သောကြာနေ့၊ 06 မတ်လ 2009
သျှမ်းပြည်အရှေ့တောင်ပိုင်း မိုင်းတုံမြို့နယ် နားကောင်းမူး အခြေစိုက် ခလရ ၆၅ တပ်သားနှစ်ယောက် တပ်မှထွက်ပြေးပြီး သျှမ်းပြည်တပ်မတော် SSA တောင်ပိုင်းသို့ ၀င်ရောက်ပူးပေါင်းခဲ့သည်ဟု SSA သတင်း ရပ်ကွက်ကဆိုသည်။ “နအဖ စစ်သား နှစ်ယောက်က သျှမ်းပြည်တပ်မတော် အမှတ် ၂ စစ်ဒေသ ဗိုလ်မှူးတင်းခေးဆီလာရောက် ပူးပေါင်းတယ်၊ တပ်တွင်းမျှတမှုမရှိလို့ထွက်ပြေးလာရတယ်လို့ပြောတယ်။ ၂ ယောက်စလုံး ဧရာဝတီတိုင်း မြောင်းမြ ဇာတိ၊စစ်မှုထမ်း လာတာ ၁၀ နှစ်ကျော်ပြီတဲ့။ သူတို့နှစ်ယောက်ကို ကောင်းကောင်းမွန်မွန် လက်ခံကျွေးမွေးထားပါတယ်” ဟု ပြောပြ၏။
ယခုလ ၄ ရက်နေ့က နားကောင်းမူးအခြေစိုက် ခလရ ၆၅ မှ တပ်ကြပ်ကျော်မိုး အသက် ၂၆ နှစ်၊ ဒုတပ်ကြပ် မောင်အေး အသက် ၂၇ နှစ် တို့နှစ်ဦး ပစ္စတိုသေနတ် တယောက်တလက်စီဖြင့်၊ တောလမ်းမှထွက်ပြေးကာ ထိုင်းနိုင်ငံ ချင်းမိုင်ခရိုင် ဖှန်မြို့နယ် မောန့်ပင်ကျေးရွာအုပ်စု မျက်နှင်ချင်းဆိုင်ရှိ သျှမ်းပြည်တပ်မတော် အမှတ် ၂ စစ်ဒေသ လွယ်ဆမ်ဆစ် ဌာနချုပ်သို့ လာရောက်ပူးပေါင်းကြောင်း ဗိုလ်မှူးကြီး ယွတ်စစ်က -
“တပ်တွင်းရံပုံငွေအတွက် ကျောက်၊ ဗြုံး တူးရတယ်။ အုတ်ဖုတ်ရတယ်။ နားရက် မရှိဘူး။ အထက်အရာရှိ တွေအကြိုက် မလုပ်ရင် အပြစ်ပေး ဒဏ်ပေးခံရတယ်၊ လစာငွေဖြတ်တယ်။ နောက်ပြီးတပ်တွင်းရဲဘော်တွေ လည်းအချင်းချင်းမတည့် ကြဘူး။ ဘယ်နေရာမှ ဘာမှ မျှတမှု ဆိုတာ မရှိဘူး။ မခံနိုင်တော့လို့ ထွက်ပြေးလာ ကြတာ” - ဟု အဆိုပါတပ်ပြေး ၂ ယောက်ကပြောသည်ဟုဆို၏။
နအဖတပ်တွင်း အထက်အရာရှိများ စည်းစိမ်နှင့် အခွင့်ထူးများရပြီး အောက်ခြေတပ်သားများမှာ မတရား စေခိုင်းမှု ငြင်းပန်းနှိပ်စက်မှုခံရခြင်းကြောင့် ပင်ပန်းဆင်းရဲမှုများ မခံနိုင်တော့ဘဲ သျှမ်းပြည်တပ်မတော်ထံ မကြာခဏလာရောက် ပူးပေါင်းကြသည်ဟုလည်း ဗိုလ်မှူးကြီးယွက်စစ်က ဆိုသည်။
၂၀၀၆ စက်တင်ဘာအထိ - ဗမာ့တပ်မတော်တွင် ခြေလျင်တပ်ရင်း ၂၁၅ ရင်း၊ ခြေမြန်တပ်ရင်း ၃၄၀ ရင်း - စုစုပေါင်း ၅၅၅ တပ်ရင်းရှိကြောင်း၊ ၂၂၀ တပ်ရင်း မှာ တရင်းလျှင် ပျမ်းမျှအင်အား ၂၀၀ မှ ၃၀၀ ကြားရှိပြီး၊ ၂၈၄ ရင်းမှာ လူအင်အား ၂၀၀ အောက်ရောက်နေကြောင်း၊ တပ်ပြေးမှာလည်း ၄ လ လျှင် ပျမ်းမျှအယောက် ၁ သောင်းရှိကြောင်း၊ စစ်အစိုးရ ကြေငြာထားသော တရားဝင်စာရင်းအရ ဗမာစစ်တပ်၌ စစ်အင်အား ၄ သိန်း ရှိကြောင်း ဒီမိုကရေစီနှင့်ဖွံ့ဖြိုး တိုးတက်ရေး အင်အားစု ကဆို၏။
REF: သျှမ်းသံတော်ဆင့်
Posts
0 comments:
Post a Comment