ဟီလာရီ ကလင်တန် ခရီးစဉ်အတွင်း လွတ်ငြိမ်း ချမ်းသာခွင့်ပေးဖို့ မျှော်လင့်

2011-11-29

အမေရိကန် နိုင်ငံခြားရေး ၀န်ကြီး မစ္စစ် ဟီလာရီ ကလင်တန်ရဲ့ ခရီးစဉ် အတွင်း လွတ်ငြိမ်း ချမ်းသာခွင့် ပေးဖို့ မျှော်လင့်ကြောင်း မြန်မာနိုင်ငံ အမျိုးသား လူ့အခွင့်အရေး ကော်မရှင်က ပြောပါတယ်။

အမျိုးသား လူ့အခွင့်အရေး ကော်မရှင် အနေနဲ့ လွတ်ငြိမ်း ချမ်းသာခွင့်ပေးဖို့ သမ္မတထံ မေတ္တာရပ်ခံ ထားပြီး ဖြစ်တဲ့ အတွက် အခုလို မျှော်လင့်ရတာလို့ ကော်မရှင်ရဲ့ ဥက္ကဋ္ဌ ဦးဝင်းမြက အာရ်အက်ဖ်အေကို ပြောပါတယ်။

၂၀၁၁ ခုနှစ် မတ်လ ၈ ရက်နေ့တွင် ကျရောက်သည့် အနှစ်တရာမြောက် နိုင်ငံတကာ အမျိုးသမီးများနေ့တွင်
အမေရိကန်နိုင်ငံ နိုင်ငံခြားရေးဝန်ကြီး ဟီလာရီ ကလင်တန်က
အမျိုးသမီး သတ္တိရှင်ဆုပေးပွဲကို ဦးဆောင် ကျင်းပနေစဉ်။

ယုံကြည်ချက်ကြောင့် အကျဉ်းကျ ခံနေရသူတွေကို နောက်တစ်ကြိမ် လွတ်ငြိမ်း ချမ်းသာခွင့် ပေးဖို့နဲ့ လွတ်ငြိမ်း ချမ်းသာခွင့်မှာ ထည့်မပေးနိုင်တဲ့ သူတွေ ရှိခဲ့ရင် မိသားစုနဲ့ တွေ့ဆုံမှု အဆင်ပြေအောင် သွားလာရ လွယ်ကူတဲ့ အကျဉ်းထောင်တွေကို ပြောင်းရွှေ့ပေးဖို့ အခုလ ၁၂ ရက် ရက်စွဲနဲ့ သမ္မတ ဦးသိန်းစိန်ထံ မြန်မာ နိုင်ငံ လူ့အခွင့်အရေး ကော်မရှင်က အိတ်ဖွင့်ပေးစာ ပေးပို့ခဲ့ပါတယ်။

ပြည်တွင်း ပြည်ပ အဖွဲ့အစည်း အသီးသီးက ထုတ်ပြန်တဲ့ စာရင်းတွေ အရ မြန်မာနိုင်ငံမှာ ယုံကြည်ချက်ကြောင့် အကျဉ်းကျ ခံနေရသူ အရေအတွက် အမျိုးမျိုး ကွဲပြားနေပေမယ့် မြန်မာနိုင်ငံ အမျိုးသား လူ့အခွင့်အရေး ကော်မရှင်ရဲ့ စုံစမ်း လေ့လာချက် အရတော့ ယုံကြည်ချက်ကြောင့် အကျဉ်းကျခံနေရသူ ၃၀၀ လောက်ပဲ ရှိတော့ကြောင်း ဦးဝင်းမြက ပြောပါတယ်။

မြန်မာနိုင်ငံ လူ့အခွင့်အရေး ကော်မရှင်ကို အငြိမ်းစား သံအမတ်ကြီးတွေ၊ တက္ကသိုလ် ပါမောက္ခဟောင်းတွေ၊ အစိုးရ အရာရှိ ဟောင်းတွေနဲ့ အခုနှစ် စက်တင်ဘာ လဆန်းပိုင်းက စတင် ဖွဲ့စည်းခဲ့ပါတယ်။ ကော်မရှင် အနေနဲ့ လောလောဆယ်မှာ မြေယာ သိမ်းယူမှု ကိစ္စ တိုင်တန်းချက် တွေကို အဓိက ကိုင်တွယ် ဖြေရှင်း ပေးနေရတယ်လို့ သိရပါတယ်။

Ref: RFA News