ဖျာပုံ ရေလုပ်သားများ အဓမ္မ ခိုင်းစေခံရမှုရှိနေ

02 May 2011

နာဂစ် မုန်တိုင်းဒဏ်အား ၂၀၀၈ ခုနှစ်က ဆိုးရွားစွာ ခံခဲ့ရသော ဧရာဝတီတိုင်းရှိ ဖျာပုံခရိုင် ပင်လယ်ပြင်တွင် ကျားဖောင် လိုက်သည့် ရေလုပ်သားများကို စာရင်းဒိုင်များက ဒေသ အာဏာပိုင်များနှင့်ပူးပေါင်းကာ အဓမ္မခိုင်းစေမှုများပြုလုပ်ကြောင်း ရေလုပ်သားများက ပြောဆိုသည်။

“ယူထားတဲ့ ပိုက်ဆံမကျေဘဲ ပင်လယ် ပြင်ကနေ ပြန်တက်ရင် အာဏာပိုင် တွေနဲ့ ပေါင်းပြီး ဖမ်းခိုင်းတယ်” ဟု ဖျာပုံခရိုင် နောက်မီး ကျေးရွာတွင် နေထိုင်ပြီး နှစ် ၃၀ကျော် ကျားဖောင် လုပ်ကိုင်သူ ဦးသောင်းအေး က ပြော သည်။

စာရင်းဒိုင်(ငါး၊ ပုစွန် အရောင်းဒိုင်) များသည် ကျားဖောင်လိုက်သည့် ရေလုပ်သားများ၏ လုပ်ခလစာအပြည့်အဝ မပေးခြင်း၊ နာမကျန်းဖြစ်၍ နေအိမ်သို့ ပြန် လိုပါက ခွင့်မပေးခြင်းများ ပြုလုပ်ကြောင်း ဖျာပုံမြို့နယ် မြစ်တန်းကျေးရွာမှ ရေလုပ်သား ဦးဝင်းဗိုလ်ကလည်း ပြောဆိုသည်။

“ကျနော်တို့ ကျားဖောင်နဲ့ပင်လယ်ပြင်ထွက်ရင် အနည်းဆုံး လေး၊ ငါးလ ကြာတယ်။ အဲဒီအချိန်နာမကျန်းဖြစ်လို့ ကျနော်တို့ဆီ ငါးသယ်လာတဲ့ အခါ ပိုင်ရှင်တွေကပြန်မခေါ်ဘူး။ ကိုယ့်ဘာသာကုန်းပေါ်တက်လာရင်လည်း ရဲနဲ့စစ်တပ်နဲ့က ဖမ်းသေးတယ်”ဟု ၎င်းက ဆိုသည်။

ပင်လယ်ပြင်ထွက်ပြီး ငါးရှာဖွေသည့် ကျားဖောင်လုပ်ငန်းများကို ၁၉၇၅ မှ စတင် လုပ်ကိုင်လာကြပြီး ၁၉၈၃တွင်ပိုမိုတွင်ကျယ်ကာ ယခုအချိန်ထိ ဆက်လက်လုပ်ကိုင်လျက် ရှိကြောင်း သိရသည်။

ရာသီ ဥတု သဘာဝ ဘေးဒဏ်ကြောင့် ပင်လယ်တွင်း မျောပါခဲ့ရသည့် ကျားဖောင် လုပ်သားများအပေါ်တွင်လည်း လုပ်ငန်းရှင်များက ခေါင်းပုံဖြတ် မတရားပြူမှုများ ရှိသည်ဟု ရေလုပ်သားများက ပြောသည်။

ပြီးခဲ့သည့် မတ်လ တတိယပတ်အတွင်းက လေပြင်းတိုက်၍ပင်လယ်ပြင်အတွင်းမျောပါခဲ့သူ ဦးလှအောင်ကလည်း“ကျနော်ပြန် တက်လာတော့ လုပ်ခက ကျပ် တသိန်းကျော်ရမှာ ဒါပေမယ့် ပိုင်ရှင်က သူတို့ဖောင်ဆုံးရှုံးတယ်။ ငါးမရဘူးဆိုပြီး ဟိုနုတ်ဒီနုတ်နဲ့ တသောင်း လောက်ပဲ ရလိုက်တယ်”ဟု ပြောပြသည်။

ထို့အပြင် စားရင်းဒိုင်အများစုသည် မတ်လအတွင်း တစ်နာရီမိုင် ၇၀နှင့် ၈၀ကြား ပင်လယ် ပြင်တွင် တိုက်ခတ်ခဲ့သော လေပြင်းကြောင့် ရေ လုပ်သားများစွာ ပင်လယ်ပြင်အတွင်း မျောပါသွားမှုကို ပြန်လည်ဆယ်ယူကယ်ဆယ်မှု မပြုလုပ်ခဲ့ကြောင်းလည်း သိရ သည်။

“အလုပ်သမားပေါ်အရမ်းကောင်းတဲ့ စာရင်းဒိုင်တွေက လေပြင်းလဲငြိမ်ရော စက်လှေတစီးနဲ့ ပင်လယ်ပြင်က သူ့လုပ်သားတွေရော အခြားလူတွေကိုရော လိုက်ဆယ်တာ၊ ကျနော်တို့ ပိုင်ရှင်ကတော့ ဆီဖိုးကုန်မှာ ဆိုးလို့ လိုက်မဆယ်ဘူး”ဟု ဦးလှအောင်က ပြော သည်။

ဖျာပုံခရိုင်အတွင်းရှိ နောက်မီး၊ ဖန်ဒါပင်၊ ခါးပြတ်၊ ချောင်းဝ၊ ရွှေလှေညှင်း၊ဘုန်းကြီးတောင်၊ ကြုံကန်၊ မြစ်တန်းစသော ကျေးရွာများမှ ရေလုပ်သားများသည် ပင်လယ်ပြင်တွင် ကျားဖောင်လိုက်ပြီး ၀မ်းစာရှာနေသူများဖြစ်သည်။

ယင်းရေလုပ်သားများသည် ပင်လယ်ပြင်တွင် ဒုက္ခကြုံတွေ့စဉ် စာရင်းဒိုင်များ ကယ်ဆယ် မှုမရှိခြင်း၊ လုပ်ခလစာများကို အပြည့် အ၀မပေးခြင်းနှင့် ခေါင်းပုံဖြတ် ခြိမ်းခြောက်ခြင်း တို့ကြောင့် ကျားဖောင်လိုက်ရသည့် အလုပ်ကို စိတ်ပျက်နေကြောင်း သိရသည်။

ထိုကဲ့သို့ ပင်လယ်ပြင်အတွင်း ကြုံတွေ့ခဲ့သောအဖြစ်ဆိုးကြောင့် ရေလုပ်သားများအနေဖြင့် ယင်းလုပ်ငန်းအပေါ် စိတ်ကုန်သွားခြင်း၊ ကျားဖောင်လုပ်ငန်းပိုင်ရှင်များ၏ ခေါင်းပုံဖြတ် မှုများကြောင့် လာမည့် ငါးဖမ်းရာသီတွင် လုပ်သားရှားပါးမှုနှင့်ကြုံတွေ့ လာနိုင်ကြောင်း ဒေသခံများက ပြောဆိုကြသည်။

ကျားဖောင်များအသုံးပြု၍ ငါးဖမ်းလုပ်ကိုင်ခြင်းကို စက်တင်ဘာလမှ ဧပြီလအတွင်း လုပ်ကိုင်ကြပြီး ကျားဖောင်လုပ်ငန်းရှင် တဦးလျှင် ကျားဖောင် ၁၀ဖောင်အနည်းဆုံး လုပ်ကိုင်ကြပြီး ဖျာပုံဒေသတွင် လုပ်ငန်းရှင် ၁၀၀ နီးပါးရှိကြောင်းသိရသည်။

၂၀၁၁ မတ်လတတိယပတ်အတွင်းဖြစ်ပွားခဲ့သော လေပြင်းကြောင့် ကျားဖောင်စုစုပေါင်း ၃၅၉၉ဖောင်ပျက်စီးဆုံးရှုံးခဲ့ပြီး ရေလုပ်သား ၁၆၂၆၈ဦး ပင်လယ်ပြင်အတွင်းမျောပါကာ ၅၈၀ ပျောက်ဆုံးနေဆဲဖြစ်ကြောင်း မြန်မာနိုင်ငံငါးလုပ်ငန်းအဖွဲ့ချုပ်မှ တရားဝင်သတင်း ထုတ်ပြန်ထားသည်။

ကျားဖောင်များဖြင့် ငါးဖမ်းဆီးခြင်းမှရရှိသော ရေထွက်ပစ္စည်းများမှာ ပုစွန်ခြောက်၊ အာပြဲခြောက်၊ ကြက်စာငါးခြောက်၊ ပင်လယ်ငါးပိ စသည်တို့ ဖြစ်ကြောင်း သိရသည်။

၂၀၀၈ ခု မေလ ၂ ရက်နှင့် ၃ ရက်တွင် ရန်ကုန်တိုင်းနှင့် ဧရာဝတီ မြစ်ဝကျွန်းပေါ် ဒေသများကို တိုက်ခတ်ခဲ့သည့် နာဂစ် ဆိုင်ကလုန်း မုန်တိုင်းကြောင့် ဧရာဝတီ တိုင်း အတွင်း အိုးမဲ့အိမ်မဲ့ ၈ သိန်း ကျော်ရှိပြီး လူပေါင်း သန်းချီ၍ ဘေးဒုက္ခ ကြုံတွေ့ရ ကြောင်း သုတေသန အစီရင်ခံစာများအရ သိရသည်။

ကမ္ဘာ့ကုလသမဂ္ဂက ယင်း နာဂစ် မုန်တိုင်းကြောင့် သေကြေပျောက်ဆုံးသူပေါင်း ၁သိန်း ၄ သောင်း ခန့်ရှိမည်ဟု ခန့်မှန်းထားသည်။

နာဂစ်မုန်တိုင်း တိုက်ခတ်မှု ၃ နှစ်ပြည့်သည့် ယနေ့အချိန်အထိ ဧရာဝတီတိုင်း နာဂစ် ဒဏ်သင့် ဒေသများ ပြန်လည် ထူထောင်ရေး ပြုလုပ်နေရဆဲဖြစ်သည်။

Ref;Irrawaddy