Monday, January 28, 2013

ငြိမ်းချမ်းရေးအတွက် သတ္တိနဲ့ ကရုဏာတရား လိုအပ်

2013-01-27

ငြိမ်းချမ်းရေးအတွက် သတ္တိနဲ့ကရုဏာတရား လိုအပ်ပါတယ်လို့ အမေရိကန် ပြည်ထောင်စု အနောက်ခြမ်း ပစိဖိတ်ဒေသ ဟာဝိုင်ယီ ကျွန်းကို ရောက်ရှိနေတဲ့ ဒေါ်အောင်ဆန်း စုကြည်က မနေ့ က ပြောကြားလိုက်ပါတယ်။

ငြိမ်းချမ်းရေး နိုဘယ်ဆုရှင်တွေကို ဖိတ်ကြား ဆွေးနွေးလေ့ရှိတဲ့ Pillars of Peace အဖွဲ့က ကြီးမှူးပြီး ဒေါ်အောင်ဆန်းစုကြည်နဲ့ ကျောင်းသားလူငယ်ထု တွေ့ဆုံပွဲမှာ ပြောကြားလိုက်တာပါ။

ဒီတွေဆုံပွဲမှာ ငြိမ်းချမ်းရေးနဲ့ ကရုဏာ တရားအကြောင်း ဒေါ်အောင်ဆန်းစုကြည်က ဟောပြော သွားပါတယ်။

အရင်တုန်းက အာမခံချက်ရှိတဲ့ဘ၀မှာ ငြိမ်းချမ်းရေးကို မစဉ်းစားခဲ့ဖူးပေမဲ့ နေအိမ် အကျယ်ချုပ်ဘ၀မှာ ငြိမ်းချမ်းရေးနဲ့ နီးစပ်လာတယ်လို့ ဒေါ်အောင်ဆန်းစုကြည်က ပြောပါတယ်။

"နေအိမ်အကျယ်ချုပ်ဘ၀နဲ့ နေရပြီးတဲ့နောက်မှ ငြိမ်းချမ်းရေးနဲ့ ကျမနီးစပ်လာတယ်လို့ ခံစားရပါတယ်။ ငြိမ်းချမ်းရေးနိုဘယ်ဆုရလို့ ငြိမ်းချမ်းရေးနဲ့ နီးစပ်လာတာမဟုတ်ပါဘူး၊ နေအိမ်အကျယ်ချုပ်နဲ့ တယောက်တည်းနေရတာ စိတ်ထဲ ဆိုးဆိုးဝါးဝါးမဖြစ်တာကို ကျမ ဖာသာကျမတွေ့လိုက်ရပါတယ်"

နေအိမ် အကျယ်ချုပ်ဘ၀မှာ တွေးတော ဆင်ခြင်ချိန်တွေ အများကြီး ရရှိခဲ့တဲ့အကြောင်း၊ ကိုယ့်ကိုကိုယ်နဲ့ ပြင်ပကမ္ဘာကိုလည်း သိလာ ရတဲ့အကြောင်း၊ကမ္ဘာနဲ့ အဆက်ဖြတ်လိုက်ချိန်မှာ ကမ္ဘာ အကြောင်း ပိုသိလာရတဲ့အကြောင်း ဒေါ်အောင်ဆန်းစုကြည်က ပြောပါတယ်။

သူဟာ နေအိမ် အကျယ်ချုပ် ဘ၀တလျှောက်လုံးလုံး ရေဒီယို အမြဲ နားထောင် လာတယ်လို့ပြောပါတယ်။ နှစ်ရှည်လများ ရေဒီယို နားထောင်ရာက ရိုးသားေ ဖြောင့်မတ်ခြင်းတန်ဖိုးကို သိလာရတယ်လို့ ဒေါ်အောင်ဆန်းစုကြည်က ပြောပါတယ်။

"ကျမထင်ပါတယ် ရိုးသားဖြောင့်မတ်ဖို့ သတ္တိရှိဖို့ လိုအပ်ပါတယ်။ ငြိမ်းချမ်းရေးအတွက် သတ္တိလိုအပ်ပါတယ်။ ဘာလို့ဆို ဒီနှစ်ခုက နီးစပ် လို့ပါလို့ ပြောသွားတာပါ။"

ဒေါ်အောင်ဆန်းစုကြည်ဟာ ဟာဝိုင်ယီက မြန်မာမိသားစုတွေနဲ့ သောကြာနေ့က တွေ့ဆုံခဲ့ပြီး စနေနေ့ ညနေပိုင်းမှာ Rotary နိုင်ငံတကာ ငြိမ်းချမ်းရေး ညီလာခံမှာ မိန့်ခွန်းပြောကြားပြီး Rotary ငြိမ်းချမ်းရေးဆုကို လက်ခံရယူပါမယ်။

Ref: အာရ်အဖ်အေ

0 comments:

အပေါ်သို့