SNLD ရုံးခန်းဖွင့်ပြီ

2012-08-15

ဦးခွန်ထွန်းဦး ခေါင်းဆောင်တဲ့ ရှမ်းတိုင်းရင်းသားများ ဒီမိုကရေစီအဖွဲ့ချုပ် (SNLD) ဗဟိုဌာနချုပ် ရုံးခန်း ဖွင့်ပွဲနဲ့ ဆိုင်းဘုတ်တင် အခမ်းအနားကို ရန်ကုန်မြို့ မရမ်းကုန်းမြို့နယ်မှာ ဒီကနေ့ မနက်ပိုင်းက ကျင်းပခဲ့ပြီး ဦးတင်ဦး၊ ဦးဥာဏ်ဝင်း စတဲ့ NLD ပါတီ ခေါင်းဆောင်တွေ အပါအ၀င် နိုင်ငံရေးပါတီ အသီးအသီးက ပုဂ္ဂိုလ် (၁၀၀)ကျော် တက်ရောက်ခဲ့သလို ပြည်ထောင်စု ၀န်ကြီး တွေဖြစ်တဲ့ ဦးအောင်မင်းနဲ့ ဦးစိုးသိန်းတို့ကလည်း ဂုဏ်ပြုပန်းခြင်းတွေ ပေးပို့ခဲ့ပါတယ်။

SNLD ပါတီအနေနဲ့ မူလရည်ရွယ်ချက်ဖြစ်တဲ့ တိုင်းရင်းသား အချင်းချင်း တန်းတူညီမျှရေးနဲ့ ငြိမ်းချမ်းရေး လုပ်ငန်းတွေ ဆက် လက် လုပ်ဆောင်သွားမယ်လို့ SNLD ပါတီ ဥက္ကဋ္ဌ ဦးခွန်ထွန်းဦးက အခမ်းအနားမှာ ပြောကြားခဲ့ပါတယ်။

အခမ်းအနားမှာ SNLD ပါတီကနေ ဒီကနေ့ရက်စွဲနဲ့ သဘောထား ကြေညာချက်တစ်စောင်ကိုလည်း ထုတ်ပြန်ခဲ့ပါတယ်။ အခု လတ်တလော ကြုံတွေ့နေရတဲ့ တိုင်းရင်းသားပဋိပက္ခတွေပေါ် မူတည်ပြီး နောက်ထပ်ဖြစ်လာနိုင်မယ့် ပြည်နယ်ပြဿနာ တွေကို သက်ဆိုင်ရာ ပြည်နယ်အစိုးရတွေက ကိုယ်တိုင် ဖြေရှင်းသွားနိုင်ဖို့အတွက် ပြည်နယ်အစိုးရတွေရဲ့ လုပ်ပိုင်ခွင့်တွေကို ကြိုတင် အပ်နှင်း သင့်ကြောင်း၊ စစ်မှန်တဲ့ ထာဝရငြိမ်းချမ်းရေးကို ရရှိစေဖို့ တစ်ဖက်နဲ့ တစ်ဖက် တွေ့ဆုံဆွေးနွေးမှုကို အလေးအနက်ပြုပြီး သက်ဆိုင်သူအားလုံး ပါဝင်ပြီး တပြေးညီ တန်းတူ ရည်တူ ပါဝင်ဆွေးနွေးနိုင်တဲ့ တွေ့ဆုံဆွေးနွေးပွဲတွေ ပြုလုပ်ဖို့ စတဲ့ အချက်တွေ ကို တိုက်တွန်းဖော်ပြထားပါတယ်။

SNLD ရှမ်းတိုင်းရင်းသားများ ဒီမိုကရေစီအဖွဲ့ချုပ်ဟာ ၁၉၉၀ ခုနှစ် ရွေးကောက်ပွဲမှာ လွှတ်တော်ကိုယ်စားလှယ် ဒုတိယအများဆုံး အနိုင်ရရှိခဲ့ပြီး ရှမ်းပြည်နယ်မှာ အဓိက အောင်ပွဲခံခဲ့တဲ့ ပါတီဖြစ်ပါတယ်။

Ref: အာရ်အဖ်အေhttp://www.rfa.org/burmese/news/snld-office-reopen-08152012114753.html