Tuesday, May 7, 2013

မြန်မာ့ဆန် ကမ္ဘာ့ဈေးကွက်သို့ရောက်နိုင်ရန် လုပ်ဆောင်မည်

နန်းလွင်နှင်းပွင့်
မလ ၀၆ ရက် ၂၀၁၃ ခုနှစ်

စီးပွားရေး အပြောင်းအလဲ များစွာ ဖြစ်ပေါ်နေသည့် အလျောက် မြန်မာ့ဆန် ဈေးကွက်အား ကမ္ဘာ့ ဈေးကွက် သို့ ရောက်ရှိစေရန် အရည်အသွေးပိုင်းဆိုင်ရာ မြင့်မားမှုများ လုပ်ဆောင်တော့မည် စီးပွားကူးသန်း ပြည်ထောင်စုဝန် ကြီး ဦးဝင်းမြင့်က ဆိုသည်။

စီးပွားကူးသန်းဝန်ကြီးဌာန ၊ပြည်ထောင်စုဝန်ကြီး ဦးဝင်းမြင့်က “ ပြည်ပကို ရာခိုင်နှုန်းနဲ့ အများကြီး မပို့နိုင် ရင်တောင် ကောင်းမွန်တဲ့ အရည်အသွေးတွေ ပို့နိုင်ဖို့ အရေးကြီးပါတယ်၊ အဲ့လိုဖြစ်အောင်လည်း အဆင်မြင့် ဆန်တွေဖြစ်အောင်၊ ဈေးကွက်ဝင်ဆန်တွေ ဖြစ်အောင် စိုက်ပျိုးနိုင်ဖို့လည်း လိုပါတယ်၊ စိုက်ပျိုးနိုင်ဖို့ နဲ့ သိုလှောင်ဖို့ ဆန်စက်၊ မြေနေ၇ာတွေ လိုအပ်ပါတယ်၊ ” ဟု ဆိုသည်။

လိုအပ်နေသည့်မြေနေရာများအား အဆင်သင့် ဖြစ်စေရန် စီးပွားကူးသန်းမှ ပိုင်ဆိုင်သော မြေနေရာ များကိုလည်း နိုင်ငံတော် လိုအပ်ချက်တိုင်း အသုံးပြုနိုင်ရန် သက်ဆိုင်ရာသို့ အပ်နှံထားသည်ဟု သိရသည်။

လက်ရှိတွင် ရှိပြီးဖြစ်သော ဆန်စက်များမှာ ပြည်ပသို့တင်ပို့ရန် အရည်အသွေးကောင်းသော ဆန်များကို သိုလှောင်ရန် ထိန်းသိမ်းရန် လိုအပ်ချက်များရှိနေပြီး ၊ ခေတ်နှင့် မလျော်ညီတော့ သဖြင့် ဆန်စက်များ အသစ်တိုးချဲ့ဆောက်လုပ်ရန်လည်း စီစဉ်နေကြောင်း သိရသည်။

လယ်ယာစိုက်ပျိုးရေးကဏ္ဍတွင် လည်း ရင်းနှီးမြှုပ်နှံမှုများ လိုအပ်ချက်ရှိနေသည်ကိုလည်း လေ့လာတွေ့ ရှိထားသည်ဟု သိရသည်။

မြန်မာနိုင်ငံအနေဖြင့် မေလ ၄ ရက်နေ့တွင် ဂျပန်နိုင်ငံသို့ ဆန်တန်ချိန် ၅၀၀၀ ကျော်တင်ပို့ နိုင်ခဲ့ခြင်းဖြင့် ပြည် ပဈေးကွက်သို့ ထိုးဖောက်နိုင်ခဲ့သည်။ ဆက်လက်၍ ပြည်ပဈေးကွက် တည်တံ့ကာ တိုးတက် လာစေရန် ပြည်တွင်းရှိ အစိုး၇မဟုတ်သော ပုဂ္ဂလိက အဖွဲ့အစည်းများနှင့်လည်း ချိတ်ဆက် လုပ်ကိုင် သွားချင်သည်ဟု ဦးဝင်းမြင့်က ဆိုသည်။

၎င်းက ဆက်လက်၍ " ၂၀၁၂ခုနှစ်နဲ့၂၀၁၃ ခုနှစ်မှာ ၁.၄ သန်းကျော် တင်ပို့နိုင်ခဲ့တယ်၊ ဒါဟာဆိုရင်ပြည်ပကို တင်ပို့နေ တဲ့ ၄၆ နှစ်ဝန်းကျင်မှာ အများဆုံး တင်ပို့နိုင်ခဲ့တာပဲ ၊ နောက်ပိုင်းမှာ ပုဂ္ဂလိက အဖွဲ့အစည်းတွေနဲ့ ပူးပေါင်းလုပ်ဆောင်သွား ချင်ပါတယ်၊ လာမည့် နှစ်တွေမှာ ကောင်းမွန်ပြီး အရည်အသွေး ရှိတဲ့ ၃ သန်း လောက်ကို တင်ပို့နိုင်အောင် ကြိုးစား သွား ပါမယ်။ " ဟု ပြောသည်။

ပြည်ပသို့ ဆန်စပါးများတင်ပို့နိုင်ရန် လယ်မြေဧက ပေါင်း ၁၂၉ ဧက ကိုလည်း ၀ယ်ယူထားကာ လုပ်ငန်းများဆောင် ရွက်ရန် အစီအစဉ်များ စတင်လုပ်ဆောင်နေပြီး ယင်းစီမံကိန်းများ ဆောင်ရွက်ရာတွင် ဆန်စပါးမှ ထွက်သော ဘေးထွက် စပါးခွံများကို ပြန်လည် အသုံးပြုနိုင်သော ဆန်စက်များလည်း ပါဝင်မည် ဟု ရန်ကုန်တိုင်းဝန်ကြီးချုပ် ဦးမြင့်ဆွေ က ဆိုသည်။

မြန်မာနိုင်ငံ ဆန်စပါးအသင်း ဦးချစ်ခိုင်က “ ဂျပန်နိုင်ငံက နှစ်နိုင်ငံကူးသန်းဆက်သွယ်ရေး ကောင်းမွန်စေဖို့၊ အရည်အသွေးမြင့် ဆန်စပါးတွေ ထုတ်လုပ်နိုင်ဖို့ မြန်မာနိုင်ငံ မှာလည်း ရင်းနှီးမြှုပ်နှံမှုတွေ ချပေးပြီးပါပြီ၊ အခု ဆန်စပါးနဲ့ ပတ်သတ်တဲ့ လုပ်ငန်းတွေ ရှေ့ဆက် လုပ်ဆောင်ဖို့ လုပ်ငန်းတွေမှာလည်း ပါဝင်မှာပါ၊ ဆန်စပါး လုပ်ငန်းတွေ ပြည်ပ ဈေးကွက်အတွက် လုပ်ဆောင်မှု တွေရဲ့ စိုက်ပျိုးမြေနေ ရာ တွေကတော့ ရန်ကုန်တိုင်းနေပြည်တော်၊ ဧရာဝတီတိုင်းတွေ ဖြစ်မှာပါ ”ဟု ဆိုသည်။

ဂျပန်နိုင်ငံသို့ ဆန်တန်ချိန် ၅၀၀၀ ကို မြန်မာ့လယ်ယာစိုက်ပျိုးရေးအများပိုင် ကော်ပိုေ၇းရှင်း (MAPCO) နှင့် MITSUI CO,Ltd တို့မှ ပူးပေါင်းကာ တင်ပို့ခဲ့ခြင်းဖြစ်သည်။

ဂျပန်နိုင်ငံ မှလည်း မြန်မာနိုင်ငံ စီးပွားရေး ပြောင်းလဲရေးတွင် ပါဝင်သော နည်းစနစ်ပိုင်းဆိုင်ရာများ၊ ဓာတုပိုင်း ဆိုင်ရာများတွင် ကူညီမှုများ ပေးခဲ့ပြီး လူ့စွမ်းအား အရင်းအမြစ် တိုးတတ်စေရန် ပြောင်းလဲ ရာတွင်လည်း ဒေါ်လာ ၃သန်းခန့် အကုန်အကျခံကာ ကူညီမည်ဟု သိရသည်။

ဂျပန်နိုင်ငံသည် ၁၉၄၀ ၀န်းကျင်တွင် အစာပြတ်လပ်မှုများ ကြုံကြိုက်သည့်နောက်ပိုင်းတွင် နိုင်ငံတကာ၏ ထောက်ခံ သဘောတူညီမှုများဖြင့် ဆန်စပါးတန်ချိန် ၇ သိန်း ၇သောင်းခန့်ကို ပြည်ပမှ ၀ယ်ယူ ရရှိလျက်ရှိသည်။

Ref: မဇ္ဈိမ

0 comments:

အပေါ်သို့