Thursday, May 16, 2013

ကုမ္ပဏီကြီးများ၏ ရင်းနှီးမြုပ်နှံမှုများအား သတိရှိရန် မလေးရှား အမတ် ပို့ချ

နေမျိုး
မေလ ၁၅ ရက် ၂၀၁၃ ခုနှစ်

‘ရင်းနှီးမြုပ်နှံမှု သဘောတူညီချက်များ၏ အမှောင်ဘက်ခြမ်း’ အမည်ရှိစီးပွားရေး စာတမ်းအား ရန်ကုန်မြို့ Summit Park View ဟော်တယ်တွင် မလေးရှား လွှတ်တော်အမတ် မစ္စတာ ချားလ်ဆန်တီယာဂို (Charles Santiago) မှ ယနေ့ ဆွေးနွေး ဟောပြောသည်။

ယနေ့ကမ္ဘာတွင် ရင်းနှီးမြုပ်နှံလိုသူများသည် ကိုလိုနီနယ်ချဲ့စံနစ်ကဲ့သို့ သဘာဝ သံယံဇာတများအား ရယူခြင်းမျိုး မဟုတ်တော့ဘဲ နိုင်ငံတကာ ရင်းနှီးမြုပ်နှံမှု ဥပဒေများအား အသုံးချသည့် ပုံစံသစ်ဖြင့် ၀င်ရောက် လာနေကြောင်း ကျောင်းဆရာတဦးလည်းဖြစ်သူ မစ္စတာ ချားလ်ဆန်တီယာဂို က ပြောသည်။

၎င်း က “ထိပ်ဆုံးရောက်နေတဲ့ ကော်ပိုရေးရှင်းကြီးတွေက ရင်းနှီးမြုပ်နှံမှု သဘောတူညီချက်တွေနဲ့ ၊ သူတို့ရဲ့ အမြတ် အစွန်းအတွက် အစိုးရတွေကို ထိန်းချုပ်တယ်၊ နိုင်ငံတိုးတက်မှုထက် ထိန်းချုပ်မှုက များတယ်” ဟု ဆိုသည်။

ယခင်က လူ့အခွင့်အရေး၊ အမျိူးသမီးအခွင့်အရေး၊ အလုပ်သမားအခွင့်အရေး တို့ကိုသာ ကြားဖူးခဲ့ပြီး ယခု အခါ ပြောင်းလဲလာနေကြောင်း ၎င်း က ဆက်ပြောသည်။

မစ္စတာ ချားလ်ဆန်တီယာဂို က“အခု ကော်ပိုရေးရှင်းတွေက ပုံစံပြောင်းလာနေတယ်။ သူတို့လည်း ရပိုင်ခွင့်ရှိတယ်ဆိုပြီး၊ ရင်းနှီးမြုပ်နှံမှု ဥပဒေတွေက သူတို့ရဲ့ အကျိုးအမြတ်ကို ကာကွယ်ပေးရမယ်ဆို အခွင့်အရေးတွေရအောင် အစိုးရတွေနဲ့ သဘောတူညီချက်တွေ လုပ်ကြတယ်” ဟု ထပ်မံ ရှင်းလင်းပြောဆိုသည်။

‘ရင်းနှီးမြုပ်နှံမှု သဘောတူညီချက်များတွင် အလွန်မှောင်တဲ့ အခြမ်းလည်းရှိနေသလို ကုမ္ပဏီများက အစိုးရများကို လျို့ဝှက်သည့် နိုင်ငံတကာခုံရုံးများတွင် တရားစွဲဆိုပိုင်ခွင့်ကို ခွင့်ပြုထားကြောင်း’ ၎င်း ၏ စာတမ်းက ထောက်ပြဝေဖန် ထားသည်။

မြန်မာနိုင်ငံတွင် ရင်းနှီးမြုပ်နှံမှုများနှင့် ပါတ်သက်ပြီး ပြည်သူများနှင့် တိုင်ပင်သင့်ကြောင်း “ကုန်ကျ စားရိတ်နဲ့ အကျိုး အမြတ် နှိုင်းယှဉ်ပြီး ဆုံးဖြတ်ပါ၊ လွှတ်တော်မှာ ရင်းနှီးမြုပ်နှံမှုနဲ့ ပါတ်သက်တဲ့ ကော်မတီတွေ ရှိမယ်၊ ပြည်နယ်တွေမှာလည်း ကော်မတီတွေ ရှိမယ်။ ပြည်သူတွေက သဘောတူရင် လုပ်သင့်တယ်” ဟု မဇ္စျိမ ၏ မေးမြန်း ချက်ကို ဖြေကြားသွားသည်။

၎င်းနှင့်အတူ အခြားပညာရှင် အချို့ပါဝင်ဆွေးနွေးခဲ့သည်။

ဆွေးနွေးပွဲ ကို ရန်ကုန်မြို့ Summit Park View ဟော်တယ်တွင် ယနေ့နေ့လည်ပိုင်း က ကျင်းပခဲ့ပြီး ပြည်တွင်းမီဒီယာ အချို့နှင့်အတူ စိတ်ပါဝင်စားသူ ၂၀ ခန့် တက်ရောက်ခဲ့သည်။

Ref: မဇ္ဈိမ

0 comments:

အပေါ်သို့