ရှပ်ပြေးယာဉ်မြုပ်မှု ၁၄ ဦး ပျောက်ဆုံးနေဆဲ

2012-07-25

ကချင်ပြည်နယ် ဗန်းမော်မြို့မှာ အခုလ ၂၀ ရက်နေ့က နစ်မြုပ်ခဲ့တဲ့ မြမင်းအောင် (၁) ရှပ်ပြေးရေယာဉ်ကို ဒီကနေ့ နေ့လည် ပိုင်းမှာ ကမ်းပေါ်ကို ၀န်ချီစက်နဲ့ ဆွဲတင်နိုင်ခဲ့ပြီး ဖြစ်ပေမယ့် လူ (၁၄) ဦး ပျောက်ဆုံးနေဆဲလို့ ကယ်ဆယ်ရေးသမားတွေက ပြောပါတယ်။

လောလောဆယ်အထိ ကယ်ဆယ်ရရှိသူ (၇၉) ဦးရှိပြီး ဘုန်းကြီးအလောင်း (၁) လောင်း အပါအ၀င်၊ စုစုပေါင်း ရုပ်အလောင်း (၁၅) လောင်းကို ဆယ်ယူရရှိထားပြီ ဖြစ်တယ်လို့ ကယ်ဆယ်ရေး လုပ်ငန်းတွေမှာ ပါဝင်ဆောင်ရွက်နေတဲ့ ဗန်းမော်မြို့ခံ အမျိုး သမီးတစ်ဦးက ပြောပါတယ်။

ဒီကနေ့ ဆယ်ယူရရှိတဲ့ မြမင်းအောင် ရှပ်ပြေးယာဉ်ပေါ်မှာ ထီး ၆ လက်၊ ခရီးဆောင်အိတ် ၉အိတ်ကိုပဲတွေ့ပြီး မတန်တဆ တင် ဆောင်လာတဲ့ ဘိလပ်မြေအိတ်၊ ဓာတ်မြေသြဇာအိတ်နဲ့ မော်တော်ဆိုင်ကယ်တွေကို မတွေ့တာကိုတော့ မြို့ခံတွေက သံသယဝင် နေကြပါတယ်။

ပျောက်ဆုံးနေဆဲ ခရီးသည်တွေရဲ့ မိသားစုဝင်တွေကလည်း သူတို့ရဲ့ မိသားစုဆွေမျိုးတွေကို ရှာမတွေ့သေးတဲ့အပေါ် မကျေမနပ် ဖြစ်နေကြတယ်လို့ သိရပါတယ်။

ဗန်းမော်မြို့မှာ အခု ရှပ်ပြေးရေယာဉ်နစ်မြုပ်မှုနဲ့ ပတ်သက်ပြီး ကချင်ပြည်နယ် အစိုးရအဖွဲ့က စုံစမ်းရေးအဖွဲ့တစ်ခု ဖွဲ့စည်းသွားမယ် လို့ ဆိုပါတယ်။


Ref: အာရ်အဖ်အေ