ဒေါ်အောင်ဆန်းစုကြည်ရဲ့ ကမ်းလှမ်းချက် တိုင်းရင်းသားများ ကြိုဆို

2011-07-28

မြန်မာ့ဒီမိုက ရေစီခေါင်းဆောင် ဒေါ်အောင်ဆန်းစုကြည်ရဲ့ ပြည်တွင်းငြိမ်းချမ်းရေး နဲ့ အမျိုးသား သွေးစည်း ညီညွတ်ရေး တိုက်တွန်း ကမ်းလှမ်းချက်ကို ၊ စည်းလုံးညီညွတ်သော တိုင်းရင်းသား လူမျိုးစုများ ဖက်ဒရယ် ကောင်စီ UNFC က ကြိုဆိုထောင်ခံ လိုက်ပါတယ်။

ဒေါ်အောင်ဆန်းစုကြည်ရဲ့ ကမ်းလှမ်းချက်ဟာ သင့်မြတ်ကောင်းမွန်တဲ့ ကိစ္စဖြစ်ကြောင်း မွန်ပြည်သစ် ပါတီရဲ့  ခေါင်းဆောင် တစ်ဦးလည်းဖြစ် UNFC ရဲ့ အတွင်းရေးမှူးလည်း ဖြစ်တဲ့ နိုင်ဟံသာက အခုလို ပြောဆိုပါတယ်။

“ကျနော်တို့ ထောက်ခံတယ်။ ကြိုဆိုတယ်။ သူ့အနေနဲ့ အားလုံး ကိုယ်စား လုပ်တာလဲ ဖြစ်တယ်။ သူ့အနေနဲ့ ကြားဝင် လုပ်ပေးတာလဲ ဖြစ်တယ်။ ဒါကိုကျနော်တို့ ၀ိုင်းပြီး ထောက်ခံ ကြိုဆိုပါတယ်”

UNFC မှာ မွန်၊ ကချင်၊ ကရင်၊ ရှမ်း စတဲ့တိုင်းရင်းသား လက်နက်ကိုင် အဖွဲ့တွေနဲ့ အတူ စုစုပေါင်း တိုင်းရင်းသား ၁၁ ဖွဲ့ ပါဝင်ပါတယ်။

ဒေါ်အောင်ဆန်းစုကြည်ရဲ့ ကမ်းလှမ်းချက်ကို အစိုးရနဲ့ တိုက်ပွဲတွေ ဆက်တိုက်ဖြစ်နေတဲ့ KIO ကချင် လွတ်မြောက်ရေး အဖွဲ့က လက်ကမ်း ကြိုဆို လိုက်သလို ရှမ်းပြည် မြောက်ပိုင်း တပ်မတော် SSA ကလည်း ကြိုဆိုတယ်လို့ ပြောခွင့်ရ ပုဂ္ဂိုလ် ဗိုလ်မှူးစိုင်းလ က အခုလိုပြောပါတယ်။

“ဒေါ်အောင်ဆန်းစုကြည်က သမ္မတဦးသိန်းစိန်ဆီ ပေးတဲ့ အိတ်ဖွင့်စာထဲမှာ ပြည်တွင်း ငြိမ်းချမ်းရေး ရရှိဖို့ အတွက် နိုင်ငံရေးကို နိုင်ငံရေး နည်းနဲ့ ရှင်းဖို့။ အခု ဖြစ်ပွားနေတဲ့ စစ်ပွဲတွေ ရပ်ဆိုင်းဖို့ တောင်းဆိုထားတဲ့ အချက် အလက်တွေကို ကျနော်တို့ ခြွင်းချက်မရှိ ထောက်ခံ ပါတယ်။ ဒါက ကျနော်တို့ SSA ရဲ့ သဘောထား ပေါ့နော်”

ဒေါ်အောင်ဆန်းစုကြည်ရဲ့ အိတ်ဖွင့်ပေးစာမှာ ပြည်တွင်း ငြိမ်းချမ်းရေးကို လက်နက်နဲ့ တည်ဆောက်လို့  မရနိုင်ကြောင်း၊ ငြိမ်းချမ်းရေးနဲ့ အမျိုးသား သွေးစည်း ညီညွတ်ရေး မရှိရင် တိုင်းပြည် ဖွံ့ဖြိုး တိုးတက်အောင် မဆောင်ရွက် နိုင်ကြောင်း အဓိက ရေးသား ထားပါတယ်။

Ref: RFA News