ဖွဲ့စည်းအုပ်ချုပ်ပုံ အခြေခံဥပဒေ ပုဒ်မ – ၄၄၅ ၏ အကာအကွယ်ကို မရ နိုင်သော နအဖ ကျူးလွန်ထားသည့် ပြစ်မှုများ

Mar 15th, 2011


၂၀၁၀ခုနှစ်၊ နိုဝင်ဘာတွင် ရွေးကောက်ပွဲ ကျင်းပပြီးသည့် နောက်ပိုင်းနှင့် လွှတ်တော်များ ကျင်းပနေသည့် အချိန်များတွင် နအဖ သည် ဖွဲ့စည်း အုပ်ချုပ်ပုံ အခြေခံဥပဒေပုဒ်မ – ၄၄၃အရ ဥပဒေများကို ဆက်တိုက် ပြဌာန်း လာသည်ကို တွေ့ရသည်။ နိုင်ငံတော်၏ ဘဏ္ဍာငွေ အရ အသုံး ဆိုင်ရာ ဥပဒေကို နှစ်စဉ် များသော အားဖြင့် မတ်လ (၂၀) ရက်နေ့ နောက်ပိုင်းတွင်မှ ထုတ်ပြန်လေ့ ရှိသော်လည်း၊ ယခုနှစ်တွင် ဖေဖေါ်ဝါရီလ (၁၁) ရက်နေ့ ကတည်းက နိုင်ငံတော် ပြန်တမ်းဖြင့် ထုတ်ပြန် ထားသည်ကို တွေ့ရသည်။ ယင်းသို့ ထုတ်ပြန် ကြေငြာရာတွင်လည်း ဖွဲ့စည်း အုပ်ချုပ်ပုံ အခြေခံဥပဒေ ပုဒ်မ – ၄၄၃ တွင် “ဖွဲ့စည်း အုပ်ချုပ်ပုံ အခြေခံဥပဒေ အကောင်အထည် ဖေါ်ရေးအတွက် ကြိုတင် ဆောင်ရွက်ရန် လိုအပ်သည့် လုပ်ငန်းများကို နိုင်ငံတော် အေးချမ်း သာယာရေးနှင့် ဖွံ့ဖြိုးရေး ကောင်စီက ဆောင်ရွက်ပေးရန် ပြဌာန်း ပေးထားသည့် အလျောက်” ဆိုသည်ကို တွင်တွင် ကျယ်ကျယ် အသုံးပြုလျက် ဥပဒေများကို ရေးဆွဲ ပြဌာန်းနေခြင်း ဖြစ်ကြောင်း တွေ့ရှိသည်။

နိုင်ငံတော် ဘဏ္ဍာငွေအရအသုံးဆိုင်ရာ ဥပဒေကို ပြဌာန်းခြင်းမှာ ဖွဲ့စည်းအုပ်ချုပ်ပုံ အခြေခံ ဥပဒေ အကောင် အထည် ဖေါ်ရေးအတွက် န.အ.ဖ အနေဖြင့် ကြိုတင် ဆောင်ရွက်ရန် လိုအပ်သည့် လုပ်ငန်း ဟုတ်သည်/မဟုတ်သည် ဆိုသည်မှာ အငြင်း ပွားစရာ ပြဿနာ ဖြစ်သည်။ မြန်မာ နိုင်ငံတွင် စစ်တပ်မှ အာဏာ သိမ်းပြီးနောက်ပိုင်း န.၀.တ၊ န.အ.ဖ အစိုးရ လက်ထက်တွင် -

(၁) ၁၉၈၉ ခုနှစ် နိုင်ငံတော်ဘဏ္ဍာငွေ အရ/အသုံး ဆိုင်ရာ ဥပဒေကို ဥပဒေအမှတ် – ၈/၈၉ အဖြစ် (၂၂.၃.၁၉၈၉) ရက်နေ့တွင် လည်းကောင်း၊

(၂) ၁၉၉၀ခုနှစ် နောက်ထပ်နိုင်ငံဘဏ္ဍာငွေ ခွဲဝေသုံးစွဲရေး ဆိုင်ရာ ဥပဒေကို ဥပဒေအမှတ် – ၄/၉၀ အဖြစ် (၁၅.၃.၁၉၉၀) ရက် နေ့တွင်လည်းကောင်း၊

(၃) ၁၉၉၀ ခုနှစ် နိုင်ငံတော်ဘဏ္ဍာငွေ အရ/အသုံးဆိုင်ရာဥပဒေကို ဥပဒေအမှတ် – ၅/၉၀ အဖြစ် (၂၉.၃.၁၉၉၀) ရက်နေ့တွင် လည်းကောင်း၊

(၄) ၁၉၉၁ခုနှစ် နောက်ထပ် နိုင်ငံဘဏ္ဍာငွေ ခွဲဝေသုံးစွဲရေး ဆိုင်ရာ ဥပဒေကို ဥပဒေအမှတ် – ၃/၉၁ အဖြစ် (၁၉.၃.၁၉၉၁) ရက် နေ့တွင်လည်းကောင်း၊

(၅) ၁၉၉၁ ခုနှစ် နိုင်ငံတော်ဘဏ္ဍာငွေ အရ/အသုံးဆိုင်ရာဥပဒေကို ဥပဒေအမှတ် – ၄/၉၁ အဖြစ် (၂၈.၃.၁၉၉၁) ရက်နေ့တွင် လည်းကောင်း၊

(၆) ၁၉၉၂ခုနှစ် နောက်ထပ်နိုင်ငံဘဏ္ဍာငွေ ခွဲဝေသုံးစွဲရေး ဆိုင်ရာ ဥပဒေကို ဥပဒေအမှတ် – ၃/၉၂ အဖြစ် (၂၆.၃.၁၉၉၂) ရက် နေ့တွင်လည်းကောင်း၊

(၇) ၁၉၉၂ ခုနှစ် နိုင်ငံတော်ဘဏ္ဍာငွေ အရ/အသုံး ဆိုင်ရာ ဥပဒေကို ဥပဒေအမှတ် – ၄/၉၂ အဖြစ် (၂၀.၃.၁၉၉၂) ရက်နေ့တွင် လည်းကောင်း၊

(၈) ၁၉၉၃ခုနှစ် နောက်ထပ်နိုင်ငံဘဏ္ဍာငွေ ခွဲဝေသုံးစွဲရေး ဆိုင်ရာ ဥပဒေကို ဥပဒေအမှတ် – ၂/၉၃ အဖြစ် (၂၅.၃.၁၉၉၃) ရက် နေ့တွင်လည်းကောင်း၊

(၉) ၁၉၉၃ ခုနှစ် နိုင်ငံတော်ဘဏ္ဍာငွေ အရ/အသုံး ဆိုင်ရာ ဥပဒေကို ဥပဒေအမှတ် – ၃/၉၃ အဖြစ် (၂၉.၃.၁၉၉၃) ရက်နေ့တွင် လည်းကောင်း၊

(၁၀) ၁၉၉၄ခုနှစ် နောက်ထပ်နိုင်ငံဘဏ္ဍာငွေ ခွဲဝေသုံးစွဲရေး ဆိုင်ရာ ဥပဒေကို ဥပဒေအမှတ် – ၂/၉၄ အဖြစ် (၂၄.၃.၁၉၉၄) ရက် နေ့တွင်လည်းကောင်း၊

(၁၁) ၁၉၉၄ခုနှစ် နိုင်ငံတော်ဘဏ္ဍာငွေ အရ/အသုံး ဆိုင်ရာ ဥပဒေကို ဥပဒေအမှတ် – ၃/၉၄ အဖြစ် (၂၈.၃.၁၉၉၄) ရက်နေ့တွင် လည်းကောင်း၊

(၁၂) ၁၉၉၅ခုနှစ် နောက်ထပ်နိုင်ငံဘဏ္ဍာငွေ ခွဲဝေသုံးစွဲရေး ဆိုင်ရာ ဥပဒေကို ဥပဒေအမှတ် – ၂/၉၅ အဖြစ် (၂၄.၃.၁၉၉၅) ရက် နေ့တွင်လည်းကောင်း၊

(၁၃) ၁၉၉၅ခုနှစ် နိုင်ငံတော်ဘဏ္ဍာငွေ အရ/အသုံး ဆိုင်ရာ ဥပဒေကို ဥပဒေအမှတ် – ၃/၉၅ အဖြစ် (၂၉.၃.၁၉၉၅) ရက်နေ့တွင် လည်းကောင်း၊

(၁၄) ၁၉၉၆ခုနှစ် နောက်ထပ်နိုင်ငံဘဏ္ဍာငွေ ခွဲဝေသုံးစွဲရေး ဆိုင်ရာ ဥပဒေကို ဥပဒေအမှတ် – ၃/၉၆ အဖြစ် (၂၅.၃.၁၉၉၆) ရက် နေ့တွင်လည်းကောင်း၊

(၁၅) ၁၉၉၆ခုနှစ် နိုင်ငံတော်ဘဏ္ဍာငွေ အရ/အသုံး ဆိုင်ရာ ဥပဒေကို ဥပဒေအမှတ် – ၄/၉၆ အဖြစ် (၂၉.၃.၁၉၉၅) ရက်နေ့တွင် လည်းကောင်း၊

(၁၆) ၁၉၉၇ခုနှစ် နောက်ထပ်နိုင်ငံဘဏ္ဍာငွေ ခွဲဝေသုံးစွဲရေး ဆိုင်ရာ ဥပဒေကို ဥပဒေအမှတ် – ၇/၉၇ အဖြစ် (၂၅.၃.၁၉၉၇) ရက် နေ့တွင်လည်းကောင်း၊

(၁၇) ၁၉၉၇ခုနှစ် နိုင်ငံတော်ဘဏ္ဍာငွေ အရ/အသုံး ဆိုင်ရာ ဥပဒေကို ဥပဒေအမှတ် – ၈/၉၇ အဖြစ် (၂၉.၃.၁၉၉၇) ရက်နေ့တွင် လည်းကောင်း၊

(၁၈) ၁၉၉၈ခုနှစ် နောက်ထပ်နိုင်ငံဘဏ္ဍာငွေ ခွဲဝေသုံးစွဲရေး ဆိုင်ရာ ဥပဒေကို ဥပဒေအမှတ် – ၅/၉၈ အဖြစ် (၂၈.၃.၁၉၉၈) ရက် နေ့တွင်လည်းကောင်း၊

(၁၉) ၁၉၉၈ခုနှစ် နိုင်ငံတော်ဘဏ္ဍာငွေ အရ/အသုံး ဆိုင်ရာ ဥပဒေကို ဥပဒေအမှတ် – ၆/၉၈ အဖြစ် (၃၀.၃.၁၉၉၈) ရက်နေ့တွင် လည်းကောင်း၊

(၂၀) ၁၉၉၉ခုနှစ် နောက်ထပ်နိုင်ငံဘဏ္ဍာငွေ ခွဲဝေသုံးစွဲရေး ဆိုင်ရာ ဥပဒေကို ဥပဒေအမှတ် – ၁/၉၉ အဖြစ် (၁၀.၃.၁၉၉၉) ရက် နေ့တွင်လည်းကောင်း၊

(၂၁) ၁၉၉၉ခုနှစ် နိုင်ငံတော်ဘဏ္ဍာငွေ အရ/အသုံး ဆိုင်ရာ ဥပဒေကို ဥပဒေအမှတ် – ၂/၉၉ အဖြစ် (၃၀.၃.၁၉၉၉) ရက်နေ့တွင် လည်းကောင်း၊

(၂၂) ၂၀၀၀ပြည့်နှစ် နောက်ထပ်နိုင်ငံဘဏ္ဍာငွေ ခွဲဝေသုံးစွဲရေး ဆိုင်ရာ ဥပဒေကို ဥပဒေအမှတ် – ၃/၀၀ အဖြစ် (၁၆.၃.၂၀၀၀) ရက် နေ့တွင်လည်းကောင်း၊

(၂၃)၂၀၀၀ပြည့်နှစ်၊ နိုင်ငံတော်ဘဏ္ဍာငွေအရ/အသုံး ဆိုင်ရာ ဥပဒေကို ဥပဒေအမှတ်-၄/၀၀ အဖြစ် (၂၈.၃.၂၀၀၀) ရက်နေ့တွင် လည်းကောင်း၊

(၂၄) ၂၀၀၁ခုနှစ် နောက်ထပ်နိုင်ငံဘဏ္ဍာငွေ ခွဲဝေသုံးစွဲရေး ဆိုင်ရာ ဥပဒေကို ဥပဒေအမှတ် – ၃/၀၁ အဖြစ် (၁၆.၃.၂၀၀၁) ရက် နေ့တွင်လည်းကောင်း၊

(၂၅) ၂၀၀၁ခုနှစ်၊နိုင်ငံတော်ဘဏ္ဍာငွေအရ/အသုံး ဆိုင်ရာ ဥပဒေကို ဥပဒေအမှတ်-၄/၀၁ အဖြစ် (၂၈.၃.၂၀၀၀) ရက်နေ့တွင် လည်းကောင်း၊

(၂၆) ၂၀၀၂ခုနှစ် နောက်ထပ်နိုင်ငံဘဏ္ဍာငွေ ခွဲဝေသုံးစွဲရေး ဆိုင်ရာ ဥပဒေကို ဥပဒေအမှတ် – ၄/၀၂ အဖြစ် (၁၂.၃.၂၀၀၂) ရက် နေ့တွင်လည်းကောင်း၊

(၂၇) ၂၀၀၂ခုနှစ်၊နိုင်ငံတော်ဘဏ္ဍာငွေအရ/အသုံး ဆိုင်ရာ ဥပဒေကို ဥပဒေအမှတ်-၅/၀၂ အဖြစ် (၂၆.၃.၂၀၀၂) ရက်နေ့တွင် လည်းကောင်း၊

(၂၈) ၂၀၀၃ခုနှစ် နောက်ထပ်နိုင်ငံဘဏ္ဍာငွေ ခွဲဝေသုံးစွဲရေး ဆိုင်ရာ ဥပဒေကို ဥပဒေအမှတ် – ၅/၀၃ အဖြစ် (၁၅.၃.၂၀၀၃) ရက် နေ့တွင်လည်းကောင်း၊

(၂၉) ၂၀၀၃ခုနှစ်၊နိုင်ငံတော်ဘဏ္ဍာငွေအရ/အသုံး ဆိုင်ရာ ဥပဒေကို ဥပဒေအမှတ်-၆/၀၃ အဖြစ် (၂၈.၃.၂၀၀၃) ရက်နေ့တွင် လည်းကောင်း၊

(၃၀) ၂၀၀၄ခုနှစ် နောက်ထပ်နိုင်ငံဘဏ္ဍာငွေ ခွဲဝေသုံးစွဲရေး ဆိုင်ရာ ဥပဒေကို ဥပဒေအမှတ် – ၂/၀၄ အဖြစ် (၁၇.၃.၂၀၀၃) ရက် နေ့တွင်လည်းကောင်း၊

(၃၁) ၂၀၀၄ခုနှစ်၊နိုင်ငံတော်ဘဏ္ဍာငွေအရ/အသုံး ဆိုင်ရာ ဥပဒေကို ဥပဒေအမှတ်-၃/၀၄ အဖြစ် (၃၀.၃.၂၀၀၃) ရက်နေ့တွင် လည်းကောင်း၊

(၃၂) ၂၀၀၆ခုနှစ် နောက်ထပ်နိုင်ငံဘဏ္ဍာငွေ ခွဲဝေသုံးစွဲရေး ဆိုင်ရာ ဥပဒေကို ဥပဒေအမှတ် – ၁/၀၆ အဖြစ် (၂၂.၃.၂၀၀၆) ရက် နေ့တွင်လည်းကောင်း၊

(၃၃) ၂၀၀၆ခုနှစ်၊နိုင်ငံတော်ဘဏ္ဍာငွေအရ/အသုံး ဆိုင်ရာ ဥပဒေကို ဥပဒေအမှတ်-၄/၀၆ အဖြစ် (၂၈.၃.၂၀၀၆) ရက်နေ့တွင် လည်းကောင်း၊

(၃၄) ၂၀၀၇ခုနှစ် နောက်ထပ်နိုင်ငံဘဏ္ဍာငွေ ခွဲဝေသုံးစွဲရေး ဆိုင်ရာ ဥပဒေကို ဥပဒေအမှတ် – ၃/၀၇ အဖြစ် (၂၂.၃.၂၀၀၇) ရက် နေ့တွင်လည်းကောင်း၊

(၃၅) ၂၀၀၇ ခုနှစ်၊နိုင်ငံတော်ဘဏ္ဍာငွေအရ/အသုံး ဆိုင်ရာ ဥပဒေကို ဥပဒေအမှတ်-၄/၀၇ အဖြစ် (၂၉.၃.၂၀၀၇) ရက်နေ့တွင် လည်းကောင်း၊

(၃၆) ၂၀၀၈ခုနှစ် နောက်ထပ်နိုင်ငံဘဏ္ဍာငွေ ခွဲဝေသုံးစွဲရေး ဆိုင်ရာ ဥပဒေကို ဥပဒေအမှတ် – ၃/၀၈ အဖြစ် (၂၀.၃.၂၀၀၈) ရက် နေ့တွင်လည်းကောင်း၊

(၃၇) ၂၀၀၈ ခုနှစ်၊နိုင်ငံတော်ဘဏ္ဍာငွေအရ/အသုံး ဆိုင်ရာ ဥပဒေကို ဥပဒေအမှတ်-၄/၀၈ အဖြစ် (၂၄.၃.၂၀၀၇) ရက်နေ့တွင် လည်းကောင်း၊

စသည်အားဖြင့် ထုတ်ပြန်ခဲ့သည်။ (နှစ်အလိုက် လိုအပ်သည့် ဥပဒေများကို ထပ်မံ ဖေါ်ပြပါမည်။) ဘဏ္ဍာရေးနှစ် အလိုက် အရသုံး ဆိုင်ရာစာရင်းနှင့် နောက်ထပ် ဘဏ္ဍာငွေ ခွဲဝေသုံးစွဲရေးတို့ အတွက် ထုတ်ပြန်ခြင်းဖြစ်ရာ အထူးသဖြင့် ဘဏ္ဍာရေးနှစ်စ၊ ဧပြီလ(၁)ရက်နေ့တွင် စတင် အကျိုး သက်ရောက်မည့် ဥပဒေများကို မတ်လ နှောင်းပိုင်းနှင့် မတ်လကုန် ပိုင်းတွင်သာ ထုတ်ပြန်လေ့ ရှိသည်မှာ အစဉ်အလာ ဖြစ်သည်။ သို့ရာတွင် ယခုနှစ်တွင် ၂၀၁၁ – ၂၀၁၂ ဘဏ္ဍာငွေ ရ/သုံး ဥပဒေကို ဖေဖေါ်ဝါရီလ အတွင်း စောလျင်စွာ နိုင်ငံတော် ပြန်တမ်းတွင် ထည့်သွင်း ဖေါ်ပြထားခြင်းနှင့် ဖွဲ့စည်း အုပ်ချုပ်ပုံ အခြေခံဥပဒေ ပုဒ်မ – ၄၄၃အရ ဖွဲ့စည်းအုပ်ချုပ်ပုံ အခြေခံ ဥပဒေ အကောင်အထည် ဖေါ်ရာတွင် န.အ.ဖ အနေဖြင့် ကြိုတင် ဆောင်ရွက်ရမည့် လုပ်ငန်းစဉ်အဖြစ်၊ ယင်းဥပဒေကို ထုတ်ပြန် လိုက်ခြင်းဖြစ်သည်။

ယင်းဥပဒေကို ထုတ်ပြန်ရာတွင် န.အ.ဖ အနေဖြင့် ဖွဲ့စည်းအုပ်ချုပ်ပုံအခြေခံ ဥပဒေ ပုဒ်မ – ၄၄၃ အရ ပေးအပ်သည့် လုပ်ပိုင်ခွင့်ကို အသုံးပြုခြင်းသည် ဥပဒေ သဘောအရ အငြင်း ထွက်သည့် ပြဿနာ ဖြစ်သည်။ အမျိုးသား ဒီမိုကရေစီ အဖွဲ့ချုပ်၏ ၂၀၁၁ခုနှစ်၊ မတ်လ (၄) ရက်နေ့တွင် ထုတ်ပြန်သည့် ကြေငြာချက်အမှတ် – ၄/၀၃/၂၀၁၁ တွင် ပြည်သူ့ ဘဏ္ဍာငွေကို ဥပဒေနှင့်အညီ ခွဲဝေသုံးစွဲရန်ကိစ္စမှာ ပြည်သူ့ လွှတ်တော်မှ ဥပဒေ အဖြစ် ပြဌာန်းမှသာ ဆီလျော်မည် -ဟု အတိအလင်း ထုတ်ပြန် ကြေငြာထားသည်။

န.အ.ဖ အနေဖြင့် ၄င်းတို့စိတ်တိုင်းကျ ရွေးကောက်ပွဲ ကျင်းပပြီးသည့် နောက်ပိုင်း၊ ၄င်းတို့ ဖြစ်ချင်သော သဘော ဆန္ဒများနှင့် ကိုက်ညီစွာ တင်းကြပ်သော စည်းမျဉ်း စည်းကမ်းများဖြင့် လွှတ်တော်များကို ခေါ်ယူ ကျင်းပနေသည့် တိုင်အောင် အခြား တဖက်တွင် ဥပဒေများကို တခုပြီးတခု ထုတ်ပြန်နေခြင်းမှာ မည်သည့် အတွက်ကြောင့်နည်း။ မေးခွန်း ထုတ်စရာ ဖြစ်လာပါသည်။

န.အ.ဖ ဘက်မှစဉ်းစားပါလျှင် ဖွဲ့စည်းအုပ်ချုပ်ပုံ အခြေခံဥပဒေ ပုဒ်မ – ၄၄၃ ပြဌာန်းချက် အရ ထုတ်ပြန်ရခြင်း ဖြစ်သည်ဟု ဆင်ခြေကန်စရာ ရှိသည်မှန်သော်လည်း၊ ယင်းပြဌာန်းချက် အရ သည်ပင်လျှင် နိုင်ငံတော် ဘဏ္ဍာငွေ ရ/သုံး ဥပဒေ ပြဌာန်းခြင်းသည် ဖွဲ့စည်း အုပ်ချုပ်ပုံ အခြေခံ ဥပဒေ အကောင်အထည် ဖေါ်ရေးအတွက် ကြိုတင် ဆောင်ရွက်ရမည့် လုပ်ငန်းစဉ် မဟုတ်။ ကျင်းပလျက် ရှိသည့် လွှတ်တော်များမှ နိုင်ငံတော် ဘဏ္ဍာငွေ ရ/သုံး ဥပဒေ ပြဌာန်းနိုင်ရေး အတွက် လွှဲအပ်ရန်နှင့် ပံ့ပိုး ကူညီရန်သာ ဖြစ်သည်။ ယင်းသို့ လွှဲအပ်ခြင်းနှင့် ပံ့ပိုး ကူညီခြင်းသည် သာလျှင် ဖွဲ့စည်း အုပ်ချုပ်ပုံ အခြေခံ ဥပဒေပုဒ်မ-၄၄၃၊ ပြဌာန်းချက်ကို ကျင့်သုံးခြင်း မည်ပေရာ န.အ.ဖမှ ဘဏ္ဍာငွေ ရ/သုံးဥပဒေနှင့် အခြားသော ဥပဒေများကို ပြဌာန်း ထုတ်ပြန်ခြင်းမှာ ပုဒ်မ-၄၄၃ ပြဌာန်းချက်ကို မိမိအကျိုးစီးပွားနှင့် ယှဉ်တွဲ အသုံးချခြင်း မည်ပေလိမ့်မည်။

၂၀၀၈ ခုနှစ်ဖွဲ့စည်းအုပ်ချုပ်ပုံ အခြေခံဥပဒေပုဒ်မ – ၄၅၃ အရ ဤဖွဲ့စည်းပုံ အခြေခံဥပဒေပါ စကားရပ် များကို အနက် အဓိပ္ပာယ် ဖွင့်ဆိုရာတွင် တည်ဆဲ စကားရပ်များ အနက် အဓိပ္ပာယ် ဖွင့်ဆိုရေး ဥပဒေကို ကိုးကားရမည်ဟု ပြဌာန်း ထားသော်လည်း – ဥပဒေ တရပ်သည် များသောအားဖြင့် အငြင်းထွက် ပြဿနာများ ပေါ်ပေါက် လာခြင်းမှာ ယေဘုယျကျသည့် ပြဌာန်းချက်ဖြစ်ခြင်း၊ စကားရပ်ကို ရှင်းလင်း တိကျစွာ အဓိပ္ပာယ် ဖွင့်ဆိုမှု မရှိခြင်းတို့ကြောင့် ဖြစ်သည်။ ထို့ပြင် ပုဒ်မ ၄၄၃ ကဲ့သို့သော အငြင်းထွက် ပြဿနာများကို ဖန်တီးပေးသည့် ပြဌာန်းချက်မျိုးကို နိုင်ငံ တနိုင်ငံအတွက် အလွန် အရေးကြီး၍ အခြေခံ အကျဆုံးဖြစ်သည့် ဖွဲ့စည်းအုပ်ချုပ်ပုံ အခြေခံ ဥပဒေထဲတွင် ပြဌာန်း ထားခြင်းက အဆိုပါ နိုင်ငံအတွက် အလွန်ကြီးလေးသော အန္တရာယ်ကို ကျရောက် စေနိုင်မည်ဖြစ်သည်။ ထို့ကြောင့် ဖျက်သိမ်းရမည့် ပြဌာန်းချက် ဖြစ်သည်။

ဖွဲ့စည်းအုပ်ချုပ်ပုံ အခြေခံဥပဒေ ပုဒ်မ – ၄၄၅ပြဌာန်းချက်သည်လည်း အထူး သတိပြုသင့်သည့် ပြဌာန်းချက် ဖြစ်သည်။ ပုဒ်မ – ၄၄၅ ပြဌာန်းချက်မှာ “ပြည်ထောင်စု မြန်မာနိုင်ငံ တော်သည် နိုင်ငံတော် ငြိမ်ဝပ်ပိပြားမှု တည်ဆောက်ရေး အဖွဲ့နှင့် နိုင်ငံတော် အေးချမ်း သာယာရေးနှင့် ဖွံ့ဖြိုးရေး ကောင်စီတို့၏ မူဝါဒလမ်းညွှန်မှုများ၊ ဥပဒေများ၊ နည်းဥပဒေများ၊ စည်းမျဉ်းများ၊ အမိန့် ပြန်တမ်းများ၊ ကြေငြာချက်များ ကိုလည်းကောင်း၊ နိုင်ငံတော် ငြိမ်ဝပ်ပိပြားမှု တည်ဆောက်ရေး အဖွဲ့နှင့် နိုင်ငံတော် အေးချမ်း သာယာရေးနှင့် ဖွံ့ဖြိုးရေး ကောင်စီတို့၏ ဆောင်ရွက်ချက်များ၊ တာဝန်များနှင့် ရပိုင်ခွင့် များကို လည်းကောင်း ဆက်ခံသည်။ ယင်းအဖွဲ့ သို့မဟုတ် အဖွဲ့ဝင်တဦးဦး သို့မဟုတ် အစိုးရအဖွဲ့ဝင်တဦးဦး၏ တာဝန်အရ ဆောင်ရွက်ချက်များအပေါ် အကြောင်းပြုလျက် ယင်းတို့အား တရားစွဲဆိုခြင်း အရေးယူခြင်း မရှိစေရ။” ဟူသော ပြဌာန်းချက်ပင် ဖြစ်သည်။ ယင်း ပြဌာန်းချက်သည် ပုဒ်မ – ၄၄၃ နှင့် တဆက်တည်း ပြဌာန်းချက်ပင် ဖြစ်သည်။ ဖွဲ့စည်း အုပ်ချုပ်ပုံ လူထု ဆန္ဒခံယူပွဲ မကျင်းပခင် ကာလတွင် န.၀.တ၊ န.အ.ဖ က ပြဌာန်းထားသည့် ဥပဒေများ၊ ယင်းနောက် ဖွဲ့စည်းပုံဥပဒေ ပုဒ်မ – ၄၄၃ ကို အသုံးချလျက် ပြဌာန်းထားသော ဥပဒေများကို နောင်တက်လာမည့် အစိုးရက ဆက်ခံရမည် ဟူ၍ ပြဌာန်းထားခြင်း ဖြစ်သည်။ ပုဒ်မ – ၄၄၃ကို အသုံးချ၍ ဥပဒေများ ပြဌာန်းလျက် ပုဒ်မ – ၄၄၅ ပြဌာန်းချက်အရ ဆက်ခံခိုင်းခြင်းပင် ဖြစ်သည်။

န.၀.တ၊ န.အ.ဖ လက်ထက် ပြဌာန်းထားသည့် ဥပဒေများအနက် အထက်တွင် နှစ်စဉ်အလိုက် ပြဌာန်း ထားသည့် နိုင်ငံတော် ဘဏ္ဍာငွေ အရ / အသုံးဆိုင်ရာ ဥပဒေ နိုင်ငံတော် နောက်ထပ် ဘဏ္ဍာငွေ ခွဲဝေ သုံးစွဲရေး ဥပဒေများနှင့်၊ ၂၀၁၀ ရွေးကောက်ပွဲ မကျင်းပခင် ထုတ်ပြန်ထားသည့် ပြည်ထောင်စု စာရင်းစစ်ချုပ် ဥပဒေ၊ ၂၀၁၁ မတ်လ (၃) ရက်နေ့တွင် ကျင်းပသည့် ပြည်သူ့လွှတ်တော် ပုံမှန် အစည်းအဝေး တတိယနေ့တွင် ဖွဲ့စည်း အတည်ပြုခဲ့သည့် ပြည်သူ့ ငွေစာရင်း ကော်မတီ၏ လုပ်ပိုင်ခွင့်နှင့် တာဝန်များ စသည်တို့ကို ပေါင်းစပ် စဉ်းစားရန် လိုအပ်သည်။

ပြည်သူ့လွှတ်တော်မှ ဖွဲ့စည်းအတည်ပြုထားသည့် ပြည်သူ့ငွေစာရင်း ကော်မတီတွင်

၁။ ဦးစိုင်းသီဟကျော် – မိုင်းရယ်မဲဆန္ဒနယ်

၂။ ဦးမန်းမောင်မောင်ဉာဏ် – ပန်းတနော်မဲဆန္ဒနယ်

၃။ ဒေါ်တင်နွယ်ဦး – မြောက်ဒဂုံမဲဆန္ဒနယ်

၎။ ဦးခွန်မောင်သောင်း – ပင်လောင်းမဲဆန္ဒနယ်

၅။ ဦးခွန်လိန်း – ဖလမ်းမဲဆန္ဒနယ်

၆။ ဦးသူရိန်ဇော် – ကော့ကရိတ်မဲဆန္ဒနယ် (ဥက္ကဌ)

၇။ ဦးမောင်တိုး – မင်းလှမဲဆန္ဒနယ် (အတွင်းရေးမှူး)

၈။ ဦးစိုးမြင့် – ညောင်လေးပင်မဲဆန္ဒနယ်

၉။ ဦးကြည်သာ – ဂွမဲဆန္ဒနယ်

၁၀။ ဦးအောင်မြသန်း – ညောင်တုန်းမဲဆန္ဒနယ်

၁၁။ ဦးဟောက်ခန့်မန် – တွန်းဇံမဲဆန္ဒနယ်

၁၂။ ဦးအောင်လင်းလှိုင် – ဘုတ်ပြင်းမဲဆန္ဒနယ်

၁၃။ ဒေါက်တာဝင်းမြင့် – လှိုင်မဲဆန္ဒနယ်

၁၄။ ဒေါ်မိယဉ်ချမ်း – ကျိုက်မရောမဲဆန္ဒနယ်

၁၅။ ဦးမိုးဇော်ဟိန်း – ကသာမဲဆန္ဒနယ် စသည့် ပြည်သူ့လွှတ်တော် ကိုယ်စားလှယ်များဖြင့် ဖွဲ့စည်း ထားသည်။

ပြည်သူ့ငွေစာရင်းကော်မတီ၏ တာဝန်များထဲမှ အရေးကြီးသည့် တာဝန်တရပ်မှာ ပြည်ထောင်စု အစိုးရ၏ အသုံး စာရင်းနှင့် ပြည်ထောင်စု စာရင်းစစ်ချုပ်၏ အစီရင်ခံစာကို စိစစ်ရာတွင် ပြည်ထောင်စု လွှတ်တော်က ခွင့်ပြုသောငွေကို သတ်မှတ် ထားသည့် ကိစ္စ အတွက်သာလျှင် သုံးစွဲခြင်းရှိ/မရှိ။ စည်းမျဉ်း စည်းကမ်းနှင့် အညီ သုံးစွဲခြင်း ရှိ/မရှိ။ ခွင့်ပြုသည့် ရည်ရွယ်ချက် အတိုင်း ထိရောက်မှန်ကန်စွာ သုံးစွဲခြင်း ရှိ/မရှိ တို့ကို စိစစ်ရမည့် တာဝန် ဖြစ်သည်။

ပြည်ထောင်စုစာရင်းစစ်ချုပ်ကို ခန့်အပ်နိုင်ရေးအတွက် န.အ.ဖ သည် ဖွဲ့စည်းပုံအခြေခံ ဥပဒေ ပုဒ်မ – ၄၄၃ ကို အသုံးချကာ ၂၀၁၀ ပြည့်နှစ် အောက်တိုဘာလ ၂၈ ရက်နေ့တွင် ပြဌာန်းထားသည်။ ယင်းဥပဒေ၏ ပုဒ်မ – ၃၉ တွင် ဤဥပဒေပါ ပြဌာန်းချက်များသည် ကာကွယ်ရေး ၀န်ကြီးဌာနနှင့် သက်ဆိုင်ခြင်း မရှိစေရဟူ၍ ပြဌာန်းထားသည်။ ပြည်ထောင်စု စာရင်းစစ်ချုပ်၏ တာဝန်များအနက် -

ပြည်ထောင်စုလွှတ်တော် အစည်းအဝေးတွင်ဖြစ်စေ၊ ပြည်သူ့လွှတ်တော် (သို့မဟုတ်) အမျိုးသား လွှတ်တော် အစည်း အဝေးတွင် ဖြစ်စေ နိုင်ငံတော်၏ အရ အသုံးစာရင်းများ စစ်ဆေးခြင်းနှင့် စပ်လျဉ်း၍ ထူးခြားသော အခြေအနေကို အခါ အားလျော်စွာ တင်ပြခြင်း၊ ပြည်ထောင်စု၏ ဘဏ္ဍာငွေ အရအသုံး ဆိုင်ရာ ဥပဒေပါ ပြဌာန်းချက်များအရ၊ နိုင်ငံတော်၏ အရ/ အသုံး စာရင်းများကို စစ်ဆေးခြင်း၊ အရ/အသုံး ခန့်မှန်းခြေ ငွေစာရင်းပါ ရငွေများကို ပြည့်ဝစွာ ရရှိစေရန် ဆောင်ရွက်ထားခြင်း ရှိ/မရှိ စစ်ဆေးခြင်း၊ အရ/အသုံး ခန့်မှန်းခြေ စာရင်းပါ သုံးစွဲ ခွင့်ပြုထားသည့် ငွေကြေးများကို ထိရောက်စွာ အသုံးပြု/မပြု စစ်ဆေးခြင်း စသည်အားဖြင့် တာဝန်များ ထမ်းဆောင်ရမည် ဖြစ်သည်။ ဘဏ္ဍာရေးနှစ် တနှစ်၏ ရ/သုံး ဆိုင်ရာ ဥပဒေအရ ရ/သုံးစာရင်းတွင် ကာကွယ်ရေး အတွက် ပါရှိသော်လည်း စာရင်းစစ်ချုပ် ဥပဒေအရ ကာကွယ်ရေး ၀န်ကြီးဌာနနှင့် သက်ဆိုင်ခြင်း မရှိစေရ ဆိုသည့် ပြဌာန်းချက်မှာ န.အ.ဖ အနေဖြင့် ၄င်းတို့၏ အကျိုးစီးပွားကို ကာကွယ်နိုင်ရန် အလို့ငှာ ထည့်သွင်း ပြဌာန်းထားခြင်း ဖြစ်ကြောင်း ထင်ရှားသည်။

စာရင်းစစ်ချုပ်ဥပဒေအရ ၁၉၈၈ခုနှစ် နိုင်ငံတော် ငြိမ်ဝပ်ပိပြားမှု တည်ဆောက်ရေးအဖွဲ့ ဥပဒေ အမှတ် ၅ ကို ရုတ်သိမ်း ထားသည်။ သို့ရာတွင် ၁၉၈၈ ခုနှစ် ဥပဒေအမှတ် – ၅ စာရင်းစစ်ချုပ် ဥပဒေ၏ ပုဒ်မ – ၃ (က) ပြဌာန်းချက် ဖြစ်သည့် စာရင်းစစ်ချုပ်၏ တာဝန်တရပ် ဖြစ်သည့် – နိုင်ငံတော် ငြိမ်ဝပ်ပိပြားမှု တည်ဆောက်ရေး အဖွဲ့၊ အစိုးရအဖွဲ့၊ ၀န်ကြီးဌာန၊ အစိုးရဌာန၏ ဆောင်ရွက်ချက်များသည် ပြည်သူ လူထုအတွက် အကျိုးသက်ရောက်မှု ရှိ/မရှိ စစ်ဆေး၍ သက်ဆိုင်ရာသို့ တင်ပြရခြင်းနှင့် ရ/သုံး မှန်းခြေ ငွေစာရင်းပါ သုံးခွင့်ပြုထားသည့် ငွေကြေးများကို ထိရောက်စွာ အသုံးပြု/မပြု စစ်ဆေးခြင်း စသည့် တာဝန်များကို န.၀.တ၊ န.အ.ဖ လက်ထက် စာရင်းစစ်ချုပ် တာဝန် ထမ်းဆောင်ခဲ့သူက ၂၀၁၀ န.အ.ဖ ဥပဒေအမှတ် – ၂၃ အရ ပေါ်ပေါက်လာမည့် စာရင်းစစ်ချုပ် ထံသို့ ၄င်း၏ တာဝန်နှင့် လုပ်ပိုင်ခွင့်များကို လွှဲပြောင်း ပေးအပ်ရမည် ဖြစ်သည်။ ယင်းသို့ဆိုလျှင် န.၀.တ၊ န.အ.ဖ လက်ထက်တွင် သုံးစွဲခဲ့သည့် နိုင်ငံတော် ဘဏ္ဍာငွေများနှင့် စပ်လျဉ်း၍လည်း ပေါ်ပေါက်လာသည့် လွှတ်တော်များတွင် ရှင်းလင်းတင်ပြရန် လိုအပ်သည်/မလိုအပ်သည် ဆိုသည်မှာ မေးခွန်းထုတ်စရာ ဖြစ်လာသည်။

* န.၀.တ၊ န.အ.ဖ အုပ်ချုပ်ဆဲကာလတွင် နိုင်ငံတော် ရ/သုံးစာရင်းကို ၀န်ကြီးဌာန အလိုက် မည်သည့် မူဝါဒများနှင့် ခွဲဝေ သတ်မှတ် သုံးစွဲပါသနည်း။
* ယင်းသို့ခွဲဝေသုံးစွဲခြင်းများသည် ပြည်သူလူထုအကျိုး အတွက် သက်ရောက်မှု ရှိ/မရှိ။
* ရ/သုံးမှန်းခြေငွေစာရင်းပါ သုံးခွင့်ပြုထားသည့် ငွေကြေးများကို ထိရောက်စွာ အသုံးပြုခြင်း ရှိ/မရှိ။
* ရန်ကုန်မြို့တော်မှ ပျဉ်းမနားမြို့တော်သို့ ပြောင်းရွှေ့ခြင်းမှာ မည်သည့် မူဝါဒအရ ပြောင်းရွှေ့ခြင်းနှင့် ထိုသို့ ပြောင်းရွှေ့၊ မြို့တော်သစ် တည်ဆောက်ရာတွင် မည်သည့် ဘဏ္ဍာငွေများကို သုံးစွဲ၍၊ ထိုသို့သုံးစွဲသည့် ဘဏ္ဍာငွေ များကိုလည်း မည်သူတို့ အပ်နှင်းသည့် အခွင့်အာဏာအရ သုံးစွဲသနည်း။ စသည် ……….

စသည်အားဖြင့် န.၀.တ၊ န.အ.ဖ အုပ်ချုပ်ခဲ့သည့် ကာလတလျှောက် ဘဏ္ဍာရေးနှစ် တနှစ်ချင်းစီ အလိုက် ပေါ်ပေါက် လာသည့် လွှတ်တော်များတွင် တင်ပြရန် တာဝန်သည် ယခင် စာရင်းစစ်ချုပ်နှင့် ယခင် စာရင်းစစ်ချုပ်မှ တာဝန် လွှဲပြောင်းပေးသည်ကို လက်ခံပြီး ဖြစ်သည် ဆိုပါက ယခု စာရင်းစစ်ချုပ်တို့၏ တာဝန်ပင်ဖြစ်သည်။ ထို့ကြောင့် ဖွဲ့စည်း အုပ်ချုပ်ပုံ အခြေခံ ဥပဒေတွင် လည်းကောင်း၊ ၂၀၁၁ခုနှစ်၊ အောက်တို ဘာလ ၂၈ ရက်နေ့တွင် ပြဌာန်း လိုက်သည့် ပြည်ထောင်စု စာရင်းစစ်ချုပ် ဥပဒေတွင် လည်းကောင်း မဖြစ်မနေ ထည့်သွင်း ပြဌာန်းရမည့် ပုဒ်မ တရပ်မှာ – န.၀.တ အာဏာ သိမ်းသည့် အချိန်မှစတင်ကာ န.အ.ဖ မှ ပြည်ထောင်စု အစိုးရထံသို့ အာဏာ လွှဲပြောင်းပေးသည့် အချိန်အထိ သက်ဆိုင်ရာ ဘဏ္ဍာရေးနှစ် အလိုက် စာရင်းစစ်ချုပ် အဖြစ် နောက်ဆုံး တာဝန် အပ်နှင်း ခံရသူသည် ပေါ်ပေါက်လာသော လွှတ်တော်များတွင် ၈၉ – ၉၀ ဘဏ္ဍာရေးနှစ်မှ ၂၀၀၉ – ၂၀၁၀ ဘဏ္ဍာရေးနှစ်အထိ န.၀.တ၊ န.အ.ဖ အစိုးရနှင့် ၀န်ကြီး ဌာနများ၏ လုပ်ဆောင်ချက်များ၊ ဘဏ္ဍာငွေကြေး သုံးစွဲမှုများသည် မှန်ကန်မှုရှိ/မရှိ၊ ပြည်သူ လူထုအတွက် အကျိုးရှိ/မရှိ စသည်တို့ကို ရှင်းလင်း တင်ပြရမည် ဆိုသည့် ပြဌာန်းချက်ပင်ဖြစ်သည်။

ယင်းသို့ တင်ပြမှသာလျှင် ပြည်သူ့ငွေစာရင်းကော်မတီက စာရင်းစစ်ချုပ်၏ တင်ပြချက်များကို စစ်ဆေး နိုင်မည် ဖြစ်သည်။ န.၀.တ၊ န.အ.ဖ အစိုးရ နှင့် သက်ဆိုင်ရာ ၀န်ကြီးဌာနတို့၏ ဘဏ္ဍာငွေကြေး အလွဲသုံးစားမှုများ ပေါ်ပေါက် လာပါကလည်း အရေး ယူနိုင်မည် ဖြစ်သည်။ န.၀.တ၊ န.အ.ဖ သည် စစ်အစိုးရ ဖြစ်သောကြောင့် စစ်အုပ်ချုပ်ရေးနှင့် အုပ်ချုပ် ခဲ့စေကာမူ ဘဏ္ဍာငွေ ဆိုသည်မှာ နိုင်ငံတော်ပိုင် ပြည်သူ့ ဘဏ္ဍာငွေကြေးများပင် ဖြစ်သည်။ ယင်း ဘဏ္ဍာငွေကြေးများကို တိုင်းပြည်နှင့် ပြည်သူလူထု အကျိုးပြုနိုင်စေရေး ရည်ရွယ်ချက်ဖြင့် သုံးစွဲခြင်း မဟုတ်ဘဲ အာဏာ တည်မြဲရေး အတွက် သော်လည်းကောင်း၊ ကိုယ်ကျိုး အသုံးပြုရေး အတွက်သော်လည်းကောင်း၊ အများပြည်သူက ရွေးချယ် ခန့်အပ်သည့် ကိုယ်စားလှယ်များ၏ အဆုံး အဖြတ် အားဖြင့်သာ ဆောင်ရွက်နိုင်မည့် နိုင်ငံတော်အဆင့် စီမံကိန်းများကို အစိုးရအဖွဲ့ အစည်းတစ်ရပ်၊ ၀န်ကြီးဌာန တစ်ခုတည်း၏ အဆုံးအဖြတ်ဖြင့် ဘဏ္ဍာငွေကြေးများ သုံးစွဲလျှင် သော်လည်းကောင်း၊ စစ်ဆေးရမည့် တာဝန်မှာ စာရင်းစစ်ချုပ်၏ တာဝန် ဖြစ်သည်။

န.၀.တ၊ န.အ.ဖ မြန်မာနိုင်ငံကို အုပ်ချုပ်ခဲ့သည်မှာ နှစ်ပေါင်း (၂၀)ကျော် ကြာမြင့်ခဲ့သည်။ ယင်းနှစ်ပေါင်း နှစ်ဆယ်ကျော် အတွင်း လုပ်ဆောင်ခဲ့သည့် လုပ်ဆောင်ချက်များကို လွှတ်တော်များတွင် တက်ရောက် လာသည့် ပြည်သူ့ လွှတ်တော် ကိုယ်စားလှယ်များအား မေးခွန်းများမေးခွင့် ပြုရုံလောက်နှင့် လုံလောက်သည်ဟူ၍ မှတ်ယူလို့ မရသကဲ့သို့၊ တက်ရောက် ကြရသည့် ကိုယ်စားလှယ်များ အနေဖြင့်လည်း န.၀.တ၊ န.အ.ဖ ရှုပ်ခဲ့သည့် အရှုပ်ထုပ်မှန်သမျှ မိမိတို့ ခေါင်းပေါ်တွင် ကျရောက်လာတော့မည် ဟူသည့် အသိစိတ်ကို အမြဲနှလုံးသွင်း နေကြရမည်ဖြစ်သည်။

အထူးသဖြင့် န.၀.တ၊ န.အ.ဖ လက်ထက် သုံးစွဲခဲ့သည့် ဘဏ္ဍာငွေကြေးများနှင့် စပ်လျဉ်းသော ပြည်သူ့ငွေ စာရင်း ကော်မတီနှင့် လွှတ်တော် ကိုယ်စားလှယ်များ အားလုံးတို့သည် တိတိ ကျကျ စုံစမ်းစစ်ဆေးရန် တာဝန်ရှိသည်။ ယင်းကဲ့သို့ စုံစမ်း စစ်ဆေးခြင်းများကို ပြုလုပ် လာနိုင်သည့် ဘေးအန္တရာယ်မှ ကာကွယ်နိုင်ရန် အတွက် န.အ.ဖ အနေဖြင့် လွှတ်တော်များ၏ လုပ်ပိုင်ခွင့် အာဏာများကို အပ်နှင်းခြင်း မရှိသေးမီ ဥပဒေများကို တခုပြီးတခု ပြဌာန်း ကာကွယ်နေခြင်း ဖြစ်ကြောင်း ထင်ရှားသည်။

သို့ရာတွင် ဖွဲ့စည်းအုပ်ချုပ်ပုံ အခြေခံဥပဒေပုဒ်မ – ၄၄၅ တွင် ပြဌာန်းထားသည်မှာ ယင်းအဖွဲ့၊ သို့မဟုတ် အဖွဲ့ဝင် တဦးဦး သို့မဟုတ် အစိုးရ အဖွဲ့ဝင် တဦးဦး၏ တာဝန်အရ ဆောင်ရွက်ချက်များ အပေါ် အကြောင်းပြုလျက် ယင်းတို့အား တရား စွဲဆိုခြင်း၊ အရေးယူခြင်း မရှိစေရ ဟု ပြဌာန်း ထားခြင်းဖြစ်သည်။ တာဝန်အရ ဆောင်ရွက်ချက် ဟူသော စကားရပ်ကို မည်ကဲ့သို့ အဓိပ္ပာယ် ဖွင့်ဆိုမည်နည်း။ နိုင်ငံတော်၏ ဘဏ္ဍာငွေကြေးများကို အလွဲသုံးစား လုပ်ခြင်း၊ ရ/သုံး မှန်းခြေထက် ကျော်လွန်သုံးစွဲခြင်း၊ ပြည်သူ့ အကျိုးစီးပွားနှင့် ဆန့်ကျင်သည့် ကိစ္စရပ်များတွင် ဘဏ္ဍာငွေကြေးများ သုံးစွဲခြင်း စသည့် လုပ်ရပ်များသည် တာဝန်အရ ဆောင်ရွက်သည်ဟူသော စကားရပ်တွင် အကြုံးဝင်မှု မရှိပါ။

ပြစ်မှုတရပ်ရပ်ကို ကျူးလွန်ခြင်းသည် အထက်လူကြီး၏ တာဝန်ပေးအပ်ချက် အရ ကျူးလွန် ရပါသည် ဟူ၍ အကြောင်း ပြရုံ သက်သက်ဖြင့် ကင်းလွတ်ခွင့် ရနိုင်မည်မဟုတ်။ ထို့ကြောင့် န.၀.တ၊ န.အ.ဖ လက်ထက် မိမိ အထက် အရာရှိတို့၏ အကာ အကွယ်ကို ရယူလျက်၊ ငွေကြေး အလွဲသုံးစားမှု ကျူးလွန်ခြင်း၊ အစိုးရကိုယ်တိုင် နိုင်ငံတော် ဘဏ္ဍာ ငွေကြေးများကို အလွဲသုံးစား ပြုလုပ်ခြင်းတို့ကို ဖေါ်ထုတ်ရမည့် တာဝန်သည် ပြည်သူ့ငွေစာရင်း ကော်မတီနှင့် လွှတ်တော် ကိုယ်စားလှယ် အားလုံး၏ သမိုင်းပေး တာဝန် ဖြစ်ပြီး၊ န.၀.တ၊ န.အ.ဖ အနေဖြင့်လည်း ၄င်းတို့သည် တာဝန်အရ လုပ်ဆောင်ခြင်း မဟုတ်ဘဲ ပြစ်မှုများ ကျူးလွန် ထားသည်ဆိုပါက ဖွဲ့စည်း အုပ်ချုပ်ပုံ အခြေခံဥပဒေ ပုဒ်မ – ၄၄၅ ၏ အကာ အကွယ်ကို ရရှိနိုင်မည် မဟုတ်ကြောင်း ရေးသား လိုက်ရပါသည်။

စောကျော်ကျော်မင်း

၁၅.၃.၂၀၁၀
]Ref: ABMA