အီဂျစ်နည်းတူ မြန်မာပြည်လည်း ပြောင်းလဲမည်ဟု ဂျွန်မက်ကိန်း မျှော်လင့်

2011-02-14

အီဂျစ်နိုင်ငံမှာ သမတမူဘာရက် နုတ်ထွက် အပြီး အီဂျစ် ပြည်သူတွေ လွတ်လပ်ခွင့် ရသလိုမျိုး မြန်မာ နိုင်ငံမှာလည်း ရလာ လိမ့်မယ်လို့ မျှော်လင့်ကြောင်း အမေရိကန် အထက်လွှတ်တော် အမတ် ဂျွန်မက်ကိန်းက ဖေဖော်ဝါရီ ၁၃ ရက် တနင်္ဂနွေနေ့က ပြောကြား လိုက်ပါတယ်။

အာဏာရှင်သမတ မူဘာရက် ရာထူးက နုတ်ထွက် ခဲ့ရတဲ့ အီဂျစ် နိုင်ငံရေးနဲ့ ပတ်သက်ပြီးံ အမေရိကန် သတင်း မီဒီယာတွေနဲ့ တွေ့ဆုံ မေးမြန်းခန်း အပြီး RFA က မေးမြန်းရာမှာ မစ္စတာ မက်ကိန်းက အဲဒီလို ပြောကြား လိုက်တာ ဖြစ်ပါတယ်။

အီဂျစ်နိုင်ငံ ပြည်သူတွေက ပြလိုက်တဲ့ သတင်းစကားဟာ ဖိနှိပ်အုပ်ချုပ်နေတဲ့ အာဏာရှင် မြန်မာ ခေါင်းဆောင်တွေ ဆီလည်း ရောက်ရှိ သွားလိမ့်မယ်လို့ မျှော်လင့်ကြောင်း၊ တူနီးရှား နိုင်ငံက စတင်လိုက်တဲ့ ဒီမိုကရေစီ အရေးတော်ပုံဟာ အီဂျစ်နဲ့ တခြား အရှေ့အလယ်ပိုင်း နိုင်ငံတွေဆီ ပျံ့နှံ့ နေသလို တကမ္ဘာလုံးကို ပျံ့နှံ့ သွားမယ်လို့ ယုံကြည် မျှော်လင့်ကြောင်း၊ အဲဒီကနေ မြန်မာ ပြည်သူတွေ အနေနဲ့ နှစ်ပေါင်းများစွာ ခံစားခွင့် မရခဲ့တဲ့ လူ့အခွင့်အရေးနဲ့ လွတ်လပ်ခွင့်တွေ ပြန်လည် ရရှိမယ်လို့ မျှော်လင့်ကြောင်း မစ္စတာ မက်ကိန်းက ပြောဆို သွားခဲ့ပါတယ်။

ဒေါ်အောင်ဆန်းစုကြည်နဲ့ ပတ်သက်လို့ ပြောကြားရာမှာ မစ္စတာ မက်ကိန်းက ဒေါ်အောင်ဆန်း စုကြည်ဟာ မိမိတို့ ခေတ်မှာ ပေါ်ပေါက် လာတဲ့ သူရဲကောင်းတဦး ဖြစ်ကြောင်း၊ သူ့အနေနဲ့ ဒေါ်အောင်ဆန်းစုကြည်နဲ့ တကြိမ် တွေ့ဆုံ ခဲ့ဖူးပြီး နောက်ထပ် ဆုံတွေ့ နိုင်ဖို့လည်း မျှော်လင့်ကြောင်း ပြောကြား သွားပါတယ်။

၂၀၀၈ ခုနှစ် ရီပါဘလီကင်ပါတီ သမတလောင်း ဖြစ်ခဲ့သူ အရီဇိုးနားပြည်နယ် အထက် လွှတ်တော် အမတ် မစ္စတာ မက်ကိန်းဟာ မြန်မာ့ အရေးမှာ ရှေ့တန်းက ဆောင်ရွက်သူ အမေရိကန် ခေါင်းဆောင် တဦး ဖြစ်ပါတယ်။

Ref: RFA News