သြစတြေလျရောက် နောက်ထပ် မြန်မာ ၂ ဦး စစ်ရာဇဝတ်မှု ကျူးလွန်ခဲ့ကြောင်း ဝန်ခံ

2011-08-01

သြစတြေလျနိုင်ငံမှာနေထိုင်တဲ့ မြန်မာလူမျိုးနောက်ထပ်နှစ်ဦးက သူတို့ဟာ ရှစ်လေးလုံး အရေးတော်ပုံအတွင်း ဆန္ဒပြသူ တွေအပေါ် သတ်ဖြတ်မှုတွေ ကျူးလွန်ခဲ့တဲ့ စစ်ထောက်လှမ်းရေးဟောင်းတွေ ဖြစ်ကြောင်း ဒီကနေ့ ထုတ်ဖော် ပြောဆိုလိုက် ပါတယ်။

သူတို့နှစ်ဦးဟာ ဗစ်တိုးရီးယားပြည်နယ်မှာ နေထိုင်သူတွေဖြစ်ပြီး တဦးက သြစတြေလျနိုင်ငံသား ဖြစ်ပြီး နောက်တဦးက ဒုက္ခသည်ဗီဇာနဲ့ နေထိုင်သူဖြစ်တယ်လို့ သိရပါတယ်။ သူတို့နှစ်ဦးစလုံးဟာ ဘရစ်စဘိန်းမြို့မှာ နေထိုင်တဲ့ ထူးထူးဟန်ဆိုသူရဲ့ လက်အောက်မှာ တာဝန် ထမ်းဆောင်ခဲ့သူတွေ ဖြစ်တယ်လို့ ဆိုပါတယ်။

ထူးထူးဟန်ဆိုသူက ထောက်လှမ်းရေး အရာရှိဟောင်းအဖြစ် ရှစ်လေးလုံးကာလက ဆန္ဒပြသမား ၁ ရာလောက် သတ်ဖြတ်မှု ကျူးလွန်ခဲ့ကြောင်း ပြီးခဲ့တဲလအတွင်း ထုတ်ဖော် ပြောဆိုခဲ့အပြီး အခုလို နောက်ထပ် ၂ ဦးက ဝန်ခံ ပြောဆိုလိုက်တာပါ။

ဒီအတောအတွင်း ကိုထူးထူးဟန်နဲ့ တမြို့တည်း နေထိုင်သူ ကိုမူးဆာ ဆိုသူကလည်း ၁၉၈၄ ကနေ ၁၉၈၇ ခုနှစ်အတွင်း မော်လမြိုင်မြို့အနီး ဘုရားသုံးဆူဒေသမှာ တိုင်းရင်းသား ၅ဝ လောက်ကို အမိန့်ပေး သတ်ဖြတ်ရာမှာ တာဝန်ရှိကြောင်း ပြီးခဲ့တဲ့ သီတင်းပတ်အတွင်း ထုတ်ဖော်ပြောဆိုခဲ့ပါတယ်။

အခုလို ကိုထူးထူးဟန် အပါအဝင် ၄ ဦးက မြန်မာနိုင်ငံမှာ စစ်ရာဇဝတ်မှုတွေ ကျူးလွန်ခဲ့ကြောင်း ဆက်တိုက်ဆိုသလို ထုတ်ဖော် ပြောဆိုလာမှုကို အတည်ပြုနိုင်ခြင်း မရှိပေမယ့် ကုလသမဂ္ဂ စုံစမ်းရေး ကော်မရှင်တရပ် ပေါ်ပေါက်ရေး ကြိုးပမ်းနေမှုတွေကို ထိခိုက်မှုရှိမှာ စိုးရိမ်ပူပန်ကြောင်း ဆစ်ဒနီမြို့အခြေစိုက် Burma Office မြန်မာ့ရေးရာရုံး ညွှန်ကြားရေးမှူး ဒေါက်တာမြင့်ချိုက ပြောပါတယ်။

အခုနောက်ဆုံး ဝန်ခံသူ ၂ ဦးထဲမှာ တဦးက ထောက်လှမ်းရေးမှာ တပ်ကြပ်ကြီးအဆင့် တာဝန်ထမ်းဆောင်ခဲ့သူ ဖြစ်ကြောင်း၊ အသက် ၅၇ နှစ်အရွယ် ပုဂ္ဂိုလ်က သူ့ရဲ့နာမည်ကို “မောင်” လို့ အတိုကောက် ပေးထားပြီး နောက်တဦးကတော့ “ကိုစိုးအောင်” လို့ ပေးထားကြောင်း Sydney Morning Herald သတင်းစာက ဖော်ပြပါတယ်။

အခုလို မြန်မာနိုင်ငံမှာ စစ်ရာဇဝတ်မှု ကျူးလွန်ခဲ့ဖူးသူတွေလို့ ဝန်ခံပြောဆိုသူ ၄ ဦးစလုံးကို သြစတြေလျ အာဏာပိုင်တွေက လောလောဆယ်အထိ ခေါ်ယူစစ်ဆေးတာ မရှိသေးဘူးလို့ သိရပါတယ်။

Ref: အာရ်အဖ်အေ