ကိုမြအေးရဲ့ ၀တ္တုကို ကြည်ဖြူသျှင် ဗီဒီယို ရိုက်မည်

ပန်းမြတ်ဇော်၊ ခင်မြတ်
တနင်္ဂနွေနေ့၊ သြဂုတ်လ ၀၅ ရက် ၂၀၁၂ ခုနှစ်

၈၈ မျိုးဆက် ကျောင်းသား ခေါင်းဆောင် ကိုမြအေး၏ မိသားစု နောက်ခံပြု ရေးသားထားသည့် “မိုးကောင်းကင်၌ တိမ်တိုက် များ” ၀တ္တုကို ဒါရိုက်တာ ကြည်ဖြူသျှင်က ဗီဒီယိုဇာတ်ကားအဖြစ် သြဂုတ် ၂၃ ရက်တွင် သရုပ်ဆောင် နေတိုး၊ သက်မွန်မြင့် တို့ဖြင့် စတင် ရိုက်ကူးသွားမည် ဖြစ်သည်။

ရုပ်ရှင်ဇာတ်ကားအဖြစ် ရိုက်ကူးရန် ထိုက်တန်သည့် ဇာတ်ကားတကား ဖြစ်သော်လည်း ပရိသတ်အား မြန်မြန်ချ ပြချင်လိုသည့် စိတ်ဆန္ဒကြောင့် ဗီဒီယိုအဖြစ် ရိုက်ကူးလိုက်ရခြင်းဖြစ်ကြောင်း ဒါရိုက်တာ ကြည်ဖြူရှင်က သြဂုတ် ၃ ရက်က ကျင်းပသည့် ကိုမြအေး၏ ၎င်းဝတ္တု မိတ်ဆက်ပွဲတွင် ပြောကြားသွားသည်။

ဝတ္တု၏ ဇာတ်လမ်းကျောရိုးမှာ မှာ မိသားစုဘ၀ မည်မျှတန်ဖိုးကြီးမားကြောင်းကို ရေးသားထားသည်။

“ဒီဝတ္တုက ပညာပေး ၀တ္တုတပုဒ်ပါ။ ပြည်သူလူထုကို ပေးချင်တဲ့ ရည်ရွယ်ချက်တွေ ၀တ္တုထဲမှာ အများကြီး ရှိနေတယ်” ဟု ကြည်ဖြူသျှင် က ဆိုသည်။

ဝတ္တုအား နာမည်ကြီး စာရေးဆရာကြီးများအား ပေးနှုန်းအတိုင်း ၀ယ်ယူခဲ့သည် ကြည်ဖြူသျှင် က ပြောသည်။ ရိုက်ကွင်း နေရာ များကိုမူ အတိအကျ မသိရသေးပေ။

Ref: မဇ္ဈိမ