နိုင်ငံတကာကြက်ခြေနီ အဖွဲ့ ဥက္ကဌ မြန်မာနိုင်ငံ ခရီးစဉ်ကို ကျေနပ်အားရ

2013-01-19

ICRC ခေါ် နိုင်ငံတကာကြက်ခြေနီ အဖွဲ့ ဥက္ကဌ တဦးအနေနဲ့ ပထမ ဆုံး ရောက်ရှိခဲ့တဲ့ ခရီးစဉ် အတွင်း မြန်မာနိုင်ငံနဲ့ ပူးပေါင်းဆောင်ရွက်ဖို့ အာမခံချက်တွေ ရရှိခဲ့တယ်လို့ ICRC ဥက္ကဌ Mr Peter Maurer က ပြောကြားလိုက်ပါတယ်။

သူ့ခရီးစဉ်ဟာ မြန်မာနိုင်ငံမှာ ကြက်ခြေနီအသင်းက လုပ်နေတဲ့ လူသားချင်းစာနာမှုဆိုင်ရာ လုပ်ငန်းတွေမှာ မြန်မာအစိုးရနဲ့ နှစ်ဦးနှစ်ဘက် ဆက်ဆံရေးအတွက် ကဏ္ဍသစ်တရပ် စတင်လိုက်တာလို့ တပတ်ကြာခရီးစဉ်အပြီး ထုတ်ပြန်တဲ့ ကြေညာချက်မှာ Mr Maurer က ဖော်ပြထားပါတယ်။

မြန်မာခေါင်းဆောင်တွေနဲ့ ဆွေးနွေးရတာ အပြုသဘောဆောင်တဲ့အကြောင်း၊ ICRC ဟာ အရေးပါပြီး ပါတီစွဲကင်းကင်းနဲ့ လွတ် လပ် တဲ့ကြားနေအဖွဲ့အစည်းဖြစ်တာကို သမ္မတ ဦးသိန်းစိန် ကောင်းကောင်း နားလည်သဘောပေါက်ပုံ ပြသကြောင်းနဲ့ ICRC နဲ့ လက်တွဲဆောင်ရွက်ဖို့ မြန်မာ သမ္မတက ထုတ်ဖော်ပြောကြားကြောင်း Mr.Maurer က ပြောပါတယ်။

မြန်မာအစိုးရရဲ့ ပူးပေါင်းဆောင်ရွက်တဲ့ စိတ်ဓာတ်သစ်ကို ဥပမာပေးပြောရရင် ကြက်ခြေနီအသင်းဟာ အကျဉ်းထောင်တွေဆီ ရှေ့သီတင်းပတ်မှာ ပြန်လည်သွားရောက်ခွင့်ရမယ့်ကိစ္စဖြစ်တယ်လို့ ဆိုပါတယ်။

Mr Peter Maurer ဟာ သမ္မတဦးသိန်းစိန်အပြင် ဝန်ကြီးတွေ၊ လွှတ်တော်နှစ်ရပ်က ဥက္ကဌတွေနဲ့ ဒေါ်အောင်ဆန်းစုကြည် ကိုလည်း တွေ့ဆုံခဲ့ပါတယ်။


Ref: အာရ်အဖ်အေ