08.08.2012
ဆီးရီးယားနိုင်ငံမြောက်ပိုင်း အာလက်ပိုမြို့ကို အစိုးရစစ်တပ်က သီးခြား ထိုးစစ်နှစ်ခုနဲ့ ဗုဒ္ဓဟူးနေ့က စတင် တိုက်ခိုက်ခဲ့ပါတယ်။
တိုက်လေယာဉ်တွေနဲ့ ရဟတ်ယာဉ်တွေက ဗုံးကျဲတိုက်ခိုက်ကြပြီး မြေပြင်တပ်တွေက သူပုန်တွေရဲ့ နေရာတွေကို ပစ်မှတ်ထား တိုက်ခိုက်ခဲ့ကြပါတယ်။
အစိုးရတပ်တွေက သူပုန်တွေကို အနိုင်ရနေတယ်လို့ နိုင်ငံပိုင် ရုပ်မြင်သံကြား သတင်းဌာနက ကြေညာ ပါတယ်။ ဒါပေမဲ့လည်း သူတို့ ဆုတ်ခွာနေရတယ်ဆိုတာ မဟုတ်တဲ့အကြောင်း အတိုက်အခံ ဆီးရီးယား လွတ်မြောက်ရေးတပ်ဖွဲ့ ခေါင်းဆောင်တွေက ပြောပါတယ်။
တချို့ သူပုန်တွေ တကယ်ပဲ ဆုတ်ခွာခဲ့ကြတယ်ဆိုတာကို အာလက်ပိုမြို့မှာရှိတဲ့ နိုင်ငံခြား သတင်းထောက်တွေက ပြောကြပါတယ်။
မြို့ရဲ့တစိတ်တပိုင်းကို သူပုန်တွေ ထိန်းချုပ်ခဲ့ပြီးကတည်းကဆိုရင် အခုနောက်ဆုံးဖြစ်နေတဲ့ တိုက်ပွဲဟာ အပြင်းထန်ဆုံးပဲလို့ ဆီးရီး ယားလူ့အခွင့်အရေးခြေအနေ စောင့်ကြည့်လေ့လာရေးအဖွဲ့က ပြောပါတယ်။ လွန်ခဲ့တဲ့နှစ်ရက်အတွင်း ဆီးရီးယားနိုင်ငံ တ၀န်းမှာ လူ ၃၀၀ ကျော် သေဆုံးခဲ့ရပြီးပြီလို့ အဲဒီ အဖွဲ့က ပြောပါတယ်။
Ref: ဗွီအိုအေ
Read More...
Collapse...
08.08.2012
အာဖရိကတိုက်မှာ စီးပွားရေးအင်အား အကြီးဆုံးနိုင်ငံဖြစ်တဲ့ တောင်အာဖရိကနိုင်ငံ အနေနဲ့ နိုင်ငံ တကာစင်မြင့်မှာ ပိုပြီးကြီးမား တဲ့ အခန်းကဏ္ဍကနေပါဝင်ဖို့ အမေရိကန်နိုင်ငံခြားရေးဝန်ကြီး ဟီလာရီ ကလင်တန်က တိုက်တွန်းလိုက်ပါတယ်။
တောင်အာဖရိကနိုင်ငံ၊ ကိပ်ပ်တောင်းမြို့က Western Cape တက္ကသိုလ်မှာ ပြောတဲ့မိန့်ခွန်းတခုထဲမှာ ၀န်ကြီးကလင်တန်က အဲဒီလိုပြောခဲ့တာပါ။
၂၁ ရာစုရဲ့ စိန်ခေါ်မှုတွေကို အန်တု ရင်ဆိုင်ခြင်းအားဖြင့် အသားအရောင်ခွဲခြားမှု တိုက်ဖျက်ရေး လှုပ်ရှားမှုရဲ့ သူရဲကောင်း နယ်လ်ဆင် မန်ဒဲလားရဲ့ အမွေအနှစ်ကို ဆက်ခံကြဖို့ ၀န်ကြီးကလင်တန်က တက္ကသိုလ်ကျောင်းသားတွေကို တိုက်တွန်းခဲ့ပါတယ်။
ဖွံ့ဖြိုးတိုးတက်ရေး၊ ကုန်သွယ်ရေးနဲ့ ရင်းနှီးမြှုပ်နှံရေး၊ ငြိမ်းချမ်းရေး၊ လုံခြုံရေးနဲ့ ဒီမိုကရေစီရေးရာလို ကိစ္စရပ်တွေမှာ အမေရိကန် ပြည်ထောင်စုဟာ တောင်အာဖရိကနိုင်ငံနဲ့ ပိုပြီး အနီးကပ် လုပ်ဆောင် သွားလိုပါတယ်လို့ ၀န်ကြီးကလင်တန်က ပြောပါတယ်။
အာဖရိကတိုက်ရဲ့ ပြဿနာတွေကို ဖြေရှင်းဖို့ အာဖရိကနည်းနာလိုအပ်တယ်ဆိုတာ မိမိ မကြာခန ကြားဖူးခဲ့ကြောင်း၊ ကမ္ဘာ့ ပြဿနာတွေကို ဖြေရှင်းဖို့ရာမှာလည်း အာဖရိကနည်းနာ လိုအပ်တယ် ဆိုတာကို မိမိ အခုပြောလိုပါကြောင်း နိုင်ငံခြားရေး ၀န်ကြီး ဟီလာရီ ကလင်တန်က ပြောခဲ့ပါတယ်။
Ref: ဗွီအိုအေ
Read More...
Collapse...
2012-08-08
မြန်မာနိုင်ငံ ရှစ်လေးလုံး ဒီမိုကရေစီတောင်းဆို လှုပ်ရှားမှု လှုပ်ရှားမှု ၂၄ နှစ်ပြည့် အခမ်းအနားကို အိန္ဒိယ-မြန်မာနယ်စပ် မဏိပူရ် ပြည်နယ် မိုးရေးမြို့မှာ မြန်မာ့ ဒီမိုကရေစီ ခေါင်းဆောင် ဒေါ်အောင်ဆန်းစုကြည်ရဲ့ ပုံတူရုပ်တုဖွင့်ပွဲ အခမ်းအနားနဲ့အတူ ကျင်းပခဲ့ပါတယ်။
ဒေါ်အောင်ဆန်းစုကြည်ရဲ့ ရုပ်တုဖွင့်ပွဲကို မိုးရေးမြို့ လူမှုသိပ္ပံ လေ့လာရေးဌာနမှာ ကျင်းပခဲ့ပြီး ရှစ်လေးလုံး အရေးတော်ပုံ (၂၄) နှစ်ပြည့် အခမ်းအနားကို မိုးရေးမြို့ ကုန်သွယ်ရေးဌာနမှာ ကျင်းပခဲ့ပါတယ်။
အဲဒီ အခမ်းအနားတွေကို မဏိပူရ် မြန်မာ့ဒီမိုကရေစီ သွေးစည်းညီညွတ်ရေး ကော်မတီက ကြီးမှူးကျင်းပခဲ့တာ ဖြစ်ပါတယ်။ ဒေါ်အောင်ဆန်းစုကြည်ရဲ့ အကြမ်းမဖက် ငြိမ်းချမ်းတဲ့နည်းနဲ့ ဒီမိုကရေစီ လမ်းကြောင်းကို လျှောက်လှမ်းခဲ့ပုံတွေ အကြောင်း အခမ်းအနားတွေမှာ ဟောပြောခဲ့ကြပါတယ်။
ဒါ့အပြင် လာမယ့် ၂၀၁၅ ခုနှစ် ရွေးကောက်ပွဲမှာ NLD ပါတီက မဲအများစုနဲ့ အနိုင်ရလိမ့်မယ်လို့ ယုံကြည်ကြောင်း၊ မြန်မာပြည် ဒီမိုကရေစီလမ်းကြောင်းပေါ် ရောက်ရှိသွားပြီဆိုရင် အိမ်နီးချင်းနိုင်ငံတွေမှာပါ အကျိုးခံစားရမှာ ဖြစ်ကြောင်းလည်း မဏိပူရ်-မြန်မာ ချစ်ကြည်ရေးအသင်း ခေါင်းဆောင်တွေက ပြောဆိုခဲ့ကြပါတယ်။
Ref: အာရ်အဖ်အေ
Read More...
Collapse...
2012-08-08
မြန်မာနဲ့ အိန္ဒိယနိုင်ငံတို့ ဆက်သွယ်မယ့် ကုလားတန် မြစ်ကြောင်း ဘက်စုံ ဖွံ့ဖြိုးရေး စီမံကိန်းမှာ ပါဝင်တဲ့ စစ်တွေဆိပ်ကမ်း တည် ဆောက်ရေး စီမံကိန်းမှာ အလုပ်လုပ်နေကြတဲ့ အလုပ်သမား ၃၀ လောက်က လုပ်ခလစာတွေ တိုးမြှင့်ပေးဖို့နဲ့ တရားမျှ တမှုရှိ အောင် လုပ်ဆောင်ဖို့ သြဂုတ်လ (၈) ရက်နေ့ မွန်းလွဲ (၁) နာရီခွဲမှာ စစ်တွေဆိပ်ကမ်း လုပ်ငန်းခွင် အဝင်ဝမှာ စာရွက်တွေ ကိုင်ဆောင်ပြီး ဆန္ဒပြခဲ့ပါတယ်။
အခုလို ဆန္ဒပြတောင်းဆိုတာနဲ့ ပတ်သက်ပြီး အလုပ်သမား ခေါင်းဆောင် ကိုထွန်းသိန်းက RFA ကို အခုလို ပြောပါတယ်။
"ကျွန်တော်တို့က အလုပ်လုပ်တာ တူပြီးတော့ တူညီတဲ့လစာ မရဘူး။ တချို့ကလစာ အပြည့်ရတယ်။ တချို့ကလစာ တစ်ဝက်ရ တယ်။ ကျွန်တော်တို့ လစာနှုန်းတွေ တအားနည်းနေတယ်။ သူတို့နဲ့စာရင်။ ကျွန်တော်တို့က လစာတွေ တိုးမြှင့်ပေးဖို့ Supervisor တွေကို သုံးလတစ်ကြိမ် တိုးမယ်ဆိုပြီး ပြောထားတာ ကနေ့ထိ ဘာမှ မတိုးလာဘူး"
အဲဒီ စီမံကိန်းမှာ အလုပ်လုပ်နေကြတဲ့ နေ့စား အလုပ်သမားတွေ အနေနဲ့ လုပ်ငန်းခွင်အတွင်းမှာ လူ့အခွင့်အရေးတွေ ချိုးဖောက် ခံနေရတယ်လို့ အလုပ်သမားတွေက ပြောပါတယ်။ အခုလို ဆန္ဒပြ တောင်းဆိုရတဲ့ အချက်တွေထဲမှာ ဒီလုပ်ငန်းခွင်ဟာ အိန္ဒိယ နိုင်ငံ Eassar ကုမ္ပဏီက အဓိက တာဝန်ယူ ဆောက်လုပ်ပေးနေတာ ဖြစ်ပေမယ့် ဒေသခံအလုပ်သမားတွေကို ပေးတဲ့လစာက ဒီလုပ်ငန်းခွင်မှာ အတူလုပ်နေကြတဲ့ အိန္ဒိယ နိုင်ငံသားတွေရဲ့လုပ်ခလစာနဲ့ အလွန်ကွာခြား နေတာကြောင့်လို့ ဆိုပါတယ်။
ဒါ့အပြင် လုပ်ငန်းခွင်ဝင်နေတဲ့ အချိန်မှာ အလုပ်သမား တစ်ယောက်အတွက် လိုအပ်တဲ့ ကျန်းမာရေးစောင့်ရှောက်မှုတွေ မရှိဘဲ အခုလောလောဆယ် ရရှိရမယ့် လုပ်ခလစာကိုလည်း သြဂုတ်လ ဒုတိယပတ်ထဲကို ရောက်ရှိလာသည့် တိုင်အောင် လုပ်ခလစာ တွေ မရရှိကြသေးဘူးလို့ ဆန္ဒပြ အလုပ်သမားတွေက ပြောပါတယ်။
အလုပ်သမားတွေ ဆန္ဒပြတောင်းဆိုပြီး (၁၀) မိနစ်လောက် အကြာမှာ စစ်တပ်လုံခြုံရေးတွေက ဟန့်တားကာ လူစုခွဲလိုက်ပေ မယ့် ဆန္ဒပြ အလုပ်သမားတချို့က ထွက်ခွာမသွားဘဲ ဆက်လက် ဆန္ဒပြခဲ့ကြတယ်လို့ သိရပါတယ်။
စစ်တွေဆိပ်ကမ်းဟာ အိန္ဒိယရဲ့ အရှေ့မျှော်မူဝါဒအရ ဘင်္ဂလားဒေ့ရ်ှနိုင်ငံ ကာလကတ္တားက ကုန်ပစ္စည်းတွေကို ရခိုင်ပြည်နယ် စစ်တွေဆိပ်ကမ်းက တစ်ဆင့် ကုလားတန်မြစ်ကို အသုံးချပြီး ပလက်ဝကတစ်ဆင့် အိန္ဒိယနိုင်ငံ မီဇိုရမ်ပြည်နယ်ကို ဆက်သွယ် ပို့ဆောင်မှာ ဖြစ်ပါတယ်။
ဒီ စစ်တွေဆိပ်ကမ်း စီမံကိန်းကို ၂၀၁၀ နှစ်ကုန်ပိုင်းက စတင်ပြီး အမေရိကန် ဒေါ်လာ သန်း (၁၂၀) အကုန်အကျခံ တည်ဆောက် နေတာ ဖြစ်ပြီး ၂၀၁၃ ခုနှစ်မှာ အပြီးသတ်မယ်လို့ ခန့်မှန်းထားပါတယ်။
Ref: အာရ်အဖ်အေ
Read More...
Collapse...
2012-08-08
ရခိုင်ပြည်နယ် မောင်တောမြို့မှာ မနေ့ မနက်ပိုင်းက အကြမ်းဖက်သမားတွေ ဗုံးခွဲ တိုက်ခိုက်မယ်ဆိုတဲ့ သတင်းတွေ ထွက်ပေါ်ခဲ့ပြီး လုံခြုံရေးတွေ တင်းတင်းကြပ်ကြပ် ချထားတယ်လို့ သိရပါတယ်။
မောင်တောမြို့မှာ နောက်ဆုံး ဖြစ်ပေါ်နေတဲ့ အခြေအနေကို မြို့ခံတစ်ဦးဖြစ်တဲ့ ကိုရွှေမောင်သိန်းက RFA ကိုအခုလို ပြောပါတယ်။
"မနေ့ကတော့ ဈေးဆိုင်တွေ ဘာတွေလည်း မဖွင့်ထားတော့ဘူး။ ဗုံးခွဲမယ် ကြားလို့ လူတွေက မရောင်းတော့ဘူး။ ဒီနေ့ကကျ တော့ များတယ်။ လုံခြုံရေးကတော့။ စိုးရိမ်မှုတွေကတော့ ဖြစ်ပေါ်နေကြပါတယ်။ လူတွေက ကြောက်လန့် နေကြတယ်"
ဒါ့ပြင် မွန်းလွဲ (၁) နာရီ လောက်က ရခိုင်ပြည်နယ် မြောက်ဦးမြို့ရဲ့ အရှေ့ဘက် ၆ မိုင်ခန့် အကွာမှာရှိတဲ့ ပရိန်ကျေးရွာမှာ ရခိုင် နဲ့ ဘင်္ဂါလီ ရိုဟင်ဂျာတွေအကြား နှစ်ဖက်တင်းမာမှုတွေ ဖြစ်ပေါ်ခဲ့ပြီး တိုက်ခိုက်မှု ဖြစ်ပွားမယ့် အနေအထားမျိုးအထိ ရုန်းရင်းဆန် ခတ် ဖြစ်သွားခဲ့တယ်လို့ သိရပါတယ်။ ဒါပေမယ့် လုံခြုံရေးတပ်တွေက အချိန်မီ ထိန်းသိမ်းထားလိုက်တယ်လို့ ဒေသခံတွေက ပြော ပါတယ်။
ကျောက်တော်မြို့နယ်မှာ ဖြစ်ပွားခဲ့တဲ့ အကြမ်းဖက်မှုတွေနဲ့ ပတ်သက်ပြီး ညမထွက်ရအမိန့် ပုဒ်မ-၁၄၄ ထုတ်ပြန်နိုင်ဖို့အတွက် ပြည်နယ်အစိုးရအဖွဲ့ကို အဆိုပြု တင်ပြထားတယ်လို့ ရခိုင်ပြည်နယ် ဆက်သွယ်ရေး မန်နေဂျာ ဦးမျိုးသန့်က RFA ကို ပြောပါတယ်။
Ref: အာရ်အဖ်အေ
Read More...
Collapse...
2012-08-08
မြန်မာနိုင်ငံ ရခိုင်ပြည်နယ်က အခြေအနေတွေကို မျက်မြင်ကိုယ်တွေ့ လေ့လာကြည့်ရှုဖို့ တူရကီ နိုင်ငံခြားရေး ၀န်ကြီး မစ္စတာ Ahmet Davutoglu ဟာ မြန်မာနိုင်ငံကို ထွက်ခွာသွားပြီ ဖြစ်ပါတယ်။
ရခိုင်ပြည်နယ်မှာ သွေးထွက်သံယို ဘာသာရေး အကြမ်းဖက်မှုတွေ ဖြစ်ပွားနေတာနဲ့ ပတ်သက်ပြီး သတင်းအမျိုးစုံ ကြားသိ နေရ ကြောင်း၊ မြန်မာအစိုးရက လူတစ်ရာ ၀န်းကျင်လောက် သေဆုံးတယ် ဆိုပေမဲ့ မိမိတို့နဲ့ အဆက်အသွယ်ရှိတဲ့ ရခိုင်က မူဆလင် ခေါင်းဆောင်တွေကတော့ သေဆုံးသူ ထောင်ဂဏန်း ရှိတယ်လို့ ပြောဆိုကြကြောင်း တူရကီ နိုင်ငံခြားရေး ၀န်ကြီးက မြန်မာ နိုင်ငံ ကို မထွက်ခွာခင် Ankara မြို့မှာ သတင်းထောက်တွေကို ပြောပါတယ်။
တူရကီ နိုင်ငံခြားရေး ၀န်ကြီး မစ္စတာ Davutoglu ဟာ တူရကီ လခြမ်းနီအသင်းက လှူဒါန်းလိုက်တဲ့ ဆေးဝါးနဲ့ တခြားပစ္စည်း တွေကို သယ်ဆောင်သွားပါတယ်။ အဲဒီ အလှူ ပစ္စည်းတွေဟာ ပဋိပက္ခ ဖြစ်ပွားချိန် အတွင်း အိုးအိမ်စွန့် ထွက်ပြေးခဲ့ကြရတဲ့ မူဆလင် ဘာသာဝင် ငါးသောင်းကျော်နဲ့ ဗုဒ္ဓဘာသာဝင် နှစ်သောင်းကျော်အတွက် ဖြစ်ကြောင်း သိရပါတယ်။
အခြေအနေမှန်တွေ၊ ခိုင်လုံတဲ့ သတင်းတွေကို သိရအောင် မိမိကိုယ်တိုင် သွားရောက်ရတာ ဖြစ်ကြောင်း၊ ဒါပေမဲ့ အဓိက ရည်ရွယ်ချက်ကတော့ ဒုက္ခသည်တွေဆီကို အကူအညီတွေ ချက်ခြင်း အမြန်ရောက်ရှိဖို့ ဖြစ်ကြောင်း တူရကီ နိုင်ငံခြားရေး ၀န်ကြီး က ပြောပါတယ်။
အခု ပေးပို့တဲ့ တူရကီ အကူအညီတွေဟာ ကုလသမဂ္ဂက ပေးတဲ့ အကူအညီတွေပြီးရင် မြန်မာအစိုးရက ပထမဦးဆုံး လက်ခံ လိုက်တဲ့ ပြည်ပ အကူအညီ ဖြစ်ကြောင်း တူရကီ နိုင်ငံခြားရေး ၀န်ကြီးဌာနက ပြောဆိုပါတယ်။
Ref: အာရ်အဖ်အေ
Read More...
Collapse...
2012-08-08
ဒီနေ့ မန္တလေးမြို့ ဒက္ခိဏာရာမ ဘုရားကြီးအလယ်တိုက်မှာ ပြုလုပ်တဲ့ ရှစ်လေးလုံး နှစ်ပတ်လည်နေ့ ၂၄ နှစ်ပြည့် ငွေရတုအကြို ဆွမ်းကျွေးပွဲနဲ့ ၀ါဆိုသင်္ကန်းကပ်ပွဲမှာ ရှစ်လေးလုံး အရေးတော်ပုံ စတင်ခဲ့တဲ့ သြဂုတ်လ (၈) ရက်နေ့ကို့ မြန်မာ့ ဒီမိုကရေစီနေ့ အဖြစ် သတ်မှတ်ဖို့ မန္တလေးပွဲဖြစ်မြောက်ရေး ကော်မတီဝင် ကိုတင်သစ်က အဆိုတင်သွင်းခဲ့ရာမှာ တက်ရောက်လာသူ ၁၀၀၀ ကျော်က ထောက်ခံခဲ့ကြပါတယ်။
ဂျီစီဘီအေ အသင်းကြီးရဲ့ န၀မအကြိမ် ကွန်ဖရင့်အစည်းအဝေး မန္တလေးမြို့မှာ ကျင်းပခဲ့စဉ်က အမျိုးသားနေ့ သတ်မှတ်ခဲ့ဖူးတဲ့ သမိုင်းကြောင်း အစဉ်အလာအရ အခုနှစ် မန္တလေးမြို့မှာ ကျင်းတဲ့ ရှစ်လေးလုံးနေ့ကို ဒီမိုရေစီနေ့အဖြစ် သတ်မှတ်ဖို့ အဆိုတင် ရတာ ဖြစ်တယ်လို့ မောင်တင်သစ်က ပြောပါတယ်။
ကျောင်းသားခေါင်းဆောင် ကိုကိုကြီးကလည်း ရှစ်လေးလုံး (၂၄) နှစ်အကြာမှာ ရှစ်လေးလုံးရဲ့ ကြွေးကြော်သံတွေ အရာထင် လာခဲ့ပြီလို့ အခမ်းအနားမှာ ပြောကြားခဲ့ပါတယ်။
ကျောင်းသားခေါင်းဆောင် ကိုမင်းကိုနိုင်ကလည်း စစ်အစိုးရက ၈၈ ကျောင်းသားတွေ၊ နိုင်ငံရေး လှုပ်ရှားသူတွေကို နယ်အနှံ့ ထောင်တွေဆီ ပို့ပစ်တာဟာ မိသားစုဘ၀တွေ ကသောင်းကနင်းဖြစ်အောင် လုပ်ဆောင်ခဲ့တာ၊ အင်အားချည့်နဲ့ သွားအောင် လုပ် တာ ဆိုပေမယ့် အရှုံးထဲကအမြတ် အနေနဲ့ ပြည်ထောင်စု စိတ်ဓာတ်ကို ရရှိစေခဲ့သလို ဒီမိုကရေစီ နိုင်ငံရေး ပြည်ထောင် စု ကွန်ယက် ဖြစ်ပေါ်စေခဲ့တယ်လို့ ပြောကြားခဲ့ပါတယ်။
အဲဒီနောက် ၂၀၀၇ မျိုးဆက် ကျောင်းသားခေါင်းဆောင် ကိုကျော်ကိုကို အပါအ၀င် ရှမ်း၊ ကယား၊ ကချင်ပြည်နယ်တွေက ကိုယ်စားလှယ်တွေ ပါဝင်ဆွေးနွေးခဲ့ကြပြီး မနက် ၁၀ နာရီခွဲမှာ ပြီးဆုံးခဲ့ပါတယ်၊
ဒီကနေ့ မန္တလေးမြို့မှာ ရှစ်လေးလုံးအခမ်းအနားကို ဒက္ခိဏာရာမ ဘုရားကြီးအလယ်တိုက်မှာ ကျင်းပခဲ့တာ ဖြစ်ပြီး အစီအစဉ် ပထမပိုင်းမှာ သံဃာတော် ၈၈ ပါးကို ဆွမ်းနဲ့ ၀ါဆိုသင်္ကန်းတွေ ဆက်ကပ်လှူဒါန်းခဲ့ကြပြီး အလယ်တိုက်ဆရာတော်၊ ဘုရား ကြီးတိုက် ဆရာတော်၊ မြ၀တီဆရာတော်နဲ့ မစိုးရိမ်တိုက်သစ် ပဓာန နာယက ဆရာတော်တို့က သြ၀ါဒစကားတွေ မိန့်ကြား ခဲ့ကြပါတယ်။
ဒီပွဲကို ကိုမင်းကိုနိုင်၊ ကိုကိုကြီး ဦးဆောင်တဲ့ ၈၈ ကျောင်းသားများအဖွဲ့၊ မန္တလေး ၈၈ ကျောင်းသားဟောင်းတွေ၊ နိုင်ငံရေး၊ လူမှုရေး နယ်ပယ်က ပုဂ္ဂိုလ်တွေ၊ နိုင်ငံတ၀န်းက ၈၈ ကျောင်းသားဟောင်းတွေ၊ ဗကသနဲ့ မျိုးဆက်သစ် လူငယ်များ အစည်း အရုံးဝင်တွေ၊ နိုင်ငံရေး မိသားစုဝင်တွေ စုစုပေါင်း ၁၀၀၀ ကျော် တက်ရောက်ခဲ့ကြပါတယ်။
Ref: အာရ်အဖ်အေ
Read More...
Collapse...
2012-08-08
၂၄ နှစ်မြောက် ရှစ်လေးလုံး နှစ်ပတ်လည် အမှတ်တရ အခမ်းအနားတွေကို မြန်မာနိုင်ငံရဲ့ မြို့နယ်အနှံ့အပြားမှာ တစ်စုံတစ်ရာ တားဆီး နှောင့်ယှက်မှု မရှိဘဲ ကျယ်ကျယ်ပြန့်ပြန့် ကျင်းပခွင့် ရခဲ့ပါတယ်။
မကွေးတိုင်း၊ ကျောက်ပန်းတောင်းမြို့နယ်က အမျိုးသားဒီမိုကရေစီ အဖွဲ့ချုပ်ရုံးမှာ ရှစ်လေးလုံး အထိမ်းအမှတ် အခမ်းအနားကို ကျင်းပခဲ့ပြီး မြို့ခံ လူထု ၃၀၀ ကျော် တက်ရောက်ခဲ့တယ်လို့ NLD ပါတီရဲ့ စည်းရုံးရေး အဖွဲ့ဝင် ဦးအေးခိုင်က RFA ကို ပြော ပါတယ်။
"ဒီနေ့တိုင်းပြည်ဟာ ပြောင်းလဲမှုလေး မျိုးစေ့လေး စလိုက်တာပေါ့လေ။ ဦးနေဝင်း လက်ထက်ကနေပြီးတော့ ယခုအချိန်အထိ ကျွန်တော်တို့ ဒီလိုမျိုး အခြေအနေမျိုးလေးကို မရခဲ့ပါဘူး။ ပြည်သူလူထုတွေအားလုံး၊ အဖွဲ့အစည်းတွေ အားလုံးက ဒီအရွေ့လေးကို ဝိုင်းပြီးတော့ ရွေ့စေချင်တဲ့ စိတ်ကလေး ရှိစေချင်ပြီးတော့ ရှစ်လေးလုံးကိုလည်း အမှတ်တရ ဖြစ်စေချင်တယ်။ ရွေ့တဲ့ အရွေ့ လေးကို အားလုံးပါဝင်တဲ့ အရွေ့လေး ဖြစ်အောင် ကျွန်တော်တို့ တစ်မြို့လုံးက ပြည်သူလူထုကို ဖိတ်တယ်။ အားလုံးက အရွေ့ လေးကို ဝိုင်းတွန်းပေးနိုင်ရင် ကျွန်တော်တို့ တိုင်းပြည်ဟာ ဒီမိုကရေစီ လမ်းကြောင်းပေါ်မှာ သေချာပေါက် ရောက်မယ်လို့ ခံယူ ချက်နဲ့ ဒီကိစ္စလုပ်တာပါ"
မကွေးမြို့က ပွင့်လင်း လူ့အဖွဲ့အစည်း ရုံးခန်းမှာ ပြုလုပ်တဲ့ ရှစ်လေးလုံး အခမ်းအနားကိုတော့ မြို့ခံလူထု ၅၀ ကျော်တက်ရောက် ခဲ့ပြီး၊ ရဟန်း သံဃာတော်တွေကို ဝါဆိုသင်္ကန်းနဲ့ ဆွမ်းကပ်လှူခဲ့ကြောင်း မကွေးမြို့ ပွင့်လင်း လူ့အဖွဲ့အစည်းက ကိုသူရက RFA ကိုပြောပါတယ်။
"ကျွန်တော်တို့ ဒီ ၂၄ နှစ်မြောက်ပေါ့နော်၊ ငွေရတု ရှစ်လေးလုံးနေ့နဲ့ ပတ်သက်ပြီးတော့ ကျွန်တော်တို့ဟာ မကွေးမြို့ ပွင့်လင်း လူ့ဘောင် ဖော်ဆောင်ရေးမှာ ကျွန်တော်တို့ သံဃာ ဆရာတော် ၅ ပါးကို ပင့်ပြီး ဝါဆိုသင်္ကန်း ကပ်တယ်။ ဘုန်းကြီးဆွမ်းကပ် တယ်ပေါ့ ခင်ဗျာ။ ရှစ်လေးလုံးနေ့ နှစ်ပတ်လည်မှာ ကျွန်တော်တို့ အနေနဲ့ တောင်းဆိုချင်တာကတော့ နိုင်ငံရေးကြောင့် အကျဉ်း ထောင် အသီးသီးမှာ ကျန်ရှိနေသေးတဲ့ ယုံကြည်ချက်ကြောင့် အကျဉ်းကျတဲ့လူတွေ၊ နိုင်ငံရေးကြောင့် အကျဉ်းကျတဲ့ လူတွေ အား လုံးကို ခြွင်းချက်မရှိ ပြန်လွှတ်ပေးဖို့ နိုင်ငံတော် သမ္မတကြီးကို ကျွန်တော်တို့ တောင်းဆိုချင်ပါတယ်"
ရန်ကုန်တိုင်း ဒေသကြီး၊ တွံတေးမြို့မှာ ရှစ်လေးလုံး အထိမ်းအမှတ် အခမ်းအနား မကျင်းပဖို့ တားမြစ်ခံရပေမယ့်လည်း ဒီကနေ့ မနက်မှာတော့ အမျိုးသား ဒီမိုကရေစီ အဖွဲ့ချုပ် ပါတီဝင်တွေ၊ ၈၈ ကျောင်းသားဟောင်းတွေ စုပေါင်းပြီး ရှစ်လေးလုံး အထိမ်း အမှတ် အခမ်းအနားကို ကျင်းပခဲ့ပါတယ်။ ဒီအခမ်းအနား အပြီးမှာ တွံတေး ရွှေဆံတော်ဘုရားကို လမ်းလျှောက် ချီတက်ခဲ့ကြပြီး အကျဉ်းထောင်တွင်း ကျန်ရှိတဲ့ နိုင်ငံရေး အကျဉ်းသားတွေ လွတ်မြောက်ဖို့ကို ဆုတောင်း ဆန္ဒပြုခဲ့ကြောင်း ၈၈ အရေးတော်ပုံ သပိတ်ခေါင်းဆောင်ဟောင်း ဦးမြင့်စိုးက RFA ကို ပြောပါတယ်။
ရန်ကုန်တိုင်း၊ မြောက်ဥက္ကလာပ မြို့နယ်က ဥတ္တရခန်းမမှာ ရှစ်လေးလုံး အထိမ်းအမှတ် အခမ်းအနားကို NLD ပါတီဝင်တွေ၊ ရှစ်ဆယ့်ရှစ် အရေးတော်ပုံမှာ တက်တက်ကြွကြွ ပါဝင်သူတွေ၊ မြန်မာနိုင်ငံ ကဗျာဆရာများသမဂ္ဂ အဖွဲ့ဝင်တွေ စုပေါင်းကျင်းပခဲ့ပြီး ရှစ်ဆယ့်ရှစ် အရေးတော်ပုံကာလက ကျဆုံးခဲ့သူတွေ အမှတ်တရ ကျောက်တိုင်ဟောင်း နေရာမှာ လွမ်းသူ့ပန်းခွေချ အလေးပြုခဲ့ ပါတယ်။
အဲဒီ အခမ်းအနားမှာ ကဗျာဆရာ သစ္စာနီက ရှစ်လေးလုံး နှစ်ဆယ့်လေးနှစ် အကြာမှာ မြင်နေရပြီ ဖြစ်တဲ့ ဒီမိုကရေစီပန်းတိုင်ကို မဆိုက်ရောက်ခင် တက်မထောင်ကြဖို့ သတိပေး ပြောကြားခဲ့ပါတယ်။
ပဲခူးတိုင်း အနောက်ဘက်ခြမ်းမှာရှိတဲ့ ပေါင်းတည်မြို့နယ်မှာလည်း ရှစ်လေးလုံး အထိမ်းအမှတ် အခမ်းအနားကို အမျိုးသား ဒီမို ကရေစီ အဖွဲ့ချုပ်ရုံးနဲ့ မင်္ဂလာဇေယျုံ ပညာဒါန ဘုန်းကြီးကျောင်းတို့မှာ နှစ်နေရာခွဲ ကျင်းပခဲ့တယ်လို့ သိရပါတယ်။ ဒီအကြောင်းနဲ့ ပတ်သက်ပြီး ပေါင်းတည်မြို့က နိုင်ငံရေး အကျဉ်းသားဟောင်း ကိုဝင်းနိုင်က RFA ကိုအခုလို ပြောပါတယ်။
"ပေါင်းတည်မှာ ၂၄ နှစ်မြောက် ငွေရတု ရှစ်လေးလုံး နှစ်ပတ်လည် ကျွန်တော်တို့ နှစ်နေရာခွဲပြီး ကျင်းပတယ်။ တစ်နေရာက အမျိုးသားဒီမိုကရေစီ အဖွဲ့ချုပ်ရုံး နောက်တစ်နေရာက မင်္ဂလာဇေယျုံ ပညာဒါနကျောင်းမှာ ဖြစ်ပါတယ်။ အဲဒီမှာ ရန်ကုန်က ရောက်လာတဲ့ ဒေါပုံမြို့နယ်က နိုင်ငံရေးအကျဉ်းသားဟောင်း ကော်မရှင်အဖွဲ့ဝင် ဖြစ်တဲ့ ကိုကျော်ကျော်လင်း ရောက်လာပါတယ်။ လူဦးရေကတော့ ဒီနေရာမှာ ၂၀၀ လောက်ရှိမယ်။ အမျိုးသား ဒီမိုကရေစီ အဖွဲ့ချုပ်ရုံးမှာက ၁၀၀ ကျော်ရှိတယ်"
ရှမ်းပြည်နယ် တောင်ပိုင်းက တောင်ကြီးမြို့၊ စိန်ပန်းရပ်က လောကမာန်အောင်ကျောင်းမှာ ရှစ်လေးလုံး အထိမ်းအမှတ် အခမ်း အနား ကို အမျိုးသားဒီမိုကရေစီ အဖွဲ့ချုပ်က ကြီးမှူးကျင်းပခဲ့ပြီး မြို့ခံ တစ်ရာကျော် တက်ရောက်ခဲ့ပါတယ်။ ဒီအခမ်းအနားမှာ ၈၈ မျိုးဆက် ကျောင်းသားများအဖွဲ့က ပေးပို့တဲ့ သဝဏ်လွှာနဲ့ ရှမ်းပြည် လူမျိုးပေါင်းစုံ လွတ်မြောက်ရေး တပ်ဖွဲ့(ရတလဖ)က ပေးပို့ တဲ့ သဝဏ်လွှာကို ဖတ်ကြားခဲ့တယ်လို့ တောင်ကြီးမြို့၊ အမျိုးသားဒီမိုကရေစီ အဖွဲ့ချုပ်က ခေါင်းဆောင်တစ်ဦးဖြစ်တဲ့ ဒေါ်ခင်မိုးမိုးက RFA ကိုပြောပါတယ်။
ရခိုင်ပြည်နယ်၊ စစ်တွေမြို့က ရခိုင်တိုင်းရင်းသား တိုးတက်ရေးပါတီ ဌာနချုပ်ရုံးမှာ ရှစ်လေးလုံး အမှတ်တရနေ့ကို ကျင်းပခဲ့ပြီး ရှစ်လေးလုံး အရေးတော်ပုံမှာ တက်တက်ကြွကြွ ပါဝင်ခဲ့သူတို့က သူတို့တွေ့ကြုံခဲ့တဲ့ ဖြစ်ရပ်တွေကို ပြန်လည် ပြောကြားခဲ့တယ်လို့ ရခိုင်တိုင်းရင်းသားများ တိုးတက်ရေး ပါတီက ခေါင်းဆောင်တစ်ဦးဖြစ်တဲ့ ဦးခိုင်ပြည်စိုးက RFA ကိုပြောပါတယ်။
"ကျွန်တော်တို့ ၂၄ နှစ်တာ ကာလမှာ ဒါပထမဆုံးအကြိမ် ကျွန်တော်တို့ လုပ်တာပေါ့ဗျာ။ ၈၈ လူထုဆန္ဒပြမှုကြောင့် ဒီနေ့ မြန်မာ နိုင်ငံမှာ ဒီမိုကရေစီ တစ်စုံတစ်ရာ ရလာတယ်လို့ ကျွန်တော် အဲသလို မြင်တယ်။ နောက်ပိုင်းမှာ မွေးဖွားလာတဲ့ ကလေး တွေက မသိကြတော့ဘူလေ။ အဲဒါကြောင့်မို့လို့ သမိုင်းကြောင်းတွေကို ပြန်လည်ပြီး သိရှိလာအောင်အတွက် ကျွန်တော်တို့ ဒီရှစ်လေးလုံး အမှတ်တရနေ့ ကျင်းပရခြင်း ဖြစ်ပါတယ်"
ကချင်ပြည်နယ်၊ မြစ်ကြီးနားမြို့က NLD ပါတီဝင်များကလည်း ရှမ်ဘူရပ်ကွက်မှာရှိတဲ့ မေတ္တာစိမ့်စမ်း မိဘမဲ့ဂေဟာမှာ ရှစ်လေးလုံး အထိမ်းအမှတ် အခမ်းအနားကို ကျင်းပခဲ့သလို မိဘမဲ့ ကလေးများကို အဝတ်အထည်နဲ့ စားသောက်ဖွယ်ရာတွေ လှူဒါန်းခဲ့တယ်လို့ မြစ်ကြီးနားမြို့က NLD ပါတီဝင် ဦးချစ်အေးက RFA ကိုပြောပါတယ်။
"ဒီမိုကရေစီ လမ်းကြောင်းကို ခင်းပေးခဲ့တဲ့ ဟိုးလွန်ခဲ့တဲ့ ၂၄ နှစ်က ရဟန်းရှင်လူ ကျောင်းသား ပြည်သူ လူသားအပေါင်းတို့ရဲ့ သွေးတွေနဲ့ ခင်းခဲ့တာလေးကို သူတို့ရဲ့ ကျေးဇူးကို အထူး အောက်မေ့ပြီးတော့မှ သူတို့ကို ရည်စူးသမှု ပြုပြီးတော့ ဒီမိဘမဲ့ ဂေဟာ မှာ ဦးတို့ NLD တွေအနေနဲ့ တတ်နိုင်စွမ်းသလောက် လာရောက် လှူဒါန်းခြင်း ဖြစ်ပါတယ်"
ဒီကနေ့ မြန်မာနိုင်ငံက မြို့အနှံ့မှာ ကျင်းပတဲ့ ရှစ်လေးလုံး အထိမ်းအမှတ် အခမ်းအနားတွေကို အာဏာပိုင်တွေဘက်က တားဆီး နှောင့်ယှက်ခြင်း မပြုပေမယ့်လည်း အသင့်အနေအထားနဲ့ စောင့်ကြည့်တာမျိုးတွေ၊ အခမ်းအနား ကျင်းပတဲ့ နေရာတွေကို လာ ရောက် ဓာတ်ပုံရိုက် မှတ်တမ်းယူတာမျိုးတွေ လုပ်ခဲ့တယ်လို့ သိရပါတယ်။
Ref: အာရ်အဖ်အေ
Read More...
Collapse...
2012-08-08
မဲဆောက်မြို့က ၈၈ မျိုးဆက် ကျောင်းသားတွေ စုပေါင်းပြီး ရှစ်လေးလုံး အရေးတော်ပုံမှာ ကျဆုံးခဲ့တဲ့ ရဟန်း ရှင်လူ ပြည်သူနဲ့ ကျောင်းသားတွေအတွက် ရည်စူးပြီး မြန်မာနိုင်ငံ အလုပ်သမား သွေးစည်းညီညွတ်ရေး အဖွဲ့ရုံးခန်းမှာ သံဃာတော် (၄) ပါးပင့် ဖိတ် ဆွမ်းကပ်ပြီး မွန်းလွဲပိုင်းမှာတော့ ရှစ်လေးလုံးနေ့ အထိမ်းအမှတ် စကားဝိုင်း ကျင်းပခဲ့ပါတယ်။
၈၈ မျိုးဆက် ကျောင်းသား ကိုသံဒုတ်က -
"ကျွန်တော်တို့ မရောက်သေးတဲ့ ပန်းတိုင်ကို စစ်အာဏာရှင်တွေကနေ ဘယ်လို နည်းပရိယာယ်နဲ့ပဲ ကျင့်သုံးကျင့်သုံး ကျွန်တော် တို့ သတိရှိဖို့ လိုတယ်။ ကျွန်တော်တို့တတွေဟာ စည်းလုံးညီညွတ်မှုကို ဆက်လက်ပြီး ကိုင်စွဲဖို့လိုတယ်။ နောက်တချက် ဒီကနေ့ ကာလဟာ ကျွန်တော်တို့ အားလုံး စည်းလုံးညီညွတ်မှုနဲ့ သံဓိဋ္ဌာန် ပိုပြီးတော့ချမှတ်၊ ပိုပြီးတော့ ကျွန်တော်တို့ ရှေ့ဆက်ချီတက် ရလိမ့်မယ်"
ရှစ်လေးလုံး အခမ်းအနားကို တရုတ် မြန်မာနယ်စပ် မြန်မာနိုင်ငံလုံးဆိုင်ရာ ကျောင်းသားများ ဒီမိုကရက်တစ် တပ်ဦး ABSDF ရဲ့ မြောက်ပိုင်း ကျောင်းသား တပ်မတော်ဌာနချုပ်မှာလည်း စစ်ရေး တင်းမာနေတဲ့ကြားကနေ ကျင်းပကြပါတယ်။
ABSDF မြန်မာပြည် မြောက်ပိုင်း ကျောင်းသားခေါင်းဆောင် ကိုလဆိုင်းက -
"ရှစ်လေးလုံးက ရခဲ့တဲ့ သမိုင်းပေးတဲ့ သင်ခန်းစာတွေ၊ အတွေ့အကြုံတွေကို ပြန်လည်ပြီးတော့ ဝေငှကြတယ်။ တက်ရောက် လာကြတာကတော့ မဟာမိတ် ကေအိုင်အို၊ ကေအိုင်အေ။ နောက် တော်လှန်ရေး အဖွဲ့အစည်းမှာ ရောက်နေတဲ့ ရခိုင့် တပ်မ တော်၊ နောက် ချင်းအမျိုးသား တပ်ဦး၊ အမျိုးသမီး အစည်းအရုံး၊ လူငယ် အသင်းအဖွဲ့တွေနဲ့ လိုင်ဇာမြို့မှာရှိတဲ့ ရပ်မိရပ်ဖ ပြည် သူလူထု အပေါင်းနဲ့ စုစုစည်းစည်း ညီညီညွတ်ညွတ်နဲ့ ကျွန်တော်တို့ ကျောင်းသား တပ်မတော် မြန်မာပြည် မြောက်ပိုင်းရဲ့ ဌာန ချုပ်မှာ ကျွန်တော်တို့ ရဲဘော် ရဲမေတွေနဲ့ ပူးပေါင်း ကျင်းပတဲ့ နိုင်ငံရေး အခမ်းအနား ဖြစ်ပါတယ်"
အခမ်းအနားမှာ ကာတွန်း၊ ကဗျာ စတဲ့ နံရံကပ် ပိုစတာတွေ ပြသထားပြီး လူ ပေါင်း ၃၀၀ လောက် တက်ရောက်ခဲ့ကြပါတယ်။
အလားတူပဲ ကချင်ပြည်နယ် မိုးကောင်းမြို့ အင်န်အယ်ဒီ အဖွဲ့ဝင်တွေကလည်း ၈ လေးလုံးမှာ ကျဆုံးသွားသူတွေကို ရည်စူးပြီး ကုသိုလ်ကောင်းမှု အလှူဒါနများ ပြုလုပ်ကာ ၈ လေးလုံး အခမ်းအနားကို ကျင်းပကြကြောင်း အင်န်အယ်လ်ဒီ အဖွဲ့ဝင် ကိုဝင်း အောင်က ပြောပါတယ်။
အိန္ဒိယမြို့တော် နယူးဒေလီ ဂျန်တာမန်တာ ပန်းခြံရှေ့မှာ ပြုလုပ်တဲ့ ဆန္ဒပြပွဲကို မြန်မာနိုင်ငံလုံးဆိုင်ရာ ကျောင်းသားများအဖွဲ့ချုပ် (ABSL) ကနေ ဦးဆောင်ပြီး နယူးဒေလီရောက် မြန်မာ့ ဒီမိုကရေစီ အင်အားစုတွေ အယောက် ၅၀ ကျော်တို့က ပူးပေါင်း ပါဝင်ခဲ့ကြပါတယ်။
ABSL ခေါင်းဆောင် ကိုကျော်သန်းက -
“၈၈ အရေးတော်ပုံ ၂၄ နှစ်မြောက် အထိမ်းအမှတ်အနေနဲ့ ကျွန်တော်တို့က ၈၈ ရဲ့ ရည်မှန်းချက် အစစ်အမှန်ဖြစ်တဲ့ စစ်အာ ဏာရှင် ချုပ်ငြိမ်းရေး၊ ဒီမိုကရေစီ ပြန်လည်ရရှိရေး ဆိုတဲ့ ရည်းမှန်းချက်တွေကို ပြန်လည်ဖော်ထုတ်တာပါပဲ။ ပြီးတော့ လက်ရှိ မြန်မာနိုင်ငံမှာ ၂၀၀၈ ဖွဲ့စည်းပုံအောက်မှာ သွားနေတဲ့ ဖြစ်စဉ်တွေကို အယုံအကြည်မရှိဘူး။ ကျွန်တော်တို့ ၈၈ တုန်းက ရည်မှန်း ခဲ့တဲ့ လူတွေ အသက်ချွေး ထောင်သောင်းချီပြီးတော့ အသက်ဆုံးရှုံးခံခဲ့တဲ့ တိုက်ပွဲဝင်ခဲ့ကြတဲ့ ရဲဘော်တွေရဲ့ ရည်မှန်းချက်ကို ပြည့် မီ နိုင်ခြင်းမရှိဘူး။ ဒါကြောင့် ကျွန်တော်တို့ ၂၀၀၈ ဖွဲ့စည်းပုံကို တိုက်ဖို့ဆိုတာရယ်၊ စစ်အာဏာရှင်စနစ်ကို ပြန်ပြီးတော့ တိုက်ဖို့ ဆိုတာရယ်၊ ပြန်ပြီးတော့ ၈၈ ရဲ့ ကြွေးကြော်သံတွေကို ကျွန်တော်တို့က ဖော်ထုတ်တဲ့ သဘောပါဘဲ"
အလားတူ အိန္ဒိယအရှေ့မြောက်ဘက် မီဇိုရမ်ပြည်နယ် အိုင်ဇောလ်မြို့မှာလည်း ၈ လေးလုံး နှစ်ပတ်လည် အထိမ်းအမှတ် စကား ၀ိုင်းနဲ့ ပန်းချီပြပွဲကို ပြုလုပ်ခဲ့ကြတယ်လို့ သိရပါတယ်။
Ref: အာရ်အဖ်အေ
Read More...
Collapse...
2012-08-08
ရှစ်လေးလုံး ဒီမိုကရေစီ လှုပ်ရှားမှု နှစ်ပတ်လည် အခမ်းအနားကို ရန်ကုန်မြို့ ရွှေဂုံတိုင် တော်ဝင်နှင်းဆီခန်းမမှာ ဒီကနေ့ မနက် ပိုင်းက ကျင်းပခဲ့ပြီး ဦးတင်ဦး၊ ဦးဝင်းတင် စတဲ့ NLD ခေါင်းဆောင်တွေ၊ ၀ါရင့်နိုင်ငံရေးသမားတွေ၊ ခေတ်အဆက်ဆက် ကျောင်း သားခေါင်းဆောင်တွေ၊ နိုင်ငံရေး အကျဉ်းသားဟောင်းတွေ၊ ဂီတ အနုပညာရှင်တွေ စုစုပေါင်း လူ (၁ဝဝဝ) ကျော် တက်ရောက် ခဲ့ပါတယ်။
ဒီနေ့အခမ်းအနားကို တက်ရောက်သူ ဒီလောက် များပြားတဲ့အချက်က ရှစ်လေးလုံး လှုပ်ရှားမှုအပေါ် ပြည်သူတွေရဲ့ အလေးအနက် ထားမှုကို ဖော်ပြတာပဲလို့ NLD ခေါင်းဆောင် တစ်ဦးဖြစ်တဲ့ ဦးဝင်းတင်က ပြောပါတယ်။
"လူတွေ ဒီလောက်များများ လာတယ်ဆိုတာ ဘာပဲပြောပြော လူတွေဟာ ရှစ်လေးလုံးအပေါ် ယုံကြည်မှုရှိတုန်း၊ ရှစ်လေးလုံးးရဲ့ စွမ်းအားတွေ ယုံကြည်တုန်း၊ နောက်ပြီးတော့ ရှစ်လေးလုံးကနေပြီးတော့ လမ်းညွန်လိုက်တဲ့ နိုင်ငံရေး တောင်းဆိုချက်တွေ၊ တာဝန် တွေ၊ ဝတ္တရားတွေကိုလည်း ပြည်သူလူထုက ဒီနေ့အထိ လက်ခံတုန်း ဆိုတာကို ပြတာပဲ"
အဲဒီ အခမ်းအနားမှာ ရှစ်လေးလုံး ၂၄ နှစ်မြောက် သဘောထား ကြေညာချက် တစ်စောင်ကို ထုတ်ပြန်ခဲ့ပြီး ကျန်ရှိနေသေးတဲ့ နိုင်ငံရေး အကျဉ်းသားတွေ အားလုံးလွှတ်ပေးဖို့၊ ရှစ်လေးလုံးနေ့ကို သမိုင်းဝင် အထိမ်းအမှတ်နေ့အဖြစ် သတ်မှတ်ပေးဖို့ တောင်း ဆိုခဲ့ကြပါတယ်။
အခမ်းအနား ဖြစ်မြောက်ရေး လှုပ်ရှားသူ တစ်ဦးဖြစ်တဲ့ ၈၈ ကျောင်းသား ကိုတိုးကျော်လှိုင်က-
"၈ ရက် ၈ လ ၈၈ ကို မြန်မာနိုင်ငံရဲ့ သမိုင်းဝင်နေ့ တစ်နေ့အဖြစ် သတ်မှတ်ပေးဖို့ လိုအပ်တယ်လို့ ကျွန်တော်တို့ ယုံကြည် ပါတယ်။ အခု နိုင်ငံတော်က ဒီမိုကရေစီ လူ့အခွင့်အရေးနဲ့ နိုင်ငံတော်သစ်ကို သွားနေတယ်ဆိုရင် ဒီနိုင်ငံတော်သစ်မှာ ကျွန်တော် တို့ နှစ်ဖက်မှာ ဝိဝါဒကွဲခဲ့တဲ့ စကားရပ် အမြဲရှိခဲ့တယ်။ ကျွန်တော်တို့က အရေးတော်ပုံလို့ သုံးနှုန်းတယ်။ သူတို့က အရေးအခင်းလို့ သုံးနှုန်းတယ်။ ၈ ရက် ၈ လ ၈၈ က အရေးတော်ပုံလား အရေးအခင်းလား" လို့ပြောကြားရာ တက်ရောက်လာသူ များက "အရေးတော်ပုံ" လို့ သံပြိုင် ဟစ်ကြွေးကြပါတယ်။
အဲဒီအခမ်းအနားမှာ သံဃာတော် (၄၄) ပါးကို ဆွမ်းနဲ့ ၀ါဆိုသင်္ဃန်း ကပ်လှူခဲ့ပြီး ရှစ်ဆယ့်ရှစ် ဒီမိုကရေစီ အရေးအခင်းမှာ ကျဆုံးသွားခဲ့တဲ့ ရဟန်းရှင်လူ ပြည်သူတွေအတွက် တစ်မိနစ်ခန့် ငြိမ်သက် အလေးပြုခဲ့ကြ ပါတယ်။ အဲဒီနောက် နိုင်ငံရေး အင်အားစုတွေရဲ့သ၀ဏ်လွှာတွေ ဖတ်ကြားခဲ့ကြပါတယ်။
ဒီအခမ်းအနားကို မနက် (၉) နာရီကနေ နေလည် (၁၂) နာရီအထိ ကျင်းပခဲ့တာ ဖြစ်ပြီး အာဏာပိုင်တွေဘက်က အနီးကပ် စောင့်ကြည့် ဓာတ်ပုံရိုက်တာတွေ ရှိခဲ့ပေမယ့် တစုံတရာ တားဆီးနှောင့်ယှက်တာ မရှိခဲ့ပါဘူး။
Ref: အာရ်အဖ်အေ
Read More...
Collapse...
သန်းထိုက်ဦး
August 8, 2012
Air Asia လေကြောင်းသည် ဘန်ကောက်-မန္တလေး ခရီးစဉ်ကို လာမည့် အောက်တိုဘာလ ၄ ရက်နေ့တွင် စတင် ပြေးဆွဲ ရန် စီစဉ် နေကြောင်း သိရသည်။
ထိုင်းနိုင်ငံ ဘန်ကောက်မြို့ ဒွန်မောင်း လေဆိပ်မှ မြန်မာနိုင်ငံ မန္တလေးမြို့သို့ တပတ်လျှင် ၄ ကြိမ်ဖြင့် တနင်္လာ၊ အင်္ဂါ၊ ကြာသပ တေးနှင့် စနေနေ့ တို့ကို ပြေးဆွဲရန် စီစဉ်ထားခြင်း ဖြစ်သည်။
လက်မှတ်များကိုလည်း ကြိုတင်ဝယ်လိုသူများ အတွက် ယခုလ ၆ ရက်နေ့မှ စတင်၍ ၁၂ ရက်နေ့ အထိ တဦးလျှင် ဘတ်ငွေ ၁၅၀၀ ဖြင့် အရောင်းမြှင့်တင်ရေးအနေနှင့် ရောင်းချပေးနေပြီ ဖြစ်ကြောင်း Air Asia လေကြောင်းလိုင်းမှ ၀န်ထမ်းတဦးက ဧရာဝတီ သို့ ပြောသည်။ ယခုပြေးဆွဲမည့် Air Asia သည် ထိုင်းနိုင်ငံနှင့် ဖက်စပ်လုပ်ကိုင်နေသော ထိုင်း Air Asia လိုင်း ဖြစ်ကြောင်း သိရ သည်။
ထိုင်း Air Asia လေကြောင်းလိုင်း၏ အမှုဆောင် အရာရှိချုပ် Tassapon Bijleveldက လက်ရှိ အခြေအနေမှာ မြန်မာနိုင်ငံအနေနှင့် ပွင့်လင်းလာသည့် နိုင်ငံဖြစ်လာသောကြောင့် လေကြောင်းလိုင်း ပျံသန်းမှုကို တိုးချဲ့စီစဉ်ခြင်းဖြစ်သည်ဟု ယခုလ ၆ ရက်နေ့က ကျင်း ပ ခဲ့သည့် သတင်းစာရှင်းလင်းပွဲ တခုတွင် သတင်းထောက်များကို ပြောကြားကြောင်း ထိုင်း သတင်းများတွင် ဖော်ပြထားသည်။
“အခုလို မြန်မာနိုင်ငံနဲ့ ခရီးစဉ်တိုးချဲ့မှုဟာ ကျနော့် အတွက် အရေးကြီးတယ်”ဟု ၎င်းက ဆိုသည်။
ဘန်ကောက်- မန္တလေး ခရီးစဉ်သည် ဆွဲဆောင်မှုများစွာ ရှိသော မြန်မာနိုင်ငံ၏ ဒုတိယ အကြီးဆုံး မြို့ဖြစ်သည့် မန္တလေးမြို့ကို ရွေးချယ်ရခြင်း ဖြစ်ကြောင်းလည်း Tassapon က ဆက်ပြောသည်။
မန္တလေးမြို့အပြင် ပုဂံ နှင့် နေပြည်တော် တို့ကိုလည်း ခရီးစဉ် တိုးချဲ့ရန် စီစဉ်ထားပြီး ခရီးသည် ၁၈၉ ဦး လိုက်ပါစီးနင်းနိုင်သည့် Airbus A 320 အမျိုးအစား လေယာဉ်များဖြင့် ပြေးဆွဲမည် ဖြစ်ကြောင်း သတင်းများအရ သိရသည်။ လက်ရှိတွင် ရန်ကုန် -ဘန် ကောက်ကို နေ့စဉ် ပြေးဆွဲနေသည်။
သြဂုတ်လ ၆ ရက်နေ့ထုတ် ဘန်ကောက်ပို့စ် သတင်းစာကလည်း မြန်မာနိုင်ငံတွင် ပြုပြင်ပြောင်းလဲမှုများကြောင့် စီးပွားရေးကိစ္စ များနှင့် အလည်အပတ် အတွက်ပါ ခရီးသည်များ လာရောက်ကြရာ နိုင်ငံတကာ လေကြောင်းလိုင်း အများအပြား မြန်မာနိုင်ငံသို့ ဆင်း သက်လာကြကြောင်း ဖော်ပြထားသည်။
ထိုကြောင့် ထိုင်းနိုင်ငံသည် မြန်မာ နိုင်ငံသို့ နိုင်ငံ တကာမှ ၀င်ပေါက်အဖြစ် ကာလရှည်ကြာ ရပ်တည်နေမှုကို ခြိမ်းခြောက်ခံရ မည့် အခြေအနေဖြစ်လာနိုင်ကြောင်း ၎င်းသတင်းက ဆိုသည်။
အနည်းဆုံး နိုင်ငံတကာ လေကြောင်းလိုင်း ငါးလိုင်းခန့်သည် လာမည့်လ အနည်းအငယ်အတွင် ရန်ကုန်သို့ တိုက်ရိုက် ဆင်းသက် နိုင်ရန် စီစဉ်လျက်ရှိကြောင်းလည်း ဘန်ကောက်ပို့စ် တွင် ရေးသားထားသည်။
မလေးရှားနိုင်ငံ ကွာလာလမ်ပူမြို့ အခြေစိုက် အာရှ-ပစိဖိတ် လေကြောင်းလိုင်းများ အဖွဲ့ (AAPA)မှ ညွန်ကြားရေးမှူးချုပ် Andrew Herdman က မြန်မာ နိုင်ငံသို့ တိုက်ရိုက်ပျံသန်းမှုများသည် ထိုင်းနိုင်ငံအနေနှင့် မြန်မာနိုင်ငံသို့ ၀င်ရောက်သော ဂိတ်ဝ နေရာမှ ပျောက်မသွား နိုင်သေးကြောင်း ဘန်ကောက်ပို့စ် သတင်းစာသို့ ပြောဆိုသည်။
“တခြားနိုင်ငံတွေကနေ မြန်မာနိုင်ငံကို တိုက်ရိုက် ပျံသန်းမှုတွေ ပိုမိုလာတာနဲ့ အတူ မြန်မာနိုင်ငံနဲ့ ဘန်ကောက်အကြား ပိုမို ပျံသန်း မှုတွေလည်း ရှိလာမှာ ဖြစ်တယ်”ဟု ၎င်းက ဆိုသည်။
တချိန်တည်းမှာပင် Bangkok Airways လေကြောင်းလိုင်းကလည်း အဲပုဂံနှင့် ခရီးစဉ် ဖလှယ်ရေး သဘောတူညီချက်ကို ဆွေးနွေး လျက်ရှိပြီး ပုဂံနှင့် မန္တလေး ခရီးသည်များ လွှဲပြောင်းပေးနိုင်ရန် စီစဉ်ထားကြောင်း သိရသည်။
လက်ရှိ မြန်မာနိုင်ငံသို့ ပျံသန်းလျက်ရှိသော နိုင်ငံခြား လေကြောင်းလိုင်း ၁၂ ခုမှာ Air China, China Southern Airlines, China Eastern Airlines, Thai Airways International, Indian Airlines, AirAsia (including Thai AirAsia), Taiwan’s China Airlines, Silk Air, Malaysian Airlines, Bangkok Airways, Jetstar Asia, and Vietnam Airlines တို့ဖြစ်ကြောင်း ဘန်ကောက် ပို့စ် တွင် ဖော်ပြထားသည်။
Ref: ဧရာဝတီ
Read More...
Collapse...
လင်းသန့်
August 8, 2012
ယနေ့ ကျရောက်သည့် ရှစ်လေးလုံး အရေးတော်ပုံ ၂၄ နှစ်ပြည့် အခမ်းအနားများမှ တဆင့် နှစ်စဉ် သြဂုတ်လ ၈ ရက်နေ့ တိုင်း မြန်မာနိုင်ငံလုံးဆိုင်ရာ ဒီမိုကရေစီနေ့ အဖြစ်သတ်မှတ်ရန် တိုက်တွန်းကြကြောင်း သတင်းရရှိသည်။
မန္တလေး၊ ရန်ကုန်နှင့် နယ်မြို့အသီးသီးတွင် ကျင်းပသည့် အခမ်းအနားများသို့ တက်ရောက်လာကြသူများက ၁၉၈၈ ခုနှစ် သြဂုတ် လ ၈ ရက်နေ့သည် မြန်မာနိုင်ငံ နိုင်ငံသူ နိုင်ငံသားအသီးသီး အားလုံး ဦးဆောင်ပါဝင်သည့် ထူးခြားသော သမိုင်းဝင်နေ့ ဖြစ် သည့်အတွက် ထိုကဲ့သို့ တောင်းဆိုခြင်း ဖြစ်ကြောင်း သိရသည်။
ယနေ့ ကျရောက်သည့် ရှစ်လေးလုံး အရေးတော်ပုံ နှစ်ပတ်လည် အခမ်းအနားများကို မန္တလေး၊ ရန်ကုန်၊ ထားဝယ် အစ ရှိသည့် မြို့နယ်အသီးသီးတို့တွင် လည်းကောင်း၊ နိုင်ငံတကာရောက် မြန်မာများက လည်းကောင်း ကျင်းပကြ သည်။
ထူးခြားသည်မှာ ယခုနှစ် ကျင်းပသည့် နှစ်ပတ်လည် အခမ်းအနားသည် အစိုးရက အသိအမှတ်ပြုသည့် လက္ခဏာဖြင့် ကျင်းပ သည့် ပထမဆုံးသော အခမ်းအနားလည်း ဖြစ်သည်။
မန္တလေးမြို့ရှိ ဒက္ခိဏ ရာမ ကျောင်းတိုက်တွင် ယနေ့ နံနက်မှ စတင်ကာ အပိုင်း ၂ ပိုင်းခွဲ ကျင်းပသော ရှစ်လေးလုံး ငွေရတု အကြိုအခမ်းအနားတွင် ၈၈ မျိုးဆက်ကျောင်းသား ခေါင်းဆောင်များ ဖြစ်ကြသည် ကိုမင်းကိုနိုင်၊ ကိုကိုကြီး၊ ကိုဌေးကြွယ် တို့ အပါအဝင် တက်ရောက်လာသူ စုစုပေါင်း ၃ ထောင်ကျော်ခန့် ရှိသည်။
အဆိုပါ အခမ်းအနားတွင် ရှစ်လေးလုံး အရေးတော်ပုံ၏ ထူးခြားမှုများကို ပြောဆို ဆွေးနွေးခဲ့ကြသည့် အပြင် ယနေ့ ကျရောက် သည့် ရှစ်လေးလုံး ၂၄ နှစ်မြောက် နေ့တွင် သြဂုတ်လ ၈ ရက်နေ့တိုင်း မြန်မာနိုင်ငံလုံး ဆိုင်ရာ ဒီမိုကရေစီ နေ့အဖြစ် သတ် မှတ် ကျင်းပသွားကြရန် တက်ရောက်လာသူများနှင့် ဆွေးနွေးသူများက သဘောတူ ဆော်သြကြပြီး ဆက်လက်ကြိုးပမ်းသွားရေး သန္တိဌာန် ချမှတ်ကြောင်း သိရသည်။
“ရှစ်လေးလုံး အရေးတော်ပုံကြီးမှာ လူတိုင်းက ခေါင်းဆောင်ဖြစ်တယ်၊ နိုင်ငံသားတိုင်းက ဦးဆောင်တဲ့ အရေး တော်ပုံကြီး ဖြစ်တဲ့
အတွက် ထူးခြားတယ်” ဟု ၈၈ မျိုးဆက်ကျောင်းသား ခေါင်းဆောင် ကိုကိုကြီးက ပြောသည်။
နိုင်ငံပြုပြင် ပြောင်းလဲရေး၊ နိုင်ငံတော် တည်ဆောက်ရေးကို ဖော်ဆောင်ရာတွင် အားလုံး ပူးပေါင်းပါဝင်သည့် နိုင်ငံရေး စနစ် ဖြစ်ရေး၊ ရှစ်လေးလုံး “ဒို့ အရေး” စိတ်ဓာတ် ပြန်လည်နိုးကြား တက်ကြွလာစေရေး အတွက် အားလုံးက ၀ိုင်းဝန်း ကြိုးစားကြရန် တိုက်တွန်းကြောင်းလည်း သူက ဆက်ပြောသည်။
ရှစ်လေးလုံးကာလတွင် ပါဝင်ခဲ့ကြသူများ စုဖွဲ့ထားပြီး အမျိုးသားပြန်လည်သင့်မြတ်ရေး၊ ဒီမိုကရေစီအရေးနှင့် လူ့ အခွင့်အရေး၊ ငြိမ်းချမ်းရေးလိုလားသူများ ဦးဆောင်ကာ ရန်ကုန်မြို့ ရွှေဂုံတိုင်ရှိ တော်ဝင်နှင်းဆီ၌လည်း ရှစ်လေးလုံး အရေးတော်ပုံ ၂၄ ပြည့် အခမ်းအနားကို ကျင်းပခဲ့သည်။
အဆိုပါ အခမ်းနားတွင် နိုင်ငံရေး အကျဉ်းသားဟောင်း ရဟန်း သံဃာ ၂၀ ကျော် တက်ရောက်ပြီး နာယကများအဖြစ် အမျိုးသား ဒီမိုကရေစီ အဖွဲ့ ချုပ် (NLD) ပါတီ ခေါင်းဆောင် ဦးတင်ဦး၊ ဦးဝင်းတင်တို့က တာဝန်ယူကာ တက်ရောက်သူ စုစုပေါင်း ၁၀၀၀ ကျော်ခန့်ရှိကြောင်း သိရသည်။
အခမ်းအနားတွင် ဦးတင်ဦး၊ ဦးဝင်းတင်နှင့် တက်ရောက် ဆွေးနွေး ပြောကြားသူများ အားလုံး စည်းလုံး ညီညွတ်စွာဖြင့် ရှစ်လေးလုံး စိတ်ဓာတ်နှင့်အညီ ရှစ်လေးလုံးမှ စတင်သည့် နိုင်ငံရေး ရည်မှန်းချက်များကို ဆက်လက် အကောင် အထည် ဖော်ရန် လိုအပ်ကြောင်းနှင့် သမိုင်းဝင်နေ့ ဖြစ်သည့်အတွက် နောင်တွင်လည်း မြန်မာနိုင်ငံလုံးဆိုင်ရာ ဒီမိုကရေစီ နေ့အဖြစ် သတ်မှတ်ရေး တောင်းဆိုမည်ဆိုသည့် အချက်ကို ဆွေးနွေးသွားကြသည်။
ထို့အပြင် မြန်မာ့သမိုင်းတွင် အကြီးကျယ်ဆုံး အရေးတော်ပုံကြီး ဖြစ်သောကြောင့် ကွယ်လွန်သွားသူများ အတွက် စုံစမ်း ဖော်ထုတ်ပြီး အသိအမှတ်ပြုရေး ဆက်လုပ်သွားရန် လိုကြောင်း ဦးဆောင်ဆွေးနွေးသူများက ပြောဆိုခဲ့ပြီး တက်ရောက်လာသူ များက အမျိုးသားပြန်လည် သင့်မြတ်ရေးကို ဦးစားပေး ပြောဆိုဆွေးနွေး သွားကြကြောင်း သိရသည်။
“ရှစ်လေးလုံး အရေးတော်ပုံကြီးမှာ ကျဆုံးသွားသူ ၃ ထောင်ကျော် ရှိတယ်လို့ ပြောကြပါတယ်။ ဒီကနေ့အထိ စာရင်း အတိအကျ ကောက်လို့ မရသေးပါဘူး။ ဒါပေမယ့် သေဆုံးသွားကြသူတွေ အားလုံးဟာ ကျနော်တို့အားလုံးရဲ့ ကျေးဇူး ရှင် တွေဖြစ်တယ်။ အာဇာနည်တွေဖြစ်တယ်” ဟု အခမ်းအနား တက်ရောက်သူ ၈၈ မျိုးဆက်ကျောင်းသား ကိုဇော်မင်း က ဆိုသည်။
အလားတူ ၈၈ မျိုးဆက် ကျောင်းသားများ (ထားဝယ်အဖွဲ့) က ဦးစီးကျင်းပသည့် ထားဝယ်မြို့ ဇေယျဝတီ စာသင်တိုက်၌ သံဃာ များအား ၀ါဆိုသင်္ကန်းကပ်ပြီး ရှစ်လေးလုံး နှစ်ပတ်လည်ပွဲကို ကျင်းပခဲ့သည်။
ထားဝယ်တွင် ကျင်းပသည့် ရှစ်လေးလုံး နှစ်ပတ်လည်ပွဲကို တက်ရောက်သည့် ၈၈ မျိုးဆက် ကျောင်းသား ခေါင်းဆောင် တဦးဖြစ်သော ကိုမင်းဇေယျာက သံဃာတော်များကို ၀ါဆိုသင်္ကန်း ကပ်လှူပူဇော်ပြီးနောက် ရှစ်လေးလုံး အရေးတော်ပုံ၏ သမိုင်းအကျဉ်း၊ ကျင်းပရသည့် ရည်ရွယ်ချက်တို့ကို တက်ရောက်လာသူ ပရိတ်သတ် ၁၅၀ ကျော်တို့ အား ရှင်းပြခဲ့သည်ဟု သိရသည်။
“လက်ရှိအနေအထားရဲ့ ပြုပြင်ပြောင်းလဲမှုတွေဟာ သူ့အလိုလို စေတနာ ရှိလွန်းလို့ ဖြစ်လာတဲ့ အရာ မဟုတ်ဘဲနဲ့ ရှစ်လေးလုံး အရေးတော်ပုံ ကာလကနေ အခုအချိန်ထိ ဒီမိုကရေစီလိုလားတဲ့ သူရဲကောင်းတွေရဲ့ သွေးတွေ၊ ချွေးတွေ၊ ဘ၀တွေ ရင်းပြီးတော့ ရခဲ့တဲ့ အခွင့်အရေးတွေ ဖြစ်တယ်။ ဒီ အခွင့်အရေးတွေကို နောက်ပြန် မဆုတ်သွားဖို့ အတွက်၊ ဒီအခွင့် အရေးတွေကို အပြည့် အ၀ ရရှိဖို့အတွက် ဆက်လက်ပြီးတော့ အားလုံးက ပူးပေါင်းဆောင်ရွက်ဖို့ လိုတယ်” ဟု ကိုမင်းဇေယျာက ပြောသည်။
သမိုင်းတွင် အရေးကြီးသည့် ရှစ်လေးလုံး အရေးတော်ပုံကို အစိုးရက ပထမဆုံး အသိအမှတ်ပြုမှု လက္ခဏာသည် ယမန်နေ့က ၈၈ မျိုးဆက်ကျောင်းသား ခေါင်းဆောင်များနှင့် ပြည်ထောင်စု အစိုးရ ၀န်ကြီးများတွေ့ဆုံစဉ်က သိလိုက်ရသည်ဟု ကိုကိုကြီးက ဆိုသည်။
ဝန်ကြီး ၂ ဦးဖြစ်သော ဦးစိုးသိန်း၊ ဦးအောင်မင်းတို့က သမ္မတထံ အသိပေးပြီး သမ္မတ ခွင့်ပြုချက်ဖြင့် လာရောက်သည့် အတွက် ပထမဆုံး ရှစ်လေးလုံး အရေးတော်ပုံကို အသိအမှတ်ပြုသည့် လက္ခဏာကောင်း ဖြစ်ကြောင်း၊ ထို့နောက် ၎င်းတို့က အလှူငွေ ကျပ် ၁၀ သိန်း ပေးအပ်ခဲ့ကြောင်း သူက ဧရာဝတီကို ပြောသည်။
“သမ္မတ ခွင့်ပြုချက်နဲ့ လာတာလို့ ပြောပါတယ်။ ဒါဟာ ရှစ်လေးလုံးကို အသိအမှတ်ပြုတဲ့ သဘောပဲ။ ရှစ်လေးလုံး ဆိုတာ အဖျက်အမှောင့် တခုလို့ တလျှောက်လုံး စွပ်စွဲ ပုတ်ခတ် လာခဲ့ရာကနေ နိုင်ငံတော် အဆင့် အသိအမှတ် ပြုလာတယ် ဆိုတာဟာ အမျိုးသား ပြန်လည်သင့်မြတ်ရေး အတွက် ကောင်းတဲ့ အရိပ်လက္ခဏာပဲလို့ နားလည် ပါတယ်” ဟု ၎င်းက ဆက်ပြောသည်။
ထို့ကြောင့် နှစ်ပေါင်း ၂၄ နှစ်ကြာခဲ့ပြီးနောက် ပြည်ထောင်စု အစိုးရအဆင့် အသိအမှတ်ပြု ခံရသည့် ပထမဆုံး ရှစ်လေးလုံး နှစ်ပတ်လည်နေ့ကို မန္တလေး၊ ရန်ကုန်၊ ထားဝယ် စသည့် မြို့နယ်အသီးသီးတွင် ကျင်းပကြခြင်း ဖြစ်ကြောင်း ၈၈ မျိုးဆက် ကျောင်းသားခေါင်းဆောင် များက ဆိုသည်။
ထို့အပြင် ရှစ်လေးလုံးကာလ အသက်၊ သွေး၊ ချွေး ပေးဆပ်ခဲ့ရသည့် အာဇာနည်များ၏ ဂုဏ်ကျေးဇူးကို လေးစား တန်ဖိုးထား သည့် အနေဖြင့် သမိုင်းမှတ်တမ်း ရှိရန် လိုအပ်ကြောင်းလည်း ယနေ့ အခမ်းအနားများတွင် ဆွေးနွေး ပြောဆို သွားကြကြောင်း လည်း သိရသည်။
မြန်မာ့ လူ့အဖွဲ့အစည်းသည် ဒဏ်ရာများနှင့် ပြည့်နှက်နေသည့် လူ့အဖွဲ့အစည်းဖြစ်ကြောင်း၊ ထို့ကြောင့် ဒဏ်ရာများ ကုစားသည့် နေရာတွင် သမိုင်းမှတ်တမ်းအမှန် ကျန်ရှိဖို့ လိုအပ်ကြောင်း၊ အာဃာတ ထားခြင်းမျိုး မဟုတ်ဘဲ အမျိုးသား ပြန်လည်သင့်မြတ် ရေးကို ရှေ့ရှုပြီး နိုင်ငံ ပြန်လည် ထူထောင်ရေးအတွက် ဖြစ်ကြောင်း ကိုကိုကြီးက ပြောသည်။
“အဲဒီလူ့အဖွဲ့အစည်းကို ပြန်ပြီးတော့ ကုစားတဲ့နေရာမှာ ဒီ ဒဏ်ရာ ဒဏ်ချက်တွေ ဖြစ်ခဲ့တယ်၊ ဒီလို မတော် မတရား မှုတွေ ဖြစ်ခဲ့တယ် ဆိုတာကိုလည်း မှန်မှန်ကန်ကန် မှတ်တမ်းတင်နိုင်ဖို့၊ မှတ်တမ်းတင်ပြီး ထိခိုက် ဒဏ်ရာ ရခဲ့တဲ့၊ အနာတရ ဖြစ်ခဲ့ တဲ့သူတွေကို အသိအမှတ်ပြုဖို့၊ ဂုဏ်ပြုဖို့ လုပ်တာဟာ ဒဏ်ရာကို အကောင်းဆုံး ကုစားတဲ့ နည်းပဲ” ဟု ၎င်းက ဆိုသည်။
ရှစ်လေးလုံး သမိုင်းမှတ်တမ်းမှန် ရရှိရေး ကိစ္စနှင့်ပတ်သက်၍ ယမန်နေ့က တွေ့ဆုံခဲ့သည့် အစိုးရ ၀န်ကြီးများကလည်း လက်ခံ နားလည်ကြောင်း ပြောကြားခဲ့သည်ဟု သိရသည်။
“အဲဒီတုန်းက ဘယ်သူတွေ သေခဲ့ကျေခဲ့တာတွေက အစ စာရင်းလေး အင်းလေးနဲ့၊ အဲဒီတုန်းက အဖြစ်အပျက်တွေကို မှန်မှန် ကန်ကန် ပြုစုနိုင်ရင် ကောင်းတယ်လို့ ဦးစိုးသိန်းကတော့ ပြောပါတယ်” ဟု ကိုကိုကြီးက ဆို သည်။
၁၉၈၈ ခုနှစ်က မြန်မာနိုင်ငံ အနှံ့ လူထု လူတန်းစား အလွှာအသီးသီးက တပါတီအာဏာရှင် စနစ်ကို ဆန့်ကျင်တော် လှန်ခဲ့ပြီး ဒီမိုကရေစီနှင့် လူ့အခွင့်ရေး အပြည့်အ၀ ရှိသည့် မြန်မာနိုင်ငံဖြစ်ပေါ်ရေး တောင်းဆို ဆန္ဒပြမှုသည် မြန်မာ့ သမိုင်းတွင် အလွန် ကြီးကျယ်ပြီး မြန်မာနိုင်ငံသစ်ကို မွေးဖွားလိုက်ခြင်း ဖြစ်သည်။
ထိုစဉ်က စစ်တပ်က ရက်စက်စွာဖြိုခွင်း ပစ်ခတ်မှု၊ ဖမ်းဆီးမှုတို့ကြောင့် သေကြေ၊ ဒဏ်ရာရသူ များစွာရှိခဲ့ပြီး သတင်းများ၏ အဆိုအရ နိုင်ငံအဝန်း ၃၀၀၀ ကျော် ရှိသည်ဟု ဆိုသော်လည်း ယနေ့ထိ လွတ်လပ်သည့် စုံစမ်းစစ်ဆေးမှု မှတ်တမ်းများ မလုပ်နိုင်သေးပေ။
မန်းသားလေး ပူးပေါင်း ရေးသားသည်။
Ref: ဧရာဝတီ
Read More...
Collapse...
August 8, 2012
၈၈၈၈ ဒီမိုကရေအရေးတော်ပုံ ငွေရတုအကြို ၂၄ နှစ်ပြည့် အခမ်းအနားကို ၈၈ မျိုးဆက်ကျောင်းသားတွေကဦးဆောင် ပြီး မန္တလေးမြို့၊ ချမ်းမြသာစည်မြို့နယ်၊ အလယ်တိုက်ကြီး၊ ဒက္ခိဏာရာမ ဘုရားကြီးကျောင်းတိုက်မှာ ဒီကနေ့ ကျင်းပခဲ့ ကြပါတယ်။
အခမ်းအနားအတွက်လိုအပ်တာတွေ မနေ့က ပြင်ဆင်နေတုန်း ကိုမင်းကိုနိုင်အပါအဝင် ၈၈ မျိုးဆက်ကျောင်းသား ခေါင်းဆောင် တွေ အံ့သြစရာ အဖြစ်တခု ပေါ်လာပါတယ်။
အဲ့ဒါကတော့ ပြည်ထောင်စုဝန်ကြီး ၂ ဦးဖြစ်တဲ့ စက်မှုဝန်ကြီးဌာန ဝန်ကြီး ဦးစိုးသိန်းနဲ့ မီးရထားပို့ဆောင်ရေး ဝန်ကြီးဌာန ဝန်ကြီး ဦးအောင်မင်းတို့ အခမ်းအနားကျင်းပမယ့် ကျောင်းတိုက်ကိုရောက်လာပြီး ၈၈ မျိုးဆက်ကျောင်းသားခေါင်းဆောင်တွေနဲ့ တွေ့ဆုံခဲ့ တာပါပဲ။
သမ္မတဦးသိန်းစိန်နဲ့နီးစပ်ပြီး အပစ်အခတ်ရပ်စဲရေးအတွက် တိုင်းရင်းသား လက်နက်ကိုင် အင်အားစုတွေနဲ့ ဆွေးနွေးပွဲ တွေမှာ ပါဝင်ဆောင်ရွက်နေကြတဲ့ ဒီဝန်ကြီး ၂ ၂ ဦးက သူတို့အခုလိုလာတာဟာ ၈၈၈၈ အခမ်းအနားကျင်းပရာမှာ ကူညီဖို့ဖြစ်တယ်လို့ ကျောင်းသားခေါင်းဆောင်တွေကို ပြောပြီး အခမ်းအနားအတွက် ငွေကျပ် ၁၀ သိန်းကိုလည်း ပေးလှူပါတယ်။
ဒါ့ပြင် ၈၈ မျိုးဆက်ကျောင်းသားခေါင်းဆောင်တွေနဲ့တွေ့ဖို့ သမ္မတထံ ခွင့်တောင်းပြီး သမ္မတရဲ့ ခွင့်ပြုချက်နဲ့ လာခဲ့ တာဖြစ်တယ်၊ ဒါကြောင့် သြဂုတ်လ ၈ ရက်နေ့မှာ ကျင်းပမယ့် ၈၈၈၈ အခမ်းအနားကို ပြည်ထောင်စုအဆင့် အစိုးရ အဖွဲ့က ခွင့်ပြုလိုက် တာ ဖြစ်တယ်လို့လည်း ဝန်ကြီးတွေ က ပြောသွားခဲ့ပါသေးတယ်။
ဒီဖြစ်ရပ်ဟာ ပြီးခဲ့တဲ့ စနေနေ့က သမ္မတဦးသိန်းစိန်ကိုယ်တိုင် နိုင်ငံရေးပါတီ ၁၄ ခုက ပါတီ ခေါင်းဆောင်တွေ နဲ့ နေပြည်တော် မှာ တွေ့ဆုံခဲ့ အပြီး ဖြစ်ပေါ်လာတာပါ။
အဲဒီတွေ့ဆုံမှုကို နွေးထွေးပွင့်လင်းတဲ့ တွေ့ဆုံမှုလို့ နိုင်ငံရေးပါတီတွေက ရှုမြင်ကြပြီး တွေ့ဆုံဆွေးနွေးမှုအပေါ် ကျေနပ်အားရတယ် လို့လည်း သူတို့က ပြောပါတယ်။ သမ္မတအနေနဲ့လည်း အမျိုးသားပြန်လည်သင့်မြတ်ရေးအတွက် အတိုက်အခံအင်အားစုတွေနဲ့ နီးနီးကပ်ကပ်ဆောင်ရွက်နိုင်ဖို့ ပိုပြီး စိတ်ချယုံကြည်မှုရှိလာတယ်လို့ သိရပါတယ်။
နိုင်ငံရေးလေ့လာသုံးသပ်သူတွေကတော့ သမ္မတနဲ့နီးစပ်တဲ့ ဝန်ကြီးတွေ အခုလို နိုင်ငံရေးအင်အားစုတွေဆီ ကိုယ်တိုင် သွား ရောက်တွေ့ဆုံတာဟာ အစိုးရနဲ့ အဲ့ဒီအင်အားစုတွေကြားမှာ နားလည်မှုပိုရှိလာဖို့နဲ့ အစိုးရရဲ့ လက်ရှိအနေအထား ကို ပိုကောင်း အောင်လုပ်ဖို့လို့ ယူဆကြပါတယ်။
သမ္မတဦးသိန်းစိန်ဟာ သိပ်မကြာခင်မှာ ၈၈ မျိုးဆက်ကျောင်းသားတွေနဲ့တွေ့ဖို့ စီစဉ်ထားတယ်၊ ဘယ်နေ့ တွေ့မယ် ဆိုတာကို တော့ မသတ်မှတ်ရသေးဘူးလို့ အစိုးရနဲ့နီးစပ်သူတွေက ဆိုပါတယ်။ ၈၈ မျိးဆက် ကျောင်းသား ခေါင်းဆောင်တွေဖြစ်ကြတဲ့ ကိုမင်းကိုနိုင်နဲ့ ကိုကိုကြီးတို့ကလည်း သူတို့ သမ္မတနဲ့တွေ့ဖို့ စီစဉ် ထားတယ်လို့ အတည်ပြု ပြောကြားပါတယ်။
၁၉၈၈ ဒီမိုကရေစီအရေးတော်ပုံ ကာလအတွင်း သမ္မတဦးသိန်းစိန်ဟာ စစ်ကိုင်းတိုင်းမှာ တာဝန်ကျနေတယ်လို့ သိရပါ တယ်။ အဲ့ဒီအချိန်မှာ တပ်မှူးငယ်တယောက်ဖြစ်နေတဲ့ ဦးသိန်းစိန်က စက်တင်ဘာ အာဏာသိမ်းမှုအပြီး အိန္ဒိယ-မြန်မာ နယ်စပ်ကို ထွက်ပြေးတိမ်းရှောင်ဖို့ကြိုးစားတဲ့ ကျောင်းသားတချို့ကို ဖမ်းမိခဲ့တယ်လို့လည်း သိရပါတယ်။ ဒါပေမယ့် အဲ့ဒီကျောင်းသားတွေကို ထိန်းသိမ်းတာမျိုးမလုပ်ဘဲ အိမ်ပြန်ပို့ပေးခဲ့တယ်လို့ ဆိုကြပါတယ်။
ဒါပေမယ့် ဒီလိုတွေ့ဆုံမှုမျိုးက သမ္မတဦးသိန်းစိန်ရဲ့ အစိုးရအဖွဲ့ထဲမှာ ကွဲနေတယ်ဆိုတာကို ပြသရာရောက်တယ်လို့ နိုင်ငံရေး လေ့လာ သုံးသပ်သူတွေက ဆိုပါတယ်၊ ဘာဖြစ်လို့လဲဆိုတော့ အဲ့ဒီလိုတွေ့ဖို့ဆိုတာ သဘောထားတင်းမာပြီး ရှေးရိုးစွဲဝါဒီတွေဆို ဖြစ်လာဖို့ မလွယ်ပါဘူး။
ဒါ့အပြင် ဒီလိုတွေ့ဆုံမှုတွေကို မနှစ်မြို့တဲ့ ရှေးရိုးစွဲဝါဒီတွေရဲ့ အငြိုအငြင်ခံပြီး လုပ်ခဲ့လိုက်လို့ သမ္မတနဲ့ ပြုပြင်ပြောင်းလဲရေးဝါဒီတွေ နေပြည်တော်နိုင်ငံရေးမှာ ဘယ်သူ အသာစီးရနေသလဲဆိုတာ စောင့်ကြည့်လေ့လာသူတွေ မေးခွန်းထုတ်စရာ ဖြစ်လာနေပါတယ်။ အုပ်ချုပ်ရေးယန္တရားနဲ့ ကြံ့ခိုင်ရေးပါတီအတွင်း အကွဲအပြဲ ကြီးကြီးမားမား ဖြစ်နေပြီး သမ္မတက ကိုင်တွယ်ရခက်နေပုံရကြောင်း လည်း တချို့က သုံးသပ်ကြပါတယ်။
မေလမှာ သမ္မတက ခေတ်နောက်ပြန်ဆွဲသူတွေ ချန်ထားခဲ့မယ်လို့ ပြောဆိုအပြီး လူမှန်နေရာမှန် ခန့်အပ်ရေး အုပ်ချုပ်ရေးအဖွဲ့ အတွင်း ဖြစ်လာလိမ့်မယ်လို့ နိုင်ငံရေးလေ့လာသူတွေက ယူဆခဲ့ကြပါတယ်။ ခြစားပြီး လုပ်ငန်းဆောင်ရွက်ရာမှာ အရည်အချင်း မပြည့်မှီတဲ့ အခြား ဝန်ကြီးတချို့လည်း ရာထူးကနေ ထုတ်ပယ်ခံရဖို့ ရှိတယ်ဆိုတဲ့အပြောတွေလည်း ထွက်ရှိလာပါတယ်။
ဒါပေမဲ့ ခေတ်နောက်ပြန်ဆွဲ ဝန်ကြီးတွေ အခုထိ လက်စောင်းထက်နေကြတုန်းပါ။ ဥပမာ ခေတ်နောက်ပြန်ဆွဲသူလို့ လူအများက သတ်မှတ်တဲ့ ပြန်ကြားရေးနဲ့ ယဉ်ကျေးမှုဝန်ကြီးဌာနဝန်ကြီး ဦးကျော်ဆန်းဟာ ရာထူးက ထုတ်ပယ်ခံရမယ်လို့ သတင်းတွေ ထွက် နေခဲ့တာကြာပြီဖြစ်ပေမဲ့ အပြောင်းအရွှေ့မခံရတဲ့အပြင် ပြန်ကြားရေးဝန်ကြီးဌာနရဲ့ စာပေစိစစ်ရေးက ဂျာနယ် ၂ စောင်ကို ထုတ်ဝေခွင့် ပိတ်ခဲ့ပါတယ်။ သတင်းဆောင်းပါးတွေရေးသားတင်ပြမှုမှာ စာပေစစ်စစ်ရေးက ပိုပြီး ဆင်ဆာ လုပ်လာပါသေးတယ်။
လစ်လပ်သွားတဲ့ ဒုသမ္မတဟောင်း ဦးသီဟသူရ တင်အောင်မြင့်ဦး နေရာကို အစိုးရက အခုအချိန်အထိ အစားမထိုးနိုင်သေးပါဘူး။ ဘယ်သူ့ကို အစားထိုးမယ်ဆိုမယ်ဆိုတာကိုလည်း အခုအချိန် ရှင်းရှင်းလင်းလင်း အမည်စာရင်းတင်သွင်းနိုင်ခြင်း မရှိသေးပါဘူး။
Ref: ဧရာဝတီ
Read More...
Collapse...
ရန်ပိုင်
August 8, 2012
ပဲခူးတိုင်း ပြည်မြို့၌ ကလေးငယ် ၁၅ ဦးခန့်ပါဝင်သည့် အိုးအိမ်မဲ့ မိသားစုများကို ရဲတပ်ဖွဲ့ နှင့် စည်ပင်သာယာရေး ၀န်ထမ်းများ က အဓမ္မ ဖမ်းဆီးပြီး ၃၅ မိုင်ခန့် အကွာရှိ ရခိုင်ရိုးမ အခြေသို့ သွားရောက်စွန့်ပစ်ကြောင်း သတင်းရသည်။
ပြီးခဲ့သည့် စနေနေ့ညတွင် ဖမ်းဆီး၍ အမှိုက်ကားဖြင့်သယ်ဆောင် စွန့်ပစ်ခံရသည့် ကလေးငယ်များမှာ အသက် ၃ နှစ်မှ ၁၂ နှစ် အကြားဖြစ်ပြီး မိဘမဲ့များ ပါဝင်ကြောင်း၊ ကိုယ်ဝန်ဆောင် မိခင်နှင့် လူကြီးများလည်း ပါဝင်ကြောင်း၊ ပြည်မြို့ ကမ်းနားလမ်းနှင့် ညဈေးတန်းတ၀ိုက်တွင် ဖမ်းဆီးခံရခြင်း ဖြစ်ကြောင်း၊ ကလေးများမှာ မြို့ခံ လူငယ်များ ဖွင့်လှစ်ထားသော “ကရုဏာ လက်များ ကွန်ရက်” စာသင်ကျောင်းတွင် ပညာသင်ကြားနေသူများဖြစ်ကြောင်း စာသင်ကျောင်း တာဝန်ခံ တဦးဖြစ်သည့် ကိုဗသျှီး က ဧရာဝတီသို့ ပြော သည်။
“ကျောင်း အမြဲတက်တဲ့ကလေးတွေ နှစ်ရက်လောက် ပျောက်သွားတော့ စုံစမ်းတဲ့အခါ ညကြီးဖမ်းသွားပြီး ဥသျှစ်ပင် ဟိုဘက်မှာ သွားစွန်ခဲ့တယ်၊ လမ်းမှာနှစ်ညလောက် အိပ်ပြီး လမ်းလျှောက်ပြန်လာကြတာ”ဟု ၎င်းက ဆိုသည်။
ကရုဏာလက်များ စာသင်ကျောင်းမှ ဖမ်းဆီးခံရသည့် ကလေးငယ်များမှာ ဇင်မာလှိုင်၊ ဘောလေး၊ မြတ်မြတ်ထွေး၊ စုဝေ၊ ရဲဇော် စသည့် ကလေးငယ်များ ဖြစ်သည်ဟု သိရသည်။
ကလေးငယ်အများစုသည် မိဘမဲ့များ ဖြစ်ကြပြီး စားဝတ်နေရေးအတွက် စွန့်ပစ်ပစ္စည်းများ ကောက်ယူရောင်းချခြင်း၊ တောင်းရမ်း စားသောက်ခြင်းဖြင့် ရပ်တည်ရသည့်အနေအထားမှ လူမှုအသိုင်းအ၀န်းအတွင်း ပြန်လည်ရောက်ရှိ လာစေရန်၊ အကျင့်စာရိတ္တ ကောင်းမွန် လာစေရန်၊ စိတ်ပိုင်းဆိုင်ရာ ထိခိုက်မှုမရှိစေရန်အတွက် ရည်ရွယ်ပြီး ဤကျောင်းကို ဖွင့်လှစ်ခြင်းးဖြစ်သည်ဟု ကိုဗသျှီး က ဆက်ရှင်းပြသည်။
“ကရုဏာလက်များ” စာသင်ကျောင်းကို ပြည်မြို့မှ လူ့အခွင့်အရေးတက်ကြွလှုပ်ရှားများက လွန်ခဲ့သည့် ၃ လခန့်က ဆံတော်ရပ် ကွက် မြကွမ်းတောင် ဘုန်းကြီးကျောင်းတွင် စတင်ဖွင့်လှစ်ခဲ့ပြီး ကလေးငယ်များအား နံနက် ၈ နာရီမှ ၁၁ နာရီအထိ မြန်မာစာ အရေး အဖတ် နှင့် ဘာသာရေး အဆုံးအမစာများကို သင်ကြားပေးကြောင်း၊ နေ့လယ်စာကိုလည်း ကျောင်းမှကျွေးမွေး ကြောင်း သိရသည်။
ပြည်မြို့အမှတ် (၂) ရဲစခန်းနှင့် မြို့နယ်စည်ပင်သာယာရေး ရုံးသို့ ဧရာဝတီမှ မေးမြန်းရာ ကလေးငယ်များနှင့် အိုးအိမ်မဲ့မိသားစု များအား ဖမ်းဆီးစွန့်ပစ်ခြင်းနှင့် ပတ်သက်ပြီး မဟုတ်မှန်ကြောင်း ငြင်းဆိုသွားသည်။
ပြည်မြို့ လူမှုဝန်ထမ်းဦးစီးဌာနမှလည်း အဆိုပါ သတင်းကို ကြားသည့်အတွက် ပြည်ခရိုင် အုပ်ချုပ်ရေးမှူးရုံးသို့ ဆက်သွယ်စုံစမ်း မေးမြန်းထားကြောင်း ပြောဆိုသည်။
မြန်မာနိုင်ငံတွင် အိုးမဲ့အိမ်မဲ့များအပါအ၀င် လေလွင့်လူငယ်များ ပြုပြင်ရေးကို လူမှုဝန်ထမ်း၊ ကယ်ဆယ်ရေးနှင့် ပြန်လည်နေရာချ ထားရေး ၀န်ကြီးဌာနက ရန်ကုန်နှင့် မန္တလေးမြို့ကြီးများတွင်သာ လူငယ်သင်တန်းကျောင်းများ ဖွင့်လှစ်ထားနိုင်သည်ကို တွေ့ရ သည်။
ပြည်မြို့မှ လူအခွင့်အရေးတက်ကြွလှုပ်ရှားသူ ကိုမင်းမင်းက ဘ၀ပေးအခြေအနေကြာင့် တောင်းရမ်းရှာဖွေစားသောက်ရသည့် က လေးငယ်များကို ဖမ်းဆီး စွန့်ပစ်ခြင်း၊ လူငယ်အကျဉ်းထောင်များသို့ပို့ကာ ထိန်းသိမ်းခြင်းသည် မှန်ကန်သောနည်းလမ်းများ မဟုတ် ကြောင်း၊ အစိုးရသစ်အနေဖြင့်လည်း လေလွင့်ကလေးငယ်များ ရှေ့ရေးအတွက် သီးသန့်အစီအစဉ်များ ထားရှိကာ လုပ်ဆောင်ပေး သင့်ကြောင်း၊ ဒေသတွင်းရှိ လူမှုအဖွဲ့အစည်းများအနေဖြင့်လည်း ကာလကြာရှည်စွာ ကလေးပြုစု စောင့်ရှောက်ရေး တာဝန်ယူနိုင် မည်ဟု မထင်ကြောင်း ထောက်ပြပြောဆိုသည်။
လွန်ခဲ့သည့်နှစ်က ပြည်မြို့တွင် ကုလသမဂ္ဂ ကလေးများရန်ပုံငွေအဖွဲ့(UNICEF)နှင့် ပုဂ္ဂလိကအဖွဲတဖွဲ့တို့ ပူးပေါင်းပြီး ကလေး သူငယ် ဖွံဖြိုးရေးနှင့် ကာကွယ်စောင့်ရှောက်ရေး စီမံကိန်းလုပ်ဆောင်ခဲ့သော်လည်း ယခုအခါ ဆက်လက် လုပ်ဆောင်နိုင်ခြင်း မရှိ
တော့ပေ။
လက်ရှိအခြေအနေတွင် ပြည်မြို့ရှိ ရတနာမဉ္ဇူရီ၊ စင်္ကြန်တောင်၊ခမ်းရတနာ၊ ကျောက်တောင်၊ ဝေပုလ္လစာရီ စသည့် ဘုန်းတော်ကြီး ကျောင်းများတွင်သာ ကလေးသူငယ်များကို စောင့်ရှောက်ပြီး စာပေသင်ကြားပေးနေသည်။
Ref: ဧရာဝတီ
Read More...
Collapse...
ခင်ဦးသာ
August 8, 2012
ကမ္ဘာ့ ကုလသမဂ္ဂ မြန်မာနိုင်ငံဆိုင်ရာ လူ့အခွင့်အရေးကိုယ်စားလှယ် မစ္စတာ သောမတ်စ် အိုဟေး ကင်တာနာသည် ထိုင်း-မြန် မာ နယ်စပ် မဲဆောက် မြို့ ၌ မြန်မာအဖွဲ့ အစည်းများနှင့် တွေ့ဆုံ၍ လူ့အခွင့်အရေး ဆိုင်ရာများ၊ ရခိုင်နှင့်ကချင် အရေးများ ကို ယမန်နေ့က ဆွေးနွေးကြောင်း သိရသည်။
နိုင်ငံရေး အကျဉ်းသားများ ကူညီစောင့်ရှောက်ရေး အသင်း(AAPP) ၊ ဒေါက်တာ စင်သီယာမောင်၊ ကရင်အမျိုးသမီး အဖွဲ့၊ က ရင် လူ့အခွင့်အရေးအဖွဲ့၊ လူ့အခွင့်အရေး မှတ်တမ်း ကွန်ရက်(ND-Burma)၊ ပလောင်လူငယ်အဖွဲ့၊ ထိုင်း-မြန်မာ နယ်စပ်တ လျှောက် ကူညီစောင့်ရှောက်ရေး ညွန့်ပေါင်း အဖွဲ့(TBBC) စသည့်အဖွဲ့ အစည်းများနှင့် မြန်မာနိုင်ငံ၏ လူ့အခွင့်အရေး ဆိုင်ရာ များ ကို မစ္စတာ ကင်တာနာနှင့် ဆွေးနွေးကြသည်ဟု တက်ရောက်သူများ က ပြောသည်။
ထို့အပြင် နိုင်ငံရေး အကျဉ်းသား၊ မြေသိမ်းယာသိမ်း၊ နယ်စပ်ဒေသရှိ ဒုက္ခသည်များ နေရပ်ရင်း ပြန်နိုင်ရေး စသည့် အကြောင်း အရာများကိုလည်း ဆွေးနွေးကြကြောင်း AAPP ၏ တွဲဖက် အတွင်းရေးမှူး ဦးဘိုကြည် က ဧရာဝတီ ကို ပြောသည်။
၎င်းက“ကျနော်ကတော့ နိုင်ငံရေးအကျဉ်းသားတွေအကြောင်း၊ ကချင်နဲ့ ရခိုင်ဘက်မှာဖြစ်နေတဲ့ အဖမ်းအဆီးတွေအကြောင်း၊ နောက် မြန်မာတနိုင်ငံလုံးမှာ ကျယ်ကျယ်ပြန့်ပြန့်ဖြစ်နေတဲ့ လယ်ယာမြေ အသိမ်းခံရတဲ့အကြောင်းတွေ ပြောဖြစ်တယ်”ဟု ဆို သည်။
လက်ရှိတွင် နိုင်ငံရေး အကျဉ်းသား ၄၄၂ ဦး ရှိသေးကြောင်း၊ ကချင်ပြည်နယ်တွင်လည်း ဖမ်းဆီးမှုများ ရှိနေပြီး ရခိုင်ဒေသတွင်း ဖြစ်ပွားနေသည့် အခြေအနေများနှင့်ပတ်သက်၍ ၎င်းတို့၏ အမြင်များကို ဆွေးနွေးခဲ့ကြောင်း ဦးဘိုကြည် က ဆက်ပြောသည်။
မစ္စတာ ကင်တာနာသည် အင်းစိန် အကျဉ်းထောင်မှ အကျဉ်းသားများနှင့်တွေ့ဆုံခဲ့ပြီး ရခိုင်ဒေသတွင်း ပဋိပက္ခများနှင့် ကချင်
ပြည်နယ်၌ ဖြစ်ပွားနေသည့် ပဋိပက္ခများ အပေါ် စိုးရိမ်သည့် အခြေအနေများကို အကျယ်တ၀င့်ရှင်းပြသည့်အပြင် ပြည်တွင်း ငြိမ်း ချမ်းရေးဆွေးနွေးမှု၊ လူ့အခွင့်အရေး အခြေအနေများ တိုးတက်မှု ရှိမရှိတို့ကို မေးမြန်း ဆွေးနွေးကြောင်း သိရသည်။
မြန်မာနိုင်ငံ၌ လက်ရှိအခြေအနေတွင် နိုင်ငံရေး အပြောင်းအလဲ တချို့ရှိသည် မှန်သော်လည်း နောက်ကြောင်း ပြန်လှည့်မသွား
နိုင်ဟု ယုံကြည်၍ မရသေးကြောင်း၊ လယ်ယာမြေ သိမ်းယူမှုကြောင့် ဆန္ဒပြသည့်လယ်သမားများ အဖမ်းခံနေရခြင်း၊ အလုပ် သမား အခွင့်အရေး တောင်းဆိုသူ အလုပ်သမားတချို့ အလုပ်ထုတ်ခံရခြင်း စသည်များ ရှိနေသေးသည်ဟု ရှင်းပြ ဆွေးနွေး ခဲ့ကြောင်း မြန်မာနိုင်ငံ ဒီမိုကရက်တစ် တပ်ပေါင်းစု(FDB) မှ ဒေါက်တာ နိုင်အောင် က ပြောပြသည်။
“အပစ်အခတ်ရပ်စဲရေး ဆွေးနွေးပွဲတွေ ဟာလည်းပဲ တကယ်ဖြစ်မဖြစ်၊ လူ့အခွင့်အရေး ချိုးဖောက်မှုတွေ ရှိမရှိ ဆိုတာကို အရပ် သား အဖွဲ့အစည်းတွေက စောင့်ကြည့်ဖို့ လိုသလို သမာသမတ်ကျတဲ့ နိုင်ငံတကာ အဖွဲ့တွေ ကလည်းပဲ စောင့်ကြည့်သင့်တယ် ဆိုတာကို ဆွေးနွေးခဲ့ပါတယ်”ဟု ၎င်းက ပြောသည်။
နယ်စပ်ဒေသများရှိ ဒုက္ခသည်များ နေရပ်ရင်း ပြန်မည်ဆိုပါက နိုင်ငံရေးအရ သဘောတူညီမှု ရယူကာ ၎င်းတို့၏ ဆန္ဒ သဘော ထားကို မေးမြန်းပြီးမှ ပြန်ပို့ပေးရန် အရေးကြီးကြောင်းလည်း ဒေါက်တာ နိုင်အောင် က ပြောဆိုသည်။
ကရင် လူ့အခွင့်အရေး အဖွဲ့ တာဝန်ခံ စောအဲလ်ဘတ် ကလည်း အစိုးရသည် အပစ်အခတ် ရပ်စဲရေးကို တဘက်တွင် လုပ်ဆောင် နေသော်လည်း အခြားတဘက်၌ တိုက်ပွဲများ ဆက်လက် ဆင်နွှဲနေကြောင်းနှင့် မြေမြှုပ်မိုင်းအရေးကို အဓိကထား ဆွေးနွေးခဲ့ကြောင်း ဧရာဝတီ ကို ပြောသည်။
“လူ့အခွင့်အရေး ချိုးဖောက်တဲ့ ပုံစံက ၂၀၁၀ နောက်ပိုင်းမှာ ပုံစံ ပြောင်းသွားတယ်၊ အရင်ကဆိုရင် ရွာသားတွေကို ဖမ်းဆီး တာ၊ ရိက္ခာပို့ဖို့ တရွာက ၂၀၊ ၃၀ ပေါ်တာဆွဲတာတွေ လုပ်ခဲ့ပေမယ့် အခု အပစ်ရပ်ပြီး နောက်ပိုင်းကာလတွေမှာ ရွာသားတွေ ပိုင်ဆိုင်တဲ့ ကားတွေ၊ ဆိုင်ကယ်တွေ၊ ထော်လာဂျီ တွေကို ရိက္ခာ ပို့တဲ့ နေရာမှာ သုံးနေတယ်”ဟု ၎င်းက ဆိုသည်။
စစ်ပြေး ဒုက္ခသည်များ၏ လယ်ယာမြေများကို အစိုးရက စီးပွားရေး ကုမ္ပဏီများထံ ရောင်းချထားပြီး ဖြစ်ကြောင်း၊ ထို့ကြောင့် ဒုက္ခသည်များ အတွက် အာမခံချက်နှင့် လုံခြုံမှုလည်း မရှိသေးကြောင်း စောအဲလ်ဘတ် က ပြောဆိုသည်။
မစ္စတာ ကင်တာနာသည် ရခိုင်ဒေသတွင်း ပဋိပက္ခများနှင့်မြန်မာနိုင်ငံ၏ လူ့အခွင့်အရေး အခြေအနေများနှင့်ပတ်သက်၍ လေ့ လာ စုံစမ်းရန် မြန်မာနိုင်ငံသို့ တပတ်ခန့် ခရီးသွားရောက်ခဲ့ပြီးနောက် မဲဆောက်၌ မြန်မာ အဖွဲ့အစည်းများနှင့်တွေ့ဆုံခဲ့ခြင်း ဖြစ် သည်။
၎င်း၏ ဇူလိုင် ၃၁ နှင့် သြဂုတ် ၁ ရက် ရခိုင်ဒေသ ခရီးစဉ်နှင့်ပတ်သက်၍ တဘက်သတ် ဆန်သည်ဟု ရခိုင်ဒေသခံများ၊ လူမှုအဖွဲ့များ၊ ရခိုင်နိုင်ငံရေး ပါတီများ နှင့် ၈၈ ကျောင်းသား ခေါင်းဆောင်တဦးဖြစ်သူ ဦးကိုကိုကြီး တို့ကလည်း ဝေဖန်ထားကြ သည့် အပြင် ရခိုင်ပြည်နယ် အစိုးရ အဖွဲ့ကလည်း ဝေဖန် ထောက်ပြထားသည်။
ရခိုင်ဒေသတွင်း ခရီးစဉ်များကို ရခိုင်ပြည်နယ် အစိုးရအဖွဲ့ တာဝန်ရှိသူများက စီစဉ်ပေးပြီး ၎င်းတွေ့လိုသူများ အားလုံးနှင့်တွေ့
ဆုံပေးခဲ့ကြောင်း၊ သို့သော် ပြည်နယ် အစိုးရနှင့်တွေ့ဆုံဆွေးနွေးမှု၊ မေးမြန်းမှု လုံးဝ မရှိခဲ့ကြောင်း ရခိုင်ပြည်နယ် ဥပဒေချုပ်နှင့် ပြည်နယ်အစိုးရ၏ သတင်းပြန်ကြားရေး ဆပ်ကော်မတီ ဥက္ကဋ္ဌ ဦးလှသိန်း က ဧရာဝတီ ကို ပြောသည်။
“ကျနော် ကိုယ်တိုင်လည်း လိုက်ပါပြီး တွေ့ချင်သူတွေနဲ့တွေ့ ပေးတယ်၊ ဒါပေမယ့် အစိုးရအဖွဲ့ကို မေးမြန်းတာ ဘာမှ မရှိဘူး၊
ကျနော်တို့က ဘာမှ ရှင်းပြဖို့ အခွင့်အရေးပေးတာမျိုး မရှိဘူး၊ လူ့အခွင့်အရေး ကိုယ်စားလှယ် တယောက်အနေနဲ့ ဒီလို မလုပ် သင့်ဘူးလို့ ယူဆတယ်”ဟု ၎င်း က ဆိုသည်။
မစ္စတာ ကင်တာနာ သည် ရခိုင်ဒေသမှ မောင်တော၊ ဘူးသီးတောင်၊ စစ်တွေ ခရီးစဉ် အတွင်း အစ္စလမ်ဘာသာရေး ခေါင်း ဆောင် များ၊ ဘင်္ဂါလီ လူမျိုး ဒုက္ခသည်များ နှင့်သာ သီးသန့်တွေဆုံ မေးမြန်းမှုများ ပြုလုပ်သွားကြောင်း သိရသည်။
ရခိုင်ဒေသတွင်း ဖြစ်ပွားခဲ့သည့် ပဋိပက္ခများနှင့်ပတ်သက်၍ လွတ်လပ်သည့် စုံစမ်းစစ်ဆေးမှုများ ပြုလုပ်ရန် မြန်မာ အစိုးရကို တိုက်တွန်းကြောင်း မြန်မာနိုင်ငံမှ မထွက်ခွာမီ ရန်ကုန်လေဆိပ်၌ ပြုလုပ်သည့် သတင်းစာရှင်းလင်းပွဲ၌ မစ္စတာ ကင်တာနာက ပြော ဆိုခဲ့သေးသည်။ ၎င်းသည် ဇူလိုင် ၃၀ ရက်မှ သြဂုတ် ၄ ရက်အထိ မြန်မာနိုင်ငံသို့ သွားရောက်ခဲ့ခြင်း ဖြစ်သည်။
Ref: ဧရာဝတီ
Read More...
Collapse...
Posts
BBC News
VOA News
DVB News
RFA News
မဇ္ဈိမ
ဧရာဝတီ
နေ့သစ်
သျှမ်းသံတော်ဆင့်
ကရင်သတင်းစဉ်
ကောင်းဝါ
ကချင်သတင်းစဉ်
ယနေ့မြန်မာ
ကန္တာရဝတီ တိုင်းမ်
ငုရင်ပြင်
ရိုးမ (၃)
မိုးမခ
ဟစ်တိုင်
ဟံသာဝတီ
နိရဉ္စရာ
ခေတ်လူငယ်
မြို့တော်ပုသိမ်သတင်းစဉ်
မြန်မာသတင်းရပ်ဝန်း
ရိုးရာလေး
Mandalay Gazette
People Media Voice
KIC News
BNI News
Burma Daily
Burma Digest
Burma Net
Kaladan
Network Media Group Rebound 88