ရခိုင်ဒေသ မုန်တိုင်းအန္တရာယ် ကင်းရှင်း၊ အစိမ်းရောင်အဆင့် သတ်မှတ်လိုက်ပြီ

မင်းမင်း
မေလ ၁၇ ရက် ၂၀၁၃ ခုနှစ်

ဘင်္ဂလားဒေ့ရ်ှနိုင်ငံနှင့် ရခိုင်ကမ်းရိုးတန်းဒေသများသို့ ဖြတ်ကျော် ဝင်ရောက်ကာ အန္တရာယ်ပေးနိုင်သည့် အဆင့် အနီရောင်ရှိသည်ဟု သတိပေးမှုများ ပြုလုပ်ခဲ့ရသည့် မဟာဆန် မုန်တိုင်းသည် ယခုအခါ အန္တရာယ်မရှိသည့် အဆင့်သတ်မှတ်မှု အစိမ်းရောင်သို့ ပြောင်းလဲသွားပြီး ရခိုင်ကမ်းရိုးတန်းတွင် မုန်တိုင်းအန္တရာယ် ကင်းရှင်းသွားပြီဟု မိုးလေဝသနှင့်ဇလဗေဒ ညွှန်ကြားမှုဦးစီးဌာနက မေလ ၁၆ ရက် ည ၈း၃၀ အချိန်တွင် ထုတ်ပြန်လိုက်သည်။

“မုန်တိုင်းကတော့ အန္တရာယ်ကင်းရှင်းသွားပါပြီ။ အစိမ်းရောင် အခြေအနေကို ရောက်ရှိသွားပါပြီ။ အဲဒါကို ည ၈ နာရီခွဲမှာ ထုတ်ပြန်ထားပါတယ်” ဟု မိုး/ဇလ မှ ဒုတိယ ညွှန်ကြားရေးမှူး ဦးချစ်ကျော် က မဇ္ဈိမသို့ အတည်ပြုပြောကြားသည်။

ဘင်္ဂလားဒေ့ရ်ှနိုင်ငံ ကမ်းခြေကို ဖြတ်ကျော်ဝင်ရောက်ခဲ့သည့် ကုန်းတွင်း မုန်တိုင်းငယ်သည် အရှေ့မြောက် ဘက်သို့ ဆက်လက်ရွေ့လျားလျက် လေဖိအားနည်း ရပ်ဝန်းအဖြစ်သို့ တဖြည်းဖြည်း အားပျော့ ပျက်ပြယ်သွား မည်ဟု ခန့်မှန်းကြောင်း ထုတ်ပြန်ချက်က ဆိုသည်။

ထိုမုန်တိုင်းသည် မေလ ၁၇ တွင် အားပျော့ ပျက်ပြယ်သွားမည်ဖြစ်ပြီး စိုးရိမ်စရာ မရှိတော့ကြောင်းလည်း မိုးလေဝသနှင့် ဇလဗေဒပညာရှင် ဦးထွန်းလွင်ကလည်း မဇ္ဈိမသို့ပြောသည်။

“မုန်တိုင်းက သုံးနာရီခွဲမှာ စစ်တကောင်းရဲ့မြောက်ဘက်အတွင်းဘက် မောင်တောနဲ့ပိုဝေးတဲ့ ဘက်က ဝင်တယ်။ ဝင်ပြီးဒီညမှာ ကုန်းတွင်းပိုင်း ရောက်မယ်။ မနက်ဆိုရင် ပျောက်သွားမယ်လို့ မှန်းထားပါတယ်။ အထွေအထူး စိုးရိမ်စရာမရှိဘူး” ဟု ဆိုသည်။

တိုက်ခတ်သွားသည့် မုန်တိုင်းကြောင့် အသက်အန္တရာယ် ကြုံတွေ့ရသည့် အခြေအနေမရှိခဲ့ဘဲ အန္တရာယ် မရှိတော့ဟုလည်း ပြန်ကြားရေး ဒုဝန်ကြီး ဦးရဲထွဋ် က ၎င်း၏ ဖေ့စ်ဘွတ် စာမျက်နှာ တွင် ရေးသား ထားသည်။

မုန်တိုင်း မတိုင်မီ ရက်များအတွင်း အန္တရာယ်ရှိသည်ဟု ယူဆရာသည့် ဒေသတွင်းရှိ ဒုက္ခသည်များ ဘေး လွတ်ရာသို့ ပြောင်းရွှေ့ခြင်း၊ စားနပ်ရိက္ခာများ ပြင်ဆင်ကာ ကူညီရန်လည်း ပြင်ဆင်နေခဲ့ကြသည်။ အစိုးရကလည်း ဒုတိယ သမ္မတ ဦးဉာဏ်ထွန်း ဦးစီး၍ မုန်တိုင်းကြောင့် ဒုက္ခရောက်မည့်သူများကို ကူညီရန် ပြင်ဆင်ခဲ့ကြသည်။

Ref: မဇ္ဈိမ