ကလေးငယ်များအား တစ်ရက်ထဲ ကာကွယ်ဆေး(၂)လုံးဆင့် မထိုးသင့်

ကြယ်စင်(မြစ်မခ)
7 Jun, 2012

တစ်နှစ်အောက်ကလေးငယ်များ ကာကွယ်ဆေးထိုးရာတွင် တစ်ရက်ထဲ၌ ကာကွယ်ဆေးနှစ်လုံးဆက် မထိုးသင့် ကြောင်း ကလေးအထူးကု ဆရာဝန်ကြီးတစ်ဦး က ဆိုသည်။

“တစ်ရက်တည်းမှာ ကာကွယ်ဆေး(၂)လုံး မထိုးသင့်ဘူး၊ တစ်နှစ်အောက်ဆိုတဲ့အရွယ်က ငယ်လွန်းတော့ ကာကွယ်ဆေးဒဏ်တွေကို မခံနိုင်ဘူး၊ ကာကွယ် ဆေး က တစ်လုံးထဲထိုးရင်တောင် အပူကြီးတယ်၊ တစ်ကြိမ်ထဲ နှစ်လုံး ထိုးမပေးသင့်ဘူး”ဟု ကလေးအထူးကု ဆရာဝန်ကြီး ဒေါက်တာအောင်ထွန်းဦးက ပြောသည်။


တစ်နှစ်အောက် ကလေးငယ်များကို လအပိုင်းအခြားအလိုက် ကာကွယ်ဆေးများထိုးရာတွင် တစ်ရက်ထဲတွင် ဆေးနှစ်မျိုးထိုးပေးပါက ကလေးအား ပိုမိုနာကျင်စေပြီး၊ ခံနိုင်ရေအား မရှိသေးချိန်တွင် အပူကြီးနိုင်ကြောင်းကိုလည်း သိရသည်။

‘သမီးလေး (၉)လပြည့်လို့ ၀က်သက်ကာကွယ်ဆေး သွားထိုးတာ၊ ဆေးရုံက ဆေးကုမ္ပဏီနဲ့ ချိတ်ထားပြီး အသည်းရောင် (ဘီ)ပိုးကာကွယ်ဆေး ပါရတယ် ဆိုလို့ ထိုးခဲ့တာ။ သမီးက နောက်နေ့ကျတော့ ကိုယ်အရမ်း ပူလာတယ်။ အရင် ကာကွယ်ဆေးတွေ သွားထိုးတုန်းကတော့ ပြန်လာရင် ကိုယ်နည်းနည်း ပူ တယ်။ အပြင်း အထန်တော့ မဟုတ်ဘူး။ ဘိုင်အိုဂျတ်ဆစ်အရည်တိုက်ရင် ပျောက်သွားတယ်။ အခုက ကိုယ်ပူပြင်းတယ်။ ဆေးတိုက်လည်း မကျဘူးဆို တော့ စိုးရိမ်သွားပြီး ဆရာဝန်သွားပြတာ တစ်ကြိမ်ထဲ ကာကွယ်ဆေး(၂)လုံး မထိုးသင့်ဘူးလို့ ဆရာက ပြောတယ်”ဟု ကမာရွတ်မြို့နယ်မှ မိခင်တစ်ဦးဖြစ်သူ မမြင့်မြတ်က ပြောသည်။

ဗဟိုအမျိုးသမီးဆေးရုံကြီးတွင် မွေးဖွားသည့်ကလေးငယ်များအား နိုင်ငံတော်မှ ကာကွယ်ဆေးများအခမဲ့ ထိုးပေးလျက်ရှိကြောင်း သိရှိရသည်။

ကာကွယ်ဆေးထိုးရာတွင် မွေးစကလေးများအား ဘီစီဂျီကာကွယ်ဆေး (၁)ကြိမ်၊ ဆုံစို့ကြက်ညှာ၊ မေးခိုင် ကာကွယ်ဆေးအား (၃)ကြိမ်၊ ပိုလီယို ကာကွယ် ဆေး(၃)ကြိမ်၊ အသဲရောင်(ဘီ)ပိုးကာကွယ်ဆေး (၃)ကြိမ်နှင့် ၀က်သက်ကာကွယ်ဆေးအား ကလေး အသက်(၉)လတွင် (၁) ကြိမ် ထိုးပေးကာ ကလေး အသက် တစ်နှစ် အရွယ်ထိ ကာကွယ်ဆေးများအား ထိုးပေးလျက်ကြောင်း ဗဟိုအမျိုးသမီးဆေးရုံမှ ကျမ်းမာရေးဝန်ထမ်းတစ်ဦးက ဆိုသည်။

ထိုကဲ့သိှု့ဗဟိုအမျိုးသမီးဆေးရုံတွင် ကာကွယ်ဆေးထိုးနှံရာ၌ အသည်းရောင်(ဘီ)ပိုးကာကွယ် ဆေးထိုးနှံ နိုင်ရန်အတွက် ဆေးရုံအနေဖြင့် ဆေးကုမ္ပဏီ နှင့်ချိတ်ဆက် ဈေးနှုန်းသက်သာစွာဖြင့်ထိုးနိုင်ရန်အတွက် စီစဉ်ပေးထားကြောင်းကိုလည်း ကာကွယ်ဆေးထိုးခဲ့သော ကလေးငယ်တစ်ဦး၏ မိခင်ထံမှ သိရှိ ရသည်။

ဗဟိုအမျိုးသမီးဆေးရုံကြီးတွင် အသည်းရောင်(ဘီ)ကာကွယ်ဆေး တစ်လုံးလျင် ကျပ် (၃၇၀၀)နှုန်းဖြင့် ဖြင့်ထိုးနိုင်ကြောင်းနှင့် (ဘီ)ပိုး ရှိမရှိ စစ်ဆေးခြင်း ကိုလည်း ကျပ်(၇၀၀)ဖြင့် စစ်ဆေးနိုင်ကြောင်းကိုလည်း သိရှိရသည်။

ပြင်ပဆေးခန်းများ၌ အသည်းရောင်(ဘီ)ပိုးကာကွယ်ဆေးတစ်လုံးလျင် ကျပ်(၆၀၀၀)မှ (၁၀၀၀၀) ၀န်းကျင် အထိ ပေး ရကြောင်းကိုလည်း ဗဟိုအမျိုး သမီးဆေးရုံက မိခင်များက ဆိုသည်။

ဗဟိုအမျိုးသမီးဆေးရုံအနေဖြင့် ကလေးငယ်များ ဈေးနှုန်းချိုသာစွာဖြင့် အသည်းရောင်(ဘီ)ပိုးကာကွယ်ဆေး ထိုးနိုင်ရန်အတွက် Hepavax-Gene –TF ဆေးဝါးဖြန့်ချီသည့် ကုမ္ပဏီနှင့် ချိတ်ဆက်ထားခြင်းဖြစ်သည်။

Ref: မြစ်မခ