သမတလောင်းစာရင်း စစ်အစိုးရလွှတ်တော်သစ်မှာ ပဏာမရွေးချယ်

2011-02-01

နေပြည်တော်မှာ ကျင်းပနေတဲ့ လွှတ်တော် ဒုတိယ နေ့ကို မနက် ၁၀ နာရီမှာ စတင် ကျင်းပခဲ့ပြီး ဒုတိယ သမတလောင်း အမည် စာရင်းတွေကို တင်သွင်း ခဲ့ကြတယ်လို့ သတင်း ရရှိပါတယ်။


ဒုတိယ သမတလောင်းတွေအနေနဲ့ ပြည်သူလွှတ်တော်က ပဏာမ ရွေးချယ်ရာမှာ ကြံ့ခိုင်ရေး ပါတီ အမတ် ဗိုလ်ချုပ်ကြီးဟောင်း လက်ရှိ ဝန်ကြီးချုပ် ဦးသိန်းစိန်နဲ့ ကရင်ပြည်နယ် လှိုင်းဘွဲ့က လွှတ်တော် ကိုယ်စားလှယ် ဦးစောသိန်းမောင် ဖြစ်တယ်လို့ သိရပါတယ်။ အမျိုးသား လွှတ်တော်က တင်သွင်းသူ နှစ်ဦးကတော့ ကြံ့ခိုင် ဖွံ့ဖြိုးရေး ပါတီ ကိုယ်စားလှယ် ဒေါက်တာ စိုင်းမောက်ခန်းနဲ့ ရခိုင် တိုင်းရင်းသားများ ဖွံ့ဖြိုး တိုးတက်ရေး ပါတီ ဒေါက်တာ အေးမောင်တို့ ဖြစ်ပြီး တပ်မတော်သား ကိုယ်စားလှယ်တွေ ဖက်က တင်သွင်းသူ ဦးတင်အောင်မြင့်ဦး ဖြစ်ကြောင်း သတင်း ရရှိပါတယ်။

ဒီစာရင်းမှာ အများ ခန့်မှန်းနေတဲ့ ဗိုလ်ချုပ်မှူးကြီး သန်းရွှေ မပါဝင်တဲ့အတွက် သမတ ရာထူးကို စစ်အစိုးရ အကြီးအကဲက ရယူမှာ မဟုတ်ဘူးဆိုတာ ထင်ထင်ရှားရှား ပြလိုက်တာ ဖြစ်တယ်လို့ နေပြည်တော်က သတင်းတွေက ဆိုပါတယ်။

လွှတ်တော် ကိုယ်တိုင်တက်ရောက်နေတဲ့ အမျိုးသား ဒီမိုကရေစီ အင်အားစုပါတီ (NDF) က ပြည်သူ့ လွှတ်တော် ကိုယ်စားလှယ် ဦးစိုးဝင်းက အခုလို ပြောပြပါတယ်။

“ပြည်သူ့လွှတ်တော်ကနေ ပြီးတော့ကျတော့ ဒုတိယ သမတလောင်း အနေနဲ့ တင်ပေးတာ ကျွန်တော်တို့ နှစ်ယောက် တင်ပေးတယ်။ အဲဒါ ဘယ်သူလဲ ဆိုတော့ ကျတော့ ဦးစောသိန်းမောင်နဲ့ နောက်တခုက ဦးသိန်းစိန်၊ အဲဒီ နှစ်ယောက်ပေါ့။ အမျိုးသား လွှတ်တော်က ကျတော့ တစ်က စိုင်းမောက်ခမ်း၊ နောက်တယောက်က ကျတော့ ကျွန်တော်တို့ ဒေါက်တာ အေးမောင်၊ ရခိုင်က။ နက်ဖြန်ခါ ကျွန်တော်တို့ တရက်နားတယ်။ ဒီနေ့ ဟိုဟာဖြစ်ပြီးရင် သဘက်ခါ ၁၀ နာရီမှာ ပြန်ပြီးတော့ ကျတော့ လွှတ်တော် ပြန်ကျင်းပမယ်။”

ဒါ့အပြင် ဒီကနေ့ ဒုတိယ သမတလောင်း စိစစ်ရေးကော်မတီကိုလည်း ဖွဲ့စည်းလိုက်ပါတယ်။ စိစစ်ရေး ကော်မတီ အတွက် ပြည်သူ့ လွှတ်တော်က လက်ရှိ သိပ္ပံနဲ့ နည်းပညာဝန်ကြီး ဦးသောင်းကို ရွေးချယ်ခဲ့ပြီး၊ အမျိုးသား လွှတ်တော်က လက်ရှိ လျှပ်စစ်စွမ်းအား ဒုဝန်ကြီး ဦးမျိုးမြင့်ကို ရွေးချယ် လိုက်ပါတယ်။ ဒီစိစစ်ရေး ကော်မတီမှာ ဒီကနေ့ ရွေးချယ်လိုက်သူ ၂ ဦးနဲ့အတူ လွှတ်တော် ဥက္ကဋ္ဌ နဲ့ ဒုဥက္ကဋ္ဌတွေလည်း ပါဝင်ကြောင်း သိရပါတယ်။

ဒုတိယ သမတလောင်း အမည်စာရင်းတွေကို စိစစ်ရေးကော်မတီက စိစစ် အတည်ပြုပြီးနောက် ပြည်သူ့ လွှတ်တော်နဲ့ အမျိုးသား လွှတ်တော်အတွက် တဦးစီကို မဲနဲ့ ရွေးချယ် တင်မြှောက်မှာ ဖြစ်ပါတယ်။

ဒုတိယ သမတကို လာမဲ့ ဖေဖော်ဝါရီလ ၃ ရက်နေ့မှာ ပြန်လည်စတင်မဲ့ လွှတ်တော်မှာ မဲခွဲမှာ ဖြစ်ပါတယ်။ အဲဒီ ဒုသမ တထဲကမှ သမတ ပြည်ထောင်စု လွှတ်တော်ကနေ ရွေးချယ်ရမှာ ဖြစ်ပါတယ်။ မနက်ဖြန် ၂ ရက်နေ့မှာတော့ လွှတ်တော်ရပ်နားကြောင်း သိရပါတယ်။

Ref: RFA News