ဝင်းကုန်းရွာ မီးဘေးသင့် ပြည်သူ အကူအညီလိုအပ်

2012-04-04

ပြီးခဲ့တဲ့ မတ်လ ၂၉ ရက်နေ့က တစ်ရွာလုံးနီးပါး မီးလောင်သွားတဲ့ စစ်ကိုင်းတိုင်း၊ ဝင်းကုန်းရွာက မီးဘေးဒုက္ခသည်တွေကို နာရေးကူ ညီမှု အသင်း(ရန်ကုန်) က တစ်အိမ်ထောင် ကျပ်ငွေ ၃ သောင်းနှုန်းနဲ့ စုစုပေါင်း သိန်း ၅၀ သွားရောက် လှူဒါန်းခဲ့ပါတယ်။

အဲဒီရွာဟာ မူလကတည်းက ရေရှားတဲ့အတွက် အခုလို ရုတ်တရက်မီးလောင်တဲ့အခါ မီးသတ်ဖို့ ရေအလုံအလောက်မရှိပဲ တစ်ရွာလုံး နီးပါး လောင်သွားတာလို့ နာရေးကူညီမှုအသင်း ဥက္ကဋ္ဌ ရုပ်ရှင်မင်းသား ဦးကျော်သူက ပြောပါတယ်။


အဲဒီနေ့က စစ်ကိုင်းတိုင်း၊ ယင်းမာပင်မြို့နယ်၊ ပုလဲမြို့မှာ အမျိုးသား ဒီမိုကရေစီအဖွဲ့ချုပ် ရွေးကောက်ပွဲ အောင်နိုင်ရေးအတွက် အနု ပညာရှင်တွေက ပညာပေးစည်းရုံးရေးနဲ့ ဖျော်ဖြေရေးပွဲ ကျင်းပနေတာကို ရွာသားတွေ သွားရောက် ကြည့်ရှုနေတုန်းမှာ ရွာမီးလောင် သွားတာ ဖြစ်ပါတယ်။

မီးဘေးကြောင့် လူပေါင်း တစ်ထောင်ကျော် အိုးမဲ့အိမ်မဲ့ဖြစ်သွားပြီး လောလောဆယ်တော့ သူတို့ကို မီးမလောင်ပဲ ကျန်ခဲ့တဲ့ သီရိမင်္ဂလာ ဘုန်းကြီးကျောင်းမှာ ခေတ္တနေရာ စီစဉ်ပေးထားပါတယ်။

အဲဒီဝင်းကုန်းရွာ မီးဘေးသင့် ပြည်သူတွေအတွက် အဝတ်အထည်၊ စားသောက်စရာတွေအပြင် ပြန်လည်ထူထောင်ရေးအတွက် အကူ အညီ လိုနေတယ်လို့ သိရပါတယ်။

Ref: အာရ်အဖ်အေ