Wednesday, 21 January 2009
စစ်အစိုးရက ထောင်ဒဏ် ၆၈ နှစ် ချမှတ်ထားသော သံဃာ့ တပ်ပေါင်းစုအဖွဲ့ ဦးဆောင် သံဃာတော်တပါး ဖြစ်သည့် အရှင်ဂမ္ဘီရကို ပြီးခဲ့သည့် စနေနေ့က မန္တလေးမြို့ အိုးဘိုထောင်မှ စစ်ကိုင်းတိုင်း ခန္တီးထောင်သို့ ပြောင်းရွှေ့လိုက်ကြောင်း မိသားစုဝင်တဦးက ပြောသည်။ ယခင်ရက်များက အရှင်ဂမ္ဘီင်္ရ အစာငတ်ခံ ဆန္ဒပြသည်ဟူသော သတင်းများ ထွက်ပေါ်လာခြင်းနှင့် ပတ်သက် ၍ အသေအချာမသိရသေးသော်လည်း ဇန်န၀ါရီ ၁၃ ရက်က စတင်ပြီး အရှင်ဂမ္ဘီရ အစာမစား၊ ရေမသောက်၊ ရေမချိုးဟူသော သတင်းများ ကြားသိရကြောင်း၊ ဆက်လက်၍ စုံစမ်းနေဆဲ ဖြစ်ကြောင်းလည်း မခင်သူဌေး က ပြောသည်။
အရှင်ဂမ္ဘီရအား ထောင်ပြောင်းလိုက်သည်ကို မိသားစုသို့ အကြောင်းကြားခြင်းမရှိကြောင်းနှင့် ယနေ့ ထောင် ၀င်စာ သွားရောက်တွေ့သည့် အချိန်တွင်မှ သိရှိရခြင်းဖြစ်သည်ဟု အရှင်ဂမ္ဘီရ၏ ညီမ တော်စပ်သူ မခင်သူဌေးက ပြောပြသည်။
“အမေနဲ့ မောင်လေးက ဒီနေ့ ၆နာရီလောက်ကတည်းက အိမ်ကထွက်တယ်တဲ့၊ ထောင်ရောက် တော့ ဦးပဉ္ဖင်းကို ခန္တီးထောင်ကို ပို့လိုက်ပြီတဲ့၊ စနေနေ့ကတည်း က ပို့လိုက်တယ်တဲ့၊ အကြောင်းမကြားဘူး၊ ကျန်းမာရေးအခြေအနေစိတ်ပူတယ်ဆိုတော့ ကျန်းမာရေးအခြေအနေ ကောင်းကောင်းမွန်မွန်နေမှာပါတဲ့၊ ဆေးစစ်ပြီးမှ သေချာမှ ပို့တာ ဖြစ်မှာပါလို့ ထောင်မှူးက ပြောတယ်”ဟု မခင်သူဌေးက ဧရာဝတီသို့ ပြော သည်။
မိသားစုနှင့် ပေးမတွေ့ချင်သောကြောင့် ယခုကဲ့သို့ အရှင်ဂမ္ဘီရကို ထောင်ပြောင်းလိုက်ကြောင်း ပြောဆိုခြင်း ဖြစ်နိုင်သည်ဟုလည်း ၎င်းက ဆိုသည်။
အဆိုပါ အရှင်ဂမ္ဘီရ သက်တော်(၂၉) နှစ်သည် လွန်ခဲ့သည့် ၂၀၀၇ ခု ရွှေဝါရောင်တော်လှန်ရေးတွင် ပါဝင်ခဲ့ သောကြောင့် စစ်အစိုးရက ဖမ်းဆီး၍ ပုဒ်မ ၅၀၅(က)၊ ၅၀၅ (ခ) ၊ လ၀က ပုဒ်မ ၁၃/၁ ၊ ပုဒ်မ ၁၇/၁ ၊ အီလက်ထရွန်နစ် ပုဒ်မ ၃၀၃(က)၊ အသင်းအဖွဲ့ပုဒ်မ ၆/၈၈ စသည်တို့ဖြင့် တရားစွဲဆိုပြီး ထောင်ဒဏ်များ ချမှတ်ခဲ့ခြင်းဖြစ်သည်။
အရှင်ဂမ္ဘီရကို ၂၀၀၇ ခု နိုဝင်ဘာ ၄ ရက် နေ့တွင် မန္တလေးတိုင်း စဥ့်ကိုင်မြို့၌ စစ်အာဏာပိုင်များက ဖမ်းဆီး ခဲ့ခြင်းဖြစ်သည်။
စစ်အစိုးရက ဖမ်းဆီးထားသည့် တခြားသော ရွှေဝါရောင်တော်လှန်ရေးနှင့် ပတ်သက်သည့် သံဃာတော် ဦးခေမာစာရ သက်တော် (၂၈)နှစ်ကိုလည်း ယမန်နေ့က ထောင်ဒဏ် ၁၄ နှစ် ချမှတ်လိုက်ကြောင်း ၎င်းနှင့် နီးစပ်သည့် နိုင်ငံရေးအကျဉ်းသား မိသားစုဝင်တဦးကပြောသည်။
“သူ့ကို မရန်းကုန်းမြို့နယ်တရားရုံးက တရားသူကြီး ဒေါ်ခင်သန့်စင်က အမှု ၂ မှုနဲ့ ထောင် ၁၄ နှစ် ချလိုက် တယ်၊ သူက စက်တင်ဘာ ရွှေဝါရောင်တော်လှန်ရေးမှာပါတဲ့ သံဃာတပါးပဲ”ဟု ၎င်းက ပြောပြသည်။
ယင်း ဦးခေမာစာရအား ပုဒ်မ ၃၈၀ ဘုရားခိုးမှု၊ ပုဒ်မ ၄၆၈ တရားမ၀င် စာရွက်စာတန်း အမှုများဖြင့် တမှုလျှင် ထောင်ဒဏ် ၇ နှစ်ဖြင့် ၂ မှုပေါင်း ထောင်ဒဏ် ၁၄ ချမှတ်လိုက်ခြင်းဖြစ်ကြောင်း သိရသည်။
“အရင် ရုံးစထုတ်စဉ်က ၂၉၅ (က) ဆိုတဲ့ ပုဒ်မ တခုပါတယ်၊ ပုဒ်မ ၃ ခု ၊ အဲဒါကို ၂၉၅(က) ဖြုတ်လိုက်တယ်၊ အဲဒါက သာသနာညိုးနွမ်းတဲ့ ပုဒ်မ၊ နိုင်ငံရေးနဲ့နွယ်တယ်၊ ၂၉၅(က) ကို ဖြုတ်လိုက်ခြင်းအားဖြင့် နိုင်ငံရေး မနွယ်တော့တဲ့အတွက် နောက်ပိုင်း ရဲဘက်တောင်ထုတ်နိုင်တယ်လို့ ယူဆရတယ်”ဟု ထောင်ဝန်ထမ်းတဦး က ပြောဆိုသည်။
ဦးခေမာစာရသည် ပဲခူးတိုင်း သနပ္ပင်မြို့နယ် ကလိုင်ရွာ ဇာတိဖြစ်ပြီး ရန်ကုန်မြို့ ဗဟန်းမြို့နယ်ရှိ ကန်သာ ကျောင်းမှ ပညာတတ်၊ ဓမ္မာစရိယဘွဲ့ရဖြစ်သည်။ ၎င်းသည် ၂၀၀၇ ခု စက်တင်ဘာ ရွှေဝါရောင်တော်လှန်ရေး တွင် ပါဝင်လှုပ်ရှားခဲ့သည့်အတွက် တိမ်းရှောင်နေရကာ ၂၀၀၇ ခု ဒီဇင်ဘာလကုန်ပိုင်းတွင် ရန်ကုန်မြို့ မရန်းကုန်းမြို့နယ်အတွင်း၌ စစ်အာဏာပိုင်များ၏ ဖမ်းဆီးမှုခံခဲ့ရခြင်းဖြစ်သည်။
ကိုစိုး
REF: ဧရာဝတီ
Posts
0 comments:
Post a Comment