ်မ(၇၇)တို့က တပ်မတော်သားတွေ စားဝတ်နေရေး အဆင်မပြေတာကို သည်းမခံနိုင်ကြတော့လို့ အစုအပြုံလိုက် ထွက် ပြေးကြတယ်ဆိုတဲ့ သတင်းလည်း ဘီဘီစီ လေလှိုင်းကနေ လွှင့်ထုတ်ပြောကြားသွားတာ ကြားလိုက်ကြ မယ် ထင်ပါတယ်။ အဲဒီလို အဖြစ်အပျက်တွေရဲ့ မူလအရင်းခံကတော့ စစ်အာဏာရှင်စနစ်ကြောင့် ဖြစ်သလို ဒီစနစ်ဆိုးကြောင့် ပျက်သုဉ်းနေခဲ့ရတာ ကြာပြီဖြစ်တဲ့ တပ်မတော်သား အခွင့်အရေး ပျောက်ကွယ်ဆုံးရှုံးနေ လို့ ဖြစ်ပါတယ်။
ဒါကြောင့် တပ်မတော်သား ရဲဘော်တွေ စိုးရိမ်ပူပန်နေကြသလိုမျိုး ထောင်ချခံရမှာ၊ ပစ်ခတ်သတ်ဖြတ်ခံရ မှာ၊ နှိပ်စက်ညှင်းပမ်းခံရမှာ၊ မိသားစုထမင်းငတ်မှာ စတဲ့ဟာတွေကို လူမျိုးစုံပြည်သူလူထုတရပ်လုံးက သိသိကြီးနဲ့ ဘာဖြစ်လို့ အသက်စွန့်၊ ထောင်ကျခံပြီး မဆုတ်မနစ် ဒီစစ်အာဏာရှင်စနစ်ကို တော်လှန်တိုက်ပွဲ ၀င်နေကြတာလဲဆိုရင် ငါတို့က ဘ၀တခု၊ အသက်တချောင်းပဲ ဆုံးရှုံးရမှာ လွတ်မြောက်ခဲ့ရင် (၅၈)သန်း ကျော် ပြည်သူတွေ လူသားအဖြစ် အမှန်တကယ် ခံစားစံစားရမှာဆိုတဲ့ အနာဂတ်အပေါ် ယုံကြည်မှုကြောင့် ဖြစ်ပါတယ်။
တသွေး၊ တသံ၊ တမိန့်ဆိုတဲ့ အကြွင်းမဲ့ သစ္စာခံရေး အတွေးအခေါ်ကြီးကို ကျနော်တို့ရဲ့ သွေးသားရင်းချာ ပြည်သူ့ရင်သွေး တပ်မတော်သားတွေက ရဲဝံ့ပြတ်သား စွန့်လွှတ်ကြမယ်ဆိုရင် ကျနော်တို့ ညီအကို တပ်မတော်သားတွေဟာလည်း တပ်မတော်ဖခင်ကြီး ဗိုလ်ချုပ်အောင်ဆန်း လိုလားတောင့်တခဲ့တဲ့ ပြည်သူ့ အမှုထမ်း တပ်မတော်စစ်စစ်အဖြစ် ပြန်လည်ရောက်ရှိသွားမှာ ဖြစ်ပါတယ်။ အစဉ်အလာ ကြီးမားတဲ့ တပ်မတော်အဖြစ်၊ ပြည်သူချစ်တဲ့ တပ်မတော်အဖြစ် ဂုဏ်သိက္ခာ ပြန်လည်တက်လာမှာ ဖြစ်ပါတယ်။
ဒီလို ဗိုလ်ချုပ်အောင်ဆန်း လိုလားတောင့်တခဲ့တဲ့ တပ်မတော်မျိုး ပြန်ပေါ်ပေါက်လာစေတာဟာ တိုင်းပြည် လွတ်လပ်ရေးကြိုးပမ်းမှုမှာ ကျဆုံးသွားရတဲ့ အာဇာနည်ခေါင်းဆောင်ကြီး(၉)ဦးရဲ့ ဂုဏ်ကျေးဇူးကို သစ္စာ စောင့်သိထိန်းသိမ်းရာ ရောက်သလို စစ်အာဏာရှင်စနစ်ကို အပြီးတိုင်နိဂုံးချုပ်စေပြီး မြန်မာပြည်ကို စစ်မှန် တဲ့ ဒီမိုကရေစီနိုင်ငံတော်သစ်အဖြစ် မွေးဖွားပေးရာလည်း ရောက်မှာပါ။ လူမျိုးစုံပြည်သူတရပ်လုံးရဲ့ အလို လားဆုံးဆန္ဒတွေကို ဖြည့်ဆည်းပေးရာလည်း ရောက်ပါတယ်။
အချုပ်အားဖြင့်တော့ တကယ့် လွတ်လပ်ရေး အစစ်ကို ရရှိခံစားနိုင်ကြဖို့ အောင်ဆန်း လမ်းစဉ်အတိုင်း ကျနော်တို့ တပ်မတော်သားတွေဟာ လူထုနဲ့ ပူးပေါင်းကြပြီး တပ်မတော်ကို မိမိတို့လက်တဆုပ်စာ လူတစုအကျိုး စီးပွားအတွက် ခုတုံးလုပ်အသုံးချနေတဲ့ နအဖစစ်အာဏာရှင်စနစ်ကို မြန်မာ့မြေပေါ်က အပြီးတိုင် မောင်း ထုတ်သုတ်သင်ပစ်ပါမယ်လို့ ဇန်န၀ါရီလ(၄)ရက်နေ့မှာ ကျရောက်တဲ့ (၆၂)နှစ်မြောက် လွတ်လပ်ရေးနေ့ အထိမ်းအမှတ် အခါသမယကို ကြိုဆိုဂုဏ်ပြုရင်း ၀န်ခံကတိပြု ဦးညွတ်ဂါဝရပြု လိုက်ကြောင်းပါ။
မင်းဆွေ (ပေါက်)
၂၀၁၀ခုနှစ် ဇန်န၀ါရီလ(၃)ရက်။
Posts
0 comments:
Post a Comment