ငွေစာရင်း ကွာဟမှုကြောင့် မြန်မာ့အလင်းသတင်းစာ ၀န်ထမ်း ၃ ဦး အဖမ်းခံရ

မြတ်မိုး
November 3, 2011

မြန်မာ့အလင်း သတင်းစာတိုက်တွင် ငွေ ကျပ် သိန်း ၈၀၀၀ စာရင်းကွာဟနေမှုကြောင့် ၀န်ထမ်းသုံးဦးကို တရား စွဲထားကြောင်း စုံစမ်း သိရှိရသည်။

ငွေကိုင်မန်နေဂျာ၊ စာရင်းကိုင်နှင့် ဖြန့်ချိရေးတာဝန်ခံ သုံးဦးကို ရန်ကုန်မြို့ ဗဟန်းမြို့နယ် ရဲစခန်းတွင် အမှုဖွင့် တရားစွဲထားခြင်း ဖြစ်သည်။

၂၀၁၀ -၂၀၁၁ ငွေစာရင်း ရှင်းတန်း၌ သိန်း ၈၀၀၀ စာရင်းကွာဟနေမှုကို စစ်ဆေးတွေ့ရှိခဲ့ခြင်း ဖြစ်ကြောင်း၊ အဆိုပါ ငွေစာရင်းကွာဟ မှုတွင် ပါဝင်ပတ်သက်သူများကို ဆက်လက် စစ်ဆေး ဖော်ထုတ်နေကြောင်း သိရသည်။

“ဘယ်အချိန်ကတည်းက စာရင်းတွေကွာနေလဲ မသိဘူး၊ ဒီနှစ်မှ သိရတာ၊ အကြီးပိုင်းတွေ ပါဝင်ပတ်သက်နေလို့ စစ်ဆေးမှုတွေ လုပ်နေတယ်”ဟု မြန်မာ့အလင်း သတင်းစာတိုက်မှ စာတည်းမှူး တဦးက ပြောဆိုသည်။

ငွေစာရင်းကွာဟမှုကြောင့် တရားစွဲခံထားရသော ၀န်ထမ်း သုံးဦးသည် အင်းစိန် အကျဉ်းထောင်တွင် အချုပ်ကျ ခံနေရသည်ဟု ၀န်ထမ်း မိသားစုများက ပြောသည်။

“သူ့ရဲ့ အလုပ်ကို နားမလည်ပေမယ့် သိန်း ၈၀၀၀ ဆိုတဲ့ အလွဲသုံးစားမှု သူမလုပ်ပါဘူး”ဟု ငွေစာရင်း ကွာဟမှုဖြင့် အချုပ် ကျနေသော ၀န်ထမ်း တဦး၏ ညီမဖြစ်သူက ပြောဆိုသည်။

ယခု ငွေစာရင်းကွာဟမှု ဖြစ်ပွားနေချိန်သည် ပြန်ကြားရေးနှင့် ယဉ်ကျေးမှု ၀န်ကြီးဌာန ပြည်ထောင်စု ၀န်ကြီး ဗိုလ်ချုပ် ကျော်ဆန်း ၏ နေရာကို နယ်စပ်ရေးရာ ၀န်ကြီး ဦးသိန်းဌေးက ယာယီ တာဝန် ယူထားသည်ဟူသော သတင်းများ ထွက်ပေါ် နေချိန်နှင့်လည်း တိုက်ဆိုင် နေသည်။

ဗိုလ်ချုပ်ကျော်ဆန်းနှင့် ငွေစာရင်း ကွာဟမှု ပတ်သက်ခြင်း ရှိ မရှိကိုမူ ရှင်းလင်းစွာ မသိရှိရ သေးပေ။

မြန်မာ့အလင်း သတင်းစာသည် စောင်ရေ ၁ သိန်း ၆ သောင်းခန့် နှင့် The New Light of Myanmar သည် စောင်ရေ ၁ သိန်းနီးပါး နေ့စဉ် ထုတ်ဝေ ဖြန့်ချိလျက်ရှိကြောင်း သိရသည်။

Ref: ဧရာဝတီ