ဒေါ်အောင်ဆန်းစုကြည်နှင့် ဦးအောင်ကြည် ထပ်မံတွေ့ဆုံ

ကိုဇော်ဝင်းလှိုင်
တနင်္ဂနွေ, 30 အောက်တိုဘာ 2011

ပြင်ဆင်ထားတဲ့ နိုင်ငံရေးပါတီများ မှတ်ပုံတင်ခြင်းဆိုင်ရာ ဥပဒေကို အတည်ပြုပြီးမှ အမျိုးသား ဒီမိုကရေစီ အဖွဲ့ချုပ် (NLD) အနေနဲ့ နိုင်ငံရေးပါတီ အဖြစ် မှတ်ပုံတင်ရေး ကိစ္စကို ဆုံးဖြတ်မယ်လို့ ပါတီခေါင်းဆောင် ဒေါ်အောင်ဆန်းစုကြည်က ပြောကြား လိုက်ပါတယ်။ ပြည်ထောင်စု အစိုးရ၀န်ကြီး ဦးအောင်ကြည်နဲ့ တနင်္ဂနွေနေ့က တွေ့ဆုံအပြီး ပြုလုပ်တဲ့ သတင်းစာ ရှင်းလင်းပွဲ အတွင်း မြန်မာ့ ဒီမိုကရေစီအရေး ခေါင်းဆောင် ဒေါ်အောင်ဆန်းစုကြည်က အဲဒီလို ပြောကြား လိုက်တာပါ။ အပြည့်အစုံကိုတော့ ကိုဇော်ဝင်းလှိုင်က တင်ပြ ထားပါတယ်။

မြန်မာ့ဒီမိုကရေစီအရေးခေါင်းဆောင် ဒေါ်အောင်ဆန်းစုကြည်နဲ့ အလုပ်သမားဝန်ကြီးဌာနနဲ့ လူမှုဝန်ထမ်း ကယ်ဆယ်ရေးနဲ့ နေရာ ပြန်လည် ချထားရေးဝန်ကြီး ဦးအောင်ကြည်တို့ တနင်္ဂနွေနေ့ နေ့လည်ပိုင်းက ရန်ကုန် စိမ်းလဲ့ ကန်သာရိပ်သာမှာ တွေ့ဆုံ ခဲ့ကြတာပါ။ တွေ့ဆုံအပြီး ပြုလုပ်တဲ့ သတင်းစာ ရှင်းလင်းပွဲအတွင်း NLD ပါတီ မှတ်ပုံတင်ရေး ကိစ္စနဲ့ ပတ်သက်လို့ သတင်းထောက် တွေရဲ့အမေးကို ဒေါ်အောင်ဆန်းစုကြည်က အခုလို ဖြေကြား ခဲ့ပါတယ်။

“ကျမတို့က NLD ပါတီ ပြန်ပြီးတော့ မှတ်ပုံတင်ရေးကိစ္စဟာ ဥပဒေအပေါ်မှာ တည်ပါတယ်။ အဲဒီတော့ ဒီဥပဒေ အတည် ပြုပြီးတော့ ထွက်လာတဲ့ အထိ စောင့်ပြီးတော့မှ ကျမတို့ ပြောနိုင်မယ့်ကိစ္စ ဖြစ်ပါတယ်။ ကျမတို့က ဒီဥပဒေ ထွက်လာပြီဆိုရင် အစည်းအဝေး ခေါ်ရမှာပေါ့။ ဒါ ကျမတို့ရဲ့ ပါတီ စည်းမျဉ်းစည်းကမ်း အရ အစည်းအဝေး ခေါ်ပြီးမှ ဆုံးဖြတ်ချက်ကို ချပါလိမ့်မယ်။ ဒါပေမဲ့ ကျမတို့က တိကျတယ်လေ။ ဥပဒေကို ကြည့်ပြီးမှပြောတယ်။ မကြည့်ရသေးလို့ ကျမ မမြင်ရသေးလို့ မပြောသေးတာပါ။”

NLD ပါတီ မှတ်ပုံတင်ရေးကိစ္စအပြင် ကုန်သွယ်ရေးနဲ့ လွတ်လပ်စွာ ငွေကြေးလည်ပတ်မှုအပါအ၀င် တခြား ဆွေးနွေး ဖြစ်ခဲ့ကြတဲ့ အကြောင်းအရာ တွေကိုတော့ ၀န်ကြီး ဦးအောင်ကြည်က သတင်းစာ ရှင်းလင်းပွဲ အစမှာ ဖတ်ကြား ပြခဲ့ပါတယ်။

“ယခင် ဆွေးနွေးခဲ့မှုများအပေါ် နိုင်ငံတော်က လိုအပ်သည်များ ကူညီဆောင်ရွက်ပေးနေသည့် အခြေအနေ၊ တိုင်းပြည် စီးပွားရေး ဖွံ့ဖြိုး တိုးတက်လာစေရန် အတွက် လွတ်လပ်စွာကုန်သွယ်ခွင့်၊ ကူးသန်းရောင်းဝယ်ခွင့် ရရှိရေးနဲ့ လွတ်လပ်စွာငွေကြေး လည်ပတ် သုံးစွဲခွင့် ရရှိရေးတို့နှင့် ပတ်သက်၍ အမြင်ချင်းဖလှယ် ဆွေးနွေး ကြပါသည်။ ထို့အပြင် တိုင်းရင်းသား လက်နက်ကိုင် အဖွဲ့ အစည်းများနှင့် ထာဝရ ငြိမ်းချမ်းရေး ရရှိရန် နိုင်ငံတော်က ဆောင်ရွက်ပေးနေမှုများ၊ တိုးတက်ဖြစ်ထွန်းမှု အခြေအနေများနှင့် လွတ်ငြိမ်း ချမ်းသာခွင့် ပေးသင့် သူများကိုလည်း ဆွေးနွေး ခဲ့ကြပါသည်။ တွေ့ဆုံ ဆွေးနွေးမှုများကို ဆက်လက် ပြုလုပ်သွားရန် သဘော တူညီခဲ့ကြပါသည်။ ဒီလောက်ပါပဲ။”

နိုင်ငံရေးအကျဉ်းသားတွေ လွှတ်ပေးရေးကိစ္စနဲ့ပတ်သက်လို့ သတင်းထောက်တွေက မေးတာကိုလည်း ၀န်ကြီး ဦးအောင်ကြည်က အခုလို ပြန်လည် ဖြေကြားခဲ့ပါတယ်။

“ကျနော်တို့က လုပ်ငန်းစဉ်တစ်ရပ်ကို လုပ်တဲ့အခါမှာ ကျနော်တို့ တစ်လှမ်းပြီး တစ်လှမ်း ဆောင်ရွက်တတ်တဲ့ သဘာဝ ရှိပါတယ်။ အဲဒါ အားလုံးလည်း သိတဲ့ အတိုင်းပဲ။ ကျနော်တို့က စုံလည်း မခုန်ဘူး၊ ရပ်လည်း မနေပါဘူး။ အားလုံးကို ကျေးဇူး တင်ပါတယ်။”

မွန်းလွဲ ၁ နာရီကနေ ၁ နာရီ ၅၅ မိနစ်အထိ ပြုလုပ်တဲ့ ဒီတွေ့ဆုံ ဆွေးနွေးမှုဟာ သမ္မတ ဦးသိန်းစိန် ဦးဆောင်တဲ့ အစိုးရသစ် တက်လာပြီး နောက်ပိုင်း ၄ ကြိမ်မြောက် တွေ့ဆုံခြင်းလည်း ဖြစ်ပါတယ်။ အရင် စစ် အစိုးရ လက်ထက် ဦးအောင်ကြည်ကို ဆက်ဆံရေး ၀န်ကြီး အဖြစ် တာဝန်ပေးလိုက်တဲ့ ၂၀၀၇ ခုနှစ်ကစလို့ ဒေါ်အောင်ဆန်းစုကြည်နဲ့ ဦးအောင်ကြည်တို့ အကြား ၉ ကြိမ် တိုင်တိုင် တွေ့ခဲ့ပြီးလည်း ဖြစ်တာကြောင့် စုစုပေါင်းတွေ့ဆုံမှုဟာ ၁၃ ကြိမ် အထိ ရှိသွားပြီ ဖြစ်ပါတယ်။

Ref: VOA News