မြန်မာမှာ လူထုတော်လှန်ရေး ဖြစ်နိုင်မှာလား

ထွန်းထွန်း။ ။
အင်္ဂါနေ့၊ မတ်လ ၁၅ ရက် ၂၀၁၁ ။

နယူးဒေလီ (မဇ္ဈိမ) ။ ။ မြန်မာနိုင်ငံမှာ ၈၈၈၈ လူထု အုံကြွမှုမျိုး တဖန်ပြန်လည် ပေါ်ပေါက်နိုင်မှု ရှိ၊ မရှိနှင့် ပတ်သက်၍ အမျိုးသား ဒီမိုကရေစီအဖွဲ့ချုပ် NLD ၏ သြဇာကြီးသော ခေါင်းဆောင် တဦးဖြစ်သူ ဦးဝင်းတင်၊ အမျိုးသား ဒီမိုကရေစီအင်အားစု NDF ပါတီခေါင်းဆောင် ဦးခင်မောင်ဆွေနှင့် ထိုင်းအခြေစိုက် ဗဟုဖွံ့ဖြိုးမှု အဖွဲ့မှ ဦးအောင်သူငြိမ်း တို့ကို မဇ္ဈိမက မေးမြန်းထားသည်။

ဦးဝင်းတင်က မြန်မာနိုင်ငံတွင် ဖြစ်ပေါ်လျက်ရှိသည့် ဖိနှိပ်မှုများ၊ မတရား ခေါင်းပုံဖြတ်မှုများ အပြင် ပြည်သူလူထု ဆင်းရဲတွင်း နက်နေခြင်းများက လူထုအုံကြွမှု ဖြစ်ပေါ်စေမည့် အချက်များဟု သုံးသပ်သည်။ ထို့ပြင် အရှေ့အလယ်ပိုင်း နိုင်ငံများတွင် ဖြစ်ပေါ်နေသည့် အာဏာရှင်ဖြုတ်ချရေး လူထုအုံကြွမှု ဂယက်များသည်လည်း အင်အားတခုအဖြစ် တည်ရှိနေသည် ဟု ဆိုသည်။

သို့သော် ယခင်က NLD ခေါင်းဆောင်တဦးဖြစ်ပြီး နိုင်ငံရေးအကျဉ်းသားဟောင်း ဦးခင်မောင်ဆွေ ကမူ လူထု အုံကြွမှု ဖြစ်ပေါ်ရန် အလားအလာ နည်းနေသည်ဟု ဆိုသည်။ လူထု အုံကြွမှုများကို စစ်အစိုးရက ဖိနှိပ်ခဲ့သည့် အတွက် ယခုလို သုံးသပ်ကြောင်းနှင့် လူထု အနေဖြင့် အသက်စွန့် လှုပ်ရှားရန်မှာ မဖြစ်နိုင်သေးကြောင်း သူက ပြောဆိုသည်။

ထိုင်းအခြေစိုက် ဗဟုဖွံ့ဖြိုးမှုအဖွဲ့မှ ဦးအောင်သူငြိမ်းကမူ အသစ်ဖြစ်ပေါ်နေသည့် လွှတ်တော်အတွင်း ပြောင်းလဲမှု တစုံတရာ ဖြစ်ပေါ်လာရန် ပြည်သူများက စောင့်ကြည့်နေပြီး၊ ပြောင်းလဲမှု မရှိလျှင် ပါလီမန်ပြင်ပ နိုင်ငံရေးကို ဦးတည် သွားနိုင်သည်ဟု သုံးသပ်သည်။


မြန်မာပြည်မှာ လူထုအုံကြွမှု ပြန်ဖြစ်နိုင်မယ်လို့ ယူဆပါသလား။ ဖြစ်နိုင်တယ်ဆိုရင် ဘာကြောင့်၊ မဖြစ်နိုင်ဘူး ဆိုရင် ဘာကြောင့် ဆိုတာလေး ရှင်းပြပေးပါခင်ဗျ။

ဦးဝင်းတင်

“အခု မြန်မာပြည်က လူတွေကို ကြည့်မယ်ဆိုရင် ဆင်းရဲတဲ့ အနေအထားမှာ ရှိနေကြပြီ။ အခု ရန်ကုန် မြို့လယ်က ချမ်းသာနေတဲ့ လူတွေကို ကြည့်ပြီး အမျိုးမျိုး ပြောနေတာကိုး။ နယ်တွေကို မပြောနဲ့ တကယ် ရန်ကုန်ထဲမှာ တောင်ဒဂုံ၊ မြောက်ဒဂုံ စတဲ့ နေရာတွေမှာ ဆင်းရဲတဲ့သူ များနေတာကို တွေ့တယ်။ ဆင်းရဲတယ် ဆိုတာ တော်တော့ကို ဆင်းရဲတဲ့ အနေအထားမှာ ရှိနေတယ်။ အဲဒီတော့ စီးပွား ချွတ်ခြုံကျမှုဟာ လူထုအုံကြွမှု ဖြစ်ပေါ်ဖို့ အတွက် ဖြစ်တတ်တယ်လို့ ကျနော်က သုံးသပ်တယ်။ အခု မြန်မာပြည်မှာက ထားစရာ မရှိတဲ့သူနဲ့ စားစရာ မရှိတဲ့သူလို ဖြစ်နေတယ်”

“နောက်တခုကတော့ မတရားမှုတွေပေါ့။ မတရားမှု ဆိုတာ လူလူချင်း ဆက်ဆံတဲ့ နေရာမှာ မတရားတာ၊ အနိုင်ကျင့်တာ၊ ဗိုလ်ကျတာ။ ဒီလို မတရားမှုတွေက မြန်မာပြည် တပြည်လုံး နေရာအနှံ့ ဖြစ်နေတယ်။ နောက်ပြီး ဒီမတရား မှုတွေကို ကိုယ်တိုင်လည်း ခံစားရတယ်။ နောက်ပြီး တခြားသူတွေ ခံစား နေရတာ ကိုလည်း မီဒီယာ တွေကနေ တဆင့် လူတွေက သိလာကြတော့ အုံကြွ ပေါက်ကွဲမှုဆိုတာ အချိန်မရွေး ဖြစ်နိုင်တယ်ဗျ”

“အဲဒါတွေအပြင်ကို နောက်ထပ် Sector တခုက ဘာလဲဆိုရင် အခု အရှေ့ အလယ်ပိုင်းမှာ ဖြစ်တဲ့ ကိစ္စတွေ ပေါ့ဗျာ။ အီဂျစ်တို့၊ တူရကီတို့မှာ ဖြစ်တဲ့ ကိစ္စတွေ။ အဲဒီကိစ္စတွေက ကျနော်တို့ရဲ့ မြန်မာပြည်ကို ဂယက် ရိုက်လာတယ်ပေါ့။ ဒီနေ့ခေတ်မှာ ကမ္ဘာကြီးက ကျဉ်းကျဉ်းလေး ဖြစ်နေတယ် ဆိုတဲ့ အခါကျတော့ တခုနဲ့ တခု ဆက်စပ်နေတယ်”

“ဒီအခြေအနေတွေ အားလုံးကို သုံးသပ်တဲ့ အခါကျတော့ ကျနော်တို့ အတွက်တော့၊ မြန်မာ ပြည်မှာတော့ ဒီဂယက်တွေ ကတော့ ပေါ်နေပြီ။ တရုတ်ပြည်မှာတောင် ပေါ်နေတာ၊ မြန်မာပြည် ကတော့ ပိုပေါ်တော့မှာ ပေါ့ဗျာ။ ဆိုတော့ အဲဒီလို အခြေအနေ တွေကြောင့် မြန်မာပြည်မှာ လူထု အုံကြွမှု ပေါ်ပေါက်နိုင်တဲ့ အနေ အထားတွေ အများကြီး ရှိနေတယ်လို့ ကျနော် သုံးသပ်တာ ဖြစ်ပါတယ်”

ဦးခင်မောင်ဆွေ

“ဖြစ်နိုင်ဖို့ကတော့ သိပ်ကို နည်းပါတယ်ခင်ဗျ။ ပါလီမန်က ထွက်လာမယ့် ဟာတွေက ဘာတွေ ဖြစ်ဦး မလဲလို့ ဝေဝေဝါးဝါးလည်း ဖြစ်နေတယ်။ ပြီးတော့ ကျနော်တို့နိုင်ငံက ဗုဒ္ဓဘာသာ နိုင်ငံ ဆိုတော့ မွတ်စလင် နိုင်ငံတွေနဲ့တော့ အတွေးအခေါ် ကွာတယ်ဗျ။ အဲဒါ တချက်ပေါ့။ လူ့အသက်ကို စွန်ဖို့၊ လွယ်လွယ်ကူကူ စွန့်ဖို့ဆိုတာ ခက်ပါတယ်”

“နောက်ပြီးတော့ အာဏာရှင်နိုင်ငံတွေမှာ ဖြစ်နေတဲ့ ဒီလူထု လှုပ်ရှားမှုတွေဟာ နှစ်ပေါင်း ၃ဝ အတွင်းမှာ တခါမှ အခုလို များများစားစား၊ ဆူဆူပူပူ မရှိခဲ့ဖူးဘူး။ မြန်မာ နိုင်ငံမှာက အများဆုံး ဖြစ်တဲ့ နိုင်ငံလေ။ ဒါတောင်မှ ဖြစ်လာတဲ့ ဆူပူမှုတွေကို နှိမ်နင်း ခံရတာလည်း ရှိနေတော့ကာ ပြည်သူကလည်း အများကြီး သတိထားပုံ ပေါ်တယ်။ အဲဒီတော့ ဖြစ်ချင်လည်း ဖြစ်မှာပေါ့လေ။ ဖြစ်ဖို့တော့ အခွင့်အရေး သိပ်နည်းတယ်လို့ ကျနော် ထင်တယ်”

“နောက် မြန်မာနိုင်ငံရဲ့ ပတ်ဝန်းကျင်နိုင်ငံတွေကလည်းပဲ စီးပွားရေးပဲ မျှော်မှန်းနေတဲ့ အခါကျတော့ နိုင်ငံမှာ ဆူဆူပူပူ ဖြစ်မယ်ဆိုရင် စီးပွားရေး အခွင့်အလမ်းတွေ ထိခိုက်မှာ စိုးတဲ့ အခါကျတော့ ဒါတွေက သိပ်ပြီး အားပေး ချင်တဲ့ပုံ ရှိမှာ မဟုတ်ဘူးလို့ ယူဆစရာ အကြောင်း ရှိပါတယ်။ မြန်မာ လူထုဟာ သိပ်ကို ခံစားနေရပြီ၊ အခုလို ဆင်းရဲ မွဲတေနေပြီ။ သို့သော်လည်း လမ်းမပေါ် ထွက်ရလောက်အောင် အခြေအနေ မပေးသေးဘူးလို့ ကျနော် တွက်ပါတယ်”

ဦးအောင်သူငြိမ်း

“ကျနော်တို့ဆီမှာ လူထုအုံကြွမှု မဖြစ်နိုင်ဘူးလို့တော့ မပြောနိုင်ဘူး ပေါ့နော်။ ဘာဖြစ်လို့လဲ ဆိုတဲ့ အခါကျတော့ ကျနော်တို့ဆီမှာ ရေခံမြေခံတွေက အတော်များများ ရှိတယ်။ အခုဖြစ်တဲ့ အရှေ့ အလယ်ပိုင်း ကိစ္စတွေကို ပြန်ကြည့်တဲ့ အခါကျတော့ လူတွေက သူတို့ရဲ့ ဂုဏ်သိက္ခာ၊ လူ့အခွင့်အရေးနဲ့ ပတ်သက်လို့ ထိပါးခံရတဲ့ အနေအထား၊ မကျေနပ်တာတွေ ပါတယ်။ နောက်တခါကျတော့ အစိုးရပိုင်းမှာ လာဘ်စားနေတဲ့ အကျင့်ပျက် ခြစားနေတဲ့ ကိစ္စတွေ ပါတယ်။ နောက်တခါကျတော့ လူတွေက အထွေထွေ ကျပ်တည်းမှုတွေ ပါတယ်။ နောက် လူတန်းစား သိပ်မညီမျှမှုတွေ ပါတယ်ပေါ့နော်။ ဆိုတော့ ဒီအခြေအနေတွေ ပြန်ကြည့်ရင် ကျနော်တို့ တိုင်းပြည်မှာလည်း ဒါတွေက ဖြစ်နေတယ်ဗျ”

“နောက်တခုကကျတော့ လူတွေက အပြောင်းအလဲကို မျှော်လင့်နေတယ် ဆိုတာ ကျနော်တို့ တနိုင်ငံလုံး သေချာ တယ်ပေါ့။ ဒါပေမဲ့ အခုဖြစ်လာတဲ့၊ ပါလီမန်ထဲမှာ ဖြစ်နေတဲ့ ဆွေးနွေးပွဲတွေ၊ အပြောင်းအလဲ တွေက ဘယ်လောက်ထိ သူတို့ရဲ့ မျှော်မှန်းချက်ကို ဖြည့်ဆည်း ပေးနိုင်မလဲပေါ့။ ဒါ မျှော်လင့်ချက် မရှိတော့ဘူး ဆိုရင်လည်း လူတွေက ပါလီမန်ပြင်ပ နိုင်ငံရေး ဘက်ကို ပြန်လှည့်လာနိုင်တဲ့ သဘောလည်း ရှိပါတယ်’’

လူထုအုံကြွမှုဖြစ်ဖို့အတွက် ဘယ်လိုအချက်က အခြေခံအချက်လို့ မြင်ပါသလဲ။

ဦးဝင်းတင်

“ဆင်းရဲတွင်းနက်နေတဲ့ လူထုရဲ့ အခြေအနေ၊ နောက် လူထုရဲ့ ပတ်ဝန်းကျင်မှာ မတရား ဖိနှိပ်မှုတွေ၊ ချုပ်ချယ်မှုတွေ၊ ပိုင်စိုးပိုင်နင်း လုပ်မှုတွေ၊ အနိုင်ကျင့်မှုတွေ၊ မတရား ခိုင်းစေမှုတွေ၊ လယ်ယာမြေတွေ သိမ်းခံရတာဗျာ။ အလုပ်သမား တွေကို လုပ်ခမပေး ဘာမပေး ဖြစ်ရတာတွေ စသဖြင့် အများကြီးပေ့ါဗျာ”

ဦးခင်မောင်ဆွေ

“အဲဒါကတော့ စာအုပ်ကြီးထဲမှာ ရှိတဲ့ဟာတွေပါ။ ပေါက်ကွဲမှု ဆိုတာက အမှိုက်ကစ ပြဿဒ်မီး လောင်တာပဲ။ လူတွေရဲ့ ခံစားချက်ကို သိပ်ထိခိုက် လွန်းရင် ဖြစ်မှာပေါ့။ ပြည်သူလူထုက သိပ်ပြီးတော့ ခံနိုင်ရည် စွမ်းရည် မြင့်မားတယ်ဗျ။ ဒါက ဗုဒ္ဓဘာသာတွေ ဖြစ်တာလည်း ပါမှာပေါ့ဗျာ”

“နောက်ပြီးတော့ ဟိုတုန်းက ကုန်ဈေးနှုန်းတွေ တက်တုန်းက ဘယ်လောက် ခံရတယ်ဆိုတာ ခင်ဗျား သိမှာပါ။ ဘဲဥကို တနေ့ နှစ်လုံးစားတဲ့ သူက တနေ့ကို တခြမ်းတောင် မဟုတ်တော့ဘူး။ တစိတ်ပဲ စားပြီး နေနေကြတဲ့ မြန်မာ ပြည်သူတွေကို သွားပြီးတော့ကာ အများကြီး မျှော်လင့်လို့ မရဘူးလို့ ထင်ပါတယ်။ သို့သော်လည်း ဖြစ်နိုင်ခြေ မရှိဘူး၊ ရှိတယ်ဆိုတာ ကျနော် အပ်ကျမတ်ကျ ပြောလို့ မရပါဘူး။ ပေါက်ကွဲချိန်ကျ ပေါက်ကွဲတာကိုး။ သို့သော် အခွင့်အရေးကတော့ အလွန်နည်းပါတယ်”

ဦးအောင်သူငြိမ်း

“အဓိကကတော့ လူထုအုံကြွမှုတွေ ကြည့်လိုက်လို့ရှိရင် သေချာပြင်ဆင် လှုံ့ဆော်ပြီးတော့ ခေါ်တယ်။ ဒါပေမဲ့လည်း ဖြစ်ချင်မှ ဖြစ်တာမျိုးပေါ့။ ဒါပေမဲ့ မျှော်လင့် မထားဘဲနဲ့ အခြေအနေတွေ ပေါင်းစုံလာတော့ အုံကြွ ပေါက်ကွဲမှုတွေ ဖြစ်တာမျိုးလည်း ရှိတာပေါ့။ အဲဒီတော့ အတိအကျတော့ ပြောလို့ ခက်ပါတယ်”

လူထုအုံကြွမှုဖြစ်ပေါ်ဖို့ ဘယ်လိုလူတန်းစားက အရေးကြီးဆုံးလို့ ထင်ပါသလဲဗျ။

ဦးဝင်းတင်

“အထူးသဖြင့် အဓိက အကျဆုံးကတော့ ကျနော်တို့ မြန်မာပြည်က အတွေ့အကြုံမှာတော့ အမြဲတမ်း ဒီ ပညာတတ် ပေါ့ဗျာ။ ပညာတတ်လို့ပဲ ပြောရမှာပေါ့။ ကျောင်းသားတို့ ဘာတို့ ဆိုတဲ့ ကျောင်းသား အင်အားစု တွေဟာ အဓိက အကျဆုံးပါဘဲ။ ဟိုးလွန်ခဲ့တဲ့ ၁၉၂ဝ ကျောင်းသား သပိတ်တို့ ဘာတို့ကနေ အစပေါ့ဗျာ။ သပိတ် တလျှောက်လုံး ဟာလည်း မြန်မာပြည်ရဲ့ နိုင်ငံရေး လှုပ်ရှားမှု အားလုံးဟာ ကျောင်းသားလူငယ် ခေါင်းဆောင်မှုက အဓိကပဲ။ ကျောင်းသား လူငယ်ဆိုတဲ့ နောက် ဘာပဲပြောပြော ပညာတတ်တွေလို့ ပြောလို့ ရပါတယ်။ ဒါက တပိုင်းပေါ့။ ဒါက အလွန့်အလွန်ကို အရေးကြီးတဲ့ တပ်ဦးက အင်အားစုပေါ့”

ဦးခင်မောင်ဆွေ

“အခြေခံလူတန်းစားတွေရဲ့ဘဝ မပြည့်စုံဘူး၊ ထွက်ပေါက် မရှိတော့ဘူး၊ စားစရာလည်း မရှိတော့ဘူး၊ ဘာမှ မျှော်လင့်ချက်လည်း မရှိတော့ဘူး ဆိုရင် ပေါက်ကွဲ ကြတာပေါ့ဗျာ။ မြန်မာ နိုင်ငံမှာတော့ လူလတ် တန်းစားမှာ ပါနေတဲ့ ကျောင်းသားတွေက စခဲ့တာ ဆိုတော့ သမိုင်းမှာ အထင်အရှား ရှိခဲ့တာပဲ။ ကျောင်းသားတွေလည်း အခု ဘယ်လို နေတယ်ဆိုတာ ခင်ဗျားတို့ မှန်းလို့ ရပါတယ်။ တကယ်ကော လူထုအုံကြွမှု လိုပြီလား၊ မလိုဘူးလားဆိုတာလည်း ရှိပါတယ်။ ဒါကို တထိုင်တည်းနဲ့ ပြောလို့မရဘူး”

ဦးအောင်သူငြိမ်း

“ကျနော်ထင်တာကတော့ အဓိကကတော့ဗျာ… မကျေနပ်တဲ့ လူစုလူဝေး ပေါ့နော်။ ဘာလို့ ဆိုတော့ ဒီဥစ္စာက အရေးကြီးတယ်ဗျ။ နောက်တခုက ကျတော့ ကျနော်ထင်တယ်… လူလတ် တန်းစားက အဓိက အားဖြင့်တော့ ဒီကိစ္စတွေမှာ ဦးဆောင်ကြတာ။ Opinion လူစားလို့ ခေါ်တာပေါ့။ သူတို့က အမြင်ရှိတယ်၊ ကျန်တဲ့ သူတွေကို ရှင်းပြနိုင်တယ်၊ ချပြနိုင်တယ်၊ ဦးဆောင်နိုင်တယ် စသဖြင့် ဒီလို အနေအထားတွေ ကျတော့ ကျနော်တို့ဆီမှာ လူထုအုံကြွမှုတွေက အဲဒါမျိုးမှာ ပေါင်းစပ်တာမျိုး ဖြစ်တတ်တာပေါ့”

လူထုအုံကြွမှု အောင်မြင်နိုင်ဖို့ သော့ချက်ကကော။

ဦးဝင်းတင်

“အဓိကအကျဆုံး သော့ချက်လို့ ကျနော်ထင်တာကတော့ လူထုပါဖို့ ပဲဗျ။ လူထုပါဖို့ ဆိုတာ ကတော့ ဥပမာ ၈၈ တုန်းက လူထုပါလို့ ဖြစ်တာ။ လူထုမပါရင် ဘယ်လိုမှ မဖြစ်နိုင်ဘူး။ ဘာလို့လဲ ဆိုတော့ ရပ်ကွက်တွေ၊ ရပ်ကွက်တွေ တိုင်းမှာ ပါတီယူနစ်တွေ ရှိတယ်။ နောက်ပြီး အဖွဲ့အစည်းတွေ ရှိတယ်။ ဒီအဖွဲ့အစည်းတွေ ဘယ်လောက်ပဲ ရှိရှိ တကယ့်ကို အုံကြွမှုလည်း ပေါ်လည်းလာကော လူထု တရပ်လုံး ထွက်လာတာ။ လူထုဆိုတဲ့ နေရာမှာ ခုနကပြောသလို ကျောင်းသား လူငယ်တင် မကတော့ဘူး။ အလုပ်သမား၊ လယ်သမားတို့၊ မြို့နေ လူတန်းစားတွေ ပါလာတယ်။ ရပ်ကွက်ထဲက လူတွေ ထွက်လာတယ်။ ဒါက ပါဝင်တဲ့ နေရာမှာ အရေးကြီးတဲ့ အင်အားစုဟာ လူထုလို့ ပြောလို့ ရတယ်။ လူထု ပါလာပြီ ဆိုရင်တော့ ဒီလူထုအုံကြွမှု၊ လှုပ်ရှားမှုဟာ အောင်မြင်နိုင်တဲ့ အလားအလာ ရှိတယ်”

ဦးခင်မောင်ဆွေ

“ခင်ဗျား ထိုင်းကို ကြည့်ပါလားဗျ၊ အခု လစ်ဗျားကို ကြည့်ပါလားဗျာ။ နိုင်ငံမှာ ရှိနေတဲ့ ကာကွယ်ရေး အဖွဲ့ အစည်းတွေပေါ့။ ကာကွယ်ရေး အဖွဲ့အစည်းတွေက ဘယ်ဘက်က ပါသလဲ၊ ဘယ်နေရာမှာ နေသလဲ၊ ကြားမှာ နေသလား။ အုပ်ချုပ်သူ လူတန်းစာက ဘယ်လောက် မှားယွင်းနေသလဲ၊ ပြည်သူတွေက ဘယ်လောက် မှန်ကန်ပြီးတော့ မှန်ကန်စွာ ဒီဟာကို သယ်ဆောင် နိုင်သလဲဆိုတဲ့ အခြေခံအချက်တွေ လိုတာပေါ့ဗျာ”

“ပြည်သူတရပ်လုံး ပါဝင်နိုင်တဲ့ လှုပ်ရှားမှုသာလျှင် အောင်မြင်နိုင်တာပေါ့။ ဒီလို အစိတ် အပိုင်း တချို့သာ ပါဝင် လာရုံနဲ့တော့လည်း ဒီကိစ္စကြီး တခုလုံးကို မှောက်လှန် ကြည့်ဖို့ ဆိုတာလည်း သိပ် မလွယ်လှပါဘူး”

ဦးအောင်သူငြိမ်း

“အဓိကကတော့ ကျနော်ထင်တယ် အချက်တွေက တော်တော်များပါတယ်။ အဓိက ကတော့ နိုင်ငံတကာ အခြေ အနေလည်း ပါတယ်၊ နောက် ကိုယ့်လူထုဘက်က ဘယ်လောက် အင်အား စုစည်း မိသလဲဆိုတဲ့ အချက်လည်း ပါတယ်။ နောက်တခါ ခေါင်းဆောင်မှုလည်း အရေးကြီးပါတယ်။ နောက် ဘယ်လိုမျိုး မဟာဗျူဟာ ကျင့်သုံးမှာလဲပေါ့”

“အထူးသဖြင့်ကတော့ အုပ်ချုပ်သူဆီမှာရှိတဲ့ စစ်တပ်အပိုင်းပေါ့ဗျာ။ စစ်တပ်တို့၊ ရဲတုိ့ စသဖြင့် ဒီလို လက်နက်ကိုင် အဖွဲ့အစည်းတွေက ဆန္ဒပြတဲ့ သူတွေဘက်ကို လာပေါင်းမလားပေါ့။ ဒီအချက်လည်း အရေးကြီးတယ်”

မြန်မာ့ဒီမိုကရေစီကူးပြောင်းရေးအတွက် အဓိကအချက်က ဘာလို့ သုံးသပ် နိုင်သလဲ။

ဦးဝင်းတင်

“အလွယ်ဆုံး၊ အဓိက အကျဆုံးအချက်ကတော့ ဒီစစ်အာဏာရှင်တွေ မရှိအောင်၊ စစ်အာဏာရှင် ပြုတ်ကျအောင် ဒီစနစ်ဆိုး ကို ပြည်သူလူထုရဲ့ အုံကြွမှုတို့၊ လူထု အုံကြွမှုတို့နဲ့ ရိုက်ချိုးနိုင်ဖို့ပဲ။ အဲဒါက အဓိကပဲလို့ ကျနော်တို့ ပြောလို့ ရနိုင်ပါတယ်။ ဒီမိုကရေစီ စနစ် ဖြစ်ထွန်းဖို့ အတွက်ကို ဒီမိုကရေစီ စနစ်နဲ့ ကြိုးစားတဲ့ နေရာမှာ လူထု အုံကြွမှုတွေက ဒီမိုကရေစီ နည်းနဲ့ လူတွေရဲ့ လှုပ်ရှားမှုပဲ”

“ဘယ်လိုနည်းနဲ့ပဲဖြစ်ဖြစ် ဒီမိုကရေစီ အသွင်ကူးပြောင်းရေး ကိစ္စမှာ အရေးကြီး ဆုံးက ဘာလဲ ဆိုတော့ စစ်အာဏာရှင်တွေ ဆိုတဲ့ အုပ်ချုပ်သူ အဖွဲ့အစည်းပေါ့… ပါတီဖြစ်ရင် ဖြစ်မယ်၊ စစ်တပ်ဖြစ်ရင် ဖြစ်မယ်၊ လူတစုကို ကိုယ်စားပြုတဲ့ အာဏာရှင်တွေ ဖြစ်ရင် ဖြစ်မယ်။ ဘာပဲဖြစ်ဖြစ် ဒီအာဏာရှင်တွေ၊ အာဏာရှင် စနစ်ကို ဖယ်ရှား နိုင်ခြင်းသာလျှင် ဒီမိုကရေစီ အောင်မြင်ရေး အတွက် လမ်းစဖြစ်မယ်”

“အာဏာရှင်ကို မတိုက်ဝံ့ရင် ဒီမိုကရေစီတိုက်ပွဲဆိုတာက ကျနော်ထင်တယ်… လူတွေ လမ်းပေါ်မှာ ဆန္ဒပြရုံ လောက်ပဲ ရှိမှာပဲ။ အဲဒီကနေ ဘာမှ တက်လာမှာ မဟုတ်ဘူး”

ဦးခင်မောင်ဆွေ

“အဓိက အကျဆုံးအချက်ကတော့ ကျနော်တို့ ထောင်ထဲ မရောက်ခင်တုန်း ကတော့ ဒီ စစ်အစိုးရကို ဖြုတ်ချဖို့ပဲ ပေါ့ဗျာ။ အခုက စစ်အစိုးရ မဖြုတ်ချ နိုင်ဘူးလေ။ မရနိုင်တဲ့ အပြင် သူကတောင်မှ ပြောင်းပြီးတော့ လွှတ်တော် ခေါ်ပြီးတော့ နောက်အစိုးရ ဖြစ်သွားပြီဗျာ။ အဲဒီလိုဆိုတော့ ကျနော်တို့ သွားရမှာက စစ်အစိုးရ ဖြုတ်ချဖို့ သက်သက်ချည်း လုပ်မှာလား၊ သို့မဟုတ် အခြေခံ ဥပဒေကို ကြိုက်သည်ဖြစ်စေ၊ မကြိုက်သည်ဖြစ်စေ လွှတ်တော်က တဆင့် ဖြည်းဖြည်းချင်းပဲ စီးပွားရေး ဒီမိုကရေစီရအောင် ထူထောင်ပြီးတော့ တဖြည်းဖြည်းချင်း ဒီမိုကရေစီ လမ်းကြောင်း ရောက်အောင်ပေါ့ဗျာ၊ ပြည်သူလူထု မနစ်နာဘဲနဲ့ သွားတဲ့ လမ်းကြောင်းကို ယူမလား ဆိုတဲ့ ဟာကို နိုင်ငံရေးသမား အားလုံး၊ နိုင်ငံရေးပါတီ အားလုံး၊ ပါဝင်နေတဲ့ State holder အားလုံးက ရွေးချယ်ရမယ့် ကိစ္စ ဖြစ်ပါတယ်”

“မြန်မာနိုင်ငံအဖို့ကတော့ ဆင့်ကဲဖြစ်စဉ်နဲ့ ပြောင်းလဲတဲ့ဘက်ကို သွားနေတာတော့ ကျနော်တို့ မြင်နေရတာ ပဲဗျာ။ အခုက စစ်အစိုးရက ဆုတ်သွားပြီလေ။ ဆုတ်သွားတဲ့ စစ်အစိုးရ ဖြုတ်ချဖို့ ဆိုတာ မရှိတော့ဘူးဗျာ။ ဖြုတ်ချချင်တယ် ဆိုလည်း စိတ်ကူးယဉ်ပဲ ဖြစ်မယ်။ အဲဒီတော့ တကယ် လက်တွေ့ကျတဲ့ ဟာကို စဉ်းစားပြီးတော့ ဒီပွဲမှာ နွှဲပြီး၊ ဒီတပွဲမှာ မအောင်မြင်ရင် နောက် ၅ နှစ်တိုင်အတွင်းမှာ ကျနော်တို့ ပြည်သူတွေ ရွေးချယ်တဲ့ လွှတ်တော်ကြီး ဖြစ်လာအောင်၊ အမှန်အကန် လွှတ်တော်ကြီး ဖြစ်လာအောင် ဝိုင်းဝန်း ကြိုးပမ်းခြင်းဖြင့်သာ ဒီ ဒီမိုကရေစီကို ဖြည်းဖြည်းချင်း သွားနိုင်မယ့် အခွင့်အလမ်းရမှာပဲ”

ဦးအောင်သူငြိမ်း

“ကျနော်တို့ တိုင်းပြည်မှာ ဒီမိုကရေစီစနစ်ကို သွားမယ်ဆိုတာမျိုး ကတော့ အကုန်လုံး ပြောနေတာပေါ့။ လက်ရှိ စစ်အစိုးရက ရွေးကောက်ပွဲတွေ လုပ်ပြီးတော့ သူတို့လည်း ဒီမိုကရေစီ သွားမယ်လို့ ပြောနေတာပဲ။ ကျန်တဲ့ အတိုက်အခံ အင်အားစုတွေ ကလည်း ဒီမိုကရေစီ သွားမယ်လို့ ပြောနေတယ် ပေါ့ဗျာ။ ဆိုတော့ အဲဒီ အနေအထားမှာ အကုန်လုံး ညှိနှိုင်းပြီးတော့ တူညီတဲ့ လမ်းကြောင်း ရှာနိုင်လို့ ရှိရင်တော့ အကောင်းဆုံးပေါ့”

“ကျနော်တို့ တိုင်းပြည်မှာက တဖက်နဲ့ တဖက်က အားယူပြီး အပြိုင်အဆိုင်လုပ်တဲ့ နိုင်ငံရေး မျိုးက ဆက်ရှိနိုင်တဲ့ အလား အလာမျိုး ရှိပါတယ်”

Ref: မဇ္ဈိမ