မြန်မာနှင့်ထိုင်း စီးပွားရေး သဘောတူ စာချုပ်များ ချုပ်ဆို

ရန်ပိုင်
July 23, 2012

မြန်မာနိုင်ငံတော် သမ္မတ ဦးသိန်းစိန်နှင့် ထိုင်ဝန်ကြီးချုပ် ယင့်လတ် ရှင်နာဝပ်တို့ ယနေ့နံနက်ပိုင်းက တွေ့ဆုံပြီး အထူးစီးပွားရေး ဇုန် ထားဝယ် ရေနက်ဆိပ်ကမ်း စီမံကိန်းနှင့် ပတ်သက်၍ စီးပွားရေးဆုိုင်ရာ နားလည်မှု ရယူနိုင်ခဲ့ကြောင်း သိရသည်။

ထားဝယ်အထူး စီးပွားရေးဇုန်နှင့် စီမံကိန်း ဆက်စပ် နယ်မြေများ၌ ပြီးပြည့်စုံသော ဖွံ့ဖြိုး တိုးတက်မှုဆိုင်ရာ နားလည်မှု စာချွန်လွှာ (MOU) ၊ မြန်မာနိုင်ငံအနှံ့ ဖွံ့ဖြိုး တိုးတက်ရေး ပူးပေါင်း ဆောင်ရွက်မှု နားလည်မှု စာချွန်လွှာတို့ကို နှစ်နိုင်ငံ နိုင်ငံခြားရေး ၀န်ကြီး များက ရေးထိုးကြခြင်း ဖြစ်သည်။

ထိုင်းနိုင်ငံသည် တရုတ်နိုင်ငံပြီးလျှင် မြန်မာနိုင်ငံ၏ ဒုတိယအကြီးဆုံး ကုန်သွယ်ဘက်ဖြစ်ပြီး ၂၀၁၁ ခုနှစ် နှစ်နိုင်ငံကုန်သွယ်ရေး တန်ဘိုးမှာ အမေရိ ကန်ဒေါ်လာ ၉.၅ဘီလီယံ (ထိုင်းဘတ် ၂၉၀ ဘီလီယံ) ရှိသည်။

စင်ကာပူအခြေစိုက် အရှေ့တောင်အာရှ လေ့လာရေးဌာနမှ မိုက်ကယ် မွန်တီဆနိုက သမ္မတ ဦးသိန်းစိန်၏ ထိုင်းနိုင်ငံ ခရီးစဉ်သည် အာဆီယံနိုင်ငံ အချင်းချင်း အပြန်အလှန် ရင်းနှီးစွာ ဆက်ဆံသည့် သဘောဖြစ်သည့်အပြင် ဦးသိန်းစိန်သည် မြန်မာနိုင်ငံ၏ အကြီးအကဲ တဦး ဖြစ်ကြောင်း ထိုင်းနိုင်ငံကို ပြသရာ ရောက်သည်ဟု သုံးသပ်သည်။

“ဒီခရီးစဉ်မှာ ခိုင်မာတဲ့ ရလဒ်တခု ရဖို့ဆိုတာ ထိုင်းနိုင်ငံအပေါ်မှာပဲ မူတည်တယ်။ လက်ရှိ မြန်မာနိုင်ငံ အခြေအနေဟာ အရင်နဲ့မတူ တော့ဘူး၊ အကျိူးတူ စီးပွားရေး လုပ်မယ့်နိုင်ငံတွေ အများကြီးရှိတယ် ဆိုတာကို ထိုင်းနိုင်ငံအနေနဲ့ သတိထားရမယ်” ဟု ၎င်းကဆို သည်။

ထို့အပြင် ထိုင်းနိုင်ငံမှ တောင်းဆိုထားသည့် ပရာကျွတ်၊ ကန်ချနဘူရီ၊ မယ်ဟောင်ဆောင်၊ ချင်းမိုင် စသည့် နှစ်နိုင်ငံ နယ်စပ်ဒေသ များ၌ ကုန်သွယ်ရေးစခန်းများ ဖွင့်လှစ်ရေးနှင့် ရွှေ့ပြောင်း အလုပ်သမားများ နိုင်ငံကူး လက်မှတ်ပြုလုပ်ရာတွင် ကြန့်ကြာနေသည့် အရေးကိစ္စများအပြင် မကြာသေးမီက တနင်္သာရီတိုင်း ကော့သောင်းခရိုင်အတွင်း ရာဘာဝင်ရောက် စိုက်ပျိုးမှုနှင့် အဖမ်းခံခဲ့ရသည့် ထိုင်းနိုင်ငံသားများ အရေးကိုပါ ဆွေးနွေးနိုင်ကြောင်း သိရသည်။

ထားဝယ်ရေနက်ဆိပ်ကမ်း စီမံကိန်းကို ပြီးခဲ့သည့်နှစ်က စတင်ဆွေးနွေး ခဲ့သော်လည်း ၎င်းစီမံကိန်းတွင် ပါဝင်သည့် ကျောက်မီးသွေး ဓာတ်အားပေး စက်ရုံစီမံကိန်းကို မြန်မာအစိုးရက ပယ်ချပြီးသည့် အပြင် ဒေသတွင်း အကျိုးတူ ပူးပေါင်းဆောင်ရွက်မည့် မက်စ် မြန်မာ ကုမ္ပဏီကလည်း အဆိုပါ စီမံကိန်းမှ နှုတ်ထွက်ခဲ့သည်။

ယမန်နေ့ နံနက် ၁၁ နာရီ ၁၁ မိနစ်ခန့်က ထိုင်းနိုင်ငံ ဘန်ကောက်မြို့သို့ ရောက်ရှိလာသည့် သမ္မတ ဦးသိန်းစိန်ကို ထိုင်းဘုရင့် ကောင်စီ အကြံပေးအဖွဲ့ဝင် ထေ့ပ်ကမွန် ထေဝကွန် အပါအ၀င် ဒုတိယ ၀န်ကြီးချုပ် ယူထစပ်က် စစီပရာပါ တို့က ကြိုဆိုခဲ့ကြောင်း သိရသည်။

နေ့လယ်ပိုင်းတွင် ထိုင်းနိုင်ငံ၏ အကြီးဆုံး ရေနက်ဆိပ်ကမ်းဖြစ်သည့် ချွန်ဘူရီခရိုင်ရှိ လမ်ချဘန် ရေနက်ဆိပ်ကမ်းသို့ သွားရောက် လေ့လာခဲ့သည်။

သမ္မတ ဦးသိန်းစိန်သည် ထိုင်းနိုင်ငံတွင် ၃ ရက်ကြာ နေထိုင်မည်ဖြစ်ပြီး မြဘုရားသို့လည်း သွားရောက်ဖူးမျှော်မည်ဟု သတင်းများက ဆိုသည်။

သမ္မတ ဦးသိန်းစိန်နှင့်အတူ နိုင်ငံခြားရေးဝန်ကြီး ဦးဝဏ္ဏမောင်လွင်၊ လယ်ယာစိုက်ပျိုးရေးနှင့် ဆည်မြောင်းဌာန ၀န်ကြီး ဦးမြင့်လှိုင်၊ အမျိုးသား စီမံကိန်းနှင့် စီးပွားရေး ဖွံ့ဖြိုးတိုးတက်မှု ၀န်ကြီး ဦးတင်နိုင်သိန်း၊ အလုပ်သမား ၀န်ကြီးဌာနနှင့် လူမှုဝန်ထမ်း ကယ်ဆယ်ရေး နှင့် နေရာ ချထားရေးဝန်ကြီး ဦးအောင်ကြည်၊ စွမ်းအင် ၀န်ကြီးဌာန၀န်ကြီး ဦးသန်းဌေး၊ စီးပွားရေးနှင့် ကူးသန်း ရောင်းဝယ်ရေး ၀န်ကြီး ဌာန ၀န်ကြီး ဦးဝင်းမြင့်တို့အပြင် ကရင်ပြည်နယ် ၀န်ကြီးချုပ် ဦးဇော်မင်း၊ တနင်္သာရီတိုင်း ၀န်ကြီးချုပ် ဦးမြတ်ကို၊ စစ်ရေးချုပ် ဒုတိယ ဗိုလ်ချုပ်ကြီး ခင်ဇော်ဦး၊ စက်မှုဝန်ကြီးဌာန ဒုဝန်ကြီး ဦးမျိုးအောင်၊ ရထားပို့ဆောင်ရေးဝန်ကြီး သူရဦးသောင်းလွင်၊ ကျန်းမာရေး ၀န်ကြီး ဌာန ဒုဝန်ကြီး ဒေါက်တာဝင်းမြင့်တို့လည်း လိုက်ပါသွားသည်။

ယနေ့တွင် အလုပ်သမားဝန်ကြီး ဦးအောင်ကြည်မှာ ဘန်ကောက်မြို့တွင် ဖွင့်လှစ်ထားသည့် မြန်မာ အလုပ်သမားရုံးများသို့ သွားရောက် ကြည့်ရှုမည်ဖြစ်ပြီး စီးပွားရေး ၀န်ကြီး ဦးဝင်းမြင့်မှာလည်း ထိုင်းနိုင်ငံ ဆန်စပါး ထုတ်လုပ်သူများနှင့် တွေ့ဆုံဆွေး နွေးမည်ဟု သိရသည်။

သမ္မတ ဦးသိန်းစိန်သည် လွန်ခဲ့သည့် ၂၀၀၈ ခုနှစ် နအဖ ဝန်ကြီးချုပ်အနေဖြင့် ထိုင်းနိုင်ငံသို့ သွားရောက်ခဲ့ပြီး ၎င်း သမ္မတ တာဝန်ယူပြီး မှ ယခုအကြိမ်သည် ပထမဆုံးအကြိမ် အဖြစ် အိမ်နီးချင်း ထိုင်းနိုင်ငံသို့ သွားရောက်ခြင်း ဖြစ်သည်။

Ref: ဧရာဝတီ