ကုန်းတွင်းရေနံနှင့် ဓါတ်ငွေ့ ရှာရန် ဈေးပြိုင်စနစ်ဖြင့် လေလံခေါ်

ကျော်ခ
ကြာသပတေးနေ့၊ ဇူလိုင်လ ၂၈ ရက် ၂၀၁၁

ချင်းမိုင်(မဇ္ဈိမ) ။ ။မြန်မာနိုင်ငံအလယ်ပိုင်း ကုန်းတွင်းဒေသများတွင် ရေနံနှင့် သဘာဝဓါတ်ငွေ့ စမ်းသပ် ရှာဖွေရန် နိုင်ငံခြား ကုမ္ပဏီများကို ကမ်းလှမ်း ထားကြောင်း မြန်မာနိုင်ငံ စွမ်းအင် ဝန်ကြီးဌာနထံမှ သိရသည်။

ဧရာဝတီမြစ်ကြောင်း တလျှောက်ရှိ ကုန်တွင်းပိုင်း လုပ်ကွက် ၁၈ကွက်ကို ပြည်ပ ကုမ္ပဏီများကို ဇူလိုင်လ ဒုတိယ ပတ်မှ စတင် ခေါ်ယူခဲ့ပြီး သြဂုတ်လ ၂၃ ရက်နေ့ နောက်ဆုံးထားကာ ချိတ်ပိတ် တင်ဒါ စနစ်ဖြင့် လျှောက်လွှာ တင် ဈေးပြိုင်ပေးရမည် ဖြစ်သည်။

“ လျှောက်လာတဲ့လူတွေက သက်ဆိုင်ရာ နိုင်ငံတွေက သံရုံးတွေကနေ တဆင့် ထောက်ခံချက်နဲ့ အတူ လျှောက်လာရမှာ ဖြစ်ပါတယ်” ဟု စွမ်းအင် ဝန်ကြီးဌာန အကြီးတန်း အရာရှိ တဦးက မဇ္ဈိမကိုပြောသည်။

ရေနံနှင့် သဘာဝဓါတ်ငွေ့ ရှာဖွေရန် တင်ဒါအောင်သူများသည် စမ်းသပ် တူးဖေါ်ခွင့် ရရှိမည်ဖြစ်ပြီး စွမ်းအင် ရင်းမြစ်များ ရှာဖွေ တွေ့ရှိပါက တူးဖေါ်အဆင့်မှ ထုတ်လုပ် အဆင့်ထိ မြန်မာနိုင်ငံ စွမ်းအင် ဌာနနှင့် ထပ်မံ ညှိနှိုင်းကာ သဘောတူချက် ရယူဖို့ လိုသည်။ ကုမ္ပဏီတခုစီကို လုပ်ကွက် ၃ ကွက် အတွက် လျှောက်လွှာ တင်သွင်းခွင့် ပြုထားသည်ဟုလည်း သိရသည်။

“အခုဟာကတော့ စမ်းသပ်အဆင့်ပေါ့။ ဒီကမှတွေ့ရင် တူးဖေါ်ပြီး ထုတ်လုပ်တဲ့ အဆင့်ထိ သွားမှာပေါ့။ တချို့ကြ တော့လည်း ရှာဖွေရေး မှာတင် တွက်ခြေ မကိုက်ဘူးဆိုပြီး ရှာဖွေရေးမှာတင် ရပ်ပြီး ပြီးသွားတာပေါ့” ဟု အဆိုပါ အရာရှိကြီးက ဆက်ပြောသည်။

ယခုလက်ရှိ မြန်မာနိုင်ငံမှ ရေနံနှင့် သဘာဝ ဓာတ်ငွေ့များ တိုးချဲ့တူးဖော် ထုတ်လုပ်နိုင်ရေးအတွက် ရုရှား၊ တရုတ်၊ အိန္ဒိယ၊ စင်္ကာပူ၊ မလေးရှား၊ တောင်ကိုရီးယား စသည့် နိုင်ငံများမှ ကုမ္ပဏီများနှင့် အကျိုးတူ ပူးပေါင်းပြီး ရေနံနှင့် သဘာဝ ဓာတ်ငွေ့ များကို ဆက်လက် ရှာဖွေ တူးဖော်မှု ပြုလုပ်နေကြောင်း စွမ်းအင် ဝန်ကြီးဌာနမှ သိရသည်။

ရှာဖွေ စမ်းသပ်ရန် ကမ်းလှမ်းထားသည့် လုပ်ကွက် ၁၈ ကွက်ထဲမှ နေရာအချို့တွင် ၁၉၉၁ ခုနှစ်မှ ၁၉၉၈ ခုနှစ် အတွင်းက ရှာဖွေ စမ်းသပ်မှုများ ပြုလုပ်ခဲ့သည့် နေရာ ဟောင်းများလည်း ပါဝင် နေသည်ဟု သိရသည်။

“နေရာဟောင်းတွေ ပါနေပေမယ့်လည်း ရှာဖွေစမ်းသပ်တဲ့ ကုမ္ပဏီတွေက တခုနဲ့ တခု တူတာမှ မဟုတ်တာ” ဟု စွမ်းအင် ဝန်ကြီးဌာနမှ အခြား အရာရှိ တဦးကလည်း မဇ္ဈိမကို ပြောသည်။ ထိုစဉ်က ယခုကဲ့သို့ တရားဝင် ကမ်းလှမ်းမှုမျိုး ပြုလုပ်ခြင်း နည်းပါးပြီး နီးစပ်ရာ လာဘ်သိပ်ထိုး စနစ်ဖြင့်သာ ရှာဖွေခွင့် ပေးသည့် ပုံစံဖြင့် ၁၉၉၉ ခုနှစ်အထိ ပြုလုပ်ခဲ့ကြောင်း သူက ဆက်ပြောသည်။

မြန်မာနိုင်ငံ ကုန်းတွင်းပိုင်းတွင် ရေနံနှင့် သဘောဝ ဓါတ်ငွေ့ ထုတ်လုပ်မှု လုပ်ကွက်ပေါင်း ၄၇ ကွက်ရှိရာ တရုတ် ကုမ္ပဏီများက ၂၃ ကွက်ဖြင့် အများဆုံး လုပ်ကိုင်နေပြီး မလေးရှားက ဒုတိယလိုက်ကြောင်း သိရသည်။

ရေနံလုပ်ငန်းများတွင် မြန်မာနိုင်ငံသားပိုင်အဖြစ် မြန်မာနိုင်ငံ ရွက်လှေအသင်း ဥက္ကဋ္ဌ ဦးမိုက်ကယ် မိုးမြင့်၏ Myanmar Petroleum Resources L.td တခုတည်းသာ ရှိပြီး၊ ဦးတေဇပိုင် ထူးကုမ္ပဏီနှင့် စက်မှု ၁ ဝန်ကြီးဟောင်း ဦးအောင်သောင်း၏ သား ဦးနေအောင်တို့မှာ ပြည်ပ မှကုမ္ပဏီများ ခေါ်ယူလာရာတွင် ရှယ်ယာစုဝင်တဦး အဖြစ်မျှသာ ပါဝင်နေကြောင်း စွမ်းအင် ဝန်ကြီးဌာန သတင်းရပ်ကွက်မှ သိရသည်။

မြန်မာနိုင်ငံရှိ ကုန်းတွင်းပိုင်း ရေနံမြေနှင့် သဘာဝဓာတ်ငွေ့မြေများမှ ရေနံစိမ်းစည် နေ့စဉ် ၉,၃၀၀ ကျော်နှင့် သဘာဝ ဓာတ်ငွေ့ ကုဗပေ သန်း ၁၀၀ ကျော် ထုတ်လုပ် ပေးနေပြီး ကမ်းလွန် သဘာဝ ဓာတ်ငွေ့မြေများ ဖြစ်သည့် ရတနာနှင့် ရဲတံခွန် စီမံကိန်းတို့မှလည်း နေ့စဉ် သဘာဝ ဓာတ်ငွေ့ ကုဗပေ သန်း ၁,၀၀၀ ကျော်ခန့်ကို ထုတ်လုပ် ရောင်းချ နေရကြောင်း သိရသည်။

အတည်ပြုထားသည့် သဘာဝဓါတ်ငွေ့ပမာဏ အနေဖြင့် ကုန်းတွင်းပိုင်းတွင် ၀.၄၆ ထရီလီယံ ကုဗပေ ရှိပြီး ကမ်းလွန်တွင် ၁၇ ထရီလီယံ ကုဗပေ ရှိသည်ဟု စွမ်းအင် ဝန်ကြီးဌာန ထုတ်ပြန်ချက်များ အရ သိရသည်။

Ref: မဇ္ဈိမ