ဖိုးဂျံ
မတ် ၂၅၊ ၂၀၀၉
ပြည်တွင်းက ၂၀၁၀ ရွေးကောက်ပွဲဝင်မည့် ပုဂ္ဂိုလ်များက တသီးပုဂ္ဂလ ၀င်ရောက်ယှဉ်ပြိုင်ကြရန် ပြင်ဆင်နေချိန်တွင် အစုအဖွဲ့များဖြင့် ပါတီအမည်များ ကိုယ်နည်းကိုယ်ဟန်ဖြင့် အမည်ပေး ကင်ပွန်းတပ်လာကြသည်ကို တွေ့ရသည်။
တသီးပုဂ္ဂလ၀င်ရောက်မည့် လူအမည်စာရင်းမှာ ဦးရေ ၂၅ ဦး ရှိပြီး၊ အစုအဖွဲ့ပါတီများမှာ ပြည်ထောင်စုမြန်မာနိုင်ငံ အမျိုးသားနိုင်ငံရေးအင်အားစုများအမည်အောက်တွင် အဖွဲ့ ၁၄ ဖွဲ့နှင့် လူ ၄ ဦးပါဝင်သည်ကို တွေ့ရသည်။ မတ်လ ၁၅ ရက်နေ့က ကျင်းပသော အစည်းအဝေးတွင် ထိုအဖွဲ့များက ၎င်းတို့နိုင်ငံရေး မူဝါဒဆိုင်ရာ ကြေငြာချက်တရပ်ကို ထုတ်ပြန်လိုက်သည်။
အမျိုးသားနိုင်ငံရေးအင်အားစုများက အခြေခံဥပဒေနှင့်အညီ အစိုးရတရပ်ပေါ်ထွန်းရန်၊ ထိုပြည်ထောင်စုကို ပြည်ပနိုင်ငံတကာအကူအညီဖြင့် တည်ဆောက်ရန်၊ စီးပွားရေး ပိတ်ဆို့မှု ဖယ်ရှားရန်နှင့် အမျိုးသားအကျိုးစီးပွားရေး ဟူသော စကားလုံးများ တတ်ဆင်ထားသည်ကို တွေ့ရသည်။
အလားတူပင် တသီးပုဂ္ဂလများကလည်း အချင်းချင်းကွန်ယက်ဖွဲ့၍ ၂၀၁၀ ရွေးကောက်ပွဲကို ၀င်ရောက်ယှဉ်ပြိုင်ကြရန်၊ စည်းရုံးရေးကိစ္စများကို တူရာ သန်ရာ ၀ိုင်းဝန်းဆောင်ရွက်ကြရန် စသည်တို့ကို သဘောထားထုတ်ပြန်သည့် ကြေငြာချက်တစောင် ထုတ်ပြန်ထားသည်ကို တွေ့ရသည်။ တသီးပုဂ္ဂလ ၂၅ ဦးမှာ - ၁။ ကိုကိုနိုင် ၂။ ကိုကို ၃။ ကျော်စိုးလင်း ၄။ ခင်မောင်ထွေး ၅။ စိုးကြွယ် ၆။ ညိုမင်းလွင် ၇။ ညွန့်မောင် ၈။ ဌေးဝင်း ၉။ တင်မောင်အေး ၁၀။ တင်လှ ၁၁။ တင်ဟန် ၁၂။ နန်းရွှေကြာ ၁၃။ နေမျိုးဝေ ၁၄။ ရဲမင်း ၁၅။ လှမြင့် ၁၆။ မြင့်အောင် ၁၇။ မျိုးခိုင် ၁၈။ ၀င်းဇော် ၁၉။ သန်မင်းစိုး ၂၀။ သိန်းတင်အောင်၂၁။ သန်းအေး ၂၂။ အုန်းလွင် ၂၃။ အောင်ဘွား ၂၄။ အောင်မျိုးဦး ၂၅။ အောင်သန်းတင့် တို့ ဖြစ်သည်။ အမျိုးသားနိုင်ငံရေးအင်အားစု အမည်အောက်က ပါတီအစုအဖွဲ့ ၁၄ ခုနှင့် လူ ၄ ဦး မှာ - ၁။ အမျိုးသားပြည်လည်စည်းလုံးညီညွတ်ရေး သုတေသနနှင့် တိုးချဲ့ထုတ်လုပ်ရေး ကျောင်းတော်သားစု ၂။ ခေတ်သစ်သိပ္ပံနိုင်ငံရေး ဘောကဗေဒလေ့လာရေး မျိုးဆက်သစ် ကျောင်းတော်သားစု ၃။ နိုင်ငံရေးဘောဗေဒ လေ့လာရေးမျိုးဆက်သစ် ကျောင်းတော်သားစု ၄။ တသီးပုဂ္ဂလအမတ်နှင့် ညီလာခံကိုယ်စားလှယ်များ ၅။ ညီလာခံနှင့် အခြေခံဥပဒေ ကြိုဆိုထောက်ခံရေးအဖွဲ့ ၆။ အမျိုးသားနိုင်ငံရေး စေ့ဆော်သူများအဖွဲ့ ၇။ လူ့ဘောင်သစ် ဒီမိုကရက်တစ် ၈။ ပြည်ထောင်စု ဒီမိုကရေစီ မဟာမိတ်အဖွဲ့ ၉။ ဒီမို အင်န်အယ်ဒီ (စစ်ကိုင်းတိုင်း) ၁၀။ ၀ံသာနု အင်န်အယ်ဒီ (မန္တလေး) ၁၁။ လူငယ် အင်န်အယ်ဒီ (မြန်မာနိုင်ငံ၊ မိတ္ထိလာ) ၁၂။ မျိုးချစ်အမျိုးသားနိုင်ငံရေးအစည်းအရုံး (တောင်တွင်းကြီး) ၁၃။ ဒီမိုကရက်တစ်ဘွဲ့ရကျောင်းသားဟောင်းများအဖွဲ့ ၁၄။ အမျိုးသားနိုင်ငံရေးအင်အားစု (ရခိုင်ပြည်နယ်) ၁၅။ အေးလွင် (၈၈ မျိုးဆက် ကျောင်းသား) ၁၆။ တက္ကသိုလ်မြတ်သူ ၁၇။ သိန်းတင်အောင် ၁၈။ ခင်မောင်မြင့် တို့ ဖြစ်ကြသည်။ ၎င်းတို့ ဖြန့်ချိသော စာရွက်စာတမ်းများကို လွတ်လပ်စွာ လက်ဆင့်ကမ်းပေးဝေလျက်ရှိပြီး အစိုးရအာဏာပိုင်များက အနှောက်အယှက်မပေးပေ။ ၂၀၁၀ ရွေးကောက်ပွဲ ကော်မရှင်ဟူ၍ သီးခြား တရားဝင် ဖွဲ့စည်းခြင်း၊ စည်းကမ်းဥပဒေများ ထုတ်ပြန်ခြင်း မရှိသေးသမျှ ၁၉၉၀ ရွေးကောက်ပွဲ ကျင်းပခဲ့သော ရွေးကောက်ပွဲ ကော်မရှင်၏ စည်းကမ်းဥပဒေများအတိုင်း အတည်ယူပြီး ကိုယ်နည်းကိုယ့်ဟန်ဖြင့် ထိုသူတို့က ဆောင်ရွက်လာပုံရသည်ဟု ပြည်တွင်းက ၈၈ မျိူးဆက် ကျောင်းသားဟောင်း တဦးက မှတ်ချက်ပေးသည်။ ၁၉၆၂ ကျောင်းသားအရေးအခင်းကို ဖြတ်သန်းခဲ့ရသူ ကျောင်းသားဟောင်းတဦးက မှတ်ချက်ပေးရာတွင် - အစိုးရဖက်ကကော၊ အစိုးရ၀ါဒဖြန့် အလိုကျ ပရိုက်ဗိတ်မီဒီယာမှ ကမကထပြု ထောက်ပံ့နေသူများကကော တိုက်တွန်းသဖြင့် ထိုသို့ ရှေ့တိုးလာပုံရကြောင်း၊ ပြည်ပမီဒီယာများက သူတို့ကို အာရုံစိုက်လာစေရန် မျက်စပစ်လာကြကြောင်း၊ ၂၀၁၀ ရွေးကောက်ပွဲကို အကောင်းမြင်ပြရင်း ၁၉၉၀ ရွေးကောက်ပွဲ ကိုင်စွဲသူများနှင့် အကျယ်ချုပ်ခံ ဒေါ်အောင်ဆန်းစုကြည်တို့ကို ဝေဖန်လာမည့် အလားအလာရှိကြောင်း သုံးသပ်ပြသွားသည်။ တက္ကသိုလ်ကျောင်းဆရာတဦးက - “ တချို့ကတော့ ရိုးသားတဲ့ တက်ကြွလှုပ်ရှားသူတွေ ဖြစ်ပုံရတယ်။ ဒါကို စစ်အစိုးရနဲ့ ငွေရှင်တွေက အသုံးချပုံရတယ်။ ပြည်သူတွေက ဒီအချိန်မှာ ဘာကိုမှ စိတ်မ၀င်စားဘူး။ ဟိုးတုန်းက ကြံ့ဖွံ့တွေ စွမ်းအားရှင်တွေ အမျိုးသမီးစွမ်းဆောင်ရှင်တွေကို သူတို့က ကြိုးကိုင်တယ်။ အခုကျတော့ နိုင်ငံရေး တက်ကြွလှုပ်ရှားသူတွေကို တဖက်လှည့်နဲ့ တွန်းအားပေးလိုက်တယ်။ အဲဒီပေါ်မှာ အခြေခံပြီး စစ်အစိုးရက လုပ်လာမှာပဲ …” ဟု ပြောသည်။ အင်န်အယ်ဒီ ပါတီက ၂၀၀၈-အခြေခံဥပဒေကို ပြန်လည်သုံးသပ်ရန်၊ နိုင်ငံရေးအကျဉ်းသားအားလုံး ချွင်းချက်မရှိ ပြန်လည် လွတ်မြောက်ရန်၊ အမျိုးသားအကျိုးစီးပွားကို ရှေ့ရှု၍ ၀ိုင်းဝန်းတွေ့ဆုံဆွေးနွေး အဖြေရှာကြရန် တိုက်တွန်းထားသည်။ ၂၀၁၀ ရွေးကောက်ပွဲကို အရာသွင်းခြင်း မရှိပေ။ ကုလသမဂ္ဂ လူ့အခွင့်အရေးကော်မရှင်က မြန်မာနိုင်ငံတွင် တရားမျှတသော ဥပဒေစိုးမိုးမှုနှင့် တရားဥပဒေ၏အာမခံချက်ရှိမှုကို တောင်းဆိုထားသည်။ လက်ရှိအချိန်တွင် နိုင်ငံရေးအကျဉ်းသား ၂၀၀၀ ကျော်ရှိသည်။ အချို့ကို ထောင်ဒဏ် အနှစ် ၆၀ ကျော် ချထားသည်။ နိုင်ငံတကာက အစီရင်ခံစာတချို့အလိုအရ မြန်မာပြည်သည် အထွေထွေ ချွတ်ချုံကျလျက်ရှိပြီး လွတ်လပ်မှုနှင့် တရားမျှတမှုကင်းမဲ့သော ဆိုးဝါးသည့် အာဏာရှင်နိုင်ငံတခုအဖြစ် သတ်မှတ်ခြင်း ခံထားရပြီး ဖြစ်သည်။
REF: မိုးမခ
Posts
0 comments:
Post a Comment