၁၆ ဖေဖော်ဝါရီ ၂၀၀၉
စနေနေ့ နံနက် ၂ နာရီခန့်က ကရင်ပြည်နယ် မြဝတီမြို့တွင် လက်နက်ကြီးကျည်များ ကျရောက်ပေါက်ကွဲခဲ့မှုသည် ကရင်အမျိုးသားအစည်းအရုံး (ကေအန်ယူ)၏ အကြမ်းဖက်လုပ်ရပ်များ ဖြစ်သည်ဟု နအဖ၏စွပ်စွဲမှုသည် အခြေအမြစ်မရှိသည့် စွပ်စွဲမှုသာဖြစ်သည်ဟု ကရင်အမျိုးသားလွတ်မြောက်ရေးတပ်မတော် (ကေအန်အယ်လ်အေ) က ငြင်းဆိုလိုက်သည်။
ကေအန်အယ်လ်အေ တပ်မဟာ (၇) မှ တပ်မဟာမှူး ဗိုလ်မှူးချုပ်စောဂျော်နီက "ဒီကိစ္စ ကေအန်ယူ လုပ်တာ မဟုတ်ဘူးဆိုတာ ခိုင်ခိုင်မာမာပြောရဲပါတယ်။ ဒါမျိုးလုပ်ဖို့ ကေအန်ယူမှာ မူမရှိဘူး။ ကိုယ့်ကိုယ်ကို ကာကွယ်တာတော့ ရှိတယ်။ အရင်သွားတိုက်တာမျိုးတော့ မလုပ်ဘူး။ သူတို့ အရင်လာတိုက်ရင်တော့ ကိုယ့်ကိုယ်ကို ခုခံကာကွယ်သွားရမှာပဲ။ ကေအန်ယူက နိုင်ငံရေးပြဿနာကို နိုင်ငံရေးအရပဲဖြေရှင်းရမယ့် မူချထားတာရှိတယ်။ မြဝတီမြို့ပြင် မိုင် (၂၀) ပတ်လည်လောက်မှာ ဒီကေဘီအေအဖွဲ့ရှိတယ်၊ ငြိမ်းချမ်းရေး အဖွဲ့ရှိတယ်၊ ပြည်သူ့စစ်ရှိတယ်၊ နအဖတပ်တွေရှိတယ်။ အဲဒီနေရာတွေကို သူတို့က အဖြူရောင်နယ်မြေ သတ်မှတ်ထားတယ်။ (၆၀) မမ (၈၁) မမ တို့နဲ့ မိုင် (၂၀) အကွာကနေ မြဝတီမြို့ကိုပစ်ရင် ဘယ်လိုမှမရောက်နိုင်ဘူး။ မြဝတီမြို့နဲ့ ကျနော်တို့တပ်စခန်းရှိတဲ့ နေရာတွေဟာ အနည်းဆုံး မိုင် (၂၀) မိုင် (၃၀) လောက်မှာရှိတယ်။ ကျနော်တို့မှာ တာဝေးပစ်ဒုံးကျည်လည်း မရှိဘူး" ဟု ခေတ်ပြိုင်သို့ပြောကြားသည်။ ကရင်အမျိုးသားလွတ်မြောက်ရေး တပ်မတော် တပ်မဟာ (၆) တပ်မဟာ ရုံးမှ ဒုတိယဗိုလ်မှူးကြီးတဦးက ပြောကြားရာ တွင် "မြဝတီ-ဖားအံ ကားလမ်းမရဲ့ တောင်ဘက်မှာ တပ်မဟာ (၆) အခြေစိုက်ပြီး မြောက်ဘက်မှာ တပ်မဟာ (၇) အခြေစိုက်တယ်။ မြဝတီမှာရှိတဲ့ ကျနော်တို့လူတွေရဲ့ အဆိုအရ အခုကျတဲ့ကျည်ဟာ (၆၀) မမကျည်ဖြစ်တယ်လို့ သိရတယ်။ ကျနော်တို့ တပ်တည်နေရာနဲ့ဆိုရင် (၆၀) မမနဲ့ပစ်လို့ ဘယ်လိုမှရောက်စရာ အကြောင်းမရှိ ဘူး။ မြဝတီမြို့ အနီးပတ်ဝန်းကျင်ကို ပြောက်ကျားနည်းနဲ့ ဝင်တိုက်တာတွေတော့ရှိတယ်" ဟုပြောသည်။ ယခုဖြစ်ရပ်နဲ့ပတ်သက်၍ ဒီကေဘီအေ အဖွဲ့မှ အရာရှိတဦးက "ဒီကိစ္စ ပြောရမယ်ဆိုရင် နိုင်ငံရေးဆိုတာ ကောက်ကျစ် ညစ်ပတ်မှ၊ မဟုတ်ရင် ဘယ်မြဲမှာလဲ။ ဘယ်သူဘယ်ဝါ လုပ်သလဲဆိုတာ သိချင်ရင် ကိုယ့်ဖာသာကိုယ် စဉ်းစားကြ" ဟု ပြောသည်။ မြဝတီမြို့ခံတဦးက အမှတ်(၅) ရပ်ကွက် ဇေ တည်းခိုခန်းအနီးတွင် လက်နက်ကြီးကျည်ကျသဖြင့် တည်းခိုခန်းအနီး ရပ်ထားသည့် တောင်းအေ့စ် ကားတစီး အနည်းငယ်ပျက်စီးသွားပြီး ထိခိုက်ဒဏ်ရာရရှိသူ မရှိကြောင်း၊ အစိုးရမှ ကေအန်ယူ လက်ချက်ဟု ဆိုသော်လည်း မြို့ခံများမှာ စိတ်ဝင်စားမှုနှင့် ယုံကြည်မှု မရှိကြောင်း ပြောကြားသည်။ ယခင်ကလည်း မြဝတီမြို့ ချစ်ကြည်ရေးတံတားထိပ်ရှိ မွန်ပြည်သစ်ပါတီမှ မွန်မြင့်အောင်ပိုင်သည့် ရွှေပြည်စံရာ တည်းခိုခန်းတွင် လူမရှိသည့်အခန်းအတွင်းမှ ဗုံးပေါက်ကွဲမှု ဖြစ်ပွားခဲ့ရာ ယနေ့ထိ လက်သည်ဖမ်းဆီးရမိခြင်း မရှိဘဲ မြန်မာအာဏာပိုင်များ က မြန်မာအတိုက်အခံအဖွဲ့အစည်းများနှင့် ကေအန်ယူကို အပြစ်ပုံချ စွပ်စွဲထားသည်။ ယမန်နေ့ထုတ် မြန်မာ့အလင်းသတင်းစာတွင် ကေအန်ယူအကြမ်းဖက်သောင်းကျန်းသူများ သည် ကရင်ပြည်နယ် မြဝတီမြို့အတွင်းသို့ လက်နက်ကြီးများဖြင့် အဝေးမှ (၄) ချက်ပစ်ခတ်ခဲ့ရာ လက်နက်ကြီးကျည် (၂) လုံးသည် မြို့နှင့် အနောက်တောင်ဘက် (၇) မိုင်အကွာတွင်လည်းကောင်း၊ လက်နက်ကြီးကျည် (၁) လုံးသည် မြဝတီမြို့ ဇေ တည်းခိုခန်း အနီးတွင်လည်းကောင်း၊ ကျန်လက်နက်ကြီး (၁) လုံးသည် တောရဘုန်းကြီးကျောင်းဝင်း အတွင်း၌လည်းကောင်း ကျရောက် ပေါက်ကွဲခဲ့ကြောင်း၊ ကျရောက်ပေါက်ကွဲမှုကြောင့် သေဆုံးထိခိုက်ဒဏ်ရာရရှိမှု တစုံတရာမရှိကြောင်း သိရသည်ဟု ဖော်ပြထားသည်။
REF: ခေတ်ပြိုင်
Posts
0 comments:
Post a Comment